လီၣ်ဖျါ ၂၂:၁-၂၁
၂၂ ဒီးမူခိၣ်ကလူး ဒုးနဲၣ်ယၤလၢ ထံမူအထံကျိလၢအဆှံဝဲ+ ဒ်လၢၢ်ဖျါကလၤအသိး ဟဲယွၤလီၤလၢ ကစၢ်ယွၤ ဒီးသိဖိအလီၢ်ပစိာ်+
၂ ဒီးအယွၤလီၤလၢ ဝ့ၢ်အကျဲမုၢ်ခိၣ် အခၢၣ်သးလီၤ. သ့ၣ်တၢ်မူတဖၣ်လၢ အသၣ်ထီၣ်ဝဲ တလါတဘျီ, တနံၣ် ၁၂ ဘျီန့ၣ် အိၣ်ဝဲလၢ ထံကျိအဃၢၤ ခံကပၤလၢာ်လီၤ. ဒီးသ့ၣ်အလၣ်တဖၣ်န့ၣ် မ့ၢ်ဝဲလၢ တၢ်ကမၤဘျါက့ၤ ပှၤကလုာ်တဖၣ် အဂီၢ်လီၤ.+
၃ ဒီးတၢ်ဆိၣ်အၢ တအိၣ်လၢၤဘၣ်. ကစၢ်ယွၤ ဒီးသိဖိ အလီၢ်ပစိာ်န့ၣ်+ ကအိၣ်ဝဲလၢ ဝ့ၢ်ပူၤလီၤ. ဒီးကစၢ်ယွၤ အကုၢ်တဖၣ် ကမၤ ကစၢ်ယွၤအတၢ်မၤစီဆှံလီၤ.
၄ အဝဲသ့ၣ်ကထံၣ် ကစၢ်ယွၤ အမဲာ်သၣ်+ ဒီးအမံၤကအိၣ်လၢ အဝဲသ့ၣ် အမဲာ်တူၢ်ခိၣ်လီၤ.+
၅ ဒီးမုၢ်နၤတအိၣ်လၢၤဘၣ်.+ ကစၢ်ယဟိဝၤယွၤ* ကဒုးကပီၤထီၣ် တၢ်ကပီၤလၢ အဝဲသ့ၣ်အဖီခိၣ်အဃိ+ အဝဲသ့ၣ်တလိၣ် မ့ၣ်အူဒၢအတၢ်ကပီၤ မ့တမ့ၢ် မုၢ်အတၢ်ကပီၤလၢၤဘၣ်. ဒီးအဝဲသ့ၣ်ကပၢတၢ် ဒ်စီၤပၤတဖၣ်အသိး လီၤထူလီၤယိာ်လီၤ.+
၆ မူခိၣ်ကလူး တဲဘၣ်ယၤလၢ “တၢ်ကတိၤတဖၣ်အံၤ ပှၤနာ်န့ၢ်အီၤသ့ ဒီးမ့ၢ်ဝဲတီဝဲလီၤ.+ ယဟိဝၤယွၤ လၢအမ့ၢ် ကစၢ်လၢ အထိၣ်ဟူးထိၣ်ဂဲၤထီၣ် ဝံတဖၣ်အသးန့ၣ်+ ဆှၢလီၤအမူခိၣ်ကလူး ဒ်သိးအကဒုးနဲၣ် အကုၢ်တဖၣ်လၢ တယံာ်တမီၢ် တၢ်လၢအကဘၣ် မၤအသးတဖၣ်လီၤ.
၇ ကွၢ်မီၤ, ယကဟဲချ့ချ့လီၤ.+ ပှၤလၢအမၤထွဲ ဝံအတၢ်ကတိၤတဖၣ်လၢ အအိၣ်လၢ လံာ်ထူအံၤအပူၤန့ၣ် ကသးခုဝဲလီၤ.”+
၈ ယၤ, စီၤယိၤဟၣ် ယမ့ၢ်ပှၤလၢအနၢ်ဟူ ဒီးထံၣ်တၢ်သ့ၣ်တဖၣ်အံၤလီၤ. ဖဲယနၢ်ဟူ ဒီးယထံၣ် တၢ်သ့ၣ်တဖၣ်အံၤအခါ ယထိၣ်လီၤပှီၤယသးလၢ မူခိၣ်ကလူးလၢ အဒုးနဲၣ်ယၤ တၢ်သ့ၣ်တဖၣ်အံၤ တဂၤန့ၣ်အခီၣ်ထံး ဒ်သိး ယကဘူၣ်ထီၣ်ဘါထီၣ်အီၤ အဂီၢ်လီၤ.
