၁ ၡမူၤအ့လး ၂၈:၁-၂၅
-
စီၤစီလူး လဲၤလၢ ပှၤလၢအဆဲးကျိးဒီး ပှၤသံတဖၣ်အအိၣ် လၢဝ့ၢ်ဧ့ၣ်ဒိၢ် (၁-၂၅)
၂၈ ဖဲန့ၣ်အဆၢကတီၢ် ပှၤဖလ့ၡသးဖိ ကိးဖှိၣ်အသုးမုၢ်တဖၣ် လၢကဒုးတၢ်ဒီး ပှၤအံၣ်စရ့လးဖိ အဂီၢ်လီၤ.+ အဃိ စီၤအၤကံၣ် တဲဘၣ်စီၤဒၤဝံးလၢ “နသ့ၣ်ညါ သပှၢ်တၢၢ်လၢ နၤဒီးနပှၤတဖၣ် ကဘၣ်လဲၤဒီးယၤ လၢတၢ်ဒုးပူၤလီၤ.”+
၂ စီၤဒၤဝံး တဲဆၢက့ၤ စီၤအၤကံၣ်လၢ “ယကမၤမနုၤလဲၣ်န့ၣ် နသ့ၣ်ညါ သပှၢ်တၢၢ်လီၤ.” ဒီးစီၤအၤကံၣ် တဲစီၤဒၤဝံးလၢ “အဃိန့ၣ် ယကပာ်ထီၣ်နၤလၢ ပှၤတဂၤလၢ အဒီသဒၢ ယသးသမူ ထီဘိလီၤ.”+
၃ စီၤၡမူၤအ့လး သံဝဲလံ. ပှၤအံၣ်စရ့လးဖိခဲလၢာ် ဟီၣ်လၢအဃိ ဒီးခူၣ်လီၤကွံာ်အီၤလၢ အနီၢ်ကစၢ်အဝ့ၢ် လၢအမ့ၢ် ဝ့ၢ်ရၤမါလီၤ.+ ဒီးစီၤစီလူး မၤလီၤမၢ်ကွံာ် ပှၤလၢအဆဲးကျိးဒီးပှၤသံ ဒီးပှၤလၢအဟီဆိပာ်စၢၤတၢ်တဖၣ် လၢကီၢ်ပူၤလံ.+
၄ ပှၤဖလ့ၡသးဖိ ပာ်ဖှိၣ်ထီၣ်ဝဲအသး ဒီးလဲၤဆီလီၤအသးလၢ ဝ့ၢ်ၡူန့ၣ်လီၤ.+ အဃိ စီၤစီလူး ကိးဖှိၣ်ဝဲ ပှၤအံၣ်စရ့လးဖိ ခဲလၢာ် ဒီးအဝဲသ့ၣ် လဲၤဆီလီၤအသးလၢ ကစၢၢ်ကံးလဘိ အလိၤလီၤ.+
၅ ဖဲစီၤစီလူးထံၣ်ဝဲ ပှၤဖလ့ၡသးဖိ အဒဲကဝီၤအခါ အဝဲပျံၤတၢ် ဒီးအသးကနိး ဒိၣ်မးလီၤ.+
၆ စီၤစီလူး မ့ၢ်သံကွၢ်တၢ်လၢ ယဟိဝၤယွၤ+ အအိၣ်သနာ်က့ ယဟိဝၤယွၤ တစံးဆၢအီၤ လၢတၢ်မံမီၢ်အပူၤမ့ၢ်ဂ့ၤ, လၢအူရံၣ်မ့ၢ်ဂ့ၤ+ ဒီးခီဖျိလၢ ဝံတဖၣ်မ့ၢ်ဂ့ၤ နီတဘျီလၢၤဘၣ်.
၇ လၢခံ စီၤစီလူးတဲဘၣ် အခ့အပှၤတဖၣ်လၢ “ဃုန့ၢ်ယၤ ပိာ်မုၣ်တဂၤလၢ အဆဲးကျိးဒီးပှၤသံ+ ဒ်သိးယကလဲၤ သံကွၢ်တၢ်လၢ အအိၣ်တထံၣ်.” အခ့အပှၤတဖၣ် တဲဆၢက့ၤအီၤလၢ “လၢဝ့ၢ်ဧ့ၣ်ဒိၢ်အပူၤန့ၣ်+ ပှၤပိာ်မုၣ်လၢ အဆဲးကျိးဒီးပှၤသံန့ၣ် အိၣ်ဝဲတဂၤလီၤ.”
