၁ စီၤပၤ ၂၀:၁-၄၃
၂၀ ဒီးကီၢ်စူၤရံ+ အစီၤပၤဘ့ၣ်ဟဒး+ ကိးဖှိၣ်ထီၣ်ဝဲ သုးမုၢ်ဒီတဖု ဃုာ်ဒီး စီၤပၤအဂၤတဖၣ် ၃၂ ဂၤ ဒီးအဝဲသ့ၣ် အကသ့ၣ်တဖၣ် ဒီးအလ့ၣ်ကဟၣ်တဖၣ်လီၤ. ဒီးအဝဲလဲၤထီၣ် ကဝီၤဝဲ+ ဝ့ၢ်ၡၤမရံ+ ဒီးဒုးဝဲဝ့ၢ်န့ၣ်လီၤ.
၂ ဝံၤဒီး စီၤဘ့ၣ်ဟဒး ဆှၢလီၤ ပှၤစိာ်တၢ်ကစီၣ်ဖိတဖၣ်လၢ ဝ့ၢ်ပူၤလၢ အံၣ်စရ့လး အစီၤပၤအၤဃာ်+ အအိၣ် ဒီးတဲအီၤလၢ “စီၤဘ့ၣ်ဟဒး တဲဝဲဒ်အံၤ,
၃ ‘နစ့ညၣ် ဒီးနထူန့ၣ် ကဲယတၢ် ဒီးနမါလၢ အဂ့ၤကတၢၢ်တဖၣ် ဒီးနဖိခွါတဖၣ်န့ၣ် ကဲစ့ၢ်ကီးယတၢ်လီၤ.’”
၄ ဒီးအံၣ်စရ့လး အစီၤပၤ တဲဆၢကဒါက့ၤလၢ “ကစၢ်စီၤပၤဧၢ, ဒ်နတဲအသိး ယၤဒီး တၢ်လၢအအိၣ်ဒီးယၤခဲလၢာ်န့ၣ် ကဲနတၢ်လီၤ.”+
၅ လၢခံ ပှၤစိာ်တၢ်ကစီၣ်ဖိတဖၣ် ဟဲက့ၤတဲဝဲလၢ “စီၤဘ့ၣ်ဟဒး တဲဝဲဒ်အံၤ, ‘ယဆှၢလီၤန့ၢ်နၤ တၢ်ကစီၣ်ဒ်အံၤလီၤ, “နစ့ညၣ်, နထူ, နဖိခွါတဖၣ် ဒီးနမါတဖၣ်န့ၣ် နကဘၣ်ဟ့ၣ်ယၤလီၤ.”
၆ ခဲမုၢ်ဆ့ၣ် အဆၢကတီၢ်ဒ်အံၤန့ၣ် ယကဆှၢလီၤ ယခ့ယပှၤတဖၣ် လၢနအိၣ် ဒီးအဝဲသ့ၣ် ကဃုကွၢ်တၢ်လၢ နဟံၣ်ဒီးနခ့နပှၤတဖၣ် အဟံၣ်ပူၤ လီၤတံၢ်လီၤဆဲး ဒီးအဝဲသ့ၣ် ကဟံးန့ၢ် တၢ်လၢ နပာ်လုၢ်ပာ်ပှ့ၤအီၤ ကိးမံၤဒဲးလီၤ.’”
၇ ဖဲန့ၣ်အခါ အံၣ်စရ့လးအစီၤပၤ ကိးန့ၢ် ထံကီၢ် အပှၤသူၣ်က့သးပှၢ် ကိးဂၤဒဲး ဒီးတဲဝဲလၢ “ဒ်သုထံၣ်ဘၣ်အသိး ပှၤတဂၤအံၤ အဲၣ်ဒိး ဒုးအိၣ်ထီၣ် တၢ်ကီတၢ်ခဲ လၢပဂီၢ်လီၤ. အဝဲမၢဆူၣ်ယၤလၢ ယကဟ့ၣ်လီၤ ယဖိခွါတဖၣ်, ယမါတဖၣ်, ယစ့ညၣ် ဒီးယထူ ဒီးယတဂ့ၢ်လိာ်အီၤဘၣ်.”
