ကလၤတံ ၄:၁-၃၁
၄ ယတဲလၢ တၢ်ခဲလၢာ်မ့ၢ်ဝဲ ပှၤန့ၢ်သါဘၣ်တၢ်တဂၤန့ၣ် အတၢ်လီၤ. ဘၣ်ဆၣ် ဖဲအဝဲမ့ၢ်ဒံး ဖိသၣ်တဂၤ အဆၢကတီၢ်န့ၣ် အဝဲတလီၤဆီဒီး ကုၢ်တဂၤဘၣ်.
၂ ဒီးတချုးမုၢ်နံၤလၢ အပၢ်ပာ်ပနီၣ်ဝဲ တုၤဒံးဘၣ်အခါ အဝဲအိၣ်လၢ ပှၤပၢတၢ် ဒီးပှၤကွၢ်ထွဲတၢ်တဖၣ် အဖီလာ်လီၤ.
၃ ဒ်န့ၣ်အသိး ပဝဲစ့ၢ်ကီး ဖဲပမ့ၢ်ဒံး ဖိသၣ်အဆၢကတီၢ်န့ၣ် ပကဲတၢ်အခီၣ်ထံးခီၣ်ဘိတဖၣ်လၢ အဘၣ်ဃးဒီး ဟီၣ်ခိၣ်အံၤ အကုၢ်လီၤ.+
၄ ဘၣ်ဆၣ် ဖဲတၢ်ဆၢကတီၢ် လၢအဘၣ်တၢ်ပာ်ပနီၣ်အီၤ တုၤဃီၤဝဲအခါ ကစၢ်ယွၤဆှၢလီၤအဖိခွါ လၢအဟဲအိၣ်ဖျဲၣ်ထီၣ်ခီဖျိ ပှၤပိာ်မုၣ်တဂၤ+ ဒီးအအိၣ်ဝဲလၢ တၢ်သိၣ်တၢ်သီအဖီလာ်လီၤ.+
၅ ဒီးအဝဲဟ့ၣ်လီၤ တၢ်အပှ့ၤလၢ ကမၤထူၣ်ဖျဲးထီၣ်ကွံာ် ပှၤလၢအအိၣ်လၢ တၢ်သိၣ်တၢ်သီအဖီလာ်+ ဒ်သိးကစၢ်ယွၤ ကလုၢ်ဖိပှၤဒ် ဖိခွါတဖၣ်အသိးလီၤ.+
၆ ခဲအံၤန့ၣ် ခီဖျိလၢ သုမ့ၢ်ဖိခွါတဖၣ်အဃိ သးစီဆှံလၢ+ ကစၢ်ယွၤ ဟ့ၣ်လီၤတ့ၢ်အဖိခွါန့ၣ် ကစၢ်ယွၤဆှၢလီၤဝဲဆူ ပသးကံၢ်ပူၤ+ ဒီးသးစီဆှံအံၤကိးထီၣ်ဝဲလၢ “အးဘၤ* ပၢ်ဧၢ” လီၤ.+
၇ အဃိ နတမ့ၢ်ကုၢ်တဂၤလၢၤဘၣ်, နမ့ၢ်ဖိခွါတဂၤလီၤ. ဒီးနမ့မ့ၢ်ဖိခွါတဂၤန့ၣ် နမ့ၢ်စ့ၢ်ကီး ပှၤန့ၢ်သါဘၣ်တၢ်လၢ ကစၢ်ယွၤအအိၣ်လီၤ.+
၈ ဘၣ်ဆၣ် ဖဲသုတသ့ၣ်ညါ ကစၢ်ယွၤဒံးဘၣ်အခါ သုကဲယွၤလၢ အကမၣ်တဖၣ် အကုၢ်လီၤ.
၉ မ့မ့ၢ်ခဲအံၤန့ၣ် သုသ့ၣ်ညါထီၣ် ကစၢ်ယွၤ ဒီးပမ့ၢ်တဲလၢအဂၤတမံၤန့ၣ် သုတဲသ့လၢ ကစၢ်ယွၤသ့ၣ်ညါထီၣ်သုလံ. ဘၣ်ဆၣ် ဘၣ်မနုၤအဃိ သုဃၣ်ကဒါက့ၤသုသးလၢ တၢ်အခီၣ်ထံးခီၣ်ဘိ လၢအဂံၢ်စၢ်ဘါစၢ်+ ဒီးအဘျုးတအိၣ်ဘၣ် တဖၣ်အအိၣ် ဒီးသုအဲၣ်ဒိးကဲထီၣ်ကဒါက့ၤ ကုၢ်လၢအဖီလာ် လၢအသီတဘျီကဒီးလဲၣ်.+
၁၀ သုမၤထွဲ မုၢ်နံၤတဖၣ်, လါတဖၣ်,+ တၢ်အကတီၢ်တဖၣ် ဒီးနံၣ်တဖၣ် လီၤတံၢ်လီၤဆဲးလီၤ.
