ယိၤဟၣ် ၄:၁-၅၄
၄ ဖဲယ့ၣ်ၡူး* သ့ၣ်ညါဝဲလၢ ပှၤဖၤရံၤၡဲတဖၣ် နၢ်ဟူဘၣ်ဝဲလၢ အဝဲဒုးကဲထီၣ်ပှၤလၢ အပျဲၢ်အဘီၣ် ဒီးအဒိးဘျၢတၢ်+ အါန့ၢ်ဒံး စီၤယိၤဟၣ်အခါ
၂ (ယ့ၣ်ၡူးအနီၢ်ကစၢ် တဒိးဘျၢတၢ်ဘၣ်, ဘၣ်ဆၣ် အပျဲၢ်အဘီၣ်တဖၣ် ဒိးဘျၢတၢ်)
၃ အဝဲဟးထီၣ်လၢ ယူဒၤအဟီၣ်ကဝီၤ ဒီးလဲၤကဒီးဝဲလၢ ကၤလံၤလါ လၢအသီတဘျီလီၤ.
၄ ဘၣ်ဆၣ် အဝဲဘၣ်လဲၤခီဂာ်ဝဲ ၡၤမရံလီၤ.
၅ ဒီးအဝဲလဲၤတုၤလၢ ၡၤမရံအဝ့ၢ်တဖျၢၣ် လၢပှၤကိးအီၤလၢ စံဃၢ်လၢအဘူးဒီး ဟီၣ်ခိၣ်တကဝီၤ လၢစီၤယၤကိာ် ဟ့ၣ်လီၤဝဲအဖိခွါ စီၤယိၤသးန့ၣ်လီၤ.+
၆ ဒီးစီၤယၤကိာ် အထံကမျၢ* န့ၣ်အိၣ်ဝဲဖဲန့ၣ်လီၤ.+ မ့ၢ်လၢ ယ့ၣ်ၡူးလီၤဘှံးဝဲလၢ အတၢ်လဲၤတၢ်က့ၤအဃိ အဝဲဆ့ၣ်နီၤဝဲလၢ ထံကမျၢအကပၤလီၤ. ဖဲန့ၣ်ဘၣ်လၢ မုၢ်ဆါခီ ၁၂ နၣ်ရံၣ်ဃၣ်ဃၣ်လီၤ.*
၇ ဒီးပှၤၡၤမရံမုၣ်တဂၤ ဟဲဒၢၣ်ထံလီၤ. ယ့ၣ်ၡူး တဲအီၤလၢ “ဟ့ၣ်အီယၤထံမီၤ.”
၈ (အပျဲၢ်အဘီၣ်တဖၣ် လဲၤပှ့ၤတၢ်အီၣ်လၢ ဝ့ၢ်ပူၤလီၤ.)
၉ အဃိ ပှၤၡၤမရံမုၣ်န့ၣ် တဲအီၤလၢ “နမ့ၢ် ပှၤယူဒၤဖိတဂၤဒီး ယမ့ၢ် ပှၤၡၤမရံမုၣ်တဂၤအဃိ နဃ့အီထံ လၢယအိၣ် ဘၣ်လဲၣ်.” (ပှၤယူဒၤဖိတဖၣ်န့ၣ် တရ့လိာ်သးဒီး ပှၤၡၤမရံဖိတဖၣ်ဘၣ်.)+
၁၀ ယ့ၣ်ၡူး တဲဆၢက့ၤအီၤလၢ “နမ့ၢ်သ့ၣ်ညါ ယွၤအတၢ်ဟ့ၣ်လၢ အဟ့ၣ်ကလီဝဲ+ ဒီးနမ့ၢ်သ့ၣ်ညါ ပှၤတဂၤလၢ အတဲနၤလၢ ‘ဟ့ၣ်အီယၤထံ’ န့ၣ် နကဃ့အီအီၤထံဒီး အဝဲကဟ့ၣ်အီနၤ ထံမူလီၤ.”+
၁၁ ဒီးပိာ်မုၣ်န့ၣ် တဲဘၣ်အီၤလၢ “ကစၢ်ဧၢ, နထံစဲၤလၢ နကဒၢၣ်ထံအဂီၢ်မး တအိၣ်ဘၣ်. ဒီးထံကမျၢစ့ၢ်ကီး ယိာ်ဒိၣ်မး အဃိ နကလဲၤန့ၢ် ထံမူတခါအံၤဖဲလဲၣ်.
