ဧ့စြၤ ၆:၁-၂၂
၆ ဒီးစီၤပၤ ဒၤရယါဝ့ၣ် ဟ့ၣ်လီၤတၢ်ကလုၢ်လၢ ပှၤကဃုကွၢ်တၢ်လၢ တၢ်ကွဲးနီၣ်ကွဲးဃါအဟံၣ် ဖဲပှၤပာ်ဃာ် ဘၤဘူၤလိၣ် အတၢ်လုၢ်ဒိၣ်ပှ့ၤဒိၣ်တဖၣ် အလီၢ်လီၤ.
၂ ဒီးပှၤထံၣ်န့ၢ် လံာ်ထူတထူလၢနီပူၤ ဖဲဝ့ၢ်အၤဃမသါလၢ မၤဒဲကီၢ်ရ့ၣ်အပူၤ ဒီးလံာ်ထူအိၣ်ဒီး တၢ်ကွဲးအသး ဒ်လၢ လာ်အံၤ အသိးလီၤ.
၃ “ဖဲစီၤပၤကိရ့ၣ် ပၢတၢ် အဆိကတၢၢ်တနံၣ်န့ၣ် ဘၣ်ဃးဒီး ကစၢ်ယွၤ အဟံၣ်လၢ ဝ့ၢ်ယရူၤၡလ့ၣ်န့ၣ် အဝဲဟ့ၣ်လီၤ တၢ်ကလုၢ်လၢ+ ‘မၢပှၤယူဒၤဖိတဖၣ် သူၣ်ထီၣ်က့ၤ ဟံၣ်တဖျၢၣ်န့ၣ် ဒ်သိးအဝဲသ့ၣ် ကလုၢ်ထီၣ်တၢ်အဂီၢ် တက့ၢ်. မၢအဝဲသ့ၣ် ဆီလီၤက့ၤ ဟံၣ်တဖျၢၣ်အံၤ အခီၣ်ထံး ဖဲအလီၢ်န့ၣ်တက့ၢ်. ဟံၣ်တဖျၢၣ်အံၤ အကစီၤထီၣ်ထီ ကဘၣ်အိၣ်ဝဲ အပျၢ်* ၆၀ ဒီးအလဲၢ်ကဘၣ်အိၣ်ဝဲ အပျၢ် ၆၀ လီၤ.+
၄ ဒီးတၢ်ဒူၣ်တဖၣ် ကဘၣ် တၢ်မၤအီၤလၢ လၢၢ်ဖးဒိၣ်သၢဂ့ၢ် ဒီးသ့ၣ်ဘၣ် တဂ့ၢ်လၢ အဖီခိၣ်လီၤ.+ ဒီးပှၤကဘၣ် ထုးထီၣ် တၢ်လၢာ်ဘူၣ်လၢာ်စ့ၤတဖၣ် လၢစီၤပၤ အစ့ပာ်ဖှိၣ် အလီၢ်လီၤ.+
၅ ဒီးကစၢ်ယွၤအဟံၣ် အတၢ်ပီးတၢ်လီ လၢပှၤတ့အီၤလၢ ထူဒီးစ့တဖၣ် လၢစီၤနဘူၤကးန့စၢ် ဟံးန့ၢ်ဝဲလၢ ယရူၤၡလ့ၣ် အတၢ်လုၢ်ဟံၣ် ဒီးဟဲက့ၤစိာ်ဝဲလၢ ဘၤဘူၤလိၣ်န့ၣ်+ ပှၤကဘၣ် က့ၤပာ်လီၤအီၤလၢ အလီၢ် လၢကစၢ်ယွၤ အဟံၣ်ပူၤလီၤ.’+
၆ “အဃိ ပဒိၣ်ဖးဒိၣ် စီၤတးနဲလၢ အပၢဟီၣ်ကဝီၤလၢ ထံကျိ* ဝၢ်ဘးခီ ဒီးစီၤၡသၢ်ဘိစနဲၤ ဒီးနသကိးတဖၣ် လၢအမ့ၢ် ပဒိၣ်ပပှၢ်လၢ အဆံးတဖၣ်လၢ အပၢတၢ်လၢ ထံကျိဝၢ်ဘးခီသ့ၣ်ဧၢ,+ လဲၤမၤဘူး တၢ်လီၢ်အဝဲန့ၣ် နီတစဲးတဂ့ၤ.
