၁ စီၤပၤ ၁၈:၁-၄၆
၁၈ လၢခံ ဖဲသၢနံၣ်တနံၣ်န့ၣ်+ ယဟိဝၤယွၤ တဲဘၣ် စီၤအ့ၤလံယၤလၢ “လဲၤပာ်ဖျါထီၣ် နသးလၢ စီၤအၤဃာ် အအိၣ်တက့ၢ်. ဒီးယကဒုးစူၤလီၤတၢ်လၢ ဟီၣ်ခိၣ်လိၤလီၤ.”+
၂ အဃိ ဖဲတၢ်သၣ်ဝံၤလီၤဒိ အိၣ်ဝဲလၢ+ ဝ့ၢ်ၡၤမရံအပူၤ နးဒိၣ်မး အဆၢကတီၢ် စီၤအ့ၤလံယၤ လဲၤပာ်ဖျါထီၣ်အသးလၢ စီၤအၤဃာ် အအိၣ်လီၤ.
၃ ဖဲန့ၣ်အခါ စီၤအၤဃာ် ကိးန့ၢ်ဝဲ စီၤဧိၤဘါဒယၤ လၢအမ့ၢ် ပှၤလၢ အတီခိၣ်ရိၤမဲတၢ်လၢ စီၤပၤအနီပူၤန့ၣ်လီၤ. (စီၤဧိၤဘါဒယၤ မ့ၢ်ပှၤလၢ အပျံၤ ယဟိဝၤယွၤ ဒိၣ်မးလီၤ.
၄ ဒီးဖဲ နီၢ်အံၤစ့ဘ့ၤလး+ မၤသံ ယဟိဝၤယွၤ အဝံတဖၣ်အခါ စီၤဧိၤဘါဒယၤ ကိးန့ၢ်ဝဲ ဝံအဂၤ ၁၀၀ ဒီးပာ်ခူသူၣ် အဝဲသ့ၣ်လၢ လ့ကိပူၤ, တပူၤ အဂၤ ၅၀, တပူၤ အဂၤ ၅၀ လီၤ. ဒီးအဝဲဒုးအီၣ်ဒုးအီ အဝဲသ့ၣ်လၢ ကိၣ်ဒီးထံလီၤ.)
၅ ဒီးစီၤအၤဃာ် တဲစီၤဧိၤဘါဒယၤလၢ “ဒ်သိး ပဆၣ်ဖိကီၢ်ဖိ သုတသံ ခဲလၢာ်ခဲဆ့ တဂ့ၤအဂီၢ် လဲၤလၢ ထံလီၢ်ကီၢ်ပူၤ ဆူထံထီၣ်ပၢၢ်ခဲလၢာ် ဒီးတၢ်တြီၤခဲလၢာ်တက့ၢ်. ဘၣ်သ့ၣ်သ့ၣ် ပကထံၣ်န့ၢ်နီၣ် လၢအယၢဝဲလၢ* ကသ့ၣ် ဒီးကသ့ၣ်ယီၤတဖၣ်* ကဆဲးမူဝဲအဂီၢ်လီၤ.”
၆ အဝဲသ့ၣ် နီၤဖးလီၤဝဲ တၢ်လီၢ်လၢ အဝဲသ့ၣ် ကလဲၤဝဲန့ၣ်လီၤ. စီၤအၤဃာ် လဲၤဝဲလၢ ကျဲတဘိ ဒီးစီၤဧိၤဘါဒယၤ လဲၤဝဲလၢ ကျဲအဂၤတဘိလီၤ.
