ရူၤသး ၂:၁-၂၃
၂ နီၢ်နၤဧမံ အဝၤအဘူးအတံၢ် လၢအကဲဒိၣ်ဒိၣ်မး အိၣ်ဝဲတဂၤ ဒီးအမံၤမ့ၢ်ဝဲ စီၤဘိၤဧးန့ၣ်လီၤ.+ အဝဲမ့ၢ်ပှၤတဂၤလၢ စီၤအလံၤမ့လ့း အဒူၣ်ဖိထၢဖိအကျါလီၤ.
၂ နီၢ်ရူၤသးလၢအမ့ၢ် ပှၤမိၤအးမုၣ်ဖိတဂၤန့ၣ် တဲဘၣ် နီၢ်နၤဧမံလၢ “ဝံသးစူၤ ဟ့ၣ်ယၤအခွဲးလၢ ယကလဲၤလၢ စံာ်ပျီပူၤတက့ၢ်. ဒီးပှၤတဂၤဂ့ၤတဂၤဂ့ၤ လၢအသးကညီၤယၤန့ၣ် ယကလဲၤလၢ အလီၢ်ခံ ဒီးထၢဖှိၣ်+ ဘုချုၣ်လၢ* အလီၤတဲာ်တဖၣ်လီၤ.” အဃိ နီၢ်နၤဧမံ တဲအီၤလၢ “လဲၤဟီ, ဖိမုၣ်ဧၢ.”
၃ ဝံၤဒီးအဝဲ ဟးထီၣ်ဒီး ထၢဖှိၣ်ဘုချုၣ်လၢစံာ်ပျီပူၤ လၢပှၤကူးဘုတဖၣ် အလီၢ်ခံလီၤ. လၢတၢ်တပာ်သူၣ်ပာ်သးအပူၤ အဝဲလဲၤတုၤဘၣ်လၢ စီၤဘိၤဧး အစံာ်ပျီပူၤလီၤ.+ စီၤဘိၤဧးန့ၣ် မ့ၢ်ဝဲပှၤလၢ စီၤအလံၤမ့လ့း+ အဒူၣ်ဖိထၢဖိအကျါ တဂၤလီၤ.
၄ ဒီးစီၤဘိၤဧး လၢအအိၣ်လၢ ဝ့ၢ်ဘ့ၤသလ့ဃ့ၣ်န့ၣ် ဘၣ်ဖဲအဟဲတုၤဝဲလၢ အစံာ်ပျီပူၤလီၤ. အဝဲတဲဘၣ် ပှၤကူးဘုဖိတဖၣ်လၢ “မ်ယဟိဝၤယွၤ အိၣ်ဒီးသုတက့ၢ်.” ဒီးအဝဲသ့ၣ် တဲဆၢဝဲလၢ “မ်ယဟိဝၤယွၤ ဆိၣ်ဂ့ၤနၤတက့ၢ်.”
၅ ဝံၤဒီးစီၤဘိၤဧး သံကွၢ်ဝဲ ပှၤကူးဘုဖိအခိၣ်တဂၤလၢ “ပိာ်မုၣ်သးစၢ်တဂၤအံၤ အဒီဘူးဒီတံၢ်ဒီး မတဂၤလဲၣ်.”
၆ ပှၤကူးဘုဖိအခိၣ် စံးဆၢက့ၤအီၤလၢ “ပိာ်မုၣ်သးစၢ်တဂၤအံၤ မ့ၢ်ဝဲပှၤမိၤအးမုၣ်ဖိလၢ+ အဟဲက့ၤပိာ် နီၢ်နၤဧမံအခံလၢ ကီၢ်မိၤအးလီၤ.+
၇ အဝဲတဲဝဲလၢ ‘ဝံသးစူၤ ယထၢဖှိၣ်+ ဘုချုၣ်လၢ အလီၤတဲာ်လၢ ပှၤကူးဘုဖိတဖၣ် အလီၢ်ခံကသ့ဧါ.’ ဒီးစးထီၣ်လၢ ဂီၤခီတုၤလၢခဲအံၤန့ၣ် အဝဲတပတုာ် မၤတၢ်ဘၣ်. အဝဲက့ၤဆ့ၣ်နီၤ အိၣ်ဘှံးလၢ ဒဲပူၤ ဖဲမကၢာ်လီၤ.”
၈ စီၤဘိၤဧး တဲဘၣ် နီၢ်ရူၤသးလၢ “ကနၣ်လၢအံၤ ယဖိမုၣ်ဧၢ, တဘၣ်လဲၤထၢဖှိၣ် ဘုချုၣ်လၢ စံာ်ပျီအဂၤတဂ့ၤ ဒီးတဘၣ်လဲၤလၢ တၢ်လီၢ်အဂၤ နီတပူၤတဂ့ၤ. အိၣ်ဘူးဒီး ယပျဲၢ်မုၣ်တဖၣ်တက့ၢ်.+
၉ တၢ်လီၢ်လၢ ပှၤကူးဘုဖိတဖၣ် လဲၤဝဲန့ၣ် ကွၢ်နီၣ်ပာ်ဒီး လဲၤဒီးပိာ်မုၣ်တဖၣ်န့ၣ်တက့ၢ်. ယမၤလိာ် ပိာ်ခွါသးစၢ်တဖၣ်လၢ အသုတမၤတံာ်တာ်နၤတဂ့ၤ. နမ့ၢ်အဲၣ်ဒိးအီထံန့ၣ် လဲၤလၢထံဒၢတဖၣ်အလီၢ် ဒီးအီထံလၢ ပှၤပိာ်ခွါသးစၢ်တဖၣ် ဒၢၣ်ပာ်ဝဲန့ၣ်တက့ၢ်.”
