မးသဲ ၁၁:၁-၃၀
၁၁ ဖဲယ့ၣ်ၡူး ဟံးစုနဲၣ်ကျဲ အပျဲၢ်အဘီၣ် ၁၂ ဂၤ ဝံၤအလီၢ်ခံ အဝဲလဲၤသိၣ်လိနဲၣ်လိတၢ် ဒီးစံၣ်တဲၤတဲလီၤတၢ်လၢ ဝ့ၢ်ဖဲန့ၣ်တဖၣ် အပူၤလီၤ.+
၂ ဖဲစီၤယိၤဟၣ်အိၣ်လၢ ဃိာ်ပူၤအခါ+ အဝဲနၢ်ဟူဘၣ်ဝဲ တၢ်လၢခရံာ်မၤဝဲတဖၣ်အဃိ အဝဲမၢလီၤ အပျဲၢ်အဘီၣ်တဖၣ်+
၃ ဒ်သိးကသံကွၢ် ယ့ၣ်ၡူးလၢ “မ့ၢ်နကဲပှၤလၢ ပခိးကွၢ်လၢ်အီၤ တဂၤန့ၣ်ဧါ. မ့တမ့ၢ် ပကဘၣ်ခိးကွၢ်လၢ် ပှၤလၢအဂၤတဂၤဒံးဧါ.”+
၄ ယ့ၣ်ၡူးတဲဆၢက့ၤ အဝဲသ့ၣ်လၢ “က့ၤတဲဘၣ် စီၤယိၤဟၣ်လၢ တၢ်လၢသုနၢ်ဟူဘၣ် ဒီးသုထံၣ်ဘၣ်တဖၣ်တက့ၢ်.+
၅ ပှၤလၢ အမဲာ်တထံၣ်တၢ်တဖၣ်န့ၣ် ထံၣ်ထီၣ်က့ၤတၢ်လံ,+ ပှၤလၢ အခီၣ်ဟးဂီၤတဖၣ်န့ၣ် ဟးသ့ထီၣ်က့ၤလံ, ပှၤလၢ အဘၣ်တၢ်ဆါအၢတဖၣ်န့ၣ်+ ကဆှီထီၣ်က့ၤလံ, ပှၤလၢ အတနၢ်ဟူတၢ်တဖၣ်န့ၣ် နၢ်ဟူထီၣ်က့ၤတၢ်လံ, ပှၤလၢ အသံတဖၣ်န့ၣ် ဘၣ်တၢ်မၤသမူထီၣ်က့ၤအီၤလံ ဒီးပှၤလၢ အဖှီၣ်အယာ်တဖၣ်န့ၣ် ဘၣ်တၢ်စံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ်လံ.+
၆ ပှၤလၢအတလီၤဃံၢ်လၢ ယဃိဘၣ်န့ၣ် ကသးခုဝဲလီၤ.”+
၇ ဖဲစီၤယိၤဟၣ် အပျဲၢ်အဘီၣ်တဖၣ် က့ၤဝံၤအလီၢ်ခံ ယ့ၣ်ၡူးတဲဘၣ် ပှၤဂီၢ်မုၢ်လၢ စီၤယိၤဟၣ်အဂ့ၢ် ဒ်အံၤလီၤ. “သုလဲၤလၢ ပှၢ်မုၢ်ကနၢ ဒ်သိး သုကလဲၤကွၢ် တၢ်မနုၤလဲၣ်.+ သုလဲၤဒ်သိး သုကထံၣ် ပှၤတဂၤလၢ အလီၤဂာ်ဒ်သိးဒီး တပိၢ်တဘိလၢ အဟူးဝးဝဲလၢ ကလံၤကျါန့ၣ်ဧါ.+
၈ မ့တမ့ၢ်ဘၣ်န့ၣ် မ့ၢ်သုလဲၤကွၢ် တၢ်မနုၤလဲၣ်. မ့ၢ်သုလဲၤဒ်သိး သုကထံၣ်ပှၤတဂၤလၢ အသိးဝဲ ဆ့ကၤကပုာ်လုး* န့ၣ်ဧါ. ပှၤလၢအသိးဝဲ ဆ့ကၤကပုာ်လုးန့ၣ် အိၣ်ဝဲလၢစီၤပၤ အဟံၣ်ပူၤလီၤ.
