၁ စီၤပၤ ၁၀:၁-၂၉
၁၀ ဒီးၡဘၤဘီမုၢ် အနီၢ်ပၤမုၣ် နၢ်ဟူဘၣ်ဝဲ စီၤၡလိၤမိၤ အကစီၣ် ဒီးအမံၤဟူသၣ်ဖျါ လၢယဟိဝၤယွၤ အမံၤအဃိလီၤ.+ လၢတၢ်န့ၣ်အဃိ အဝဲဟဲဝဲဒ်သိး ကမၤကွၢ်အီၤလၢ တၢ်သံကွၢ်လၢ အကီဒိၣ်မးတဖၣ်လီၤ.+
၂ လၢခံ အဝဲလဲၤတုၤလၢ ဝ့ၢ်ယရူၤၡလ့ၣ် ဃုာ်ဒီး အခ့အပှၤအါဂၤ+ ဒီးကီၤလၤအူး လၢအတီၣ်ဝဲ သ့ၣ်စရံအထုး,+ ထူ ဒီးလၢၢ်လၢ အလုၢ်ဒိၣ်ပှ့ၤဒိၣ် အါအါဂီၢ်ဂီၢ်လီၤ. အဝဲလဲၤနုာ်လီၤဝဲလၢ စီၤၡလိၤမိၤအအိၣ် ဒီးတဲအီၤ တၢ်လၢအအိၣ်လၢ အသးပူၤ ကိးမံၤဒဲးလီၤ.
၃ ဒီးစီၤၡလိၤမိၤ စံးဆၢ နီၢ်ပၤမုၣ် အတၢ်သံကွၢ် ခဲလၢာ်လီၤ. တၢ်လၢအကီတလၢ လၢစီၤပၤ ကတဲနၢ်ပၢၢ်အီၤန့ၣ် တအိၣ်နီတမံၤဘၣ်.
၄ ဖဲၡဘၤဘီမုၢ် အနီၢ်ပၤမုၣ် ထံၣ်ဘၣ်ဝဲ စီၤၡလိၤမိၤ အတၢ်ကူၣ်သ့ခဲလၢာ်,+ ဟံၣ်လၢအတ့ထီၣ်ဝဲ,+
၅ တၢ်အီၣ်တၢ်အီ လၢအစီၢ်နီၤခိၣ် အဖီခိၣ်,+ အခ့အပှၤတဖၣ် ဆ့ၣ်နီၤဝဲ အကျိၤအကျဲ ဒ်လဲၣ်ဒ်လဲၣ်, ပှၤလၢအဟဲပာ်လီၤ တၢ်အီၣ်လၢ စီၢ်နီၤခိၣ်န့ၣ် မၤတၢ်ဒ်လဲၣ် ဒီးကူကၤဝဲဒ်လဲၣ်ဒ်လဲၣ်, ပှၤလၢအစိာ် တၢ်ထံတၢ်နိ ဒီးတၢ်လုၢ်ဒွဲၣ်အူတဖၣ်လၢ အဝဲလုၢ်ထီၣ်လၢ ယဟိဝၤယွၤ အဟံၣ်ထီဘိအခါ ၡဘၤဘီမုၢ် အနီၢ်ပၤမုၣ်အသးလီၤကတုၤဝဲ တုၤလၢ အတဲတၢ်မး တထီၣ်လၢၤဘၣ်.
၆ နီၢ်ပၤမုၣ် တဲဘၣ်စီၤပၤလၢ “တၢ်ကစီၣ်လၢ ယနၢ်ဟူဘၣ်လၢ ယထံယကီၢ် ဘၣ်ဃးဒီး နမၤတၢ်ကဲထီၣ်လိၣ်ထီၣ် ဒီးနတၢ်ကူၣ်သ့အဂ့ၢ်န့ၣ် မ့ၢ်ဝဲတီဝဲလီၤ.