၇ ဖဲစီၤဧိၤဘါဒယၤ လဲၤလၢကျဲအခါ စီၤအ့ၤလံယၤ ဟဲထံၣ်လိာ်သးဒီးအီၤ လၢကျဲလီၤ. ဒီးစီၤဧိၤဘါဒယၤ ကွၢ်နီၣ်အီၤ ဘၣ်ဝဲတဘျီဃီ ဒီးအဝဲထိၣ်လီၤပှီၤအသး ဒီးတဲဝဲလၢ “ကစၢ်ဧၢ, နကဲ စီၤအ့ၤလံယၤဧါ.”+
၈ စီၤအ့ၤလံယၤ တဲဆၢက့ၤအီၤလၢ “အကဲယၤလီၤ. လဲၤတဲဘၣ် နကစၢ်လၢ ‘စီၤအ့ၤလံယၤ အိၣ်လၢအံၤလီၤ.’”
၉ ဘၣ်ဆၣ် စီၤဧိၤဘါဒယၤ တဲဝဲလၢ “နကဟ့ၣ်လီၤယၤလၢ စီၤအၤဃာ် အစုပူၤ ဒ်သိး အကမၤသံယၤအဂီၢ်န့ၣ် မ့ၢ်ယမၤကမၣ်ဘၣ် မနုၤလဲၣ်.
၁၀ ယအၢၣ်လီၤတၢ်လၢ နကစၢ် ယဟိဝၤယွၤ လၢအမူဝဲတဂၤ အမဲာ်ညါလၢ ပှၤတကလုာ်မ့ၢ်ဂ့ၤ, ဘီမုၢ်မ့ၢ်ဂ့ၤ လၢယကစၢ်တမၢ ပှၤလဲၤဃုနၤ ဖဲန့ၣ်ဘၣ်န့ၣ် တအိၣ်ဘၣ်. ဒီးဖဲအဝဲသ့ၣ် တဲဝဲလၢ နတအိၣ်ဖဲန့ၣ်ဘၣ်အခါ ယကစၢ် မၢဘီမုၢ် မ့တမ့ၢ် ပှၤတကလုာ်အံၤ အၢၣ်လီၤဝဲလၢ အဝဲသ့ၣ် ဃုနၤတဘၣ်ဘၣ်.+
၁၁ ဒီးခဲအံၤ နတဲလၢ ယဘၣ်လဲၤတဲဘၣ် ယကစၢ်လၢ “စီၤအ့ၤလံယၤ အိၣ်လၢအံၤလီၤ.”
၁၂ ဘၣ်ဆၣ် ဖဲယဟးထီၣ်ကွံာ်လၢ နအိၣ် ဒ်သိးယကက့ၤတဲဘၣ် စီၤအၤဃာ်အခါ ယဟိဝၤယွၤ အသးစီဆှံ ကစိာ်ထီၣ်ကွံာ်နၤ+ လၢတၢ်လီၢ်လၢ ယတသ့ၣ်ညါဘၣ် ဒီးစီၤအၤဃာ် ဃုနၤမ့ၢ်တဘၣ်ဘၣ်န့ၣ် အကမၤသံယၤ သပှၢ်ကတၢၢ်လီၤ. သနာ်က့ နခ့နပှၤယၤအံၤ ပျံၤယဟိဝၤယွၤစးထီၣ်လၢ အသးစၢ်ခါလံ.
၁၃ ကစၢ်ဧၢ, ဖဲနီၢ်အံၤစ့ဘ့ၤလး မၤသံ ယဟိဝၤယွၤ အဝံတဖၣ်အခါ ယပာ်ခူသူၣ် ယဟိဝၤယွၤ အဝံအဂၤ ၁၀၀ လၢလ့ကိပူၤ, တပူၤ အဂၤ ၅၀ တပူၤ အဂၤ ၅၀ ဒီးဒုးအီၣ်ဒုးအီ အဝဲသ့ၣ် ကိၣ်ဒီးထံန့ၣ် ပှၤတတဲဘၣ်နၤဧီၤ.+
၁၄ ဒီးခဲအံၤ ဒ်နတဲယၤအသိး ယမ့ၢ်လဲၤတဲဘၣ် ယကစၢ်လၢ ‘စီၤအ့ၤလံယၤ အိၣ်လၢအံၤ’ န့ၣ် အဝဲကမၤသံယၤ သပှၢ်ကတၢၢ်လီၤ.”
