မးသဲ ၁၉:၁-၃၀
၁၉ ဖဲယ့ၣ်ၡူးတဲ တၢ်ဂ့ၢ်တဖၣ်န့ၣ် ဝံၤအလီၢ်ခံ အဝဲဟးထီၣ်လၢ ကၤလံၤလါ ဒီးလဲၤဝဲလၢ ယူဒၤအဟီၣ်ကဝီၤအဆၢ လၢထံကျိယၢ်ဒ့ၣ်အဝၢ်ဘးခီလီၤ.+
၂ ဒီးပှၤဂီၢ်မုၢ်ဖးဒိၣ် ပိာ်ထီၣ်အခံ ဒီးဖဲန့ၣ်န့ၣ် ယ့ၣ်ၡူးမၤဘျါက့ၤ အဝဲသ့ၣ်လီၤ.
၃ ဒီးပှၤဖၤရံၤၡဲတဖၣ် ဟဲလၢအအိၣ် ဒ်သိး ကမၤကွၢ်အီၤလီၤ. အဝဲသ့ၣ် သံကွၢ်အီၤလၢ “ပိာ်ခွါတဂၤ မ့ၢ်မၤကတၢၢ်ကွံာ် အတၢ်ဆီဟံၣ်ဆီဃီဒီးအမါ လၢတၢ်ဂ့ၢ် တမံၤဂ့ၤတမံၤဂ့ၤ အဃိန့ၣ် မ့ၢ်အဘၣ် တၢ်သိၣ်တၢ်သီစ့ၢ်ကီးဧါ.”+
၄ ယ့ၣ်ၡူး တဲဆၢဝဲလၢ “လၢအခီၣ်ထံးန့ၣ် ပှၤလၢအတ့လီၤ ပှၤဟီၣ်ခိၣ်ဖိန့ၣ် တ့လီၤဝဲ ပိာ်ခွါတဂၤ ဒီးပိာ်မုၣ်တဂၤန့ၣ် သုတဖးဘၣ်ဧီၤ.+
၅ ဒီးအဆဲးတဲဝဲလၢ ‘လၢတၢ်န့ၣ်အဃိ ပိာ်ခွါကပာ်တ့ၢ် အမိၢ်အပၢ် ဒီးကလဲၤအိၣ်ဒီးအမါ* ဒီးအဝဲသ့ၣ်ခံဂၤန့ၣ် ကကဲထီၣ် တၢ်တမံၤဃီလီၤ.’+
၆ အဃိ အဝဲသ့ၣ်တမ့ၢ် ပှၤခံဂၤလၢၤဘၣ်. မ့ၢ်ဝဲတၢ်တမံၤဃီလီၤ. အဃိ တၢ်လၢကစၢ်ယွၤ ဒုးအိၣ်ဃုာ်ဝဲန့ၣ် မ်ပှၤဟီၣ်ခိၣ်ဖိ သုတထုးဖးအီၤတဂ့ၤ.”+
၇ အဝဲသ့ၣ် တဲဘၣ်ယ့ၣ်ၡူးလၢ “မ့မ့ၢ်ဒ်န့ၣ်န့ၣ် ဘၣ်မနုၤအဃိ စီၤမိၤၡ့ မၤလိာ်ဝဲလၢ ပှၤကဟ့ၣ်လီၤဝဲ လံာ်လီၤဖးလၢ ပှၤကမၤကတၢၢ်ကွံာ် အတၢ်ဆီဟံၣ်ဆီဃီဒီးအမါ အဂီၢ်လဲၣ်.”+
၈ ယ့ၣ်ၡူး တဲဘၣ်အဝဲသ့ၣ်လၢ “ခီဖျိလၢ သုခိၣ်ကိၤအဃိ စီၤမိၤၡ့ ဟ့ၣ်အခွဲးလၢ သုကမၤကတၢၢ်ကွံာ် သုတၢ်ဆီဟံၣ်ဆီဃီ ဒီးသုမါလီၤ.+ ဘၣ်ဆၣ် လၢအခီၣ်ထံးလံၤလံၤန့ၣ် တမ့ၢ်ဒ်န့ၣ်ဘၣ်.+
