မၤတၢ် ၂၁:၁-၄၀
၂၁ ပဟးဖးဒီး အဝဲသ့ၣ်လၢ တၢ်သူၣ်အုးသးအုးအပူၤ ဒီးပဒိးထီၣ်ကဘီဒီး ပလဲၤတၢ် လိၤလိၤ တုၤလီၤလၢ ဝ့ၢ်ကိၣ်လီၤ. လၢခံတနံၤန့ၣ် ပလဲၤတုၤလၢ ကီးရဒူး ဒီးပဟးထီၣ်ဖဲန့ၣ် ဒီးလဲၤလၢ ပတါရါလီၤ.
၂ ဖဲပထံၣ်န့ၢ် ကဘီတဘ့ၣ်လၢ ကလဲၤလၢ ကီၢ်ဖံၤနံက့ၤအခါ ပဒိးထီၣ်အီၤဒီး ပလဲၤတၢ်လီၤ.
၃ ပလဲၤတၢ်တုၤလၢ ပထံၣ်စိ ကီးကူပြူး ဘၣ်ဆၣ် ပလဲၤတလၢအီၤလၢ စုစ့ၣ်တခီ ဒီးဆဲးလဲၤလၢ ကီၢ်စူၤရံ ဒီးလဲၤတုၤ ဖဲဝ့ၢ်စိၢ်လီၤ. ဖဲန့ၣ်န့ၣ် ပှၤဘၣ်ပာ်လီၤ တၢ်ဖိတၢ်လံၤလၢ အအိၣ်လၢ ကဘီပူၤလီၤ.
၄ ပဃုပှၤလၢ အစူၢ်က့ၤနာ်က့ၤတၢ်တဖၣ် ဒီးပထံၣ်န့ၢ် အဝဲသ့ၣ် ဒီးပအိၣ်ဖဲန့ၣ် နွံသီလီၤ. ဘၣ်ဆၣ် ခီဖျိတၢ်လၢ သးစီဆှံ ပာ်ဖျါထီၣ်န့ၢ်အဝဲသ့ၣ် အဃိ အဝဲသ့ၣ် တဲဘၣ်စီၤပီလူး တဘျီဝံၤ တဘျီလၢ အဝဲတဘၣ်လဲၤလၢ ဝ့ၢ်ယရူၤၡလ့ၣ်ဘၣ်.+
၅ ဖဲတၢ်ဆၢကတီၢ် ဘၣ်အခါ ပဟးထီၣ်ဒီး လဲၤတၢ်လီၤ. ဘၣ်ဆၣ် အဝဲသ့ၣ်ခဲလၢာ် ဃုာ်ဒီးပိာ်မုၣ်ဒီး ဖိသၣ်တဖၣ်န့ၣ် လဲၤဆှၢပှၤ တုၤလၢဝ့ၢ်ချၢလီၤ. ဒီးပချံးလီၤ ပခီၣ်လၢ ပီၣ်လဲၣ်နံၤဒီး ဃ့ထုကဖၣ်တၢ်လီၤ.
၆ ဒီးပတဲလိာ်သး တဂၤဒီးတဂၤလၢ ပကဘၣ်လဲၤတၢ်လီၤ. ဝံၤဒီး ပလဲၤဒိးထီၣ်ကဘီ ဒီးအဝဲသ့ၣ် က့ၤကဒါက့ၤလၢ အဝဲသ့ၣ် အဟံၣ်လီၤ.
၇ ပလဲၤကဒီးတၢ်လၢ ကဘီ စးထီၣ်ဖဲဝ့ၢ်စိၢ် တုၤလၢ ဝ့ၢ်ပတလ့းမဲ ဒီးဖဲန့ၣ်န့ၣ် ပဆၢဂ့ၤဆၢဝါ ဒီပုၢ်ဝဲၢ်တဖၣ် ဝံၤဒီး အိၣ်ဒီးအဝဲသ့ၣ် တသီလီၤ.