၁၅ ဘၣ်ဆၣ် စီၤအ့ၤလံယၤ တဲဝဲလၢ “ယအၢၣ်လီၤတၢ်လၢ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢယဘူၣ်ထီၣ်ဘါထီၣ်အီၤတဂၤ* အမဲာ်ညါလၢ တနံၤညါအံၤ ယကလဲၤ ပာ်ဖျါထီၣ်ယသးလၢ စီၤအၤဃာ် အအိၣ်လီၤ.”
၁၆ အဃိ စီၤဧိၤဘါဒယၤ ဟးထီၣ်ကွံာ်ဝဲ ဒ်သိး အကက့ၤထံၣ်လိာ်သးဒီး စီၤအၤဃာ် ဒီးအဝဲတဲဘၣ်အီၤလီၤ. ဒီးစီၤအၤဃာ် လဲၤထံၣ်လိာ်သးဒီး စီၤအ့ၤလံယၤလီၤ.
၁၇ ဒီးဖဲစီၤအၤဃာ် ထံၣ်စီၤအ့ၤလံယၤအခါ အဝဲတဲ စီၤအ့ၤလံယၤလၢ “ပှၤလၢအဒုးအိၣ်ထီၣ် တၢ်ကီတၢ်ခဲဖးဒိၣ်လၢ ပှၤအံၣ်စရ့လးဖိတဖၣ် အဖီခိၣ်န့ၣ် အကဲနၤလီၤဧါ.”
၁၈ ဒီးစီၤအ့ၤလံယၤ တဲဝဲလၢ “ယတဒုးအိၣ်ထီၣ် တၢ်ကီတၢ်ခဲလၢ ပှၤအံၣ်စရ့လးဖိတဖၣ် အဂီၢ်ဘၣ်. ဘၣ်ဆၣ် နၤဒီးနပၢ် အဒူၣ်ဖိထၢဖိန့ၣ် ဒုးအိၣ်ထီၣ် တၢ်ကီတၢ်ခဲ ခီဖျိ သုပာ်တ့ၢ်ကွံာ် ယဟိဝၤယွၤ အတၢ်မၤလိာ်တဖၣ် ဒီးသုလဲၤဘူၣ်ထီၣ်ဘါထီၣ် ဘဧၤလးအဃိလီၤ.+
၁၉ ခဲအံၤန့ၣ် ကိးဖှိၣ် ပှၤအံၣ်စရ့လးဖိ ခဲလၢာ် ဆူယအိၣ် လၢကစၢၢ် ကၢ်မ့ၤလး+ အလိၤတက့ၢ်. ဒီးကိးဃုာ်ဒီး ဘဧၤလး အဝံတဖၣ် အဂၤ ၄၅၀ ဒီးတၢ်စီဆှံအထူၣ်*+ အဝံတဖၣ် အဂၤ ၄၀၀ လၢအအီၣ်တၢ်လၢ နီၢ်အံၤစ့ဘ့ၤလး အစီၢ်နီၤခိၣ်တက့ၢ်.”
၂၀ အဃိ စီၤအၤဃာ် ဆှၢလီၤတၢ်ကစီၣ်လၢ ပှၤအံၣ်စရ့လးဖိ ခဲလၢာ်အအိၣ် ဒီးကိးဖှိၣ်ဝဲ ဝံတဖၣ်လၢ ကစၢၢ်ကၢ်မ့ၤလး အလိၤလီၤ.
