တံတူး ၃:၁-၁၅
၃ ဆဲးဒုးသ့ၣ်နီၣ်ထီၣ် ဒီပုၢ်ဝဲၢ်တဖၣ်ဒ်သိး အကဒိးပၢအသးလၢ ပဒိၣ် ဒီးပှၤပၢတၢ်တဖၣ် အဖီလာ် ဒီးကဒိကနၣ် အဝဲသ့ၣ်အကလုၢ်+ ဒီးကအိၣ် ကတဲာ်ကတီၤအသးလၢ ကမၤတၢ်မၤလၢ အဂ့ၤကိးမံၤဒဲးအဂီၢ်တက့ၢ်.
၂ ဒီးဆဲးဒုးသ့ၣ်နီၣ်ထီၣ် အဝဲသ့ၣ်လၢ တဘၣ်တဲအၢတဲသီ ပှၤနီတဂၤဘၣ်, တဘၣ်ဃု တၢ်အ့ၣ်လိာ်ဆိးက့ဘၣ် ဒီးတဘၣ်မ့ၢ်ပှၤလၢ အခိၣ်ကိၤဘၣ်+ ဒီးကဘၣ် ပာ်ဖျါထီၣ် တၢ်သူၣ်စူၤသးစူၤ လၢပှၤခဲလၢာ်အဖီခိၣ် ထီဘိလီၤ.+
၃ ပဝဲစ့ၢ်ကီး တဘျီခါ ပကဲပှၤလၢ အတဆိကမိၣ်ထံတၢ်ဘၣ်, ပှၤလၢအနၢ်က့ၣ် ဒီးပှၤဆှၢကမၣ်ပှၤလီၤ. ပကဲတ့ၢ် တၢ်သူၣ်လီသးကွံ ဒီးတၢ်မုာ်တၢ်ပၠီၣ် အကလုာ်ကလုာ် အကုၢ်လီၤ. ဒီးပဆဲးလဲၤတၢ်လၢ တၢ်အၢတၢ်သီ ဒီးတၢ်သူၣ်က့ၣ်သးကါအပူၤ, ပကဲပှၤလၢ အလီၤသးဟ့ ဒီးပသးဟ့လိာ်သး တဂၤဒီးတဂၤလီၤ.
၄ ဘၣ်ဆၣ် ဖဲပကစၢ်ယွၤ လၢအမ့ၢ် ပှၤလၢ အအုၣ်က့ၤခီၣ်က့ၤပှၤန့ၣ် ပာ်ဖျါထီၣ်ဝဲ အတၢ်သူၣ်ဂ့ၤသးဝါ+ ဒီးအတၢ်အဲၣ်တၢ်ကွံလၢ ပှၤဟီၣ်ခိၣ်ဖိ အမဲာ်ညါအခါ
၅ (တမ့ၢ်ခီဖျိလၢ ပတၢ်မၤလၢ အတီအလိၤ အဃိဘၣ်.+ မ့ၢ်ဝဲခီဖျိလၢ ကစၢ်ယွၤ အနီၢ်ကစၢ်ဒၣ်ဝဲ အတၢ်သးကညီၤ အဃိလီၤ.)+ အဝဲအုၣ်က့ၤခီၣ်က့ၤပှၤ ခီဖျိ အဝဲမၤကဆှီထီၣ်က့ၤပှၤ ဒ်သိးကဒုးမူထီၣ်ပှၤအဂီၢ်+ ဒီးအဝဲမၤသီထီၣ်ပှၤခီဖျိ သးစီဆှံလီၤ.+
၆ ဒီးအဝဲဟ့ၣ်လီၤပှၤ သးစီဆှံ အါအါဂီၢ်ဂီၢ် ခီဖျိလၢ ပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ်လီၤ.+
၇ ကစၢ်ယွၤ မၤဝဲဒ်အံၤန့ၣ် မ့ၢ်ဒ်သိး ဖဲပဘၣ် တၢ်ပာ်တီပာ်လိၤပှၤ ခီဖျိလၢ အတၢ်သးကညီၤ ဒိၣ်ဒိၣ်မုၢ်မုၢ်+ ဝံၤအလီၢ်ခံ ပကကဲထီၣ် ပှၤန့ၢ်သါဘၣ်တၢ်လၢ+ အိၣ်ဒီး တၢ်မုၢ်လၢ်လၢ ပကဒိးန့ၢ်ဘၣ်တၢ်မူ လီၤထူလီၤယိာ်လီၤ.+
၈ တၢ်ကတိၤသ့ၣ်တဖၣ်အံၤ ပှၤနာ်န့ၢ်အီၤသ့လီၤ. ဒီးယအဲၣ်ဒိးလၢ နကဆဲးပာ်ဖျါထီၣ် တၢ်ဂ့ၢ်တဖၣ်အံၤ ဒ်သိးပှၤလၢ အစူၢ်က့ၤနာ်က့ၤ ကစၢ်ယွၤန့ၣ် ကသးစၢၢ်ဆၢလၢ ကဆဲးမၤ တၢ်မၤလၢ အဂ့ၤတဖၣ်အဂီၢ်လီၤ. တၢ်သ့ၣ်တဖၣ်န့ၣ် ဂ့ၤဝဲဒီးကဲဘျုးလၢ ပှၤဟီၣ်ခိၣ်ဖိတဖၣ် အဂီၢ်လီၤ.
