မၤတၢ် ၂၇:၁-၄၄
၂၇ ဒီးပှၤဆၢတဲာ်ဝဲလၢ ပကဘၣ်ဒိးထီၣ်ကဘီ ဒီးလဲၤလၢ ကီၢ်အံၤတလံအဃိ+ အဝဲသ့ၣ် အးလီၤစီၤပီလူး ဒီးပှၤဃိာ်ဖိ အဂၤတဖၣ်လၢ စီၤယူၤလံအစုပူၤလီၤ. စီၤယူၤလံ မ့ၢ်သုးခိၣ် လၢအဘၣ်ဃးဒီး အီၤကူစတူး အသုးမုၢ်တဒူၣ်လီၤ.
၂ ပဒိးထီၣ်ကဘီလၢ အဟဲလၢအဒြၤမူးတ့ၣ် လၢအကလဲၤလၢ ကဘီသန့တဖၣ် လၢအိၣ်လၢ အၤစံအကီၢ်ရ့ၣ် အပီၣ်လဲၣ်ကၢၢ်နံၤ အကပၤ ဒီးပလဲၤတၢ်လီၤ. ဒီးပှၤမၤက့းဒနံဖိလၢ အမ့ၢ်စီၤအရံစတၢ်ဃူး+ လၢအဟဲလၢ ဝ့ၢ်သ့းစၤလနံန့ၣ် လဲၤတၢ်ဒီးပှၤလီၤ.
၃ လၢခံတနံၤန့ၣ် ပလဲၤတုၤလၢ ဝ့ၢ်စံဒိၣ်လီၤ. ဒီးစီၤယူၤလံ အသးဂ့ၤလၢ စီၤပီလူးအဖီခိၣ်အဃိ ဟ့ၣ်အီၤအခွဲးလၢ အဝဲကလဲၤဟးလၢ အသကိးအအိၣ် ဒ်သိးအကဒိးန့ၢ်ဘၣ် အဝဲသ့ၣ် အတၢ်မၤစၢၤ အဂီၢ်လီၤ.
၄ ပဟးထီၣ်ဖဲန့ၣ် ဒီးမ့ၢ်လၢ ကလံၤအူတၢ် အကျိၤတလိၤဘၣ်အဃိ ပလဲၤတၢ်ဘူးဘူးဒီး ကီးကူပြူးအကပၤ ဒ်သိးပကဒိးန့ၢ်ဘၣ် တၢ်ဒီသဒၢအဂီၢ်လီၤ.
၅ ဒီးပလဲၤခီဂာ် ပီၣ်လဲၣ်လၢ ကံၤလံၤကံကီၢ်ရ့ၣ်ဒီး ပၣ်ဖူၤလံအဃၢၤ ဒီးပလဲၤတုၤလၢ ကဘီသန့ ဖဲဝ့ၢ်မူရၤ လၢအအိၣ်လၢ ကီၢ်လူၤကံ အပူၤလီၤ.
၆ ဖဲန့ၣ်သုးခိၣ် ထံၣ်ဝဲ ကဘီတဘ့ၣ်လၢ အဟဲလၢ ဝ့ၢ်အလ့းစၣ်ဒြူး ဒီးကလဲၤလၢ ကီၢ်အံၤတလံအဃိ အဝဲဒုးဒိးထီၣ်ပှၤ ကဘီတဘ့ၣ်န့ၣ်လီၤ.
၇ ပလဲၤတၢ် ကယီကယီ တဘျုးသီဝံၤ ပလဲၤတုၤလၢ ဝ့ၢ်ကနံဒူး ကီကီခဲခဲလီၤ. ဒီးမ့ၢ်လၢ ကလံၤအဃိ ပလဲၤဆူညါလၢ ကျဲအဝဲန့ၣ် တန့ၢ်လၢၤဘၣ်. အဃိ ပဆဲးလဲၤတၢ်ဘူးဘူး ဒီးကီးကြ့တ့ၤ လၢစၤလမိၣ် ဒ်သိးကဒိးန့ၢ်ဘၣ် တၢ်ဒီသဒၢ အဂီၢ်လီၤ.