၂၁ စီၤအ့ၤလံယၤ လဲၤဃီၤလၢ ပှၤဂီၢ်မုၢ်အအိၣ် ဒီးတဲဝဲလၢ “သုကထုးယံာ် တၢ်ဆၢကတီၢ် ဒီးအိၣ်ဒီး တၢ်ထံၣ်ခံခါ* ဆံးယံာ်ဒံးလဲၣ်.+ ယဟိဝၤယွၤ မ့မ့ၢ် ယွၤလၢ အမ့ၢ်အတီ တဂၤန့ၣ် ဘူၣ်ထီၣ်ဘါထီၣ်အီၤ တက့ၢ်.+ ဘၣ်ဆၣ် ဘဧၤလး မ့မ့ၢ် ယွၤလၢ အမ့ၢ်အတီတဂၤန့ၣ် ဘူၣ်ထီၣ်ဘါထီၣ်အီၤ တက့ၢ်.” ဒီးပှၤဂီၢ်မုၢ် တတဲဆၢအီၤ တၢ်နီတမံၤဘၣ်.
၂၂ ဒီးစီၤအ့ၤလံယၤ တဲပှၤဂီၢ်မုၢ်လၢ “ဘဧၤလးအဝံ အိၣ်တ့ၢ်အဂၤ ၄၅၀ ဒံး ဘၣ်ဆၣ် မ့မ့ၢ် ယဟိဝၤယွၤ အဝံန့ၣ် အိၣ်တ့ၢ်ထဲ ယၤတဂၤလီၤ.+
၂၃ မၢပှၤဟဲစိာ်န့ၢ်ပှၤ ကျီၢ်ဖါဖိ ခံဒု ဒီးမၢအဝဲသ့ၣ် ဃုထၢတဒု ဒီးဒီၣ်လီၤအီၤ တကူာ်တကူာ် ဒီးပာ်လီၤအီၤလၢ သ့ၣ်မုၣ်ခိၣ် ဘၣ်ဆၣ် အဝဲသ့ၣ် တဘၣ်ဒွဲၣ်ထီၣ် မ့ၣ်အူဘၣ်. မ့မ့ၢ် ကျီၢ်ဖါဖိ အဝဲတဒုန့ၣ် ယကကတဲာ်ကတီၤထီၣ်အီၤ ဒီးပာ်ထီၣ်အီၤလၢ သ့ၣ်မုၣ်ခိၣ် ဒီးယတဒွဲၣ်ထီၣ် မ့ၣ်အူဘၣ်.
၂၄ ဝံၤဒီး သုကဘၣ် ကိးထီၣ် သုယွၤအမံၤ+ ဒီးမ့မ့ၢ်ယၤန့ၣ် ယကကိးထီၣ် ယဟိဝၤယွၤ အမံၤလီၤ. ယွၤတဂၤလၢ အစံးဆၢတၢ် ခီဖျိ အဆှၢလီၤ မ့ၣ်အူန့ၣ် မ့ၢ်ဝဲ ယွၤလၢ အမ့ၢ်အတီတဂၤလီၤ.”+ ဒီးပှၤဂီၢ်မုၢ်ခဲလၢာ် တဲဆၢဝဲလၢ “တၢ်လၢနတဲန့ၣ် ဂ့ၤလီၤ.”
၂၅ စီၤအ့ၤလံယၤ တဲဘၣ် ဘဧၤလး အဝံတဖၣ်လၢ “မ့ၢ်လၢ သုအိၣ်အါဂၤအဃိ ဃုထၢ ကျီၢ်ဖါဖိ တဒု ဒီးကတဲာ်ကတီၤထီၣ်ဆိအီၤ ဘၣ်ဆၣ် သုတဘၣ် ဒွဲၣ်ထီၣ် မ့ၣ်အူဘၣ်. ဝံၤဒီး ကိးထီၣ် သုယွၤအမံၤ တက့ၢ်.”
