မးသဲ ၁၈:၁-၃၅
၁၈ ဖဲန့ၣ်အဆၢကတီၢ် အပျဲၢ်အဘီၣ်တဖၣ် ဟဲလၢယ့ၣ်ၡူးအအိၣ် ဒီးတဲဝဲလၢ “ပှၤအဒိၣ်ကတၢၢ်လၢ မူခိၣ်အဘီမုၢ်အပူၤန့ၣ် ကမ့ၢ် မတဂၤလဲၣ်.”+
၂ အဃိ ယ့ၣ်ၡူးကိးန့ၢ်ဝဲ ဖိသၣ်တဂၤ ဒီးဒုးဆၢထၢၣ်အီၤလၢ အဝဲသ့ၣ် အခၢၣ်သးလီၤ.
၃ ဒီးယ့ၣ်ၡူးတဲဝဲလၢ “ယကတဲဘၣ်သု တီတီလၢ သုကဘၣ်ဆီတလဲ သုတၢ်ပာ်သူၣ်ပာ်သး ဒီးကဲထီၣ်ဒ် ဖိသၣ်တဖၣ် အသိးလီၤ.+ သုမ့ၢ်တမၤ ဒ်န့ၣ်ဘၣ်န့ၣ် လ့ၤတက့ၤ သုတနုာ်လီၤဘၣ်လၢ မူခိၣ်အဘီမုၢ် အပူၤဘၣ်.+
၄ ဘၣ်ဆၣ် ပှၤလၢအဆီၣ်လီၤအသး ဒ်ဖိသၣ်တဂၤအံၤ အသိးန့ၣ် ကမ့ၢ် ပှၤအဒိၣ်ကတၢၢ်လၢ မူခိၣ်အဘီမုၢ်အပူၤ+
၅ ဒီးပှၤလၢ အတူၢ်လိာ်ဖိသၣ် ဒ်အံၤတဂၤ လၢယမံၤအဃိန့ၣ် မ့ၢ်အတူၢ်လိာ်ယၤစ့ၢ်ကီးလီၤ.
၆ ဘၣ်ဆၣ် ပှၤလၢအမၤလီၤဃံၢ် ပှၤအဆံးလၢ အနာ်ယၤတဖၣ်အံၤ အကျါတဂၤန့ၣ် ပှၤမ့ၢ်ဘျးထီၣ်အကိာ်ဘိဒီး ဆၢၣ်ဂူာ်လၢၢ်လၢ ကသ့ၣ်ယီၤတွံၢ်အီၤဒီး ကွံာ်လီၤအီၤလၢ ပီၣ်လဲၣ်ပူၤန့ၣ် ကဂ့ၤဒိၣ်လၢအဂီၢ်လီၤ.+
၇ “ခီဖျိလၢ ပှၤလၢအမၤလီၤဃံၢ် ပှၤဂၤတဖၣ်အဃိ ဟီၣ်ခိၣ်ကပှဲၤဒီး တၢ်ကီတၢ်ခဲတဖၣ်လီၤ. ပှၤလၢအမၤလီၤဃံၢ် ပှၤဂၤန့ၣ် ကအိၣ်ဝဲသပှၢ်တၢၢ် ဘၣ်ဆၣ် ပှၤတဖၣ်န့ၣ် ကဘၣ်တၢ်စံၣ်ညီၣ်အီၤလီၤ.