၈ ဒီးပဘၣ်လဲၤတၢ် ကီကီခဲခဲအဃိ ပလဲၤဘူးဘူးဒီး ထံကၢၢ်နံၤ ဒီးတုၤဃီၤလၢ တၢ်လီၢ်တတီၤ လၢပှၤကိးအီၤလၢ သန့လၢအဂ့ၤ လၢအအိၣ်ဘူးဒီး ဝ့ၢ်လၤစဲလီၤ.
၉ အါနံၤအါသီဝံၤ အလီၢ်ခံ ဒီးတၢ်ဒုၣ်တၢ်အီၣ်လၢ အဘၣ်ထွဲဒီး တၢ်မၤဘၣ်လိာ်ဖိးဒ့က့ၤတၢ် အမုၢ်နံၤ+ ပူၤကွံာ်ဝဲလံအဃိ ပကဆဲးလဲၤတၢ်အဂီၢ် တၢ်ဘၣ်ယိၣ် အိၣ်ဝဲလီၤ. အဃိ စီၤပီလူးဟ့ၣ်ကူၣ်
၁၀ အဝဲသ့ၣ်လၢ “သကိးသ့ၣ်ဧၢ, ယထံၣ်လၢ ပတၢ်လဲၤအံၤ တၢ်ဘၣ်ဒိဘၣ်ထံး ဒီးတၢ်လီၤမူၤလီၤမၢ် ကအိၣ်ဝဲအါမး ဒီးတမ့ၢ်ထဲကဘီဒီး တၢ်ဖိတၢ်လံၤတဖၣ်ဘၣ် ကပၣ်ဃုာ်စ့ၢ်ကီးဒီး ပသးသမူလီၤ.”
၁၁ ဘၣ်ဆၣ် သုးခိၣ်န့ၣ် တဒိကနၣ် စီၤပီလူး အကလုၢ်ဘၣ်. လၢတၢ်န့ၣ်အလီၢ် အဝဲဒိကနၣ် ကဘီခိၣ် ဒီးကဘီကစၢ် အကလုၢ်လီၤ.
၁၂ ဒီးကဘီသန့ဖဲန့ၣ် တမ့ၢ်တၢ်လီၢ် အကြၢးအဘၣ်လၢ ပှၤကအိၣ်ဝဲဖဲ တၢ်ဂိၢ်ခါ အကတီၢ်ဘၣ်. အဃိ ပှၤအါတက့ၢ် ဟ့ၣ်ကူၣ်ဟ့ၣ်ဖးဝဲလၢ ကဟးထီၣ်ဖဲန့ၣ် ဒီးမ့ၢ်သ့န့ၣ် ကလဲၤတုၤလၢ ဖံၤနံက့ၤ ဒ်သိး ကအိၣ်ဝဲဖဲန့ၣ် ဖဲတၢ်ဂိၢ်ခါ အကတီၢ်အဂီၢ်လီၤ. ဒီးဖံၤနံက့ၤန့ၣ် မ့ၢ်ဝဲကီးကြ့တ့ၤ အကဘီသန့ လၢအမဲာ်ကွၢ်ဃီၤတၢ်လၢ မုၢ်ထီၣ်ကလံၤစိး ဒီးမုၢ်ထီၣ်ကလံၤထံးလီၤ.
၁၃ ဒီးဖဲကလံၤလၢ ကလံၤထံး စးထီၣ်အူတၢ် ကယီကယီအခါ အဝဲသ့ၣ် ဆိကမိၣ်ဝဲလၢ အလဲၤတၢ်ဒ် အတိာ်ပာ်ဝဲအသိး သ့လံအဃိ အဝဲသ့ၣ် ထုးထီၣ်က့ၤနီၣ်သက့ၤ ဒီးစးထီၣ်လဲၤဝဲ ဘူးဘူးဒီး ကီးကြ့တ့ၤအပီၣ်လဲၣ် ကၢၢ်နံၤလီၤ.
