ယၡါယၤ ၄၀:၁-၃၁
၄၀ သုကစၢ်ယွၤ တဲဝဲလၢ “မၤမုာ်ထီၣ်, မၤမုာ်ထီၣ် ယပှၤဂီၢ်မုၢ်.”+
၂ “တဲတၢ်ဒီး ယရူၤၡလ့ၣ် အပှၤဂီၢ်မုၢ် မုာ်မုာ် တုၤလၢ အနုာ်လီၤလၢ အဝဲသ့ၣ် အသးပူၤတက့ၢ်.
ခီဖျိလၢ အဝဲသ့ၣ် အတၢ်ဒဲးဘးခဲလၢာ်အဃိ အဝဲသ့ၣ် တူၢ်ဘၣ် တၢ်စံၣ်ညီၣ်လၢ ယဟိဝၤယွၤအအိၣ် လၢလၢပှဲၤပှဲၤလံ.+
အဃိ တဲဘၣ်အဝဲသ့ၣ်လၢ တၢ်ဆၢကတီၢ်လၢ အဝဲသ့ၣ် ကဘၣ်ကီ ဘၣ်ခဲန့ၣ် ကတၢၢ်ဝဲလံဒီးအဝဲသ့ၣ် အတၢ်ကမၣ် ပျၢ်လံ.”+
၃ လၢပှၢ်မုၢ်ကနၢန့ၣ် ပှၤတဂၤ အကလုၢ်သီၣ်ထီၣ်ဝဲလၢ“ကတဲာ်ကတီၤန့ၢ် ယဟိဝၤယွၤ အကျဲ+
ဒီးတ့ထီၣ်န့ၢ် ကျဲမုၢ်ဖးဒိၣ်တဘိလၢ+ အလဲၤဝဲလိၤလိၤလၢ မဲးမုၢ်ပျီအပူၤ လၢပကစၢ်ယွၤ အဂီၢ်တက့ၢ်.+
၄ တၢ်တြီၤခဲလၢာ် ကပှဲၤထီၣ်ဒီးကစၢၢ် ဒီးတၢ်လူၢ်ကိးဖျၢၣ်ဒဲး ကလီၤပၢၤဝဲလီၤ.
တၢ်လီၢ်လၢ အတပၢၤဘၣ်န့ၣ် ကပၢၤဝဲဒီးဟီၣ်ခိၣ်လၢ အထီၣ်စိလီၤညၢၣ်န့ၣ် ကကဲထီၣ် တၢ်ပျီလီၤ.+
၅ ယဟိဝၤယွၤ အလၤကပီၤ ကအိၣ်ဖျါထီၣ်+ဒီးပှၤဟီၣ်ခိၣ်ဖိခဲလၢာ်* ကထံၣ်ဝဲ,+မ့ၢ်လၢ ယဟိဝၤယွၤ တဲတ့ၢ်ဝဲ ဒ်န့ၣ်အဃိလီၤ.”
၆ ကနၣ်သၢၤ, ပှၤတဂၤ တဲဝဲလၢ “တဲဖျါထီၣ် တၢ်တမံၤမံၤ.”
ပှၤအဂၤတဂၤ သံကွၢ်ဝဲလၢ “ယကဘၣ် တဲဖျါထီၣ် မနုၤလဲၣ်.”
“ပှၤဟီၣ်ခိၣ်ဖိ ခဲလၢာ်န့ၣ် လီၤဂာ်ဒ်သိးဒီး နီၣ်လါဟ့လီၤ.
ဒီးအဝဲသ့ၣ် အတၢ်အဲၣ်လၢအတီ ခဲလၢာ်န့ၣ် လီၤဂာ်ဒ်သိးဒီး ဖီလၢပျီပူၤလီၤ.+
၇ နီၣ်လါဟ့ ဃ့ထီကွံာ်ဝဲဒီးဖီတဖၣ် လီၤညွံးလီၤဘဲဝဲ,+မ့ၢ်လၢ ယဟိဝၤယွၤ အတၢ်ကသါလီၤန့ၣ်* အူဘၣ်အီၤ အဃိလီၤ.+
နီၢ်ကီၢ်န့ၣ် ပှၤဂီၢ်မုၢ်တဖၣ် လီၤဂာ် ဒ်သိးဒီး နီၣ်လါဟ့လီၤ.
