မ့ၢ်​န​ဆိကမိၣ်​ဒ်လဲၣ်. မ့ၢ်​န​ဆိကမိၣ်​လၢ ကစၢ်​ယွၤ​ဆီၣ်ထွဲ​တၢ်ဒုး​တၢ်ယၤ​ဒံး​ဧါ. တၢ်ဒုး​တၢ်ယၤ မ့ၢ်​ကဲထီၣ်​န့ၣ် မ့ၢ်​ကစၢ်​ယွၤ ကအိၣ်​ဃူဝဲ ဖဲလဲၣ်​တဖု​လဲၣ်. န​မ့ၢ်​ဃု​သ့ၣ်ညါ တၢ်​သံကွၢ်​တဖၣ်​အံၤ​အ​တၢ်​စံးဆၢ​န့ၣ် ဘၣ်​သ့ၣ်​သ့ၣ် န​တၢ်ထံၣ်​လၢ​အ​ဘၣ်ဃး​ဒီး တၢ်ဒုး​တၢ်ယၤ​အဂ့ၢ်​န့ၣ် ဆီတလဲ​အသး​သ့ဝဲ​လီၤ. အဒိ န​မ့ၢ်​သ့ၣ်ညါ လၢ ကစၢ်​ယွၤ​ဘၣ်သူၣ်​ဘၣ်သး​ဝဲ တၢ်ဒုး​တၢ်ယၤ ဒီး​ဆီၣ်ထွဲ​ဝဲ​ပှၤ​တဖု​လၢ န​ဆီၣ်ထွဲ​အီၤ​န့ၣ် န​က​ဆိကမိၣ်​လၢ န​ကြၢး​ဆီၣ်ထွဲ​ဒံး​ပှၤ​တဖု​အံၤ​လီၤ. ဒီး​န​က​နာ်​သပှၢ်​ကတၢၢ်​လၢ အဝဲသ့ၣ်​က​မၤနၢၤ​တၢ်ဒုး​န့ၣ်​လီၤ. ဘၣ်ဆၣ် န​မ့ၢ်​သ့ၣ်ညါ​လၢ ကစၢ်​ယွၤ​ဆီၣ်ထွဲ​ဝဲ​လၢ န​ဒုၣ်​န​ဒါ​န့ၣ် န​က​တူၢ်ဘၣ်​ဒ်လဲၣ်. ဘၣ်​သ့ၣ်​သ့ၣ် န​တ​အဲၣ်ဒိး​ဆီၣ်ထွဲ​မၤစၢၤ အဝဲ​တဖု​လၢၤဘၣ်.

ဘၣ်ဆၣ် တၢ်​လၢ​အရ့ဒိၣ်​န့ၢ်​တၢ်ဂ့ၢ်​အံၤ အိၣ်ဝဲ​လီၤ. န​မ့ၢ်​သ့ၣ်ညါ​ထီၣ်​လၢ ကစၢ်​ယွၤ​အ​တၢ်ထံၣ် ဘၣ်ဃး​ဒီး​တၢ်ဒုး​မ့ၢ်​တၢ်​ဒ်လဲၣ်​ဒ်လဲၣ်​န့ၣ် န​တၢ်ထံၣ်​ဘၣ်ဃး​ဒီး ကစၢ်​ယွၤ​န့ၣ် က​ဆီတလဲ​အသး​လီၤ. န​မ့မ့ၢ်​ဘၣ်ဖုး ပှၤ​တဂၤ​လၢ အ​တူၢ်ဘၣ်​တၢ်နး​တၢ်ဖှီၣ် ခီဖျိ​လၢ​တၢ်ဒုး​တၢ်ယၤ​အဃိ​န့ၣ် န​က​အဲၣ်ဒိး​သ့ၣ်ညါ တၢ်​သံကွၢ်​အံၤ အ​တၢ်​စံးဆၢ​လီၤ– ဒ်​ပှၤ​တနီၤနီၤ​နာ်ဝဲ​အသိး ကစၢ်​ယွၤ​မ့ၢ်​ပှၤလၢ​အ​အဲၣ်တၢ်​ဒုးတၢ်​ယၤ ဒီး​ပျဲဝဲ မ့တမ့ၢ် ဆီၣ်ထွဲ​ဝဲ​တၢ်ဒုး​တၢ်ယၤ ဒ်သိး​ပှၤ​က​တူၢ်ဘၣ်​တၢ်နး​တၢ်ဖှီၣ်​န့ၣ်​ဧါ. မ့တမ့ၢ် ကစၢ်​ယွၤ​န့ၣ် မ့ၢ်​ပှၤလၢ​အ​တ​သူၣ်အိၣ်​သးအိၣ်​တၢ် ဒီး​တ​ဘၣ်ယိၣ်​ဘၣ်ဘှီ​တၢ်​လၢ ပှၤလၢ​အ​တူၢ်ဘၣ်​တၢ်နး​တၢ်ဖှီၣ် ခီဖျိ​လၢ​တၢ်ဒုး​တၢ်ယၤ​အဃိ​ဘၣ်​ဧါ.

လံာ်စီဆှံ​အ​တၢ်​စံးဆၢ​ဒီး ပှၤ​ဟီၣ်ခိၣ်​ဖိ အ​တၢ်ထံၣ်​သ့ၣ်​တဖၣ်​အံၤ လီၤဆီ​လိာ်အသး​ထဲလဲၣ်​န့ၣ် န​က​ကမၢ​ကမၣ်​လီၤ. လၢညါ​ဒီး​တုၤလၢ​မုၢ်မဆါ​တနံၤ​အံၤ ယွၤ​အ​တၢ်ထံၣ်​လၢ​အ​ဘၣ်ဃး​ဒီး တၢ်ဒုး​တၢ်ယၤ​န့ၣ်​တဆီ​တ​လဲ​ဝဲ​နီတဘျီ​ဘၣ်. ခဲအံၤ​ပ​က​တဲသကိး ကစၢ်​ယွၤ​အ​တၢ်ထံၣ်​ဘၣ်ဃး​ဒီး တၢ်ဒုး​တၢ်ယၤ​လၢ​စိၤ​လၢပျၢၤ ဒီး​လၢ​တၢ​ယၤဖှိၣ်​အ​စိၤ ဖဲ​ယ့ၣ်ၡူး​အိၣ်မူ​လၢ​ဟီၣ်ခိၣ်​ချၢ​အဆၢ​ကတီၢ်​န့ၣ်​လီၤ. တၢ်အံၤ​က​မၤစၢၤ​ပှၤ ဒ်သိး​ပ​က​သ့ၣ်ညါ​ဘၣ်​လၢ တၢ်ဒုး​တၢ်ယၤ​လၢ​မုၢ်မဆါ​တနံၤ​အံၤန့ၣ် မ့ၢ်​ကစၢ်​ယွၤ​ထံၣ်ဝဲ​ဒ်လဲၣ်. တကးဒံးဘၣ် က​မၤစၢၤ​စ့ၢ်ကီး​ပှၤ​ဒ်သိး ပ​က​သ့ၣ်ညါ​ဘၣ်​လၢ ခါဆူညါ​န့ၣ် မ့ၢ်​တၢ်ဒုး​တၢ်ယၤ​ကအိၣ်​ဒံး​ဧါ.