လီၣ်ဖျါ ၁၃:၁-၁၈
၁၃ ဒီးပယိၤ ဆၢထၢၣ်ဂၢၢ်ဂၢၢ်လၢ ပီၣ်လဲၣ်နံၤအမဲးခိၣ်လီၤ.
ဒီးယထံၣ်ဘၣ် ဆၣ်ဖိကီၢ်ဖိလၢအအၢတဒု+ ဟဲထီၣ်လၢ ပီၣ်လဲၣ်အပူၤလီၤ.+ ဒီးဆၣ်ဖိကီၢ်ဖိတဒုန့ၣ် အအိၣ်ဒီးအနၢၤ အဘိတဆံ ဒီးအခိၣ်သၣ်ဃံနွံဖျၢၣ်လီၤ. ဒီးလၢအနၢၤ တဘိစုာ်စုာ်အလိၤန့ၣ် အခိၣ်သလုးအိၣ်ဝဲ တဖျၢၣ်စုာ်စုာ်လီၤ. ဘၣ်ဆၣ် လၢအခိၣ်သၣ်ဃံတဖၣ်အလိၤန့ၣ် အိၣ်ဒီးမံၤတဖၣ်လၢ အကတိၤထီဒါ ကစၢ်ယွၤလီၤ.
၂ ဆၣ်ဖိကီၢ်ဖိလၢ အအၢတဒုန့ၣ် လီၤဂာ်ဒီးခ့စံၣ်ပိၣ် ဘၣ်ဆၣ်အခီၣ်န့ၣ် လီၤဂာ်ဒီး တၤသူအခီၣ် ဒီးအထးခိၣ်လီၤဂာ်ဒီး ခ့ယုၢ်အထးခိၣ်လီၤ. ဒီးပယိၤဟ့ၣ်လီၤဝဲ+ ဆၣ်ဖိကီၢ်ဖိလၢ အအၢတဒုအံၤလၢ တၢ်စိကမီၤ, လီၢ်ပစိာ် ဒီးတၢ်ခွဲးတၢ်ယာ်လၢ အကပၢတၢ်အဂီၢ်လီၤ.+
၃ ယထံၣ်လၢ အခိၣ်သၣ်ဃံတဖၣ် အကျါတဖျၢၣ်န့ၣ် ဖျါလၢအဘၣ်ဒိ ဘူးထီၣ်လၢ အကသံညါလီၤ. ဘၣ်ဆၣ် အတၢ်ပူၤလီၢ် ဘျါက့ၤဝဲလီၤ.+ ဒီးပှၤအိၣ်လၢ ဟီၣ်ခိၣ်ဒီဘ့ၣ် ကမၢကမၣ်ဝဲ ဒီးပိာ်ဝဲ ဆၣ်ဖိကီၢ်ဖိလၢ အအၢတဒုအံၤအခံလီၤ.
၄ ဒီးအဝဲသ့ၣ် ဘူၣ်ထီၣ်ဘါထီၣ်ပယိၤ မ့ၢ်လၢအဟ့ၣ်လီၤ ဆၣ်ဖိကီၢ်ဖိလၢ အအၢတဒုအံၤလၢ တၢ်စိတၢ်ကမီၤ ဒီးအဝဲသ့ၣ် ဘူၣ်ထီၣ်ဘါထီၣ်ဝဲ ဆၣ်ဖိကီၢ်ဖိလၢ အအၢတဒုအံၤ ဒီးတဲဝဲလၢ “မ့ၢ်မတဂၤလီၤဂာ်ဒီး ဆၣ်ဖိကီၢ်ဖိလၢ အအၢတဒုန့ၣ်လဲၣ်. ဒီးမ့ၢ်မတဂၤ ဟဲဒုးတၢ်ဒီးအီၤ ကသ့လဲၣ်.”
၅ ဒီးပယိၤဟ့ၣ်လီၤအီၤ ကိာ်ပူၤလၢ အတဲတၢ်ကတိၤလၢ အဒိၣ်အထီတဖၣ် ဒီးတၢ်ကတိၤထီဒါ ကစၢ်ယွၤလီၤ. ဒီးအဒိးန့ၢ်ဘၣ် တၢ်စိတၢ်ကမီၤ ဒ်သိးအကမၤတၢ် ၄၂ လါလီၤ.+
၆ ဒီးဆၣ်ဖိကီၢ်ဖိလၢ အအၢတဒုအံၤ အိးထီၣ် အကိာ်ပူၤလၢ တၢ်ကတိၤထီဒါ+ ကစၢ်ယွၤ ဒ်သိးကကတိၤထီဒါ ကစၢ်ယွၤအမံၤ, ကစၢ်ယွၤအတၢ်အိၣ်တၢ်ဆိးအလီၢ် ဒီးပှၤလၢ အအိၣ်ဝဲဆိးဝဲလၢ မူခိၣ်လီၤ.+
၇ ဒီးအဒိးန့ၢ်ဘၣ်အခွဲးလၢ အကဒုးပှၤစီဆှံတဖၣ် ဒီးမၤနၢၤအဝဲသ့ၣ်လီၤ.+ ဒီးအဒိးန့ၢ်ဘၣ် တၢ်စိတၢ်ကမီၤလၢ ကလုာ်ဒူၣ်ကိးဒူၣ်ဒဲး, ပှၤကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး ဒီးပှၤကိးကလုာ်ဒဲး အဖီခိၣ်လီၤ.
