ဧ့ၤဘြံၤ ၆:၁-၂၀
-
ဂုာ်ကျဲးစၢး လဲၤဆူညါတုၤလၢ တၢ်ဒိၣ်တုာ်ခိၣ်ပှဲၤ (၁-၃)
-
ပှၤလၢ အဃၣ်ကွံာ်အသးတဖၣ် ပျၤထီကဒီး ဖိခွါလၢ သ့ၣ်တၢၣ်အလိၤ (၄-၈)
-
နာ်န့ၢ် သုတၢ်မုၢ်လၢ် လီၤတံၢ်လီၤဆဲး (၉-၁၂)
-
ကစၢ်ယွၤ အတၢ်အၢၣ်လီၤန့ၣ် မ့ၢ်တၢ်လၢ အလီၤတံၢ်လီၤဆဲး (၁၃-၂၀)
-
ကစၢ်ယွၤ ပာ်ဂၢၢ်ပာ်ကျၢၤဝဲ အတၢ်စံးပာ် ဒီးအဆီတလဲတသ့ဘၣ် (၁၇, ၁၈)
-
၆ အဃိ ခဲအံၤန့ၣ် ခီဖျိလၢ ပလဲၤပူၤကွံာ် တၢ်သိၣ်လိ အခီၣ်ထံးခီၣ်ဘိ+ ဘၣ်ဃးဒီး ခရံာ်လံအဃိ မ်ပဂုာ်ကျဲးစၢး လဲၤဆူညါတုၤလၢ တၢ်ဒိၣ်တုာ်ခိၣ်ပှဲၤတက့ၢ်.+ မ်ပသုတဆဲးမၤလိကဒီး တၢ်အခီၣ်ထံးခီၣ်ဘိတဖၣ် တဘျီဝံၤတဘျီတဂ့ၤ. တၢ်အခီၣ်ထံးခီၣ်ဘိတဖၣ်န့ၣ် မ့ၢ်ဝဲ တၢ်သိၣ်လိဘၣ်ဃးဒီး တၢ်ပီၢ်ယၢ်လီၤက့ၤပသးလၢ တၢ်မၤကလီကလီတဖၣ်,* တၢ်နာ်ကစၢ်ယွၤ,
၂ တၢ်သိၣ်လိဘၣ်ဃးဒီး တၢ်ဒိးဘျၢတဖၣ်, တၢ်ပာ်ထီၣ်စုလၢပှၤလိၤ,+ ပှၤသံ ကဂဲၤဆၢထၢၣ် သမူထီၣ်က့ၤ+ ဒီးတၢ်စံၣ်ညီၣ် အထူအယိာ်လီၤ.
၃ ဒီးကစၢ်ယွၤ မ့ၢ်ဟ့ၣ်အခွဲးန့ၣ် ပကဂုာ်ကျဲးစၢးလဲၤဆူညါ တုၤလၢ တၢ်ဒိၣ်တုာ်ခိၣ်ပှဲၤ တစုလီၤ.
၄ ပှၤလၢ အဒိးန့ၢ်ဘၣ် တၢ်ကပီၤ,+ ဒိးန့ၢ်ဘၣ် မူခိၣ်အတၢ်ဟ့ၣ်ကလီ, ဒိးန့ၢ်ဘၣ်သးစီဆှံ,
၅ ဒိးန့ၢ်ဘၣ်တ့ၢ် ကစၢ်ယွၤ အကလုၢ်ကထါလၢအဂ့ၤ ဒီးဒိးန့ၢ်ဘၣ် တၢ်ဆိၣ်ဂ့ၤတဖၣ်လၢ အဘၣ်ထွဲဒီးခါဆူညါန့ၣ်
၆ တုၤလၢအဝဲသ့ၣ် ဃၣ်ကွံာ်အသးလၢ တၢ်နာ်အခါ+ မ့ၢ်လၢ အဝဲသ့ၣ်ပျၤထီကဒီး ကစၢ်ယွၤအဖိခွါလၢ သ့ၣ်တၢၣ်အလိၤ ဒီးမၤမဲာ်ဆှးအီၤလၢ ကမျၢၢ်အမဲာ်ညါအဃိ+ ပှၤမၤစၢၤအဝဲသ့ၣ် လၢကပီၢ်ယၢ်လီၤက့ၤအသး တသ့လၢၤဘၣ်.