၈ နီၣ်လါဟ့ ဃ့ထီကွံာ်ဝဲဒီးဖီတဖၣ် လီၤညွံးလီၤဘဲဝဲဘၣ်ဆၣ် ပကစၢ်ယွၤ အတၢ်ကတိၤန့ၣ် အိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.”+
၉ သုဝဲပိာ်မုၣ်လၢ အဟဲစိာ် တၢ်သးခုကစီၣ်လၢ စံယိၣ်အဂီၢ်သ့ၣ်ဧၢ,+လဲၤထီၣ်လၢ ကစၢၢ်ဖးထီ အလိၤတက့ၢ်.
သုဝဲပိာ်မုၣ်လၢ အဟဲစိာ် တၢ်သးခုကစီၣ်လၢ ဝ့ၢ်ယရူၤၡလ့ၣ် အဂီၢ်သ့ၣ်ဧၢ,ကိးပသူထီၣ် လၢကလုၢ်ဖးဒိၣ်တက့ၢ်.
ကိးပသူထီၣ် ဒီးတဘၣ်ပျံၤတၢ်တဂ့ၤ.
ဒုးသ့ၣ်ညါ ယူဒၤအဝ့ၢ်တဖၣ်လၢ “သုကစၢ်ယွၤ အိၣ်ဒီးသု” တက့ၢ်.+
၁၀ တၢ်ပၢကစၢ် ယဟိဝၤယွၤ ကဟဲဒီး အစိကမီၤဒီးအစု ကပၢတၢ်လၢ အဂီၢ်လီၤ.+
တၢ်အဘူးအလဲလၢ အကဟ့ၣ်လီၤဝဲန့ၣ် အိၣ်ဒီးအီၤဒီးအဝဲအိၣ်ကတဲာ်ကတီၤပာ်စၢၤအသးလၢ ကဟ့ၣ်လီၤခိၣ်ဖးလီၤ.+
၁၁ အဝဲကကွၢ်ထွဲ အသိတဖၣ် ဒ်ပှၤကွၢ်သိတဂၤ အသိးလီၤ.+
အဝဲကပာ်ဖှိၣ်ထီၣ် အသိဖိတဖၣ် တပူၤဃီ*ဒီးကစိာ် အသိဖိတဖၣ်လၢ အသးနါပှၢ်အလိၤလီၤ.
သိဖိလၢ အအိၣ်ဒီး အဖိဆံးတဖၣ်န့ၣ် အကဆှၢဝဲ ကယီကယီလီၤ.+
၁၂ မတဂၤ ထိၣ်ပီၣ်လဲၣ်ထံ ခဲလၢာ်လၢ အစုညါသး အပူၤလဲၣ်.+
မတဂၤ ထိၣ်မူခိၣ်လၢ အစုထါ တထါလဲၣ်.*
ဒီးမတဂၤ ပာ်ဖှိၣ်ထီၣ် ဟီၣ်ခိၣ်ဒီဘ့ၣ်အကမူၣ် လၢလီခီဖျၢၣ်တဖျၢၣ်အပူၤ+ဒ်သိး ကထိၣ်အီၤအဂီၢ်ဒီးစီၤဝဲ ကစၢၢ်တဖၣ် ဒီးတၢ်လူၢ်တဖၣ်လၢ စီၤပီၢ်ပူၤန့ၣ်လဲၣ်.
၁၃ တၢ်လၢ ယဟိဝၤယွၤ အသးစီဆှံန့ၣ် မတဂၤထိၣ်အီၤ* ကသ့လဲၣ်.