၈ ဒီးစီၤစီလူး မၤလီၤဆီထီၣ်အသး ဒီးကူထီၣ်ကၤထီၣ် တၢ်ကူတၢ်ကၤအဂၤတဖၣ် ဒီးလဲၤဝဲဒီးအပှၤခံဂၤလၢ ပိာ်မုၣ်တဂၤန့ၣ်အအိၣ် လၢမုၢ်နၤခီလီၤ. ဒီးစီၤစီလူးတဲဝဲ “ဝံသးစူၤ ဆဲးကျိးဒီးပှၤသံ+ ဒီးကိးထီၣ်န့ၢ်ယၤ ပှၤတဂၤလၢ ယကတဲဘၣ်နၤ ဒီးဖးတၢ်လၢ အကမၤအသးလၢ ခါဆူညါတက့ၢ်.”
၉ ဘၣ်ဆၣ် ပိာ်မုၣ်န့ၣ် တဲဘၣ်အီၤလၢ “တၢ်လၢ စီၤစီလူး မၤဝဲတဖၣ်န့ၣ် နကသ့ၣ်ညါဧါသၢၤ. အဝဲ မၤလီၤမၢ်ကွံာ် ပှၤလၢအဆဲးကျိးဒီး ပှၤသံတဖၣ် ဒီးပှၤလၢ အဟီဆိပာ်စၢၤတၢ်တဖၣ် လၢကီၢ်ပူၤလီၤ.+ ဘၣ်မနုၤအဃိ နဒိးလီၤ ပျံၤသကွီၤလၢယဂီၢ် ဒ်သိးယကတုၤလၢ တၢ်သံလဲၣ်.”+
၁၀ ဒီးစီၤစီလူး အၢၣ်လီၤ ပိာ်မုၣ်တဂၤန့ၣ်လၢ ယဟိဝၤယွၤ အမဲာ်ညါလၢ “ဒ်ယဟိဝၤယွၤ မ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤနၤလၢ ဘၣ်ဃးဒီး တၢ်ဂ့ၢ်တခါအံၤန့ၣ် ပှၤတပာ်ဒ့ၣ်ပာ်ကမၣ်နၤ နီတမံၤဘၣ်.”
၁၁ ဒီးပိာ်မုၣ်တဂၤန့ၣ် တဲဘၣ်အီၤလၢ “ယကဘၣ် ကိးထီၣ်န့ၢ်နၤ မတဂၤလဲၣ်.” စီၤစီလူး တဲဆၢက့ၤလၢ “ကိးထီၣ်န့ၢ်ယၤ စီၤၡမူၤအ့လး တက့ၢ်.”
၁၂ ဖဲပိာ်မုၣ်တဂၤန့ၣ် ထံၣ်ဝဲ “စီၤၡမူၤအ့လး”*+ အခါ အဝဲကိးပသူထီၣ် လၢအကလုၢ်ဖးဒိၣ် ဒီးတဲဘၣ် စီၤစီလူးလၢ “နကဲစီၤစီလူးလီၤမၢၤ. ဘၣ်မနုၤအဃိ နတဲလံၣ်ယၤလဲၣ်.”
၁၃ စီၤပၤတဲဘၣ် ပိာ်မုၣ်တဂၤန့ၣ်လၢ “ပျံၤတၢ်တဂ့ၤ. နထံၣ်မနုၤလဲၣ်.” ဒီးပိာ်မုၣ်တဂၤန့ၣ် တဲဆၢက့ၤအီၤလၢ “ယထံၣ် ပှၤလၢအလီၤဂာ် ဒ်သိးဒီးယွၤတဂၤ ဟဲထီၣ်လၢ ဟီၣ်ခိၣ်လာ်လီၤ.”
