စံးထီၣ်ပတြၢၤ ၁၉:၁-၁၄
လၢတၢ်သူၣ်ဝံၣ်သးဆၢအခိၣ်အဂီၢ်. စီၤဒၤဝံးအထါ.
၁၉ မူခိၣ်လီၣ်ဖျါထီၣ် ကစၢ်ယွၤ အလၤကပီၤ+ဒီးမူကပိာ်လိၤ ပာ်ဖျါထီၣ်ဝဲ အစုအတၢ်မၤလီၤ.+
၂ တနံၤဘၣ်တနံၤန့ၣ် အတၢ်ကတိၤသ့ၣ်တဖၣ် ပုာ်ထီၣ်ယွၤလီၤဝဲဒီးတနၤဘၣ်တနၤန့ၣ် အဝဲသ့ၣ်ပာ်ဖျါထီၣ် တၢ်သ့ၣ်ညါလီၤ.
၃ အဝဲသ့ၣ်တတဲတၢ်ဘၣ်, အတၢ်ကတိၤတအိၣ်ဘၣ်ဒီးတၢ်တနၢ်ဟူ အဝဲသ့ၣ် အကလုၢ်စ့ၢ်ကီးဘၣ်.
၄ ဘၣ်ဆၣ် အဝဲသ့ၣ်အကလုၢ်န့ၣ် ဟူထီၣ်လၢ ဟီၣ်ခိၣ်ဒီဘ့ၣ်ဒီးအဝဲသ့ၣ်အတၢ်ကစီၣ်န့ၣ် ရၤလီၤအသးလၢ ဟီၣ်ခိၣ်အနၢၣ် အကတၢၢ်လီၤ.+
လၢမူခိၣ်န့ၣ် ကစၢ်ယွၤတ့ဝဲ ဒဲတဖျၢၣ်လၢ မုၢ်အဂီၢ်လီၤ.
၅ ဒီးမုၢ်န့ၣ် လီၤဂာ်ဒ် တလးမူးပိာ်ခွါ လၢအဟးထီၣ်လၢ တလးမူးပိာ်ခွါ အဒၢးပူၤအသိးဒီးမုၢ်န့ၣ် သူၣ်ဖှံသးညီဝဲ ဒ်ပှၤလၢအဂံၢ်ဆူၣ်တဂၤလၢ အဃ့ၢ်ဝဲလၢ အကျဲပူၤအသိးလီၤ.
၆ ဒီးမုၢ်န့ၣ် ဟဲထီၣ်ဝဲလၢ မူခိၣ်လၢအံၤတကပၤဒီးလဲၤတရံးဝဲတုၤလၢ အဝဲ တကပၤလီၤ.+
ဒီးလၢမုၢ်အတၢ်ကိၢ်အဖီလာ်န့ၣ် တၢ်တအိၣ်သဒၢ နီတမံၤဘၣ်.
၇ ယဟိဝၤယွၤ အတၢ်သိၣ်တၢ်သီန့ၣ် လၢပှဲၤဝဲဒီး+ မၤဆူၣ်ထီၣ်က့ၤ ပဂံၢ်ပဘါလီၤ.+
ယဟိဝၤယွၤ အတၢ်ဒုးသ့ၣ်နီၣ်ထီၣ်တဖၣ်န့ၣ် မ့ၢ်တၢ်လၢ ပနာ်န့ၢ်အီၤသ့+ ဒီးဒုးကူၣ်သ့ ပှၤလၢအတၢ်လဲၤခီဖျိ တအိၣ်ဘၣ်န့ၣ်လီၤ.+
၈ ယဟိဝၤယွၤ အတၢ်ဘျၢတဖၣ်န့ၣ် တီဝဲလိၤဝဲဒီး မၤသးခု ပသးလီၤ.+
ယဟိဝၤယွၤ အတၢ်မၤလိာ်န့ၣ် ကဆှီဝဲဒီး မၤကပီၤထီၣ် ပမဲာ်ချံလီၤ.+
၉ တၢ်ပျံၤယဟိဝၤယွၤန့ၣ်+ စီဆှံဝဲ ဒီးအိၣ်ဝဲလီၤထူလီၤယိာ်လီၤ.
ယဟိဝၤယွၤ အတၢ်စံၣ်ညီၣ်ဆၢတဲာ်တဖၣ်န့ၣ် မ့ၢ်အမ့ၢ်အတီ ဒီးတီဝဲလိၤဝဲခဲလၢာ်လီၤ.+
၁၀ ပလီကီအီၤ ဒိၣ်န့ၢ်ဒံးထူဒီးထူစီလီၤ.+
ဒီးအဆၢဒိၣ်န့ၢ်ဒံး ကနဲစီလၢ+ အဟဲလီၤစီၤလၢ ကနဲအခိၣ်ထံဒံးလီၤ.
၁၁ နတၢ်သိၣ်တၢ်သီန့ၣ် ဟ့ၣ်ပလီၢ် နခ့နပှၤလီၤ.+
ဒီးပှၤလၢ အမၤထွဲဝဲန့ၣ် ဒိးန့ၢ်ဘၣ်အဘျုး အါမးလီၤ.+
၁၂ မ့ၢ်မတဂၤ သ့ၣ်ညါလီၤ အနီၢ်ကစၢ် အတၢ်ကမၣ်လဲၣ်.+
တၢ်ကမၣ်လၢ ယမၤဘၣ်အီၤလၢ တၢ်တပာ်သူၣ်ပာ်သးအပူၤန့ၣ် ပျၢ်ကွံာ်အီၤတက့ၢ်.
၁၃ ဒီးတြီနခ့နပှၤ ယၤအံၤ ဒ်သိးယသုတမၤတၢ်လၢ အပာ်ဖျါထီၣ် တၢ်ပာ်ထီၣ်ထီသးတဂ့ၤ.+
ဒီးတဘၣ်ပျဲလၢ အကဒိၣ်စိလၢ ယဖီခိၣ်တဂ့ၤ.+
ထဲန့ၣ်မး ယကမ့ၢ် ပှၤတဂၤလၢ ပှၤပာ်ဒ့ၣ်ပာ်ကမၣ်အီၤ အလီၢ် တအိၣ်ဘၣ်+ဒီးယကပူၤဖျဲးဒီး တၢ်ကမၣ်ဖးဒိၣ်တဖၣ်လီၤ.
၁၄ အိ, ယဟိဝၤယွၤ လၢအမ့ၢ် ယလၢၢ်+ ဒီးပှၤလၢ အပှ့ၤက့ၤယၤဧၢ,+တၢ်ကတိၤလၢ အဟဲထီၣ်လၢ ယထးခိၣ်ဒီး တၢ်လၢယဆိကမိၣ်ထံအီၤလၢ ယသးပူၤန့ၣ် မ်အဘၣ်နသးတက့ၢ်.+
