လူၤကၣ် ၁၄:၁-၃၅
-
ပိာ်ခွါလၢအကဘုတဂၤ ဘၣ်တၢ်မၤဘျါက့ၤအီၤလၢ မုၢ်အိၣ်ဘှံးနံၤ (၁-၆)
-
ကဲထီၣ်ပှၤတမှံၤလၢ အဆီၣ်လီၤသး (၇-၁၁)
-
ကွဲမုာ်ပှၤလၢ အဟ့ၣ်ဆၢက့ၤနၤ တၢ်တအိၣ်နီတမံၤဘၣ် (၁၂-၁၄)
-
တၢ်ကတိၤဒိဘၣ်ဃးဒီး ပှၤတမှံၤလၢ အတဟဲဘၣ်တဖၣ် (၁၅-၂၄)
-
ကဘၣ်တူၢ်ၡူကွံာ်တၢ်ဒ်သိး ကကဲထီၣ် ယ့ၣ်ၡူးအပျဲၢ်အဘီၣ်အဂီၢ် (၂၅-၃၃)
-
အံသၣ်လၢ အတဟီလၢၤဘၣ် (၃၄, ၃၅)
၁၄ ဘၣ်တဘျီန့ၣ် ယ့ၣ်ၡူးလဲၤအီၣ်တၢ်လၢ ပှၤဖၤရံၤၡဲအခိၣ် တဂၤအဟံၣ် လၢမုၢ်အိၣ်ဘှံးနံၤ ဒီးအဝဲသ့ၣ်ကွၢ်ထံအီၤလီၤ.
၂ ဖဲန့ၣ် ပှၤလၢအကဘုတဂၤ အိၣ်ဝဲလၢအမဲာ်ညါလီၤ.
၃ အဃိ ယ့ၣ်ၡူးသံကွၢ် ပှၤလၢအသ့ စီၤမိၤၡ့ အတၢ်သိၣ်တၢ်သီ ဒီးပှၤဖၤရံၤၡဲတဖၣ်လၢ “ပှၤမ့ၢ် မၤဘျါက့ၤတၢ်လၢ မုၢ်အိၣ်ဘှံးနံၤန့ၣ် ကြၢးမ့ၢ်တကြၢးဘၣ်လဲၣ်.”+
၄ ဘၣ်ဆၣ် အဝဲသ့ၣ် အိၣ်ဘှ့ၣ်ဝဲလီၤ. အဃိ ယ့ၣ်ၡူးထိးဘၣ် ပိာ်ခွါတဂၤအံၤဒီး မၤဘျါအီၤဝံၤ ပျဲက့ၤအီၤလီၤ.
၅ ဝံၤဒီး ယ့ၣ်ၡူးတဲဘၣ် အဝဲသ့ၣ်လၢ “ပှၤလၢသုကျါလၢ အဖိခွါ မ့တမ့ၢ် အကျီၢ် မ့ၢ်လီၤတဲာ်လၢ ထံကမျၢပူၤ*+ လၢမုၢ်အိၣ်ဘှံးနံၤဒီး တလဲၤထုးထီၣ်ဝဲ တဘျီဃီဘၣ်န့ၣ် အိၣ်တဂၤဂၤဧါ.”+
၆ ဒီးအဝဲသ့ၣ် တဲဆၢက့ၤအီၤ တဘၣ်နီတဂၤဘၣ်.
၇ ဖဲယ့ၣ်ၡူး ပာ်သူၣ်ပာ်သးဝဲလၢ ပှၤလၢအဘၣ် တၢ်ကွဲမုာ်အီၤတဖၣ် ဃုထၢဝဲ တၢ်လီၢ်လၢ အဂ့ၤကတၢၢ် လၢအနီၢ်ကစၢ်အဂီၢ်အခါ+ အဝဲတဲအဝဲသ့ၣ် တၢ်ကတိၤဒိတခါလီၤ. အဝဲတဲအဝဲသ့ၣ်လၢ
၈ “ပှၤတဂၤဂၤ မ့ၢ်ကွဲမုာ်နၤလၢ အတၢ်ဖျီအမူးန့ၣ် တဘၣ်ဆ့ၣ်နီၤလၢ တၢ်လီၢ်လၢ အဂ့ၤကတၢၢ်တဂ့ၤ.+ ဘၣ်သ့ၣ်သ့ၣ် ပှၤလၢ အရ့ဒိၣ်န့ၢ်နၤတဂၤဂၤ ဘၣ်တၢ်ကွဲမုာ်အီၤ စ့ၢ်ကီးလီၤ.
