လီၣ်ဖျါ ၃:၁-၂၂
၃ “ကွဲးန့ၢ်ဝ့ၢ်စၢ်ဒံ တၢ်အိၣ်ဖှိၣ်အကလူး ဒ်အံၤတက့ၢ်. ပှၤလၢအအိၣ်ဒီး ကစၢ်ယွၤအသးနွံဖျၢၣ်+ ဒီးဆၣ်နွံဖျၢၣ်န့ၣ်+ တဲဝဲလၢ ‘ယသ့ၣ်ညါ တၢ်လၢနမၤ ဒီးနအိၣ်ဒီးမံၤဂ့ၤသၣ်ဂ့ၤလၢ နမူလီၤ. ဘၣ်ဆၣ် အနီၢ်ကီၢ်န့ၣ် နသံလံ.+
၂ အိၣ်ပလီၢ်သး+ ဒီးတၢ်လၢအအိၣ်တ့ၢ်လၢ အဘူးထီၣ်ကသံသ့ၣ်တဖၣ်န့ၣ် မၤဆူၣ်ထီၣ် အဂံၢ်အဘါတက့ၢ်. ယတထံၣ်လၢ နမၤတၢ်မၤ လၢလၢပှဲၤပှဲၤလၢ ယကစၢ်ယွၤ အမဲာ်ညါဘၣ်.
၃ အဃိ သ့ၣ်နီၣ်ထီၣ်က့ၤတၢ်လၢ နဒိးန့ၢ်ဘၣ် ဒီးတၢ်လၢ နနၢ်ဟူဘၣ်တဖၣ်တက့ၢ်. ဒီးဆဲးမၤထွဲအီၤ ဒီးပီၢ်ယၢ်လီၤက့ၤ နသးတက့ၢ်.+ နမ့ၢ်တပၢၢ်ထီၣ်ဘၣ်န့ၣ် ယကဟဲ ဒ်တၢ်ဘျၣ်တဂၤအသိး+ ဒီးယကဟဲတုၤလၢနအိၣ် လၢအနၣ်ရံၣ်ဖဲလဲၣ်န့ၣ် တမ့ၢ်လၢ နကသ့ၣ်ညါ နီတစဲးဘၣ်.+
၄ “‘ဘၣ်ဆၣ် လၢဝ့ၢ်စၢ်ဒံအပူၤန့ၣ် သုဝဲလၢ အတမၤဘၣ်အၢ အတၢ်ကူတၢ်ကၤဘၣ်န့ၣ် အိၣ်ဝဲစှၤဂၤလီၤ.+ ဒီးအဝဲသ့ၣ်န့ၣ် ကဟးဒီးယၤ ဒီးကၤဝဲ တၢ်ကူတၢ်ကၤအဝါ+ မ့ၢ်လၢအဝဲသ့ၣ် ကြၢးဒီး တၢ်ခွဲးတၢ်ယာ်အံၤ အဃိလီၤ.
၅ မ့ၢ်လီၤ, ပှၤလၢအမၤနၢၤတၢ်န့ၣ်+ ကကူဝဲကၤဝဲ တၢ်ကူတၢ်ကၤအဝါ+ ဒီးလ့ၤတက့ၤ ယတထူးသံကွံာ် အမံၤလၢ လံာ်တၢ်မူအပူၤဘၣ်.+ လၢတၢ်န့ၣ်အလီၢ် ယကအၢၣ်လီၤတူၢ်လိာ် အမံၤလၢ ယပၢ်ဒီး အမူခိၣ်ကလူးတဖၣ် အမဲာ်ညါလီၤ.+
၆ ဒိကနၣ်တၢ်လၢ သးစီဆှံတဲဘၣ် တၢ်အိၣ်ဖှိၣ်တဖၣ် လီၤတံၢ်လီၤဆဲးတက့ၢ်.’
