စံးထီၣ်ပတြၢၤ ၉၀:၁-၁၇
ကစၢ်ယွၤအမ့ၢ်အတီအပှၤ စီၤမိၤၡ့ အတၢ်ထုကဖၣ်.+
၉၀ အိ ယဟိဝၤယွၤဧၢ, နမ့ၢ်ပတၢ်အိၣ်တၢ်ဆိးအလီၢ်*+ စးထီၣ်လၢပျၢၤလံၤလံၤလံ.
၂ တချုးလၢ ကစၢၢ်ကလိ အိၣ်ဖျဲၣ်ထီၣ်ဒံးဘၣ်ဒီးတချုးလၢ နဒုးအိၣ်ထီၣ် ဟီၣ်ခိၣ်ဒံးဘၣ်န့ၣ်+နမ့ၢ်ကစၢ်ယွၤလၢ အအိၣ်ပာ်စၢၤ အစိၤစိၤအဃၣ်ဃၣ် ဒီးနကအိၣ်ဒံး အစိၤစိၤအဃၣ်ဃၣ်လီၤ.+
၃ နဒုးကဲထီၣ်ကဒါက့ၤ ပှၤဟီၣ်ခိၣ်ဖိလၢ ဟီၣ်ခိၣ်ကမူၣ်ဒီးနတဲလၢ “သုဝဲပှၤဟီၣ်ခိၣ်ဖိသ့ၣ်ဧၢ, က့ၤကဲထီၣ်ကဒါက့ၤ ဟီၣ်ခိၣ်ကမူၣ်တက့ၢ်.”+
၄ လၢနတၢ်ထံၣ်န့ၣ် အနံၣ်တကထိ မၤအသး ဒ်မဟါတနံၤ လၢအလဲၤပူၤကွံာ်တ့ၢ်လံအသိး+ဒီးဒ်တၢ်ခိးကွၢ်တၢ်လၢ မုၢ်နၤခီတတီၤ* အသိးလီၤ.
၅ နမၤဟးဂီၤကွံာ် အဝဲသ့ၣ်+ ဒီးအဝဲသ့ၣ် လီၤမၢ်ကွံာ်ဝဲဒ် တၢ်မံမီၢ်အသိးလီၤ.
အဝဲသ့ၣ် လီၤဂာ်ဒ် နီၣ်လၢအဟဲမဲထီၣ် လၢဂီၤခီအသိးလီၤ.+
၆ လၢဂီၤခီန့ၣ် အဒိၣ်ထီၣ် ဒီးဖီထီၣ်ဝဲဘၣ်ဆၣ် တုၤလၢဟါလီၤခီန့ၣ် အဃ့ထီဒီး သံကွံာ်ဝဲလီၤ.+
၇ ပပျံၤတၢ်ဒိၣ်မး ခီဖျိလၢ နတၢ်သးထီၣ်အဃိ+ဒီးပဟးဂီၤကွံာ်လၢ နတၢ်သးဒိၣ်ထီၣ်အဃိလီၤ.
၈ နသ့ၣ်ညါ ပတၢ်ကမၣ်တဖၣ်*+ဒီးတၢ်လၢပမၤအီၤလၢ တၢ်ခူသူၣ်န့ၣ် နထံၣ်အီၤ ပျီပျီလီၤ.+
၉ ခီဖျိလၢ နတၢ်သးဒိၣ်ထီၣ်အဃိ ပတၢ်အိၣ်မူ ဘူးကကတၢၢ်ကွံာ်ဝဲဒီးပသံကွံာ်ချ့မး ဒ်တၢ်ကသါလီၤထဲတထံၣ် လီၤမၢ်ကွံာ်ဝဲညီညီအသိးလီၤ.
၁၀ ပတၢ်အိၣ်မူန့ၣ် ယံာ်ဝဲထဲ အနံၣ် ၇၀ဒီးပှၤလၢအဂံၢ်ဆူၣ်န့ၣ် ကအိၣ်ဘၣ်ဝဲ တုၤအနံၣ် ၈၀ လီၤ.+
ဘၣ်ဆၣ် ပတၢ်အိၣ်မူန့ၣ် ပှဲၤဝဲဒီး တၢ်ကီတၢ်ခဲ ဒီးတၢ်သးအုးဒီးလဲၤပူၤကွံာ်အသး ချ့မး ဝံၤဒီးပဒံကွံာ်လီၤ.+
၁၁ နတၢ်သးထီၣ် အစိကမီၤ ဒိၣ်ဝဲထဲလဲၣ်န့ၣ် ပှၤတသ့ၣ်ညါနၢ်ပၢၢ် နီတဂၤဘၣ်.