၂၆ အဃိ ဘဧၤလး အဝံတဖၣ် ဟံးန့ၢ် ကျီၢ်ဖါဖိလၢ အဝဲသ့ၣ်ဃုထၢထီၣ် ဒီးကတဲာ်ကတီၤထီၣ်ဝဲလီၤ. စးထီၣ်လၢ ဂီၤခီ တုၤလၢ မုၢ်ထူၣ်န့ၣ် အဝဲသ့ၣ် ကိးထီၣ်ဝဲ ဘဧၤလး အမံၤ တဘျီဝံၤတဘျီ ဒီးတဲဝဲလၢ “အိ ဘဧၤလးဧၢ, စံးဆၢပှၤတက့ၢ်.” ဘၣ်ဆၣ် တၢ်ကလုၢ် တသီၣ်နီတမံၤဘၣ် ဒီးပှၤတစံးဆၢ အဝဲသ့ၣ် နီတဂၤဘၣ်.+ ဒီးအဝဲသ့ၣ် ဂဲၤကလံၣ် ဖုကဆဲးဝဲ* ဝးတရံး တၢ်လုၢ်လီၢ်လၢ အဝဲသ့ၣ် တ့ထီၣ်ဝဲ တဖျၢၣ်န့ၣ်လီၤ.
၂၇ ဒီးလၢမုၢ်ထူၣ်န့ၣ် စီၤအ့ၤလံယၤ တဲဆဲးအဲးအဝဲသ့ၣ်လၢ “ကိးထီၣ် သုယွၤလၢ သုကလုၢ်မ့ၢ်ဒိၣ်သၢၤ. အဝဲကဲယွၤဒၢး.+ ဘၣ်သ့ၣ်သ့ၣ် အဝဲဆိကမိၣ်တၢ် ဖးယိာ်ညါ မ့တမ့ၢ် အဝဲလဲၤထီၣ် တၢ်ဟးလီၢ်ဧါသၢၤ. ဒီးဘၣ်သ့ၣ်သ့ၣ် အဝဲမံကမၣ်အသး ဒီးပှၤကဘၣ် ကိးပၢၢ်ထီၣ်အီၤ တဂၤဂၤ ဧါသၢၤ.”
၂၈ အဝဲသ့ၣ် ကိးထီၣ်ဝဲလၢ အကလုၢ်ဒိၣ်ဒိၣ် ဒီးဒ်အဝဲသ့ၣ် အလုၢ်လၢ်အိၣ်ဝဲအသိး အဝဲသ့ၣ် ကူးလီၤအသးလၢ ဒီဖိ ဒီးဘီဖိတဖၣ် တုၤလၢ အသွံၣ်ယွၤလီၤ လၢအလိၤ ဒီတဂၤညါလီၤ.
၂၉ ဒီးမုၢ်ထူၣ်ဝံၤ အလီၢ်ခံန့ၣ် အဝဲသ့ၣ် မၤထီၣ်အသးဒ် ပှၤပျုၢ်အသိး* တုၤလၢ ဟါခီတၢ်လုၢ်ဘု ဘၣ်တၢ်လုၢ်ထီၣ်အီၤ အဆၢကတီၢ်လီၤ. ဘၣ်ဆၣ် တၢ်ကလုၢ် တသီၣ်ဘၣ်, ပှၤတစံးဆၢ အဝဲသ့ၣ် နီတဂၤဘၣ် ဒီးပှၤတကနၣ်ဃုာ် အဝဲသ့ၣ် နီတဂၤဘၣ်.+
