မၤတၢ် ၄:၁-၃၇
-
စီၤပ့းတရူးဒီးစီၤယိၤဟၣ် ဘၣ်တၢ်ဖီၣ်အဝဲသ့ၣ် (၁-၄)
-
ပိာ်ခွါလၢ အစူၢ်က့ၤနာ်က့ၤတၢ် အိၣ်ဝဲအဂၤ ၅,၀၀၀ (၄)
-
-
တၢ်သံကွၢ်သံဒိးလၢ ပှၤယူဒၤဖိအကွီၢ်ဘျီၣ်လၢ အဒိၣ်ကတၢၢ်အမဲာ်ညါ (၅-၂၂)
-
“ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်” (၂၀)
-
-
ဃ့ထုကဖၣ်လၢ ကအိၣ်ဒီးတၢ်သးဒူ (၂၃-၃၁)
-
ပှၤစူၢ်က့ၤနာ်က့ၤတၢ်တဖၣ် ဟ့ၣ်နီၤလီၤဝဲ တၢ်လၢအိၣ်ဒီးအဝဲသ့ၣ်တဖၣ် (၃၂-၃၇)
၄ ဖဲအဝဲသ့ၣ်ခံဂၤ တဲတၢ်ဒီး ပှၤဂီၢ်မုၢ်အခါန့ၣ် ပှၤလုၢ်တၢ်ဒိၣ်တဖၣ်, ပှၤကွၢ်ထွဲ တၢ်လုၢ်ဟံၣ်အခိၣ် ဒီးပှၤစးဒူၤကဲတဖၣ်+ ဟဲလၢအဝဲသ့ၣ် အအိၣ်လီၤ.
၂ ဒီးမ့ၢ်လၢ တၢ်မၢဖိခံဂၤအံၤ သိၣ်လိပှၤဂီၢ်မုၢ် ဒီးစံၣ်တဲၤတဲလီၤဝဲလၢ ယ့ၣ်ၡူးဘၣ်တၢ် မၤသမူထီၣ်က့ၤအီၤလၢ တၢ်သံအဂ့ၢ် ပျီပျီအဃိ အဝဲသ့ၣ်အသးဘၣ်တံာ်တာ်လီၤ.+
၃ အဃိ အဝဲသ့ၣ် ဖီၣ်တၢ်မၢဖိခံဂၤအံၤ ဒီးဘၣ်လၢ မုၢ်ဟါလီၤလံအဃိ အဝဲသ့ၣ် ဖၢနုာ်တၢ်မၢဖိခံဂၤလၢဃိာ်ပူၤ+ တုၤလီၤလၢ လၢခံတနံၤလီၤ.
၄ ဘၣ်ဆၣ် ပှၤအါဂၤလၢ အနၢ်ဟူဘၣ် တၢ်စံၣ်တဲၤတဲလီၤန့ၣ် စူၢ်က့ၤနာ်က့ၤတၢ် ဒီးပိာ်ခွါလၢ အစူၢ်က့ၤနာ်က့ၤတၢ်တဖၣ်န့ၣ် အနီၣ်ဂံၢ်အါထီၣ် တုၤလၢ အဂၤ ၅,၀၀၀ လီၤ.+
၅ လၢခံတနံၤန့ၣ် ပှၤယူဒၤဖိ အခိၣ်နၢ်, ပှၤသူၣ်က့သးပှၢ်တဖၣ် ဒီးပှၤကွဲးလံာ်ဖိတဖၣ် ပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ်အပူၤ
၆ ဃုာ်ဒီး ပှၤလုၢ်တၢ်ဒိၣ်အခိၣ် စီၤအၣ်နၣ်,+ စီၤကၤယါဖၤ,+ စီၤယိၤဟၣ်, စီၤအလ့းစၣ်ဒြူး ဒီးပှၤခဲလၢာ်လၢ အဒီဘူးဒီတံၢ်ဒီး ပှၤလုၢ်တၢ်ဒိၣ်အခိၣ်လီၤ.
၇ အဝဲသ့ၣ်မၢ စီၤပ့းတရူး ဒီးစီၤယိၤဟၣ် ဆၢထၢၣ်လၢ အဝဲသ့ၣ် အခၢၣ်သးဒီး သံကွၢ်ဝဲလၢ “သုမၤတၢ်အံၤလၢ မတဂၤအစိအကမီၤ ဒီးလၢမတဂၤ အမံၤလဲၣ်.”
