တံတူး ၂:၁-၁၅
၂ မ့မ့ၢ်နၤန့ၣ် ဆဲးသိၣ်လိတၢ်လၢ အလီၤပလိာ်လိာ်အသးဒီး တၢ်သိၣ်လိလၢ အဂ့ၤအဘၣ်တက့ၢ်.+
၂ ပိာ်ခွါလၢ အသးပှၢ်တဖၣ်န့ၣ် ကြၢးမ့ၢ်ပှၤလၢ အပၢၤအတၢ်အိၣ်မူ ကိးသနၢၣ်ဒဲး, ပှၤလၢအလီၤပာ်ကဲ, ပှၤလၢအဆိကမိၣ်ထံတၢ် သ့ဂ့ၤဂ့ၤ, ပှၤလၢအတၢ်နာ်ဂၢၢ်ကျၢၤ ဒီးပှၤလၢအပှဲၤဒီး တၢ်အဲၣ်တၢ်ကွံ ဒီးအိၣ်ဒီး တၢ်တူၢ်န့ၢ်ခီၣ်ကဲလီၤ.
၃ ဒ်န့ၣ်အသိး ပိာ်မုၣ်လၢအသးပှၢ်တဖၣ်န့ၣ် အဝဲသ့ၣ်ကြၢးမ့ၢ် ပှၤလၢအအိၣ်မူဒ် ပှၤလၢအပာ်ဒိၣ်ယွၤအသိး, တဘၣ်တဲဟးဂီၤပှၤဂ့ၢ် ဒီးတဘၣ်ကဲစပံးထံအကုၢ် ခီဖျိလၢအအီဝဲ အါအါအဃိဘၣ်. အဝဲသ့ၣ်ကြၢးမ့ၢ် ပှၤလၢအသိၣ်လိတၢ်လၢအဂ့ၤ
၄ ဒ်သိးအဝဲသ့ၣ် ကဟ့ၣ်ကူၣ်ပိာ်မုၣ်လၢ အသးစၢ်တဖၣ်လၢ အကအဲၣ်အဝၤ, ကအဲၣ်အဖိ
၅ ဒီးဒ်သိးကမ့ၢ် ပှၤလၢ အဆိကမိၣ်ထံတၢ် သ့ဂ့ၤဂ့ၤ, ပှၤလၢအအိၣ်စီဆှံ, ပှၤလၢအကွၢ်ထွဲ အဟံၣ်အဃီဂ့ၤဂ့ၤ, ပှၤလၢအသူၣ်ဂ့ၤသးဝါ ဒီးပှၤလၢအဒိးပၢအသးလၢ အဝၤအဖီလာ်+ ဒ်သိးယွၤအကလုၢ်ကထါ သုတဘၣ် တၢ်ဒုၣ်ဒွဲၣ်စံးအၢအီၤ တဂ့ၤအဂီၢ်လီၤ.
၆ ဒ်န့ၣ်အသိး ဆဲးဟ့ၣ်သဆၣ်ထီၣ် ပိာ်ခွါသးစၢ်တဖၣ် ဒ်သိးအဝဲသ့ၣ်ကမ့ၢ် ပှၤလၢ အဆိကမိၣ်ထံတၢ် သ့ဂ့ၤဂ့ၤန့ၣ်တက့ၢ်.+
၇ ဘၣ်ဃးဒီး တၢ်မၤလၢအဂ့ၤတဖၣ်န့ၣ် နကဘၣ် ပာ်ဖျါထီၣ် တၢ်ဒိဂ့ၤတဲာ်ဘၣ်လၢ ကျဲကိးဘိဒဲးလီၤ. ဒီးသိၣ်လိ တၢ်တီတီလိၤလိၤလၢ တၢ်သးဆူၣ်အပူၤတက့ၢ်.+
၈ သူတၢ်ကတိၤလၢအဂ့ၤအဘၣ် လၢပှၤပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်န့ၣ်တက့ၢ်.+ နမ့ၢ်မၤဒ်န့ၣ်န့ၣ် ပှၤလၢ အထီဒါတၢ်တဖၣ် ကဒိးန့ၢ်ဘၣ်တၢ်မဲာ်ဆှး ဒီးအဝဲသ့ၣ် တဲအၢတဲသီပှၤ တသ့နီတမံၤဘၣ်.+
၉ ကုၢ်တဖၣ်န့ၣ် မ်အဒိးပၢအသးလၢ အကစၢ်အဖီလာ် လၢတၢ်ခဲလၢာ်အပူၤ+ ဒီးဂုာ်ကျဲးစၢးမၤအဝဲသ့ၣ် အတၢ်ဘၣ်သးတက့ၢ်. ဒီးကုၢ်တဖၣ်န့ၣ် တဘၣ်တဲဆၢတၢ်တဂ့ၤ.