၈ နစု မ့တမ့ၢ် နခီၣ်မ့ၢ်မၤလီၤဃံၢ်နၤန့ၣ် ဒီၣ်တဲာ်အီၤ ဒီးတၢၤကွံာ်အီၤတက့ၢ်.+ နန့ၢ်ဘၣ် တၢ်မူ အိၣ်ဒီးနစုတဂ့ၤခီၣ်တဂ့ၤ မ့တမ့ၢ် နစုတူာ်ခီၣ်တူာ်န့ၣ် ဂ့ၤန့ၢ်ဒံး နဘၣ် တၢ်ကွံာ်လီၤနၤ လၢမ့ၣ်အူ အထူအယိာ်အပူၤ အိၣ်ဒီးနစုခံခီ မ့တမ့ၢ် နခီၣ်ခံခီလီၤ.+
၉ ဒ်န့ၣ်အသိး နမဲာ်ချံတခီ မ့ၢ်မၤလီၤဃံၢ်နၤန့ၣ် ခွဲးထုးထီၣ်ကွံာ်အီၤ ဒီးတၢၤကွံာ်အီၤတက့ၢ်. နမဲာ်ချံအိၣ်တ့ၢ်တခီဒီး နန့ၢ်ဘၣ်တၢ်မူန့ၣ် ဂ့ၤဒိၣ်န့ၢ်ဒံး နအိၣ်ဒီး နမဲာ်ချံခံခီ ဒီးနဘၣ် တၢ်ကွံာ်လီၤနၤလၢ ကဟဲနၢ်* လၢအအိၣ်ဒီးမ့ၣ်အူလီၤ.+
၁၀ ပလီၢ်သုသးဒ်သိး သုတဆိကမိၣ်ဆံး ပှၤအဆံးတဖၣ်အံၤ နီတဂၤတဂ့ၤ. ယကတဲဘၣ်သုလၢ အဝဲသ့ၣ် အမူခိၣ်ကလူးအိၣ်လၢမူခိၣ်န့ၣ် ကွၢ်ထီၣ်ဝဲ ယပၢ်အိၣ်လၢ မူခိၣ်တဂၤ အမဲာ်သၣ်ထီဘိလီၤ.+
၁၁ *—
၁၂ “မ့ၢ်သုဆိကမိၣ်ဒ်လဲၣ်. ပှၤတဂၤ အသိမ့ၢ်အိၣ်ဝဲအဒု ၁၀၀ ဒီးအမ့ၢ်ဟးဖျိးတဒုန့ၣ်+ အဝဲကပာ်တ့ၢ်ကွံာ်အသိ ၉၉ ဒုလၢကစၢၢ်ကျါ ဒီးကလဲၤဃုက့ၤ အသိလၢ အဟးဖျိးတဒုန့ၣ် တမ့ၢ်ဧီၤ.+
၁၃ ယကတဲဘၣ်သု တီတီလၢ အတၢ်သးခုလၢ အဒိးန့ၢ်ဘၣ်ဝဲခီဖျိလၢ အထံၣ်က့ၤအသိလၢ အဟးဖျိးတဒုအဃိန့ၣ် ကဒိၣ်န့ၢ်ဒံး အတၢ်သးခုလၢ သိ ၉၉ ဒုလၢ အတဟးဖျိးဘၣ်တဖၣ်အဃိလီၤ.
၁၄ ဒ်န့ၣ်အသိး ယပၢ်အိၣ်လၢမူခိၣ်န့ၣ် တအဲၣ်ဒိးဝဲလၢ ပှၤအဆံးတဖၣ်အံၤ တဂၤဒၣ်လဲာ် ကလီၤမၢ်ဝဲဘၣ်.+
၁၅ “တကးဒံးဘၣ် နဒီပုၢ်ဝဲၢ်ခွါ မ့ၢ်မၤကမၣ်ဘၣ်နၤန့ၣ် လဲၤပာ်ဖျါထီၣ် အတၢ်ကမၣ်* ဖဲနၤဒီးအီၤ အိၣ်ထဲခံဂၤအခါတက့ၢ်.+ အဝဲမ့ၢ်ဒိကနၣ်နၤန့ၣ် နန့ၢ်ဘၣ်က့ၤ နဒီပုၢ်ဝဲၢ်ခွါလံ.+
၁၆ ဘၣ်ဆၣ် အဝဲမ့ၢ် တဒိကနၣ်နၤဘၣ်န့ၣ် လဲၤကိးဃုာ်ပှၤတဂၤ မ့တမ့ၢ် ခံဂၤတက့ၢ်. နမ့ၢ်မၤဒ်န့ၣ်န့ၣ် တၢ်ဂ့ၢ်ကိးမံၤဒဲးန့ၣ် တၢ်ကပာ်ဂၢၢ်ပာ်ကျၢၤအီၤ လၢပှၤအုၣ်အသး ခံဂၤသၢဂၤ အတၢ်ကတိၤအဃိလီၤ.+
၁၇ ဒီးအဝဲမ့ၢ် တဒိကနၣ်အဝဲသ့ၣ်ဘၣ်န့ၣ် လဲၤတဲဘၣ် တၢ်အိၣ်ဖှိၣ်တက့ၢ်. ဒီးမ့ၢ်တဒိကနၣ်ဝဲ တၢ်အိၣ်ဖှိၣ်ဘၣ်န့ၣ် ပာ်အီၤဒ် ပှၤကလုာ်အဂၤတဂၤ+ ဒီးပှၤထၢတၢ်ခိတၢ်သွဲ အသိးတက့ၢ်.+
၁၈ “ယကတဲဘၣ်သု တီတီလၢ တၢ်လၢသုစၢဃာ်အီၤလၢ ဟီၣ်ခိၣ်ချၢန့ၣ် မ့ၢ်တၢ်လၢ အစၢဃာ်ပာ်စၢၤအသးလၢ မူခိၣ်လံ. ဒီးတၢ်လၢသုဃဲၣ်လီၤလၢ ဟီၣ်ခိၣ်ချၢန့ၣ် မ့ၢ်တၢ်လၢ အဃဲၣ်လီၤပာ်စၢၤအသးလၢ မူခိၣ်လီၤ.