၁၂ ပဖုဖးဒိၣ် စီၤယၤကိာ် ဟ့ၣ်ပှၤလၢ ထံကမျၢအံၤလီၤ. အဝဲ ဒီးအဖိအလံၤ ဒီးအဆၣ်ဖိကီၢ်ဖိတဖၣ် အီထံလၢ ထံကမျၢအံၤလီၤ. မ့ၢ်နဒိၣ်န့ၢ်ဒံးအီၤဧါ.”
၁၃ ယ့ၣ်ၡူး တဲဆၢက့ၤအီၤလၢ “ပှၤကိးဂၤဒဲးလၢ အအီထံ အဝဲအံၤန့ၣ် ကအဲၣ်ဒိး အီကဒီးထံဒံးလီၤ.
၁၄ မ့မ့ၢ် ပှၤလၢအအီထံလၢ ယကဟ့ၣ်လီၤအီၤန့ၣ် တအဲၣ်ဒိး အီကဒီးထံ နီတဘျီလၢၤဘၣ်.+ ဒီးထံလၢ ယဟ့ၣ်အီၤန့ၣ် ကလီၤဂာ်ဒ်သိးဒီး ထံထီၣ်ပၢၢ်လၢ အိၣ်လၢအပူၤလၢ အကဟ့ၣ်အီၤ တၢ်မူအထူအယိာ်လီၤ.”+
၁၅ ပိာ်မုၣ်အံၤ တဲအီၤလၢ “ကစၢ်ဧၢ, ဒ်သိး ယသုတအဲၣ်ဒိး အီထံလၢၤတဂ့ၤ ဒီးဒ်သိး ယသုတဘၣ် ဟဲက့ၤဒၢၣ်ထံလၢ တၢ်လီၢ်ဖဲအံၤ လၢၤတဂ့ၤအဂီၢ် ဟ့ၣ်ယၤလၢ ထံအဝဲန့ၣ်မီၤ.”
၁၆ ယ့ၣ်ၡူး တဲဘၣ်အီၤလၢ “က့ၤကိးန့ၢ်နဝၤဒီး ဟဲကိးအီၤဖဲအံၤ.”
၁၇ ဒီးပိာ်မုၣ်တဂၤန့ၣ် တဲဆၢဝဲလၢ “ယဝၤတအိၣ်ဘၣ်.” ယ့ၣ်ၡူး တဲအီၤလၢ နတဲလၢ နဝၤတအိၣ်ဘၣ်န့ၣ် ဘၣ်လီၤမၢၤ.
၁၈ နဝၤအိၣ်ဝဲ ယဲၢ်ဆီလံ ဒီးပိာ်ခွါလၢ နအိၣ်ဒီးအီၤခဲအံၤန့ၣ် တမ့ၢ်နဝၤဘၣ်. အဃိ နတဲတၢ်န့ၣ် ဘၣ်တီတီလီၤ.
၁၉ ပိာ်မုၣ်တဂၤန့ၣ် တဲအီၤလၢ “ကစၢ်ဧၢ, နၤန့ၣ် နကဘၣ်မ့ၢ် ဝံတဂၤလီၤ.+
၂၀ ပမိၢ်ပၢ်ဖံဖု လၢပျၢၤတဖၣ် ဘူၣ်ထီၣ်ဘါထီၣ်တၢ်လၢ ကစၢၢ်တဖျၢၣ်အံၤ အလိၤလီၤ. ဘၣ်ဆၣ် သုတဲလၢ တၢ်လီၢ်လၢ ပှၤကဘၣ် ဘူၣ်ထီၣ်ဘါထီၣ်တၢ်န့ၣ် မ့ၢ်ဝဲ ဝ့ၢ်ယရူၤၡလ့ၣ်လီၤ.”+
၂၁ ယ့ၣ်ၡူး တဲအီၤလၢ “ပိာ်မုၣ်ဧၢ, နာ်ယၤတက့ၢ်. တၢ်ဆၢကတီၢ် ကဘၣ်ဝဲလၢ သုတဘူၣ်ထီၣ်ဘါထီၣ် ကစၢ်ယွၤ ဖဲကစၢၢ်ခိၣ်အံၤ မ့တမ့ၢ် လၢဝ့ၢ်ယရူၤၡလ့ၣ် အပူၤလၢၤဘၣ်.