၇ “ကွဲးန့ၢ်ဝ့ၢ်ဖံၤလဒ့းလဖံ တၢ်အိၣ်ဖှိၣ်အကလူး ဒ်အံၤတက့ၢ်. ပှၤတဂၤလၢ အစီဆှံဝဲ,+ အမ့ၢ်ဝဲတီဝဲ+ ဒီးအအိၣ်ဒီး စီၤဒၤဝံးအသီးခွဲး+ ဒီးဖဲအဝဲအိးထီၣ် တြဲၤတဘ့ၣ်န့ၣ် ပှၤပံးအီၤ တန့ၢ်နီတဂၤဘၣ် ဒီးဖဲအပံးဝဲန့ၣ် ပှၤအိးထီၣ်အီၤ တန့ၢ်နီတဂၤဘၣ်န့ၣ် တဲဝဲလၢ
၈ ‘ယသ့ၣ်ညါတၢ်လၢ နမၤတဖၣ်လီၤ. ကွၢ်မီၤ, ယအိးထီၣ်ပာ်စၢၤ တြဲၤတဘ့ၣ်လၢနမဲာ်ညါ+ ဒီးပှၤပံးဃာ်အီၤ တန့ၢ်နီတဂၤဘၣ်. ယသ့ၣ်ညါလၢ နအိၣ်ဒီး တၢ်ဂံၢ်တၢ်ဘါတစဲး ဒီးနဒိကနၣ် ယကလုၢ် ဒီးနတီဒီးယၤလီၤ.
၉ မ့မ့ၢ် ပှၤတဒူၣ်လၢ အဘၣ်ဃးဒီး မုၣ်ကီၤလံၢ်* လၢအတဲလံၣ်တဲလီတၢ် ဒီးကိးလီၤအသးလၢ ပှၤယူဒၤဖိ ဘၣ်ဆၣ် တမ့ၢ်ပှၤယူဒၤဖိ အနီၢ်ကီၢ်ဘၣ်တဖၣ်န့ၣ်+ ကွၢ်မီၤ, ယကမၤဒ်သိး အဝဲသ့ၣ်ကဘၣ် ဟဲထိၣ်လီၤပှီၤအသးလၢ နခီၣ်ထံး ဒီးယကမၤဒ်သိး အဝဲသ့ၣ် ကသ့ၣ်ညါလၢ ယအဲၣ်နၤလီၤ.
၁၀ ဒီးမ့ၢ်လၢ သုကွၢ်လိမၤဒိး ယတၢ်တူၢ်န့ၢ်ခီၣ်ကဲအဃိ+ ယကဒီသဒၢသု ဖဲတၢ်မၤကွၢ်အဆၢကတီၢ်လၢ+ အကဟဲဘၣ် ဟီၣ်ခိၣ်ဒီဘ့ၣ်လီၤ. တၢ်မၤကွၢ်အဆၢကတီၢ်အံၤ မ့ၢ်ဒ်သိး ကမၤကွၢ်ပှၤအိၣ်လၢ ဟီၣ်ခိၣ်ချၢအဂီၢ်လီၤ.
၁၁ ယကဟဲချ့ချ့လီၤ.+ တၢ်လၢအအိၣ်ဒီးနၤန့ၣ် ဟံးဃာ်အီၤကျၢၤကျၢၤ ဒ်သိး ပှၤသုတဟံးထီၣ်ကွံာ် နခိၣ်သလုး နီတဂၤတဂ့ၤအဂီၢ်တက့ၢ်.+
၁၂ “‘ပှၤလၢအမၤနၢၤတၢ်န့ၣ် ယကဒုးကဲထီၣ်အီၤလၢ ဟံၣ်အထူၣ်တထူၣ်လၢ ယကစၢ်ယွၤ အတၢ်လုၢ်ဟံၣ်အပူၤ ဒီးလ့ၤတက့ၤ အဝဲတဟးထီၣ်လၢအပူၤ နီတဘျီလၢၤဘၣ်. ဒီးလၢပှၤတဂၤန့ၣ်အလိၤန့ၣ် ယကကွဲးလီၤ ယကစၢ်ယွၤအမံၤ+ ဒီးယရူၤၡလ့ၣ်အသီလၢ+ အဟဲလီၤလၢမူခိၣ်လၢ ယကစၢ်ယွၤအအိၣ် လၢအမ့ၢ် ယကစၢ်ယွၤအဝ့ၢ်န့ၣ်အမံၤ ဒီးယနီၢ်ကစၢ်အမံၤ+ လၢအသီတဖျၢၣ်န့ၣ်လီၤ.
၁၃ ဒိကနၣ်တၢ်လၢ သးစီဆှံတဲဘၣ် တၢ်အိၣ်ဖှိၣ်တဖၣ် လီၤတံၢ်လီၤဆဲးတက့ၢ်.’