ဒီးမတဂၤကဲထီၣ် အပှၤလၢအဟံးစုနဲၣ်ကျဲအီၤ ဒီးဟ့ၣ်ကူၣ်ဟ့ၣ်ဖးအီၤ သ့လဲၣ်.+
၁၄ ဒ်သိး အဝဲကမၤန့ၢ်အါထီၣ် တၢ်နၢ်ပၢၢ်အဂီၢ် အဝဲတၢၣ်ပီၣ်ဒီး မတဂၤလဲၣ်.
မ့ၢ်မတဂၤ သိၣ်လိအီၤ တၢ်စံၣ်ညီၣ် အကျဲလဲၣ်.
မ့ၢ်မတဂၤ သိၣ်လိအီၤ တၢ်သ့ၣ်ညါလဲၣ်.
ဒီးမ့ၢ်မတဂၤ ဒုးနဲၣ်အီၤလၢ တၢ်နၢ်ပၢၢ်နီၢ်ကီၢ်အကျဲ ကသ့လဲၣ်.+
၁၅ ပှၤကလုာ်တဖၣ်န့ၣ် လီၤဂာ်ဒ်သိးဒီး ထံတလီၤစီၤလၢ ထံစဲၤပူၤဒီးအဝဲသ့ၣ် လီၤဂာ်ဒ်သိးဒီး တၢ်ကမူၣ်လၢ စီၤပီၢ်ပူၤလီၤ.+
ကွၢ်မီၤ, အဝဲစိာ်ထီၣ် ကီးတဖၣ် ဒ်သိးဒီးတၢ်ကမူၣ်လီၤ.
၁၆ လဘၤနိၣ် အသ့ၣ်ထူၣ်တဖၣ် ဒၣ်လဲာ် တယၢလၢ မ့ၣ်အူကဆဲးကဲၤ အဂီၢ်ဘၣ်.
ဒီးအဆၣ်ဖိကီၢ်ဖိအမံၤတဖၣ်န့ၣ် တယၢလၢ တၢ်လုၢ်ဒွဲၣ်အူ အဂီၢ်ဘၣ်.
၁၇ လၢအမဲာ်ညါန့ၣ် ပှၤကလုာ်တဖၣ် လီၤဂာ်ဒ် တၢ်လၢအတအိၣ် နီၢ်ကီၢ်ဘၣ်.+
ဒီးအပာ်အဝဲသ့ၣ်ဒ် တၢ်လၢအလုၢ်အပှ့ၤတအိၣ်ဘၣ် လၢအတမ့ၢ်တၢ်နီတမံၤဘၣ်.+
၁၈ သုထိၣ်သတြီၤ ပှၤဂၤဒီးကစၢ်ယွၤ ကသ့ဧါ.+
သုတဲလၢ ကစၢ်ယွၤ လီၤဂာ်ဒီး တၢ်တမံၤမံၤ ကသ့ဧါ.+
၁၉ ပှၤစုသ့ဖိ တ့ထီၣ်ဝဲ တၢ်ဂီၤတၢ်ဖှီၣ်တခါ,ပှၤပိာ်ထးဖိ ကျးဝဲတၢ်ဂီၤတၢ်ဖှီၣ် တခါန့ၣ် လၢထူ+ဒီးအဝဲပိာ်ဝဲ ပျံၤထးစ့ညၣ်တဖၣ်လီၤ.
၂၀ ပှၤတဂၤ ဃုထၢဝဲ သ့ၣ်လၢ+အတအုၣ်တကျၣ်ဘၣ် တထူၣ်လၢ တၢ်မၤဘူၣ်အဂီၢ်လီၤ.
အဝဲဃုကွၢ် ပှၤစုသ့ဖိလၢအဖၠဲး လၢအမၤတၢ်သ့ဂ့ၤဂ့ၤတဂၤဒ်သိး ကတ့ထီၣ် တၢ်ဂီၤစိးပျၤတခါလၢ အလီၤကူၢ်တန့ၢ်ဘၣ်လီၤ.+
၂၁ သုတသ့ၣ်ညါဧီၤ.
သုတနၢ်ဟူဘၣ်ဧီၤ.