၁၄ ဘၣ်ဆၣ် တယံာ်ဘၣ်န့ၣ် ကလံၤမုၢ်လၢ အဆူၣ်လၢ ပှၤကိးအီၤလၢ အူၤရကျူဒိၣ်န့ၣ်* လီၤဝဲလီၤ.
၁၅ ဒီးကလံၤ ဟဲအူဘၣ်ကဘီဆူၣ်ဆူၣ် တုၤဒၣ်လဲာ် ပလဲၤတၢ်လၢ မဲာ်ညါ တန့ၢ်လၢၤဘၣ်အဃိ ပဟ့ၣ်အၡူဒီး လဲၤပိာ်ထွဲ ကလံၤအခံလီၤ.
၁၆ ဒီးဒ်သိး ပကဒိးန့ၢ်ဘၣ် တၢ်ဒီသဒၢအဂီၢ် ပလဲၤတၢ်ဘူးဘူးဒီး ကီးဆံးဆံးဖိလၢ ပှၤကိးအီၤလၢ ကျီဒ့ၤလီၤ. ဘၣ်ဆၣ် ဒ်သိးချံဖိ* လၢအအိၣ်လၢ ကဘီအခံတခီ သုတဟးဂီၤ တဂ့ၤအဂီၢ် ပဘၣ်ပၢၤဃာ်အီၤ ကီကီခဲခဲလီၤ.
၁၇ ဘၣ်ဆၣ် အဝဲသ့ၣ် ထုးထီၣ်ချံဖိတဘ့ၣ်န့ၣ်လၢ ကဘီပူၤန့ၢ်ဝဲဝံၤဒီး စၢထီၣ်ကဘီ အမိၢ်ပှၢ် လၢပျံၤဃံးဃံးလီၤ. ဒီးအဝဲသ့ၣ် ဘၣ်ယိၣ်ဝဲလၢ အကတုၤထီၣ်လၢ စံထ့ၤ အမဲးပျီခိၣ်အဃိ အဝဲသ့ၣ် ထုးလီၤကဘီယၢ်လၣ် ဒီးလဲၤပိာ်ထွဲဝဲ ကလံၤအခံလီၤ.
၁၈ ဒီးခီဖျိလၢ ကလံၤမုၢ်အဃိ ကဘီဟူးဝဲ ဆူၣ်မးလီၤ. လၢခံတနံၤန့ၣ် အဝဲသ့ၣ်ကွံာ်လီၤ တၢ်ဖိတၢ်လံၤတနီၤ ဒ်သိးကဘီ ကဖှံထီၣ်အဂီၢ်လီၤ.
၁၉ လၢသၢသီတသီန့ၣ် အဝဲသ့ၣ်ကွံာ်လီၤဝဲ ကဘီအတၢ်ပီးတၢ်လီ တနီၤလီၤ.
၂၀ ဒီးလၢအါနံၤအါသီ အတီၢ်ပူၤန့ၣ် မုၢ်မ့ၢ်ဂ့ၤ ဆၣ်မ့ၢ်ဂ့ၤ တဖျါထီၣ်ဘၣ် ဒီးကလံၤမုၢ် လီၤဝဲဆူၣ်မး* အဃိ ဖျါလၢ ပကပူၤဖျဲးအဂီၢ် တၢ်မုၢ်လၢ် တအိၣ်လၢၤဘၣ်.