၇ ဟီၣ်ခိၣ်ညၣ်န့ၣ် ဒိးန့ၢ်ဘၣ် တၢ်ဆိၣ်ဂ့ၤလၢ ကစၢ်ယွၤအအိၣ် ခီဖျိလၢ အအီဝဲတၢ်စူၤထံလၢ အလီၤဘၣ်လၢအလိၤ တလီၢ်လီၢ် ဒီးလၢခံဒုးမဲထီၣ် တၢ်မုၢ်တၢ်ဘိလၢ အကဲဘျုးလၢ ပှၤလၢအသူၣ်တၢ်ဖျးတၢ်တဂၤ အဂီၢ်လီၤ.
၈ ဘၣ်ဆၣ် ဟီၣ်ခိၣ်ညၣ်အံၤ မ့ၢ်ဒုးမဲထီၣ် တၤဆှုၣ်တၤမဲ ဒီးနီၣ်တၤဆှုၣ်တဖၣ်န့ၣ် အကဘၣ်တၢ်ပာ်တ့ၢ်ကွံာ်အီၤ ဒီးဘူးထီၣ်လၢ တၢ်ကဆိၣ်အၢအီၤ ဒီးလၢခံကတၢၢ်န့ၣ် အကဘၣ် တၢ်ဒွဲၣ်အူထီၣ်ကွံာ်အီၤလီၤ.
၉ ဘၣ်ဆၣ် ယပှၤသးဘိသ့ၣ်ဧၢ, ပမ့ၢ်တဲတၢ် ဒ်အံၤသနာ်က့ ဘၣ်ဃးဒီးသုန့ၣ် ပနာ်သပှၢ်တၢၢ်လၢ သုတၢ်အိၣ်သး ကဂ့ၤဒိၣ်န့ၢ်အန့ၣ် ဒီးသုမၤတၢ်လၢ အကကဲထီၣ် တၢ်အုၣ်က့ၤခီၣ်က့ၤ လၢသုဂီၢ်လီၤ.
၁၀ ကစၢ်ယွၤန့ၣ် မ့ၢ်ပှၤတီပှၤလိၤလီၤ. လၢတၢ်န့ၣ်အဃိ အဝဲတသးပ့ၤနီၣ် သုတၢ်မၤဒီးတၢ်အဲၣ်လၢ သုပာ်ဖျါထီၣ်လၢ အမံၤအဖီခိၣ်+ ခီဖျိလၢ သုမၤစၢၤတ့ၢ် ပှၤစီဆှံတဖၣ် ဒီးသုဆဲးမၤစၢၤ အဝဲသ့ၣ်အဃိဘၣ်.
၁၁ ဒီးပအဲၣ်ဒိးလၢ သုဝဲတဂၤစုာ်စုာ် ကဆဲးပာ်ဖျါထီၣ် တၢ်သးဆူၣ်အံၤ ဒ်သိးသုကနာ်န့ၢ် သုတၢ်မုၢ်လၢ်+ လီၤတံၢ်လီၤဆဲး တုၤလၢအကတၢၢ်လီၤ.+
၁၂ ပတအဲၣ်ဒိးလၢ သုကကဲထီၣ် ပှၤလၢအကၢၣ်ဘၣ်.+ ပအဲၣ်ဒိးလၢ သုကကွၢ်လိမၤဒိး ပှၤလၢအနာ်တၢ် ဒီးဝံသးစူၤတၢ် အဃိန့ၢ်သါဘၣ် တၢ်စံးပာ်တဖၣ်လီၤ.
