မၤတၢ် ၁၀:၁-၄၈
-
စီၤကန့လံး အတၢ်ထံၣ်လၢညါခီ (၁-၈)
-
စီၤပ့းတရူးထံၣ်ဝဲ တၢ်ထံၣ်လၢညါခီ ဘၣ်ဃးဒီး ဆၣ်ဖိကီၢ်ဖိလၢအကဆှီ (၉-၁၆)
-
စီၤပ့းတရူးလဲၤဟးလၢ စီၤကန့လံးအအိၣ် (၁၇-၃၃)
-
စီၤပ့းတရူး စံၣ်တဲၤတဲလီၤ တၢ်သးခုကစီၣ်လၢ ပှၤကလုာ်တဖၣ်အဂီၢ် (၃၄-၄၃)
-
“ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်” (၃၄, ၃၅)
-
-
ပှၤကလုာ်တဖၣ် ဒိးန့ၢ်ဘၣ်သးစီဆှံဒီး ဒိးဘျၢထံ (၄၄-၄၈)
၁၀ ဖဲဝ့ၢ်ကဲၤစါရံၤအပူၤန့ၣ် ပှၤအိၣ်ဝဲတဂၤ လၢအမံၤမ့ၢ် စီၤကန့လံးလီၤ. အဝဲမ့ၢ်သုးခိၣ်လၢ* အဘၣ်ဃးဒီး အံၤတလံ အသုးဖိတဒူၣ်လီၤ.
၂ အဝဲမ့ၢ်ပှၤတဂၤလၢ အယူးယီၣ် ကစၢ်ယွၤ တကးဒံးဘၣ် အဝဲဒီးပှၤလၢ အအိၣ်ဟံၣ်တဖျၢၣ်ဃီဒီးအီၤ ကိးဂၤဒဲးန့ၣ် ပျံၤကစၢ်ယွၤလီၤ. အဝဲဟ့ၣ်မၤစၢၤ ပှၤဂၤတၢ်အါမး ဒီးဃ့ကညး ကစၢ်ယွၤ ထီဘိလီၤ.
၃ ဖဲဟါလီၤခီ ၃ နၣ်ရံၣ်န့ၣ်*+ လၢတၢ်ထံၣ်လၢညါခီအပူၤ အဝဲထံၣ်ဝဲ ကစၢ်ယွၤ အမူခိၣ်ကလူးတဂၤ ဟဲလၢအအိၣ်ဒီး ကိးအီၤလၢ “စီၤကန့လံးဧၢ.”
၄ ဒီးစီၤကန့လံး ပျံၤတၢ်ဖုးတၢ်အဃိ ကွၢ်ထံအီၤဒီး သံကွၢ်အီၤလၢ “ကစၢ်ဧၢ, မနုၤလဲၣ်.” အဝဲတဲ စီၤကန့လံးလၢ “နဟ့ၣ်မၤစၢၤ ပှၤဖှီၣ်ဖိယာ်ဖိတဖၣ် ဒီးနတၢ်ထုကဖၣ်န့ၣ် ကစၢ်ယွၤ တိၢ်နီၣ်ဃာ်ဝဲလီၤ.+
၅ အဃိ ဆှၢလီၤပှၤတဖၣ်လၢ ဝ့ၢ်ယၤဖိၤ ဒ်သိး ကလဲၤကိးန့ၢ်ဝဲ စီၤၡံမိၣ် လၢပှၤကိးအီၤလၢ စီၤပ့းတရူး တက့ၢ်.
၆ အဝဲ အိၣ်တမှံၤလၢ စီၤၡံမိၣ်လၢ အမၤတၢ်မၤလၢ ဘၣ်ဃးဒီး ဆၣ်ဖိကီၢ်ဖိအဘ့ၣ်တဂၤန့ၣ် အဟံၣ်လၢ အဘူးဒီး ပီၣ်လဲၣ်နံၤလီၤ.”
၇ ဖဲမူခိၣ်ကလူးလၢ အတဲတၢ်ဒီး စီၤကန့လံးတဂၤ ဟးထီၣ်ဝဲ ဝံၤအလီၢ်ခံ စီၤကန့လံး ကိးန့ၢ်ဝဲ အခ့အပှၤခံဂၤ ဒီးသုးဖိတဂၤလၢ အယူးယီၣ် ကစၢ်ယွၤလီၤ. သုးဖိတဂၤန့ၣ် မ့ၢ်စ့ၢ်ကီး အခ့အပှၤတဂၤလီၤ.