လၢအခီၣ်ထံးလံၤလံၤန့ၣ် ပှၤတတဲဘၣ်သုဧီၤ.
တၢ်အုၣ်အသးလၢ အအိၣ်ပာ်စၢၤစးထီၣ်လၢ ဟီၣ်ခိၣ်ကဲထီၣ်လံၤလံၤန့ၣ် သုတနၢ်ပၢၢ်ဧီၤ.+
၂၂ ပှၤလၢအအိၣ်ဝဲဆိးဝဲလၢ ဟီၣ်ခိၣ်ဖျၢၣ်အံၤ* အဖီခိၣ်န့ၣ် အိၣ်ဝဲတဂၤလီၤ.+
ဒီးလၢအတၢ်ထံၣ်န့ၣ် ပှၤလၢ အအိၣ်လၢ ဟီၣ်ခိၣ်န့ၣ် လီၤဂာ်ဒ်သိးဒီး ဒွဲၣ်တဖၣ်လီၤ.
အဝဲထုးသလၣ်ထီၣ် မူခိၣ် ဒ်တၢ်ကံးညာ် ဘူဘူဖိတဘ့ၣ်အသိးဒီးအသလၣ်ထီၣ်ဝဲ ဒ်ဒဲလၢပှၤအိၣ်ဝဲဆိးဝဲ လၢအပူၤ အသိးလီၤ.+
၂၃ အဝဲသုးကွံာ် ပဒိၣ်လၢအပတီၢ်ထီတဖၣ် အလီၢ်အလၤဒီးစံၣ်ညီၣ်ကွီၢ်တဖၣ်လၢ* ဟီၣ်ခိၣ်ချၢန့ၣ် အဝဲဒုးကဲထီၣ်ဝဲလၢ တၢ်လၢအဘျုးတအိၣ်ဘၣ်လီၤ.
၂၄ အဝဲသ့ၣ် လီၤဂာ်ဒ် တၢ်မုၢ်တၢ်ဘိလၢ ပှၤတသူၣ်လီၤအီၤ မူာ်နီၢ်ဒံးဘၣ်,အဂံၢ် တစဲၤလီၤသးမူာ်နီၢ်ဒံးဘၣ်ဒီးပှၤတဖှံလီၤအီၤ မူာ်မူာ်နီၢ်နီၢ်ဒံးဘၣ် အသိးလီၤ.
ကလံၤအူဘၣ် အဝဲသ့ၣ် ဒီးအဝဲသ့ၣ် ဃ့ထီကွံာ်ဝဲဒီးအဝဲသ့ၣ် ဒံကွံာ်ဝဲလၢ ကလံၤကျါ ဒ်လီၢ်ဘိ အသိးလီၤ.+
၂၅ တၢ်စီဆှံတဂၤ တဲဝဲလၢ “သုထိၣ်သတြီၤယၤဒီး မတဂၤကသ့လဲၣ်. ပှၤလၢအဒိၣ်ထဲသိးဒီးယၤ အိၣ်တဂၤဂၤဧါ.”
၂၆ “ကျ့ၣ်ထီၣ်သုမဲာ်လၢ မူခိၣ် ဒီးကွၢ်တက့ၢ်.
မတဂၤတ့လီၤ ဆၣ်တဖၣ်အံၤလဲၣ်.+
မ့ၢ်ဝဲ ပှၤတဂၤလၢ အဆှၢထီၣ် ဆၣ်တဖၣ်အံၤ ဒ်သုးမုၢ်တဖုအသိးဒီးအဝဲဂံၢ်ဝဲ ဆၣ်တဖၣ် ဒီးကိးဝဲလၢ အမံၤ ကိးဖျၢၣ်ဒဲးလီၤ.+
မ့ၢ်လၢ အဝဲအိၣ်ဒီး တၢ်ဂံၢ်တၢ်ဘါ အါအါဂီၢ်ဂီၢ် ဒီးတၢ်စိတၢ်ကမီၤ ဒိၣ်ဒိၣ်မုၢ်မုၢ်အဃိ+ဆၣ်တဖၣ် တလီၤမၢ်နီတဖျၢၣ်ဘၣ်.