၈ ဒီးပှၤသူၣ်က့သးပှၢ်တဖၣ် ဒီးပှၤဂီၢ်မုၢ် ခဲလၢာ် တဲစီၤပၤလၢ “တဘၣ်ကနၣ်အကလုၢ် ဒီးဟ့ၣ်အီၤ အခွဲးနီတစဲးတဂ့ၤ.”
၉ ဒီးစီၤအၤဃာ် တဲဘၣ် စီၤဘ့ၣ်ဟဒး အပှၤစိာ်တၢ်ကစီၣ်ဖိတဖၣ်လၢ “တဲဘၣ်ယကစၢ် စီၤပၤလၢ တၢ်လၢအဃ့ယၤ အဆိကတၢၢ်တဘျီန့ၣ် ယကမၤလီၤ. ဘၣ်ဆၣ် တၢ်တဘျီအံၤဒု ယတဟ့ၣ်အခွဲးဘၣ်.” ဝံၤဒီး ပှၤစိာ်တၢ်ကစီၣ်ဖိတဖၣ် က့ၤတဲဘၣ် စီၤဘ့ၣ်ဟဒးလီၤ.
၁၀ ဒီးစီၤဘ့ၣ်ဟဒး ဆှၢကဒါက့ၤ တၢ်ကစီၣ်လၢ အအိၣ်ဒ်အံၤ, “ပှၤလၢအကလဲၤပိာ်ယခံ ဒ်သိး ယကမၤဟးဂီၤ ဝ့ၢ်ၡၤမရံ အဂီၢ် ကအိၣ်ဝဲ အါအါဂီၢ်ဂီၢ် တုၤဒၣ်လဲာ် ၡၤမရံအဟီၣ်ခိၣ် အကမူၣ် တယၢဝဲလၢ* ကဟ့ၣ်လီၤ ယပှၤတဖၣ် တဂၤတစှီၤ တဂၤတစှီၤ အဂီၢ်ဘၣ်. ယမ့ၢ်တမၤဒ်န့ၣ်ဘၣ်န့ၣ် မ်ယွၤတဖၣ် သိၣ်ဃီၣ်ယၤ ဆူၣ်ဆူၣ်တက့ၢ်.”
၁၁ ဒီးအံၣ်စရ့လး အစီၤပၤ တဲဆၢက့ၤလၢ “တဲဘၣ်အီၤလၢ ‘ပှၤတဂၤလၢ အစိာ်ထီၣ် အစုကဝဲၤန့ၣ် တဘၣ်တဲဂ့ၤလီၤအသး ဒ်ပှၤတဂၤလၢ အပာ်ကွံာ် အစုကဝဲၤတဂ့ၤ.’”+
၁၂ ဖဲစီၤဘ့ၣ်ဟဒး ဒီးစီၤပၤတဖၣ် အီသံးလၢ အဝဲသ့ၣ် အဒဲတဖၣ် အပူၤအခါ စီၤဘ့ၣ်ဟဒး နၢ်ဟူဘၣ်ဝဲ တၢ်ကတိၤတဖၣ်န့ၣ် ဒီးအဝဲတဲဘၣ် အခ့အပှၤတဖၣ်လၢ “ကတဲာ်ကတီၤထီၣ်သးလၢ တၢ်ဒုးအဂီၢ်ဟီ.” အဃိ အဝဲသ့ၣ် ကတဲာ်ကတီၤအသးလၢ ကဒုးဝဲ ဝ့ၢ်အဂီၢ်လီၤ.
၁၃ ဘၣ်ဆၣ် ဝံတဂၤ လဲၤလၢ အံၣ်စရ့လး အစီၤပၤအၤဃာ်+ အအိၣ်ဒီးတဲလၢ “ယဟိဝၤယွၤ တဲဝဲလၢ ‘သုးမုၢ်ဖးဒိၣ်တဖုအံၤန့ၣ် မ့ၢ်နထံၣ်လံဧါ. တနံၤညါအံၤန့ၣ် ယကဟ့ၣ်လီၤအီၤလၢ နစုပူၤ ဒီးနကသ့ၣ်ညါလၢ ယမ့ၢ်ယဟိဝၤယွၤလီၤ.’”+
၁၄ စီၤအၤဃာ် သံကွၢ်အီၤလၢ “နကသူ မတၤတဖၣ်လဲၣ်.” ဝံတဂၤန့ၣ် တဲဆၢဝဲလၢ “ယဟိဝၤယွၤ တဲဝဲဒ်အံၤ, ‘ကီၢ်ရ့ၣ်အပဒိၣ်ဖးဒိၣ်တဖၣ် အခ့အပှၤတဖၣ်လီၤ.’” ဒီးစီၤပၤ သံကွၢ်ဝဲလၢ “မတဂၤ ကစးထီၣ် တၢ်ဒုးလဲၣ်.” ဝံတဂၤန့ၣ် တဲဆၢဝဲလၢ “နၤလီၤ.”