၉ ဒီးပှၤလၢအကွဲမုာ် သုခံဂၤလၢာ်န့ၣ် ကဟဲတဲဘၣ်နၤလၢ ‘ပှၤတဂၤအံၤ ကဘၣ်ဆ့ၣ်နီၤဖဲအံၤအဃိ ပျဲန့ၢ်အလီၢ်မီၤ.’ ဒီးလၢတၢ်မဲာ်ဆှးအပူၤ နကဘၣ်လဲၤဆ့ၣ်နီၤလၢ တၢ်လီၢ်လၢ အပတီၢ်ဖုၣ်ကတၢၢ်လီၤ.
၁၀ အဃိ ဖဲပှၤကွဲမုာ်နၤအခါ လဲၤဆ့ၣ်နီၤလၢ တၢ်လီၢ်လၢ အပတီၢ်ဖုၣ်ကတၢၢ်တက့ၢ်. ဒီးဖဲပှၤလၢ အကွဲမုာ်နၤတဂၤ ဟဲလၢနအိၣ်အခါ အဝဲကတဲနၤလၢ ‘သကိးဧၢ, လဲၤထီၣ်လၢ တၢ်လီၢ်လၢ အပတီၢ်ထီမီၤ.’ ဖဲန့ၣ် နကဒိးန့ၢ်ဘၣ် တၢ်လၤတၢ်ကပီၤလၢ ပှၤတမှံၤအဂၤခဲလၢာ် အမဲာ်ညါလီၤ.+
၁၁ ပှၤကိးဂၤဒဲးလၢ အပာ်ထီၣ်ထီ အသးန့ၣ် တၢ်ကဆီၣ်လီၤအီၤလီၤ. ဒီးပှၤလၢ အဆီၣ်လီၤအသးန့ၣ် ကဘၣ်တၢ်ပာ်ထီၣ်ထီအီၤလီၤ.”+
၁၂ ဝံၤဒီး ယ့ၣ်ၡူးတဲစ့ၢ်ကီး ပှၤလၢ အကွဲမုာ်အီၤလၢ “ဖဲနကွဲမုာ်ပှၤလၢ မုၢ်ဆါခီတၢ်အီၣ် မ့တမ့ၢ် ဟါခီတၢ်အီၣ်အခါ တဘၣ်ကွဲမုာ် နသကိးတဖၣ်, နဒီပုၢ်ဝဲၢ်တဖၣ်, နဘူးနတံၢ် ဒီးပှၤလၢနခိၣ်နဃၢၤလၢ အကဲဒိၣ်တဖၣ်တဂ့ၤ. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် အဝဲသ့ၣ် ကကွဲမုာ်ကဒါက့ၤနၤ ဒ်သိး ကဟ့ၣ်ဆၢက့ၤနၤ အဂီၢ်လီၤ.
၁၃ ဖဲနမၤတၢ်အီၣ်တၢ်အီ အမူးအခါ ကွဲမုာ်ပှၤဖှီၣ်ဖိယာ်ဖိ, ပှၤလၢ အစုတဂ့ၤခီၣ်တဂ့ၤ, ပှၤလၢအခီၣ်ဟးဂီၤ ဒီးပှၤလၢအမဲာ် တထံၣ်တၢ်တဖၣ်တက့ၢ်.+
၁၄ ခီဖျိလၢ အဝဲသ့ၣ် ဟ့ၣ်ဆၢက့ၤနၤ တၢ်တအိၣ် နီတမံၤဘၣ်အဃိ နကသးခုလီၤ. ဒီးဖဲပှၤတီပှၤလိၤ ဂဲၤဆၢထၢၣ် သမူထီၣ်က့ၤအခါ ကစၢ်ယွၤ ကဟ့ၣ်ဆၢက့ၤနၤလီၤ.”+
၁၅ ဖဲပှၤလၢ ပှၤတမှံၤအကျါတဂၤ နၢ်ဟူဘၣ်ဝဲ တၢ်ဂ့ၢ်တဖၣ်အံၤအခါ အဝဲတဲဘၣ် ယ့ၣ်ၡူးလၢ “ပှၤလၢအအီၣ်တၢ်* လၢကစၢ်ယွၤ အဘီမုၢ်အပူၤန့ၣ် ကသးခုဝဲလီၤ.”
၁၆ ယ့ၣ်ၡူး တဲဘၣ်အီၤလၢ “ပှၤတဂၤ မၤဝဲတၢ်အီၣ်အမူးဖးဒိၣ်*+ ဒီးအဝဲကွဲမုာ်ဝဲ ပှၤအါမးလီၤ.
