မၢ်ကူး ၁၅:၁-၄၇
၁၅ ဖဲမုၢ်ဝါထီၣ် တဘျီဃီန့ၣ် ပှၤလုၢ်တၢ်ဒိၣ်အခိၣ်တဖၣ် ဒီးပှၤသူၣ်က့သးပှၢ် ဒီးပှၤကွဲးလံာ်ဖိတဖၣ် လၢအမ့ၢ် ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် ဒီတဖုန့ၣ် အိၣ်ဖှိၣ်ဝဲ ဒီးကူၣ်ထီၣ်တၢ်လီၤ. အဝဲသ့ၣ် စၢဃာ်ယ့ၣ်ၡူး ဒီးဆှၢထီၣ်အီၤ ဒီးဟ့ၣ်လီၤအီၤလၢ စီၤပံၤလးအစုပူၤလီၤ.+
၂ ဒီးစီၤပံၤလး သံကွၢ်ယ့ၣ်ၡူးလၢ “နကဲပှၤယူဒၤဖိ အစီၤပၤဧါ.”+ ယ့ၣ်ၡူး တဲဆၢက့ၤအီၤလၢ “ဒ်နတဲအသိးလီၤ.”+
၃ ပှၤလုၢ်တၢ်ဒိၣ်အခိၣ်တဖၣ် ပာ်ဒ့ၣ်ပာ်ကမၣ် ယ့ၣ်ၡူးလၢ တၢ်ဂ့ၢ်အါမံၤလီၤ.
၄ ဒီးစီၤပံၤလး သံကွၢ်ကဒီးယ့ၣ်ၡူး ဒီးတဲဝဲလၢ “နတက့ၤတဲဆၢက့ၤ တၢ်နီတမံၤဧီၤ.+ အဝဲသ့ၣ် ပာ်ဒ့ၣ်ပာ်ကမၣ်နၤ အါထဲထဲအံၤန့ၣ် နတနၢ်ဟူဧီၤ.”+
၅ ဘၣ်ဆၣ် ယ့ၣ်ၡူး တတဲဆၢက့ၤအီၤ နီတမံၤလၢၤဘၣ်အဃိ စီၤပံၤလး ကမၢကမၣ်ဝဲ ဒိၣ်မးလီၤ.+
၆ ဖဲဘူၣ်လဲၤကပာ်ဘၣ်ဝဲ တဘျီဂ့ၤ တဘျီဂ့ၤအခါ စီၤပံၤလး ပျၢ်ကွံာ်ဝဲ ပှၤဃိာ်ဖိတဂၤလၢ ပှၤဃ့ထီၣ်ဝဲလီၤ.+
၇ ဖဲန့ၣ်အခါ ပှၤပိာ်ခွါအိၣ်တဂၤလၢ အမ့ၢ် စီၤဘၤရးဘါလီၤ. အဝဲဒီး ပှၤလၢအအိၣ်ဒီးအီၤ လၢဃိာ်ပူၤန့ၣ် မ့ၢ်ပှၤလၢ အထီဒါပဒိၣ် ဒီးမၤသံတၢ်လီၤ.
၈ အဃိ ပှၤဂီၢ်မုၢ်တဖၣ်ဟဲဃ့ဝဲလၢ စီၤပံၤလး ကမၤန့ၢ်အဝဲသ့ၣ် ဒ်အမၤညီနုၢ်ဝဲ အသိးလီၤ.