၁၁ ယတၢ်ဂုာ်ကျဲးစၢး လၢသုဂီၢ်ခဲလၢာ်န့ၣ် ယဘၣ်ယိၣ်လၢ အကကဲထီၣ် တၢ်ကလီကလီလီၤ.
၁၂ ဒီပုၢ်ဝဲၢ်သ့ၣ်ဧၢ, ယမ့ၢ်တ့ၢ်ပှၤဒ်သိးဒီးသုလီၤ. အဃိ ယဃ့ကညးသုလၢ ဆီတလဲက့ၤသုသး ဒ်ယၤအသိးတက့ၢ်.+ သုတမၤကမၣ်ယၤ နီတမံၤဘၣ်.
၁၃ ဘၣ်ဆၣ် သုသ့ၣ်ညါလၢ ခီဖျိလၢ ယအိၣ်ဒီးတၢ်ဆူးတၢ်ဆါအဃိ ယဒိးန့ၢ်ဘၣ် တၢ်ခွဲးတၢ်ယာ်လၢ ယကစံၣ်တဲၤတဲလီၤသု တၢ်သးခုကစီၣ် အဆိကတၢၢ်တဘျီလီၤ.
၁၄ ဒီးယတၢ်ဆူးတၢ်ဆါန့ၣ် ကဲထီၣ်တၢ်မၤကွၢ်တခါလၢသုဂီၢ် ဘၣ်ဆၣ် သုတသးဟ့ယၤဘၣ် ဒီးသုတသးဘၣ်အၢယၤဘၣ်. သုတူၢ်လိာ်ယၤဒ်သိးဒီး ကစၢ်ယွၤ အမူခိၣ်ကလူးတဂၤ မ့တမ့ၢ် ဒ်ယ့ၣ်ၡူးခရံာ် အသိးလီၤ.
၁၅ တၢ်သးခု လၢအအိၣ်ဒီးသု လၢညါန့ၣ် လဲၤအိၣ်က့ၤဖဲလဲၣ်. ယသ့ၣ်ညါ သပှၢ်တၢၢ်လၢ လၢညါန့ၣ် သုမ့ၢ်ဘၣ်ခွဲးထုးထီၣ် သုမဲာ်ချံ ဒီးဟ့ၣ်လီၤယၤဒၣ်လဲာ် သုကမၤလီၤ.+
၁၆ ဘၣ်ဆၣ် မ့ၢ်လၢ ယတဲသု တၢ်မ့ၢ်တၢ်တီအဃိ မ့ၢ်ယကဲထီၣ် သုဒုၣ်သုဒါလံဧါ.
၁၇ ပှၤတနီၤ ဂုာ်ကျဲးစၢးဆူၣ်ဆူၣ် ဒ်သိးကထုးန့ၢ်သုသး ဘၣ်ဆၣ် အဝဲသ့ၣ်အတၢ်ပညိၣ်န့ၣ် တဂ့ၤဘၣ်. အဝဲသ့ၣ်န့ၣ် အဲၣ်ဒိးမၤလီၤဖးယၤဒီးသု ဒ်သိးသုသးကဆူၣ်လၢ သုကပိာ် အဝဲသ့ၣ်အခံ အဂီၢ်လီၤ.
၁၈ ဘၣ်ဆၣ် ပှၤတဂၤဂၤ အတၢ်ပညိၣ်မ့ၢ်ဂ့ၤဝဲဒီး အဝဲမ့ၢ်ဂုာ်ကျဲးစၢးဆူၣ်ဆူၣ် ဒ်သိးကထုးန့ၢ်သုသးအဂီၢ်န့ၣ် ဂ့ၤဝဲလၢသုဂီၢ်လီၤ. ဒီးပှၤမ့ၢ်မၤဒ်န့ၣ် ကိးဆၢကတီၢ်ဒဲး ဒီးတမ့ၢ်ထဲလၢ ဖဲယအိၣ်ဒီးသု အဆၢကတီၢ်ဘၣ်န့ၣ် ဂ့ၤဝဲစ့ၢ်ကီးလီၤ.
