၁ ၡမူၤအ့လး ၁၁:၁-၁၅
၁၁ ဒီးပှၤဧၣ်မိၣ်ဖိ+ စီၤနၤဃၣ် ဟဲထီၣ်ဆီလီၤအသး ဒ်သိးကဒုးဝဲ ဝ့ၢ်ယၤဘ့ၣ်+ လၢကံးလဧးအဟီၣ်ကဝီၤ အပူၤလီၤ. ပှၤပိာ်ခွါခဲလၢာ် လၢအအိၣ်လၢ ဝ့ၢ်ယၤဘ့ၣ်န့ၣ် တဲဘၣ် စီၤနၤဃၣ်လၢ “မၤတၢ်အၢၣ်လီၤအီလီၤ ဒီးပှၤ ဒီးပကမၤနတၢ်လီၤ.”
၂ ပှၤဧၣ်မိၣ်ဖိ စီၤနၤဃၣ် တဲအဝဲသ့ၣ်လၢ “ဒ်သိးယကမၤ တၢ်အၢၣ်လီၤအီလီၤတခါအံၤ ဒီးသုအဂီၢ် ကျဲအိၣ်ထဲတဘိလီၤ. သုကိးဂၤဒဲး အမဲာ်ချံ လၢအထွဲတခီန့ၣ် ကဘၣ်တၢ်တူခွဲးထီၣ်အီၤလီၤ. ယကမၤဒ်အံၤ ဒ်သိး ယကမၤမဲာ်ဆှး ပှၤအံၣ်စရ့လးဖိ ခဲလၢာ်အဂီၢ်လီၤ.”
၃ ဝ့ၢ်ယၤဘ့ၣ် အပှၤသူၣ်က့သးပှၢ်တဖၣ် တဲဆၢအီၤလၢ “ဟ့ၣ်ဆိပှၤ တၢ်ဆၢကတီၢ် နွံသီ ဒ်သိး ပကဆှၢလီၤ ပှၤစိာ်တၢ်ကစီၣ်ဖိတဖၣ်လၢ ကီၢ်အံၣ်စရ့လးဒီဘ့ၣ်အဂီၢ် တက့ၢ်. ဒီးပှၤလၢ အကမၤထူၣ်ဖျဲးထီၣ်ပှၤ မ့ၢ်တအိၣ်ဘၣ်န့ၣ် ပကဟ့ၣ်လီၤကွံာ် ပသးလၢ သုစုပူၤလီၤ.”
၄ လၢခံ ပှၤစိာ်တၢ်ကစီၣ်ဖိတဖၣ် လဲၤတုၤလၢ ဝ့ၢ်ကံဘဧၤ+ လၢအမ့ၢ် စီၤစီလူးအဝ့ၢ် ဒီးတဲဘၣ် တၢ်ကတိၤတဖၣ်အံၤလၢ ပှၤဂီၢ်မုၢ် အမဲာ်ညါလီၤ. ဒီးပှၤဂီၢ်မုၢ်ခဲလၢာ် ဟီၣ်ကိးပသူထီၣ်ဝဲ ဖးဒိၣ်လီၤ.
၅ မ့မ့ၢ် စီၤစီလူးန့ၣ် ဟဲက့ၤလၢ ပျီပူၤ လၢကျီၢ်တဖု အလီၢ်ခံလီၤ. ဒီးစီၤစီလူး တဲဝဲလၢ “ပှၤဂီၢ်မုၢ်တဖၣ်အံၤ အဘၣ်မနုၤလဲၣ်. ဘၣ်မနုၤအဃိ အဝဲသ့ၣ် ဟီၣ်လဲၣ်.” အဃိ အဝဲသ့ၣ် တဲဘၣ်အီၤလၢ ပှၤပိာ်ခွါ လၢအအိၣ်လၢ ဝ့ၢ်ယၤဘ့ၣ် အတၢ်ကတိၤတဖၣ်လီၤ.