၁၄ “ကွဲးန့ၢ်ဝ့ၢ်လီၤဒံၤကံ+ တၢ်အိၣ်ဖှိၣ်အကလူး ဒ်အံၤတက့ၢ်. ပှၤလၢ အဘၣ်တၢ်ကိးအီၤလၢ အၤမ့ၣ်+ လၢအမ့ၢ် ပှၤအုၣ်အသးလၢ+ အသးတီဒီးမ့ၢ်ဝဲတီဝဲတဂၤ+ ဒီးမ့ၢ်ဝဲ ကစၢ်ယွၤအတၢ်ဘၣ်တ့ အဆိကတၢၢ်န့ၣ်+ တဲဝဲလၢ
၁၅ ‘ယသ့ၣ်ညါတၢ်လၢ နမၤတဖၣ်လီၤ. နတချံၣ်ဘၣ် ဒီးနတကိၢ်စ့ၢ်ကီးဘၣ်. ယမုၢ်လၢ်လၢ နကချံၣ် မ့တမ့ၢ် နကကိၢ်လီၤ.
၁၆ မ့ၢ်လၢ နကလၢၤ ဒီးနတချံၣ်ဘၣ်+ ဒီးနတကိၢ်စ့ၢ်ကီးဘၣ်+ အဃိ ယကဘှိးထီၣ်နၤလၢ ယကိာ်ပူၤလီၤ.
၁၇ နတဲလၢ နကဲဒိၣ်+ ဒီးနဒိးန့ၢ်ဘၣ် တၢ်ထူးတၢ်တီၤတဖၣ်လံ ဒီးနတလိၣ်ဘၣ်တၢ် နီတမံၤဘၣ်. နီၢ်ကီၢ်န့ၣ် နမ့ၢ်ပှၤလၢ အသးအုး, အလီၤသးကညီၤ, အဖှီၣ်အယာ်, အမဲာ်တထံၣ်တၢ်ဘၣ် ဒီးအိၣ်ဘ့ၣ်ဆ့ သနာ်က့ နတသ့ၣ်ညါလီၤနသးဘၣ်.
၁၈ အဃိ ဒ်သိး နကထူးထီၣ်တီၤထီၣ်အဂီၢ် ယဟ့ၣ်ကူၣ်နၤလၢ နကပှ့ၤန့ၢ်ထူလၢ အဘၣ်တၢ်ပှံၢ်စီအီၤလၢ မ့ၣ်အူလၢယအိၣ်လီၤ. ဒီးဒ်သိး ပှၤသုတထံၣ်လၢ နအိၣ်ဘ့ၣ်ဆ့+ ဒီးနသုတဒိးန့ၢ်ဘၣ် တၢ်မဲာ်ဆှးတဂ့ၤအဂီၢ် ပှ့ၤန့ၢ်တၢ်ကူတၢ်ကၤ အဝါလၢ နကကူကၤအဂီၢ် လၢယအိၣ်တက့ၢ်. ဒီးပှ့ၤန့ၢ် မဲာ်ချံအကသံၣ် လၢယအိၣ် ဒ်သိးနကဖၢနုာ်လၢ နမဲာ်ချံအပူၤ+ ဒီးနကထံၣ်တၢ်အဂီၢ် န့ၣ်တက့ၢ်.+
၁၉ “‘ပှၤလၢယအဲၣ်န့ၣ် ယသိၣ်ဃီၣ် ဒီးသိၣ်က့ၤသီက့ၤအီၤ+ ကိးဂၤဒဲးလီၤ. အဃိ ပာ်ဖျါထီၣ်တၢ်သးဆူၣ် ဒီးပီၢ်ယၢ်လီၤက့ၤ နသးတက့ၢ်.+
၂၀ ကွၢ်မီၤ, ယဆၢထၢၣ်လၢ တြဲၤအခီၣ်ထံး ဒီးဒိတကျိာ်တၢ်လံ. ပှၤတဂၤဂၤ မ့ၢ်နၢ်ဟူ ယကလုၢ်ဒီးအိးထီၣ်တြဲၤန့ၣ် ယကဟဲနုာ်လီၤလၢ အဟံၣ်ပူၤ ဒီးယကအီၣ်သကိး ဟါတၢ်အီၣ် ဒီးအီၤလီၤ.
၂၁ ပှၤလၢအမၤနၢၤတၢ်န့ၣ်+ ယကပျဲ အဆ့ၣ်နီၤဒီးယၤလၢ ယလီၢ်ပစိာ်အလိၤ+ ဒ်ယမၤနၢၤတၢ်ဒီး ယဆ့ၣ်နီၤဒီးယပၢ်လၢ+ အလီၢ်ပစိာ်အလိၤ အသိးလီၤ.
၂၂ ဒိကနၣ်တၢ်လၢ သးစီဆှံတဲဘၣ် တၢ်အိၣ်ဖှိၣ်တဖၣ် လီၤတံၢ်လီၤဆဲးတက့ၢ်.’”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”
