ယဃ့းစက့လး ၂၄:၁-၂၇
၂၄ ဖဲခွံနံၣ်တနံၣ်, လါတဆံလါတလါ, လါထီၣ်အသီတဆံန့ၣ် ယဟိဝၤယွၤ တဲယၤလၢ
၂ “ပှၤကညီဖိခွါဧၢ, ကွဲးနီၣ်ဃာ် မုၢ်နံၤမုၢ်သီ တနံၤအံၤနီၤ. တနံၤအံၤန့ၣ် မ့ၢ်ဝဲ မုၢ်နံၤလၢ ဘၤဘူၤလိၣ်အစီၤပၤ ဟဲဒုးဝဲ ဝ့ၢ်ယရူၤၡလ့ၣ်လီၤ.+
၃ တဲတၢ်ကတိၤဒိလၢ ဘၣ်ဃးဒီး ပှၤလၢအထီဒါတၢ်နီၤ. ဘၣ်ဃးဒီး အဝဲသ့ၣ်န့ၣ် တဲလၢ
“‘တၢ်ပၢကစၢ် ယဟိဝၤယွၤ တဲဝဲလၢ
“ဒိထီၣ်သပၢၤ ဖီအီၣ်တၢ်လၢ မ့ၣ်အူဖီခိၣ် ဒီးထၢနုာ်ထံလၢအပူၤတက့ၢ်.+
၄ ပၢနုာ်တၢ်ညၣ်အလိၣ်လၢအဂ့ၤ,+
အခီၣ်ကံၣ်ဒုၣ်, အဖံဘၣ်ခိၣ် ဒီးမၤပှဲၤသပၢၤဒီး တၢ်အဃံလၢ အဂ့ၤကတၢၢ်တဖၣ် လၢသပၢၤပူၤတက့ၢ်.
၅ ဟံးန့ၢ်သိလၢ အဂ့ၤကတၢၢ်တဒု+ ဒီးပာ်ပူၣ်ထီၣ်သ့ၣ်မုၣ် လၢသပၢၤ ဖီလာ်ဝးဝး,
ချီထီၣ်တၢ်ညၣ် ဒီးတၢ်ဃံ လၢသပၢၤပူၤတက့ၢ်.”’
၆ “တၢ်ပၢကစၢ် ယဟိဝၤယွၤ တဲဝဲလၢ‘ဝ့ၢ်လၢအပှဲၤဒီး တၢ်မၤသံမၤဝီန့ၣ် ကဘၣ်ကီဘၣ်ခဲ သပှၢ်ကတၢၢ်လီၤ.+ ဝ့ၢ်အံၤန့ၣ် လီၤဂာ်ဒီး ပှၤဖီအီၣ်တၢ် အသပၢၤလၢ အထီၣ်အ့ၣ် လၢပှၤထူးစီအီၤ တန့ၢ်ဘၣ်န့ၣ်လီၤ.
ထုးထီၣ်တၢ်ညၣ် တလိၣ်ဝံၤတလိၣ်ဟီ,+ တဘၣ်ဃုထၢ* လၢနကထုးထီၣ် ဖဲလဲၣ်တလိၣ်လဲၣ်န့ၣ်တဂ့ၤ.
၇ လၢဝ့ၢ်ပူၤန့ၣ် ပှၤအါဂၤ ဘၣ်တၢ်မၤသံအီၤလီၤ.+ ပှၤလၢအဘၣ်တၢ်မၤသံအီၤတဖၣ် အသွံၣ်န့ၣ် ဘၣ်တၢ်လူလီၤအီၤလၢ လၢၢ်ဘ့ၣ်ဘၣ် အဖီခိၣ်လီၤ.
တၢ်သွံၣ်တဖၣ်န့ၣ် ပှၤတလူလီၤအီၤ လၢဟီၣ်ခိၣ်လိၤ ဒ်သိး ကမၤဘၢအီၤ လၢဟီၣ်ခိၣ်ကမူၣ်အဂီၢ်ဘၣ်.+
၈ ဒီးယကပာ်တ့ၢ် တၢ်သွံၣ်တဖၣ်န့ၣ်လၢ လၢၢ်ဘ့ၣ်ဘၣ်အဖီခိၣ်ဒ်သိးတၢ်သွံၣ်သုတဘၣ် တၢ်မၤဘၢအီၤတဂ့ၤ အဂီၢ်လီၤ.+
ယမၤဒ်န့ၣ် ဒ်သိး ယသးကဒိၣ်ထီၣ်တၢ် တုၤလၢ ယကစံၣ်ညီၣ်အီၤ အဂီၢ်လီၤ.
၉ “တၢ်ပၢကစၢ် ယဟိဝၤယွၤ တဲဝဲလၢ‘ဝ့ၢ်လၢအပှဲၤဒီး တၢ်မၤသံမၤဝီန့ၣ် ကဘၣ်ကီဘၣ်ခဲ သပှၢ်ကတၢၢ်လီၤ.+
ယကပာ်ပူၣ်ထီၣ် သ့ၣ်မုၣ်အပူၣ် ဖးဒိၣ်လီၤ.