၉ ဘၣ်ဆၣ် အဝဲတဲဘၣ်ယၤလၢ “ပလီၢ်နသးသၢၤ, တဘၣ်မၤဒ်န့ၣ်တဂ့ၤ. ယမ့ၢ်ဒၣ် ကုၢ်ကဒဲကဒဲ ဒ်သိးဒီး နၤဒီးနဒီပုၢ်ဝဲၢ် ဝံတဖၣ် ဒီးပှၤလၢအမၤထွဲ တၢ်ကတိၤတဖၣ်လၢ အအိၣ်လၢ လံာ်ထူတဘ့ၣ်အံၤ အပူၤလီၤ. ဘူၣ်ထီၣ်ဘါထီၣ် ကစၢ်ယွၤဟီ.”+
၁၀ မူခိၣ်ကလူး တဲစ့ၢ်ကီးယၤလၢ “တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ် ဘူးထီၣ်လံ. အဃိ ဝံအတၢ်ကတိၤတဖၣ်လၢ အအိၣ်လၢ လံာ်ထူတဘ့ၣ်အံၤအပူၤန့ၣ် တဘၣ် ကးပံးဃာ်အီၤတဂ့ၤ.
၁၁ ပှၤလၢ အတတီတလိၤဘၣ်န့ၣ် မ်အဆဲးမၤ တၢ်တတီတလိၤဘၣ် ဒီးပှၤလၢ အဘၣ်အၢဘၣ်သီန့ၣ် မ်အဆဲးမၤတၢ်လၢ အဘၣ်အၢဘၣ်သီတက့ၢ်. မ့မ့ၢ် ပှၤတီပှၤလိၤန့ၣ် မ်အဆဲးမၤ တၢ်တီတၢ်လိၤ ဒီးပှၤလၢအစီဆှံန့ၣ် မ်အဆဲးအိၣ်စီဆှံ လၢကစၢ်ယွၤ အမဲာ်ညါတက့ၢ်.
၁၂ “‘ကွၢ်မီၤ, ယကဟဲချ့ချ့လီၤ. ယအိၣ်ကတဲာ်ကတီၤ ပာ်စၢၤယသးလၢ ယကဟ့ၣ်လီၤခိၣ်ဖးအဂီၢ်လံ ဒီးယကဟ့ၣ်ဆၢက့ၤ ပှၤတဂၤစုာ်စုာ် ဒ်အတၢ်မၤဒၣ်ဝဲ အသိးလီၤ.+
၁၃ ယမ့ၢ် ကဒီးဧ,*+ တၢ်အဆိကတၢၢ် ဒီးတၢ်အလီၢ်ခံကတၢၢ်, တၢ်အခီၣ်ထံး ဒီးတၢ်အကတၢၢ်လီၤ.
၁၄ ပှၤလၢ အဆှုၣ်အကူအကၤ+ ဒ်သိးအကအိၣ်ဒီး တၢ်ခွဲးတၢ်ယာ်လၢ ကလဲၤလၢ သ့ၣ်တၢ်မူတဖၣ်အအိၣ်+ ဒီးဒ်သိးအကလဲၤခီဖျိဘၣ် ဝ့ၢ်အတြဲၤတဖၣ်+ ဒီးနုာ်လီၤဘၣ်လၢ ဝ့ၢ်ပူၤအဂီၢ်န့ၣ် ကသးခုဝဲလီၤ.
၁၅ ထွံၣ်တဖၣ်,* ပှၤလၢအမၤတၢ်ဝံတၢ်နါ အတၢ်ဖံးတၢ်မၤ, ပှၤမၤကမၣ်မုၣ်ကမၣ်ခွါ,* ပှၤလၢအမၤသံပှၤဂၤ, ပှၤလၢအဘါတၢ်ဂီၤတၢ်ဖှီၣ် ဒီးကယဲၢ်ပှၤလၢ အအဲၣ်တၢ်လံၣ်တၢ်လီ ဒီးလံၣ်တၢ်လီတၢ် တလီၢ်လီၢ်န့ၣ်+ အိၣ်ဝဲလၢတၢ်ချၢလီၤ.’
