၁ တံၤမသ့း ၄:၁-၁၆
၄ ဘၣ်ဆၣ် ကစၢ်ယွၤ အသးစီဆှံတဲဝဲ လီၤတံၢ်လီၤဆဲးလၢ ခါဆူညါန့ၣ် ပှၤတနီၤနီၤကပာ်တ့ၢ်ကွံာ် တၢ်စူၢ်တၢ်နာ်လီၤ. အဝဲသ့ၣ်ကဒိကနၣ် တၢ်ကတိၤလၢ အကမၣ်တဖၣ်လၢ အဖျါလၢ အဟဲလၢ ကစၢ်ယွၤအအိၣ်+ ဒီးကဒိကနၣ်ဝဲ တၢ်ဝံတၢ်နါ အတၢ်သိၣ်လိတဖၣ်လီၤ.
၂ ဒီးအဝဲသ့ၣ် ကဒိကနၣ်ဝဲ ပှၤလၢ အပာ်မၤအသးတဖၣ် အတၢ်လံၣ်တၢ်လီလီၤ.+ ပှၤတဖၣ်အံၤ အသးလၢအသ့ၣ်ညါဒၣ်တၢ်န့ၣ် လီၤဂာ်ဒ်သိးဒီး အဘၣ်ဒီးထးကိၢ်အဃိ တတူၢ်ဘၣ်လၢ အဆါလၢၤဘၣ်.
၃ အဝဲသ့ၣ်တြီဝဲဒ်သိး ပှၤသုတဆီဟံၣ်ဆီဃီတဂ့ၤ အဂီၢ်လီၤ.+ ဒီးတၢ်အီၣ်တၢ်အီလၢ+ ကစၢ်ယွၤ တ့လီၤဝဲဒ်သိး ပှၤလၢ အအိၣ်ဒီးတၢ်နာ်+ ဒီးသ့ၣ်ညါ တၢ်မ့ၢ်တၢ်တီ လီၤတံၢ်လီၤဆဲးတဖၣ် ကအီၣ်ဝဲလၢ+ တၢ်စံးဘျုးစံးဖှိၣ်အပူၤန့ၣ် အဝဲသ့ၣ် မၤလိာ်ဝဲလၢ ပှၤကဘၣ်ဟးဆှဲးဝဲလီၤ.
၄ ဘၣ်ဆၣ် ကစၢ်ယွၤ အတၢ်ဘၣ်တ့ခဲလၢာ်န့ၣ် ဂ့ၤဝဲလီၤ.+ ဒီးပှၤမ့ၢ်အီၣ်အီၤလၢ တၢ်စံးဘျုးစံးဖှိၣ်အပူၤန့ၣ် တၢ်လၢ ပှၤကဘၣ်ဟးဆှဲးအီၤ တအိၣ်နီတမံၤဘၣ်,+
၅ မ့ၢ်လၢတၢ်အီၣ်န့ၣ် စီဆှံထီၣ်ဝဲလၢ ကစၢ်ယွၤ အကလုၢ်ကထါ ဒီးတၢ်ထုကဖၣ်အဃိလီၤ.
၆ နမ့ၢ်ဟ့ၣ်ကူၣ် ဒီပုၢ်ဝဲၢ်တဖၣ်လၢ တၢ်ဟ့ၣ်ကူၣ်အံၤန့ၣ် နကမ့ၢ်ယ့ၣ်ၡူးခရံာ် အခ့အပှၤလၢ အဂ့ၤလီၤ. ဒီးနကပာ်ဖျါထီၣ်လၢ နမ့ၢ်ပှၤလၢ အန့ၢ်ဂံၢ်န့ၢ်ဘါ ခီဖျိလၢ တၢ်မ့ၢ်တၢ်တီ ဒီးတၢ်သိၣ်လိနဲၣ်လိလၢအဂ့ၤ လၢနမၤထွဲအီၤ လီၤတံၢ်လီၤဆဲးအဃိလီၤ.+
၇ ဘၣ်ဆၣ် ပူအကမၣ်တဖၣ်လၢ အထီဒါကစၢ်ယွၤ+ ဒ်သိးဒီး ပူလၢပိာ်မုၣ်သးပှၢ်တဖၣ် တဲဝဲန့ၣ် တဘၣ်ကနၣ်ဃုာ်အီၤတဂ့ၤ. လၢတၢ်န့ၣ်အလီၢ် ဂုာ်ကျဲးစၢးဆူၣ်ဆူၣ်* ဒ်သိး နကတုၤလၢ နဖီတၢၣ်လၢအမ့ၢ် တၢ်သးတီဒီးကစၢ်ယွၤ န့ၣ်တက့ၢ်.
