ယၡါယၤ ၂၂:၁-၂၅
၂၂ တၢ်စံၣ်ညီၣ်အကစီၣ် လၢအဘၣ်ဃးဒီး တၢ်ထံၣ်လၢညါခီ အကစၢၢ်ကဆူးန့ၣ်* အိၣ်ဝဲဒ် လၢလာ်အံၤ အသိးလီၤ.+
ဘၣ်မနုၤအဃိ သုလဲၤထီၣ်လၢ ဟံၣ်ခိၣ်ဒုး ကိးဂၤဒဲးလဲၣ်.
၂ သုဝ့ၢ်န့ၣ် ကပှဲၤဝဲဒီး တၢ်သဘံၣ်သဘုၣ်,တၢ်တၢထီၣ်တၢလီၤဒီး တၢ်ပာ်ကဖၢလၢသးလီၤ.
သုပှၤဂီၢ်မုၢ်လၢ အသံတဖၣ်န့ၣ် တသံလၢနးဘၣ်ဒီးအဝဲသ့ၣ် တသံလၢ တၢ်ဒုးပူၤဘၣ်.+
၃ သုပှၤပၢတၢ်တဖၣ်န့ၣ် ကဃ့ၢ်ကွံာ် တပူၤဃီလီၤ.+
ပှၤကဖီၣ်န့ၢ် အဝဲသ့ၣ်အဂီၢ် ပှၤမးတလိၣ်သူ ချံၣ်ဘၣ်.
ပှၤလၢအဃ့ၢ်ကွံာ် ဖးယံၤသနာ်က့ပှၤမ့ၢ်ထံၣ်န့ၢ်အီၤန့ၣ် ပှၤကဖီၣ်န့ၢ်အီၤ+ ကိးဂၤဒဲးလီၤ.
၄ အဃိန့ၣ် ယတဲလၢ “ယကဟီၣ် နးနးလီၤ.+
ကွၢ်ယၤတဂ့ၤ.
ခီဖျိလၢ ယပှၤဂီၢ်မုၢ် ဟးဂီၤဝဲအဃိ+တဘၣ်ဂုာ်ကျဲးစၢး မၤမုာ်ထီၣ်က့ၤယၤတဂ့ၤ.
၅ တၢ်တနံၤန့ၣ် ကမ့ၢ်ဝဲ တၢ်သဘံၣ်သဘုၣ်, တၢ်ၡူကွံာ် ဒီးတၢ်ပျံၤတၢ်ဖုး အမုၢ်နံၤ+လၢအဟဲလၢ တၢ်ပၢကစၢ် ယဟိဝၤယွၤအအိၣ်ဒီးကမၤအသးလၢ တၢ်ထံၣ်လၢညါခီ အကစၢၢ်ကဆူး အပူၤလီၤ.
ဝ့ၢ်ဒူၣ် ကဘၣ်တၢ်မၤလီၤပှီၢ်အီၤ+ဒီးတၢ်ကိးထီၣ်လၢ တၢ်မၤစၢၤ အဂီၢ် ကသီၣ်ထီၣ်တုၤလၢ ကစၢၢ်ကျါလီၤ.
၆ ပှၤဧ့ၤလၣ်ဖိတဖၣ်+ ထုးထီၣ် အပျၢ်ဘိအဒၢဒီးဟဲဒိးလ့ၣ်ကဟၣ်သုးဒီး ကသ့ၣ်တဖၣ်ဒီးပှၤကံၢ်ဖိတဖၣ်+ ကတဲာ်ကတီၤပာ်စၢၤ အကတီၤတဖၣ်လီၤ.
၇ သုတၢ်တြီၤ လၢအဂ့ၤကတၢၢ် တဖၣ်န့ၣ်ကပှဲၤဝဲဒီး လ့ၣ်ကဟၣ်သုးတဖၣ်ဒီးကသ့ၣ်တဖၣ်န့ၣ်* ကဆီလီၤအသးလၢ တြဲၤခိၣ်ထိးလီၤ.
၈ ယူဒၤ အတၢ်ဒီသဒၢန့ၣ်* ကဘၣ်တၢ်ထုးထီၣ်ကွံာ်အီၤလီၤ.
“ဖဲတၢ်တနံၤန့ၣ် သုကသန့ၤသုသးလၢ စုကဝဲၤတဖၣ် လၢအအိၣ်လၢ လဘၤနိၣ်ပှၢ် အဟံၣ်တဖျၢၣ် အပူၤလီၤ.+
၉ သုကထံၣ်ဘၣ် စီၤဒၤဝံးအဝ့ၢ်ဒူၣ် ဖျိဝဲအါမးလီၤ.+ ဒီးသုကပာ်ဖှိၣ်ထံလၢ ကမါလၢ လာ်ခီတတီၤလီၤ.+
၁၀ သုကဂံၢ် ဟံၣ်တဖၣ်လၢ ဝ့ၢ်ယရူၤၡလ့ၣ်အပူၤ ဒီးသုကမၤလီၤပှီၢ် ဟံၣ်တဖၣ်န့ၣ် ဒ်သိး သုကတ့ကျၢၤထီၣ်က့ၤ ဝ့ၢ်ဒူၣ်အဂီၢ်လီၤ.