၆ ဖဲစီၤစီလူး နၢ်ဟူဘၣ် တၢ်ကတိၤတဖၣ်အံၤအခါ ကစၢ်ယွၤ အသးစီဆှံ ဟ့ၣ်စိဟ့ၣ်ကမီၤအီၤလီၤ.+ ဒီးအသးပှံၢ်ထီၣ်တၢ် ဒိၣ်မး
၇ အဃိ အဝဲဟံးန့ၢ် ကျီၢ်ဖါခံဒု ဒီးဒီၣ်တဲာ်အီၤ တကူာ်ဘၣ်တကူာ် ဝံၤဒီး အဝဲမၢ ပှၤစိာ်တၢ်ကစီၣ်ဖိတဖၣ် လဲၤဆှၢတၢ်ညၣ် အကူာ်တဖၣ်န့ၣ်လၢ ကီၢ်အံၣ်စရ့လး ဒီဘ့ၣ်အပူၤလီၤ. ဒီးပှၤစိာ်တၢ်ကစီၣ်ဖိတဖၣ် တဲဝဲလၢ “ပှၤလၢအတပိာ်ထီၣ် စီၤစီလူး ဒီးစီၤၡမူၤအ့လး အခံဘၣ်န့ၣ် အဝဲသ့ၣ် အကျီၢ်တဖၣ် ကဘၣ်တၢ်မၤအီၤ ဒ်အံၤစ့ၢ်ကီးလီၤ.” ဒီးတၢ်ပျံၤယဟိဝၤယွၤ လီၤဘၣ်လၢ ပှၤဂီၢ်မုၢ်တဖၣ်အလိၤအဃိ အဝဲသ့ၣ် ဟဲထီၣ်သကိးဝဲ ဒီးအိၣ်ဝဲဒီး တၢ်တိာ်ပာ် တမံၤဃီလီၤ.
၈ ဝံၤဒီး လၢဝ့ၢ်ဘ့စ့းန့ၣ် စီၤစီလူးဂံၢ်ဝဲ အဝဲသ့ၣ် ဒီးပှၤအံၣ်စရ့လးဖိ အိၣ်ဝဲ အဂၤ ၃၀၀,၀၀၀ ဒီးပှၤလၢယူဒၤအဒူၣ်ကျါ အိၣ်ဝဲ အဂၤ ၃၀,၀၀၀ လီၤ.
၉ အဝဲသ့ၣ် တဲပှၤစိာ်တၢ်ကစီၣ်ဖိ လၢအဟဲဝဲ တဖၣ်န့ၣ်လၢ “သုကဘၣ် တဲပှၤပိာ်ခွါတဖၣ်လၢ ဝ့ၢ်ယၤဘ့ၣ် လၢကံးလဧးအဟီၣ်ကဝီၤအပူၤ ဒ်အံၤ, ‘ခဲမုၢ်ဆ့ၣ် ဖဲမုၢ်ဟဲကိၢ်ထီၣ် အဆၢကတီၢ်န့ၣ် ပကမၤထူၣ်ဖျဲးထီၣ်သုလီၤ.’” ဒီးပှၤစိာ်တၢ်ကစီၣ်ဖိတဖၣ် က့ၤတဲဘၣ် ပှၤပိာ်ခွါတဖၣ်လၢ ဝ့ၢ်ယၤဘ့ၣ် လၢကံးလဧးအဟီၣ်ကဝီၤအပူၤ ဒီးအဝဲသ့ၣ် သးခုဒိၣ်မးလီၤ.