၈ လၢခံတနံၤန့ၣ် ပဟးထီၣ်ဒီး လဲၤတုၤလၢ ဝ့ၢ်ကဲၤစါရံၤ ဒီးပလဲၤနုာ်လၢ စီၤဖံလံးပူး လၢအမ့ၢ် ပှၤစံၣ်တဲၤတဲလီၤ တၢ်သးခုကစီၣ်တဂၤန့ၣ် အဟံၣ်ပူၤ ဒီးပအိၣ်ဒီးအီၤ ဖဲန့ၣ်လီၤ. အဝဲမ့ၢ်ပှၤလၢ အပၣ်ဃုာ်လၢ ပှၤလၢ အဘၣ်တၢ်ဃုထၢအီၤ နွံဂၤအကျါ တဂၤလီၤ.+
၉ အဝဲအိၣ်ဒီး အဖိမုၣ် မုၣ်ကနီၤလွံၢ်ဂၤ လၢအတဲတၢ် ဒ်ဝံအသိးလီၤ.+
၁၀ ပအိၣ်ဖဲန့ၣ် တဘျုးသီဝံၤဒီး ဝံလၢအမံၤမ့ၢ် စီၤအကၤဘူး+ လၢအအိၣ်လၢ ယူဒၤအဟီၣ်ကဝီၤန့ၣ် ဟဲလီၤဝဲလီၤ.
၁၁ အဝဲဟဲလၢပအိၣ် ဒီးဟံးန့ၢ်ဝဲ စီၤပီလူး အယီၢ်တကိး ဒီးစၢထီၣ်ဝဲ အနီၢ်ကစၢ်အစုဒီး အခီၣ် ဒီးတဲဝဲလၢ “သးစီဆှံ တဲဝဲဒ်အံၤ ‘ပှၤယူဒၤဖိလၢ ယရူၤၡလ့ၣ်အပူၤန့ၣ်+ ကစၢဃာ်ဝဲ ယီၢ်တကိး အကစၢ်ဒ်အံၤ ဒီးအဝဲသ့ၣ် ကဟ့ၣ်လီၤအီၤလၢ ပှၤကလုာ်အဂၤတဖၣ်အစုပူၤလီၤ.’”+
၁၂ ဖဲပနၢ်ဟူဘၣ် ဒ်အံၤအခါ ပဝဲဒီးပှၤလၢ အအိၣ်ဖဲန့ၣ်တဖၣ် ဃ့ကညး စီၤပီလူး ဒ်သိးအသု တလဲၤလၢ ယရူၤၡလ့ၣ် တဂ့ၤအဂီၢ်လီၤ.
၁၃ ဘၣ်ဆၣ် စီၤပီလူး တဲဆၢဝဲလၢ “ဘၣ်မနုၤအဃိ သုဟီၣ် ဒီးမၤစၢ်လီၤ ယသးလဲၣ်. ယအိၣ်ကတဲာ်ကတီၤပာ်စၢၤယသးလၢ ပှၤကစၢဃာ်ယၤ ဖဲဝ့ၢ်ယရူၤၡလ့ၣ်အဂီၢ် ဒီးလၢယကသံဖဲန့ၣ်လၢ ကစၢ်ယ့ၣ်ၡူး အမံၤအဂီၢ်လီၤ.”+
၁၄ ပတဲအီၤ တန့ၢ်ဘၣ်အဃိ ပအိၣ်ဘှ့ၣ် ဒီးပတဲလၢ “မ်တၢ်မၤအသး ဒ်ယဟိဝၤယွၤ* အတၢ်ဘၣ်သး အိၣ်ဝဲအသိးတက့ၢ်.”
၁၅ တၢ်မၤအသးတဖၣ်အံၤ ဝံၤအလီၢ်ခံ ပကတဲာ်ကတီၤထီၣ် ပသးလၢ ပတၢ်လဲၤအဂီၢ် ဒီးပစးထီၣ်လဲၤလၢ ဝ့ၢ်ယရူၤၡလ့ၣ်လီၤ.