၉ ယကတဲသုလၢ မ့တမ့ၢ်ဘၣ်လၢ တၢ်မၤကမၣ်မုၣ်ကမၣ်ခွါ* အဃိဘၣ်န့ၣ် ပှၤမ့ၢ်မၤကတၢၢ်ကွံာ် အတၢ်ဆီဟံၣ်ဆီဃီ ဒီးအမါ ဒီးအဝဲမ့ၢ်ဆီဟံၣ်ဆီဃီဒီး ပှၤလၢအဂၤတဂၤန့ၣ် မ့ၢ်အအဲၣ်ဘၢအမါလီၤ.”+
၁၀ ဒီးအပျဲၢ်အဘီၣ်တဖၣ် တဲဘၣ်ယ့ၣ်ၡူးလၢ “တၢ်ဆီဟံၣ်ဆီဃီ မ့ၢ်ဘၣ်အိၣ်ဝဲဒ်န့ၣ်န့ၣ် တကြၢးလၢ ပှၤဆီဟံၣ်ဆီဃီဘၣ်.”
၁၁ ယ့ၣ်ၡူးတဲဘၣ် အဝဲသ့ၣ်လၢ “ပှၤလူၤပိာ်ထွဲ တၢ်ကတိၤအံၤ တန့ၢ်ကိးဂၤဒဲးဘၣ်. ပှၤလူၤပိာ်ထွဲန့ၢ်ထဲဒၣ် ပှၤလၢအတူၢ်လိာ် တၢ်ဟ့ၣ်အံၤလီၤ.+
၁၂ ပှၤတနီၤန့ၣ် အိၣ်ဖျဲၣ်လီၤပာ်စၢၤဝဲဒ် ပှၤဒ့ဒံၣ်ဖိ* အသိး, မ့မ့ၢ် ပှၤဒ့ဒံၣ်ဖိအဂၤတနီၤန့ၣ် ပှၤဒ့အဒံၣ်လီၤ. ဒီးပှၤတနီၤန့ၣ် ဒုးကဲထီၣ် အနီၢ်ကစၢ်လၢ ပှၤဒ့ဒံၣ်ဖိ လၢမူခိၣ်ဘီမုၢ်အဃိလီၤ. ပှၤလူၤပိာ်ထွဲ တၢ်ကတိၤအံၤ မ့ၢ်န့ၢ်န့ၣ် မ်အလူၤပိာ်ထွဲတက့ၢ်.”+
၁၃ ဝံၤဒီး ပှၤဟဲကိး ဖိသၣ်တဖၣ်လၢ ယ့ၣ်ၡူးအအိၣ် ဒ်သိး အကပာ်ထီၣ်အစုလၢ အဝဲသ့ၣ်အလိၤ ဒီးဘါထုကဖၣ်တၢ်လၢ အဝဲသ့ၣ်အဂီၢ်လီၤ. ဘၣ်ဆၣ် ယ့ၣ်ၡူးအပျဲၢ်အဘီၣ်တဖၣ် သိၣ်ပှၤတဖၣ်န့ၣ်လီၤ.+
၁၄ ဘၣ်ဆၣ် ယ့ၣ်ၡူးတဲဝဲလၢ “ပျဲဖိသၣ်တဖၣ် ဟဲလၢယအိၣ် ဒီးတြီအဝဲသ့ၣ်တဂ့ၤ. မူခိၣ်အဘီအမုၢ်န့ၣ် မ့ၢ်ပှၤဒ်အံၤတဖၣ် အတၢ်လီၤ.”+
၁၅ ဒီးယ့ၣ်ၡူး ပာ်ထီၣ်အစုလၢ အဝဲသ့ၣ်အလိၤဝံၤဒီး ဟးထီၣ်ကွံာ်ဝဲဖဲန့ၣ်လီၤ.