၂၁ ဒီးအဝဲသ့ၣ် တအီၣ်ဘၣ်တၢ်ဘၣ် အိၣ်ဖးယံာ်လံ. အဃိ စီၤပီလူး ဂဲၤဆၢထၢၣ်လၢ အဝဲသ့ၣ်အကျါ ဒီးတဲဝဲလၢ “သကိးသ့ၣ်ဧၢ, သုမ့ၢ်ဒိကနၣ် ယတၢ်ဟ့ၣ်ကူၣ် ဒီးသုမ့ၢ်တဟးထီၣ်လၢ ကီးကြ့တ့ၤဘၣ်န့ၣ် တမ့ၢ်လၢ ပကထံၣ်ဘၣ် တၢ်ဘၣ်ဒိဘၣ်ထံး ဒီးတၢ်လီၤမူၤလီၤမၢ် ဒ်အံၤဘၣ်.+
၂၂ ဘၣ်ဆၣ်ခဲအံၤ ယကဟ့ၣ်ဂံၢ်ဟ့ၣ်ဘါသုလၢ ပာ်ဆူၣ်ထီၣ် သုသးတက့ၢ်, သုသးသမူ တလီၤမၢ်နီတဂၤဘၣ်. ကဟးဂီၤဒၣ်ထဲ ကဘီတဘ့ၣ်လီၤ.
၂၃ ဖဲမနၤကၢာ်, ကစၢ်ယွၤလၢ ယဘူၣ်ထီၣ်ဘါထီၣ် ဒီးမၤအတၢ်တဂၤန့ၣ် အမူခိၣ်ကလူး+ ဆၢထၢၣ်လၢ ယကပၤ
၂၄ ဒီးတဲဝဲလၢ ‘စီၤပီလူးဧၢ, တဘၣ်ပျံၤတၢ်တဂ့ၤ, နကဘၣ် လဲၤဆၢထၢၣ်လၢ ကဲစၢ်အမဲာ်ညါလီၤ.+ ဒီးကစၢ်ယွၤ ကမၤပူၤဖျဲး ပှၤလၢအဒိးကဘီ ဒီးနၤကိးဂၤဒဲးလီၤ.’
၂၅ အဃိ သကိးသ့ၣ်ဧၢ, ပာ်ဆူၣ်ထီၣ် သုသးတက့ၢ်, ယနာ်လၢ ကစၢ်ယွၤ ကမၤဝဲဒ် တၢ်လၢ အတဲဘၣ်ယၤအသိး လီၤတံၢ်လီၤဆဲးလီၤ.
၂၆ ဘၣ်ဆၣ် ပကဘီ ကဟးဂီၤဝဲဘူးဒီး ကီးတဖျၢၣ်ဖျၢၣ်လီၤ.”+
၂၇ ဖဲ ၁၄ နၤတနၤန့ၣ် ကလံၤအူဝ့ၤဝီၤပှၤလၢ ပီၣ်လဲၣ်အ့ဒြံအပူၤလီၤ. လၢဖးဖီမုၢ်န့ၣ် ပှၤကဘီဖိတဖၣ် ဆိကမိၣ်ဝဲလၢ အဝဲသ့ၣ် လဲၤဘူးထီၣ်ဒီး ခိခိၣ်လံ.
၂၈ အဃိ အဝဲသ့ၣ် ထိၣ်ကွၢ်ထံဒီး သ့ၣ်ညါဘၣ်ဝဲလၢ အယိာ်ဝဲအပ့ၣ် ၁၂၀* ဒီးအဝဲသ့ၣ် လဲၤဆူညါတတီၤဖိ ဒီးထိၣ်ကွၢ်ကဒီးဝဲ ဒီးသ့ၣ်ညါဘၣ်ဝဲလၢ အယိာ်ဝဲအပ့ၣ် ၉၀ လီၤ.*
၂၉ ဒီးပဘၣ်ယိၣ်လၢ ကဘီကဘၣ်တိၢ်လၢ လၢၢ်အဃိ ပကွံာ်လီၤ နီၣ်သက့ၤလွံၢ်ခါလၢ ကဘီအခံတခီ ဒီးပမုၢ်လၢ်လၢ မုၢ်ကဝါထီၣ်လီၤ.