၇ ဘၣ်ဆၣ် တချုးလၢ ယဟဲဒံးဘၣ်န့ၣ် ယတနာ် တၢ်ကစီၣ်လၢ ပှၤတဲယၤဘၣ်. ဒီးခဲအံၤ ယထံၣ်လၢ ယနီၢ်ကစၢ်အမဲာ် ဒီးတၢ်လၢပှၤတဲယၤန့ၣ် အိၣ်ဒၣ်တစဲးဒံးလီၤ. နီၢ်ကီၢ်န့ၣ် နတၢ်ကူၣ်သ့ ဒီးနတၢ်ထူးတၢ်တီၤတဖၣ် အိၣ်အါန့ၢ်ဒံး တၢ်လၢပှၤတဲယၤ စၢၢ်တလၢၢ်လီၤ.
၈ နပှၤဂီၢ်မုၢ် ဒီးနခ့နပှၤတဖၣ်လၢ အမၤတၢ်လၢ နမဲာ်ညါထီဘိ ဒီးနၢ်ဟူဘၣ် နတၢ်ကူၣ်သ့န့ၣ် ကသးခုဝဲလီၤ.+
၉ နကစၢ် ယဟိဝၤယွၤ လၢအဘၣ်သူၣ်ဘၣ်သးနၤ ဒီးပာ်ထီၣ်နၤလၢ အံၣ်စရ့လး အလီၢ်ပစိာ် အဖီခိၣ်န့ၣ် မ်အဘၣ် တၢ်စံးထီၣ်ပတြၢၤအီၤတက့ၢ်.+ ခီဖျိလၢ ယဟိဝၤယွၤ အတၢ်အဲၣ် အထူအယိာ်လၢ အံၣ်စရ့လး အဖီခိၣ်အဃိ အဝဲပာ်ထီၣ်နၤလၢ စီၤပၤ ဒ်သိးနကစံၣ်ညီၣ်တၢ် တီတီလိၤလိၤ ဒီးပၢတၢ်လၢ တၢ်တီတၢ်လိၤအပူၤလီၤ.”
၁၀ ဒီးနီၢ်ပၤမုၣ်န့ၣ် ဟ့ၣ်စီၤပၤလၢ ထူအတၤလၣ်* ၁၂၀, သ့ၣ်စရံအထုး+ အါအါဂီၢ်ဂီၢ် ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ.+ လၢခံ ပှၤတဟဲစိာ် သ့ၣ်စရံအထုး အါထဲသိးဒီး ၡဘၤဘီမုၢ် အနီၢ်ပၤမုၣ် ဟဲစိာ်န့ၢ် စီၤပၤၡလိၤမိၤ နီတဘျီလၢၤဘၣ်.
၁၁ စီၤဃံရၣ် အကဘီအါဘ့ၣ်လၢ အဟဲက့ၤတီၣ်ဝဲ ထူလၢ အအိၣ်လၢ အိဖ့ၢ်န့ၣ်+ တီၣ်ဃုာ်စ့ၢ်ကီးဝဲ သ့ၣ်အလၤမူး အသ့ၣ်ဘၣ်+ အါအါဂီၢ်ဂီၢ် လၢအအိၣ်လၢ အိဖ့ၢ် ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ.+
၁၂ ယဟိဝၤယွၤ အဟံၣ်ထူၣ်တဖၣ်, စီၤပၤအဟံၣ်ထူၣ်တဖၣ်, တနၢ်တဖၣ်, သီတူၢ်တဖၣ် လၢပှၤသးဝံၣ်တၢ်ဖိတဖၣ် အဂီၢ်န့ၣ်+ စီၤပၤ တ့ဝဲလၢ သ့ၣ်အလၤမူး အသ့ၣ်ဘၣ်တဖၣ်လီၤ. လၢခံ ပှၤတဟဲစိာ်ဝဲ ဒီးပှၤတထံၣ် သ့ၣ်အလၤမူး အသ့ၣ်ဘၣ်တဖၣ် အါထဲအံၤညါ နီတဘျီလၢၤဘၣ် တုၤလၢ မုၢ်မဆါတနံၤအံၤလီၤ.