၁၃ မ့ၢ်လၢ ပှၤလၢအဒိၣ်န့ၢ်ကစၢ်ယွၤ တအိၣ်နီတဂၤဘၣ်အဃိ ဖဲကစၢ်ယွၤအၢၣ်လီၤ စီၤအၤဘြၤဟၣ်အခါ အဝဲပာ်ဂၢၢ်ပာ်ကျၢၤဝဲ* လၢအနီၢ်ကစၢ် အမံၤအပူၤလီၤ.+
၁၄ ဒီးအတဲဝဲလၢ “ယကဆိၣ်ဂ့ၤနၤ သပှၢ်တၢၢ် ဒီးယကမၤအါထီၣ် နချံနသၣ် သပှၢ်တၢၢ်လီၤ.”+
၁၅ အဃိ စီၤအၤဘြၤဟၣ် ပာ်ဖျါထီၣ် တၢ်ဝံသးစူၤ ဒီးလၢခံန့ၣ် အဒိးန့ၢ်ဘၣ် တၢ်စံးပာ်အံၤလီၤ.
၁၆ ပှၤဟီၣ်ခိၣ်ဖိ ပာ်ဂၢၢ်ပာ်ကျၢၤ အတၢ်အၢၣ်လီၤတဖၣ်လၢ ပှၤလၢအဒိၣ်န့ၢ်အီၤတဂၤ အမံၤအပူၤဒီးမ့ၢ်လၢ တၢ်အဝဲအံၤ ကဲတၢ်အုၣ်ကီၤ လီၤတံၢ်လီၤဆဲးအဃိ+ အမၤကတၢၢ်ကွံာ် တၢ်ဂ့ၢ်လိာ်ဘှီလိာ်ခဲလၢာ်လီၤ.
၁၇ ဒ်န့ၣ်အသိး ပှၤလၢအကန့ၢ်သါဘၣ် တၢ်စံးပာ်တဖၣ်န့ၣ်+ ဖဲကစၢ်ယွၤ ဆၢတဲာ်လီၤအသးလၢ အကပာ်ဖျါထီၣ်န့ၢ် အဝဲသ့ၣ် လီၤတံၢ်လီၤဆဲးလၢ အတၢ်တိာ်ပာ် ဆီတလဲတသ့ဘၣ်အခါန့ၣ် အဝဲပာ်ဂၢၢ်ပာ်ကျၢၤဝဲ အတၢ်စံးပာ်လီၤ.
၁၈ ဒီးကစၢ်ယွၤ တဲလံၣ်တဲလီတၢ်လၢ တၢ်ခံမံၤအံၤအဖီခိၣ် တသ့ဘၣ်+ ဒီးတၢ်ခံမံၤအံၤ ဆီတလဲအသး တသ့စ့ၢ်ကီးဘၣ်. အဃိ ပဝဲလၢ အဃ့ၢ်ဆူ တၢ်ပူၤဖျဲးအလီၢ်န့ၣ် ပန့ၢ်ဘၣ် တၢ်ဂံၢ်တၢ်ဘါဒိၣ်မး ဒ်သိးပကဟံးဃာ် တၢ်မုၢ်လၢ်လၢ အအိၣ်ပာ်လီၤအသးလၢ ပမဲာ်ညါ ဃံးဃံးအဂီၢ်လီၤ.
၁၉ ပတၢ်မုၢ်လၢ်အံၤ+ လီၤဂာ်ဒ်သိးဒီး ပသးသမူ အနီၣ်သက့ၤလီၤ. တၢ်မုၢ်လၢ်အံၤ မ့ၢ်တၢ်လၢအလီၤတံၢ်ဒီး ဂၢၢ်ကျၢၤဝဲ ဒီးအလဲၤနုာ်လီၤ ပၢၢ်တုၤလၢအတလၢကွံာ် ယၣ်ဘျးသဒၢ+
၂၀ ဖဲတၢ်လီၢ်လၢ ယ့ၣ်ၡူးလဲၤနုာ်လီၤဆိဝဲလၢ ပဂီၢ်လီၤ.+ အဝဲမ့ၢ် ပှၤလုၢ်တၢ်ခိၣ် အဒိၣ်ကတၢၢ် ဒ်စီၤမၤလကံစဒ့းအသိး လီၤထူလီၤယိာ်လီၤ.+