၉ စီၤပံၤလးတဲဆၢက့ၤ အဝဲသ့ၣ်လၢ “မ့ၢ်သုအဲၣ်ဒိးလၢ ယကပျၢ်ကွံာ်န့ၢ်သု ပှၤယူဒၤဖိ အစီၤပၤဧါ.”+
၁၀ စီၤပံၤလး သ့ၣ်ညါဝဲလၢ ပှၤလုၢ်တၢ်ဒိၣ်အခိၣ်တဖၣ် သးက့ၣ် ယ့ၣ်ၡူးအဃိ အဝဲသ့ၣ် ဟ့ၣ်လီၤကွံာ်အီၤလီၤ.+
၁၁ ဘၣ်ဆၣ် ပှၤလုၢ်တၢ်ဒိၣ်အခိၣ်တဖၣ် ဆီၣ်ထွဲဝဲ ပှၤဂီၢ်မုၢ်တဖၣ် ဒ်သိးကဃ့ဝဲလၢ ပှၤကပျၢ်ကွံာ် စီၤဘၤရးဘါလီၤ.+
၁၂ စီၤပံၤလး တဲဘၣ်အဝဲသ့ၣ်လၢ “မ့မ့ၢ်ဒ်န့ၣ်န့ၣ် ပှၤလၢ သုကိးအီၤလၢ ပှၤယူဒၤဖိ အစီၤပၤတဂၤန့ၣ် ယကဘၣ်မၤအီၤဒ်လဲၣ်.”+
၁၃ အဝဲသ့ၣ် ကိးပသူထီၣ်ကဒီးလၢ “ပျၤထီအီၤလၢ သ့ၣ်တၢၣ်အလိၤန့ၣ်.”*+
၁၄ ဘၣ်ဆၣ် စီၤပံၤလး တဲအဝဲသ့ၣ်လၢ “ဘၣ်မနုၤအဃိလဲၣ်. အမၤဘၣ်တၢ်အၢ မနုၤလဲၣ်.” ဘၣ်ဆၣ် အဝဲသ့ၣ် ဆဲးကိးပသူထီၣ်ဝဲ ဆူၣ်န့ၢ်ဒံးအလီၢ်လၢ “ပျၤထီအီၤလၢ သ့ၣ်တၢၣ်အလိၤန့ၣ်.”+
၁၅ မ့ၢ်လၢ စီၤပံၤလး အဲၣ်ဒိးမၤမုာ် ပှၤဂီၢ်မုၢ်အသးအဃိ အဝဲပျၢ်ကွံာ်န့ၢ် အဝဲသ့ၣ်လၢ စီၤဘၤရးဘါလီၤ. ဒီးအဝဲမၢပှၤဖျ့ ယ့ၣ်ၡူးဝံၤဒီး+ ဟ့ၣ်လီၤကွံာ်အီၤဒ်သိး ပှၤကမၤသံအီၤလၢ သ့ၣ်တၢၣ်အလိၤလီၤ.+
၁၆ သုးဖိတဖၣ် လဲၤကိးအီၤလၢကရၢၢ်ပူၤ ဖဲပဒိၣ်ဖးဒိၣ် အိၣ်တၢ်အလီၢ်လီၤ. ဒီးအဝဲသ့ၣ် ကိးဖှိၣ် ပှၤသုးဖိ ဒီတဖုလီၤ.+
၁၇ အဝဲသ့ၣ် ဒုးကၤထီၣ် ယ့ၣ်ၡူးလၢ ဆ့ကၤဖးထီလၢ အလွဲၢ်လုးတဘ့ၣ် ဒီးသံၣ်ထီၣ်ဝဲ တၤဆှုၣ်တဖၣ် ဒ်ခိၣ်သလုးအသိး ဒီးဒုးဖျီၣ်ထီၣ်အီၤလီၤ.
၁၈ ဒီးအဝဲသ့ၣ် တဲယ့ၣ်ၡူးလၢ “ပှၤယူဒၤဖိ အစီၤပၤဧၢ, ပဆၢဂ့ၤဆၢဝါနၤလီၤ.”+
၁၉ တကးဒံးဘၣ် အဝဲသ့ၣ် တီၢ်ဝဲအခိၣ်သၣ်ဃံလၢ တပိၢ်ဘိ ဒီးထူးပှဲာ်ဒိးအီၤ ဒီးအဝဲသ့ၣ် ချံးလီၤအခီၣ် ဒီးဆုးလီၤအခိၣ်လၢ အမဲာ်ညါလီၤ.
၂၀ အဝဲသ့ၣ် ဒုၣ်ဒွဲၣ်စံးအၢအီၤဝံၤဒီး ဘ့ၣ်လီၤကွံာ် ဆ့ကၤဖးထီလၢ အလွဲၢ်လုး လၢအလိၤ ဒီးဒုးကၤထီၣ်က့ၤအီၤလၢ အနီၢ်ကစၢ် အတၢ်ကူတၢ်ကၤလီၤ. ဒီးအဝဲသ့ၣ် လဲၤဆှၢထီၣ်အီၤ ဒ်သိးကပျၤထီအီၤလၢ သ့ၣ်တၢၣ်အလိၤလီၤ.+
၂၁ ဒီးပှၤကူၤရ့ၤန့ဖိ စီၤၡံမိၣ် လၢအမ့ၢ် စီၤအလ့းစၣ်ဒြူး ဒီးစီၤရူဖူးအပၢ်န့ၣ် အအိၣ်ဟဲလၢခိခိၣ်လီၤ. ဘၣ်အတီၤလၢ အဟဲအဃိ အဝဲသ့ၣ် မၢဆူၣ်အီၤလၢ ကယိးဝဲ ယ့ၣ်ၡူး အတၢ်မၤအၢမၤနး အသ့ၣ်တၢၣ်လီၤ.*+
၂၂ အဝဲသ့ၣ် လဲၤကိးယ့ၣ်ၡူးလၢ တၢ်လီၢ်လၢ ပှၤကိးအီၤလၢ ကီၤလၤကီၤသါ လၢအခီပညီမ့ၢ်ဝဲ “ခိၣ်သၣ်ဃံကုအလီၢ်”+ လီၤ.
