စံၣ်ညီၣ်ကွီၢ် ၁၇:၁-၁၃
-
စီၤမံၤကါ အတၢ်ဂီၤတၢ်ဖှီၣ်တဖၣ် ဒီးအပှၤလုၢ်တၢ်ဒိၣ် (၁-၁၃)
၁၇ လၢအ့ဖရဲၣ်+ အကစၢၢ်ကလိကျါန့ၣ် ပှၤပိာ်ခွါ လၢအမံၤမ့ၢ်ဝဲ စီၤမံၤကါ အိၣ်ဝဲတဂၤလီၤ.
၂ အဝဲတဲအမိၢ်လၢ “လၢညါ ပှၤဟံးန့ၢ်စ့ညၣ် အဘ့ၣ် ၁,၁၀၀ လၢနအိၣ် ဒီးဖဲနဆိၣ်အၢအီၤအခါ ယနၢ်ဟူလီၤ. စ့ညၣ်တဖၣ်န့ၣ် အိၣ်လၢယအိၣ်, ယမ့ၢ်ပှၤတဂၤလၢ အဟံးန့ၢ်အီၤလီၤ.” ဒီးအမိၢ်တဲအီၤလၢ “ဖိခွါဧၢ, မ်ယဟိဝၤယွၤ ဆိၣ်ဂ့ၤနၤတက့ၢ်.”
၃ ဒီးအဝဲ ဟ့ၣ်က့ၤအမိၢ် စ့ညၣ် အဘ့ၣ် ၁,၁၀၀ ဘၣ်ဆၣ် အမိၢ်တဲဝဲလၢ “ယကပာ်စီဆှံ ယစ့ညၣ်တဖၣ်အံၤ လၢယဟိဝၤယွၤအဂီၢ် ဒ်သိး နကသူက့ၤအီၤ လၢနကတ့ထီၣ် တၢ်ဂီၤစိးပျၤတခါ ဒီးတၢ်ဂီၤတၢ်ဖှီၣ်ထးတခါ အဂီၢ်လီၤ.+ အဃိ ခဲအံၤ ယကဟ့ၣ်ကဒါက့ၤနၤ စ့ညၣ်တဖၣ်အံၤလီၤ.”
၄ အဝဲဟ့ၣ်က့ၤ စ့ညၣ်လၢအမိၢ်ဝံၤဒီး အမိၢ်ဟံးန့ၢ်ဝဲ စ့ညၣ်အဘ့ၣ် ၂၀၀ ဒီးလဲၤဟ့ၣ်လီၤဝဲလၢ ပှၤပိာ်စ့တဂၤအအိၣ်လီၤ. ဒီးပှၤပိာ်စ့တဂၤန့ၣ် တ့ထီၣ်ဝဲ တၢ်ဂီၤစိးပျၤတခါ ဒီးတၢ်ဂီၤတၢ်ဖှီၣ်ထး တခါလီၤ. ဒီးတၢ်ဂီၤတၢ်ဖှီၣ်တဖၣ်န့ၣ် ဘၣ်တၢ်ပာ်အီၤလၢ စီၤမံၤကါ အဟံၣ်ပူၤလီၤ.
၅ ဒီးစီၤမံၤကါ အိၣ်ဒီး ဟံၣ်တဖျၢၣ်လၢ အယွၤတဖၣ် အဂီၢ်လီၤ. ဒီးအဝဲထါန့ၢ်ဝဲ အ့ဖိးတဘ့ၣ်+ ဒီးတ့ထီၣ် တရၤဖး တၢ်ဂီၤတၢ်ဖှီၣ်တဖၣ်+ ဒီးပာ်ထီၣ်အဖိခွါတဂၤ ဒ်သိးကကဲထီၣ် ပှၤလုၢ်တၢ်ဒိၣ် လၢအဂီၢ်လီၤ.+
၆ ဖဲန့ၣ်အဆၢကတီၢ် လၢအံၣ်စရ့လးအပူၤန့ၣ် စီၤပၤတအိၣ် နီတဂၤဘၣ်.+ တၢ်လၢ ပှၤတဂၤဂ့ၤ တဂၤဂ့ၤ အနီၢ်ကစၢ်ထံၣ်ဝဲလၢ အဘၣ်န့ၣ် အဝဲသ့ၣ် မၤဝဲလီၤ.+
၇ ပှၤပိာ်ခွါသးစၢ် လၢအဘၣ်ဃးဒီး ယူဒၤအဒူၣ်ဖိထၢဖိန့ၣ် အိၣ်ဝဲတဂၤ ဒီးအဝဲအိၣ်ဝဲလၢ ဝ့ၢ်ဘ့ၤသလ့ဃ့ၣ်+ လၢယူဒၤအဟီၣ်ကဝီၤအပူၤလီၤ. ဒီးအဝဲကဲဝဲ ပှၤလ့ၤဝံဖိတဂၤ+ ဒီးအဝဲအိၣ်ဖဲန့ၣ် တတီၤဖိလီၤ.
