မၤတၢ် ၈:၁-၄၀
၈ ဒီးပှၤမၤသံ စီၤစတ့းဖၣ်န့ၣ် စီၤစီလူး ဘၣ်သူၣ်ဘၣ်သးဝဲလီၤ.+
စးထီၣ်ဖဲ တၢ်တနံၤန့ၣ် ပှၤမၤနးမၤဖှီၣ် တၢ်အိၣ်ဖှိၣ်လၢ အအိၣ်လၢ ဝ့ၢ်ယရူၤၡလ့ၣ်အပူၤ နးမးလီၤ. အဃိ အဝဲသ့ၣ်ကိးဂၤဒဲး လီၤပြံလီၤပြါဝဲ သကုၤလၢ ယူဒၤဒီးၡၤမရံ အဟီၣ်ကဝီၤအပူၤ, ဒီးထဲဒၣ် တၢ်မၢဖိတဖၣ်န့ၣ် အိၣ်တ့ၢ်လၢ ဝ့ၢ်ယရူၤၡလ့ၣ်အပူၤလီၤ.+
၂ ဘၣ်ဆၣ် ပှၤလၢအပျံၤ ကစၢ်ယွၤန့ၣ် က့ၤစိာ်ကွံာ် စီၤစတ့းဖၣ်အစိၣ် ဒ်သိး ကခူၣ်လီၤကွံာ်အီၤအဂီၢ်လီၤ. ဒီးအဝဲသ့ၣ် ဟီၣ်ဝဲယၢၤဝဲလၢ အဃိဒိၣ်မးလီၤ.
၃ မ့မ့ၢ် စီၤစီလူးန့ၣ် စးထီၣ်မၤနးမၤဖှီၣ် တၢ်အိၣ်ဖှိၣ် အၢအၢသီသီလီၤ. အဝဲလဲၤနုာ်လီၤဆူၣ်လၢ ဟံၣ်တဖျၢၣ်ဘၣ် တဖျၢၣ်အပူၤ ဒီးတွံၢ်ထီၣ်ဝဲ ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ ဒီးဟ့ၣ်လီၤကွံာ် အဝဲသ့ၣ် ဒ်သိး ကလီၤဘၣ်လၢ ဃိာ်ပူၤအဂီၢ်လီၤ.+
၄ ဘၣ်ဆၣ် ပှၤလၢ အလီၤပြံလီၤပြါတဖၣ်အံၤန့ၣ် စံၣ်တဲၤတဲလီၤ တၢ်သးခုကစီၣ်လၢ တၢ်လီၢ် သကုၤဆးဒးလီၤ.+
၅ ဒီးစီၤဖံလံးပူး လဲၤလီၤလၢ ၡၤမရံအဝ့ၢ်+ ဒီးစးထီၣ် စံၣ်တဲၤတဲလီၤ အဝဲသ့ၣ်လၢ ခရံာ်အဂ့ၢ်လီၤ.
၆ တၢ်လၢ စီၤဖံလံးပူး တဲဝဲတဖၣ်န့ၣ် ပှၤဂီၢ်မုၢ်တဖၣ် ဒိကနၣ်ဝဲ လီၤတံၢ်လီၤဆဲး လၢတၢ်သးတဖျၢၣ်ဃီအပူၤ ဒီးကွၢ်ဝဲ တၢ်ပနီၣ်လီၤလးလၢ အမၤဝဲတဖၣ်လီၤ.
၇ တၢ်ဝံတၢ်နါတဖၣ် လၢအအိၣ်လၢ ပှၤအါဂၤအလိၤန့ၣ် ကိးပသူထီၣ်ဝဲလၢ အကလုၢ်ဖးဒိၣ် ဝံၤဒီးဟးထီၣ်ကွံာ်ဝဲလီၤ.+ တကးဒံးဘၣ် ပှၤအါဂၤလၢ အစုလီၤဘျ့ ခီၣ်လီၤဘျ့ ဒီးအခီၣ် ဟးဂီၤတဖၣ်န့ၣ် ဘျါကွံာ်ဝဲလီၤ.