၂၃ ဖဲန့ၣ်န့ၣ် အဝဲသ့ၣ် ကဟ့ၣ်အီအီၤ စပံးထံလၢ ပှၤဃါဃုာ်အီၤဒီးမူရၣ်*+ ဘၣ်ဆၣ် အဝဲတအီဝဲဘၣ်.
၂၄ အဝဲသ့ၣ် ပျၤထီအီၤလၢ သ့ၣ်တၢၣ်အလိၤဒီး ဖးတၢ်ဒ်သိး ကနီၤဖးလိာ်အသးလၢ ယ့ၣ်ၡူး အကူအသိး ဒီးကဆၢတဲာ်ဝဲလၢ မတဂၤ ကန့ၢ်ဘၣ် တၢ်မနုၤလဲၣ်န့ၣ်လီၤ.+
၂၅ ဒီးဘၣ်ဖဲ ဂီၤခီ ၉ နၣ်ရံၣ်ဃၣ်ဃၣ်* အဆၢကတီၢ်န့ၣ် ပှၤပျၤထီအီၤလၢ သ့ၣ်တၢၣ်အလိၤလီၤ.
၂၆ ဒီးဒ်သိး ကပာ်ဖျါထီၣ်ဝဲလၢ ပှၤပာ်ဒ့ၣ်ပာ်ကမၣ် ယ့ၣ်ၡူးလၢ တၢ်ဂ့ၢ်မနုၤလဲၣ်အဂီၢ် အဝဲသ့ၣ် ကွဲးလီၤဝဲလၢ “ပှၤယူဒၤဖိ အစီၤပၤလီၤ.”+
၂၇ တကးဒံးဘၣ် အဝဲသ့ၣ် ပျၤထီဝဲ တၢ်ဘျၣ်ခံဂၤလၢ သ့ၣ်တၢၣ်အလိၤလၢ ယ့ၣ်ၡူးအစုထွဲ တကပၤတဂၤ ဒီးလၢအစုစ့ၣ် တကပၤတဂၤလီၤ.+
၂၈ *—
၂၉ ပှၤလၢအလ့ၢ်ထီၣ်လ့ၢ်လိၤ ဖဲန့ၣ်တဖၣ် ဒုၣ်ဒွဲၣ်စံးအၢအီၤ ဒီးဂံၤဂုၤအခိၣ်+ ဒီးတဲဝဲလၢ “ပှၤလၢအတဲဝဲလၢ အကမၤလီၤပှီၢ်ကွံာ် တၢ်လုၢ်ဟံၣ် ဒီးကသူၣ်ထီၣ်က့ၤအီၤလၢ သၢသီအတီၢ်ပူၤတဂၤဧၢ,+
၃၀ မၤပူၤဖျဲးလီၤနသး ဒီးဟဲက့ၤလီၤလၢ တၢ်မၤအၢမၤနး အသ့ၣ်တၢၣ်အလိၤသၢၤ.”