၁၆ ပှၤစူၢ်က့ၤ နာ်က့ၤတၢ်လၢ ဝ့ၢ်ကဲၤစါရံၤအပူၤ တနီၤစ့ၢ်ကီး လဲၤတၢ်ဒီးပှၤ ဒီးလဲၤဆှၢပှၤဆူ စီၤပနါစိၣ် လၢအဟဲလၢ ကီးကူပြူး အဟံၣ်လီၤ. အဝဲမ့ၢ် ပှၤစူၢ်က့ၤနာ်က့ၤတၢ် လၢညါလံၤလံၤတဂၤ ဒီးပှၤကွဲမုာ်ပှၤလၢ ပကလဲၤအိၣ်ဖဲ အဟံၣ်လီၤ.
၁၇ ဖဲပလဲၤတုၤလၢ ဝ့ၢ်ယရူၤၡလ့ၣ်အခါ ဒီပုၢ်ဝဲၢ်တဖၣ် တူၢ်လိာ်မုာ်ပှၤလၢ တၢ်သးခုအပူၤလီၤ.
၁၈ လၢခံတနံၤန့ၣ် စီၤပီလူး လဲၤဒီးပှၤလၢ စီၤယၤကိာ်အအိၣ်+ ဒီးတၢ်အိၣ်ဖှိၣ်သးပှၢ် ကိးဂၤဒဲး အိၣ်ဝဲဖဲန့ၣ်လီၤ.
၁၉ စီၤပီလူး ဆၢဂ့ၤဆၢဝါအဝဲသ့ၣ် ဒီးတဲဘၣ် အဝဲသ့ၣ် တၢ်ဂ့ၢ်တၢ်ကျိၤ လီၤတံၢ်လီၤဆဲး ဘၣ်ဃးဒီး တၢ်လၢ ကစၢ်ယွၤမၤဝဲလၢ ပှၤကလုာ်တဖၣ်အကျါ ခီဖျိလၢ အတၢ်စံၣ်တဲၤတဲလီၤ တၢ်မၤလီၤ.
၂၀ ဖဲအဝဲသ့ၣ် နၢ်ဟူဝဲဒ်န့ၣ် ဝံၤအလီၢ်ခံ အဝဲသ့ၣ် စံးထီၣ်ပတြၢၤကစၢ်ယွၤ, ဘၣ်ဆၣ် အဝဲသ့ၣ်တဲ စီၤပီလူးလၢ “ဒီပုၢ်ဝဲၢ်ဧၢ, နထံၣ်လၢ ပှၤစူၢ်က့ၤနာ်က့ၤတၢ်တဖၣ် လၢအမ့ၢ် ပှၤယူဒၤဖိန့ၣ် အိၣ်ဝဲလၢ အကလးတဖၣ် ဒီးအဝဲသ့ၣ်ခဲလၢာ် အသးဆူၣ်လၢ ကမၤထွဲ စီၤမိၤၡ့ အတၢ်သိၣ်တၢ်သီလီၤ.+
၂၁ ဘၣ်ဆၣ် အဝဲသ့ၣ်နၢ်ဟူနဂ့ၢ် လၢနသိၣ်လိ ပှၤယူဒၤဖိခဲလၢာ်လၢ အအိၣ်လၢ ထံဂၤကီၢ်ဂၤတဖၣ် ဒ်သိး အကပာ်တ့ၢ်ကွံာ် စီၤမိၤၡ့ အတၢ်သိၣ်တၢ်သီ ဒီးလၢနတဲဘၣ် အဝဲသ့ၣ်လၢ အဝဲသ့ၣ် တဘၣ်ကူးတရံး အဖိတဖၣ် ဒီးတဘၣ်မၤထွဲ လုၢ်လၢ်တဖၣ် တဂ့ၤလီၤ.+
၂၂ ဒီးအဝဲသ့ၣ် ကနၢ်ဟူဘၣ်ဝဲလၢ နဟဲတုၤလံ. အဃိ ပကဘၣ်မၤဒ်လဲၣ်.