၈ အဃိ ပှၤလၢအအိၣ်လၢ ဝ့ၢ်တဖျၢၣ်န့ၣ်အပူၤန့ၣ် သးခုဝဲဒိၣ်မးလီၤ.
၉ ဒီးလၢဝ့ၢ်အံၤအပူၤန့ၣ် ပှၤလၢအမံၤလၢ စီၤၡံမိၣ် အိၣ်ဝဲတဂၤလီၤ. လၢညါအမ့ၢ် ပှၤမၤကဒါပှၤမဲာ်အဃိ အဒုးကမၢကမၣ်ဝဲ ပှၤၡၤမရံဖိတဖၣ်လီၤ. ဒီးအဝဲ တဲလီၤအသးလၢ အမ့ၢ်ပှၤလၢ အရ့ဒိၣ်တဂၤလီၤ.
၁၀ ပှၤၡၤမရံဖိ ကိးဂၤဒဲး စးထီၣ်လၢ ပှၤအဒိၣ်ကတၢၢ် တုၤလၢ ပှၤအဆံးကတၢၢ်န့ၣ် ဒိကနၣ် စီၤၡံမိၣ် ထံထံဆးဆး ဒီးတဲဝဲလၢ “ပှၤတဂၤအံၤ အိၣ်ဒီး အစိဒိၣ်ကမီၤထီလၢ အဟဲလၢ ကစၢ်ယွၤအအိၣ်လီၤ.”
၁၁ ဒီးမ့ၢ်လၢ အဝဲမၤကဒါပှၤမဲာ် ဒီးဒုးကမၢကမၣ် အဝဲသ့ၣ် ယံာ်လံအဃိ အဝဲသ့ၣ်ဒိကနၣ်အီၤ ထံထံဆးဆးလီၤ.
၁၂ ဘၣ်ဆၣ် ဖဲစီၤဖံလံးပူး စံၣ်တဲၤတဲလီၤ ကစၢ်ယွၤအဘီမုၢ် တၢ်သးခုကစီၣ်+ ဒီးယ့ၣ်ၡူးခရံာ် အမံၤအခါ အဝဲသ့ၣ် စူၢ်က့ၤနာ်က့ၤတၢ်လီၤ. ဒီးပိာ်မုၣ်ဒီး ပိာ်ခွါတဖၣ် ဒိးဘျၢအသးလၢထံလီၤ.+
၁၃ စီၤၡံမိၣ်စ့ၢ်ကီး ကဲထီၣ်ပှၤလၢ အစူၢ်က့ၤနာ်က့ၤတၢ် တဂၤလီၤ. ဖဲအဘျၢထံ ဝံၤအလီၢ်ခံ အဝဲဆဲးပိာ် စီၤဖံလံးပူးအခံ+ ဒီးထံၣ်ဘၣ် တၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ်အဃိ အဝဲကမၢကမၣ်ဝဲလီၤ.
၁၄ ဒီးဖဲတၢ်မၢဖိလၢ ဝ့ၢ်ယရူၤၡလ့ၣ်အပူၤတဖၣ် နၢ်ဟူဘၣ်ဝဲလၢ ပှၤၡၤမရံဖိတဖၣ် တူၢ်လိာ်ဝဲ ကစၢ်ယွၤ အကလုၢ်ကထါအခါ+ အဝဲသ့ၣ်ဆှၢလီၤဝဲ စီၤပ့းတရူး ဒီးစီၤယိၤဟၣ် လၢပှၤၡၤမရံဖိတဖၣ် အအိၣ်လီၤ.