၁၅ ဒီးစီၤအၤဃာ် ဂံၢ်ဝဲ ကီၢ်ရ့ၣ်အပဒိၣ်ဖးဒိၣ်တဖၣ် အခ့အပှၤတဖၣ် အနီၣ်ဂံၢ် ဒီးအဝဲသ့ၣ်အိၣ်ဝဲ ၂၃၂ ဂၤလီၤ. ဝံၤဒီး အဝဲဂံၢ်ဝဲ အံၣ်စရ့လးသုးဖိ အနီၣ်ဂံၢ် ခဲလၢာ် အိၣ်ဝဲအဂၤ ၇,၀၀၀ လီၤ.
၁၆ ဖဲမုၢ်ထူၣ် အဆၢကတီၢ်န့ၣ် အဝဲသ့ၣ်ဟးထီၣ်ဝဲလီၤ. ဖဲန့ၣ်အခါ စီၤဘ့ၣ်ဟဒး ဃုာ်ဒီး စီၤပၤ ၃၂ ဂၤ လၢအမၤစၢၤအီၤန့ၣ် အီမူၤအသးလၢ ဒဲတဖၣ်အပူၤလီၤ.
၁၇ ဒီးဖဲကီၢ်ရ့ၣ် အပဒိၣ်ဖးဒိၣ်တဖၣ် အခ့အပှၤတဖၣ် ဟဲထီၣ်ဆိဝဲအခါ တဘျီဃီန့ၣ် စီၤဘ့ၣ်ဟဒး ဆှၢလီၤ ပှၤစိာ်တၢ်ကစီၣ်ဖိတဖၣ်လီၤ. ဒီးအဝဲသ့ၣ် ဟဲက့ၤတဲဘၣ်အီၤလၢ “ပှၤပိာ်ခွါတဖၣ်လၢ အအိၣ်လၢ ဝ့ၢ်ၡၤမရံ ဟဲထီၣ်လံ.”
၁၈ စီၤဘ့ၣ်ဟဒး တဲဝဲလၢ “အဝဲသ့ၣ် မ့ၢ်ဟဲထီၣ်လၢ ကဒုးတၢ် အဂီၢ်မ့ၢ်ဂ့ၤ လၢကဃ့ တၢ်ဃူတၢ်ဖိး အဂီၢ်မ့ၢ်ဂ့ၤ ဖီၣ်န့ၢ်မူဒံး အဝဲသ့ၣ်တက့ၢ်.”
၁၉ ဘၣ်ဆၣ် ဖဲကီၢ်ရ့ၣ် အပဒိၣ်ဖးဒိၣ်တဖၣ် အခ့အပှၤတဖၣ် ဒီးသုးမုၢ်တဖၣ် လၢအပိာ် အဝဲသ့ၣ်အခံ ဟးထီၣ်လၢ ဝ့ၢ်ပူၤအခါ
၂၀ အဝဲသ့ၣ် တဂၤစုာ်စုာ် မၤသံဝဲ ပှၤလၢ အဟဲထီဒါအီၤလီၤ. လၢခံ ပှၤစူၤရံဖိ ဃ့ၢ်ကွံာ်ဝဲ+ ဒီးပှၤအံၣ်စရ့လးဖိ လူၤအဝဲသ့ၣ်လီၤ. ဘၣ်ဆၣ် စူၤရံ အစီၤပၤဘ့ၣ်ဟဒး ဃ့ၢ်ပူၤဖျဲးကွံာ်အသး လၢကသ့ၣ် ဃုာ်ဒီး ပှၤဒိးကသ့ၣ်သုး တနီၤလီၤ.