၂၃ မၤဒ် ပတဲနၤ အသိးတက့ၢ်. ပအိၣ်ဒီး ပိာ်ခွါလွံၢ်ဂၤ လၢအမၤတ့ၢ် တၢ်အၢၣ်လီၤအီလီၤ ဒီးယွၤလီၤ.
၂၄ လဲၤကိးဃုာ်ဒီး အဝဲသ့ၣ် ဒီးမၤသကိး တၢ်မၤကဆှီထီၣ်သး အလုၢ်လၢ်တဖၣ် ဒီးဟ့ၣ်လီၤန့ၢ် အဝဲသ့ၣ် အတၢ်လၢာ်ဘူၣ်လၢာ်စ့ၤတဖၣ် ဒ်သိးအဝဲသ့ၣ် ကတံာ်အခိၣ်ဆူၣ် ဖုၣ်ဖုၣ်အဂီၢ်တက့ၢ်. ဒီးပှၤကိးဂၤဒဲး ကသ့ၣ်ညါလၢ တၢ်လၢ အဝဲသ့ၣ် နၢ်ဟူဘၣ်ဃးဒီး နဂ့ၢ်န့ၣ် တမ့ၢ်တၢ်နီၢ်ကီၢ်ဘၣ် ဒီးကသ့ၣ်ညါလၢ နအိၣ်မူ ဂ့ၤဂ့ၤဘၣ်ဘၣ် ဒီးနမၤထွဲစီၤမိၤၡ့ အတၢ်သိၣ်တၢ်သီ စ့ၢ်ကီးလီၤ.+
၂၅ မ့မ့ၢ် ပှၤကလုာ်အဂၤလၢ အစူၢ်က့ၤနာ်က့ၤတၢ် တဖၣ်န့ၣ် ပဆှၢလီၤန့ၢ် အဝဲသ့ၣ် ပတၢ်ဆၢတဲာ် လၢလံာ်ပရၢအပူၤ လၢအဝဲသ့ၣ် ကဘၣ်ဟးဆှဲး တၢ်လၢ ပှၤလုၢ်ထီၣ်အီၤလၢ တၢ်ဂီၤတၢ်ဖှီၣ်အအိၣ်+ ဒီးတၢ်သွံၣ်,+ ဆၣ်ဖိကီၢ်ဖိလၢ တၢ်စံၢ်သံအီၤ*+ ဒီးတၢ်မၤကမၣ်မုၣ် ကမၣ်ခွါလီၤ.”*+
၂၆ လၢခံတနံၤန့ၣ် စီၤပီလူးကိးန့ၢ် ပှၤပိာ်ခွါတဖၣ်န့ၣ် ဒီးအဝဲသ့ၣ် မၤသကိး တၢ်မၤကဆှီထီၣ်သး အလုၢ်လၢ်တဖၣ်+ ဒီးအဝဲ လဲၤနုာ်လီၤလၢ တၢ်လုၢ်ဟံၣ်အပူၤ ဒ်သိး ကတဲဖျါထီၣ်ဝဲလၢ တၢ်မၤကဆှီထီၣ်သး အလုၢ်လၢ် အမုၢ်နံၤတဖၣ် ကဝံၤဝဲ ဆံးယံာ်လဲၣ် ဒီးဒ်သိး တၢ်ကလုၢ်ထီၣ်တၢ်လၢ အဝဲသ့ၣ် တဂၤစုာ်စုာ် အဂီၢ်လီၤ.