၁၀ ပာ်ပူၣ်ထီၣ်သ့ၣ်မုၣ်တဖၣ်ဒီးချီထီၣ် တၢ်ညၣ်တဖၣ် တုၤလၢအမံ, လူလီၤကွံာ်အထံ ဒီးပာ်တ့ၢ်အဃံတဖၣ် တုၤလၢအကိၢ်ဃိာ် န့ၣ်တက့ၢ်.
၁၁ ပာ်ထီၣ်သပၢၤတိၢ်ဘီ ကလီတဖျၢၣ်အံၤ လၢမ့ၣ်အူအ့ၣ်အဖီခိၣ်တုၤလၢ အကိၢ်ဝဲ ဒီးထီၣ်ဂီၤဝဲ န့ၣ်တက့ၢ်.
ဒီးတၢ်ဃံၣ်တၢ်မူးလၢ အပူၤန့ၣ် ကလီၤပှံၢ်ဝဲ+ ဒီးတၢ်ထီၣ်အ့ၣ်လၢ အပူၤန့ၣ် ကအူအီၣ်ကွံာ်ဝဲလီၤ.
၁၂ မ့ၢ်လၢ သပၢၤအံၤ ထီၣ်အ့ၣ်ဝဲဒိၣ်မး ဒီးအတလီၤတကျိာ်ဘၣ်အဃိ+လီၤသးအ့န့ ဒီးလီၤသးဘၣ်တံာ်တာ် သပှၢ်ကတၢၢ်လီၤ.
အဃိ ကွံာ်လီၤသပၢၤထီၣ်အ့ၣ် တဖျၢၣ်အံၤလၢ မ့ၣ်အူပူၤသၢၤ.’
၁၃ “‘မ့ၢ်လၢန* အိၣ်ဒီး လုၢ်လၢ်သကဲာ်ပဝး လၢအလီၤမဲာ်ဆှး အဃိ နတကဆှီဘၣ်.+ ယဂုာ်ကျဲးစၢး မၤကဆှီထီၣ်နၤ ဘၣ်ဆၣ် နတကဆှီထီၣ်ဘၣ်. ယပျၢ်လီၤ ယတၢ်သးထီၣ်လၢနလိၤ မ့ၢ်တဝံၤဘၣ်န့ၣ် နတကဆှီထီၣ်ဘၣ်.+
၁၄ ယၤ, ယဟိဝၤယွၤ တဲတၢ်ဝံၤလံ ဒီးတၢ်ကဟဲကဲထီၣ်အသး ဒ်န့ၣ် သပှၢ်ကတၢၢ်လီၤ. ယကမၤသပှၢ်တၢၢ် ဒီးယတဆီတလဲ ယတၢ်ဆၢတဲာ်ဘၣ် ဒီးယတသးကညီၤနၤဘၣ်.+ အဝဲသ့ၣ် ကစံၣ်ညီၣ်နၤ ဒ်နသကဲာ်ပဝး ဒီးဒ်တၢ်လၢ နမၤအသိးလီၤ.’ တၢ်ပၢကစၢ် ယဟိဝၤယွၤ တဲဝဲဒ်န့ၣ်လီၤ.”
၁၅ ကစၢ်ယဟိဝၤယွၤ ဆဲးတဲယၤလၢ
၁၆ “ပှၤကညီဖိခွါဧၢ, ယကမၤလီၤမၢ်ကွံာ် ပှၤလၢနအဲၣ်အီၤတဂၤ ခီဖျိတၢ်တီၢ် ထဲတထံၣ်လီၤ.+ နတဘၣ်သူၣ်အုးသးအုးဘၣ် ဒီးနတဘၣ်ဟီၣ် ဒီးဒုးလီၤနမဲာ်ထံဘၣ်.
၁၇ ကအုကစွါကစုဒု ဒီးတဘၣ်မၤ လုၢ်လၢ်လၢ ဘၣ်ဃးဒီး တၢ်သူၣ်အုးသးအုးလၢ ပှၤသံအဃိတဂ့ၤ.+ ဖၢၣ်ထီၣ်နခိၣ်ဖၢၣ်+ ဒီးဒိးထီၣ်ခီၣ်ဖံးတက့ၢ်.+ တဘၣ်ကးဘၢ နနိးဆူၣ်တဂ့ၤ.+ ဒီးတဘၣ်အီၣ် ကိၣ်လၢ ပှၤဟဲဆှၢဒုးအီၣ်နၤတဂ့ၤ.”+
၁၈ ဒီးယတဲတၢ်ဒီး ပှၤဂီၢ်မုၢ်လၢ ဂီၤခီ ဒီးယမါသံလၢ ဟါလီၤခီလီၤ. အဃိ လၢခံတဂီၤန့ၣ်ယမၤဒ် တၢ်မၤလိာ်ယၤ အသိးလီၤ.