၇ တဘၣ်မၤတံာ်တာ် ပှၤလၢအမၤတၢ်လၢ ကစၢ်ယွၤ အဟံၣ်န့ၣ် တဂ့ၤ. ပှၤယူဒၤဖိတဖၣ် အပဒိၣ်ဖးဒိၣ် ဒီးပှၤယူဒၤဖိ အပှၤသူၣ်က့သးပှၢ်တဖၣ်န့ၣ် ကက့ၤသူၣ်ထီၣ်က့ၤ ကစၢ်ယွၤအဟံၣ် ဖဲအလီၢ်လီၢ်လီၤ.
၈ တကးဒံးဘၣ် ခဲအံၤန့ၣ် ယဟ့ၣ်လီၤ တၢ်ကလုၢ်လၢ သုကဘၣ်မၤစၢၤ ပှၤယူဒၤဖိ အပှၤသူၣ်က့သးပှၢ်တဖၣ်လၢ အက့ၤတ့ထီၣ် ကစၢ်ယွၤ အဟံၣ်လီၤ. အဃိ တၢ်ခိတၢ်သွဲလၢ ပှၤထၢအီၤလၢထံကျိဝၢ်ဘးခီ ဒီးပှၤပာ်အီၤလၢ စီၤပၤ အတၢ်လုၢ်ဒိၣ်ပှ့ၤဒိၣ် အလီၢ်ပူၤန့ၣ်+ သုကဘၣ် ဟ့ၣ်လီၤ ပှၤသ့ၣ်တဖၣ်အံၤ လၢအဆိအချ့ ဒ်သိး အဝဲသ့ၣ် ဆဲးမၤတၢ်မၤ ဘျ့ဘျ့ဆှီဆှီ ကသ့အဂီၢ်လီၤ.+
၉ ဒီးသုကဘၣ်ဟ့ၣ်လီၤ ပှၤလုၢ်တၢ်ဒိၣ်တဖၣ်လၢ ဝ့ၢ်ယရူၤၡလ့ၣ် လၢကျီၢ်ဖါဖိ,+ သိဖါ+ ဒီးသိဖိတဖၣ်+ လၢတၢ်လုၢ်ဒွဲၣ်အူ လၢမူခိၣ်အကစၢ်အဂီၢ် ဒီးဘုကၠူၣ်,+ အံသၣ်,+ စပံးထံ,+ သိဧိၤချါဧိၤ+ ဒ်အဝဲသ့ၣ် ဃ့ဝဲအသိးလီၤ. တၢ်လၢအဝဲသ့ၣ် လိၣ်ဘၣ်ဝဲတဖၣ်အံၤန့ၣ် သုကဘၣ်ဟ့ၣ်လီၤ အဝဲသ့ၣ် ကိးနံၤဒဲး သပှၢ်ကတၢၢ်လီၤ.
၁၀ ဒီးအဝဲသ့ၣ် ကဆဲးလုၢ်ထီၣ်ဘၣ် တၢ်လုၢ်လၢ အမၤမုာ် မူခိၣ်အကစၢ်အသး ဒီးကဃ့ထုကဖၣ်န့ၢ်တၢ်လၢ စီၤပၤ ဒီးအဖိခွါတဖၣ် ကအိၣ်မူဘၣ် ဖးယံာ်အဂီၢ်လီၤ.+
၁၁ ယဟ့ၣ်လီၤစ့ၢ်ကီး တၢ်ကလုၢ်လၢ ပှၤလၢ အမၤကမၣ် တၢ်သိၣ်တၢ်သီ တခါအံၤန့ၣ် ပှၤကဘၣ်ထုးထီၣ် သ့ၣ်တကျီၣ်လၢ အဟံၣ်ပူၤ ဒီးပှၤကဘၣ် ပျၤထီအီၤလၢ သ့ၣ်တကျီၣ်အံၤ အလိၤ ဒီးအဟံၣ်န့ၣ် ကကဲထီၣ် တၢ်ဟးလီၢ်လၢ ကမျၢၢ်အဂီၢ် ခီဖျိလၢ အမၤကမၣ်တၢ် ဒ်အံၤအဃိလီၤ.
