၁ ၡမူၤအ့လး ၂၉:၁-၁၁
-
ပှၤဖလ့ၡသးဖိ တနာ်အီၣ် စီၤဒၤဝံးဘၣ် (၁-၁၁)
၂၉ ဖဲပှၤအံၣ်စရ့လးဖိ ဆီလီၤအသးလၢ ထံထီၣ်ပၢၢ်အဃၢၤလၢ ယံးစရ့လးအပူၤအခါ+ ပှၤဖလ့ၡသးဖိ+ ကိးဖှိၣ်ဝဲ အသုးမုၢ်ခဲလၢာ်ဖဲ ဝ့ၢ်အဖ့းန့ၣ်လီၤ.
၂ ဒီးပှၤဖလ့ၡသးဖိ အခိၣ်အနၢ်တဖၣ် လဲၤတၢ်ဃုာ်ဒီး အသုးဖိအကယၤတဖၣ် ဒီးအကထိတဖၣ်လီၤ. မ့မ့ၢ် စီၤဒၤဝံးဒီး အပှၤတဖၣ်န့ၣ် အိၣ်ဝဲဒီး စီၤအၤကံၣ် ဒီးဟးဝဲလၢ တၢ်လီၢ်ခံလီၤ.+
၃ ဒီးပှၤဖလ့ၡသးဖိ အခိၣ်အနၢ်တဖၣ် တဲဝဲလၢ “ဘၣ်မနုၤအဃိ ပှၤဧ့ၤဘြံၤဖိတဖၣ်အံၤ ဟဲဖဲအံၤလဲၣ်.” စီၤအၤကံၣ် တဲဆၢက့ၤအဝဲသ့ၣ်လၢ “အဝဲမ့ၢ် အံၣ်စရ့လး အစီၤပၤ စီလူးအပျဲၢ် စီၤဒၤဝံးလီၤ. အဝဲအိၣ်ဒီးယၤ တနံၣ်ဘျဲၣ်လံ.+ ဘၣ်ဆၣ် စးထီၣ်လၢ အဝဲဟဲအိၣ်ဒီးယၤ တုၤလၢခဲအံၤန့ၣ် ယတထံၣ်န့ၢ် အတၢ်ကမၣ်နီတမံၤဘၣ်.”
၄ ဘၣ်ဆၣ် ပှၤဖလ့ၡသးဖိ အခိၣ်အနၢ်တဖၣ် သးဒိၣ်ထီၣ်ဝဲ စီၤအၤကံၣ် ဒီးတဲအီၤလၢ “နီက့ၤပှၤတဂၤအံၤ.+ ဒီးမၢအက့ၤလၢ တၢ်လီၢ်လၢ နဒုးအိၣ်အီၤန့ၣ်သၢၤ. တဘၣ်ပျဲ အဝဲလဲၤဒီးပှၤ လၢတၢ်ဒုးအပူၤတဂ့ၤ, အကထီဒါက့ၤဘၣ်ဖုးပှၤ လၢတၢ်ဒုးအပူၤလီၤ.+ ဒီးကျဲလၢအဂ့ၤကတၢၢ်လၢ အကဒိးန့ၢ်ဘၣ် အကစၢ်တဂၤန့ၣ် အတၢ်ဘၣ်သးအဂီၢ်န့ၣ် မ့ၢ်ဝဲခီဖျိလၢ အက့ၤစိာ်ဝဲ ပပှၤတဖၣ် အခိၣ်သၣ်ဃံ တမ့ၢ်ဧီၤ.
၅ ပှၤတဂၤအံၤ မ့ၢ်ဝဲ စီၤဒၤဝံးလၢ လၢညါပှၤဂဲၤကလံၣ် ဒီးသးဝံၣ်တၢ် ဘၣ်ဃးဒီးအဂ့ၢ်လၢ
‘စီၤစီလူး မၤသံပှၤအကထိတဖၣ်,မ့မ့ၢ်စီၤဒၤဝံးန့ၣ် မၤသံ ပှၤလၢ အကလးတဖၣ်’+ တမ့ၢ်ဧီၤ.”