၈ ဒီးပှၤလၢအအိၣ်လၢ ဟီၣ်ခိၣ်ချၢခဲလၢာ်န့ၣ် ကဘူၣ်ထီၣ်ဘါထီၣ်အီၤလီၤ. စးထီၣ်ဖဲ တချုးလၢ ပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်လံၤလံၤန့ၣ်* အဝဲသ့ၣ်အမံၤ တဘၣ်တၢ်ကွဲးလီၤအီၤလၢ သိဖိလၢ အဘၣ်တၢ်မၤသံအီၤန့ၣ်+ အလံာ်မူပူၤ နီတဂၤဘၣ်.+
၉ ပှၤတဂၤဂ့ၤ တဂၤဂ့ၤ လၢအနၢ်ဟူတၢ်သ့န့ၣ် မ်အဒိကနၣ်တၢ် လီၤတံၢ်လီၤဆဲးတက့ၢ်.+
၁၀ ပှၤမ့ၢ်ကဘၣ်ဖီၣ် ပှၤတဂၤဂၤန့ၣ် ပှၤကဖီၣ်အီၤလီၤ. ပှၤတဂၤဂၤ မ့ၢ်မၤသံတၢ်လၢနးန့ၣ် အဝဲကဘၣ် တၢ်မၤသံအီၤလၢ နးလီၤ.+ လၢတၢ်ဂ့ၢ်အံၤအဃိ ပှၤစီဆှံတဖၣ်+ လိၣ်ဘၣ် တၢ်တူၢ်န့ၢ်ခီၣ်ကဲ+ ဒီးတၢ်နာ်လီၤ.+
၁၁ တၢ်န့ၣ်ဝံၤအလီၢ်ခံ ယထံၣ်ဘၣ် ဆၣ်ဖိကီၢ်ဖိလၢအအၢ အဂၤတဒုလၢ အဟဲထီၣ်လၢ ဟီၣ်ခိၣ်လီၤ. အအိၣ်ဒီးအနၢၤခံဘိ ဒ်သိဖိအနၢၤအသိး ဘၣ်ဆၣ် အတဲတၢ် ဒ်ပယိၤအသိးလီၤ.+
၁၂ ဒီးဆၣ်ဖိကီၢ်ဖိလၢ အအၢတဒုအံၤ သူဝဲတၢ်စိတၢ်ကမီၤ တမံၤဃီလၢအအိၣ်ဒီး ဆၣ်ဖိကီၢ်ဖိလၢအအၢ အဆိကတၢၢ်တဒုန့ၣ်လီၤ.+ ဒီးအသူဝဲ တၢ်စိတၢ်ကမီၤန့ၣ်လၢ ဆၣ်ဖိကီၢ်ဖိလၢအအၢ အဆိကတၢၢ်တဒုန့ၣ် အမဲာ်ညါလီၤ. ဒီးအမၢဆူၣ်ဟီၣ်ခိၣ် ဒီးပှၤလၢအအိၣ်လၢ ဟီၣ်ခိၣ်ချၢတဖၣ် ဒ်သိး ကဘူၣ်ထီၣ်ဘါထီၣ်ဝဲ ဆၣ်ဖိကီၢ်ဖိလၢအအၢ အဆိကတၢၢ်တဒုလၢ အဘၣ်ဒိဘူးထီၣ်လၢ အကသံညါ ဘၣ်ဆၣ် အတၢ်ပူၤလီၢ် ဘျါက့ၤဝဲလီၤ.+
၁၃ ဒီးဆၣ်ဖိကီၢ်ဖိလၢအအၢ တဒုအံၤ မၤဝဲတၢ်ပနီၣ်လီၤလးဖးဒိၣ်တဖၣ် တုၤဒၣ်လဲာ် အဒုးဟဲလီၤ မ့ၣ်အူလၢမူခိၣ် ဆူဟီၣ်ခိၣ်ချၢလၢ ပှၤဟီၣ်ခိၣ်ဖိတဖၣ် အမဲာ်ညါလီၤ.