၈ သးစီဆှံ ဟဲလီၤလၢ စီၤပ့းတရူးအလိၤ*+ ဒီးအဝဲတဲဘၣ် အဝဲသ့ၣ်လၢ
“ပှၤဂီၢ်မုၢ်ခိၣ်နၢ်တဖၣ် ဒီးပှၤသူၣ်က့သးပှၢ်သ့ၣ်ဧၢ,
၉ တနံၤအံၤ သုမ့ၢ်အဲၣ်ဒိးသံကွၢ်သံဒိးပှၤ ဘၣ်ဃးဒီး ပှၤလၢ အခီၣ်တဂ့ၤဘၣ်+ လၢအဘၣ် တၢ်မၤဂ့ၤထီၣ်အီၤတဂၤအံၤအဂ့ၢ် ဒီးသုမ့ၢ်အဲၣ်ဒိး သ့ၣ်ညါလၢ မတဂၤ မၤဘျါက့ၤအီၤလဲၣ်န့ၣ်
၁၀ သုဝဲကိးဂၤဒဲး ဒီးပှၤအံၣ်စရ့လးဖိခဲလၢာ် ကဘၣ် သ့ၣ်ညါတၢ်ဂ့ၢ်တခါလီၤ. ပှၤတဂၤအံၤ အိၣ်ဆၢထၢၣ်လၢ သုမဲာ်ညါ ပှဲၤဒီးတၢ်အိၣ်ဆူၣ်အိၣ်ချ့န့ၣ် မ့ၢ်လၢ ပှၤနစၤရ့းဖိယ့ၣ်ၡူးခရံာ် အမံၤအဃိလီၤ.+ ယ့ၣ်ၡူးမ့ၢ်ပှၤတဂၤလၢ သုပျၤထီအီၤလၢ သ့ၣ်တၢၣ်အလိၤ+ ဘၣ်ဆၣ် ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံလီၤ.+
၁၁ ဒီးအဝဲမ့ၢ် ‘လၢၢ်တဖျၢၣ်လၢ သုဝဲသ့ၣ်လၢအမ့ၢ် ပှၤသူၣ်ဟံၣ်ဖိတဖၣ် တပာ်ကဲအီၤဘၣ်, ဘၣ်ဆၣ် အဝဲ ကဲထီၣ်လၢၢ်လၢ အရ့ဒိၣ်ကတၢၢ်တဖျၢၣ်လီၤ.’+
၁၂ တကးဒံးဘၣ် ပှၤအဂၤလၢ အကအုၣ်က့ၤခီၣ်က့ၤပှၤန့ၣ် တအိၣ်နီတဂၤဘၣ်.+ ဒီးလၢဟီၣ်ခိၣ်ချၢန့ၣ် မံၤအဂုၤအဂၤလၢ ကစၢ်ယွၤ ဟ့ၣ်လီၤဝဲဒ်သိး ပကဒိးန့ၢ်ဘၣ် တၢ်အုၣ်က့ၤခီၣ်က့ၤ ခီဖျိလၢအီၤန့ၣ် တအိၣ်နီတဖျၢၣ်ဘၣ်.”+
၁၃ ဖဲအဝဲသ့ၣ် ထံၣ်ဝဲလၢ စီၤပ့းတရူး ဒီးစီၤယိၤဟၣ် တဲတၢ်ဒူဒူ ဒီးသ့ၣ်ညါဝဲလၢ ပှၤခံဂၤအံၤ တမ့ၢ် ပှၤကူၣ်ဘၣ်ကူၣ်သ့ဘၣ်,* မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိအခါ+ အဝဲသ့ၣ် ကမၢကမၣ်ဝဲ ဒိၣ်မးလီၤ. ဒီးအဝဲသ့ၣ် သ့ၣ်ညါနၢ်ပၢၢ်ထီၣ်ဝဲလၢ ပှၤခံဂၤအံၤ မ့ၢ်ပှၤလၢ အအိၣ်ဝဲဒီး ယ့ၣ်ၡူးလၢအပူၤကွံာ်လီၤ.+
၁၄ အဝဲသ့ၣ်ကွၢ်ဝဲ ပှၤလၢအဘၣ် တၢ်မၤဘျါက့ၤအီၤတဂၤ ဆၢထၢၣ်ဃုာ်ဒီး တၢ်မၢဖိခံဂၤန့ၣ်+ ဒီးအဝဲသ့ၣ် တဲဆၢက့ၤတၢ် တဘၣ်နီတမံၤဘၣ်.+
၁၅ အဃိ အဝဲသ့ၣ် မၢပှၤသၢဂၤန့ၣ် ဟးထီၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်အချၢ ဒီးအဝဲသ့ၣ် တၢၣ်ပီၣ်တၢၣ်ပီလိာ်အသး တဂၤဒီးတဂၤ
၁၆ ဒီးတဲဝဲလၢ “ပကဘၣ်မၤ ပှၤတဖၣ်အံၤဒ်လဲၣ်.+ အဝဲသ့ၣ် မၤတၢ်ပနီၣ်လီၤလး တခါအံၤ ဒီးပှၤလၢ အအိၣ်ဝဲဆိးဝဲလၢ ဝ့ၢ်ယရူၤၡလ့ၣ်အပူၤကိးဂၤဒဲး+ သ့ၣ်ညါဝဲအဃိ ပဂ့ၢ်လိာ်အီၤ တသ့ဘၣ်.