၈ ဒီးစီၤကန့လံး တဲဘၣ် ပှၤတဖၣ်န့ၣ် လၢတၢ်ဂ့ၢ်ခဲလၢာ် ဝံၤဒီး မၢအဝဲသ့ၣ် လဲၤဝဲလၢ ဝ့ၢ်ယၤဖိၤလီၤ.
၉ လၢခံတနံၤ ဖဲအဝဲသ့ၣ် ဆဲးလဲၤတၢ် ဘူးကတုၤလၢ ဝ့ၢ်အံၤအခါ ကဘၣ်ဖဲ မုၢ်ဆါခီ ၁၂ နၣ်ရံၣ်န့ၣ်* စီၤပ့းတရူး လဲၤထီၣ်လၢ ဟံၣ်ခိၣ်ဒ်သိး ကဃ့ထုကဖၣ်တၢ် အဂီၢ်လီၤ.
၁၀ ဘၣ်ဆၣ် အဝဲလီၤဘဲဒိၣ်မး အဃိ အဝဲအဲၣ်ဒိးအီၣ်တၢ်လီၤ. ဖဲပှၤကတဲာ်ကတီၤ တၢ်အီၣ်တၢ်အီအခါ အဝဲထံၣ်ဝဲ တၢ်ထံၣ်လၢညါခီလီၤ.+
၁၁ အဝဲထံၣ် မူခိၣ်အိးထီၣ်အသး ဒီးတၢ်လၢ အလီၤဂာ်ဒီး တၢ်ကံးညာ်ဖးလဲၢ် တဘ့ၣ်န့ၣ် ဘၣ်တၢ်စဲၤလီၤအီၤလၢ အနၢၣ်လွံၢ်နၢၣ် လၢဟီၣ်ခိၣ်လီၤ.
၁၂ လၢအပူၤန့ၣ် အိၣ်ဝဲဒီးဆၣ်ဖိကီၢ်ဖိ အကလုာ်ကလုာ် လၢအိၣ်ဒီး အခီၣ်လွံၢ်ခီ, တၢ်လၢအဘျိၣ် ဒီးထိၣ်ဖိလံၣ်ဖိလၢ တၢ်ဖးဖီတဖၣ်လီၤ.
၁၃ ဒီးတၢ်ကလုၢ် တဲအီၤလၢ “စီၤပ့းတရူးဧၢ, ဂဲၤဆၢထၢၣ် မၤသံအီၤဒီး အီၣ်အီၤတက့ၢ်.”
၁၄ ဘၣ်ဆၣ် စီၤပ့းတရူး တဲဝဲလၢ “ကစၢ်ဧၢ, လ့ၤတက့ၤ ယတမၤဘၣ်. ယတအီၣ်တၢ်လၢ အဘၣ်အၢဒီး အတကဆှီဘၣ်တဖၣ် နီတဘျီဘၣ်.”+
၁၅ တၢ်ကလုၢ် တဲကဒီးတၢ်ဒီးအီၤ ခံဘျီတဘျီ ဒီးတဲဝဲလၢ “တၢ်လၢကစၢ်ယွၤ မၤကဆှီထီၣ်ဝဲတဖၣ်န့ၣ် တဘၣ်ကိးအီၤလၢ တၢ်လၢအဘၣ်အၢ လၢၤတဂ့ၤ.”
၁၆ တၢ်မၤအသးဒ်အံၤ ပှဲၤထီၣ်ဝဲ သၢဘျီတဘျီဝံၤဒီး တၢ်လၢစီၤပ့းတရူး ထံၣ်ဘၣ်ဝဲန့ၣ် ဘၣ်တၢ်ထုးထီၣ်ကွံာ်အီၤလၢ မူခိၣ် တဘျီဃီလီၤ.
