လၢစီၤမိၤၡ့အတၢ်သိၣ်တၢ်သီအပူၤန့ၣ် ပှၤမၤတၢ်အၢၣ်လီၤအီလီၤ သ့ဝဲတနီၤလီၤ. အဒိ, ပှၤမၤတၢ်အၢၣ်လီၤအီလီၤ တနီၤသူဝဲတၢ်ကတိၤ လၢအမ့ၢ် “ယအၢၣ်လီၤလၢ ယွၤအမဲာ်ညါ” မ့တမ့ၢ် “ယအၢၣ်လီၤလၢ ယဟိဝၤယွၤ အမံၤ” လီၤ. ဘၣ်ဆၣ် လၢယ့ၣ်ၡူးအစိၤန့ၣ် တၢ်အၢၣ်လီၤအီလီၤန့ၣ် ကဲထီၣ်ဝဲလုၢ်လၢ်တခါ ဒီးအဝဲသ့ၣ် မၤတၢ်အၢၣ်လီၤအီလီၤလၢ တၢ်ဂ့ၢ်ကိးမံၤဒဲးဃၣ်ဃၣ်န့ၣ်လီၤ. အဝဲသ့ၣ်မၤဝဲတၢ်အၢၣ်လီၤအီလီၤ ဒ်သိးပှၤကနာ်အီၤအဂီၢ်လီၤ. ဘၣ်ဆၣ် ယ့ၣ်ၡူးသိၣ်ဝဲပှၤလၢအမၤ တၢ်အၢၣ်လီၤအီလီၤလၢ အတကြၢးတဘၣ်တဖၣ်အံၤ ခံဘျီလီၤ. ယ့ၣ်ၡူးသိၣ်လိဝဲလၢ– “မ်သုကတိၤတၢ်လၢအမ့ၢ်, အမ့ၢ်, တမ့ၢ်ဘၣ်, တမ့ၢ်ဘၣ်, န့ၣ်တက့ၢ်.”—မးသဲ ၅:၃၃-၃၇; ၂၃:၁၆-၂၂.

လံာ်လၢအမ့ၢ် Theological Dictionary of the New Testament ပာ်ဖျါထီၣ်ဝဲလၢ ပှၤယူဒၤဖိတဖၣ် မၤဝဲတၢ်အၢၣ်လီၤအီလီၤအါတလၢ ဒီးစံးဝဲလၢအတၢ်ကတိၤန့ၣ် မ့ၢ်ဝဲတီဝဲအဂ့ၢ်န့ၣ် ပထံၣ်ဘၣ်အီၤလၢ ပှၤယူဒၤဖိအလံာ် တၢ်သိၣ်တၢ်သီလၢပျၢၤအပူၤသ့ဝဲလီၤ. တကးဒံးဘၣ် ပာ်ဖျါထီၣ်စ့ၢ်ကီးဝဲ တၢ်အၢၣ်လီၤအီလီၤလၢ ပှၤမၤဟးဂီၤအီၤသ့ ဒီးပှၤမၤဟးဂီၤအီၤတသ့ အဂ့ၢ်လီၤ.

ပှၤလၢအထီဒါ ပှၤမၤတၢ်အၢၣ်လီၤအီလီၤလၢ အတကြၢးတဘၣ်တဖၣ်န့ၣ် တမ့ၢ်ထဲယ့ၣ်ၡူးတဂၤဧိၤဘၣ်. အဒိ, ပှၤယူဒၤဖိ လၢအမၤလိတၢ်စံၣ်စိၤတဲစိၤလၢအမ့ၢ် ကၠိစံဖး န့ၣ်တဲဝဲဘၣ်ဃးဒီး ပှၤယူဒၤဖိတဒူၣ်အဂ့ၢ်ဒ်အံၤလီၤ. အဝဲသ့ၣ်နာ်ဝဲလၢ ပှၤမၤတၢ်အၢၣ်လီၤအီလီၤန့ၣ် အၢဝဲဒိၣ်န့ၢ်ဒံး ပှၤလံၣ်တၢ်လီတၢ်လီၤ. အဝဲသ့ၣ်ထံၣ်ဝဲလၢ ပှၤတဂၤမၤဝဲ တၢ်အၢၣ်လီၤအီလီၤ ဒ်သိးပှၤကနာ်အီၤအဂီၢ်အဃိ ပှၤတဂၤအံၤကဘၣ်မ့ၢ် ပှၤလီတၢ်လီၤ. ပှၤယူဒၤဖိအလံာ်လၢအမ့ၢ် Sirach, မ့တမ့ၢ် Ecclesiasticus (၂၃:၁၁) တဲဝဲလၢ– “ပှၤလၢအမၤ တၢ်အၢၣ်လီၤအီလီၤတဂၤန့ၣ် မ့ၢ်ပှၤလၢတဒိကနၣ် တၢ်သိၣ်တၢ်သီဘၣ်န့ၣ်လီၤ.” လၢတၢ်န့ၣ်အဃိ ယ့ၣ်ၡူးသိၣ်ဝဲပှၤလၢ အမၤတၢ်အၢၣ်လီၤအီလီၤလၢ အတကြၢးတဘၣ်တဖၣ်န့ၣ်လီၤ. ပမ့ၢ်တဲတၢ်မ့ၢ်တၢ်တီထီဘိန့ၣ် တလိၣ်လၢပမၤတၢ်အၢၣ်လီၤအီလီၤ ဒ်သိးပှၤကနာ်ပှၤအဂီၢ်ဘၣ်.