၂၁ ဒီးအံၣ်စရ့လး အစီၤပၤလဲၤထီၣ်ဝဲ ဒီးကျီကွံာ် ဒုၣ်ဒါလၢ အဒိးကသ့ၣ် ဒီးအဒိး လ့ၣ်ကဟၣ်တဖၣ် ဒီးမၤနၢၤ* ပှၤစူၤရံဖိ အါအါဂီၢ်ဂီၢ်လီၤ.
၂၂ လၢခံ ဝံတဂၤန့ၣ်+ လဲၤလၢ အံၣ်စရ့လး အစီၤပၤအအိၣ် ဒီးတဲအီၤလၢ “မ့ၢ်လၢ ခဲကိာ်တနံၣ် ဖဲနံၣ်စးထီၣ် သီသီအခါန့ၣ် စူၤရံအစီၤပၤ ကဟဲထီၣ်ဒုးနၤ+ တဘျီကဒီးအဃိ က့ၤမၤဆူၣ်ထီၣ် နသုးမုၢ်အဂံၢ်အဘါ ဒီးနကမၤဒ်လဲၣ်န့ၣ် ဆိကမိၣ်ပာ်စၢၤတက့ၢ်.”+
၂၃ ဒီးစူၤရံအစီၤပၤ အခ့အပှၤတဖၣ် တဲဘၣ် စီၤပၤလၢ “အဝဲသ့ၣ် အကစၢ်ယွၤန့ၣ် မ့ၢ်ဝဲ ကစၢၢ်တဖၣ် အကစၢ်ယွၤ အဃိ အဝဲသ့ၣ် မၤနၢၤပှၤလီၤ. ဘၣ်ဆၣ် ပမ့ၢ်ဒုးအဝဲသ့ၣ်လၢ တၢ်ပၢၤခိၣ်န့ၣ် ပကမၤနၢၤအဝဲသ့ၣ်လီၤ.
၂၄ တကးဒံးဘၣ် မၤဒ်အံၤ, လၢစီၤပၤတဖၣ်အလီၢ်န့ၣ် ဃုထၢထီၣ်က့ၤ+ ပဒိၣ်ဖးဒိၣ်တဖၣ်လၢ ကတီခိၣ်ရိၤမဲ ပှၤသုးဖိတက့ၢ်.
၂၅ ဝံၤဒီးပာ်ဖှိၣ်ထီၣ် သုးမုၢ်တဖုလၢ အပှဲၤသိးဒီး နသုးမုၢ်လၢ အဘၣ်တၢ်မၤသံအီၤတဖၣ် ဒီးကသ့ၣ် ဒီးလ့ၣ်ကဟၣ်တဖၣ် စ့ၢ်ကီး ပာ်ဖှိၣ်ထီၣ်အီၤ ဒ်န့ၣ်တက့ၢ်. ဒီးပကလဲၤဒုးအဝဲသ့ၣ်လၢ တၢ်ပၢၤခိၣ်ဒီး ပကမၤနၢၤအဝဲသ့ၣ် သပှၢ်တၢၢ်လီၤ.” ဒီးစီၤဘ့ၣ်ဟဒး ဒိကနၣ်ဝဲ အခ့အပှၤတဖၣ် အတၢ်ဟ့ၣ်ကူၣ် ဒီးအမၤဝဲဒ်န့ၣ်လီၤ.
၂၆ ဖဲနံၣ်စးထီၣ် သီသီန့ၣ် စီၤဘ့ၣ်ဟဒး ကိးဖှိၣ်ဝဲ ပှၤစူၤရံဖိ ဒီးလဲၤထီၣ်ဝဲလၢ ဝ့ၢ်အဖ့း+ ဒ်သိးကဒုးလိာ်သးဒီး ပှၤအံၣ်စရ့လးဖိ အဂီၢ်လီၤ.