၁၇ အဃိ ဒ်သိးတၢ်ကစီၣ်အံၤ သုတဟူထီၣ်သါလီၤလၢ ပှၤဂီၢ်မုၢ်အကျါ လၢၤတဂ့ၤအဂီၢ် ပကတဲပျံၤတဲဖုးအဝဲသ့ၣ် ဒီးမၤလိာ်အဝဲသ့ၣ် ဒ်သိးအသုတတဲဘၣ် ပှၤဂၤလၢ ယ့ၣ်ၡူး အမံၤအပူၤလၢၤတဂ့ၤ အဂီၢ်လီၤ.”+
၁၈ အဃိ ပှၤတဖၣ်န့ၣ် ကိးန့ၢ်စီၤပ့းတရူး ဒီးစီၤယိၤဟၣ် ဒီးမၤလိာ် အဝဲသ့ၣ်ဒ်သိး အသု တစံၣ်တဲၤတဲလီၤတၢ် ဒီးသိၣ်လိတၢ်လၢ ယ့ၣ်ၡူးအမံၤအပူၤ နီတစဲးလၢၤတဂ့ၤ အဂီၢ်လီၤ.
၁၉ ဘၣ်ဆၣ် စီၤပ့းတရူး ဒီးစီၤယိၤဟၣ် တဲဘၣ်အဝဲသ့ၣ်လၢ “လၢပကဒိကနၣ် ကစၢ်ယွၤအလီၢ် ပမ့ၢ်ဒိကနၣ်က့ၤလၢ သုကလုၢ်န့ၣ် မ့ၢ်ကစၢ်ယွၤ ကထံၣ်ဝဲလၢ အဘၣ်ဧါ တဘၣ်ဘၣ်ဧါန့ၣ် ဆၢတဲာ်လၢ သုနီၢ်ကစၢ်တက့ၢ်.
၂၀ ဘၣ်ဆၣ် မ့မ့ၢ်ပှၤန့ၣ် တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.”+
၂၁ အဃိ ပှၤတဖၣ်န့ၣ် ဆဲးတဲပျံၤတဲဖုး စီၤပ့းတရူး ဒီးစီၤယိၤဟၣ်လီၤ. ဘၣ်ဆၣ် မ့ၢ်လၢ ပှၤတဖၣ်န့ၣ် တထံၣ်အဝဲသ့ၣ် အတၢ်ကမၣ်လၢ အကြၢးဘၣ် တၢ်စံၣ်ညီၣ်အီၤဘၣ်အဃိ+ ဒီးမ့ၢ်လၢ ပှၤဂီၢ်မုၢ်ခဲလၢာ် မၤလၤကပီၤ ကစၢ်ယွၤလၢ တၢ်မၤအသးတခါအံၤ အဃိ ပှၤတဖၣ်န့ၣ် ပျၢ်ကွံာ်အဝဲသ့ၣ်လီၤ.
၂၂ ဒီးပှၤလၢ အဘၣ်တၢ်မၤဘျါက့ၤအီၤလၢ တၢ်လီၤလးအပူၤ တဂၤအံၤန့ၣ် အသးနံၣ်အိၣ်ဝဲ ၄၀ ဘျဲၣ်လီၤ.
၂၃ ဖဲအဝဲသ့ၣ် ထူၣ်ဖျဲးထီၣ်ဝံၤအလီၢ်ခံ အဝဲသ့ၣ်က့ၤဝဲလၢ ပှၤလၢ အစူၢ်က့ၤနာ်က့ၤတၢ် ကဒဲကဒဲအအိၣ် ဒီးတဲဖျါထီၣ်ဝဲ တၢ်လၢ ပှၤလုၢ်တၢ်ဒိၣ်အခိၣ်တဖၣ် ဒီးပှၤသူၣ်က့သးပှၢ်တဖၣ် တဲဘၣ် အဝဲသ့ၣ်လီၤ.