၃၀ ဘၣ်ဆၣ် လၢခံန့ၣ် ပှၤကဘီဖိတဖၣ် စးထီၣ်ဃုကျဲ ဒ်သိး အကဃ့ၢ်ပူၤဖျဲးကွံာ် အသးအဃိ အဝဲသ့ၣ်စဲၤလီၤ ချံဖိလၢထံကျါ ဒီးပာ်မၤအသးလၢ အဝဲသ့ၣ် ကသူအီၤဒ်သိး ကစဲၤလီၤ နီၣ်သက့ၤတဖၣ်လၢ ကဘီအခိၣ် တကပၤလီၤ.
၃၁ စီၤပီလူး တဲဘၣ်သုးခိၣ် ဒီးသုးဖိတဖၣ်လၢ “ပှၤတဖၣ်အံၤ မ့ၢ်တအိၣ်လၢ ကဘီအပူၤလၢၤဘၣ်န့ၣ် သုပူၤဖျဲး တသ့ဘၣ်.”+
၃၂ အဃိ သုးဖိတဖၣ် ကူးတဲာ်ကွံာ်ဝဲ ချံဖိအပျံၤတဖၣ် ဒီးပျၢ်ကွံာ်ဝဲလီၤ.
၃၃ ဘူးထီၣ်လၢ မုၢ်ကဝါထီၣ်အခါ စီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ်ခဲလၢာ်လၢ ကအီၣ်တၢ် ဒီးတဲဝဲလၢ “တနံၤအံၤ သုအိၣ်ခိးတၢ်လၢ တၢ်သူၣ်ကိၢ်သးဂီၤအပူၤ ပှဲၤထီၣ် ၁၄ သီတသီလံ ဒီးသုတအီၣ်တၢ် နီတမံၤဘၣ်.
၃၄ အဃိ ယဟ့ၣ်ဂံၢ်ဟ့ၣ်ဘါသုလၢ သုကအီၣ်တၢ်တမံၤမံၤ လၢသု တၢ်အိၣ်ဆူၣ်အိၣ်ချ့ အဂီၢ်လီၤ. သုခိၣ်ဆူၣ် တဘိဒၣ်လဲာ် တလီၤမၢ်လၢ သုခိၣ်လိၤဘၣ်.”
၃၅ အဝဲတဲဝဲ ဒ်န့ၣ်ဝံၤဒီး အဝဲဟံးန့ၢ်ကိၣ် ဒီးစံးဘျုးစံးဖှိၣ် ကစၢ်ယွၤလၢ အဝဲသ့ၣ် ခဲလၢာ်အမဲာ်ညါ ဒီးဘိးကၢ်ဝဲ ဒီးအီၣ်တၢ်လီၤ.
၃၆ အဃိ အဝဲသ့ၣ်ခဲလၢာ် ပာ်ဆူၣ်ထီၣ်အသးဒီး စးထီၣ်အီၣ်တၢ်လီၤ.
၃၇ ပဝဲခဲလၢာ် လၢအအိၣ်လၢ ကဘီပူၤန့ၣ် အိၣ်ဝဲ ၂၇၆ ဂၤလီၤ.
၃၈ ဖဲအဝဲသ့ၣ် အီၣ်တၢ် ဘျဲဘျဲဝံၤအခါ အဝဲသ့ၣ် ကွံာ်လီၤ ဘုကၠူၣ်လၢ ပီၣ်လဲၣ်ပူၤ ဒ်သိး ကဘီကဖှံထီၣ် အဂီၢ်လီၤ.+
၃၉ ဖဲမုၢ်ဝါထီၣ်အခါ အဝဲသ့ၣ် ထံၣ်စိဝဲခိခိၣ် ဘၣ်ဆၣ် အမ့ၢ်တၢ်လီၢ်ဖဲလဲၣ်န့ၣ် အဝဲသ့ၣ် တသ့ၣ်ညါဝဲဘၣ်.+ ဘၣ်ဆၣ် အဝဲသ့ၣ်ထံၣ်ဝဲ ပီၣ်လဲၣ်ကၢၢ်နံၤတတီၤ ဒီးအဝဲသ့ၣ် ပာ်လီၤအသးလၢ မ့ၢ်သ့န့ၣ် ကလဲၤပာ်ပတုာ် ကဘီဖဲန့ၣ်လီၤ.