၂၂ သုဘူၣ်ထီၣ်ဘါထီၣ်တၢ်လၢ သုတသ့ၣ်ညါဘၣ်,+ မ့မ့ၢ်ပှၤန့ၣ် ပဘူၣ်ထီၣ်ဘါထီၣ်တၢ်လၢ ပသ့ၣ်ညါ, မ့ၢ်လၢ တၢ်အုၣ်က့ၤခီၣ်က့ၤ စးထီၣ်အသးလၢ ပှၤယူဒၤဖိတဖၣ်အအိၣ် အဃိလီၤ.+
၂၃ ဘၣ်ဆၣ် တၢ်ဆၢကတီၢ် ကဘၣ်ဝဲ ဒီးဘၣ်ဝဲခဲအံၤ ဖဲပှၤလၢ အဘူၣ်ထီၣ်ဘါထီၣ်တၢ် နီၢ်နီၢ်တဖၣ် ကဘူၣ်ထီၣ်ဘါထီၣ် ကစၢ်ယွၤ ဒ်သးစီဆှံ အတၢ်ဟံးစုနဲၣ်ကျဲအသိး ဒီးလၢတၢ်မ့ၢ်တၢ်တီ အပူၤလီၤ. ကစၢ်ယွၤဃုဝဲ ပှၤဒ်အံၤတဖၣ်လၢ ကဘူၣ်ထီၣ်ဘါထီၣ်အီၤ အဂီၢ်လီၤ.+
၂၄ ကစၢ်ယွၤ မ့ၢ်ပှၤနီၢ်သး+ ဒီးပှၤလၢ အဘူၣ်ထီၣ်ဘါထီၣ်အီၤတဖၣ်န့ၣ် ကဘၣ်ဘူၣ်ထီၣ်ဘါထီၣ်အီၤ ဒ်သးစီဆှံ အတၢ်ဟံးစုနဲၣ်ကျဲအသိး ဒီးလၢ တၢ်မ့ၢ်တၢ်တီအပူၤလီၤ.”+
၂၅ ပိာ်မုၣ်အံၤ တဲအီၤလၢ “ယသ့ၣ်ညါလၢ မ့းၡံအၤလၢ တၢ်ကိးအီၤလၢ ခရံာ်န့ၣ် ကဟဲဝဲလီၤ. ဖဲပှၤတဂၤန့ၣ် ဟဲဝဲအခါ အဝဲ ကတဲဖျါထီၣ်န့ၢ်ပှၤ တၢ်ခဲလၢာ်ပျီပျီလီၤ.”
၂၆ ယ့ၣ်ၡူး တဲအီၤလၢ “ပှၤလၢ အတဲတၢ်ဒီးနၤ, ယၤအံၤ မ့ၢ်ပှၤတဂၤန့ၣ်လီၤ.”+
၂၇ ဖဲန့ၣ်အခါ အပျဲၢ်အဘီၣ်တဖၣ် ဟဲက့ၤတုၤဒီး ကမၢကမၣ်ဝဲ မ့ၢ်လၢ ယ့ၣ်ၡူးတဲတၢ်ဒီး ပိာ်မုၣ်တဂၤ အဃိလီၤ. ဘၣ်ဆၣ် အဝဲသ့ၣ်တဂၤမး တသံကွၢ်အီၤလၢ “နလိၣ်ဘၣ်မနုၤလဲၣ်” ဒီး “ဘၣ်မနုၤအဃိ နတဲတၢ်ဒီး တၢ်ပိာ်မုၣ်တဂၤန့ၣ်လဲၣ်” န့ၣ်ဘၣ်.