၁၃ စီၤပၤၡလိၤမိၤ ဟ့ၣ်ဝဲ ၡဘၤဘီမုၢ် အနီၢ်ပၤမုၣ် တၢ်ဟ့ၣ်လၢ အသးအိၣ်ဟ့ၣ်ဝဲတဖၣ် တကးဒံးဘၣ် အဝဲဟ့ၣ်စ့ၢ်ကီးဝဲ ကယဲၢ်တၢ်လၢ နီၢ်ပၤမုၣ်လီကီဝဲဒီး ဃ့ဝဲတဖၣ်လီၤ. ဝံၤဒီးနီၢ်ပၤမုၣ် ဒီးအခ့အပှၤတဖၣ် က့ၤကဒါက့ၤလၢ အထံအကီၢ်လီၤ.+
၁၄ ဒီးလၢတနံၣ်အတီၢ်ပူၤ ထူလၢပှၤဟဲစိာ်လၢ စီၤၡလိၤမိၤအအိၣ်န့ၣ် အတယၢၢ်အိၣ်ဝဲ အတၤလၣ် ၆၆၆ လီၤ.+
၁၅ တကးဒံးဘၣ် အဝဲဒိးန့ၢ်ဘၣ် တၢ်ခိတၢ်သွဲလၢ ပှၤပနံာ်တၢ်ကၤတၢ်ဖိ, ဧ့ရ့းအစီၤပၤ ခဲလၢာ် ဒီးကီၢ်အပဒိၣ်ဖးဒိၣ်တဖၣ် အအိၣ်လီၤ.
၁၆ စီၤၡလိၤမိၤ တ့ထီၣ်ဝဲ ကတီၤဖးဒိၣ် အဘ့ၣ် ၂၀၀ လၢထူ လၢအဘၣ်တၢ်ဃါဃုာ်အီၤဒီး ထးအဂၤတကလုာ်လီၤ.+ ဒီးကတီၤ တဘ့ၣ်ဘၣ်တဘ့ၣ်န့ၣ် အဝဲကျးဝဲဒီးထူ အိၣ်ဝဲ ၡက့လး* ၆၀၀ န့ၣ်လီၤ.+
၁၇ ဒီးအဝဲတ့ထီၣ် ကတီၤဖိ အဘ့ၣ် ၃၀၀ လၢထူလၢ အဘၣ်တၢ်ဃါဃုာ်အီၤဒီး ထးအဂၤတကလုာ်လီၤ. ဒီးကတီၤဖိ တဘ့ၣ်ဘၣ်တဘ့ၣ်န့ၣ် အဝဲကျးဝဲဒီးထူ အိၣ်ဝဲ သၢမနါ* န့ၣ်လီၤ. ဒီးစီၤပၤပာ်ဝဲ ကတီၤတဖၣ်န့ၣ် လၢလဘၤနိၣ်ပှၢ် အဟံၣ်ပူၤလီၤ.+
၁၈ စီၤပၤ တ့ထီၣ်စ့ၢ်ကီး လီၢ်ပစိာ်ဖးဒိၣ်လၢ ကဆီမဲ+ ဒီးကျးဝဲဒီး ထူလၢဘၣ်တၢ်ပှံၢ်စီအီၤ န့ၣ်လီၤ.+
၁၉ စီၤပၤအလီၢ်ပစိာ်န့ၣ် အဃီသွါ အိၣ်ဝဲ ဃုသွါ ဒီးအလီၢ်ပစိာ်န့ၣ် အိၣ်ဒီး တၢ်အခိၣ်ဒုးကဝီၤတခါ ဒီးလၢလီၢ်ဆ့ၣ်နီၤအလိၤန့ၣ် အိၣ်ဒီးတၢ်ပာ်လီၤစုအလီၢ် ခံကပၤလၢာ် ဒီးခ့ယုၢ်အဂီၤခံဒု+ ဆၢထၢၣ်ဝဲဘူးဒီး တၢ်ပာ်လီၤစုအလီၢ် တကပၤတဒု တကပၤတဒုလီၤ.