၁၂ စီၤပၤတဂၤဂၤမ့ၢ်ဂ့ၤ ပှၤတဒူၣ်ဒူၣ်မ့ၢ်ဂ့ၤ မ့ၢ်မၤကမၣ် တၢ်သိၣ်တၢ်သီတခါအံၤ ဒ်သိး ကမၤဟးဂီၤ ကစၢ်ယွၤ အဟံၣ်လၢ ဝ့ၢ်ယရူၤၡလ့ၣ် အဂီၢ်န့ၣ် မ်ကစၢ်ယွၤလၢ အဒုးအိၣ်ဒုးဆိး အမံၤဖဲန့ၣ်န့ၣ်+ မၤဟးဂီၤကွံာ် အဝဲသ့ၣ်တက့ၢ်. ယမ့ၢ် စီၤဒၤရယါဝ့ၣ်လၢ အဟ့ၣ်လီၤ တၢ်ကလုၢ်န့ၣ်လီၤ. ယၤ, စီၤဒၤရယါဝ့ၣ် ဟ့ၣ်လီၤတၢ်ကလုၢ်လံ. မ်ပှၤမၤထွဲအီၤလၢ အဆိအချ့တက့ၢ်.”
၁၃ ပဒိၣ်ဖးဒိၣ် စီၤတးနဲလၢ အပၢဟီၣ်ကဝီၤလၢ ထံကျိဝၢ်ဘးခီ ဒီးစီၤၡသၢ်ဘိစနဲၤ+ ဒီးအသကိးတဖၣ်န့ၣ် မၤထွဲဝဲတၢ်ခဲလၢာ်ဒ် စီၤပၤဒၤရယါဝ့ၣ် ဟ့ၣ်လီၤတၢ်ကလုၢ်အသိး တဘျီဃီလီၤ.
၁၄ ဒီးမ့ၢ်လၢ ဝံဃးကဲ+ ဒီးစီၤဧံးဒိၤ အလံၤခွါ စီၤစကၤရယၤ+ တဲတၢ်ဒ်ဝံအသိး ဒီးကဲထီၣ်တၢ်ဟ့ၣ်ဂံၢ်ဟ့ၣ်ဘါ အဃိ ယူဒၤ အပှၤသူၣ်က့သးပှၢ်တဖၣ် ဆဲးသူၣ်ထီၣ်တၢ် ဒီးအဝဲသ့ၣ်အတၢ်မၤ လဲၤထီၣ်လဲၤထီဝဲ ကွ့ၢ်ကွ့ၢ်လီၤ.+ ဒီးမ့ၢ်လၢ အံၣ်စရ့လး အကစၢ်ယွၤ ဟ့ၣ်လီၤတၢ်ကလုၢ်+ ဒီးစီၤကိရ့ၣ်,+ စီၤဒၤရယါဝ့ၣ်+ ဒီးဖၢၡၢၣ် အစီၤပၤ အၢ်တၤၡါၡတၤ+ ဟ့ၣ်လီၤတၢ်ကလုၢ်အဃိ အဝဲသ့ၣ် သူၣ်ထီၣ်တၢ် ဝံၤဝဲလီၤ.
၁၅ အဝဲသ့ၣ် သူၣ်ထီၣ်ဝဲ ဟံၣ်တဖျၢၣ်အံၤ ဝံၤဝဲဖဲ စီၤပၤဒၤရယါဝ့ၣ် ပၢတၢ် ဃုနံၣ်တနံၣ်, လါအးဒၢ်* သၢသီတသီလီၤ.
၁၆ ပှၤအံၣ်စရ့လးဖိတဖၣ်, ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ်+ ဒီးပှၤအဂၤ လၢအဟဲက့ၤတဖၣ်န့ၣ် ပာ်စီဆှံဝဲ ကစၢ်ယွၤအဟံၣ် လၢတၢ်သူၣ်ခုသးခု အပူၤလီၤ.