၂၈ အဃိ ပိာ်မုၣ်တဂၤန့ၣ် ပာ်တ့ၢ်အထံဒၢ ဒီးက့ၤဝဲလၢဝ့ၢ်ပူၤ ဒီးတဲဘၣ် ပှၤဂၤလၢ
၂၉ “ဟဲကွၢ် ပှၤတဂၤလၢ အတဲယၤ တၢ်ခဲလၢာ်လၢ ယမၤတ့ၢ်တဖၣ်ဟီ. ဘၣ်သ့ၣ်သ့ၣ် အကမ့ၢ် ခရံာ်ဧါသၢၤ.”
၃၀ အဝဲသ့ၣ် ဟးထီၣ်လၢဝ့ၢ်ပူၤ ဒီးလဲၤဝဲလၢ ယ့ၣ်ၡူးအအိၣ်လီၤ.
၃၁ ဖဲန့ၣ်အခါ အပျဲၢ်အဘီၣ်တဖၣ် မၢအီၤလၢ “သရၣ်ဧၢ,+ အီၣ်တၢ်သၢၤ.”
၃၂ ဘၣ်ဆၣ် ယ့ၣ်ၡူးတဲဘၣ် အဝဲသ့ၣ်လၢ “ယအိၣ်ဒီးတၢ်အီၣ်လၢ သုတသ့ၣ်ညါဘၣ်.”
၃၃ အဃိ အပျဲၢ်အဘီၣ်တဖၣ် တဲလိာ်အသး တဂၤဒီးတဂၤလၢ “မ့ၢ်ပှၤဟဲစိာ်န့ၢ်အီၤ တၢ်အီၣ် တဂၤဂၤလံဟီဧါ.”
၃၄ ယ့ၣ်ၡူး တဲအဝဲသ့ၣ်လၢ “ယတၢ်အီၣ်န့ၣ် မ့ၢ်ဝဲလၢ ယကမၤပှၤလၢ အဆှၢလီၤယၤတဂၤန့ၣ် အတၢ်ဘၣ်သးဒီး+ မၤဝံၤက့ၤ အတၢ်မၤလီၤ.+
၃၅ သုတဲလၢ တၢ်ကူးတၢ်အဆၢကတီၢ် ကဘၣ်အဂီၢ် လိၣ်လွံၢ်လါဒံးမ့ၢ်ဧါ. လၢအံၤ ယကတဲဘၣ်သု, ကျ့ၣ်ထီၣ်သုမဲာ် ဒီးကွၢ်စံာ်ပျီတဖၣ်န့ၣ်မီၤ, အဘီထီၣ်* လၢပှၤကကူးအီၤ အဂီၢ်လံ.+
၃၆ ပှၤကူးတၢ်ဖိန့ၣ် ဒိးန့ၢ်ဘၣ်ဝဲ အဘူးအလဲ ဒီးထၢဖှိၣ်ဝဲ တၤသူတၤသၣ်လၢ အမ့ၢ်ပှၤလၢ အကဒိးန့ၢ်ဘၣ် တၢ်မူအထူအယိာ် အဂီၢ်လီၤ. အဃိ ပှၤဖှံတၢ်ဖိဒီး ပှၤကူးတၢ်ဖိ သးခုသကိး ဒ်သိးသိးလီၤ.+
၃၇ အဃိ တၢ်ကတိၤ အိၣ်ဝဲတထံၣ်လၢ ပှၤဖှံတၢ်အိၣ်တဂၤ ဒီးပှၤကူးတၢ် အိၣ်ဝဲတဂၤန့ၣ် မ့ၢ်တၢ်လၢ အမ့ၢ်အတီလီၤ.