၁၇ ဖဲတၢ်ဆၢကတီၢ်ဘၣ်လၢ ကအီၣ်တၢ်အခါ အဝဲဆှၢလီၤဝဲ အကုၢ်တဂၤ ဒ်သိးကလဲၤ တဲဘၣ်ပှၤလၢ အဘၣ် တၢ်ကွဲမုာ်အီၤတဖၣ်လၢ ‘ဟဲမီၤ, တၢ်ခဲလၢာ် အိၣ်ကတဲာ်ကတီၤ အသးလံ.’
၁၈ ဘၣ်ဆၣ် အဝဲသ့ၣ် ကိးဂၤဒဲးန့ၣ် တဲပူၤဖျဲးအသးလီၤ.+ ပှၤအဆိကတၢၢ် တဂၤန့ၣ် တဲအီၤလၢ ‘ယပှ့ၤ ဟီၣ်ခိၣ်တကဝီၤ ဒီးယဘၣ် လဲၤကွၢ်အီၤလီၤ. အဃိ ဝံသးစူၤ, ယလဲၤတသ့ဘၣ်.’
၁၉ အဝဲတဂၤ တဲဝဲလၢ ‘ယပှ့ၤ ကျီၢ်ယဲၢ်ခိၣ်* ဒီးယဘၣ် လဲၤကွၢ်အီၤလီၤ. အဃိ ဝံသးစူၤ, ယလဲၤတသ့ဘၣ်.’+
၂၀ ဒီးအဝဲတဂၤန့ၣ် တဲဝဲလၢ ‘ယဖျီယသးဝံၤ သီသီအဃိ ယလဲၤတသ့ဘၣ်.’
၂၁ အဃိ ကုၢ်တဂၤန့ၣ် က့ၤတဲဘၣ် အကစၢ်လၢ တၢ်ဂ့ၢ်တဖၣ်အံၤလီၤ. အဃိ ဟံၣ်ကစၢ်န့ၣ် အသးဒိၣ်ထီၣ်တၢ် ဒီးတဲဘၣ်အကုၢ်လၢ ‘လဲၤလၢ ကျဲမုၢ်ခိၣ် ဒီးလၢကျဲဖိလၢဝ့ၢ်ပူၤချ့ချ့ ဒီးဟဲက့ၤကိး ပှၤဖှီၣ်ဖိယာ်ဖိ, ပှၤလၢအစုတဂ့ၤခီၣ်တဂ့ၤ, ပှၤလၢအမဲာ် တထံၣ်တၢ်တဖၣ် ဒီးပှၤလၢအခီၣ်ဟးဂီၤတက့ၢ်.’
၂၂ လၢခံန့ၣ် ကုၢ်ဟဲက့ၤတဲဝဲလၢ ‘ကစၢ်ဧၢ, ဒ်နမၤလိာ်အသိးန့ၣ် ယမၤဝံၤလံ ဘၣ်ဆၣ် တၢ်လီၢ်တြီၢ်ဒံးလီၤ.’
၂၃ အဃိ ကစၢ်တဲဘၣ်ကုၢ်လၢ ‘လဲၤလၢ ကျဲတဖၣ် ဒီးကျဲအံၣ်အံၣ်ဖိတဖၣ် ဒီးမၢအဝဲသ့ၣ်ဟဲ ဒ်သိးယဟံၣ် ကပှဲၤအဂီၢ်တက့ၢ်.+
၂၄ ယကတဲဘၣ်သုလၢ ပှၤလၢအဘၣ်တၢ်ကွဲမုာ်အီၤ အဆိကတၢၢ်တဖၣ်န့ၣ် တအီၣ်ဘၣ် ယဟါတၢ်အီၣ် နီတဂၤဘၣ်.’”+
၂၅ ဒီးပှၤဂီၢ်မုၢ်ဖးဒိၣ်လဲၤတၢ်ဒီး ယ့ၣ်ၡူးလီၤ. အဝဲဃၣ်ဃီၤအသး ဒီးတဲဘၣ် အဝဲသ့ၣ်လၢ
၂၆ “ပှၤတဂၤဂၤ မ့ၢ်ဟဲလၢယအိၣ် ဒီးမ့ၢ်တသးဟ့* အမိၢ်, အပၢ်, အမါ, အဖိတဖၣ်, အဒီပုၢ်ဝဲၢ်မုၣ်တဖၣ်, အဒီပုၢ်ဝဲၢ်ခွါတဖၣ် ဒီးအနီၢ်ကစၢ် အသးသမူဘၣ်န့ၣ်+ အကဲထီၣ်ယပျဲၢ်ယဘီၣ် တသ့ဘၣ်.+
၂၇ ပှၤလၢ အတယိးထီၣ် အနီၢ်ကစၢ် အတၢ်မၤအၢမၤနး အသ့ၣ်တၢၣ်* ဒီးဟဲပိာ်ယခံဘၣ်န့ၣ် ကဲထီၣ် ယပျဲၢ်ယဘီၣ် တသ့ဘၣ်.+
၂၈ အဒိ ပှၤလၢသုကျါလၢ အအဲၣ်ဒိး သူၣ်ထီၣ်တၢး ဒီးတဆ့ၣ်နီၤ ဒွးဆိဝဲ အတၢ်လၢာ်ဘူၣ်လၢာ်စ့ၤ ဒ်သိး ကသ့ၣ်ညါဝဲလၢ အစ့ကယၢဧါ တယၢဧါန့ၣ်* အိၣ်တဂၤဂၤဧါ.
