စံးထီၣ်ပတြၢၤ ၁၆:၁-၁၁
စီၤဒၤဝံး အမံၣ်ထဲၤ.*
၁၆ အိ ကစၢ်ယွၤဧၢ, ယဃုတၢ်အိၣ်တဒၢအလီၢ်လၢ နအိၣ်အဃိ ဒီသဒၢယၤတက့ၢ်.+
၂ ယတဲဘၣ် ယဟိဝၤယွၤလၢ “နမ့ၢ် ယဟိဝၤယွၤ လၢအမ့ၢ် ယတၢ်ဂ့ၤတၢ်ဝါ အဂံၢ်ခီၣ်ထံးလီၤ.
၃ ပှၤစီဆှံတဖၣ် လၢဟီၣ်ခိၣ်ချၢ လၢအမ့ၢ်ပှၤလၢအအိၣ်ဒီး တၢ်လၤကပီၤန့ၣ် မၤသးခုယသးဒိၣ်မး.”+
၄ ပှၤလၢအလူၤဘၣ် ယွၤအဂၤတဖၣ်အသးန့ၣ် မၤအါထီၣ် အနီၢ်ကစၢ် တၢ်သးအုးလီၤ.+
ယတလူလီၤ တၢ်သွံၣ်လၢ ယွၤတဖၣ်န့ၣ်အအိၣ် ဒ်တၢ်လုၢ်အသိး နီတဘျီဘၣ်ဒီးအဝဲသ့ၣ်အမံၤန့ၣ် တဟးထီၣ်လၢ ယကိာ်ပူၤဘၣ်.+
၅ ယဟိဝၤယွၤ ဟ့ၣ်ယၤတၢ်လၢ ယလိၣ်ဘၣ်ခဲလၢာ်,+ အဝဲမၤပှဲၤယခွး+ဒီးဒီသဒၢ ယတၢ်န့ၢ်သါလီၤ.
၆ တၢ်လီၢ်လၢ အမုာ်တဖၣ်န့ၣ် ဘၣ်တၢ်ထိၣ်န့ၢ် ဒွးန့ၢ်လၢယဂီၢ်လံ.
မ့ၢ်လီၤ, ယသးမံဒီး ယ တၢ်န့ၢ်သါလီၤ.+
၇ ယဟိဝၤယွၤ လၢအဟ့ၣ်ကူၣ်ယၤန့ၣ် ယကစံးထီၣ်ပတြၢၤအီၤလီၤ.+
လၢမုၢ်နၤခီ အဆၢကတီၢ်ဒၣ်လဲာ် ယတၢ်ဆိကမိၣ်လၢ အယိာ်န့ၣ်* ဘှီဘၣ်ထီၣ်ယၤလီၤ.+
၈ ယပာ် ယဟိဝၤယွၤလၢ ယမဲာ်ညါ ထီဘိလီၤ.+
အဝဲအိၣ်လၢ ယစုထွဲတခီအဃိ ယကဆၢထၢၣ် ဂၢၢ်ဂၢၢ်ကျၢၤကျၢၤ ထီဘိလီၤ.+
၉ အဃိ ယသးခု ဒီးယနီၢ်ခိ* ဒီတဂၤညါ သူၣ်ဖှံသးညီလီၤ.
ဒီးယအိၣ်ဘၣ် ဘံၣ်ဘံၣ်ဘၢဘၢလီၤ.
၁၀ နတပာ်တ့ၢ်ယၤလၢ တၢ်သွၣ်ခိၣ်* အပူၤဘၣ်.+
ပှၤလၢအတီဒီးနၤန့ၣ် နတပျဲလၢ အဝဲကထံၣ်ဘၣ်တၢ်ပူၤဘၣ်.*+
၁၁ နဒုးသ့ၣ်ညါယၤလၢ တၢ်မူ အကျဲလီၤ.+
လၢနမဲာ်ညါန့ၣ် တၢ်သးခု အိၣ်ဝဲ အါမးလီၤ.+
ဒီးလၢနစုထွဲတခီန့ၣ် တၢ်သူၣ်ဖှံသးညီ အိၣ်ဝဲ လီၤစိၤလီၤထီလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ယတၢ်တူၢ်ဘၣ်လၢအယိာ်.” အခီပညီလိၤလိၤ “ယကလ့ၢ်တဖၣ်.”
^ အခီပညီလိၤလိၤ “ယလၤကပီၤ.”
^ လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
^ ဘၣ်သ့ၣ်သ့ၣ် ကမ့ၢ် “ထံၣ်ဘၣ် တၢ်အုၣ်သံကျၣ်သံဘၣ်.”