၉ မ့မ့ၢ် တၢ်အ့ၣ်လိာ်သးလၢ အခီပညီတအိၣ်ဘၣ်မ့ၢ်ဂ့ၤ, တၢ်ကွဲးဖျါထီၣ် တၢ်ဟဲလီၤစၢၤလီၤသွဲၣ် အမံၤအသၣ်တဖၣ်မ့ၢ်ဂ့ၤ, တၢ်အ့ၣ်လိာ်ဆိးက့မ့ၢ်ဂ့ၤ, တၢ်တဲအါလိာ်သး ဘၣ်ဃးဒီး စီၤမိၤၡ့ အတၢ်သိၣ်တၢ်သီမ့ၢ်ဂ့ၤ တဘၣ်မၤဃုာ်အီၤ နီတစဲးတဂ့ၤ. တၢ်သ့ၣ်တဖၣ်န့ၣ် တကဲဘျုးဘၣ် ဒီးမ့ၢ်တၢ်ကလီကလီလီၤ.+
၁၀ ပှၤလၢ အရၤလီၤ တၢ်သိၣ်လိလၢ အကမၣ်တဖၣ်န့ၣ်+ နဘၣ်ဟ့ၣ်ပလီၢ်အီၤ တဘျီခံဘျီ+ ဝံၤဒီး အမ့ၢ်တဒိကနၣ်ဝဲဘၣ်န့ၣ် ဟးဆှဲးအီၤတက့ၢ်.+
၁၁ နသ့ၣ်ညါလၢ ပှၤဒ်န့ၣ်တဂၤန့ၣ် ဃၣ်ကွံာ်အသးလၢ ကျဲမ့ၢ်ကျဲတီလံ ဒီးအမၤတၢ်ဒဲးဘး ဒီးစံၣ်ညီၣ်လီၤ အနီၢ်ကစၢ်သးလံ.
၁၂ ဖဲယဆှၢလီၤန့ၢ်နၤ စီၤအၢ်တ့းမါ မ့တမ့ၢ် စီၤတူဃံၤကူးအခါ+ ဂုာ်ကျဲးစၢးလၢ အဂ့ၤကတၢၢ် ဒ်သိးနကဟဲလၢ ယအိၣ်လၢ ဝ့ၢ်နံၤကပီလံးန့ၣ်တက့ၢ်. ယဆၢတဲာ်လီၤယသးလၢ ဖဲတၢ်ဂိၢ်ခါ အဆၢကတီၢ်န့ၣ် ယကအိၣ်ဖဲန့ၣ်လီၤ.
၁၃ စီၤစ့ၤနါ လၢအမ့ၢ် ပှၤလၢအသ့ၣ်ညါ စီၤမိၤၡ့ အတၢ်သိၣ်တၢ်သီ ဂ့ၤဂ့ၤ ဒီးစီၤအပီးလိၤန့ၣ် ဒ်သိးအဝဲသ့ၣ် အတၢ်လိၣ်ဘၣ် လၢအတၢ်လဲၤတၢ်က့ၤ တဘျီအံၤ သုတအိၣ် နီတမံၤတဂ့ၤအဂီၢ် မၤစၢၤအဝဲသ့ၣ်လၢ အဂ့ၤကတၢၢ်တက့ၢ်.+
၁၄ ဒီးပဒီပုၢ်ဝဲၢ်တဖၣ်န့ၣ် မ်အဝဲသ့ၣ်မၤလိအသးလၢ ကမၤတၢ်မၤလၢအဂ့ၤထီဘိ ဒ်သိးအမၤလၢပှဲၤ တၢ်လိၣ်ဘၣ်လၢ အရ့ဒိၣ်တဖၣ် ကသ့အဂီၢ်+ ဒီးဒ်သိးအဝဲသ့ၣ် ကဖီထီၣ်သၣ်ထီၣ် ထီဘိအဂီၢ်တက့ၢ်.+
၁၅ ပှၤလၢအိၣ်ဒီးယၤခဲလၢာ် ဆၢဂ့ၤဆၢဝါနၤလီၤ. ဆၢဂ့ၤဆၢဝါန့ၢ်ယၤ ပှၤစူၢ်က့ၤနာ်က့ၤတၢ် ကဒဲကဒဲလၢ အအဲၣ်ဘၣ်ပှၤန့ၣ်တက့ၢ်.
မ်သုဝဲကိးဂၤဒဲး ဒိးန့ၢ်ဘၣ်တၢ်သးကညီၤ ဒိၣ်ဒိၣ်မုၢ်မုၢ်တက့ၢ်.