၁၄ တဘျီဃီန့ၣ် စီၤစီလူး သံကွၢ်ပိာ်မုၣ်န့ၣ်လၢ “အဝဲ ဖျါဒ်လဲၣ်.” ပိာ်မုၣ်တဂၤန့ၣ် တဲဆၢအီၤလၢ “ပှၤလၢ အဟဲထီၣ်န့ၣ် အကဲဝဲ ပှၤသးပှၢ်တဂၤ ဒီးအကၤဝဲ ဆ့ကၤလၢအစုဒုၣ်တအိၣ်ဘၣ် တဘ့ၣ်လီၤ.”+ ဖဲန့ၣ် စီၤစီလူး နၢ်ပၢၢ်ထီၣ်ဝဲလၢ အမ့ၢ် “စီၤၡမူၤအ့လး” အဃိ စီၤစီလူး ဆုးလီၤအခိၣ် ဒီးထိၣ်လီၤပှီၤအသး လၢဟီၣ်ခိၣ်လိၤလီၤ.
၁၅ ဒီး “စီၤၡမူၤအ့လး” တဲဘၣ် စီၤစီလူးလၢ “ဘၣ်မနုၤအဃိ နမၤတံာ်တာ်ယၤ ဒီးမၢပှၤကိးထီၣ်ယၤလဲၣ်.” စီၤစီလူး တဲဆၢက့ၤလၢ “တၢ်ကိၢ်တၢ်ဂီၤဘၣ်ယၤ ဒိၣ်မးလီၤ. ပှၤဖလ့ၡသးဖိတဖၣ်န့ၣ် ဟဲဒုးယၤ ဒီးကစၢ်ယွၤ ပာ်တ့ၢ်ကွံာ်ယၤ ဒီးတစံးဆၢယၤ ခီဖျိလၢ ဝံတဖၣ်မ့ၢ်ဂ့ၤ တၢ်မံမီၢ်တဖၣ်မ့ၢ်ဂ့ၤ+ လၢၤဘၣ်အဃိ ယကိးထီၣ်နၤ ဒ်သိးနကတဲဘၣ်ယၤလၢ ယကြၢးမၤ မနုၤလဲၣ်န့ၣ်လီၤ.”+
၁၆ “စီၤၡမူၤအ့လး” တဲဝဲလၢ “ယဟိဝၤယွၤ ပာ်တ့ၢ်ကွံာ်နၤ+ ဒီးကဲထီၣ် နဒုၣ်နဒါလံဒၢး, ဘၣ်မနုၤအဃိ ခဲအံၤ နဟဲသံကွၢ်တၢ် လၢယၤလဲၣ်.
၁၇ တၢ်လၢယဟိဝၤယွၤ တဲဆိပာ်စၢၤဝဲ ခီဖျိလၢယၤန့ၣ် အဝဲကမၤဝဲလီၤ. အဃိ ယဟိဝၤယွၤ ကထုးကွံာ် ဘီမုၢ်လၢနစုပူၤ ဒီးကဟ့ၣ်လီၤဝဲဆူ နသကိးတဂၤ လၢအမ့ၢ် စီၤဒၤဝံးလီၤ.+
၁၈ မ့ၢ်လၢ နတဒိကနၣ် ယဟိဝၤယွၤ အကလုၢ်ဘၣ် ဒီးပှၤဧမၤလ့းဖိ+ လၢအမၤသးဒိၣ်ထီၣ်အီၤန့ၣ် နတမၤသံကွံာ် အဝဲသ့ၣ် ခဲလၢာ်ဘၣ်အဃိ မုၢ်မဆါတနံၤအံၤ ယဟိဝၤယွၤ မၤနၤဒ်အံၤလီၤ.
၁၉ ယဟိဝၤယွၤ ကဟ့ၣ်လီၤကွံာ် နၤဒီးပှၤအံၣ်စရ့လးဖိ လၢပှၤဖလ့ၡသးဖိ အစုပူၤလီၤ.+ ဒီးခဲမုၢ်ဆ့ၣ်န့ၣ် နၤဒီး+ နဖိခွါတဖၣ်+ ကအိၣ်ဒီးယၤလီၤ. ဒီးယဟိဝၤယွၤ ကဟ့ၣ်လီၤကွံာ်စ့ၢ်ကီး အံၣ်စရ့လး အသုးမုၢ်လၢ ပှၤဖလ့ၡသးဖိ အစုပူၤလီၤ.”+
၂၀ ခီဖျိလၢ “စီၤၡမူၤအ့လး” အတၢ်ကတိၤတဖၣ်အဃိ စီၤစီလူး ပျံၤတၢ်ဒိၣ်မး ဒီးလီၤဃံၢ်ကျးမဲာ် လၢဟီၣ်ခိၣ်လိၤလီၤ. ဒီးအဝဲတအီၣ်တၢ် နီတမံၤဘၣ် ဒီတနံၤဒီတနၤညါအဃိ အဂံၢ်အဘါ တအိၣ်နီတစဲးလၢၤဘၣ်.