၃၀ လၢခံ စီၤအ့ၤလံယၤ တဲဘၣ်ပှၤဂီၢ်မုၢ် ခဲလၢာ်လၢ “ဟဲသုးဘူးထီၣ် သုသးလၢ ယအိၣ်တက့ၢ်.” အဃိ ပှၤဂီၢ်မုၢ်ခဲလၢာ် ဟဲသုးဘူးထီၣ်အသးလၢ အအိၣ်လီၤ. ဝံၤဒီးအဝဲ ဘှီဂ့ၤထီၣ်က့ၤ ယဟိဝၤယွၤ အတၢ်လုၢ်လီၢ်လၢ အဘၣ်တၢ်မၤဟးဂီၤ ပာ်စၢၤအီၤန့ၣ်လီၤ.+
၃၁ ဒီးစီၤအ့ၤလံယၤ ဟံးန့ၢ်လၢၢ် ၁၂ ဖျၢၣ် ဒ်စီၤယၤကိာ် အဖိခွါတဖၣ် အဒူၣ်အနီၣ်ဂံၢ် အိၣ်ဝဲအသိးန့ၣ်လီၤ. စီၤယၤကိာ်န့ၣ် မ့ၢ်ပှၤတဂၤလၢ ယဟိဝၤယွၤ တဲအီၤလၢ “နမံၤကမ့ၢ် အံၣ်စရ့လးလီၤ.”+
၃၂ ဒီးစီၤအ့ၤလံယၤ တ့ထီၣ်က့ၤ တၢ်လုၢ်လီၢ်+ လၢလၢၢ်တဖၣ်အံၤလၢ ယဟိဝၤယွၤ အမံၤအဂီၢ်လီၤ. ဒီးအဝဲခူၣ် တၢ်ကျိၤတကျိၤ ဝးတရံးတၢ်လုၢ်လီၢ် ဒီးတၢ်လီၢ်ဖဲန့ၣ် လဲၢ်ဝဲတုၤလၢ အကတြီၢ် တၢ်ချံ ခံစ့ၤအၤလီၤ.*
၃၃ ဝံၤဒီး စီၤအ့ၤလံယၤ ရဲၣ်လီၤ သ့ၣ်မုၣ်, ဒီၣ်လီၤဝဲ ကျီၢ်ဖါဖိ တကူာ်တကူာ် ဒီးပာ်ထီၣ်ဝဲလၢ သ့ၣ်မုၣ် အဖီခိၣ်လီၤ.+ ဒီးအဝဲတဲဝဲလၢ “မၤပှဲၤထံလၢ ကိဖးဒိၣ်လွံၢ်ကိအပူၤ ဒီးလူလီၤထံလၢ တၢ်လုၢ်ဒွဲၣ်အူ အလိၤ ဒီးလၢသ့ၣ်မုၣ်တဖၣ် အလိၤတက့ၢ်.”
၃၄ ဝံၤဒီး စီၤအ့ၤလံယၤ တဲဝဲလၢ “မၤကဒီး တဘျီ.” ဒီးအဝဲသ့ၣ် မၤကဒီးအသီတဘျီလီၤ. ဒီးအဝဲတဲကဒီးလၢ “မၤကဒီး သၢဘျီတဘျီတက့ၢ်.” ဒီးအဝဲသ့ၣ် မၤကဒီးဝဲ သၢဘျီတဘျီလီၤ.
၃၅ ဒီးထံယွၤလီၤဝဲ ဝးတရံးတၢ်လုၢ်လီၢ် ဒီးစီၤအ့ၤလံယၤ မၤပှဲၤစ့ၢ်ကီး တၢ်ကျိၤပူၤ လၢထံလီၤ.