၂၇ အံၣ်စရ့လး အပှၤဂီၢ်မုၢ် ဘၣ်တၢ်ကိးဖှိၣ်အီၤ ဒီးဘၣ်တၢ်ဟ့ၣ်လီၤ အဝဲသ့ၣ် တၢ်အီၣ်တၢ်အီလီၤ. ဒီးအဝဲသ့ၣ် လဲၤထီၣ် သဂၢၢ်ဝဲ ပှၤစူၤရံဖိတဖၣ်လီၤ. ဖဲပှၤအံၣ်စရ့လးဖိ ဆီလီၤအသးလၢ ပှၤစူၤရံဖိ အမဲာ်ညါအခါ ပှၤစူၤရံဖိ အိၣ်ဝဲပှဲၤပှဲၤလၢ လီၢ်ကဝီၤပူၤ အဃိ ပှၤအံၣ်စရ့လးဖိ လီၤဂာ်ဒ်သိး မဲာ်တဲးလဲးအဖု ဆံးဆံးဖိ ခံဖုလီၤ.+
၂၈ ဒီးယွၤလၢအမ့ၢ်အတီ အပှၤတဂၤ လဲၤလၢ အံၣ်စရ့လး အစီၤပၤအအိၣ် ဒီးတဲဝဲလၢ “ယဟိဝၤယွၤ တဲဝဲဒ်အံၤ ‘မ့ၢ်လၢ ပှၤစူၤရံဖိတဖၣ် တဲဝဲလၢ “ယၤ, ယဟိဝၤယွၤ မ့ၢ်ဝဲ ကစၢၢ်တဖၣ် အကစၢ်ယွၤ ဒီးအတမ့ၢ် တၢ်ပၢၤခိၣ်တဖၣ် အကစၢ်ယွၤဘၣ်” အဃိ ယကဟ့ၣ်လီၤ သုးမုၢ်ဖးဒိၣ် တဖုအံၤလၢ နစုပူၤ+ ဒီးနကသ့ၣ်ညါ သပှၢ်တၢၢ်လၢ ယမ့ၢ် ယဟိဝၤယွၤလီၤ.’”+
၂၉ အဝဲသ့ၣ် ဆီလီၤအသးခံဒူၣ် သဃီၤလိာ်သး နွံသီ ဒီးလၢနွံသီတသီန့ၣ် အဝဲသ့ၣ်စးထီၣ် ဒုးလိာ်အသးလီၤ. ဒီးလၢတနံၤအတီၢ်ပူၤန့ၣ် အံၣ်စရ့လးအသုးဖိ မၤနၢၤဝဲ စူၤရံအပှၤသုးဖိအဂၤ ၁၀၀,၀၀၀ လီၤ.
၃၀ မ့မ့ၢ်လၢ သုးဖိလၢအအိၣ်တ့ၢ်တဖၣ်န့ၣ် ဃ့ၢ်ကွံာ်ဝဲလၢ ဝ့ၢ်အဖ့းအပူၤလီၤ.+ ဘၣ်ဆၣ် သုးဖိလၢအအိၣ်တ့ၢ်တဖၣ် အဂၤ ၂၇,၀၀၀ န့ၣ် ဝ့ၢ်ဒူၣ် လီၤပှီၢ်ဘၣ်အဝဲသ့ၣ်လီၤ. စီၤဘ့ၣ်ဟဒး စ့ၢ်ကီးဃ့ၢ်ကွံာ်ဝဲ ဒီးလဲၤနုာ်ဝဲလၢ ဝ့ၢ်ပူၤ ဒီးလဲၤအိၣ်ခူသူၣ်ဝဲလၢ ဒၢးဖိလၢ တၢ်လီၢ်ခံတဖျၢၣ်အပူၤလီၤ.
၃၁ ဒီးစီၤဘ့ၣ်ဟဒး အခ့အပှၤတဖၣ် တဲအီၤလၢ “ပနၢ်ဟူဘၣ်လၢ အံၣ်စရ့လး အစီၤပၤတဖၣ်န့ၣ် မ့ၢ်စီၤပၤလၢ အသးကညီၤတၢ်လီၤ. ဝံသးစူၤ ဟ့ၣ်ပှၤအခွဲးလၢ ပကကူထီၣ် ထၢၣ်တၢ်ကံးညာ်* လၢပယီၢ်ဒ့လိၤ ဒီးပကဘံထီၣ် ပျံၤတဖၣ် လၢပခိၣ်သၣ်ဃံလိၤ ဒီးလဲၤလၢ အံၣ်စရ့လး အစီၤပၤအအိၣ်မီၤ. ဘၣ်သ့ၣ်သ့ၣ် အဝဲကပျဲမူနၤလီၤ.”+
၃၂ အဃိအဝဲသ့ၣ် ကူထီၣ် ထၢၣ်တၢ်ကံးညာ် လၢအယီၢ်ဒ့လိၤ ဒီးဘံထီၣ် ပျံၤတဖၣ် လၢအခိၣ်သၣ်ဃံ အလိၤလီၤ. ဒီးအဝဲသ့ၣ်လဲၤနုာ်လၢ အံၣ်စရ့လး အစီၤပၤအအိၣ် ဒီးတဲအီၤလၢ “နခ့နပှၤ စီၤဘ့ၣ်ဟဒး တဲဝဲလၢ ‘ဝံသးစူၤ မၤသံယၤတဂ့ၤ.’” ဒီးအံၣ်စရ့လး အစီၤပၤ တဲဆၢက့ၤဝဲလၢ “အဝဲမူဒံးဧါ. အဝဲကဲ ယဒီပုၢ်ဝဲၢ်ခွါလီၤ.”