၁၉ ယကတဲဘၣ်ကဒီးသု တီတီလၢ သုခံဂၤလၢဟီၣ်ခိၣ်ချၢ မ့ၢ်သးလီၤပလိာ်လၢ ကဃ့တၢ်လၢ အရ့ဒိၣ်တမံၤမံၤန့ၣ် ယပၢ်အိၣ်လၢမူခိၣ် ကမၤလၢပှဲၤန့ၢ်သုလီၤ.+
၂၀ ဖဲပှၤခံဂၤ မ့တမ့ၢ် သၢဂၤ အိၣ်ဖှိၣ်ရိဖှိၣ်လၢ ယမံၤအခါန့ၣ်+ ယကအိၣ်လၢ အဝဲသ့ၣ်အကျါလီၤ.”
၂၁ ဒီးစီၤပ့းတရူး ဟဲတဲဘၣ်ယ့ၣ်ၡူးလၢ “ကစၢ်ဧၢ, ယဒီပုၢ်ဝဲၢ် မ့ၢ်မၤကမၣ်ဘၣ်ယၤန့ၣ် ယကဘၣ်ပျၢ် အတၢ်ကမၣ် ပှဲၤဘျီလဲၣ်. တုၤလၢ အပှဲၤထီၣ် နွံဘျီညါဧါ.”
၂၂ ယ့ၣ်ၡူး တဲဘၣ်အီၤလၢ “ယကတဲနၤ တမ့ၢ်ထဲဒၣ် ၇ ဘျီဘၣ်, တုၤလၢ ၇၇ ဘျီလီၤ.+
၂၃ “အဃိ မူခိၣ်အဘီအမုၢ်န့ၣ် ဘၣ်တၢ်ဒိလီၤအီၤ ဒ်သိးဒီး စီၤပၤတဂၤလၢ အအဲၣ်ဒိးလၢ အကုၢ်တဖၣ် ကလိးက့ၤအကမၢ်လီၤ.
၂၄ ဖဲအစးထီၣ်ဃ့က့ၤဝဲ အကမၢ်အခါ ပှၤဟဲကိးဝဲ ပိာ်ခွါတဂၤလၢ အကမၢ်ထီၣ်ဒီးအီၤ စ့အတၤလၣ်* ၁၀,၀၀၀ လီၤ.
၂၅ ဘၣ်ဆၣ် မ့ၢ်လၢအလိးက့ၤ အကမၢ်အံၤ တန့ၢ်ဘၣ်အဃိ စီၤပၤဟ့ၣ်လီၤတၢ်ကလုၢ်လၢ အဝဲဒီးအဖိဒီးအမါ ကဘၣ်တၢ်ဆါလီၤကွံာ်အီၤ ဒ်ကုၢ်အသိး ဒီးတၢ်လၢ အအိၣ်ဒီးအီၤခဲလၢာ် ကဘၣ် တၢ်ဆါလီၤကွံာ်အီၤစ့ၢ်ကီး ဒ်သိးအကလိးက့ၤ အကမၢ်အဂီၢ်လီၤ.+
၂၆ အဃိ ကုၢ်တဂၤန့ၣ် ထိၣ်လီၤပှီၤအသး, ယူးယီၣ်အီၤ ဒီးတဲဝဲလၢ ‘ဝံသးစူၤယၤနီၤ, ယကလိးက့ၤနၤ တၢ်ခဲလၢာ်လီၤ.’