ဒ်နတၢ်သးဒိၣ် ဒိၣ်ဝဲဒိၣ်မးအသိး ပှၤကြၢးပျံၤနၤဒိၣ်ထဲန့ၣ်လီၤ.+
၁၂ ပကဘၣ်သူ ပမုၢ်နံၤတဖၣ်လၢ အဂ့ၤကတၢၢ် ဒ်လဲၣ်ဒ်လဲၣ်န့ၣ် သိၣ်လိပှၤတက့ၢ်.*+
ထဲန့ၣ်မး ပကန့ၢ်ဘၣ် သးလၢအအိၣ်ဒီး တၢ်ကူၣ်သ့လီၤ.
၁၃ အိ ယဟိဝၤယွၤဧၢ,+ ဝံသးစူၤ ပာ်ဖျါထီၣ်ကဒီးတၢ်သူၣ်ဂ့ၤသးဝါလၢ ပဖီခိၣ်တက့ၢ်. နကသးထီၣ်တၢ် ယံာ်ဒံးထဲလဲၣ်.+
သးကညီၤ နခ့နပှၤတဖၣ်တက့ၢ်.+
၁၄ ဒ်သိး ပကကိးပသူထီၣ်လၢ တၢ်သူၣ်ဖှံသးညီအပူၤ ဒီးပကသူၣ်ခုသးခုလၢ+ ပတၢ်အိၣ်မူ ဒီတစိၤအဂီၢ်လၢဂီၤခီန့ၣ် ပာ်ဖျါထီၣ်န့ၢ်ပှၤ နတၢ်အဲၣ်လၢအတီတက့ၢ်.+
၁၅ နဒုးတူၢ်ပှၤတၢ် ယံာ်ဝဲအသီထဲလဲၣ် ဒီးပထံၣ်ဘၣ် တၢ်ကီတၢ်ခဲ+ အနံၣ်ထဲလဲၣ်န့ၣ်မၤသူၣ်ဖှံသးညီပသး ယံာ်ထဲထဲန့ၣ်တက့ၢ်.+
၁၆ မ်နခ့နပှၤတဖၣ် ထံၣ်ဘၣ် တၢ်လၢနမၤတဖၣ်ဒီးမ်အဝဲသ့ၣ် အဖိတဖၣ် ထံၣ်ဘၣ် နစိနကမီၤလၢ အဒိၣ်အမုၢ်န့ၣ်တက့ၢ်.+
၁၇ မ်ပကစၢ် ယဟိဝၤယွၤ ဘၣ်သူၣ်ဘၣ်သးပှၤတက့ၢ်.
ဒီးမ်အမၤကဲထီၣ်လိၣ်ထီၣ် ပစုအတၢ်မၤတဖၣ်တက့ၢ်.
မ့ၢ်လီၤ, မ်အမၤကဲထီၣ်လိၣ်ထီၣ် ပစုအတၢ်မၤတဖၣ်တက့ၢ်.+
တၢ်ဂ့ၢ်အဘျဲၣ်တဖၣ်
^ ဘၣ်သ့ၣ်သ့ၣ် ကမ့ၢ် “ပတၢ်အိၣ်သဒၢအလီၢ်.”
^ တၢ်ခိးကွၢ်တၢ်လၢ မုၢ်နၤခီတတီၤန့ၣ် ကယံာ်ဝဲ လွံၢ်နၣ်ရံၣ်.
^ အခီပညီလိၤလိၤ “နပာ်လီၤပတၢ်ကမၣ်တဖၣ် လၢနမဲာ်ညါ.”
^ အခီပညီလိၤလိၤ “သိၣ်လိပှၤလၢ ပကဘၣ်ဒွး ပမုၢ်နံၤတဖၣ် ဒ်လဲၣ်ဒ်လဲၣ်န့ၣ်တက့ၢ်.”