၂၁ ဖဲပိာ်မုၣ်န့ၣ် ဟဲလၢ စီၤစီလူးအအိၣ်အခါ အထံၣ်ဝဲလၢ စီၤစီလူး အသူၣ်ကိၢ်သးဂီၤတၢ် ဒိၣ်မးလီၤ. အဃိ အဝဲတဲ စီၤစီလူးလၢ “ဒ်နတဲအသိး နခ့နပှၤပိာ်မုၣ်ယၤအံၤ ယမၤထွဲအီၤလံ. ဒီးအကဲထီၣ်တၢ်ဘၣ်ယိၣ်အလီၢ်လၢ ယသးသမူအဂီၢ်+ သနာ်က့ ယမၤဒ်နတဲယၤအသိးလီၤ.
၂၂ ဝံသးစူၤ ဒိကနၣ် တၢ်လၢ ယကတဲတက့ၢ်. ယကပာ်လီၤန့ၢ်နၤ ကိၣ်လၢနမဲာ်ညါ တက့နီၤ. ဒီးဒ်သိးနဂံၢ်နဘါကအိၣ်လၢ နကလဲၤတၢ်အဂီၢ် အီၣ်အီၤမီၤ.”
၂၃ ဘၣ်ဆၣ် အဝဲတအီၣ်ဘၣ် ဒီးတဲဝဲလၢ “ယတအီၣ်ဘၣ်.” ဘၣ်ဆၣ် အခ့အပှၤတဖၣ် ဒီးပိာ်မုၣ်တဂၤန့ၣ် မၢဆူၣ်အီၤ တဘျီဝံၤတဘျီလီၤ. လၢခံ အဝဲဒိကနၣ် အဝဲသ့ၣ်အကလုၢ် ဒီးအဝဲဂဲၤဆၢထၢၣ်က့ၤလၢ ဟီၣ်ခိၣ်လိၤ ဒီးဆ့ၣ်နီၤလၢ လီၢ်မံပူၤလီၤ.
၂၄ ပိာ်မုၣ်တဂၤန့ၣ် အိၣ်ဒီးကျီၢ်ဖိ လၢအဘီၣ်တဒုလီၤ. အဃိ အဝဲကရီလဲၤ မၤသံဝဲ* ကျီၢ်ဖိတဒုန့ၣ်လီၤ. ဒီးအဝဲဟံးန့ၢ်ဝဲ ကိၣ်ကမူၣ်, စံၢ်ဃါဝဲ ဒီးကုၢ်ဝဲ အဃိ ကဲထီၣ်ဝဲ ကိၣ်လၢ အတပၣ်ဒီး ကိၣ်မံၣ်ဘၣ်န့ၣ်လီၤ.
၂၅ အဝဲဒုးအီၣ်ဝဲ စီၤစီလူး ဒီးအခ့အပှၤတဖၣ် ဒီးအဝဲသ့ၣ်အီၣ်ဝဲလီၤ. ဝံၤဒီးလၢမုၢ်နၤခီန့ၣ် အဝဲသ့ၣ်ဟးထီၣ်ဝဲလီၤ.+
တၢ်ဂ့ၢ်အဘျဲၣ်တဖၣ်
^ လံာ်စီဆှံတတီၤအံၤ ပာ်ဖျါထီၣ် တၢ်အိၣ်သး ဒ်ပိာ်မုၣ်လၢအဆဲးကျိးဒီးပှၤသံ တဂၤအံၤအတၢ်ထံၣ်အိၣ်ဝဲအသိး. ဒီးပိာ်မုၣ်တဂၤအံၤ ဘၣ်တၢ်လံၣ်န့ၢ်အီၤ ခီဖျိလၢ တၢ်ဝံတၢ်နါလၢ အပာ်မၤအသးဒ်စီၤၡမူၤအ့လး အသိး.
^ မ့ၢ်စ့ၢ်ကီး “ဟ့ၣ်လုၢ်ထီၣ်.”