၁၉ ယဖိဆံးသ့ၣ်ဧၢ,+ ဒ်မိၢ်တဂၤလၢ အကအိၣ်ဖျဲၣ်ထီၣ်အဖိ တူၢ်ဘၣ်ဝဲအဟုးဆါအသိး ယတူၢ်ဘၣ်တၢ်ဆါဒ်န့ၣ် လၢသုဃိလီၤ. ဒီးယကတူၢ်ဘၣ်တၢ်ဒ်န့ၣ် တုၤလၢ သုပာ်ဖျါထီၣ် ခရံာ်အတၢ်ပာ်သူၣ်ပာ်သးလီၤ.*
၂၀ ယခိၣ်နူာ်ဘံဘူ လၢသုဃိလီၤ. လၢတၢ်န့ၣ်အဃိ ယမုၢ်လၢ်လၢ ယကအိၣ်ဘၣ်ဒီးသုခဲအံၤ ဒီးယတလိၣ်တဲတၢ်ဒီးသု ဒ်အံၤဘၣ်.
၂၁ သုဝဲလၢ အအဲၣ်ဒိးအိၣ်လၢ တၢ်သိၣ်တၢ်သီအဖီလာ်သ့ၣ်ဧၢ, တဲယၤတထံၣ်. စီၤမိၤၡ့ အတၢ်သိၣ်တၢ်သီ တဲဝဲဒ်လဲၣ်န့ၣ် သုတသ့ၣ်ညါဧီၤ.
၂၂ အဒိ တၢ်ကွဲးအသးအိၣ်ဝဲလၢ စီၤအၤဘြၤဟၣ်န့ၣ် အဖိခွါအိၣ်ဝဲခံဂၤလီၤ. တဂၤန့ၣ် အန့ၢ်ဘၣ်ဝဲလၢ ကုၢ်မုၣ်အအိၣ်+ မ့မ့ၢ်အဝဲတဂၤန့ၣ် အန့ၢ်ဘၣ်ဝဲလၢ ပိာ်မုၣ်လၢ အအိၣ်ဒီးတၢ်သဘျ့တဂၤန့ၣ် အအိၣ်လီၤ.+
၂၃ ကုၢ်မုၣ် အဖိခွါတဂၤန့ၣ် အိၣ်ဖျဲၣ်ထီၣ်ဒ် ပှၤဟီၣ်ခိၣ်ဖိ အိၣ်ဖျဲၣ်ညီနုၢ်အသိး*+ မ့မ့ၢ် ပိာ်မုၣ်လၢ အအိၣ်ဒီးတၢ်သဘျ့ အဖိခွါတဂၤန့ၣ် အိၣ်ဖျဲၣ်ထီၣ် ခီဖျိလၢ တၢ်စံးပာ်အဃိလီၤ.+
၂၄ တၢ်မၤအသးတဖၣ်အံၤ အိၣ်ဒီးအခီပညီလၢ အဂၤတမံၤဒံးလီၤ. ပိာ်မုၣ်ခံဂၤအံၤ အခီပညီမ့ၢ်ဝဲ တၢ်အၢၣ်လီၤအီလီၤ ခံခါလီၤ. တၢ်အၢၣ်လီၤအီလီၤတခါ ဘၣ်တၢ်မၤအီၤလၢ ကစၢၢ်စံၤနါလီၤ.+ ပှၤလၢအအိၣ်လၢ တၢ်အၢၣ်လီၤအီလီၤတခါအံၤ အဖီလာ်န့ၣ် ကဲကုၢ်ခဲလၢာ်လီၤ. ဒီးတၢ်အၢၣ်လီၤအီလီၤတခါအံၤ လီၤဂာ်ဒ်သိးဒီး နီၢ်ဟၤကၢ်လီၤ.
၂၅ နီၢ်ဟၤကၢ်န့ၣ် အခီပညီမ့ၢ်ဝဲ ကစၢၢ်စံၤနါ+ လၢအအိၣ်လၢ ကီၢ်ဧ့ရ့းအပူၤလီၤ. ဒီးအဝဲ ဘၣ်တၢ်ဒိလီၤအီၤလၢ ဝ့ၢ်ယရူၤၡလ့ၣ်လၢ မုၢ်မဆါတနံၤအံၤ, မ့ၢ်လၢ အကဲကုၢ်ဃုာ်ဒီး အဖိတဖၣ်အဃိလီၤ.