၂၄ ဖဲပှၤအိၣ်ဖဲန့ၣ်တဖၣ် နၢ်ဟူဝဲဒ်န့ၣ်အခါ လၢတၢ်သးတဖျၢၣ်ဃီအပူၤ အဝဲသ့ၣ် ဃ့ထုကဖၣ်တၢ်လၢ ကစၢ်ယွၤ အအိၣ်လၢ
“တၢ်ပၢကစၢ်ဧၢ, နမ့ၢ်ပှၤလၢအတ့လီၤ မူခိၣ်ဒီးဟီၣ်ခိၣ် ဒီးပီၣ်လဲၣ် ဒီးကယဲၢ်တၢ်အိၣ်လၢ အပူၤခဲလၢာ်လီၤ.+
၂၅ နသူသးစီဆှံဒ်သိး နကတဲတၢ်ခီဖျိလၢ နခ့နပှၤပဖုဖးဒိၣ် စီၤဒၤဝံးအထးခိၣ်လၢ+ ‘ဘၣ်မနုၤအဃိ ပှၤကလုာ်တဖၣ် အသးဘၣ်တံာ်တာ် ဒီးပှၤဟီၣ်ခိၣ်ဖိတဖၣ် ဆိကမိၣ်တၢ်လၢ အဘျုးတအိၣ်ဘၣ်တဖၣ်လဲၣ်.
၂၆ ဟီၣ်ခိၣ်အစီၤပၤတဖၣ် ဆၢထၢၣ်ကတဲာ်ကတီၤ ပာ်စၢၤအသး ဒီးပှၤခိၣ်ပှၤနၢ်တဖၣ် အိၣ်ဖှိၣ်ဝဲတပူၤဃီ ဒ်သိးကထီဒါ ယဟိဝၤယွၤ* ဒီးအပှၤဒိးဖှူသးတဂၤအဂီၢ်လီၤ.’*+
၂၇ မ့ၢ်လီၤ, စီၤဟ့ၤရိာ် ဒီးစီၤပီၣ်တံၤပံၤလး+ ဒီးပှၤကလုာ်အဂၤတဖၣ် ဒီးပှၤအံၣ်စရ့လးဖိတဖၣ် အိၣ်ဖှိၣ်ဝဲတပူၤဃီ လၢဝ့ၢ်တဖျၢၣ်အံၤအပူၤ ဒ်သိးကထီဒါဝဲ နခ့နပှၤစီဆှံယ့ၣ်ၡူးလၢ နဒိးဖှူအီၤတဂၤလီၤ.+
၂၈ ဒီးအဝဲသ့ၣ် အိၣ်ဖှိၣ်ဝဲ ဒ်သိးကမၤတၢ်လၢ နတဲပာ်စၢၤဝဲအဂီၢ် ဒီးတၢ်သ့ၣ်တဖၣ်အံၤ ကဲထီၣ်အသး ခီဖျိလၢနစိကမီၤ* ဒ်နတၢ်ဘၣ်သး အိၣ်ဝဲအသိးလီၤ.+
၂၉ ယဟိဝၤယွၤဧၢ, ခဲအံၤ မ်နနၢ်ဟူ ပှၤတဖၣ်န့ၣ် အတၢ်တဲပျံၤတဲဖုး ဒီးမၤစၢၤ ပဝဲနကုၢ်တဖၣ်အံၤ ဒ်သိး ပကဆဲးစံၣ်တဲၤတဲလီၤ နကလုၢ်ကထါ ဒူဒူအဂီၢ်တက့ၢ်.