၈ ဒီးအဝဲ ဟးထီၣ်လၢ ဝ့ၢ်ဘ့ၤသလ့ဃ့ၣ် လၢယူဒၤအဟီၣ်ကဝီၤအပူၤ ဒီးဟးဃုဝဲ တၢ်လီၢ်လၢ အကအိၣ်ဝဲ အဂီၢ်လီၤ. အဝဲလဲၤတၢ်ဒီး လဲၤဝဲတုၤလၢ စီၤမံၤကါ အဟံၣ် လၢအအိၣ်လၢ အ့ဖရဲၣ် အကစၢၢ်ကလိကျါလီၤ.+
၉ ဒီးစီၤမံၤကါ တဲအီၤလၢ “နဟဲဖဲလဲၣ်.” ဒီးပိာ်ခွါတဂၤန့ၣ် တဲက့ၤအီၤလၢ “ယကဲ ပှၤလ့ၤဝံဖိတဂၤ လၢအဟဲလၢ ဝ့ၢ်ဘ့ၤသလ့ဃ့ၣ် လၢယူဒၤအဟီၣ်ကဝီၤအပူၤ ဒီးယဟးဃု တၢ်လီၢ်လၢ ယကအိၣ် အဂီၢ်လီၤ.”
၁၀ အဃိ စီၤမံၤကါ တဲအီၤလၢ “အိၣ်ဒီးယၤ ဒီးနဘၣ်ကဲထီၣ် ဒ်ပၢ်တဂၤ* ဒီးပှၤလုၢ်တၢ်ဒိၣ် လၢယဂီၢ်လီၤ. ယကဟ့ၣ်နၤ စ့ညၣ် တနံၣ်အဘ့ၣ်တဆံ, တၢ်ကူတၢ်သိးတစူၣ် ဒီးတၢ်အီၣ်တၢ်အီလီၤ. အဃိ ပှၤလ့ၤဝံဖိ တဂၤအံၤ လဲၤနုာ်လၢ ဟံၣ်ပူၤလီၤ.
၁၁ ဒီးပှၤလ့ၤဝံဖိ တဂၤအံၤ တူၢ်လိာ်ဝဲလၢ အကအိၣ်ဒီး စီၤမံၤကါလီၤ. ဒီးစီၤမံၤကါ ပာ်အီၤဒ် အဖိခွါတဂၤ အသိးလီၤ.
၁၂ တကးဒံးဘၣ် စီၤမံၤကါ ပာ်ထီၣ် ပှၤလ့ၤဝံဖိ တဂၤအံၤ ဒ်ပှၤလုၢ်တၢ်ဒိၣ် လၢအဂီၢ်+ ဒီးအဝဲအိၣ်လၢ စီၤမံၤကါ အဟံၣ်လီၤ.
၁၃ လၢခံ စီၤမံၤကါ တဲဝဲလၢ “ခဲအံၤ မ့ၢ်လၢ ပှၤလ့ၤဝံဖိ တဂၤအံၤ ကဲထီၣ် ယပှၤလုၢ်တၢ်ဒိၣ် အဃိ ယသ့ၣ်ညါလၢ ယဟိဝၤယွၤ ကဂ့ၤလၢ ယဖီခိၣ်လီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ပှၤဟ့ၣ်ကူၣ်တၢ်တဂၤ.”