၂၇ ဖဲန့ၣ်န့ၣ် စီၤပၤသးကညီၤဘၣ်ဝဲ ကုၢ်တဂၤန့ၣ် ဒီးမၤလီၤတူာ်ကွံာ် အကမၢ်ခဲလၢာ် ဒီးပျၢ်ကွံာ်အီၤလီၤ.+
၂၈ ဘၣ်ဆၣ် ကုၢ်အံၤက့ၤဃုဝဲ ကုၢ်လၢအဂၤတဂၤလၢ အဘၣ်လိးက့ၤအီၤ စ့ဒန့ၤရံၤ* ၁၀၀ ဒီးဖဲအထံၣ်အီၤအခါ အဖီၣ်တံၢ်ဃာ်အီၤ, ဘံးဝဲအကိာ်ဘိ ဒီးတဲဝဲလၢ ‘လိးက့ၤယၤ နကမၢ်ခဲလၢာ်သၢၤ.’
၂၉ ကုၢ်တဂၤန့ၣ် ထိၣ်လီၤပှီၤအသး ဒီးဃ့ကညးအီၤလၢ ‘ဝံသးစူၤယၤနီၤ, ယကလိးက့ၤနၤလီၤ.’
၃၀ ဘၣ်ဆၣ် အဝဲတတူၢ်လိာ်ဝဲဘၣ်. လၢတၢ်န့ၣ်အလီၢ် အဝဲလဲၤမၢပှၤဖၢနုာ် ကုၢ်တဂၤန့ၣ်လၢ ဃိာ်ပူၤတုၤလၢ အလိးက့ၤအကမၢ်လီၤ.
၃၁ ဖဲကုၢ်အဂၤတဖၣ် ထံၣ်ဘၣ်ဝဲတၢ်ကဲထီၣ် အသးဒ်န့ၣ်အခါ အဝဲသ့ၣ် သးတမုာ်ဘၣ် ဖးဒိၣ်ညါလီၤ. အဃိ အဝဲသ့ၣ်လဲၤတဲဘၣ် စီၤပၤလၢ တၢ်ကဲထီၣ်အသး ခဲလၢာ်လီၤ.
၃၂ အဃိ စီၤပၤကိးန့ၢ်အီၤ ဒီးတဲအီၤလၢ ‘ကုၢ်လၢအအၢတဂၤဧၢ, ဖဲနဃ့ကညးယၤအခါ ယမၤလီၤတူာ်ကွံာ် နကမၢ်ခဲလၢာ်လီၤ.
၃၃ ဒ်ယပာ်ဖျါထီၣ် တၢ်သးကညီၤလၢ နဖီခိၣ်အသိး နတကြၢး ပာ်ဖျါထီၣ် တၢ်သးကညီၤလၢ ကုၢ်အဝဲတဂၤ အဖီခိၣ်ဧီၤ.’+
၃၄ ဒီးစီၤပၤသးဒိၣ်ထီၣ်တၢ် ဒီးဟ့ၣ်လီၤကွံာ်အီၤလၢ ပှၤကွၢ်ဃိာ်ဖိတဖၣ်အစုပူၤ တုၤလီၤလၢ အလိးက့ၤ အကမၢ်ခဲလၢာ်လီၤ.
၃၅ အဃိ သုဝဲတဂၤစုာ်စုာ် သုမ့ၢ်တပျၢ်ကွံာ် သုဒီပုၢ်ဝဲၢ် အတၢ်ကမၣ် လၢသုသးဒီဖျၢၣ်ဘၣ်န့ၣ်+ ယပၢ်အိၣ်လၢမူခိၣ်စ့ၢ်ကီး ကမၤသုဒ်န့ၣ် အသိးလီၤ.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ အခီပညီလိၤလိၤ “လဲၤသိၣ်ဃီၣ်အီၤ.”
^ စ့အတၤလၣ် တကလး န့ၣ် အိၣ်ဝဲစ့ဒန့ၤရံၤ အကကွဲၢ်ဃုဆံ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