၂၀ ခ့ယုၢ်အဂီၤ ၁၂ ဒု ဆၢထၢၣ်ဝဲလၢ ဃီသွါ ဃုသွါအလိၤ အဃိ လၢဃီသွါ တသွါစုာ်စုာ်အလိၤန့ၣ် ခ့ယုၢ်အိၣ်ဝဲခံဒု, တကပၤတဒု တကပၤတဒုလီၤ. ဒီးဘီမုၢ်လၢအဂၤလၢ အတ့ထီၣ်တၢ်ဒ်အံၤန့ၣ် တအိၣ်နီတခါဘၣ်.
၂၁ စီၤပၤၡလိၤမိၤ အထံအီခွးခဲလၢာ်န့ၣ် ဘၣ်တၢ်တ့အီၤလၢထူ ဒီးတၢ်ပီးတၢ်လီ ခဲလၢာ်လၢ အအိၣ်လၢ လဘၤနိၣ်ပှၢ် အဟံၣ်ပူၤန့ၣ်+ ဘၣ်တၢ်တ့အီၤလၢ ထူစီလီၤ. ဖဲစီၤၡလိၤမိၤ ပၢတၢ်အဆၢကတီၢ်န့ၣ် ပှၤတပာ်စ့ညၣ် လၢတၢ်နီတမံၤဘၣ် အဃိ ပှၤတတ့ထီၣ်တၢ်လၢ စ့ညၣ် နီတမံၤဘၣ်.+
၂၂ စီၤပၤၡလိၤမိၤ အိၣ်ဒီးကဘီအါဘ့ၣ်လၢ အလဲၤဃုာ်ဒီး စီၤဃံရၣ် အကဘီတဖၣ် လၢပီၣ်လဲၣ်ပူၤ ဆူတၢ်ၡံၣ် အဟီၣ်ကဝီၤလီၤ.+ ကဘီတဖၣ်အံၤလၢ အလဲၤဝဲလၢ တၢ်ၡံၣ်န့ၣ် ဟဲက့ၤတီၣ်ဝဲ ထူ, စ့ညၣ်, ကဆီမဲ,+ တၤယုာ် ဒီးထိၣ်ပှာ်တဖၣ် သၢနံၣ်တဘျီလီၤ.
၂၃ ဒီးစီၤပၤၡလိၤမိၤ အတၢ်ကူၣ်သ့+ ဒီးအတၢ်ထူးတၢ်တီၤ အိၣ်အါန့ၢ်ဒံး စီၤပၤအဂၤလၢ ဟီၣ်ခိၣ်ချၢ ကိးဂၤဒဲးလီၤ.+
၂၄ ဒီးပှၤခဲလၢာ်လၢ ဟီၣ်ခိၣ်ချၢ အဲၣ်ဒိးထံၣ်လိာ်သးဒီး စီၤၡလိၤမိၤ ဒ်သိးကနၢ်ဟူဘၣ် စီၤၡလိၤမိၤ အတၢ်ကူၣ်သ့လၢ ကစၢ်ယွၤ ဟ့ၣ်အီၤန့ၣ်လီၤ.+
၂၅ ပှၤတဂၤဂ့ၤ တဂၤဂ့ၤ လၢအဟဲန့ၣ် ဟဲစိာ်ဝဲ တၢ်ဟ့ၣ်တမံၤမံၤ ဒ်သိးဒီး တၢ်ဖိတၢ်လံၤလၢ အဘၣ်တၢ်တ့အီၤလၢ စ့ညၣ်, တၢ်ဖိတၢ်လံၤလၢ ဘၣ်တၢ်တ့အီၤလၢထူ, တၢ်ကူတၢ်ကၤတဖၣ်, တၢ်စုကဝဲၤ, သ့ၣ်စရံအထုး, ကသ့ၣ်တဖၣ် ဒီးကသ့ၣ်ယီၤတဖၣ်လီၤ.* ဒီးအဝဲသ့ၣ်မၤဝဲဒ်အံၤ တနံၣ်ဘၣ်တနံၣ်လီၤ.