၁၆ ဒီးပှၤတဂၤ ဟဲတဲအီၤလၢ “သရၣ်ဧၢ, ဒ်သိးယကဒိးန့ၢ်ဘၣ် တၢ်မူအထူအယိာ်အဂီၢ် ယကဘၣ်မၤတၢ်လၢ အဂ့ၤမနုၤလဲၣ်.”+
၁၇ ယ့ၣ်ၡူးတဲအီၤလၢ “ဘၣ်မနုၤအဃိ နသံကွၢ်ယၤ ဘၣ်ဃးဒီး တၢ်ဂ့ၤအဂ့ၢ်လဲၣ်. ပှၤလၢအဂ့ၤန့ၣ် အိၣ်ထဲတဂၤလီၤ.+ ဘၣ်ဆၣ် နမ့ၢ်အဲၣ်ဒိးန့ၢ်ဘၣ် တၢ်မူန့ၣ် မၤထွဲတၢ်မၤလိာ်တဖၣ် ထီဘိတက့ၢ်.”+
၁၈ ဒီးအတဲယ့ၣ်ၡူးလၢ “တၢ်မၤလိာ် မနုၤတဖၣ်လဲၣ်.” ယ့ၣ်ၡူးတဲအီၤလၢ “နတဘၣ် မၤသံပှၤနီတဂၤတဂ့ၤ,+ နတဘၣ် အဲၣ်ဘၢမါအဲၣ်ဘၢဝၤတဂ့ၤ,+ နတဘၣ် ဟုၣ်တၢ်တဂ့ၤ+ ဒီးနတဘၣ် အုၣ်သး ကဘျံးကဘျၣ်တဂ့ၤ.+
၁၉ ယူးယီၣ်ပာ်ကဲ နမိၢ်ဒီးနပၢ်တက့ၢ်.+ ဒီးနကဘၣ် အဲၣ်ပှၤလၢနဃၢၤ ဒ်နအဲၣ်လီၤနနီၢ်ကစၢ်အသး အသိးလီၤ.”+
၂၀ ဒီးပှၤသးစၢ်တဂၤအံၤ တဲအီၤလၢ “တၢ်သ့ၣ်တဖၣ်န့ၣ် ယမၤထွဲအီၤခဲလၢာ်လံ. ယကဘၣ် မၤဒံးမနုၤလဲၣ်.”
၂၁ ယ့ၣ်ၡူးတဲဘၣ်အီၤလၢ “နမ့ၢ်အဲၣ်ဒိးကဲထီၣ် ပှၤလၢပှၤပှဲၤန့ၣ်* ဆါလီၤကွံာ်တၢ်လၢ အအိၣ်ဒီးနၤ ဒီးဟ့ၣ်လီၤ ပှၤဖှီၣ်ဖိယာ်ဖိ ဒီးနကအိၣ်ဒီး တၢ်လုၢ်ဒိၣ်ပှ့ၤဒိၣ် လၢမူခိၣ်လီၤ.+ မ့ၢ်ဝံၤန့ၣ် ဟဲပိာ်ယခံဟီ.”+
၂၂ မ့ၢ်လၢ ပှၤသးစၢ်တဂၤအံၤ အတၢ်စုလီၢ်ခီၣ်ခိၣ် အိၣ်ဝဲအါမး အဃိ ဖဲအနၢ်ဟူဝဲဒ်န့ၣ်အခါ အဝဲက့ၤလၢ တၢ်သးအုးအပူၤလီၤ.+
၂၃ ဖဲန့ၣ်ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “ယကတဲဘၣ်သု တီတီလၢ ပှၤထူးပှၤတီၤတဂၤ ကလဲၤနုာ်လၢ မူခိၣ်အဘီမုၢ်အပူၤန့ၣ် ကီမးလီၤ.+
၂၄ ယကတဲကဒီးသုလၢ ကီၤလၤအူး လဲၤနုာ်လီၤလၢ ထးအမဲၢ်ခံန့ၣ် ညီဒိၣ်န့ၢ်ဒံး ပှၤထူးပှၤတီၤတဂၤ ကလဲၤနုာ်လီၤလၢ ကစၢ်ယွၤ အဘီမုၢ်အပူၤလီၤ.”+