၉ မ့မ့ၢ်ဒ်န့ၣ်န့ၣ် မ့ၢ်သုလဲၤကွၢ် တၢ်မနုၤလဲၣ်. ဝံတဂၤဧါ. မ့ၢ်, ယကတဲဘၣ်သုလၢ အဝဲဒိၣ်န့ၢ်ဒံး ဝံတဂၤလီၤ.+
၁၀ ဘၣ်ဃးဒီး ပှၤတဂၤအံၤအဂ့ၢ်န့ၣ် တၢ်ကွဲးအသး အိၣ်ဝဲလၢ ‘ကွၢ်မီၤ, ယကမၢလီၤ ယပှၤစိာ်တၢ်ကစီၣ်ဖိတဂၤ လၢနမဲာ်ညါ ဒ်သိးအဝဲ ကကတဲာ်ကတီၤဆိန့ၢ် ကျဲလၢနမဲာ်ညါလီၤ.’+
၁၁ ယကတဲဘၣ်သု တီတီ, လၢပှၤဟီၣ်ခိၣ်ဖိခဲလၢာ်အကျါန့ၣ်* ပှၤလၢအဒိၣ်န့ၢ် ပှၤဘျၢတၢ်စီၤယိၤဟၣ် တအိၣ်နီတဂၤဘၣ်. ဘၣ်ဆၣ် ပှၤအဆံးတဂၤလၢ မူခိၣ်အဘီမုၢ်အပူၤန့ၣ် ဒိၣ်န့ၢ်ဒံးအီၤလီၤ.+
၁၂ စးထီၣ်လၢ ပှၤဘျၢတၢ် စီၤယိၤဟၣ်အစိၤ တုၤလီၤလၢ ခဲအံၤန့ၣ် ပှၤဂုာ်ကျဲးစၢးဝဲဒ်သိး ကနုာ်လီၤဘၣ်လၢ မူခိၣ်အဘီမုၢ်အပူၤလီၤ. ဒီးပှၤလၢ အတဟ့ၣ်အၡူဘၣ်န့ၣ် ဒိးန့ၢ်ဘၣ်ဝဲလီၤ.+
၁၃ ဝံအတၢ်စံးပာ် ဒီးစီၤမိၤၡ့ အတၢ်သိၣ်တၢ်သီန့ၣ် တဲဆိပာ်စၢၤဝဲ တၢ်လၢ ကမၤအသးတဖၣ် တုၤလီၤလၢ စီၤယိၤဟၣ်အစိၤလီၤ.+
၁၄ သုမ့ၢ်ဘၣ်သးနာ်မ့ၢ်ဂ့ၤ တနာ်ဘၣ်မ့ၢ်ဂ့ၤ ပှၤတဂၤန့ၣ်မ့ၢ် ‘ဝံအ့ၤလံယၤ လၢကဟဲဝဲတဂၤန့ၣ်လီၤ.’+
၁၅ ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ် ထံထံတက့ၢ်.
၁၆ “ပှၤတစိၤအံၤ ယကထိၣ်သတြီၤ အဝဲသ့ၣ်ဒီး မတၤတဖၣ်လဲၣ်.+ အဝဲသ့ၣ်န့ၣ် လီၤဂာ်ဒ်သိးဒီး ဖိသၣ်တဖၣ်လၢ အဆ့ၣ်နီၤလၢ တၢ်ဆါတၢ်ပှ့ၤအလီၢ် ဒီးကိးဃီၤဝဲ အသကိးတဖၣ်
၁၇ ဒီးတဲဝဲလၢ ‘ပအူပံလၢသုဂီၢ် ဘၣ်ဆၣ် သုတဂဲၤကလံၣ်ဘၣ်. ပဟီၣ်ကိးပသူ ဘၣ်ဆၣ် သုတပာ်ဖျါထီၣ်လၢ သုသးအုးဘၣ်.’