၁၉ ပှၤဂီၢ်မုၢ်တဖၣ် တဲယၤလၢ “တၢ်လၢနမၤအီၤတဖၣ်အံၤန့ၣ် အဘၣ်ထွဲဒီးပှၤဒ်လဲၣ်န့ၣ် နတတဲဘၣ်ပှၤဧီၤ.”
၂၀ အဃိ ယတဲဆၢ အဝဲသ့ၣ်လၢ “ယဟိဝၤယွၤ တဲယၤလၢ
၂၁ ‘တဲဘၣ် ပှၤအံၣ်စရ့လးဖိတဖၣ်လၢ “တၢ်ပၢကစၢ် ယဟိဝၤယွၤ တဲဝဲလၢ ‘ယတၢ်စီဆှံအလီၢ် လၢသုပာ်ကဖၢလၢသုသးလၢအဃိ ဒီးသုပာ်လုၢ်ပာ်ပှ့ၤအီၤ ဒီးသးစဲဘူးဒီးအီၤန့ၣ် ယကမၤဘၣ်အၢအီၤ+ ဘူးထီၣ်လံ. သုဖိမုၣ်ဖိခွါ လၢသုပာ်တ့ၢ်အီၤ လၢဝ့ၢ်ပူၤန့ၣ် ကဘၣ်သံလၢ နးအဃိလီၤ.+
၂၂ ဖဲန့ၣ်အခါ သုကမၤဘၣ်ဒ် ယမၤအသိးလီၤ. သုတကးဘၢ သုနိးဆူၣ်ဘၣ် ဒီးသုတအီၣ် တၢ်အီၣ်လၢ ပှၤဟဲစိာ်ဒုးအီၣ်သုဘၣ်.+
၂၃ သုကဖၢၣ်ဃာ်ခိၣ်ဖၢၣ် ဒီးသုကဒိးဃာ် ခီၣ်ဖံးလီၤ. သုတသးအုး ဒီးသုတဟီၣ်ဘၣ်. လၢတၢ်န့ၣ်အလီၢ် သုကတူၢ်ဘၣ်တၢ် လၢသုတၢ်ကမၣ်အဃိ+ ဒီးသုကကွၢ်လိာ်သး တဂၤဒီးတဂၤ ဒီးသုကကအုကစွါလီၤ.
၂၄ စီၤယဃ့းစက့လး မ့ၢ်ဝဲ တၢ်ပနီၣ်လၢ သုဂီၢ်လီၤ.+ သုကမၤဒ် အဝဲမၤဝဲအသိးလီၤ. ဖဲတၢ်မၤအသးဒ်န့ၣ်အခါ သုကသ့ၣ်ညါဘၣ်လၢ ယမ့ၢ် တၢ်ပၢကစၢ် ယဟိဝၤယွၤလီၤ.’”’”
၂၅ “ပှၤကညီဖိခွါဧၢ, အဝဲသ့ၣ် အတၢ်သူၣ်ထီၣ်လၢ အဝဲသ့ၣ် ပာ်ဂံၢ်ပာ်ဘါဝဲန့ၣ် မ့ၢ်တၢ်လၢ အဃံအလၤလၢ အမၤသးခု အဝဲသ့ၣ်အသး ဒီးအဝဲသ့ၣ် ပာ်လုၢ်ပာ်ပှ့ၤဝဲလီၤ. ဘၣ်ဆၣ် ယကဟံးထီၣ်ကွံာ် တၢ်လီၢ်အံၤလၢ အအိၣ်စဲဘူးလၢ အဝဲသ့ၣ် အသးပူၤဃုာ်ဒီး အဝဲသ့ၣ် အဖိမုၣ်ဖိခွါတဖၣ်လီၤ.+ ဖဲန့ၣ်အခါ
၂၆ ပှၤလၢ အဃ့ၢ်ပူၤဖျဲးအသးတဂၤန့ၣ် ကဟဲတဲကျၢနၤ တၢ်ကစီၣ်လီၤ.+
၂၇ ဖဲတၢ်တနံၤန့ၣ် နတအိၣ်ဘှ့ၣ်လၢၤဘၣ် ဒီးနကအိးထီၣ် နထးခိၣ် ဒီးနကတဲတၢ်ဒီး ပှၤလၢ အဃ့ၢ်ပူၤဖျဲးအသးတဂၤန့ၣ်လီၤ.+ နကကဲထီၣ် တၢ်ပနီၣ်လၢ အဝဲသ့ၣ်အဂီၢ် ဒီးအဝဲသ့ၣ် ကသ့ၣ်ညါဘၣ်ဝဲလၢယမ့ၢ် ယဟိဝၤယွၤလီၤ.”
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တဘၣ်ကွံာ်လီၤတၢ်ဖးလၢ တၢ်သ့ၣ်တဖၣ်န့ၣ်အဂီၢ်တဂ့ၤ.”
^ မ့ၢ်ဝဲ ဝ့ၢ်လၢအပှဲၤဒီး တၢ်မၤသံမၤဝီ လၢအမ့ၢ် ဝ့ၢ်ယရူၤၡလ့ၣ်.