၂၉ အဝဲမ့ၢ်တမၤဝဲ ဒ်န့ၣ်ဘၣ်န့ၣ် အဝဲကပာ်လီၤဝဲ တၢ်အခီၣ်ထံး ဘၣ်ဆၣ် ဘၣ်သ့ၣ်သ့ၣ် အတ့ထီၣ်တၢး တုၤလၢအဝံၤ တန့ၢ်ဘၣ်. ဖဲန့ၣ် ပှၤလၢအခိးကွၢ်တၢ် ကိးဂၤဒဲး ကဒုၣ်ဒွဲၣ်အီၤ
၃၀ ဒီးကတဲဝဲလၢ ‘ပှၤတဂၤအံၤ စးထီၣ်တ့ထီၣ်တၢ် ဘၣ်ဆၣ် အမၤဝံၤဝဲတန့ၢ်ဘၣ်.’
၃၁ အဂၤတမံၤန့ၣ် ဖဲစီၤပၤတဂၤ ကလဲၤဒုး စီၤပၤလၢ အဂၤတဂၤအခါ မ့ၢ်အပှၤသုးဖိ ၁၀,၀၀၀ န့ၣ် ဒုးဝဲစီၤပၤ အဝဲတဂၤ အပှၤသုးဖိအဂၤ ၂၀,၀၀၀ ကနၢၤဧါတနၢၤဧါန့ၣ် အဝဲကဆ့ၣ်နီၤ တၢၣ်ပီၣ်တၢၣ်ပီဆိဝဲ တမ့ၢ်ဧီၤ.
၃၂ အဝဲဒုးဝဲ မ့ၢ်တနၢၤဘၣ်န့ၣ် ဖဲစီၤပၤအဝဲတဂၤ အိၣ်ဒံးလၢအယံၤအခါ အဝဲကဆှၢလီၤဆိဝဲ အပှၤခၢၣ်စးတဖု ဒ်သိးကဃ့ တၢ်ဃူတၢ်ဖိးအဂီၢ်လီၤ.
၃၃ ဒ်န့ၣ်အသိး သုနာ်သ့ သပှၢ်ကတၢၢ်လၢ သုမ့ၢ်တပာ်တ့ၢ်ကွံာ် တၢ်လၢအအိၣ်ဒီးသု ခဲလၢာ်ဘၣ်န့ၣ် သုကဲထီၣ် ယပျဲၢ်ယဘီၣ် တသ့နီတဂၤဘၣ်.+
၃၄ “အံသၣ်န့ၣ်ဂ့ၤဝဲ သပှၢ်ကတၢၢ်လီၤ. ဘၣ်ဆၣ် အံသၣ်အံၤ မ့ၢ်တဟီလၢၤဘၣ်န့ၣ် အဟီထီၣ်က့ၤ ကသ့ဒ်လဲၣ်.+
၃၅ အံသၣ်အံၤတဂ့ၤလၢ ဟီၣ်ခိၣ် ဒီးဟီၣ်ခိၣ်ညၣ်ထ့ၣ် အဂီၢ်လၢၤဘၣ်. ဒီးပှၤကတၢၤကွံာ်အီၤလီၤ. ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ် ထံထံတက့ၢ်.”+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “ထံပူၤ.”
^ အခီပညီလိၤလိၤ “အီၣ်ကိၣ်.”
^ အခီပညီလိၤလိၤ “ဟါတၢ်အီၣ်.”
^ မ့ၢ်စ့ၢ်ကီး “ကျီၢ်ယဲၢ်စူၣ်.”
^ မ့ၢ်စ့ၢ်ကီး “အဲၣ်ဝဲစှၤန့ၢ်ဒံး.”
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “လၢဧါ တလၢဧါ.”