၁၅ အဃိ အဝဲသ့ၣ်လဲၤလီၤ ဒီးဃ့ထုကဖၣ်တၢ် ဒ်သိး ပှၤၡၤမရံဖိတဖၣ်အံၤ ကန့ၢ်ဘၣ် သးစီဆှံအဂီၢ်,+
၁၆ မ့ၢ်လၢ အဝဲသ့ၣ် ဒိးဘျၢထံ လၢကစၢ်ယ့ၣ်ၡူး အမံၤအပူၤ ဘၣ်ဆၣ် သးစီဆှံတဟဲလီၤလၢ အဝဲသ့ၣ်အလိၤ နီတဂၤဒံးဘၣ်အဃိလီၤ.+
၁၇ အဃိ စီၤပ့းတရူး ဒီးစီၤယိၤဟၣ် ပာ်ထီၣ်အစုလၢ အဝဲသ့ၣ်အလိၤ+ ဒီးအဝဲသ့ၣ် ဒိးန့ၢ်ဘၣ်သးစီဆှံလီၤ.
၁၈ ဒီးစီၤၡံမိၣ် ထံၣ်ဝဲလၢ သးစီဆှံန့ၣ် ဘၣ်တၢ်ဟ့ၣ်လီၤအီၤ ခီဖျိလၢ တၢ်မၢဖိတဖၣ် ပာ်ထီၣ်အစုလၢ ပှၤဂၤအလိၤအဃိ အဝဲဟဲစိာ်စ့ လၢအဝဲသ့ၣ်အအိၣ်
၁၉ ဒီးတဲဝဲလၢ “ဟ့ၣ်စ့ၢ်ကီးယၤ တၢ်စိတၢ်ကမီၤအံၤ ဒ်သိးပှၤတဂၤဂ့ၤ တဂၤဂ့ၤလၢ ယပာ်ထီၣ် ယစုလၢအလိၤန့ၣ် ကဒိးန့ၢ်ဘၣ် သးစီဆှံအဂီၢ်တက့ၢ်.”
၂၀ ဘၣ်ဆၣ် စီၤပ့းတရူး တဲဘၣ်အီၤလၢ “ခီဖျိလၢ နဆိကမိၣ်လၢ နပှ့ၤကစၢ်ယွၤ အတၢ်ဟ့ၣ်ကလီအံၤ လၢစ့န့ၢ်ဝဲအဃိ မ်နစ့န့ၣ် ဟးဂီၤဃုာ်ဒီးနၤတက့ၢ်.+
၂၁ ဒီးမ့ၢ်လၢ နသးတဘျၢလၢ ကစၢ်ယွၤ အမဲာ်ညါဘၣ်အဃိ နတဘၣ်ဃးဒီး တၢ်မၤအဝဲအံၤ နီတစဲးဘၣ်.
၂၂ ဒီးခီဖျိလၢ နမၤဘၣ် တၢ်အၢတၢ်သီ တခါအံၤအဃိ ပီၢ်ယၢ်လီၤက့ၤ နသးတက့ၢ်. ဒီးမ့ၢ်လၢ နကူၣ်ထီၣ်တၢ်အၢလၢ နသးပူၤအဃိ ဃ့ကညး ယဟိဝၤယွၤ* ဒ်သိး အဝဲကပျၢ်ကွံာ် နတၢ်ကမၣ်တက့ၢ်.
၂၃ ယထံၣ်လၢ နသးပူၤပှဲၤဒီး တၢ်စုၣ်တၢ်ပျၢ် ဒီးနမ့ၢ် တၢ်တတီတလိၤ အကုၢ်လီၤ.”
၂၄ စီၤၡံမိၣ် တဲဆၢက့ၤ အဝဲသ့ၣ်လၢ “ဃ့ကညးန့ၢ် တၢ်လၢယဂီၢ်လၢ ယဟိဝၤယွၤ အအိၣ် ဒ်သိးတၢ်လၢ သုတဲသ့ၣ်တဖၣ်အံၤ သုတဟဲဘၣ်ယၤ နီတခါတဂ့ၤ အဂီၢ်တက့ၢ်.”