၁၆ “‘ယၤ, ယ့ၣ်ၡူးအံၤ ယဆှၢလီၤ ယမူခိၣ်ကလူး ဒ်သိး ကအုၣ်အသးလၢနအိၣ် ဘၣ်ဃးဒီး တၢ်သ့ၣ်တဖၣ်အံၤလၢ တၢ်အိၣ်ဖှိၣ်တဖၣ် အဂီၢ်လီၤ. ယမ့ၢ်တၢ်အဂံၢ် ဒီးစီၤဒၤဝံးအချံအသၣ်+ ဒီးဆၣ်တူၢ်ဂီၤလၢ+ အကပြုၢ်ကပြီၤတဖျၢၣ်လီၤ.’”
၁၇ သးစီဆှံ ဒီးတလးမူးပိာ်မုၣ်+ ဆဲးတဲဝဲလၢ “ဟဲမီၤ.” ပှၤတဂၤဂ့ၤ တဂၤဂ့ၤ လၢအနၢ်ဟူဘၣ်ဝဲန့ၣ် မ်အတဲဝဲလၢ “ဟဲမီၤ.”+ ပှၤတဂၤဂ့ၤ တဂၤဂ့ၤ လၢအအဲၣ်ဒိးအီထံန့ၣ် မ်အဟဲတက့ၢ်. ဒီးပှၤတဂၤဂ့ၤ တဂၤဂ့ၤလၢ အဆၢဒိးန့ၢ်ဘၣ် ထံမူန့ၣ် မ်အဟံးန့ၢ်ကလီတက့ၢ်.+
၁၈ “ယအုၣ်ယသးလၢ ပှၤလၢအနၢ်ဟူ တၢ်ကတိၤတဖၣ်လၢ လံာ်ထူတဘ့ၣ်အံၤအပူၤ ကိးဂၤဒဲးအအိၣ်လီၤ. ပှၤတဂၤဂ့ၤ တဂၤဂ့ၤ မ့ၢ်ဖၢနုာ်အါထီၣ် တၢ်တမံၤမံၤလၢ တၢ်သ့ၣ်တဖၣ်အံၤအပူၤန့ၣ်+ ကစၢ်ယွၤကပာ်အါထီၣ် တၢ်နးတၢ်ဖှီၣ်တဖၣ်လၢ အအိၣ်ကွဲးအသးလၢ လံာ်ထူတဘ့ၣ်အံၤအပူၤန့ၣ် လၢအလိၤလီၤ.+
၁၉ ဒီးပှၤတဂၤဂ့ၤ တဂၤဂ့ၤ မ့ၢ်ထုးထီၣ်ကွံာ် တၢ်တမံၤမံၤလၢ ဝံအတၢ်ကတိၤတဖၣ်လၢ အအိၣ်လၢ လံာ်ထူတဘ့ၣ်အံၤအပူၤန့ၣ် ကစၢ်ယွၤကထုးထီၣ်ကွံာ် အဝဲသ့ၣ်အတၢ်ခွဲးတၢ်ယာ်လၢ အဘၣ် တၢ်ကွဲးဖျါထီၣ်အီၤလၢ လံာ်ထူတဘ့ၣ်အံၤ အပူၤလီၤ. အဃိ အဝဲသ့ၣ် တအီၣ်ဘၣ် သ့ၣ်မူတဖၣ်အသၣ်ဘၣ်+ ဒီးတလဲၤနုာ်ဘၣ်လၢ ဝ့ၢ်စီဆှံအပူၤဘၣ်.+
၂၀ “ပှၤတဂၤလၢ အအုၣ်အသး ဘၣ်ဃးဒီး တၢ်သ့ၣ်တဖၣ်အံၤန့ၣ် တဲဝဲလၢ ‘မ့ၢ်လီၤ, ယကဟဲချ့ချ့လီၤ.’”+
“အၤမ့ၣ်, ယကစၢ်ယ့ၣ်ၡူးဧၢ, ဟဲတက့ၢ်.”
၂၁ မ်ပှၤစီဆှံတဖၣ် ဒိးန့ၢ်ဘၣ် ကစၢ်ယ့ၣ်ၡူး အတၢ်သးကညီၤ ဒိၣ်ဒိၣ်မုၢ်မုၢ်တက့ၢ်.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ ကွၢ် တၢ်ဂ့ၢ်အဘျဲၣ်ဖဲ လီၣ်ဖျါ ၁:၈.
^ မ့ၢ်ဝဲ ပှၤလၢအမၤတၢ်လၢ အလီၤသးဘၣ်အၢလၢ ကစၢ်ယွၤအတၢ်ထံၣ်.
^ ကွၢ် တၢ်ကတိၤအခီပညီ. “တၢ်မၤကမၣ်မုၣ်ကမၣ်ခွါ.”