၁၀ ဒီးနီၢ်ရူၤသး ထိၣ်လီၤပှီၤအသး လၢဟီၣ်ခိၣ်လိၤဒီး တဲဘၣ်စီၤဘိၤဧးလၢ “ယမ့ၢ် ပှၤထံဂၤကီၢ်ဂၤဖိတဂၤ+ ဘၣ်ဆၣ် ဘၣ်မနုၤအဃိ နပာ်သူၣ်ပာ်သးယၤ ဒီးနသးဂ့ၤလၢယဖီခိၣ် ထဲအံၤညါလဲၣ်.”
၁၁ ဒီးစီၤဘိၤဧး စံးဆၢအီၤလၢ “ပှၤတဲဘၣ်ယၤ နဂ့ၢ်နကျိၤခဲလၢာ် လၢအဘၣ်ဃးဒီး တၢ်လၢနမၤတ့ၢ်လၢ နမံၤပှၢ်ပိာ်မုၣ်အဂီၢ် ဖဲနဝၤသံဝံၤအလီၢ်ခံန့ၣ်လီၤ. ဒီးနပာ်တ့ၢ်ကွံာ် နမိၢ်ဒီးနပၢ် ဒီးနတၢ်အိၣ်တၢ်ဆိးအလီၢ် ဒီးလဲၤဆူပှၤတကလုာ် လၢနတသ့ၣ်ညါအီၤဘၣ် အအိၣ်လီၤ.+
၁၂ မ်ယဟိဝၤယွၤ ဆိၣ်ဂ့ၤနၤ ခီဖျိတၢ်လၢ နမၤအီၤအဃိန့ၣ်တက့ၢ်.+ ဒီးယဟိဝၤယွၤ လၢအမ့ၢ်အံၣ်စရ့လး အကစၢ်လၢ နဟဲအိၣ်ကဒုလၢ အဒံးဆ့ဖီလာ်တဂၤန့ၣ် မ်အဟ့ၣ်ဆၢက့ၤနၤ လၢလၢပှဲၤပှဲၤ* တက့ၢ်.”+
၁၃ ဒီးနီၢ်ရူၤသး တဲဝဲလၢ “ယကစၢ်ဧၢ, ယမုၢ်လၢ်လၢ နကဆဲးပာ်ဖျါထီၣ် တၢ်သးကညီၤ လၢယဖီခိၣ်လီၤ. ယတမ့ၢ် နခ့နပှၤတဂၤဘၣ်ဆၣ် နမၤမုာ်ထီၣ်ယသး ဒီးတဲမုာ်ထီၣ်က့ၤယသးလီၤ.”
၁၄ ဖဲပှၤအီၣ်တၢ်အခါန့ၣ် စီၤဘိၤဧး တဲဘၣ်နီၢ်ရူၤသးလၢ “ဟဲဖဲအံၤ ဒီးဟံးန့ၢ်အီၣ် ကိၣ်တနီၤ ဒီးထိးအီၣ်အီၤဒီး တၤဆံၣ်ထံတက့ၢ်.” ဒီးနီၢ်ရူၤသး ဆ့ၣ်နီၤဝဲလၢ ပှၤကူးဘုဖိတဖၣ် အကပၤလီၤ. ဝံၤဒီး စီၤဘိၤဧး ဟ့ၣ်လီၤအီၤ ဘုအဝဲာ်တနီၤလီၤ. အဝဲအီၣ်ဝဲဘျဲဘျဲ တကးဒံးဘၣ် အိၣ်တ့ၢ်ဒံးဝဲ တနီၤလီၤ.
၁၅ ဖဲအဝဲ ကလဲၤထၢဖှိၣ်ဘုအခါ+ စီၤဘိၤဧး မၤလိာ်အပျဲၢ် ပိာ်ခွါတဖၣ်လၢ “ပျဲအထၢဖှိၣ်ဘု လၢဘုကဒိၣ်တဖၣ်အကျါစ့ၢ်ကီး ဒီးတဘၣ်မၤတံာ်တာ်အီၤတဂ့ၤ.+
၁၆ သုကဘၣ်မၤလီၤတဲာ်န့ၢ်အီၤ ဘုချုၣ်တနီၤလၢ ဘုကဒိၣ်အကျါ ဒ်သိးအကထၢဝဲအဂီၢ်လီၤ. တဘၣ်တဲတၢ်လၢ အကမၤပတုာ်အီၤ နီတမံၤတဂ့ၤ.”
