၁ ၡမူၤအ့လး ၂၇:၁-၁၂
-
ပှၤဖလ့ၡသးဖိ ဟ့ၣ်လီၤဝ့ၢ်စံကလး လၢစီၤဒၤဝံးအအိၣ် (၁-၁၂)
၂၇ ဘၣ်ဆၣ် စီၤဒၤဝံး တဲလီၤအသးလၢ “မုၢ်ကအိၣ်ဝဲတနံၤဒု ယကသံလၢ စီၤစီလူး အစုပူၤလီၤ. ယမ့ၢ်ဃ့ၢ်ပူၤဖျဲးယသး လၢပှၤဖလ့ၡသးဖိ အကီၢ်န့ၣ် ကမ့ၢ်တၢ်လၢ အဂ့ၤကတၢၢ်လီၤ.+ အန့ၣ်မး စီၤစီလူး တဟးဃုယၤလၢ အံၣ်စရ့လး အဟီၣ်ကဝီၤအပူၤလၢၤဘၣ်+ ဒီးယကပူၤဖျဲးလၢ အစုပူၤလီၤ.”
၂ အဃိ စီၤဒၤဝံးဒီး အပှၤလၢအအိၣ်ဒီးအီၤ အဂၤ ၆၀၀+ န့ၣ်ဂဲၤဆၢထၢၣ် ဒီးလဲၤဝဲလၢ စီၤအၤကံၣ်+ လၢအမ့ၢ် ဝ့ၢ်ကၤသးအစီၤပၤ အအိၣ်လီၤ. စီၤအၤကံၣ်န့ၣ် အပၢ်မ့ၢ်ဝဲ စီၤမၤဧိးလီၤ.
၃ စီၤဒၤဝံး ဒီးအပှၤတဖၣ် ဃုာ်ဒီးအဝဲသ့ၣ်တဂၤစုာ်စုာ် အဟံၣ်ဖိဃီဖိန့ၣ် အိၣ်ဝဲဒီး စီၤအၤကံၣ်လၢ ဝ့ၢ်ကၤသးအပူၤလီၤ. ဒီးစီၤဒၤဝံး အမါခံဂၤ လၢအလဲၤအိၣ်ဒီးအီၤဖဲန့ၣ်န့ၣ် မ့ၢ်ဝဲ နီၢ်အဃံနိၣ်+ လၢအဟဲလၢ ဝ့ၢ်ယံးစရ့လး ဒီးပှၤကၢ်မ့ၤလးဖိ နီၢ်အဘံၤကါယံးလး+ လၢအမ့ၢ်တ့ၢ် စီၤနၤဘလးအမါလီၤ.
၄ ဖဲပှၤတဲဘၣ် စီၤစီလူးလၢ စီၤဒၤဝံး လဲၤဃ့ၢ်အိၣ်လၢ ဝ့ၢ်ကၤသးအခါ စီၤစီလူး တလူၤဃုအီၤလၢၤဘၣ်.+
၅ ဒီးစီၤဒၤဝံး တဲစီၤအၤကံၣ်လၢ “နမ့ၢ်ဘၣ်သူၣ်ဘၣ်သးယၤန့ၣ် ဟ့ၣ်ဒုးအိၣ်ယၤလၢ တၢ်လီၢ်တတီၤလၢ ဝ့ၢ်ဆံးဆံးဖိတဖျၢၣ်အပူၤမီၤ. နခ့နပှၤယၤအံၤ မ့ၢ်တအိၣ်ဘၣ်ဒီးနၤလၢ စီၤပၤအဝ့ၢ်ပူၤဘၣ်န့ၣ် ကဂ့ၤဒိၣ်ဝဲလီၤ.”
၆ အဃိ ဖဲနံၤအဝဲန့ၣ် စီၤအၤကံၣ် ဟ့ၣ်အီၤလၢ ဝ့ၢ်စံကလးလီၤ.+ လၢတၢ်န့ၣ်အဃိ ဝ့ၢ်စံကလးန့ၣ် ကဲဝဲ ပှၤယူဒၤဖိ အစီၤပၤတဖၣ် အဝ့ၢ် တုၤလီၤလၢ မုၢ်မဆါတနံၤအံၤလီၤ.