၂၆ မ့မ့ၢ် ပိာ်မုၣ်အဝဲတဂၤန့ၣ် ဘၣ်တၢ်ဒိလီၤအီၤလၢ ဝ့ၢ်ယရူၤၡလ့ၣ်လၢထးလၢ အအိၣ်ဒီးတၢ်သဘျ့ဒီး မ့ၢ်ဝဲပမိၢ်လီၤ.
၂၇ တၢ်ကွဲးအသးအိၣ်ဝဲလၢ “ပိာ်မုၣ်တူာ်ဖိလၢ အတအိၣ်ဖျဲၣ်ထီၣ် အဖိဒံးဘၣ်တဂၤဧၢ, သူၣ်ဖှံသးညီတက့ၢ်. ပိာ်မုၣ်လၢအတတူၢ်ဘၣ် တၢ်ဟုးဆါ နီတဘျီဒံးဘၣ်တဂၤဧၢ, ကိးပသူထီၣ် လၢတၢ်သးခုအပူၤတက့ၢ်. ပိာ်မုၣ်လၢ အအိၣ်သယုၢ်တဂၤန့ၣ် အဖိကအိၣ်အါန့ၢ်ဒံး ပိာ်မုၣ်လၢအအိၣ်ဒီး အဝၤလီၤ.”+
၂၈ ဒီပုၢ်ဝဲၢ်သ့ၣ်ဧၢ, သုမ့ၢ်ဖိတဖၣ်လၢ အအိၣ်ဖျဲၣ်ထီၣ် ခီဖျိလၢ တၢ်စံးပာ်အဃိ ဒ်စီၤအံၤစဲးအသိးလီၤ.+
၂၉ ဖဲန့ၣ်အဆၢကတီၢ် ပှၤတဂၤလၢ အအိၣ်ဖျဲၣ်ထီၣ်ဒ် ပှၤဟီၣ်ခိၣ်ဖိ အိၣ်ဖျဲၣ်ညီနုၢ်အသိးန့ၣ် မၤအၢမၤနးဝဲ ပှၤတဂၤလၢ အအိၣ်ဖျဲၣ်ထီၣ် ခီဖျိသးစီဆှံလီၤ.+ ခဲအံၤ တၢ်မၤအသး ဒ်န့ၣ်စ့ၢ်ကီးလီၤ.+
၃၀ ဒ်လဲၣ်ဂ့ၤ ဒ်လဲၣ်ဂ့ၤ တၢ်ကွဲးအသးတဲဝဲဒ်လဲၣ်. တၢ်ကွဲးအသးတဲဝဲလၢ “နီဟးထီၣ်ကွံာ် ကုၢ်မုၣ်ဒီးအဖိခွါတက့ၢ်. ကုၢ်မုၣ်တဂၤအံၤ အဖိခွါန့ၣ် လ့ၤတက့ၤ တန့ၢ်သါဘၣ်တၢ်ဃုာ်ဒီး ပိာ်မုၣ်လၢ အအိၣ်ဒီး တၢ်သဘျ့တဂၤန့ၣ် အဖိခွါဘၣ်.”+
၃၁ အဃိ ဒီပုၢ်ဝဲၢ်သ့ၣ်ဧၢ, ပမ့ၢ်ပိာ်မုၣ်လၢ အအိၣ်ဒီး တၢ်သဘျ့တဂၤန့ၣ် အဖိတဖၣ်လီၤ. ပတမ့ၢ် ကုၢ်မုၣ် အဖိတဖၣ်ဘၣ်.
တၢ်ဂ့ၢ်အဘျဲၣ်တဖၣ်
^ တၢ်ကတိၤတဖျၢၣ်အံၤ မ့ၢ်ဝဲ ဧ့ၤဘြံၤ မ့တမ့ၢ် အရၣ်မ့း အတၢ်ကတိၤလၢ အခီပညီမ့ၢ်ဝဲ “အိ ပၢ်ဧၢ.”
^ မ့ၢ်စ့ၢ်ကီး “ဒိၣ်ထီၣ်ထီထီၣ် လၢသုပူၤ.”
^ အခီပညီလိၤလိၤ “အိၣ်ဖျဲၣ်ထီၣ်ဒ် တၢ်ဖံးတၢ်ညၣ်အသိး.”