၃၃ ဒီးပှၤပိာ်ခွါတဖၣ်န့ၣ် ပာ်ဝဲလၢ တၢ်ပနီၣ်လၢအဂ့ၤ ဒီးနာ်န့ၢ်အတၢ်ကတိၤ တဘျီဃီအဃိ အဝဲသ့ၣ်တဲဆၢဝဲလၢ “စီၤဘ့ၣ်ဟဒးန့ၣ် ကဲနဒီပုၢ်ဝဲၢ်ခွါလီၤ.” ဒီးစီၤပၤ တဲဝဲလၢ “လဲၤကိးန့ၢ်အီၤတက့ၢ်.” ဝံၤဒီး စီၤဘ့ၣ်ဟဒး လဲၤလၢ စီၤပၤအအိၣ် ဒီးစီၤပၤ ကွဲထီၣ်အီၤလၢ လ့ၣ်ကဟၣ်အပူၤလီၤ.
၃၄ ဒီးစီၤဘ့ၣ်ဟဒး တဲဘၣ်စီၤပၤလၢ “ဝ့ၢ်တဖၣ် လၢယပၢ်ဟံးန့ၢ်လၢ နပၢ်အအိၣ်န့ၣ် ယကဟ့ၣ်က့ၤနၤ ဒီးနတ့ထီၣ် ပှၤဆါတၢ်ပှ့ၤတၢ်အလီၢ်လၢ ဝ့ၢ်ဒၤမ့ၤစ့းအပူၤ ဒ်ယပၢ်တ့ထီၣ်တ့ၢ်ဝဲလၢ ဝ့ၢ်ၡၤမရံ အပူၤအသိး သ့ဝဲလီၤ.”
ဒီးစီၤအၤဃာ် တဲဆၢက့ၤဝဲလၢ “ခီဖျိလၢ နမၤတၢ်အၢၣ်လီၤဒီး ယၤဒ်အံၤအဃိ ယကပျဲက့ၤနၤလီၤ.”
ဒီးစီၤအၤဃာ် မၤတၢ်အၢၣ်လီၤဒီး စီၤဘ့ၣ်ဟဒး ဒီးပျဲက့ၤအီၤလီၤ.
၃၅ ဒ်ယဟိဝၤယွၤ မၤလိာ်ဝဲအသိး ပှၤလၢအပၣ်ဃုာ်လၢ ဝံအဖိခွါတဖၣ်+ အကျါတဂၤ* တဲဘၣ်အသကိးလၢ “ဝံသးစူၤ ထိယၤတထံၣ်.” ဘၣ်ဆၣ် ပှၤတဂၤန့ၣ် တထိအီၤဘၣ်.
၃၆ အဃိ အဝဲတဲဆၢက့ၤ အသကိးလၢ “ခီဖျိလၢ နတဒိကနၣ် ယဟိဝၤယွၤ အကလုၢ်ဘၣ်အဃိ ဖဲနဟးထီၣ်ကွံာ်လၢ ယအိၣ်အခါ တဘျီဃီန့ၣ် ခ့ယုၢ်တဒု ကမၤသံနၤလီၤ.” ဒီးဖဲအသကိးတဂၤန့ၣ် ဟးထီၣ်ကွံာ်လၢ အအိၣ်ဝံၤအလီၢ်ခံ ခ့ယုၢ်တဒု မၤသံအီၤလီၤ.