၇ စီၤဒၤဝံး အိၣ်ဝဲလၢ ပှၤဖလ့ၡသးဖိအကီၢ်လၢ ဝ့ၢ်ဆံးဆံးဖိတဖျၢၣ်အပူၤန့ၣ် ယံာ်ဝဲ တနံၣ် ဒီးလွံၢ်လါလီၤ.+
၈ မ့ၢ်လၢ ပှၤကၡူၢ်ဖိ,+ ပှၤက့စ့ာ်ဖိ ဒီးပှၤဧမၤလ့းဖိန့ၣ်+ အိၣ်ဝဲလၢ တၢ်လီၢ်လၢ အစးထီၣ်သးလၢ တ့လ့ၣ် ပၢၢ်တုၤလၢ ၡူၢ်+ ဒီးတုၤလၢ ကီၢ်အဲၤကူပတူးအဃိ စီၤဒၤဝံး ဒီးအပှၤတဖၣ် လဲၤနုာ်လီၤဒုး အဝဲသ့ၣ်လီၤ.
၉ ဖဲစီၤဒၤဝံး လဲၤဒုးတၢ်လၢ တၢ်လီၢ်တဖၣ်န့ၣ်အခါ ပှၤပိာ်မုၣ်မ့ၢ်ဂ့ၤ ပှၤပိာ်ခွါမ့ၢ်ဂ့ၤ အဝဲတပာ်မူဝဲဘၣ်.+ မ့မ့ၢ် သိ, မဲာ်တဲးလဲး, ကျီၢ်, ကသ့ၣ်ယီၤ, ကီၤလၤအူး ဒီးတၢ်ကူတၢ်ကၤတဖၣ်န့ၣ် အဝဲဟံးန့ၢ်ဝဲ ဝံၤဒီး အဝဲဟဲက့ၤကဒါက့ၤလၢ စီၤအၤကံၣ် အအိၣ်လီၤ.
၁၀ ဒီးစီၤအၤကံၣ် သံကွၢ်အီၤလၢ “တနံၤအံၤ နလဲၤဒုးတၢ်ဖဲလဲၣ်.” စီၤဒၤဝံးတဲဆၢက့ၤလၢ “ယလဲၤဒုးတၢ်လၢ ယူဒၤ အကလံၤထံးတခီ,+ ယလဲၤဒုးတၢ်လၢ ပှၤယရၤဃမအ့လးဖိ+ အတၢ်လီၢ် လၢအကလံၤထံးတခီ ဒီးယလဲၤဒုးတၢ်လၢ ပှၤက့ၣ်ဖိအတၢ်လီၢ် လၢအကလံၤထံးတခီလီၤ.”+
၁၁ ဒီးစီၤဒၤဝံး တဲလီၤအသးလၢ “ဘၣ်သ့ၣ်သ့ၣ် ပှၤတဖၣ်န့ၣ် ကတဲဖျါထီၣ်ပဂ့ၢ်လၢ ပှၤကၤသးဖိ ဒီးကတဲဖျါထီၣ် တၢ်လၢယမၤတဖၣ်လီၤ.” အဃိ ဒ်သိး ပှၤသုတဟဲက့ၤကိး ပှၤပိာ်မုၣ်မ့ၢ်ဂ့ၤ ပှၤပိာ်ခွါမ့ၢ်ဂ့ၤ လၢဝ့ၢ်ကၤသးအပူၤတဂ့ၤအဂီၢ် စီၤဒၤဝံး တပာ်မူအဝဲသ့ၣ် နီတဂၤဘၣ်. (ဒီးဖဲ စီၤဒၤဝံးအိၣ်လၢ ပှၤဖလ့ၡသးဖိ အကီၢ်လၢ ဝ့ၢ်ဆံးဆံးဖိတဖျၢၣ်အပူၤအခါ အဝဲမၤဝဲဒ်န့ၣ် ထီဘိလီၤ.)
၁၂ ဒီးစီၤအၤကံၣ် နာ်န့ၢ်ဝဲ စီၤဒၤဝံး ဒီးစီၤအၤကံၣ် တဲလီၤအသးလၢ ‘စီၤဒၤဝံးအပှၤကလုာ် ပှၤအံၣ်စရ့လးဖိန့ၣ် သးဟ့အီၤသပှၢ်တၢၢ်လံ အဃိ အကကဲ ယခ့ယပှၤထီဘိလီၤ.’