၃၆ တုၤလၢ ဟါခီတၢ်လုၢ်ဘု ဘၣ်တၢ်လုၢ်ထီၣ်အီၤ အဆၢကတီၢ်+ ဝံအ့ၤလံယၤ ဟဲသုးဘူးထီၣ်အသးလၢ တၢ်လုၢ်လီၢ် ဒီးတဲဝဲလၢ “အိ စီၤအၤဘြၤဟၣ်,+ စီၤအံၤစဲး+ ဒီးစီၤအံၣ်စရ့လး အကစၢ် ယဟိဝၤယွၤဧၢ, တနံၤအံၤ ဒုးသ့ၣ်ညါ ပှၤကိးဂၤဒဲးလၢ နမ့ၢ် ကစၢ်ယွၤလၢ ကီၢ်အံၣ်စရ့လး အပူၤတက့ၢ်. ဒီးမ်ပှၤသ့ၣ်ညါလၢ ယမ့ၢ် နခ့နပှၤတဂၤ ဒီးယမၤတၢ်သ့ၣ်တဖၣ်အံၤ ခီဖျိလၢ နမၢယၤအဃိတက့ၢ်.+
၃၇ အိ ယဟိဝၤယွၤဧၢ, စံးဆၢယၤတက့ၢ်. စံးဆၢယၤ ဒ်သိး ပှၤတဖၣ်အံၤ ကသ့ၣ်ညါလၢ နၤ, ယဟိဝၤယွၤန့ၣ် နမ့ၢ်ယွၤလၢ အမ့ၢ်အတီတဂၤ ဒီးနမ့ၢ်ယွၤလၢ အဒုးဃၣ်က့ၤ အဝဲသ့ၣ်အသးလၢ နအိၣ်န့ၣ်တက့ၢ်.”+
၃၈ ဒီးယဟိဝၤယွၤ အမ့ၣ်အူ ဟဲလီၤအီၣ်ကွံာ်ဝဲ တၢ်လုၢ်ဒွဲၣ်အူ,+ သ့ၣ်မုၣ်တဖၣ်, လၢၢ်တဖၣ် ဒီးဟီၣ်ခိၣ်ကမူၣ်လီၤ. ဒီးမ့ၣ်အူန့ၣ် ဆူးထီၣ်ကွံာ်ဝဲ ထံလၢ တၢ်ကျိၤပူၤခဲလၢာ်လီၤ.+
၃၉ ဖဲပှၤဂီၢ်မုၢ် ခဲလၢာ်ထံၣ်ဝဲဒ်န့ၣ်အခါ တဘျီဃီန့ၣ် အဝဲသ့ၣ် ထိၣ်လီၤပှီၤအသးဒီး တဲဝဲလၢ “ယဟိဝၤယွၤ မ့ၢ်ယွၤ လၢအမ့ၢ်အတီတဂၤ, ယဟိဝၤယွၤ မ့ၢ်ယွၤ လၢအမ့ၢ်အတီတဂၤလီၤ.”
၄၀ ဒီးဝံအ့ၤလံယၤ တဲအဝဲသ့ၣ်လၢ “ဖီၣ်န့ၢ် ဘဧၤလး အဝံတဖၣ်တက့ၢ်. တဘၣ်ပျဲပူၤကွံာ် အဝဲသ့ၣ် နီတဂၤတဂ့ၤ.” တဘျီဃီန့ၣ် အဝဲသ့ၣ် ဖီၣ်န့ၢ်ဝံတဖၣ်န့ၣ် ဒီးစီၤအ့ၤလံယၤ လဲၤကိးအဝဲသ့ၣ်လၢ ထံကျိဖိ* ကံၡိၣ်+ ဒီးမၤသံကွံာ် အဝဲသ့ၣ် ဖဲန့ၣ်လီၤ.+
၄၁ ဒီးစီၤအ့ၤလံယၤ တဲဘၣ် စီၤအၤဃာ်လၢ “မ့ၢ်လၢ တၢ်စူၤဖးဒိၣ် ဟဲသီၣ်လံအဃိ လဲၤထီၣ် အီၣ်တၢ်အီတၢ်တက့ၢ်.”+
၄၂ အဃိ စီၤအၤဃာ် လဲၤထီၣ်ဝဲ ဒ်သိးကအီၣ်တၢ်အီတၢ် အဂီၢ်လီၤ. ဒီးဖဲန့ၣ်အခါ စီၤအ့ၤလံယၤ လဲၤထီၣ်ဝဲလၢ ကစၢၢ်ကၢ်မ့ၤလး အဒီခိၣ် ဒီးဆ့ၣ်နီၤကစီၤခီၣ် ဒီးပာ်အခိၣ်သၣ်ဃံလၢ အခီၣ်လ့ၢ်ခိၣ် အကဆူးလီၤ.+
၄၃ ဒီးအဝဲတဲဘၣ် အပှၤမၤစၢၤတၢ်တဂၤလၢ “ဝံသးစူၤလဲၤထီၣ် ဒီးကွၢ်စိတၢ်လၢ ပီၣ်လဲၣ်တကပၤတက့ၢ်.” ဒီးအပှၤမၤစၢၤတၢ်န့ၣ် လဲၤထီၣ်ကွၢ်တၢ် ဒီးတဲဝဲလၢ “တၢ်တအိၣ်နီတမံၤဘၣ်.” ဒီးစီၤအ့ၤလံယၤ တဲအီၤလၢ “လဲၤထီၣ်ကွၢ်ကဒါက့ၤ” နွံဘျီလီၤ.