၃၇ ဒီးအဝဲထံၣ် ပှၤပိာ်ခွါလၢ အဂၤတဂၤ ဒီးတဲဝဲလၢ “ဝံသးစူၤ ထိယၤတထံၣ်.” ဒီးပှၤပိာ်ခွါတဂၤန့ၣ် ထိအီၤဒီး အဘၣ်ဒိဝဲလီၤ.
၃၈ ဒီးဝံတဂၤန့ၣ် မၤလီၤဆီထီၣ်အသး ခီဖျိ ဘိၣ်ထီၣ်ဝဲအမဲာ်ချံဒီး တၢ်ကံးညာ် ဒီးလဲၤအိၣ်ခိး စီၤပၤလၢ ကျဲကပၤလီၤ.
၃၉ ဖဲစီၤပၤဟဲအခါ ဝံတဂၤန့ၣ် ကိးထီၣ်လၢ စီၤပၤအအိၣ် ဒီးတဲဝဲလၢ “နခ့နပှၤ ယၤအံၤ ယလဲၤထီၣ်လၢ တၢ်ဒုးကျါ ဒီးဖဲန့ၣ် ပှၤသုးဖိတဂၤလၢ အကဟးထီၣ်လၢ တၢ်ဒုးပျီပူၤန့ၣ် ဟဲကိးပှၤပိာ်ခွါတဂၤလၢ ယအိၣ် ဒီးတဲယၤလၢ ‘ကွၢ်ထွဲ ပှၤတဂၤအံၤ ဂ့ၤဂ့ၤနီၤ. အဝဲမ့ၢ်လီၤမၢ်န့ၣ် နဘၣ်တူၢ်ၡူ နသးသမူလၢ အသးသမူအလီၢ်+ မ့တမ့ၢ်ဘၣ်န့ၣ် နကဘၣ်ဟ့ၣ်လီၤ စ့ညၣ် တတၤလၣ်လီၤ.’*
၄၀ ဖဲယမၤတၢ် လၢအံၤတမံၤ လၢန့ၣ်တမံၤအခါ ပှၤပိာ်ခွါတဂၤန့ၣ် လီၤမၢ် သတူၢ်ကလာ်လီၤ.” ဒီးအံၣ်စရ့လး အစီၤပၤတဲအီၤလၢ “နစံၣ်ညီၣ်လီၤ နနီၢ်ကစၢ်သးလံ, နကဘၣ်တၢ်စံၣ်ညီၣ် ဒ်နတဲအသိးလီၤ.”
၄၁ ဒီးအဝဲကရီဘ့ၣ်လီၤကွံာ် တၢ်ကံးညာ် လၢအမဲာ်ချံလိၤ ဒီးအံၣ်စရ့လး အစီၤပၤ သ့ၣ်ညါဝဲလၢ အမ့ၢ်ဝံတဂၤလီၤ.+
၄၂ ဒီးဝံတဂၤန့ၣ် တဲဘၣ် စီၤပၤလၢ “ယဟိဝၤယွၤ တဲဝဲလၢ ‘ခီဖျိလၢ နပျၢ်ကွံာ် ပှၤလၢ ယတဲလၢ အကဘၣ် တၢ်မၤဟးဂီၤကွံာ်အီၤ တဂၤန့ၣ်အဃိ+ နဘၣ်တူၢ်ၡူ နသးသမူလၢ အသးသမူအလီၢ်+ ဒီးနပှၤ ကဘၣ်သံက့ၤလၢ အပှၤအလီၢ်လီၤ.’”+
၄၃ အဃိ အံၣ်စရ့လးအစီၤပၤ အသးအ့န့ ဒီးအသးဟးဂီၤ ဒီးက့ၤဝဲလၢ အဟံၣ်လၢ ဝ့ၢ်ၡၤမရံန့ၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ တလၢဝဲလၢ.
^ မ့ၢ်စ့ၢ်ကီး “မၤသံ.”
^ ကွၢ် တၢ်ကတိၤအခီပညီ.
^ ဖျါလၢ “ဝံအဖိခွါတဖၣ်” န့ၣ်အဲၣ်ဒိးတဲဝဲ ဝံတဖၣ်လၢ အကထီၣ် တၢ်မၤလိတပူၤဃီ မ့တမ့ၢ် ဝံတဖၣ်လၢ အမၤသကိးတၢ်.
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