၃၁ ဒ်န့ၣ်အသိး ပှၤလုၢ်တၢ်ဒိၣ်အခိၣ်တဖၣ် ဒီးပှၤကွဲးလံာ်ဖိတဖၣ်စ့ၢ်ကီး ဒုၣ်ဒွဲၣ်စံးအၢအီၤ ဒီးတဲလိာ်အသး ကဒဲကဒဲလၢ “ပှၤဂၤန့ၣ် အမၤပူၤဖျဲးဝဲ မ့မ့ၢ်အနီၢ်ကစၢ်န့ၣ် အမၤပူၤဖျဲးလီၤအသး တသ့ဘၣ်.+
၃၂ အမ့မ့ၢ် အံၣ်စရ့လး အစီၤပၤ ခရံာ်န့ၣ် အကဘၣ်ဟဲက့ၤလီၤလၢ တၢ်မၤအၢမၤနး အသ့ၣ်တၢၣ်* အလိၤခဲအံၤသၢၤ. ပမ့ၢ်ထံၣ်ဒ်န့ၣ်မး ပကနာ်အီၤသၢၤ.”+ ဒီးပှၤလၢ အဘၣ်တၢ်ပျၤထီအီၤလၢ သ့ၣ်တၢၣ်အလိၤလၢ ယ့ၣ်ၡူးအကပၤဒၣ်လဲာ် ဒုၣ်ဒွဲၣ်စံးအၢအီၤ စ့ၢ်ကီးလီၤ.+
၃၃ စးထီၣ်လၢ မုၢ်ဆါခီ ၁၂ နၣ်ရံၣ်* တုၤလီၤလၢ ဟါလီၤခီ ၃ နၣ်ရံၣ်န့ၣ်* တၢ်ခံးလီၤဝဲလၢ ကီၢ်ဒီဘ့ၣ်ညါလီၤ.+
၃၄ ဒီးဖဲဟါလီၤခီ ၃ နၣ်ရံၣ်န့ၣ်* ယ့ၣ်ၡူး ကိးပသူထီၣ်လၢ အကလုၢ်ဖးဒိၣ်လၢ “အ့ၤလံၤ, အ့ၤလံၤ, လၤမါစၤဘၤဃသၤနံ” လၢအခီပညီမ့ၢ်ဝဲ “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.”+
၃၅ ဒီးပှၤဆၢထၢၣ်ဘူး ဖဲန့ၣ်တဖၣ် နၢ်ဟူဝဲအဃိ အဝဲသ့ၣ်တဲဝဲလၢ “ကွၢ်မီၤ, အဝဲကိးထီၣ် စီၤအ့ၤလံယၤလံ.”
၃၆ ပှၤတဂၤလဲၤဃ့ၢ် ဟံးန့ၢ်ဝဲ တၢ်ကပုာ်လုးတလိၣ် ဒီးစုၣ်လီၤဝဲလၢ စပံးထံလၢအဆံၣ်အပူၤ ဒီးမၤဘုးတာ်ထီၣ်ဝဲလၢ တပိၢ်ဘိအလိၤ ဒီးဒုးအီဝဲ ယ့ၣ်ၡူးလီၤ.+ ဒီးအတဲဝဲလၢ “ခိးသၢၤ, ပကကွၢ်တထံၣ်. မ့ၢ်စီၤအ့ၤလံယၤ ကဟဲစိာ်လီၤအီၤဧါ.”
၃၇ ဘၣ်ဆၣ် ယ့ၣ်ၡူး ကိးပသူထီၣ်လၢ အကလုၢ်ဖးဒိၣ် ဒီးသံဝဲလီၤ.*+
၃၈ ဒီးယၣ်ဘျးသဒၢလၢ တၢ်လုၢ်ဟံၣ်ပူၤန့ၣ်+ ညာ်ကွံာ်ဝဲခံက့ စးထီၣ်လၢအခိၣ် တုၤလီၤလၢအခီၣ်ထံးလီၤ.+
၃၉ ဖဲသုးခိၣ်တဂၤလၢ အဆၢထၢၣ်လၢ ယ့ၣ်ၡူးအမဲာ်ညါန့ၣ် ထံၣ်တၢ်ကဲထီၣ်သးတဖၣ်အံၤ ဒီးထံၣ်ဝဲလၢ ယ့ၣ်ၡူးသံဝဲအခါ အတဲဝဲလၢ “ပှၤတဂၤအံၤမ့ၢ် ကစၢ်ယွၤအဖိခွါ နီၢ်ကီၢ်လီၤ.”+
၄၀ ဒီးပိာ်မုၣ်တဖၣ်လၢ အကွၢ်စိ တၢ်မၤအသးတဖၣ်လၢ အယံၤန့ၣ် အိၣ်ဝဲစ့ၢ်ကီးလီၤ. လၢအဝဲသ့ၣ်အကျါန့ၣ် ပၣ်ဃုာ်ဒီး နီၢ်မၤရံ မၤကဒၤလ့ၣ်, နီၢ်မၤရံ လၢအမ့ၢ် စီၤယၤကိာ်လၢ အသးစၢ်တဂၤ* ဒီးစီၤယိၤစ့ၣ်အမိၢ် ဒီးနီၢ်စၤလိၣ်လီၤ.+
၄၁ လၢညါ ဖဲယ့ၣ်ၡူးအိၣ်လၢ ကၤလံၤလါအဆၢကတီၢ် အဝဲသ့ၣ် ပိာ်အခံ ဒီးမၤန့ၢ်တၢ်လၢအဂီၢ်လီၤ.+ ဒီးပိာ်မုၣ်အဂၤလၢ အဟဲပိာ် ယ့ၣ်ၡူးအခံလၢ ယရူၤၡလ့ၣ်န့ၣ် အိၣ်ဝဲဖဲန့ၣ် အါဂၤစ့ၢ်ကီးလီၤ.