၂၅ ဒီးအဝဲသ့ၣ် စံၣ်တဲၤတဲလီၤတၢ်လၢ တၢ်လီၢ်ဝးဝး ဒီးစံၣ်တဲၤတဲလီၤဝဲ ယဟိဝၤယွၤ အကလုၢ်ကထါဝံၤ အဝဲသ့ၣ် က့ၤကဒါက့ၤလၢ ဝ့ၢ်ယရူၤၡလ့ၣ် ဒီးလၢကျဲန့ၣ် အဝဲသ့ၣ် စံၣ်တဲၤတဲလီၤ တၢ်သးခုကစီၣ် လၢၡၤမရံ အသဝီအါဖျၢၣ် အပူၤလီၤ.+
၂၆ ဒီးယဟိဝၤယွၤ အမူခိၣ်ကလူးတဂၤ+ တဲဘၣ် စီၤဖံလံးပူးလၢ “လဲၤလၢ ကလံၤထံးတခီလၢ ကျဲလၢအလဲၤလီၤလၢ ယရူၤၡလ့ၣ် ဆူဝ့ၢ်ဂါစၤတက့ၢ်.” (ကျဲအံၤ မ့ၢ်ဝဲ မဲးမုၢ်ခိၣ်ကျဲလီၤ.)
၂၇ အဃိ စီၤဖံလံးပူး လဲၤဝဲ ဒီးထံၣ်လိာ်သးဒီး ပှၤအဲၤသံအီးပး အပဒိၣ်လၢ အလီၢ်အလၤ ဒိၣ်တဂၤလီၤ.* အဝဲမ့ၢ် အဲၤသံအီးပး အနီၢ်ပၤမုၣ် ကၣ်ဒါက့ၤ အပဒိၣ်တဂၤလၢ အပၢၤဝဲ နီၢ်ပၤမုၣ်အံၤ အတၢ်ထူးတၢ်တီၤ ခဲလၢာ်လီၤ. အဝဲလဲၤ ဘူၣ်ထီၣ်ဘါထီၣ်တၢ်လၢ ဝ့ၢ်ယရူၤၡလ့ၣ် အပူၤဝံၤ+
၂၈ ဖဲအဝဲက့ၤလၢ ကျဲအခါ အဆ့ၣ်နီၤဝဲလၢ အလ့ၣ်ကဟၣ်အပူၤ ဒီးဖးသီၣ်ဝဲ ဝံယၡါယၤ အလံာ်လီၤ.
၂၉ ဒီးသးစီဆှံတဲဘၣ် စီၤဖံလံးပူးလၢ “လဲၤဃီၤလၢ လ့ၣ်ကဟၣ် အကပၤတက့ၢ်.”
၃၀ အဃိ စီၤဖံလံးပူး ဃ့ၢ်ဝဲလၢ လ့ၣ်ကဟၣ်အကပၤ ဒီးနၢ်ဟူ အဝဲဖးသီၣ်ဝဲ ဝံယၡါယၤအလံာ်အဃိ စီၤဖံလံးပူး တဲအီၤလၢ “တၢ်လၢနဖးန့ၣ် မ့ၢ်နနၢ်ပၢၢ် အနီၢ်ကီၢ်ဧါ.”
၃၁ အဝဲတဲဝဲလၢ “ပှၤသိၣ်လိယၤ မ့ၢ်တအိၣ်ဘၣ်န့ၣ် ယနၢ်ပၢၢ် ကသ့ဒ်လဲၣ်.” အဃိ အဝဲမၢ စီၤဖံလံးပူး ဟဲထီၣ်ဆ့ၣ်နီၤဒီးအီၤလီၤ.