၂၇ ဖဲနွံသီတသီ ဘူးကဝံၤအခါ ပှၤယူဒၤဖိလၢ အဟဲလၢ အၤစံအကီၢ်ရ့ၣ်န့ၣ် ထံၣ်စီၤပီလူးလၢ တၢ်လုၢ်ဟံၣ်ပူၤအဃိ အဝဲသ့ၣ် ဟ့ၣ်သဆၣ်ထီၣ် ပှၤဂီၢ်မုၢ်ခဲလၢာ် ဒီးအဝဲသ့ၣ်ဖီၣ်န့ၢ်အီၤ
၂၈ ဒီးကိးပသူထီၣ်ဝဲလၢ “ပှၤအံၣ်စရ့လးဖိသ့ၣ်ဧၢ, ဟဲမၤစၢၤသၢၤ. ပှၤတဂၤအံၤ သိၣ်လိပှၤကိးဂၤဒဲး လၢတၢ်လီၢ် ကိးတီၤဒဲး ဘၣ်ဃးဒီးတၢ်လၢ အထီဒါ ပပှၤကလုာ် ဒီးပတၢ်သိၣ်တၢ်သီ ဒီးတၢ်လီၢ်အံၤလီၤ. တကးဒံးဘၣ် အဝဲဟဲကိးစ့ၢ်ကီး ပှၤကြံးဖိလၢ တၢ်လုၢ်ဟံၣ်ပူၤ ဒီးအဝဲမၤဘၣ်အၢ တၢ်စီဆှံအလီၢ်အံၤလီၤ.”+
၂၉ အဝဲသ့ၣ် တဲဝဲဒ်န့ၣ် မ့ၢ်လၢ အဝဲသ့ၣ် ထံၣ်တ့ၢ်ဝဲ ပှၤအ့းဖ့းစူးဖိ စီၤတြီဖံမူးအိၣ်ဒီး+ စီၤပီလူးလၢ ဝ့ၢ်ပူၤအဃိ အဝဲသ့ၣ် ဆိကမိၣ်ဝဲလၢ စီၤပီလူး လဲၤကိးနုာ်အီၤလၢ တၢ်လုၢ်ဟံၣ်ပူၤလီၤ.
၃၀ ဝ့ၢ်န့ၣ် ပှဲၤဝဲဒီး တၢ်တၢထီၣ်တၢလီၤ ဒီးပှၤဂီၢ်မုၢ်တဖၣ် လဲၤဃ့ၢ်ဖှိၣ်ဝဲ ဒီးဖီၣ်န့ၢ်စီၤပီလူး ဒီးတွံၢ်ထီၣ်အီၤလၢ တၢ်လုၢ်ဟံၣ်အချၢ ဒီးပှၤကးပံးဃာ်တြဲၤ တဘျီဃီလီၤ.
၃၁ ဖဲအဝဲသ့ၣ် ဂုာ်မၤသံ စီၤပီလူးအခါ တၢ်ကစီၣ်ဘၣ်ဃးဒီး တၢ်တၢထီၣ်တၢလီၤလၢ ဝ့ၢ်ယရူၤၡလ့ၣ် ဒီတဝ့ၢ်န့ၣ် ဟူထီၣ်တုၤလၢ ပှၤသုးဖိတကထိ အခိၣ်အအိၣ်လီၤ.
၃၂ တဘျီဃီန့ၣ် သုးခိၣ်တဂၤအံၤ ကိးထီၣ်ဝဲ သုးဖိတဖၣ် ဒီးသုးဖိတကယၤ အခိၣ်တဖၣ် ဒီးလဲၤဃ့ၢ်လီၤဝဲလၢ အဝဲသ့ၣ် အအိၣ်လီၤ. ဖဲအဝဲသ့ၣ် ထံၣ်ဘၣ် ပှၤသုးဖိ တကထိအခိၣ် ဒီးသုးဖိတဖၣ်အခါ အဝဲသ့ၣ် တတီၢ်စီၤပီလူး လၢၤဘၣ်.
၃၃ ပှၤသုးဖိတကထိအခိၣ်န့ၣ် ဟဲဃီၤဝဲဒီး ဖီၣ်န့ၢ် စီၤပီလူးဒီးဟ့ၣ်လီၤ တၢ်ကလုၢ်လၢ ပှၤကစၢဃာ်အီၤဒီး ပျံၤထးခံဘိလီၤ.+ ဒီးပှၤသုးဖိတကထိအခိၣ် သံကွၢ်ဝဲလၢ အဝဲမ့ၢ် မတဂၤလဲၣ် ဒီးအဝဲမၤဘၣ် တၢ်မနုၤလဲၣ်.