၃၈ ယဆှၢလီၤသုဒ်သိး သုကကူးတၢ်လၢ သုတဖှံဘၣ်တဖၣ်လီၤ. ပှၤဂၤမၤတ့ၢ်တၢ်ဒီး သုနုာ်လီၤဒိးန့ၢ်ဘၣ် အဘျုးလၢ အဝဲသ့ၣ် အတၢ်မၤအဃိလီၤ.”
၃၉ ပှၤၡၤမရံဖိအါဂၤလၢ အအိၣ်လၢ ဝ့ၢ်တဖျၢၣ်န့ၣ်အပူၤန့ၣ် စူၢ်က့ၤနာ်က့ၤ ယ့ၣ်ၡူး ခီဖျိလၢ ပိာ်မုၣ်တဂၤန့ၣ် အုၣ်အသး ဒီးတဲဝဲလၢ “အဝဲတဲဘၣ်ယၤ တၢ်ခဲလၢာ်လၢ ယမၤတ့ၢ်တဖၣ်”+ အဃိလီၤ.
၄၀ အဃိ ဖဲပှၤၡၤမရံဖိတဖၣ် ဟဲလၢ ယ့ၣ်ၡူးအအိၣ်အခါ အဝဲသ့ၣ် ဃ့ကညးအီၤလၢ ကအိၣ်ဒီးအဝဲသ့ၣ်လီၤ. ဒီးအဝဲအိၣ်ဝဲဖဲန့ၣ် ခံသီလီၤ.
၄၁ မ့ၢ်လၢ ပှၤနၢ်ဟူဘၣ်တၢ်လၢ ယ့ၣ်ၡူး တဲဝဲတဖၣ်အဃိ ပှၤစူၢ်က့ၤနာ်က့ၤတၢ် အါထီၣ်ဝဲအါဂၤလီၤ.
၄၂ ဒီးအဝဲသ့ၣ်တဲဘၣ် ပိာ်မုၣ်တဂၤန့ၣ်လၢ “ပနာ်တၢ်န့ၣ် တမ့ၢ်ထဲလၢ ပနၢ်ဟူတၢ်လၢ နတဲအဃိလၢၤဘၣ်, မ့ၢ်လၢ ပနၢ်ဟူဘၣ်လၢ ပနီၢ်ကစၢ် ဒီးပသ့ၣ်ညါလၢ ပှၤတဂၤအံၤ မ့ၢ်ဝဲပှၤလၢ အအုၣ်က့ၤခီၣ်က့ၤ ဟီၣ်ခိၣ်နီၢ်ကီၢ် အဃိလီၤ.”+
၄၃ တၢ်ခံသီအံၤဝံၤအလီၢ်ခံ ယ့ၣ်ၡူး ဟးထီၣ်ဝဲဖဲန့ၣ် ဒီးလဲၤဝဲလၢ ကၤလံၤလါလီၤ.
၄၄ ဘၣ်ဆၣ် ယ့ၣ်ၡူးအနီၢ်ကစၢ် အုၣ်အသးလၢ ဝံန့ၣ်ပှၤတပာ်ဒိၣ်အီၤလၢ အနီၢ်ကစၢ် အဟီၣ်ကဝီၤအပူၤဘၣ်.+
၄၅ ဖဲယ့ၣ်ၡူး လဲၤတုၤလၢ ကၤလံၤလါအခါ ပှၤကၤလံၤလါဖိတဖၣ် တူၢ်လိာ်မုာ်အီၤ, မ့ၢ်လၢ အဝဲသ့ၣ် လဲၤဘၣ်စ့ၢ်ကီးလၢ ဘူၣ်လၢ ဝ့ၢ်ယရူၤၡလ့ၣ်အပူၤ+ ဒီးထံၣ်ဘၣ်ဝဲ တၢ်ခဲလၢာ်လၢ အမၤဝဲလၢ ဘူၣ်ပူၤအဃိလီၤ.+
၄၆ ဒီးယ့ၣ်ၡူး လဲၤကဒီးလၢ ကၤနါ လၢကၤလံၤလါအပူၤ ဖဲတၢ်လီၢ်လၢ အဝဲမၤကဲထီၣ် ထံလၢစပံးထံန့ၣ်လီၤ.+ ဒီးစီၤပၤအခ့အပှၤတဂၤ အဖိခွါလၢအအိၣ်လၢ ဝ့ၢ်ကပ့းရနီၣ်န့ၣ် အိၣ်တဆူၣ်ဘၣ်.