၁၇ တၢ်ထံၣ်လၢညါခီအံၤ အခီပညီ ကမ့ၢ်ဝဲဒ်လဲၣ်န့ၣ် စီၤပ့းတရူး အခိၣ်နူာ် ဘံဘူဝဲလီၤ. ဖဲန့ၣ်အခါ ပှၤလၢ စီၤကန့လံး ဆှၢလီၤဝဲတဖၣ် သံကွၢ်ဝဲလၢ စီၤၡံမိၣ် အဟံၣ်အိၣ်ဖဲလဲၣ် ဒီးဆၢထၢၣ်ဝဲလၢ တြဲၤအခီၣ်ထံးလီၤ.+
၁၈ အဝဲသ့ၣ် ကိးစိဝဲ ဒီးသံကွၢ်ဝဲလၢ စီၤၡံမိၣ်လၢ ပှၤကိးအီၤလၢ စီၤပ့းတရူးန့ၣ် မ့ၢ်အအိၣ်တမှံၤ ဖဲအံၤဧါ.
၁၉ ဖဲစီၤပ့းတရူး ဆိကမိၣ်ဒံးဝဲ တၢ်ထံၣ်လၢညါခီအံၤ အဂ့ၢ်အခါ သးစီဆှံ+ တဲအီၤလၢ “ကွၢ်မီၤ, ပှၤသၢဂၤန့ၣ် ဃုနၤလီၤ.
၂၀ အဃိ လဲၤလီၤလၢ တၢ်ဖီလာ် ဒီးလဲၤပိာ် အဝဲသ့ၣ်အခံတက့ၢ်. ပှၤတဖၣ်န့ၣ် ယဆှၢလီၤအဝဲသ့ၣ်အဃိ တဘၣ်သးဒ့ဒီ နီတစဲးတဂ့ၤ.”
၂၁ စီၤပ့းတရူး လဲၤလီၤလၢ အဝဲသ့ၣ်အအိၣ်လၢ တၢ်ဖီလာ် ဒီးတဲဝဲလၢ “ယမ့ၢ်ပှၤတဂၤလၢ သုဟဲဃုအီၤလီၤ. သုဟဲဖဲအံၤ ဘၣ်လဲၣ်.”
၂၂ အဝဲသ့ၣ်တဲအီၤလၢ “သုးခိၣ်စီၤကန့လံး+ လၢအမ့ၢ် ပှၤလၢအတီအလိၤ, ပှၤလၢ အပျံၤကစၢ်ယွၤ ဒီးပှၤလၢ ပှၤယူဒၤဖိ ဒီတကလုာ် စံးပတြၢၤဝဲတဂၤန့ၣ် မၢလီၤပှၤလီၤ. ကစၢ်ယွၤ အမူခိၣ်ကလူး စီဆှံတဂၤ မၤလိာ်စီၤကန့လံးလၢ အကကိးနၤ လၢအဟံၣ် ဒ်သိး ကနၢ်ဟူဘၣ် တၢ်လၢ နကတဲတဖၣ် အဂီၢ်လီၤ.”
၂၃ အဃိ စီၤပ့းတရူး ကိးနုာ် အဝဲသ့ၣ်ဒီး တူၢ်လိာ် အဝဲသ့ၣ် လၢဟံၣ်ပူၤလီၤ.
လၢခံတနံၤန့ၣ် အဝဲကတဲာ်ကတီၤထီၣ်အသးဒီး လဲၤပိာ်အဝဲသ့ၣ်အခံလီၤ. ဒီးဒီပုၢ်ဝဲၢ်တနီၤလၢ အအိၣ်လၢ ဝ့ၢ်ယၤဖိၤန့ၣ် လဲၤဒီးအီၤစ့ၢ်ကီးလီၤ.
၂၄ လၢခံတနံၤန့ၣ် အဝဲလဲၤနုာ်လီၤလၢ ဝ့ၢ်ကဲၤစါရံၤလီၤ. မ့မ့ၢ် စီၤကန့လံးန့ၣ် အိၣ်ခိးကွၢ်လၢ် အဝဲသ့ၣ် ဒီးကိးဖှိၣ်ပာ်စၢၤဝဲ အဘူးအတံၢ် ဒီးအသကိးလၢ အရ့ဝဲ ဘူးဘူးတံၢ်တံၢ်တဖၣ်လီၤ.