၂၆ စီၤၡလိၤမိၤ အလ့ၣ်ကဟၣ် ဒီးကသ့ၣ်တဖၣ်* အါထီၣ်ဝဲ ကွ့ၢ်ကွ့ၢ်လီၤ. အလ့ၣ်ကဟၣ်အိၣ်ဝဲ အခိၣ် ၁,၄၀၀ ဒီးအကသ့ၣ် အိၣ်ဝဲအဒု ၁၂,၀၀၀+ ဒီးအဝဲပာ်ဝဲလၢ လ့ၣ်ကဟၣ်အဝ့ၢ်တဖၣ် ဒီးလၢဝ့ၢ်ယရူၤၡလ့ၣ်အပူၤ ဘူးဒီးစီၤပၤလီၤ.+
၂၇ လၢဝ့ၢ်ယရူၤၡလ့ၣ်အပူၤန့ၣ် စ့ညၣ်တဖၣ် အိၣ်ဝဲအါအါဂီၢ်ဂီၢ် ဒ်လၢၢ်တဖၣ်အသိး ဒီးသ့ၣ်ဆှိအ့ရ့း အိၣ်ဝဲအါအါဂီၢ်ဂီၢ်ဒ် သိးဝံာ်ဒၢ အထူၣ်တဖၣ် လၢၡ့ဖလၣ် အပူၤအသိးလီၤ.+
၂၈ ဒီးစီၤပၤမၢလီၤ အပှၤပနံာ်တၢ်ကၤတၢ်ဖိတဖၣ် လၢကလဲၤပှ့ၤန့ၢ်အီၤ ကသ့ၣ်အဖုတဖၣ် လၢအပှ့ၤ ဒ်တၢ်ပာ်ပနီၣ်အီၤ အသိးလီၤ. အဃိ စီၤၡလိၤမိၤ အကသ့ၣ်တဖၣ်န့ၣ် ဟဲလၢ ကီၢ်အဲၤကူပတူးလီၤ.+
၂၉ လ့ၣ်ကဟၣ် တခိၣ်စုာ်စုာ်လၢ အဟဲလၢ ကီၢ်အဲၤကူပတူးန့ၣ် အပှ့ၤအိၣ်ဝဲ စ့ညၣ်အဘ့ၣ် ၆၀၀ ဒီးကသ့ၣ်တဒုန့ၣ် အပှ့ၤအိၣ်ဝဲ ၁၅၀ လီၤ. ဒီးအဝဲသ့ၣ် ဆါန့ၢ်ဝဲ* တၢ်သ့ၣ်တဖၣ်အံၤလၢ ပှၤဃ့ၤသးဖိ+ အစီၤပၤခဲလၢာ် ဒီးစူၤရံ အစီၤပၤတဖၣ် အအိၣ်လီၤ.
တၢ်ဂ့ၢ်အဘျဲၣ်တဖၣ်
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ လၢလံာ်စီဆှံလၢ ဧ့ၤဘြံၤကျိာ်တကတြူၢ်အပူၤ ၁ မနါန့ၣ် ဃၢဝဲ ၅၇၀ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ဧ့ၤဘြံၤအတၢ်ကတိၤတဖျၢၣ်အံၤ အဲၣ်ဒိးတဲဝဲ ကသ့ၣ်လၢ အကးပြါဒီး ကသ့ၣ်ယီၤ.
^ မ့ၢ်စ့ၢ်ကီး “ပှၤဒိးကသ့ၣ်.”
^ မ့ၢ်စ့ၢ်ကီး “ဆှၢဝဲ.”