၁၀ ဒီးအဝဲသ့ၣ်တဘၣ်ဟုၣ် အကစၢ်တဖၣ် အတၢ်တဂ့ၤ.+ ဒ်သိးကုၢ်တဖၣ် ကမၤဃံမၤလၤထီၣ် ကစၢ်ယွၤလၢအမ့ၢ် ပှၤလၢ အအုၣ်က့ၤခီၣ်က့ၤပှၤတဂၤ အတၢ်သိၣ်လိတဖၣ်အဂီၢ် အဝဲသ့ၣ် ကဘၣ်ပာ်ဖျါထီၣ်လၢ အမ့ၢ်ပှၤလၢ ပှၤနာ်န့ၢ်အီၤသ့ လၢလၢပှဲၤပှဲၤလီၤ.+
၁၁ ကစၢ်ယွၤပာ်ဖျါထီၣ်တ့ၢ် အတၢ်သးကညီၤ ဒိၣ်ဒိၣ်မုၢ်မုၢ် ဒ်သိးပှၤအကလုာ်ကလုာ် ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ်လီၤ.+
၁၂ ဒီးတၢ်သးကညီၤ ဒိၣ်ဒိၣ်မုၢ်မုၢ်အံၤ သိၣ်လိနဲၣ်လိပှၤဒ်သိး ပကပာ်တ့ၢ်ကွံာ်တၢ်လၢ အထီဒါလိာ်သးဒီး ကစၢ်ယွၤအတၢ်ဘၣ်သး ဒီးဟီၣ်ခိၣ် အတၢ်သူၣ်လီသးကွံ+ ဒီးဒ်သိး ပကပာ်ဖျါထီၣ်လၢ ပမ့ၢ်ပှၤလၢ အဆိကမိၣ်ထံတၢ် သ့ဂ့ၤဂ့ၤ, ပှၤလၢအအိၣ်ဒီးတၢ်တီတၢ်လိၤ ဒီးပှၤလၢအသးတီဒီးကစၢ်ယွၤ လၢဆၢကတီၢ်ခဲအံၤလီၤ.+
၁၃ ဒီးပအိၣ်ခိးကွၢ်လၢ်လၢ ပတၢ်မုၢ်လၢ်လၢ အကမၤသးခုပှၤန့ၣ်+ ကလၢထီၣ်ပှဲၤထီၣ် ဒီးပကစၢ်ယွၤလၢအဒိၣ် ဒီးပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ်န့ၣ် ကပာ်ဖျါထီၣ်အသး ပှဲၤဒီးတၢ်လၤကပီၤလီၤ.
၁၄ ခရံာ်န့ၣ် ဟ့ၣ်လီၤကွံာ်အသးလၢပဂီၢ်+ ဒ်သိးကမၤထူၣ်ဖျဲးပှၤလၢ+ တၢ်အၢတၢ်သီကိးမံၤဒဲး ဒီးဒ်သိး အကမၤကဆှီထီၣ် ပှၤလီၤလီၤဆီဆီတဒူၣ်လၢ အနီၢ်ကစၢ်အဂီၢ် ဒီးအဝဲသ့ၣ် ကသးဆူၣ်လၢ တၢ်မၤလၢအဂ့ၤတဖၣ်အဂီၢ်လီၤ.+
၁၅ မ့ၢ်လၢ နဒိးန့ၢ်ဘၣ် တၢ်စိတၢ်ကမီၤ လၢလၢပှဲၤပှဲၤအဃိ ဆဲးသိၣ်လိ တၢ်ဂ့ၢ်တဖၣ်အံၤ ဒီးဟ့ၣ်သဆၣ်ထီၣ်တၢ် ဒီးသိၣ်ဃီၣ်တၢ်တက့ၢ်.+ တဘၣ်ပျဲ ပှၤဆိကမိၣ်ဆံးနၤ နီတဂၤတဂ့ၤ.