၁၁ ဒီးဒ်သိး သုကပာ်ဃာ်ထံလၢ အဟဲလၢ ထံကမါလီၢ်လံၤ အဂီၢ်န့ၣ် သုကတ့ထီၣ် ထံဒၢဖးဒိၣ်လၢ တၢ်ဒူၣ်ခံခါ အဘၢၣ်စၢၤလီၤ. ဘၣ်ဆၣ် သုတသန့ၤသုသးလၢ ကစၢ်ယွၤ ဖးဒိၣ်တဂၤလၢ အတ့လီၤအီၤ အအိၣ်ဘၣ်. ဒီးကစၢ်ယွၤလၢ အဆၢတဲာ်တၢ်လၢ အပူၤကွံာ်ဖးယံာ်လၢ အကမၤဝဲဒ်အံၤ တဂၤန့ၣ် သုတထံၣ်ဘၣ်အီၤဘၣ်.
၁၂ မုၢ်နံၤအဝဲန့ၣ် မ့ၢ်တုၤန့ၣ် တၢ်ပၢကစၢ် ယဟိဝၤယွၤကမၢသုဟီၣ်လၢ တၢ်သးအုးအပူၤ,+လူၤသုခိၣ် ဒီးကူထီၣ်ကၤထီၣ် ထၢၣ်တၢ်ကံးညာ်တဖၣ်လီၤ.*
၁၃ သနာ်က့ သုမၤမူးပွဲ ဒီးတၢ်သူၣ်ဖှံသးညီ,သုဒိသံလီၤကျီၢ် ဒီးဒိသံလီၤသိ,သုအီၣ်တၢ်ညၣ် ဒီးသုအီ စပံးထံလီၤ.+
ဒီးသုတဲလၢ ‘မ့ၢ်လၢ ခဲမုၢ်ဆ့ၣ်န့ၣ် ပကသံအဃိ ကဲ, ပအီၣ်တၢ် ဒီး အီတၢ်ဟီ.’”+
၁၄ ဝံၤဒီး တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဘၣ်ယၤဒ်အံၤလီၤ. “တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ ‘သုမ့ၢ်တသံဘၣ်န့ၣ် သုတၢ်ကမၣ်အံၤ တဘၣ်တၢ်ပျၢ်ကွံာ်အီၤဘၣ်.’”+
၁၅ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ “လဲၤလၢ ပှၤလၢအအိၣ်ဒီး တၢ်န့ၢ်စိန့ၢ်ကမီၤ စီၤၡ့ၤဘနၤ+ လၢအမ့ၢ် ပှၤလၢအကွၢ်ထွဲဟံၣ်* အအိၣ် ဒီးတဲလၢ
၁၆ ‘တၢ်လီၢ်အံၤ ဘၣ်ဃးဒီး နၤဒ်လဲၣ်. လၢနကစိးပျၤထီၣ် တၢ်သွၣ်ခိၣ်တပူၤလၢ နနီၢ်ကစၢ်အဂီၢ်န့ၣ် နအိၣ်ဒီး တၢ်ခွဲးတၢ်ယာ်ဒ်လဲၣ်.’ စီၤၡ့ၤဘနၤ စိးပျၤထီၣ် တၢ်သွၣ်ခိၣ်တပူၤလၢ တၢ်လီၢ်လၢ အအိၣ်ထီၣ်ထီ ဒီးအခူၣ်ဝဲ တၢ်အိၣ်ဘှံးအလီၢ်လၢ အနီၢ်ကစၢ်အဂီၢ် လၢလ့ပူၤလီၤ.
၁၇ ဒီးတဲစ့ၢ်ကီးအီၤလၢ ‘ယၤ, ယဟိဝၤယွၤ ကဖီၣ်တံၢ်ဃာ်နၤဃံးဃံး ဒီးကကွံာ်လီၤနၤ ဆူၣ်ဆူၣ်လီၤ.
၁၈ ယကဘိၣ်ဘံထီၣ်နၤဃံးဃံး ဒီးယကကွံာ်နၤ ဒ်တၢ်အဖျၢၣ်တဖျၢၣ်အသိး ဆူထံကီၢ်လၢ အလဲၢ်တဘ့ၣ်အပူၤလီၤ. နကသံဖဲန့ၣ် ဒီးဖဲန့ၣ် ကအိၣ်တ့ၢ်က့ၤထဲ နလ့ၣ်ကဟၣ်လၢ အလီၤကဟုကညီၢ်တဖၣ် ဒီးကကဲထီၣ် တၢ်မဲာ်ဆှးလၢ ပှၤအိၣ်လၢ နကစၢ် အဟံၣ်ပူၤအဂီၢ်လီၤ.