၁၄ ဒီးအဆှၢကမၣ်ဝဲ ပှၤလၢအအိၣ်လၢ ဟီၣ်ခိၣ်ချၢတဖၣ် ခီဖျိလၢ တၢ်ပနီၣ်လီၤလးလၢ အဒိးန့ၢ်ဘၣ်အခွဲးလၢ အကမၤဝဲလၢ ဆၣ်ဖိကီၢ်ဖိလၢအအၢ အဆိကတၢၢ်တဒုန့ၣ် အမဲာ်ညါလီၤ. ဒီးအမၢစ့ၢ်ကီးဝဲ ပှၤလၢအအိၣ်လၢ ဟီၣ်ခိၣ်ချၢတဖၣ် ဒ်သိးကတ့ထီၣ် ဆၣ်ဖိကီၢ်ဖိလၢအအၢ လၢအဘၣ်တၢ်ကျီအီၤလၢနး ဘၣ်ဆၣ် ဘျါက့ၤဝဲတဒုန့ၣ်+ အဂီၤလီၤ.+
၁၅ ဒီးအဒိးန့ၢ်ဘၣ်အခွဲးလၢ အကအူနုာ်တၢ်မူ* လၢဆၣ်ဖိကီၢ်ဖိလၢ အအၢတဒုန့ၣ်အဂီၤအပူၤ ဒ်သိး ဆၣ်ဖိကီၢ်ဖိလၢ အအၢတဒုအဂီၤန့ၣ် ကတဲတၢ် ဒီးကဟ့ၣ်လီၤ တၢ်ကလုၢ်လၢ ပှၤကိးဂၤဒဲးလၢ အတဘူၣ်ထီၣ်ဘါထီၣ် ဆၣ်ဖိကီၢ်ဖိလၢ အအၢတဒုန့ၣ်အဂီၤဘၣ်န့ၣ် ကဘၣ်တၢ်မၤသံအီၤလီၤ.
၁၆ ဆၣ်ဖိကီၢ်ဖိလၢ အအၢတဒုန့ၣ် မၢဆူၣ်ဝဲပှၤခဲလၢာ်, ပၣ်ဃုာ်ဒီး ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤ, ပှၤထူးပှၤတီၤမ့ၢ်ဂ့ၤ, ပှၤအဖှီၣ်မ့ၢ်ဂ့ၤ, ကုၢ်မ့ၢ်ဂ့ၤ, ပှၤလၢအအိၣ်ဒီး တၢ်သဘျ့မ့ၢ်ဂ့ၤ ဒ်သိးအဝဲသ့ၣ် ကဒိးန့ၢ်ဘၣ် တၢ်ပနီၣ်လၢ အစုထွဲအလိၤ မ့တမ့ၢ် လၢအမဲာ်တူၢ်ခိၣ်လီၤ.+
၁၇ ဒီးပှၤလၢအတအိၣ်ဒီး တၢ်ပနီၣ် လၢအမ့ၢ် ဆၣ်ဖိကီၢ်ဖိလၢ အအၢတဒုန့ၣ်အမံၤ+ မ့တမ့ၢ် အမံၤအနီၣ်ဂံၢ်ဘၣ်န့ၣ်+ အဝဲသ့ၣ် ပှ့ၤတၢ်မ့ၢ်ဂ့ၤ, ဆါတၢ်မ့ၢ်ဂ့ၤ တန့ၢ်နီတဂၤဘၣ်.
၁၈ ပှၤလိၣ်ဘၣ် တၢ်ကူၣ်သ့ဒ်သိး ကနၢ်ပၢၢ် တၢ်ဂ့ၢ်အံၤအဂီၢ်လီၤ. ပှၤလၢအအိၣ်ဒီး တၢ်ကူၣ်တၢ်ဆးန့ၣ် မ်အဒွးဝဲ ဆၣ်ဖိကီၢ်ဖိလၢအအၢအံၤ အနီၣ်ဂံၢ်တက့ၢ်. နီၣ်ဂံၢ်အံၤမ့ၢ်ဝဲ ပှၤဟီၣ်ခိၣ်ဖိအနီၣ်ဂံၢ် ဒီးအနီၣ်ဂံၢ်မ့ၢ်ဝဲ ၆၆၆ လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “စးထီၣ်လၢ တၢ်ဒုးအိၣ်ထီၣ်ဟီၣ်ခိၣ်.”
^ အခီပညီလိၤလိၤ “တၢ်သါ.”