၂၇ အိ စီၤယၤကိာ် အစၢၤအသွဲၣ်သ့ၣ်ဧၢ, အိ ပှၤအံၣ်စရ့လးဖိသ့ၣ်ဧၢ, ဘၣ်မနုၤအဃိ သုတဲလၢ‘ယဟိဝၤယွၤ တထံၣ်ပတၢ်အိၣ်မူ အတၢ်ကီတၢ်ခဲတဖၣ်ဘၣ်ဒီးကစၢ်ယွၤ တစံၣ်ညီၣ်န့ၢ်တၢ်လၢပဂီၢ်ဘၣ်’ န့ၣ်လဲၣ်.+
၂၈ သုတသ့ၣ်ညါဧီၤ. သုတနၢ်ဟူဘၣ်ဧီၤ.
ယဟိဝၤယွၤ လၢအမ့ၢ် တၢ်ဘၣ်တ့ကစၢ်လၢ အတ့လီၤတၢ်အိၣ်လၢ ဟီၣ်ခိၣ်ခဲလၢာ်န့ၣ် အမ့ၢ်ကစၢ်ယွၤ အထူအယိာ်လီၤ.+
အဝဲတလီၤဘှံး ဒီးအဂံၢ်ဘါ တလီၤစၢ် နီတဘျီဘၣ်.+
အတၢ်သ့ၣ်ညါနၢ်ပၢၢ်န့ၣ် ပှၤနၢ်ပၢၢ်တသ့ နီတဂၤဘၣ်.+
၂၉ ပှၤလၢအလီၤဘှံးန့ၣ် ကစၢ်ယွၤ ဟ့ၣ်လီၤဝဲ တၢ်ဂံၢ်တၢ်ဘါဒီးပှၤလၢအဂံၢ်တအိၣ်ဘၣ်န့ၣ် အဝဲဟ့ၣ်လီၤဝဲ ဂံၢ်ဘါ ပှဲၤပှဲၤလီၤ.*+
၃၀ ဖိသၣ်ပိာ်ခွါတဖၣ် ကလီၤဘှံး ဒီးအဂံၢ်အဘါ ကလီၤစၢ်ဒီးပိာ်ခွါသးစၢ်တဖၣ် အခီၣ်ကဘၣ်တိၢ် ဒီးလီၤဃံၢ်လီၤ.
၃၁ မ့မ့ၢ် ပှၤလၢ အမုၢ်လၢ်တၢ်လၢ ယဟိဝၤယွၤန့ၣ် ကဒိးန့ၢ်ဘၣ်က့ၤ တၢ်ဂံၢ်တၢ်ဘါလီၤ.
အဝဲသ့ၣ် ကယူၤထီၣ်ဖးထီ လီၤဂာ်ဒ်သိးဒီး အအိၣ်ဒီး လံာ်ကြီကြာ်အဒံးလီၤ.+
အဝဲသ့ၣ် ကဃ့ၢ် ဒီးအဂံၢ်အဘါ တလီၤစၢ်ဘၣ်.
အဝဲသ့ၣ် ကဟး ဒီးအတလီၤဘှံးဘၣ်.”+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဖံးညၣ်.”
^ မ့ၢ်စ့ၢ်ကီး “သး.”
^ မ့ၢ်စ့ၢ်ကီး “ကစိာ်ထီၣ်ဝဲလၢ အစု.”
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ဘၣ်သ့ၣ်သ့ၣ် ကမ့ၢ် “နၢ်ပၢၢ်အီၤ.”
^ မ့ၢ်စ့ၢ်ကီး “ဖျၢၣ်သလၢၣ်.”
^ မ့ၢ်စ့ၢ်ကီး “ပှၤခိၣ်ပှၤနၢ်တဖၣ်.”
^ မ့ၢ်စ့ၢ်ကီး “တၢ်ဂံၢ်တၢ်ဘါ အါအါဂီၢ်ဂီၢ်.”
