ဧ့ၤဘြံၤ ၁:၁-၁၄
၁ လၢအပူၤကွံာ်န့ၣ် ကစၢ်ယွၤတဲတၢ်ဒီး ပမိၢ်ပၢ်ဖံဖု လၢပျၢၤတဖၣ် ခီဖျိလၢဝံတဖၣ်အါဘျီ ဒီးလၢကျဲအါဘိလီၤ.+
၂ လၢမုၢ်နံၤတဖၣ်အံၤ အကတၢၢ်န့ၣ် အဝဲတဲတၢ်ဒီးပှၤခီဖျိ အဖိခွါလၢအပာ်ထီၣ်ဝဲလၢ ပှၤန့ၢ်သါဘၣ်တၢ်ခဲလၢာ်လီၤ.+ ဒီးအဝဲဒုးအိၣ်ထီၣ် တၢ်အစိၤတဖၣ်+ ခီဖျိလၢ အဖိခွါတဂၤအံၤအဃိလီၤ.+
၃ ဒီးဖိခွါန့ၣ်ပာ်ဖျါထီၣ် ကစၢ်ယွၤအလၤကပီၤ+ ဒီးအဝဲလီၤဂာ်ဒီးကစၢ်ယွၤ လီၤတံၢ်လီၤဆဲး+ ဒီးအဝဲပၢၤဃာ် တၢ်ခဲလၢာ်ခီဖျိလၢ အကလုၢ်လၢ အအိၣ်ဒီးအစိကမီၤလီၤ. ဒီးဖဲအဝဲသ့စီကွံာ်ပှၤလၢ ပတၢ်ဒဲးဘးဝံၤအလီၢ်ခံ+ အဝဲဆ့ၣ်နီၤဝဲလၢ တၢ်ကဟုကညီၢ် ကစၢ်တဂၤ အစုထွဲတခီလၢမူခိၣ်လီၤ.+
၄ ဒီးမ့ၢ်လၢ အဝဲန့ၢ်သါဘၣ်အမံၤ* လၢအဂ့ၤဒိၣ်န့ၢ်ဒံး မူခိၣ်ကလူးတဖၣ်အဃိ+ အကဲထီၣ်ပှၤလၢ အဒိၣ်န့ၢ်ဒံးအဝဲသ့ၣ် အါန့ၢ်အလီၢ်လီၤ.+
၅ အဒိ မူခိၣ်ကလူးလၢ ကစၢ်ယွၤတဲအီၤလၢ “နမ့ၢ်ယဖိခွါ ဒီးတနံၤညါအံၤ ယကဲထီၣ်နပၢ်လံ”+ ဒီး “ယကကဲထီၣ်အပၢ် ဒီးအဝဲကကဲထီၣ်ယဖိခွါ”+ န့ၣ်အိၣ်တဂၤဂၤဧါ.
၆ ဘၣ်ဆၣ် ဘၣ်ဃးဒီးဆၢကတီၢ်ဖဲ ကစၢ်ယွၤကဆှၢလီၤကဒီး အဖိဝဲၢ်ကိလၢ+ ဟီၣ်ခိၣ်အခါ ကစၢ်ယွၤတဲဝဲလၢ “မ်ကစၢ်ယွၤ အမူခိၣ်ကလူးခဲလၢာ် ထိၣ်လီၤပှီၤအသး လၢအမဲာ်ညါတက့ၢ်.”
၇ ဒီးဘၣ်ဃးဒီး မူခိၣ်ကလူးတဖၣ်အဂ့ၢ်န့ၣ် ကစၢ်ယွၤတဲဝဲလၢ “အဝဲ* ဒုးကဲထီၣ် အမူခိၣ်ကလူးတဖၣ်လၢ ပှၤနီၢ်သးဖိလၢ အဂံၢ်ဆူၣ်ဘါဆူၣ် ဒီးအခ့အပှၤတဖၣ်လၢ+ မ့ၣ်အူလၣ်လီၤ.”+
၈ မ့မ့ၢ် ဘၣ်ဃးဒီး ဖိခွါအဂ့ၢ်န့ၣ် အဝဲတဲဝဲလၢ “ယၤ, ကစၢ်ယွၤမ့ၢ် နလီၢ်ပစိာ်+ လီၤထူလီၤယိာ် ဒီးနဘီမုၢ်အနီၣ်ထိးဘိန့ၣ် မ့ၢ်ဝဲတၢ်စံၣ်ညီၣ်တီ အနီၣ်ထိးဘိလီၤ.
၉ နအဲၣ်တၢ်တီတၢ်လိၤ ဒီးနသးဟ့ တၢ်အၢတၢ်သီလီၤ. အဃိ ယၤ, ကစၢ်ယွၤ လၢအမ့ၢ် နကစၢ်ယွၤန့ၣ် ဒိးဖှူနၤလၢသိ+ ဒီးဟ့ၣ်နၤတၢ်သးခုအါန့ၢ်ဒံး နသကိးတဖၣ်လီၤ.”+
၁၀ ဒီးတၢ်ကွဲးအသး တဲကဒီးဝဲလၢ “ကစၢ်ဧၢ, လၢအခီၣ်ထံးန့ၣ် နဒုးအိၣ်ထီၣ် ဟီၣ်ခိၣ် ဒီးမူကပိာ်လိၤန့ၣ် မ့ၢ်နစုအတၢ်ဘၣ်တ့လီၤ.
၁၁ ဟီၣ်ခိၣ်ဒီးမူကပိာ်လိၤ ကဟးဂီၤကွံာ်, မ့မ့ၢ်နၤန့ၣ် နကအိၣ်ထီဘိလီၤ. ဟီၣ်ခိၣ်ဒီးမူကပိာ်လိၤ ကလီၢ်လံၤကွံာ် ဒ်တၢ်ကူတၢ်ကၤအသိး
၁၂ ဒီးနကချံးထီၣ်အီၤ ဒ်ဆ့ကၤတဘ့ၣ်အသိး ဒီးနကဆီတလဲအီၤ ဒ်တၢ်ကူတၢ်ကၤအသိးလီၤ. မ့မ့ၢ်နၤန့ၣ် နမ့ၢ်တၢ်ဒ်အလီၢ်လီၢ် ဒီးနနံၣ်နလါတဖၣ် အကတၢၢ် တအိၣ်နီတဘျီဘၣ်.”+
၁၃ ဘၣ်ဆၣ် မူခိၣ်ကလူးလၢ ကစၢ်ယွၤတဲအီၤလၢ “ဆ့ၣ်နီၤလၢ ယစုထွဲတုၤလီၤလၢ ယပာ်နဒုၣ်နဒါ ဒ်တၢ်ယီၢ်လီၤခီၣ်အလီၢ်လၢ နခီၣ်အဂီၢ်တက့ၢ်”+ န့ၣ်အိၣ်တဂၤဂၤဧါ.
၁၄ အဝဲသ့ၣ်ခဲလၢာ် မ့ၢ်ပှၤနီၢ်သးဖိလၢ တၢ်မၤစီဆှံအဂီၢ်+ ဒီးကစၢ်ယွၤမၢလီၤအဝဲသ့ၣ် ဒ်သိးအကမၤစၢၤ ပှၤလၢအကန့ၢ်သါဘၣ် တၢ်အုၣ်က့ၤခီၣ်က့ၤအဂီၢ် တမ့ၢ်ဘၣ်ဧါ.