၄၂ ဖဲန့ၣ်အခါ ဘၣ်လၢ ဟါလီၤခီလံ. ဒီးမ့ၢ်ဝဲ တၢ်ကတဲာ်ကတီၤတၢ် အမုၢ်နံၤ, တချုးလၢ အိၣ်ဘှံးနံၤဘၣ်ဒံးဘၣ် တသီအဃိ
၄၃ ပှၤအရံၤမၤသဲဖိ စီၤယိၤသးဟဲဝဲလီၤ. အဝဲ မ့ၢ်ပှၤမံၤဂ့ၤသၣ်ဂ့ၤလၢ ပှၤယူဒၤဖိ အကွီၢ်ဘျီၣ် လၢအဒိၣ်ကတၢၢ် တဖုအကျါတဂၤ ဒီးအခိးကွၢ်လၢ် ကစၢ်ယွၤအဘီအမုၢ် စ့ၢ်ကီးလီၤ. အပာ်ဆူၣ်ထီၣ်အသးဒီး လဲၤဝဲလၢ စီၤပံၤလးအအိၣ် ဒီးဃ့န့ၢ်ဝဲ ယ့ၣ်ၡူးအစိၣ်လီၤ.+
၄၄ ဘၣ်ဆၣ် စီၤပံၤလး အဲၣ်ဒိးသ့ၣ်ညါဝဲလၢ မ့ၢ်ယ့ၣ်ၡူးသံလံဧါ တသံဒံးဘၣ်ဧါ အဃိ အဝဲကိးန့ၢ်ဝဲ သုးခိၣ်တဂၤ ဒီးသံကွၢ်အီၤလၢ မ့ၢ်ယ့ၣ်ၡူး သံလံဧါန့ၣ်လီၤ.
၄၅ ဖဲအသ့ၣ်ညါ လၢယ့ၣ်ၡူးသံလံအခါ အဟ့ၣ်အခွဲးလၢ စီၤယိၤသး ကက့ၤစိာ်ယ့ၣ်ၡူးအစိၣ်လီၤ.
၄၆ ဒီးစီၤယိၤသး ဟဲစိာ် တၢ်ကံးညာ်လၢ အညၣ်ဂ့ၤတဘ့ၣ် ဒီးစိာ်လီၤ ယ့ၣ်ၡူးအစိၣ် ဒီးဘိၣ်ဘံထီၣ်အီၤလၢ တၢ်ကံးညာ်လၢ အညၣ်ဂ့ၤတဘ့ၣ်လီၤ. ဒီးအပာ်လီၤအီၤလၢ တၢ်သွၣ်ခိၣ်လၢ+ အဘၣ်တၢ်ခူၣ်အီၤ လၢလၢၢ်ပူၤလီၤ. ဝံၤဒီးအတလ့ၣ်တံၢ်လၢၢ်တဖျၢၣ်လၢ တၢ်သွၣ်ခိၣ် အခိၣ်ထိးလီၤ.+
၄၇ ဘၣ်ဆၣ် နီၢ်မၤရံ မၤကဒၤလ့ၣ် ဒီးစီၤယိၤစ့ၣ်အမိၢ် နီၢ်မၤရံန့ၣ် ဆဲးကွၢ်ဒံးဝဲတၢ်လီၢ်လၢ ပှၤပာ်လီၤ ယ့ၣ်ၡူးအစိၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မၤသံအီၤလၢ သ့ၣ်တၢၣ်အလိၤ.”
^ ကွၢ် တၢ်ကတိၤအခီပညီ.
^ ပၣ်ဃုာ်ဒီးတၢ်မူၤတၢ်ဘှီး.
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၃ နၣ်ရံၣ်ဃၣ်ဃၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၃.
^ ကွၢ် တၢ်ကတိၤအခီပညီ.
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၆ နၣ်ရံၣ်ဃၣ်ဃၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်ဃၣ်ဃၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်.”
^ မ့ၢ်စ့ၢ်ကီး “အဝဲကသါထီၣ်လၢ အလီၢ်ခံကတၢၢ်တထံၣ်.”
^ မ့ၢ်စ့ၢ်ကီး “အနီၢ်ဖုၣ်.”