၃၂ ဒီးအဝဲဖး တၢ်ကွဲးအသး တတီၤလၢ အတဲဝဲလၢ “ဒ်သိတဒုအသိး အဝဲဘၣ်တၢ် ဆှၢထီၣ်အီၤလၢ တၢ်ကမၤသံအီၤ အဂီၢ်လီၤ. ဒီးဒ်သိဖိ အိၣ်ဘှ့ၣ်ဝဲဖဲ ပှၤတံာ်အဆူၣ် အခါအသိး အဝဲစ့ၢ်ကီး တအိးထီၣ် အထးခိၣ်ဘၣ်.+
၃၃ ဖဲအဘၣ် တၢ်ဒုၣ်ဒွဲၣ်စံးအၢအီၤအခါ ပှၤတစံၣ်ညီၣ်န့ၢ်အီၤ တီတီလိၤလိၤဘၣ်.+ ဒီးမ့ၢ်လၢ အသးသမူ ကဘၣ်တၢ် ထုးထီၣ်ကွံာ်အီၤလၢ ဟီၣ်ခိၣ်ချၢအဃိ မတဂၤကတဲတၢ် ဘၣ်ဃးဒီး အတၢ်ဟဲလီၤစၢၤလီၤသွဲၣ် အဂ့ၢ်အကျိၤလဲၣ်.”+
၃၄ ပဒိၣ်လၢ အလီၢ်အလၤဒိၣ်တဂၤအံၤ တဲစီၤဖံလံးပူးလၢ “ဝံသးစူၤ တဲဘၣ်ယၤလၢ ဝံတဂၤအံၤ တဲဝဲဘၣ်ဃးဒီး မတဂၤ အဂ့ၢ်လဲၣ်. မ့ၢ်အတဲဘၣ်ဃးဒီး အနီၢ်ကစၢ်အဂ့ၢ်ဧါ မ့တမ့ၢ် ဘၣ်ဃးဒီး ပှၤအဂၤတဂၤ အဂ့ၢ်ဧါ.”
၃၅ စီၤဖံလံးပူး စးထီၣ်တဲတၢ် ဘၣ်ဃးဒီး လံာ်စီဆှံတဆၢအံၤဒီး ဒုးသ့ၣ်ညါအီၤ တၢ်သးခုကစီၣ်လၢ အဘၣ်ဃးဒီး ယ့ၣ်ၡူးအဂ့ၢ်လီၤ.
၃၆ ဖဲအဝဲသ့ၣ် လဲၤလၢ ကျဲအခါ အဝဲသ့ၣ်ထံၣ်ဝဲ တၢ်လီၢ်လၢအအိၣ်ဒီး ထံတတီၤလီၤ. ဒီးပဒိၣ်လၢ အလီၢ်အလၤဒိၣ်တဂၤအံၤ တဲဝဲလၢ “ကွၢ်မီၤ, ထံအိၣ်ဖဲအံၤလီၤ. တၢ်လၢအတြီယၤ ဒ်သိးယသု တဒိးဘျၢထံတဂ့ၤအဂီၢ်န့ၣ် အိၣ်တမံၤမံၤဧါ.”
၃၇ *—
၃၈ ဖဲန့ၣ်န့ၣ် အဝဲမၢ ပှၤပာ်ပတုာ် လ့ၣ်ကဟၣ် ဒီးအဝဲဒီး စီၤဖံလံးပူးလဲၤလီၤလၢ ထံကျါလီၤ. ဒီးစီၤဖံလံးပူး ဒိးဘျၢအီၤထံလီၤ.
၃၉ ဖဲအဝဲသ့ၣ် ဟဲထီၣ်လၢ ထံကျါအခါ ယဟိဝၤယွၤ အသးစီဆှံ ဆှၢဝဲစီၤဖံလံးပူးလၢ တၢ်လီၢ်အဂၤလၢ အဆိအချ့ ဒီးပဒိၣ်လၢ အလီၢ်အလၤဒိၣ်တဂၤအံၤ တထံၣ်အီၤလၢၤဘၣ်, ဘၣ်ဆၣ် အဝဲက့ၤဝဲလၢ တၢ်သးခုအပူၤလီၤ.
၄၀ စီၤဖံလံးပူး လဲၤဝဲလၢ ဝ့ၢ်အၤစဒိာ် ဒီးအဝဲလဲၤဝဲ သကုၤလၢ ဟီၣ်ကဝီၤအဝဲန့ၣ် ဒီးဆဲးစံၣ်တဲၤတဲလီၤ တၢ်သးခုကစီၣ်လၢ ဝ့ၢ်ခဲလၢာ် တုၤအလဲၤတုၤလၢ ဝ့ၢ်ကဲၤစါရံၤ တစုလီၤ.+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “ပှၤဒ့ဒံၣ်ဖိ.”
^ ကွၢ် တၢ်ဂ့ၢ်ဘၣ်ထွဲလိာ်သး က၃.