၄၄ ဒီးဖဲနွံဘျီတဘျီန့ၣ် အပှၤမၤစၢၤတၢ်တဂၤ တဲဝဲလၢ “တၢ်အၢၣ်ဆံးဆံးဖိတလိၣ် လၢအအိၣ်ထဲသိးဒီး ပှၤကညီ အစုလၣ်န့ၣ် ဟဲထီၣ်လၢ ပီၣ်လဲၣ်ပူၤလီၤ.” စီၤအ့ၤလံယၤ တဲအီၤလၢ “လဲၤတဲစီၤအၤဃာ်လၢ ‘ကတဲာ်ကတီၤထီၣ် နလ့ၣ်ကဟၣ်သၢၤ. ဒ်သိးတၢ်စူၤဖးဒိၣ် သုတမၤပတုာ်နၤ တဂ့ၤအဂီၢ် က့ၤလီၤမ့ၢ်ချ့.’”
၄၅ ဖဲန့ၣ်အခါ လၢမူခိၣ်န့ၣ် တၢ်အၢၣ်ခံးသူထီၣ်ဝဲ ဒီးကလံၤအူတၢ် ဝံၤဒီးမူခိၣ်စူၤလီၤဖးဒိၣ်လီၤ.+ ဒီးစီၤအၤဃာ် ဒိးဝဲလ့ၣ်ကဟၣ် ဒီးက့ၤဝဲလၢ ဝ့ၢ်ယံးစရ့လးလီၤ.+
၄၆ ဒီးယဟိဝၤယွၤ အစု ဟ့ၣ်စိဟ့ၣ်ကမီၤ စီၤအ့ၤလံယၤ အဃိ အဝဲခးချ့ၣ်ထီၣ် အကူအသိးလၢ အယီၢ်ဒ့ ဒီးဃ့ၢ်တလၢ စီၤအၤဃာ် တုၤလီၤလၢ ဝ့ၢ်ယံးစရ့လးန့ၣ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ လၢအလၢဝဲ.
^ ဧ့ၤဘြံၤအတၢ်ကတိၤတဖျၢၣ်အံၤ အဲၣ်ဒိးတဲဝဲ ကသ့ၣ်လၢ အကးပြါဒီး ကသ့ၣ်ယီၤ.
^ အခီပညီလိၤလိၤ “လၢယဆၢထၢၣ်လၢ အမဲာ်ညါတဂၤ.”
^ ကွၢ် တၢ်ကတိၤအခီပညီ.
^ အခီပညီလိၤလိၤ “ဟးတကျဲၢ်တကျဲၢ်.”
^ မ့ၢ်စ့ၢ်ကီး “စံၣ်.”
^ မ့ၢ်စ့ၢ်ကီး “မၤထီၣ်အသး ဒ်ဝံတဖၣ်အသိး.”
^ အဃၢ ကအိၣ် အကံလိ ၁၀. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ မ့ၢ်စ့ၢ်ကီး “တၢ်တြီၤ.”