၁၇ လၢတၢ်ပာ်စီဆှံ ကစၢ်ယွၤ အဟံၣ်အဂီၢ်န့ၣ် အဝဲသ့ၣ် လုၢ်ထီၣ် ကျီၢ်ဖါ အဒု ၁၀၀, သိဖါ အဒု ၂၀၀ ဒီးသိဖိ အဒု ၄၀၀ လီၤ. ဒီးဒ်ပှၤအံၣ်စရ့လးဖိတဖၣ် အဒူၣ်အနီၣ်ဂံၢ် အိၣ်ဝဲအသိး အဝဲသ့ၣ် လုၢ်ထီၣ်ဝဲ မဲာ်တဲးလဲးဖါ ၁၂ ဒု လၢအဝဲသ့ၣ် ခဲလၢာ်အတၢ်ဒဲးဘး ကပျၢ်ကွံာ် အဂီၢ်လီၤ.+
၁၈ ဒီးအဝဲသ့ၣ် ရဲၣ်ကျဲၤဝဲ ပှၤလုၢ်တၢ်ဒိၣ်တဖၣ် ဒ်အဝဲသ့ၣ် အကရူၢ်တဖၣ် အိၣ်ဝဲအသိး ဒီးပှၤလ့ၤဝံဖိတဖၣ် ဒ်အဝဲသ့ၣ် အကရူၢ်တဖၣ် အိၣ်ဝဲအသိး ဒ်သိး အဝဲသ့ၣ်ကမၤ ကစၢ်ယွၤ အတၢ်မၤလၢ ဝ့ၢ်ယရူၤၡလ့ၣ်အပူၤ+ ဒ်တၢ်ကွဲးအသးလၢ စီၤမိၤၡ့အလံာ်ပူၤ ပာ်ဖျါဝဲအသိးလီၤ.+
၁၉ ပှၤလၢ အဟဲက့ၤတဖၣ်န့ၣ် မၤဝဲ ဘူၣ်လဲၤကပာ် ဖဲလါအဆိကတၢၢ်တလါ, လါထီၣ် ၁၄ သီလီၤ.+
၂၀ ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် မၤကဆှီထီၣ်အသး+ ဒီးအဝဲသ့ၣ် ကဆှီထီၣ်ဝဲ ကိးဂၤဒဲးလီၤ. ဒီးအဝဲသ့ၣ်မၤသံ ဘူၣ်လဲၤကပာ်အတၢ်လုၢ်လၢ ပှၤလၢ အဟဲက့ၤတဖၣ်အဂီၢ် ဒီးပှၤလုၢ်တၢ်ဒိၣ်အဂၤတဖၣ် အဂီၢ် ဒီးအဝဲသ့ၣ် အနီၢ်ကစၢ် အဂီၢ်လီၤ.
၂၁ ဒီးပှၤအံၣ်စရ့လးဖိလၢ အဘၣ်တၢ်က့ၤဖီၣ်အီၤ လၢအဟဲက့ၤတဖၣ်န့ၣ်* အီၣ်ဝဲ ဘူၣ်လဲၤကပာ်လီၤ. ဒီးပှၤလၢအဟဲပာ်ဖှိၣ်ထီၣ် အသးဒီးအဝဲသ့ၣ်န့ၣ် အီၣ်ဝဲ ဘူၣ်လဲၤကပာ်လီၤ. ပှၤသ့ၣ်တဖၣ်အံၤန့ၣ် ဒ်သိး အဝဲသ့ၣ် ကဘူၣ်ထီၣ်ဘါထီၣ် အံၣ်စရ့လး အကစၢ် ယဟိဝၤယွၤအဂီၢ် အဝဲသ့ၣ် ပာ်ပတုာ် လုၢ်လၢ်လၢအတကဆှီဘၣ် လၢပှၤကလုာ်အဂၤ လၢကီၢ်ပူၤတဖၣ် မၤဝဲလီၤ.+
၂၂ ဒီးအဝဲသ့ၣ် မၤဝဲ ဘူၣ်ကိၣ်လၢ အတပၣ်ဒီးကိၣ်မံၣ်ဘၣ်+ နွံသီ လၢတၢ်သူၣ်ဖှံသးညီ အပူၤလီၤ. အဝဲသ့ၣ် မၤဝဲလၢတၢ်သူၣ်ဖှံသးညီ အပူၤဒ်န့ၣ်န့ၣ် မ့ၢ်လၢယဟိဝၤယွၤ မၤသးခု အဝဲသ့ၣ်အသး ဒီးမၤဝဲဒ်သိး အၤၡူၢ်အစီၤပၤ ကဘၣ်သူၣ်ဘၣ်သး+ ဒီးကဆီၣ်ထွဲမၤစၢၤ အဝဲသ့ၣ် ဖဲအဝဲသ့ၣ် သူၣ်ထီၣ် အံၣ်စရ့လး အကစၢ်ယွၤ လၢအမ့ၢ်အတီတဂၤ အဟံၣ်အခါအဃိလီၤ.
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်ဝဲ ထံကျိဖရၤသး.
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၅.
^ ပှၤတဖၣ်အံၤ ပၣ်ဃုာ်ဒီး ပှၤလၢအဘၣ်တၢ်က့ၤဖီၣ်အီၤတဖၣ် အစၢၤအသွဲၣ်.
