ကတိၤဒိ ၂:၁-၂၂
၂ ဖိခွါဧၢ, နမ့ၢ်တူၢ်လိာ် တၢ်လၢ ယတဲတဖၣ်ဒီးပာ်ဖှိၣ်ဃာ် ယတၢ်မၤလိာ်တဖၣ် ဒ်တၢ်လုၢ်ဒိၣ်ပှ့ၤဒိၣ်အသိး,+
၂ ဒိးနနၢ်လၢ တၢ်ကူၣ်သ့,+သးလီ တၢ်သ့ပဲာ်ထံနီၤဖးတၢ်,+
၃ တကးဒံးဘၣ် နမ့ၢ်ကိးထီၣ် ဒ်သိးနကဃ့ တၢ်နၢ်ပၢၢ်+ဒီးကိးပသူထီၣ် ဒ်သိးနကန့ၢ်ဘၣ် တၢ်သ့ပဲာ်ထံနီၤဖးတၢ်,+
၄ ဒီးနမ့ၢ်ဆဲးဃုအီၤ ဒ်သိးဒီး စ့ညၣ်+ဒီးဆဲးဃုအီၤ ဒ်သိးဒီး တၢ်လုၢ်ဒိၣ်ပှ့ၤဒိၣ်လၢ အအိၣ်ခူသူၣ်န့ၣ်+
၅ နကနၢ်ပၢၢ် တၢ်ပျံၤ ယဟိဝၤယွၤ+ဒီးနကထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤလီၤ.+
၆ ယဟိဝၤယွၤ အနီၢ်ကစၢ် ဟ့ၣ်လီၤဝဲ တၢ်ကူၣ်သ့လီၤ.+
တၢ်သ့ၣ်ညါ ဒီးတၢ်သ့ပဲာ်ထံနီၤဖးတၢ် ဟဲထီၣ်လၢ အထးခိၣ်လီၤ.
၇ ကစၢ်ယွၤ ပာ်ဖှိၣ်ဃာ် တၢ်ကူၣ်သ့လၢ ပှၤလၢ အသူၣ်ဘျၢသးဘျၢအဂီၢ်ဒီးအဝဲမ့ၢ်ဝဲ ကတီၤတဘ့ၣ်လၢ ပှၤလၢ အလဲၤတၢ်လၢ တၢ်သးတီ အပူၤအဂီၢ်လီၤ.+
၈ ကစၢ်ယွၤ ကွၢ်ထွဲဝဲ ပှၤတီပှၤလိၤဒီးအဝဲ ကဒီသဒၢဝဲ ပှၤလၢ အသးတီဒီးအီၤတဖၣ်လီၤ.+
၉ နမ့ၢ်မၤ တၢ်သ့ၣ်တဖၣ်န့ၣ် နကနၢ်ပၢၢ် တၢ်လၢအတီအလိၤ, တၢ်စံၣ်ညီၣ်တီ ဒီးတၢ်လၢအကြၢးဝဲဘၣ်ဝဲလၢအမ့ၢ် ကျဲလၢအဂ့ၤလီၤ.+
၁၀ တၢ်ကူၣ်သ့ မ့ၢ်ဟဲနုာ်လီၤလၢ နသးပူၤ+ဒီးနမ့ၢ်ဘၣ်သူၣ်ဘၣ်သး တၢ်သ့ၣ်ညါန့ၣ်+
၁၁ တၢ်သ့ဆိကမိၣ် ပဲာ်ထံနီၤဖးတၢ် ကကွၢ်ထွဲနၤ+ဒီးတၢ်သူၣ်ဆးသးဆး ကဒီသဒၢနၤလီၤ.
၁၂ ဒီးတၢ်သ့ၣ်တဖၣ်န့ၣ် ကမၤပူၤဖျဲးနၤလၢ ကျဲလၢအတဂ့ၤဘၣ်,ပှၤလၢ အတဲတၢ် တတီတလိၤဘၣ်,+
၁၃ ပှၤလၢ အပာ်တ့ၢ်ကွံာ် ကျဲတီကျဲလိၤဒ်သိး ကလဲၤတၢ်လၢ တၢ်ခံးသူအကျဲ,+
၁၄ ပှၤလၢ အမၤကမၣ်တၢ်မုာ်မးတဖၣ်,ပှၤလၢ အဘၣ်သူၣ်ဘၣ်သး တၢ်အၢတၢ်သီတဖၣ်,
၁၅ ပှၤလၢ အလဲၤကျဲလၢအက့ၣ်ဒီးပှၤလၢ အတအိၣ်မူ တီတီလိၤလိၤဘၣ်တဖၣ် အကျဲလီၤ.
၁၆ ဒီးတၢ်ကူၣ်သ့ ကမၤပူၤဖျဲးနၤလၢ ပိာ်မုၣ်ဟးဂီၤဒီးပိာ်မုၣ်လၢ အသကဲာ်ပဝးတဂ့ၤဘၣ်တဂၤ အတၢ်ကတိၤ ကွဲန့ၢ်လွဲန့ၢ်တၢ်လီၤ.+
၁၇ ပိာ်မုၣ်တဂၤန့ၣ် ပာ်တ့ၢ်ကွံာ် အသးသမူတံၤသကိး* လၢအဟံးဝဲ ဖဲအသးစၢ်အခါ+ဒီးသးပ့ၤနီၣ်ကွံာ် အကစၢ်ယွၤ အတၢ်အၢၣ်လီၤအီလီၤလီၤ.
၁၈ ပှၤမ့ၢ်လဲၤလၢ ပိာ်မုၣ်တဂၤန့ၣ် အဟံၣ်န့ၣ် လီၤဂာ်လၢ အဝဲသ့ၣ်ပိာ်ဝဲ တၢ်သံအကျဲဒီးကျဲလၢ အလဲၤလၢ ပိာ်မုၣ်တဂၤန့ၣ် အဟံၣ်န့ၣ် ဆှၢအဝဲသ့ၣ်လၢ တၢ်သွၣ်ခိၣ်လီၤ.+
၁၉ ပှၤလၢအမံဃုာ်ဒီးအီၤန့ၣ် တဟဲက့ၤ နီတဂၤလၢၤဘၣ်.
ဒီးအဝဲသ့ၣ် တဟဲက့ၤကဒါက့ၤလၢ တၢ်မူအကျဲတဖၣ်လၢၤဘၣ်.+
၂၀ အဃိ မၤထွဲ ပှၤလၢအမၤတၢ်ဂ့ၤတဖၣ် အကျဲဒီးဆဲးအိၣ်လၢ ပှၤတီပှၤလိၤ အကျဲတဖၣ်,+
၂၁ မ့ၢ်လၢ ထဲဒၣ် ပှၤလၢအသူၣ်ဘျၢသးဘျၢန့ၣ် ကအိၣ်ဘၣ်လၢ ဟီၣ်ခိၣ်ချၢဒီးပှၤလၢ တၢ်ပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်တဖၣ်န့ၣ် ကအိၣ်ဘၣ်လၢ ဟီၣ်ခိၣ်ချၢလီၤ.+
၂၂ မ့မ့ၢ် ပှၤအၢပှၤသီန့ၣ် ကလီၤမၢ်ကွံာ်ဝဲလၢ ဟီၣ်ခိၣ်ချၢ+ဒီးပှၤလၢ အသးတတီဘၣ်တဖၣ်န့ၣ် ကဘၣ်တၢ်ထုးထီၣ်ကွံာ်အီၤလၢ ဟီၣ်ခိၣ်ချၢလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “သကိးဘူးဘူးတံၢ်တံၢ်.”