၁၇ အဝဲဆဲးထၢဖှိၣ်ဘုလၢ စံာ်ပူၤ တုၤလၢဟါလီၤခီလီၤ.+ ဖဲအဝဲတီၢ်လီၤဆှုဘုလၢ အထၢဖှိၣ်ဝဲတဖၣ်အခါ န့ၢ်ဝဲဘုမုယီၤ တအ့ဖးဃၣ်ဃၣ်လီၤ.*
၁၈ အဝဲဟံးထီၣ်ဘု ဒီးက့ၤဝဲလၢ ဝ့ၢ်ပူၤလီၤ. ဒီးအမံၤပှၢ်ပိာ်မုၣ် ထံၣ်ဝဲတၢ်လၢ အထၢဖှိၣ်န့ၢ်ဝဲတဖၣ်လီၤ. တၢ်လၢ နီၢ်ရူၤသး အီၣ်ဝဲဘျဲဘျဲဝံၤဒီး အအိၣ်တ့ၢ်တဖၣ်န့ၣ်+ ဟ့ၣ်လီၤဝဲ အမံၤပှၢ်ပိာ်မုၣ်လီၤ.
၁၉ ဒီးအမံၤပှၢ်ပိာ်မုၣ် သံကွၢ်အီၤလၢ “တနံၤညါအံၤ နလဲၤထၢဖှိၣ်ဘုဖဲလဲၣ်, နလဲၤမၤတၢ်ဖဲလဲၣ်, ပှၤလၢအပာ်သူၣ်ပာ်သးနၤတဂၤန့ၣ် မ်အဘၣ်တၢ်ဆိၣ်ဂ့ၤတက့ၢ်.”+ အဝဲတဲဘၣ် အမံၤပှၢ်ပိာ်မုၣ် ဘၣ်ဃးဒီး အဝဲလဲၤမၤတၢ်လၢ မတၤအစံာ်ပူၤလဲၣ်န့ၣ်လီၤ. ဒီးအတဲဝဲလၢ “ပှၤတဂၤလၢ ယလဲၤမၤတၢ်လၢ အစံာ်ပူၤ တနံၤညါအံၤန့ၣ် အမံၤမ့ၢ်ဝဲ စီၤဘိၤဧးလီၤ.”
၂၀ ဝံၤဒီးနီၢ်နၤဧမံ တဲဘၣ်အဒဲၣ်မုၣ်လၢ “ယဟိဝၤယွၤ လၢအမ့ၢ် ပှၤလၢအပာ်ဖျါထီၣ် တၢ်အဲၣ်လၢအတီလၢ ပှၤမူဒီး ပှၤသံအဖီခိၣ်န့ၣ် မ်အဆိၣ်ဂ့ၤ စီၤဘိၤဧးတက့ၢ်.”+ ဒီးနီၢ်နၤဧမံ ဆဲးတဲဝဲလၢ “ပိာ်ခွါတဂၤအံၤ ဒီဘူးဒီးပှၤလီၤ.+ အဝဲမ့ၢ်ပှၤလၢ ပှၤပှ့ၤက့ၤပှၤ အကျါတဂၤလီၤ.”+
၂၁ ဒီးနီၢ်ရူၤသးလၢအမ့ၢ် ပှၤမိၤအးမုၣ်ဖိန့ၣ် တဲဝဲလၢ “အဝဲတဲစ့ၢ်ကီးယၤလၢ ‘အိၣ်ဘူးဒီး ယပှၤကူးဘုဖိတဖၣ် တုၤလၢအဝဲသ့ၣ် ကူးယဘုဝံၤဝဲခဲလၢာ် တစုန့ၣ်တက့ၢ်.’”+
၂၂ နီၢ်နၤဧမံ တဲအဒဲၣ်မုၣ် နီၢ်ရူၤသးလၢ “ဖိမုၣ်ဧၢ, နလဲၤမၤတၢ်ဒီး ပှၤတဂၤအံၤ အပျဲၢ်မုၣ်သးစၢ်တဖၣ်န့ၣ် ဂ့ၤဒိၣ်န့ၢ်ဒံး နလဲၤမၤတၢ်လၢ စံာ်အဂၤလၢ ပှၤကမၤတံာ်တာ် နၤန့ၣ်လီၤ.”
၂၃ အဃိ အဝဲဆဲးပိာ်ဝဲ စီၤဘိၤဧး အပျဲၢ်မုၣ် သးစၢ်တဖၣ်အခံ ဒီးထၢဖှိၣ်တၢ်တုၤလၢ ပှၤကူးဘုမုယီၤ+ ဒီးဘုကၠူၣ် ဝံၤဝဲတစုလီၤ. ဒီးအဝဲဆဲးအိၣ်ဝဲဒီး အမံၤပှၢ်ပိာ်မုၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ဘုစဲၤ.”
^ အခီပညီလိၤလိၤ “တၢ်အဘူးအလဲလၢ အလၢအပှဲၤ.”
^ မ့ၢ်စ့ၢ်ကီး “၁၃ ကံလိဃၣ်ဃၣ်.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