၃၀ ဒီးဆဲးပာ်ဖျါထီၣ် နစိကမီၤဒ်သိး နကမၤဘျါက့ၤ တၢ်ဆူးတၢ်ဆါအဂီၢ် ဒီးမၤတၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ်+ ခီဖျိလၢ နခ့နပှၤစီဆှံ ယ့ၣ်ၡူးအမံၤန့ၣ်တက့ၢ်.”+
၃၁ ဖဲအဝဲသ့ၣ် ဃ့ကညးတၢ် ဝံၤအလီၢ်ခံ တၢ်လီၢ်လၢအဝဲသ့ၣ် အိၣ်ဖှိၣ်ဝဲ တပူၤဃီန့ၣ် ဟူးဝးဝဲဒီး သးစီဆှံ+ ဟဲလီၤလၢ အဝဲသ့ၣ်ခဲလၢာ်အလိၤ ဒီးအဝဲသ့ၣ် စံၣ်တဲၤတဲလီၤ ကစၢ်ယွၤ အကလုၢ်ကထါဒူဒူလီၤ.+
၃၂ တကးဒံးဘၣ် ပှၤလၢ အစူၢ်က့ၤနာ်က့ၤတၢ် ကိးဂၤဒဲး အိၣ်ဒီး တၢ်သးတဖျၢၣ်ဃီ ဒီးတၢ်တိာ်ပာ် တမံၤဃီ ဒီးအဝဲသ့ၣ် တတဲဝဲလၢ တၢ်လၢအအိၣ်ဒီးအီၤန့ၣ် မ့ၢ်အနီၢ်ကစၢ်တၢ် နီတဂၤဘၣ်. တၢ်လၢအအိၣ်ဒီး အဝဲသ့ၣ်ခဲလၢာ်န့ၣ် အဝဲသ့ၣ် ဟ့ၣ်နီၤလီၤလိာ်အသး တဂၤဒီးတဂၤလီၤ.+
၃၃ ဒီးတၢ်မၢဖိတဖၣ် ဆဲးအုၣ်အသး သ့သ့ဘၣ်ဘၣ် ဘၣ်ဃးဒီး ကစၢ်ယ့ၣ်ၡူး အတၢ်ဂဲၤဆၢထၢၣ် သမူထီၣ်က့ၤအဂ့ၢ်+ ဒီးကစၢ်ယွၤ ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢအဝဲသ့ၣ်ခဲလၢာ် အဖီခိၣ်လီၤ.
၃၄ ဒီးလၢ အဝဲသ့ၣ်အကျါန့ၣ် ပှၤလၢ အတၢ်အိၣ်တယၢဘၣ်န့ၣ် တအိၣ်နီတဂၤဘၣ်.+ ပှၤကိးဂၤဒဲးလၢ အအိၣ်ဒီး ဟီၣ်ခိၣ်လီၢ်တဖၣ်မ့ၢ်ဂ့ၤ, အဟံၣ်အဃီတဖၣ်မ့ၢ်ဂ့ၤ အဝဲသ့ၣ်ဆါကွံာ်ဝဲလီၤ. ဒီးကျိၣ်စ့လၢ အဒိးန့ၢ်ဘၣ်ဝဲတဖၣ်န့ၣ် အဝဲသ့ၣ်ဟဲစိာ်
၃၅ ဒီးအးလီၤဝဲလၢ တၢ်မၢဖိတဖၣ်အစုပူၤ+ ဒီးတၢ်မၢဖိတဖၣ် ဟ့ၣ်နီၤလီၤဝဲ ဒ်ပှၤတဂၤစုာ်စုာ် အတၢ်လိၣ်ဘၣ် အိၣ်ဝဲအသိးလီၤ.+
၃၆ ဒီးပှၤလ့ၤဝံဖိ စီၤယိၤသးလၢ အအိၣ်ဖျဲၣ်ထီၣ်လၢ ကီးကူပြူးအပူၤ, လၢတၢ်မၢဖိတဖၣ် ကိးစ့ၢ်ကီးအီၤလၢ စီၤဘၢ်နါဘၤ+ (အခီပညီမ့ၢ်ဝဲ “ပှၤလၢအမၤမုာ်ထီၣ်ပှၤဂၤ”) န့ၣ်
၃၇ အအိၣ်ဒီး ဟီၣ်ခိၣ်တကဝီၤလီၤ. ဒီးအဝဲဆါလီၤကွံာ်ဝဲ ဝံၤဒီးလဲၤစိာ်ဝဲစ့အံၤ ဒီးအးလီၤဝဲလၢ တၢ်မၢဖိတဖၣ် အစုပူၤလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “လၢထီၣ်ပှဲၤထီၣ်ဒီး သးစီဆှံ.”
^ ဖျါလၢအဲၣ်ဒိးတဲဝဲ တမၤလိဘၣ်တၢ်လၢ ဧ့ၤဘြံၤအတၢ်ဘူၣ်တၢ်ဘါကၠိဘၣ်.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “အခရံာ်.”
^ အခီပညီလိၤလိၤ “နစု.”