၃၄ ဘၣ်ဆၣ် ပှၤတနီၤလၢ ပှၤဂီၢ်မုၢ်အကျါန့ၣ် ကိးပသူထီၣ်ဝဲတမံၤ ဒီးပှၤအဂၤတနီၤ ကိးပသူထီၣ်ဝဲလၢ အဂၤတမံၤလီၤ. မ့ၢ်လၢ တၢ်သီၣ်တၢ်သဲအဃိ သုးခိၣ်တဂၤန့ၣ် တသ့ၣ်ညါဘၣ်ဝဲ တၢ်ဂ့ၢ်လီၤတံၢ်လီၤဆဲး နီတမံၤဘၣ်. အဃိ အဝဲဟ့ၣ်လီၤ တၢ်ကလုၢ်လၢ ပှၤကလဲၤကိး စီၤပီလူးလၢ သုးဖိတဖၣ် အိၣ်တၢ်အလီၢ်လီၤ.
၃၅ ဘၣ်ဆၣ် မ့ၢ်လၢ ပှၤဂီၢ်မုၢ်အဲၣ်ဒိး မၤဒၢၣ်မၤဆါ စီၤပီလူးအဃိ ဖဲစီၤပီလူးလဲၤတုၤလၢ ဃီခီၣ်ထံးအခါ သုးဖိတဖၣ် ဘၣ်စိာ်ထီၣ်အီၤလီၤ.
၃၆ ဒီးပှၤဂီၢ်မုၢ် ဆဲးပိာ်ဝဲအခံ ဒီးကိးပသူထီၣ်ဝဲလၢ “မၤသံကွံာ်အီၤဟီ.”
၃၇ ဖဲပှၤကလဲၤ ဆှၢနုာ်လီၤအီၤလၢ သုးဖိတဖၣ် အိၣ်တၢ်အလီၢ်အခါ စီၤပီလူးတဲဘၣ် သုးဖိတကထိ အခိၣ်တဂၤန့ၣ်လၢ “ယကတဲနၤ တၢ်တမံၤသ့ဧါ.” အဝဲတဲဝဲလၢ “နတဲကြံးကျိာ်ဘၣ်ဧါ.
၃၈ နကဲ ပှၤအဲၤကူပတူးဖိတဂၤ လၢအပူၤကွံာ် အထီဒါပဒိၣ် ဒီးဆှၢထီၣ် ပှၤပိာ်ခွါ အဂၤ ၄,၀၀၀ လၢအစိာ်ဒီတဖၣ် ဆူပှၢ်မုၢ်ကနၢန့ၣ် တမ့ၢ်ဧီၤ.”
၃၉ စီၤပီလူး တဲဝဲလၢ “ယမ့ၢ်ပှၤယူဒၤဖိ+ လၢအအိၣ်ဖျဲၣ်ထီၣ်လၢ ဝ့ၢ်တၢ်စူး+ လၢကံၤလံၤကံ အကီၢ်ရ့ၣ်ပူၤ ဒီးယမ့ၢ် ဝ့ၢ်လၢအမံၤဟူသၣ်ဖျါတဖျၢၣ်န့ၣ် အပှၤဝ့ၢ်ဖိလီၤ. အဃိ ယဃ့ကညးနၤလၢ နကဟ့ၣ်ယၤ အခွဲးလၢ ယကတဲတၢ်ဒီး ပှၤဂီၢ်မုၢ်လီၤ.”
၄၀ အဝဲဟ့ၣ်အခွဲးဝံၤ စီၤပီလူး ဆၢထၢၣ်လၢ ဃီအလိၤ ဒီးယူာ်ထီၣ်အစုလၢ ပှၤဂီၢ်မုၢ်အအိၣ်လီၤ. ဖဲပှၤအိၣ်ဘှ့ၣ်အခါ အဝဲတဲလီၤတၢ်ဆူ အဝဲသ့ၣ် အအိၣ်လၢ ဧ့ၤဘြံၤကျိာ်+ ဒီးတဲဝဲလၢ
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “တၢ်လၢပှၤမၤသံအီၤလၢ တဒုးဟးထီၣ်အသွံၣ်ဘၣ်.”