၄၇ ဖဲပှၤတဂၤအံၤ နၢ်ဟူဝဲလၢ ယ့ၣ်ၡူး ဟးထီၣ်လၢ ယူဒၤအဟီၣ်ကဝီၤဒီး ဟဲတုၤလၢ ကၤလံၤလါအခါ မ့ၢ်လၢအဖိခွါ ဘူးကသံလံ အဃိ အဝဲလဲၤလၢ ယ့ၣ်ၡူးအအိၣ် ဒီးဃ့အီၤလၢ အကလဲၤ မၤဘျါအဖိခွါလီၤ.
၄၈ ဘၣ်ဆၣ် ယ့ၣ်ၡူး တဲအီၤလၢ “သုမ့ၢ်တထံၣ် တၢ်ပနီၣ်တဖၣ်ဒီး တၢ်လီၤလးတဖၣ်ဘၣ်န့ၣ် သုတနာ်တၢ် နီတဘျီဘၣ်.”+
၄၉ စီၤပၤအခ့အပှၤတဂၤအံၤ တဲဘၣ်အီၤလၢ “ကစၢ်ဧၢ, တချုးလၢ ယဖိခွါသံဒံးဘၣ်န့ၣ် ဟဲမီၤ.”
၅၀ ယ့ၣ်ၡူး တဲအီၤလၢ “က့ၤဟီ, နဖိခွါန့ၣ်ဘျါက့ၤလံ.”+ ဒီးအဝဲနာ်ယ့ၣ်ၡူး အတၢ်ကတိၤလၢ အတဲဘၣ်အီၤ ဒီးက့ၤဝဲလီၤ.
၅၁ ဒီးဖဲအဝဲ က့ၤလၢကျဲအခါ အကုၢ်အပှၤတဖၣ် ဟဲထံၣ်လိာ်သးဒီးအီၤ ဒီးတဲဘၣ်အီၤလၢ အဖိခွါ ဘျါက့ၤလံ.
၅၂ အဃိ အဝဲသံကွၢ် အဝဲသ့ၣ်လၢ အဝဲဘျါက့ၤလၢ ပှဲၤနၣ်ရံၣ်လဲၣ်. အဝဲသ့ၣ် တဲဆၢအီၤလၢ “အတၢ်ကိၢ်ခုၣ်လီၤဖဲ မဟါတနံၤ ဟါလီၤခီ ၁ နၣ်ရံၣ်လီၤ.”*
၅၃ ဒီးအပၢ်န့ၣ် သ့ၣ်ညါဝဲလၢ အမ့ၢ်ဝဲတနၣ်ရံၣ်ဃီဖဲ ယ့ၣ်ၡူးတဲအီၤလၢ “နဖိခွါန့ၣ်ဘျါက့ၤလံ”+ အခါန့ၣ်လီၤ. အဃိ အဝဲဒီးအဟံၣ်ဖိဃီဖိခဲလၢာ် ကဲထီၣ် ပှၤစူၢ်က့ၤနာ်က့ၤတၢ်လီၤ.
၅၄ အဝဲအံၤ မ့ၢ်ဝဲတၢ်လီၤလး ခံခါတခါလၢ+ ယ့ၣ်ၡူးမၤဝဲဖဲ အဟဲက့ၤလၢ ယူဒၤအဟီၣ်ကဝီၤ ဒီးနုာ်လီၤလၢ ကၤလံၤလါအပူၤ ဝံၤအလီၢ်ခံလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ကစၢ်.”
^ မ့ၢ်စ့ၢ်ကီး “ထံပူၤ.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၆ နၣ်ရံၣ်ဃၣ်ဃၣ်.”
^ အခီပညီလိၤလိၤ “ဝါထီၣ်.”
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၇ နၣ်ရံၣ်ဃၣ်ဃၣ်.”