၁၈ ဒ်န့ၣ်အသိး စီၤယိၤဟၣ်န့ၣ် ဒုၣ်တၢ်အီၣ် ဒီးတအီစပံးထံဘၣ်. ဘၣ်ဆၣ် ပှၤတဲဝဲလၢ ‘တၢ်ဝံတၢ်နါ အိၣ်လၢအလိၤလီၤ.’
၁၉ မ့မ့ၢ် ပှၤကညီဖိခွါန့ၣ် အီၣ်တၢ်အီတၢ်+ ဘၣ်ဆၣ် ပှၤတဲဝဲလၢ ‘ကွၢ်မီၤ, အဝဲမ့ၢ်ပှၤလၢ အအီၣ်တၢ်အါတလၢ ဒီးအီစပံးထံအါတလၢ ဒီးအဒီသကိးဒီး ပှၤထၢတၢ်ခိတၢ်သွဲဖိ ဒီးပှၤတၢ်ဒဲးဘးဖိတဖၣ်လီၤ.’+ ဘၣ်ဆၣ် ပှၤတဂၤမ့ၢ် အိၣ်ဒီးတၢ်ကူၣ်သ့န့ၣ် အအိၣ်ဖျါထီၣ်* ခီဖျိလၢ တၢ်လၢအမၤဝဲတဖၣ် အဃိလီၤ.”+
၂၀ ဝ့ၢ်တဖၣ်လၢ ယ့ၣ်ၡူးမၤတၢ်လီၤလး အါကတၢၢ်လၢအပူၤန့ၣ် အပှၤဝ့ၢ်ဖိတဖၣ် တပီၢ်ယၢ်လီၤက့ၤ အသးဘၣ်. အဃိ ယ့ၣ်ၡူးသိၣ်က့ၤသီက့ၤ အဝဲသ့ၣ်လၢ
၂၁ “ပှၤဃၤရၤစံၣ်ဖိသ့ၣ်ဧၢ, ကလီၤသးအုးလၢ သုဂီၢ်ထဲလဲၣ်. ပှၤဘ့ၤသစဲဒၤဖိသ့ၣ်ဧၢ, ကလီၤသးအုးလၢ သုဂီၢ်ထဲလဲၣ်. တၢ်လီၤလးတဖၣ်လၢ ဘၣ်တၢ်မၤအီၤလၢ သုဝ့ၢ်ပူၤ မ့ၢ်ဘၣ်တၢ်မၤတ့ၢ်အီၤလၢ ဝ့ၢ်စိၢ်ဒီးစံဒိၣ်အပူၤန့ၣ် အဝဲသ့ၣ် ကသိးထီၣ်ဝဲ ထၢၣ်တၢ်ကံးညာ် ဒီးကဆ့ၣ်နီၤဝဲလၢ ဖၣ်ဆါအကျါ ဒီးကပီၢ်ယၢ်လီၤက့ၤအသး ဖးယံာ်လံ.+
၂၂ ဘၣ်ဆၣ် ယကတဲဘၣ်သုလၢ ဖဲမုၢ်စံၣ်ညီၣ်အနံၤန့ၣ် သုကဘၣ် တၢ်စံၣ်ညီၣ်သု နးန့ၢ်ဒံး ဝ့ၢ်စိၢ်ဒီးစံဒိၣ်လီၤ.+
၂၃ ပှၤကပ့းရနီၣ်ဖိသ့ၣ်ဧၢ,+ မ့ၢ်သုကဘၣ် တၢ်ပာ်ထီၣ်ထီ သုလၢမူခိၣ်ဧါ. လၢတၢ်န့ၣ်အလီၢ် သုကလဲၤလီၤလၢ တၢ်သွၣ်ခိၣ်အပူၤလီၤ.*+ တၢ်လီၤလး မ့ၢ်မၤအသးလၢ ဝ့ၢ်စဒိၣ်အပူၤ ဒ်အမၤအသးလၢ သုဝ့ၢ်ပူၤအသိးန့ၣ် ဝ့ၢ်စဒိၣ် ကအိၣ်ဒံးဝဲ တုၤလၢ မုၢ်မဆါတနံၤအံၤလီၤ.