၄၀ အဃိ အဝဲသ့ၣ် ကူးတဲာ်ကွံာ် နီၣ်သက့ၤတဖၣ်အပျံၤ ဒီးပျဲဝဲလၢ နီၣ်သက့ၤတဖၣ် ကလီၤဘျၢကွံာ်လၢ ပီၣ်လဲၣ်ပူၤ ဒီးတဘျီဃီန့ၣ် အဝဲသ့ၣ် ဃဲၣ်လီၤကွံာ် ပျံၤလၢအစၢဃာ် နီၣ်ဝၢ်တဖၣ်လီၤ. ဒီးအဝဲသ့ၣ်ထုးထီၣ် ယၢ်လၣ်တဘ့ၣ်လၢ ကဘီအမဲာ်ညါ ဒ်သိး ကလံၤကဆီၣ်ဖျိး ကဘီလၢ ထံကၢၢ်နံၤအဂီၢ်လီၤ.
၄၁ ဘၣ်ဆၣ် ကဘီ အိၣ်ဘုးတာ်အသးလၢ မဲးခိၣ်လၢ ထံဒီၣ်အလီၢ် ဖဲထံခံခီ ဘၣ်သဂၢၢ် လိာ်အသးလီၤ. ဒီးကဘီအခိၣ် တကူာ်န့ၣ် အိၣ်ကတာ်ဝဲဒီး ဟူးဝဲတန့ၢ်လၢၤဘၣ်. မ့မ့ၢ် အခံတကပၤန့ၣ် လပီဘၣ်အီၤ ဆူၣ်မးအဃိ အသ့ၣ်ဖးကွံာ်ဝဲလီၤ.+
၄၂ ဖဲန့ၣ်အခါ ဒ်သိးပှၤဃိာ်ဖိတဖၣ် သုတပီၢ်ထံ ဒီးထူၣ်ဖျဲး နီတဂၤတဂ့ၤအဂီၢ် သုးဖိတဖၣ် ပာ်လီၤအသးလၢ အကမၤသံကွံာ် အဝဲသ့ၣ်လီၤ.
၄၃ ဘၣ်ဆၣ် သုးခိၣ်န့ၣ် အဲၣ်ဒိးမၤပူၤဖျဲး စီၤပီလူးအဃိ အဝဲတြီဝဲ ပှၤသုးဖိတဖၣ် ဒ်သိး အသုတမၤဒ်န့ၣ်တဂ့ၤ အဂီၢ်လီၤ. အဃိ အဝဲဟ့ၣ်လီၤ တၢ်ကလုၢ်လၢ ပှၤလၢ အပီၢ်ထံသ့တဖၣ်န့ၣ် ကဖုလီၤလၢ ပီၣ်လဲၣ်ပူၤဒီး ကလဲၤပီၢ်ဆိထံ တုၤလၢ ထံကၢၢ်နံၤ
၄၄ ဒီးမ့မ့ၢ် ပှၤအဂၤတဖၣ် ကလဲၤပိာ်ထီၣ် အဝဲသ့ၣ်အခံ, တနီၤနီၤလၢ သ့ၣ်ဘၣ်အလိၤ ဒီးအဂၤတနီၤနီၤလၢ ကဘီအက့တဖၣ် အလိၤလီၤ. အဃိ ပှၤခဲလၢာ် လဲၤတုၤဝဲလၢ ထံကၢၢ်နံၤ ပူၤပူၤဖျဲးဖျဲးလီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ကလံၤမုၢ်လၢအဟဲလၢ မုၢ်ထီၣ်ကလံၤစိး.
^ ချံအပိၣ်ဆံးဆံးဖိတဘ့ၣ်လၢ ကမၤပူၤဖျဲးသးသမူ.
^ အခီပညီလိၤလိၤ “တမ့ၢ်ဆံးဆံးဖိဘၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