၂၅ ဖဲအပျဲၢ်အဘီၣ်တဖၣ် နၢ်ဟူဘၣ် တၢ်ဂ့ၢ်အံၤအခါ အဝဲသ့ၣ် ကမၢကမၣ်ဒိၣ်မး ဒီးတဲဝဲလၢ “မတဂၤ န့ၢ်ဘၣ် တၢ်အုၣ်က့ၤခီၣ်က့ၤ ကသ့လဲၣ်.”+
၂၆ ယ့ၣ်ၡူး ကွၢ်အဝဲသ့ၣ်ထံထံ ဒီးတဲဘၣ် အဝဲသ့ၣ်လၢ “လၢပှၤဟီၣ်ခိၣ်ဖိ အတၢ်ထံၣ်န့ၣ် အကဲထီၣ်အသးတသ့ဘၣ်. ဘၣ်ဆၣ် ကစၢ်ယွၤန့ၣ် မၤတၢ်သ့ ခဲလၢာ်လီၤ.”+
၂၇ စီၤပ့းတရူး တဲဆၢဝဲလၢ “မ့မ့ၢ်ပှၤန့ၣ် ပပာ်တ့ၢ်ကွံာ် တၢ်ခဲလၢာ် ဒီးပပိာ်နခံလံ. အဃိ ပကန့ၢ်ဘၣ် တၢ်မနုၤလဲၣ်.”+
၂၈ ယ့ၣ်ၡူး တဲဘၣ်အဝဲသ့ၣ်လၢ “ယကတဲဘၣ်သု တီတီလၢ ဖဲတၢ်ဒုးကဲထီၣ်က့ၤ တၢ်ခဲလၢာ်လၢအသီ ဒီးဖဲ ပှၤကညီဖိခွါအံၤ ဆ့ၣ်နီၤလၢ အလီၢ်ပစိာ် ကဟုကညီၢ်အလိၤအခါ သုဝဲလၢ အပိာ်ယခံန့ၣ် ကဆ့ၣ်နီၤလၢ လီၢ်ပစိာ် ၁၂ ဖျၢၣ်အဖီခိၣ် ဒီးကစံၣ်ညီၣ် အံၣ်စရ့လး ၁၂ ဒူၣ်လီၤ.+
၂၉ ဒီးပှၤကိးဂၤဒဲးလၢ အပာ်တ့ၢ်ကွံာ် အဟံၣ်အဃီမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိမ့ၢ်ဂ့ၤ, အစံာ်ဧိၤပှဲၤဧိၤမ့ၢ်ဂ့ၤ လၢယမံၤအဃိန့ၣ် အဝဲသ့ၣ် ကန့ၢ်ဘၣ်က့ၤ အါန့ၢ်ဒံးအလီၢ် အစးတကယၤ ဒီးကန့ၢ်ဘၣ် တၢ်မူအထူအယိာ်လီၤ.+
၃၀ “ဘၣ်ဆၣ် ပှၤအါဂၤလၢ အအိၣ်လၢတၢ်မဲာ်ညါန့ၣ် ကအိၣ်က့ၤလၢ တၢ်လီၢ်ခံ ဒီးပှၤလၢ အအိၣ်လၢ တၢ်လီၢ်ခံန့ၣ် ကအိၣ်က့ၤလၢ တၢ်မဲာ်ညါလီၤ.+
တၢ်ဂ့ၢ်အဘျဲၣ်တဖၣ်
^ ကြံးအတၢ်ကတိၤအံၤ အခီပညီမ့ၢ်ဝဲ “ဘုးတာ်လိာ်သးဃံးဃံးဒ်ကီၣ်အသိး.”
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ မ့ၢ်ဝဲ လၢပှဲၤလၢ ကစၢ်ယွၤအမဲာ်ညါ.