၂၅ ဖဲစီၤပ့းတရူး လဲၤတုၤဝဲအခါ စီၤကန့လံး ဟဲသဂၢၢ်အီၤ ဒီးထိၣ်လီၤပှီၤ အသးလၢ အခီၣ်ထံးဒီး ယူးယီၣ်အီၤလီၤ.*
၂၆ ဘၣ်ဆၣ် စီၤပ့းတရူး တွံၢ်ထီၣ်အီၤ ဒီးတဲဝဲလၢ “ဂဲၤဆၢထၢၣ်သၢၤ. ယမ့ၢ်ဒၣ် ပှၤကညီဒ်သိးဒီးနၤလီၤ.”+
၂၇ ဖဲစီၤပ့းတရူး တဲတၢ်ဒီးအီၤအခါ စီၤပ့းတရူး လဲၤနုာ်လီၤဝဲလၢဟံၣ်ပူၤ ဒီးထံၣ်ဝဲ ပှၤအါဂၤ အိၣ်ဖှိၣ်ဖဲန့ၣ်လီၤ.
၂၈ ဒီးအတဲဘၣ် အဝဲသ့ၣ်လၢ “ပှၤယူဒၤဖိတဖၣ် တကြၢးရ့လိာ်အသးဒီး ပှၤကလုာ်အဂၤတဖၣ် ဒီးတကြၢးလဲၤလၢ အဝဲသ့ၣ် အအိၣ်ဘၣ်န့ၣ် သုသ့ၣ်ညါဂ့ၤဂ့ၤလီၤ.+ ဘၣ်ဆၣ် ကစၢ်ယွၤ ပာ်ဖျါထီၣ်န့ၢ်ယၤလၢ ယတကြၢးကိးပှၤလၢ တၢ်ဘၣ်အၢ ဒီးတၢ်တကဆှီဘၣ် နီတဂၤဘၣ်.+
၂၉ အဃိ ဖဲသုမၢယဟဲအခါ ယသးတဒ့ဒီ နီတစဲးဘၣ် ဒီးယဟဲလီၤ. ခဲအံၤ ယကသံကွၢ်သုလၢ ဘၣ်မနုၤအဃိ သုမၢယဟဲလဲၣ်.”
၃၀ စီၤကန့လံးတဲဝဲလၢ “လၢအပူၤကွံာ်လွံၢ်သီ ဒီးဖဲတၢ်ဆၢကတီၢ်ဒ်အံၤ, ဘၣ်ဖဲ ဟါလီၤခီ ၃ နၣ်ရံၣ်န့ၣ်* ယဃ့ထုကဖၣ်တၢ်လၢ ယဟံၣ်ပူၤလီၤ. ဒီးယထံၣ် ပှၤတဂၤလၢ အသိးဆ့ကၤ ကပြုၢ်ကပြီၤ ဆၢထၢၣ်ဝဲလၢ ယမဲာ်ညါ သတူၢ်ကလာ်လီၤ.
၃၁ ဒီးအဝဲ တဲဝဲလၢ ‘စီၤကန့လံးဧၢ, ကစၢ်ယွၤ နၢ်ဟူ ဒီးတူၢ်လိာ် နတၢ်ထုကဖၣ်လံ, ဒီးနဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်န့ၣ် ကစၢ်ယွၤ တိၢ်နီၣ်ဃာ်ဝဲလီၤ.
၃၂ အဃိ ဆှၢလီၤပှၤတဖၣ်လၢ ဝ့ၢ်ယၤဖိၤဒ်သိး ကလဲၤကိးန့ၢ် စီၤၡံမိၣ်လၢ ပှၤကိးအီၤလၢ စီၤပ့းတရူးတက့ၢ်. အဝဲ အိၣ်တမှံၤလၢ စီၤၡံမိၣ်လၢ အမၤတၢ်မၤလၢ ဘၣ်ဃးဒီး ဆၣ်ဖိကီၢ်ဖိအဘ့ၣ်တဂၤအဟံၣ် လၢအအိၣ်ဘူးဒီး ပီၣ်လဲၣ်နံၤလီၤ.’+
၃၃ အဃိ ယဆှၢလီၤ ပှၤလၢနအိၣ် တဘျီဃီလီၤ. ဒီးနဟဲအဃိ တၢ်ဘျုးဒိၣ်မးလီၤ. ခဲအံၤ ပဝဲခဲလၢာ် ပအိၣ်လၢ ကစၢ်ယွၤအမဲာ်ညါ ဒ်သိးပကဒိကနၣ် တၢ်ခဲလၢာ်လၢ ယဟိဝၤယွၤ* မၤလိာ်နၤလၢ နကတဲဖျါထီၣ်အီၤလီၤ.”