၁၀ အဃိ ပှၤပိာ်ခွါတဖၣ် လၢဝ့ၢ်ယၤဘ့ၣ်န့ၣ် တဲဝဲ စီၤနၤဃၣ်လၢ “ခဲမုၢ်ဆ့ၣ်န့ၣ် ပကဟ့ၣ်လီၤပသးလၢ သုစုပူၤလီၤ. ဒီးသုမၤပှၤဖဲ သုအဲၣ်ဒိးမၤပှၤသ့လီၤ.”+
၁၁ လၢခံတသီ စီၤစီလူး နီၤဖး အသုးဖိတဖၣ် သၢဒူၣ် ဒီးတချုးလၢ မုၢ်ဝါထီၣ်ဒံးဘၣ်န့ၣ်* အဝဲသ့ၣ် လဲၤနုာ်လီၤလၢ ဒုၣ်ဒါအဒဲကဝီၤပူၤ ဒီးကျီသံ ပှၤဧၣ်မိၣ်ဖိတဖၣ်+ တုၤလၢ မုၢ်ဟဲကိၢ်ထီၣ် အဆၢကတီၢ်လီၤ. ဒီးပှၤလၢ အအိၣ်မူဒံး လၢအဝဲသ့ၣ်အကျါန့ၣ် လီၤမုၢ်ပြံပြါဝဲအဃိ အဝဲသ့ၣ် တဃ့ၢ်ဝဲခံဂၤ တပူၤဃီဘၣ်.
၁၂ ဒီးပှၤဂီၢ်မုၢ် တဲဘၣ် စီၤၡမူၤအ့လးလၢ “ပှၤလၢအတဲလၢ ‘မ့ၢ်စီၤစီလူး ကကဲပစီၤပၤဧါ’+ န့ၣ်မ့ၢ်မတၤ တဖၣ်လဲၣ်. ဟဲကိးအဝဲသ့ၣ် လၢပအိၣ် ဒီးပကမၤသံ အဝဲသ့ၣ်လီၤ.”
၁၃ ဘၣ်ဆၣ် စီၤစီလူး တဲဝဲလၢ “တနံၤအံၤ မ့ၢ်လၢ ယဟိဝၤယွၤ မၤပူၤဖျဲးထီၣ် ပှၤအံၣ်စရ့လးဖိလံအဃိ ပှၤတဘၣ် မၤသံ ပှၤပိာ်ခွါ နီတဂၤဘၣ်.”+
၁၄ လၢခံ စီၤၡမူၤအ့လး တဲဘၣ် ပှၤဂီၢ်မုၢ်လၢ “ဟဲ, ပကလဲၤသကိးလၢ ဝ့ၢ်ကံးလကၤလး+ ဒီးပာ်ဂၢၢ်ပာ်ကျၢၤလၢ စီၤစီလူး မ့ၢ်စီၤပၤမီၤ.”+
၁၅ အဃိ ပှၤဂီၢ်မုၢ်ခဲလၢာ် လဲၤလၢ ဝ့ၢ်ကံးလကၤလး ဒီးဖဲဝ့ၢ်ကံးလကၤလးန့ၣ် အဝဲသ့ၣ် ပာ်ထီၣ် စီၤစီလူးလၢ စီၤပၤ လၢယဟိဝၤယွၤ အမဲာ်ညါလီၤ. ဝံၤဒီး အဝဲသ့ၣ် လုၢ်ထီၣ်ဝဲ တၢ်လုၢ်အိၣ်ဃူအိၣ်ဖိးတဖၣ် လၢယဟိဝၤယွၤ အအိၣ်လီၤ.+ စီၤစီလူး ဒီးပှၤအံၣ်စရ့လးဖိ ခဲလၢာ် သူၣ်ခုသးခုဒိၣ်မး ဒီးမၤဝဲ တၢ်သူၣ်ဖှံသးညီလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “ဖဲပှၤခိးတၢ်လၢ ဂီၤခီတတီၤ အဆၢကတီၢ်.” အဃိ ကဘၣ်ဖဲ ဂီၤခီ ခံနၣ်ရံၣ် တုၤလၢ ဂီၤခီ ဃုနၣ်ရံၣ်.