၆ အဃိ စီၤအၤကံၣ်+ ကိးဃီၤဝဲ စီၤဒၤဝံး ဒီးတဲအီၤလၢ “စးထီၣ်လၢ နဟဲအိၣ်ဒီးယၤ တုၤလၢတနံၤအံၤန့ၣ် ယတထံၣ် နတၢ်ကမၣ် နီတမံၤဘၣ်.+ အဃိ ယအၢၣ်လီၤတၢ်လၢ ယဟိဝၤယွၤ လၢအမူဝဲတဂၤ အမဲာ်ညါလၢ နမ့ၢ်ပှၤလၢ အတီ ဒီးယအဲၣ်ဒိးလၢ နကလဲၤ ဒုးတၢ်ဒီးယၤ ဒီးယသုးမုၢ်တဖၣ်လီၤ.+ ဘၣ်ဆၣ် ပှၤခိၣ်ပှၤနၢ်တဖၣ် တနာ်န့ၢ်နၤဘၣ်.+
၇ အဃိ က့ၤမုာ်မုာ် ဒီးတဘၣ်မၤတၢ်လၢ အကမၤသးအုး ပှၤဖလ့ၡသးဖိ အခိၣ်အနၢ်တဖၣ်အသး နီတမံၤတဂ့ၤ.”
၈ ဘၣ်ဆၣ် စီၤဒၤဝံး တဲစီၤအၤကံၣ်လၢ “ဘၣ်မနုၤလဲၣ်. ယမၤဘၣ်တၢ်မနုၤလဲၣ်. စးထီၣ်လၢ ယဟဲအိၣ်ဒီးနၤ တုၤလၢ ခဲအံၤန့ၣ် နထံၣ် ယမၤကမၣ်ဘၣ် တၢ်မနုၤတမံၤလဲၣ်. ယကစၢ်စီၤပၤဧၢ, ဘၣ်မနုၤအဃိ ယလဲၤဒီးနၤ ဒီးဒုးနဒုၣ်နဒါတဖၣ် တန့ၢ်ဘၣ်လဲၣ်.”
၉ စီၤအၤကံၣ် တဲဆၢက့ၤ စီၤဒၤဝံးလၢ “လၢယတၢ်ထံၣ်န့ၣ် နဂ့ၤထဲသိးဒီး ကစၢ်ယွၤ အမူခိၣ်ကလူးတဂၤညါ.+ ဘၣ်ဆၣ် ပှၤဖလ့ၡသးဖိ အခိၣ်အနၢ်တဖၣ် တဲယၤလၢ ‘တဘၣ် ဟ့ၣ်အခွဲးလၢ အဝဲကလဲၤဒီးပှၤလၢ တၢ်ဒုးပူၤတဂ့ၤ.’
၁၀ ခဲမုၢ်ဆ့ၣ်န့ၣ် နၤဒီးပှၤလၢ အဟဲဒီးနၤတဖၣ် ဂဲၤဆၢထၢၣ်ဂီၤဂီၤ ဒီးဖဲတၢ်ကပီၤထီၣ်အခါ ဟးထီၣ်ကွံာ် တဘျီဃီတက့ၢ်.”
၁၁ အဃိ လၢဂီၤခီဂီၤဂီၤန့ၣ် စီၤဒၤဝံး ဒီးအပှၤတဖၣ် ဂဲၤဆၢထၢၣ်ဝဲ ဒ်သိးကက့ၤကဒါက့ၤလၢ ပှၤဖလ့ၡသးဖိ အကီၢ်န့ၣ်လီၤ. မ့မ့ၢ် ပှၤဖလ့ၡသးဖိတဖၣ်န့ၣ် လဲၤထီၣ်ဝဲလၢ ယံးစရ့လးလီၤ.+