၂၄ ဘၣ်ဆၣ် ယကတဲဘၣ်သုလၢ ဖဲမုၢ်စံၣ်ညီၣ်အနံၤန့ၣ် သုကဘၣ် တၢ်စံၣ်ညီၣ်သု နးဒိၣ်န့ၢ်ဒံး ဝ့ၢ်စဒိၣ်လီၤ.”+
၂၅ ဖဲန့ၣ်အဆၢကတီၢ် ယ့ၣ်ၡူးတဲဝဲလၢ “မူခိၣ်ဒီးဟီၣ်ခိၣ်အကစၢ် ပၢ်ဧၢ, မ့ၢ်လၢ နပာ်ဖျါထီၣ်န့ၢ် ဖိသၣ်တဖၣ် လၢတၢ်ဂ့ၢ်တဖၣ်အံၤ ဘၣ်ဆၣ် နပာ်ခူသူၣ်အီၤလၢ ပှၤကူၣ်တၢ်သ့ ဒီးပှၤလၢ အဖၠဲးတဖၣ် အမဲာ်ညါ အဃိ ယစံးထီၣ်ပတြၢၤနၤလၢ ပှၤမဲာ်ညါလီၤ.+
၂၆ မ့ၢ်လီၤ ပၢ်ဧၢ, အဝဲအံၤမ့ၢ်ဝဲ တၢ်လၢ အဘၣ်နသးလီၤ.
၂၇ ယပၢ်ဟ့ၣ်လီၤယၤလၢ တၢ်ခဲလၢာ်လံ.+ ပှၤလၢအသ့ၣ်ညါ ဖိခွါအဂ့ၢ် လၢာ်လၢာ်ဆ့ဆ့န့ၣ် အိၣ်ထဲဒၣ် ပၢ်တဂၤလီၤ.+ ဒီးပှၤလၢအသ့ၣ်ညါ ပၢ်အဂ့ၢ်လၢာ်လၢာ်ဆ့ဆ့န့ၣ် အိၣ်ထဲဒၣ်ဖိခွါ ဒီးပှၤလၢဖိခွါ အဲၣ်ဒိး ပာ်ဖျါထီၣ်န့ၢ်အီၤတဖၣ်လီၤ.+
၂၈ ပှၤလၢတၢ်ဘှံးအသး ဒီးဝံတၢ်ယိးတၢ်ဃၢ ခဲလၢာ်သ့ၣ်ဧၢ, ဟဲလၢ ယအိၣ်တက့ၢ်. ယကမၤဆူၣ်ထီၣ် သုသးဂံၢ်ဘါလီၤ.
၂၉ ယိးထီၣ် ယနီၣ်ယိးဘိ ဒီးမၤလိတၢ်လၢ ယအိၣ်တက့ၢ်. မ့ၢ်လၢယသးစူၤ ဒီးယအိၣ်ဒီးတၢ်ဆီၣ်လီၤသးအဃိ+ သုကဒိးန့ၢ်ဘၣ် တၢ်ဂံၢ်တၢ်ဘါလီၤ.
၃၀ ယနီၣ်ယိးဘိန့ၣ် ပှၤယိးဘၣ်အီၤညီ ဒီးယတၢ်ဝံတၢ်ယိးန့ၣ် ဖှံဝဲလီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဆ့ကၤလၢအဂ့ၤ.”
^ အခီပညီလိၤလိၤ “လၢပှၤလၢ ပိာ်မုၣ်အိၣ်ဖျဲၣ်ဝဲတဖၣ်အကျါ.”
^ အခီပညီလိၤလိၤ “ဘၣ်တၢ်ပာ်တီပာ်လိၤအီၤ.”
^ လၢကြံးကျိာ် မ့ၢ်ဝဲ ဟ့ဒံ(စ်). ကွၢ် တၢ်ကတိၤအခီပညီ.