၈ နီၢ်ခိအတၢ်ဟူးတၢ်ဂဲၤ အဘျုးအိၣ်ထဲတစဲးဖိလီၤ. မ့မ့ၢ် တၢ်သးတီဒီးကစၢ်ယွၤန့ၣ် အဘျုးအိၣ်လၢ တၢ်ခဲလၢာ်အဂီၢ်, မ့ၢ်လၢ အဒုးအိၣ်ထီၣ် တၢ်ဆိၣ်ဂ့ၤတဖၣ်လၢ ပတၢ်အိၣ်မူ လၢဆၢကတီၢ်ခဲအံၤ ဒီးပတၢ်အိၣ်မူလၢ ကဟဲခါဆူညါအဂီၢ်အဃိလီၤ.+
၉ တၢ်ကတိၤအံၤ မ့ၢ်ဝဲတီဝဲ ဒီးပကြၢးတူၢ်လိာ်အီၤ လၢပသးဒီဖျၢၣ်လီၤ.
၁၀ အဃိ ပမၤတၢ်ဆူၣ်ဆူၣ် ဒီးပထဲးဂံၢ်ထဲးဘါလီၤ.+ ပမၤဒ်န့ၣ် မ့ၢ်လၢ ပမုၢ်လၢ်တၢ်လၢ ကစၢ်ယွၤလၢအမူဝဲတဂၤန့ၣ် အအိၣ်လီၤ. အဝဲမ့ၢ်ကစၢ်လၢ အအုၣ်က့ၤခီၣ်က့ၤ+ ပှၤအကလုာ်ကလုာ်+ လီၤဆီဒၣ်တၢ် ပှၤလၢအသးတီတဖၣ်လီၤ.
၁၁ ဆဲးဟ့ၣ်လီၤ တၢ်မၤလိာ်တဖၣ်အံၤ ဒီးသိၣ်လိ တၢ်ဂ့ၢ်တဖၣ်အံၤတက့ၢ်.
၁၂ တဘၣ်ပျဲ ပှၤဆိကမိၣ်ဆံးနၤလၢ နမ့ၢ်ပှၤသးစၢ်အဃိ နီတဂၤတဂ့ၤ. လၢတၢ်စံးတၢ်ကတိၤမ့ၢ်ဂ့ၤ, လုၢ်လၢ်သကဲာ်ပဝးမ့ၢ်ဂ့ၤ, တၢ်အဲၣ်တၢ်ကွံမ့ၢ်ဂ့ၤ, တၢ်နာ်မ့ၢ်ဂ့ၤ, တၢ်စီဆှံမ့ၢ်ဂ့ၤ ကဲထီၣ်တၢ်ဒိတၢ်တဲာ် လၢပှၤလၢအသးတီတဖၣ် အဂီၢ်တက့ၢ်.
၁၃ တချုးလၢ ယလဲၤတုၤဒံးဘၣ်န့ၣ် ဆဲးဂုာ်ကျဲးစၢးလၢ တၢ်ဖးလံာ်ဖးလဲၢ်လၢ ကမျၢၢ်မဲာ်ညါ,+ တၢ်ဟ့ၣ်ဂံၢ်ဟ့ၣ်ဘါပှၤဂၤ ဒီးတၢ်သိၣ်လိသီလိတၢ်တက့ၢ်.
၁၄ တဘၣ်ကွၢ်ကပာ်ကွံာ် တၢ်ဟ့ၣ်လၢအအိၣ်ဒီးနၤတဂ့ၤ. နဒိးန့ၢ်ဘၣ်တၢ်ဟ့ၣ်အံၤ ခီဖျိလၢ ဝံအတၢ်စံးပာ်ဖဲ တၢ်အိၣ်ဖှိၣ်သးပှၢ်ကရူၢ် ပာ်ထီၣ်အစုလၢ နလိၤအခါလီၤ.+
၁၅ ဆိကမိၣ်ထံ တၢ်ဂ့ၢ်တဖၣ်န့ၣ်ဒီး သးစၢၢ်ဆၢအီၤသပှၢ်တၢၢ် ဒ်သိး နတၢ်လဲၤထီၣ်လဲၤထီ ကအိၣ်ဖျါထီၣ် လၢပှၤခဲလၢာ် အမဲာ်ညါတက့ၢ်.
၁၆ ပလီၢ်နသး ဘၣ်ဃးဒီး နနီၢ်ကစၢ် ဒီးတၢ်လၢနသိၣ်လိတဖၣ်+ ထီဘိတက့ၢ်. ဆဲးမၤထွဲ တၢ်ဂ့ၢ်တဖၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် နကအုၣ်က့ၤခီၣ်က့ၤလီၤ နနီၢ်ကစၢ် ဒီးပှၤလၢ အဒိကနၣ်နၤတဖၣ်+ စ့ၢ်ကီးလီၤ.
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “သိၣ်လိမၤသ့ထီၣ်နသး.”