၃၄ ဒီးစီၤပ့းတရူး တဲဝဲလၢ “ခဲအံၤ ယနၢ်ပၢၢ်နီၢ်ကီၢ်လၢ ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်.+
၃၅ ကစၢ်ယွၤ တူၢ်လိာ်ဝဲ ပှၤကိးကလုာ်ဒဲးလၢ အပျံၤအီၤ ဒီးမၤတၢ်လၢ အဘၣ်လီၤ.+
၃၆ အဝဲဆှၢလီၤဝဲ တၢ်ကစီၣ်လၢ ပှၤအံၣ်စရ့လးဖိတဖၣ်အအိၣ် ဒ်သိး ကဘိးဘၣ်သ့ၣ်ညါ အဝဲသ့ၣ်လၢ တၢ်သးခုကစီၣ် ဘၣ်ဃးဒီး တၢ်ဃူတၢ်ဖိး+ ခီဖျိ ယ့ၣ်ၡူးခရံာ်လီၤ. ဒီးယ့ၣ်ၡူးန့ၣ် မ့ၢ်ဝဲပှၤခဲလၢာ် အကစၢ်လီၤ.+
၃၇ ဖဲစီၤယိၤဟၣ် စံၣ်တဲၤတဲလီၤ တၢ်ဒိးဘျၢထံအဂ့ၢ် ဝံၤအလီၢ်ခံန့ၣ် သုသ့ၣ်ညါတၢ်ဂ့ၢ်လၢ ပှၤတဲသကိးအီၤ စးထီၣ်လၢ ကၤလံၤလါ+ ပၢၢ်တုၤလၢ ယူဒၤအဟီၣ်ကဝီၤဒီဘ့ၣ်ညါ အပူၤလီၤ.
၃၈ တၢ်ဂ့ၢ်တခါအံၤန့ၣ် ဘၣ်ဃးဒီး ယ့ၣ်ၡူးလၢ အဟဲလၢ ဝ့ၢ်နစၤရ့းလီၤ. ကစၢ်ယွၤဒိးဖှူအီၤလၢ သးစီဆှံ+ ဒီးတၢ်စိတၢ်ကမီၤ ဒီးမ့ၢ်လၢ ကစၢ်ယွၤ အိၣ်ဒီးအီၤအဃိ+ အဝဲလဲၤမၤတၢ်ဂ့ၤလၢ ထံကီၢ်အပူၤ သကုၤဆးဒး ဒီးမၤဘျါက့ၤ ပှၤလၢမုၣ်ကီၤလံၢ် မၤနးမၤဖှီၣ်အီၤ ကိးဂၤဒဲးလီၤ.+
၃၉ ဒီးပမ့ၢ် ပှၤအုၣ်အသးလၢ တၢ်ခဲလၢာ်လၢ အဝဲမၤဝဲလၢ ယူဒၤအဟီၣ်ကဝီၤပူၤ ဒီးလၢဝ့ၢ်ယရူၤၡလ့ၣ်အပူၤလီၤ. ဘၣ်ဆၣ် အဝဲသ့ၣ် မၤသံကွံာ်အီၤခီဖျိ ဘျးထီၣ်အီၤလၢ သ့ၣ်တၢၣ်* အလိၤလီၤ.
၄၀ ဒီးလၢသၢသီတသီန့ၣ် ကစၢ်ယွၤ ဒုးဂဲၤဆၢထၢၣ်က့ၤအီၤ+ ဒီးပျဲဝဲလၢ အဝဲ ကလီၣ်ဖျါထီၣ်အသးလီၤ.