၁၉ ယကသုးကွံာ်နၤလၢ နလီၢ်နလၤ ဒီးယကထုးထီၣ်ကွံာ်နၤလၢ နမူဒါလီၤ.
၂၀ “‘ဖဲန့ၣ်အဆၢကတီၢ် ယကကိးန့ၢ် ယခ့ယပှၤ စီၤအ့ၤလယါကံၣ်+ လၢအမ့ၢ် စီၤဃံးလကံယၤ အဖိခွါ
၂၁ ဒီးယကဒုးကၤထီၣ်အီၤလၢ နဆ့ဖးထီ, ယကစၢထီၣ် နယီၢ်တကိးလၢ အယီၢ်ဒ့လိၤဃံးဃံး+ ဒီးယကဟ့ၣ်လီၤကွံာ် နတၢ်စိတၢ်ကမီၤ လၢအစုပူၤလီၤ. ဒီးအဝဲကကဲထီၣ် ပှၤအိၣ်လၢ ဝ့ၢ်ယရူၤၡလ့ၣ်တဖၣ် ဒီးယူဒၤအပှၤဂီၢ်မုၢ် အပၢ်လီၤ.
၂၂ ဒီးယကဟ့ၣ်လီၤအီၤလၢ စီၤဒၤဝံး အစၢၤအသွဲၣ်တဖၣ်*+ အသီးခွဲးလီၤ. အဝဲကအိးထီၣ် တြဲၤတဖၣ် ဒီးပှၤတကးပံးဝဲ နီတဂၤဘၣ်. အဝဲကကးပံးတြဲၤတဖၣ် ဒီးပှၤတအိးထီၣ်ဝဲ နီတဂၤဘၣ်.
၂၃ ယကဒိတံၢ်အီၤ ဒ်ထးပနဲာ်* လၢအဘၣ်တၢ်ဒိတံၢ်အီၤလၢ တၢ်ဒူၣ်လၢအကျၢၤအလိၤ ဒီးအဝဲကကဲထီၣ် ဒ်သိးဒီး လီၢ်ပစိာ်လၢ အလီၤကဟုကညီၢ် လၢအပၢ်အဒူၣ်ဖိထၢဖိ အဂီၢ်လီၤ.
၂၄ အပၢ်အဒူၣ်ဖိထၢဖိ အလၤကပီၤခဲလၢာ် ကလီၤကစဲၤ လၢအီၤလီၤ. ဒီးအဝဲသ့ၣ် အစၢၤအသွဲၣ် ဒီးအဖိအလံၤတဖၣ် ကသန့ၤအသးလၢအီၤ ဒ်ပှၤဘျးလီၤကစဲၤ လီခီဖျၢၣ်ဆံးဆံးဖိတဖၣ်, လီခီဖျၢၣ်ဖးဒိၣ်တဖၣ် ဒီးကိတဖၣ်လၢ ထးပနဲာ်အလိၤ အသိးလီၤ.
၂၅ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ ‘ဖဲန့ၣ်အဆၢကတီၢ် ထးပနဲာ်လၢညါ* လၢအဘၣ်တၢ်ဒိတံၢ်အီၤလၢ တၢ်ဒူၣ်လၢအကျၢၤအလိၤန့ၣ် ကဘၣ်တၢ်ထုးထီၣ်ကွံာ်အီၤ,+ မၤလီၤတဲာ်ကွံာ်အီၤ ဒီးကလီၤတဲာ်ကွံာ်ဝဲလီၤ. တၢ်အဃၢလၢ အလီၤကစဲၤလၢ ထးပနဲာ်အလိၤန့ၣ် ကလီၤတဲာ်ကွံာ် ဒီးဟးဂီၤကွံာ်ဝဲ, မ့ၢ်လၢ ယဟိဝၤယွၤ အနီၢ်ကစၢ် တဲပာ်စၢၤဝဲဒ်န့ၣ်အဃိလီၤ.’”
တၢ်ဂ့ၢ်အဘျဲၣ်တဖၣ်
^ ဖျါလၢအဲၣ်ဒိးတဲဝဲ ဝ့ၢ်ယရူၤၡလ့ၣ်.
^ မ့ၢ်စ့ၢ်ကီး “ပှၤဒိးကသ့ၣ်.”
^ မ့ၢ်စ့ၢ်ကီး “တၢ်ကျၢၢ်ဘၢ.”
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “ပှၤလၢအအိၣ်လၢ နနီပူၤ.”
^ အခီပညီလိၤလိၤ “ဟံၣ်.”
^ ဖျါလၢအဲၣ်ဒိးတဲဝဲ စီၤအ့ၤလယါကံၣ်.
^ ဖျါလၢအဲၣ်ဒိးတဲဝဲ စီၤၡ့ၤဘနၤ.