၄၁ ဘၣ်ဆၣ် တမ့ၢ်လၢ ပှၤခဲလၢာ် အမဲာ်ညါဘၣ်, မ့ၢ်ထဲဒၣ်လၢပမဲာ်ညါလီၤ. ပဝဲဒၣ်န့ၣ် မ့ၢ်ပှၤလၢအအီၣ်သကိး အီသကိးတၢ်ဒီးအီၤ ဖဲအဝဲဂဲၤဆၢထၢၣ်လၢ တၢ်သံဝံၤ အလီၢ်ခံလီၤ.+ ဒီးကစၢ်ယွၤ ဃုထၢပာ်စၢၤပှၤ ဒ်သိးပကတဲအဂ့ၢ်လီၤ.
၄၂ တကးဒံးဘၣ် အဝဲမၤလိာ်ပှၤလၢ ပကစံၣ်တဲၤတဲလီၤတၢ်လၢ ပှၤဂၤအအိၣ် ဒီးအုၣ်ပသး လီၤတံၢ်လီၤဆဲးလၢ+ ပှၤတဂၤအံၤန့ၣ် ကစၢ်ယွၤ ဃုထၢထီၣ်အီၤလၢ ကစံၣ်ညီၣ် ပှၤမူဒီး ပှၤသံလီၤ.+
၄၃ ဝံခဲလၢာ် အုၣ်အသးလၢ+ အဂ့ၢ်ဒ်သိး ပှၤလၢ အစူၢ်က့ၤနာ်က့ၤအီၤ ကိးဂၤဒဲးန့ၣ် အတၢ်ဒဲးဘး ကပျၢ်ကွံာ်ဝဲ ခီဖျိလၢ အမံၤအဃိလီၤ.”+
၄၄ ဖဲစီၤပ့းတရူးတဲဝဲ ဘၣ်ဃးဒီး တၢ်ဂ့ၢ်တဖၣ်အံၤ အခါန့ၣ် သးစီဆှံ ဟဲလီၤလၢ ပှၤလၢ အဒိကနၣ်တၢ် ခဲလၢာ် အလိၤလီၤ.+
၄၅ သးစီဆှံလၢ အမ့ၢ်တၢ်ဟ့ၣ်ကလီအံၤ ဘၣ်တၢ်လူလီၤအီၤလၢ ပှၤကလုာ်တဖၣ်အလိၤ အဃိ ပှၤဒိးတၢ်ကူးတရံးလၢ အစူၢ်က့ၤနာ်က့ၤတၢ်တဖၣ် လၢအဟဲဒီး စီၤပ့းတရူးန့ၣ် ကမၢကမၣ်ဝဲလီၤ.
၄၆ အဝဲသ့ၣ် နၢ်ဟူဝဲ ပှၤတဖၣ်န့ၣ် တဲတၢ်လၢ ကျိာ်အဂၤတဖၣ်* ဒီးစံးထီၣ်ပတြၢၤ ကစၢ်ယွၤလီၤ.+ အဃိ စီၤပ့းတရူး တဲဝဲလၢ
၄၇ “အဝဲသ့ၣ် ဒိးန့ၢ်ဘၣ် သးစီဆှံ ဒ်သိးပှၤလီၤ. မ့မ့ၢ်ဒ်န့ၣ်န့ၣ် ပှၤတဂၤဂၤတြီ အဝဲသ့ၣ် ဒ်သိးအသု တဒိးဘျၢထံတဂ့ၤန့ၣ် ကသ့ဧါ.”+
၄၈ ဒီးစီၤပ့းတရူး မၤလိာ် အဝဲသ့ၣ်လၢ ကဒိးဘျၢထံလၢ ယ့ၣ်ၡူးခရံာ် အမံၤအပူၤလီၤ.+ ဒီးအဝဲသ့ၣ် ဃ့ကညးစီၤပ့းတရူးလၢ အကဆဲးအိၣ်ဝဲဖဲန့ၣ် တဘျုးသီညါလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “သုးဖိ ၁၀၀ အခိၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်ဃၣ်ဃၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၆ နၣ်ရံၣ်ဃၣ်ဃၣ်.”
^ မ့ၢ်စ့ၢ်ကီး “ဘါလီၤအီၤ.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်ဃၣ်ဃၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “သ့ၣ်ထူၣ်.”
^ အခီပညီလိၤလိၤ “လၢပျ့ၤအကျိာ်.”
