၁ ၡမူၤအ့လး ၃:၁-၂၁
-
စီၤၡမူၤအ့လး ကဲထီၣ်ဝံ (၁-၂၁)
၃ ဒီးဖိသၣ်ပိာ်ခွါ စီၤၡမူၤအ့လး မၤယဟိဝၤယွၤ အတၢ်မၤလၢ+ စီၤဧ့လံၤ အတၢ်ဟံးစုနဲၣ်ကျဲ အဖီလာ်လီၤ. ဘၣ်ဆၣ် ဖဲန့ၣ်အဆၢကတီၢ် ပှၤတဒိးန့ၢ်ဘၣ် တၢ်ကစီၣ်လၢ ယဟိဝၤယွၤ အအိၣ်ကြီကြီဘၣ် ဒီးတၢ်ထံၣ်လၢညါခီတဖၣ်န့ၣ်+ တအိၣ်အါအါဘၣ်.
၂ ဘၣ်တနၤန့ၣ် စီၤဧ့လံၤ မံနီၤလၢ အလီၢ်မံလီၤ. ဒီးမ့ၢ်လၢအမဲာ်ချံ ကဒုထီၣ်ဝဲအဃိ အတထံၣ်တၢ် ဂ့ၤဂ့ၤလၢၤဘၣ်.+
၃ ဒီးဖဲကစၢ်ယွၤ အမ့ၣ်အူဒၢ+ တချုးလီၤပံာ်ဒံးဘၣ်အခါ စီၤၡမူၤအ့လး မံနီၤဝဲလၢ ယဟိဝၤယွၤ အတၢ်လုၢ်ဟံၣ်*+ အပူၤလီၤ. ဖဲန့ၣ် ကစၢ်ယွၤ အတလါစီဆှံ အိၣ်ဝဲလီၤ.
၄ ဒီးယဟိဝၤယွၤ ကိးဝဲ စီၤၡမူၤအ့လးလီၤ. စီၤၡမူၤအ့လး တဲဆၢဝဲလၢ “မ့ၢ်.”
၅ ဒီးစီၤၡမူအ့လး လဲၤဃ့ၢ်လၢ စီၤဧ့လံၤအအိၣ် ဒီးတဲဝဲလၢ “နကိးယၤအဃိ ယဟဲတုၤလံနီၤ.” ဘၣ်ဆၣ် စီၤဧ့လံၤ တဲအီၤလၢ “ယတကိးနၤဘၣ်. က့ၤမံနီၤဟီ.” အဃိ အဝဲက့ၤမံနီၤလီၤ.
၆ ယဟိဝၤယွၤ ကိးထီၣ်ကဒီးဝဲလၢ “စီၤၡမူၤအ့လးဧၢ.” ဖဲန့ၣ် စီၤၡမူၤအ့လး ဂဲၤဆၢထၢၣ် ဒီးလဲၤတဲဘၣ် စီၤဧ့လံၤလၢ “နကိးယၤအဃိ ယဟဲတုၤလံနီၤ.” ဘၣ်ဆၣ် စီၤဧ့လံၤ တဲဝဲလၢ “ဖိခွါဧၢ, ယတကိးနၤဘၣ်. က့ၤမံနီၤကဒီးဟီ.”
၇ (စီၤၡမူၤအ့လး တသ့ၣ်ညါ ယဟိဝၤယွၤဒံးဘၣ်. ဒီးအဝဲတဒိးန့ၢ်ဘၣ် တၢ်ကစီၣ်လၢ ယဟိဝၤယွၤ အအိၣ်ဒံးဘၣ်.)+
၈ ယဟိဝၤယွၤ ကိးထီၣ်ကဒီးဝဲ စီၤၡမူၤအ့လး သၢဘျီတဘျီလၢ “စီၤၡမူၤအ့လးဧၢ.” ဖဲန့ၣ် စီၤၡမူၤအ့လး ဂဲၤဆၢထၢၣ် ဒီးလဲၤတဲဘၣ် စီၤဧ့လံၤလၢ “နကိးယၤအဃိ ယဟဲတုၤလံနီၤ.”
ဒီးစီၤဧ့လံၤ သ့ၣ်ညါဘၣ်ဝဲလၢ ပှၤလၢအကိး ဖိသၣ်ပိာ်ခွါန့ၣ် မ့ၢ်ဝဲ ယဟိဝၤယွၤလီၤ.
၉ အဃိ စီၤဧ့လံၤ တဲဘၣ် စီၤၡမူၤအ့လးလၢ “က့ၤမံနီၤ ကဒီးနီၤ. ဒီးအဝဲမ့ၢ်ကိးနၤ တဘျီကဒီးန့ၣ် နဘၣ်တဲလၢ ‘ယဟိဝၤယွၤဧၢ, နခ့နပှၤယၤအံၤ ဒိကနၣ်နၤ အဃိ တဲတၢ်တက့ၢ်.’” ဒီးစီၤၡမူၤအ့လး က့ၤမံနီၤကဒါက့ၤလၢ အလီၢ်လီၤ.
၁၀ ဒီးယဟိဝၤယွၤ ဟဲဆၢထၢၣ်ဖဲန့ၣ် ဒီးကိးထီၣ်ကဒီး စီၤၡမူၤအ့လးလၢ “စီၤၡမူၤအ့လးဧၢ, စီၤၡမူၤအ့လးဧၢ.” ဖဲန့ၣ် စီၤၡမူၤအ့လး တဲဝဲလၢ “နခ့နပှၤယၤအံၤ ဒိကနၣ်နၤ အဃိ တဲတၢ်တက့ၢ်.”
၁၁ ယဟိဝၤယွၤ တဲစီၤၡမူၤအ့လးလၢ “ယကမၤတၢ်တမံၤမံၤလၢ ကီၢ်အံၣ်စရ့လးအပူၤ ဒီးပှၤတဂၤဂ့ၤ တဂၤဂ့ၤလၢ အနၢ်ဟူဘၣ် တၢ်ဂ့ၢ်တခါအံၤန့ၣ် ကဖုးဘၣ်အသးလီၤ.*+
၁၂ ဖဲနံၤအဝဲန့ၣ်န့ၣ် ယကမၤ တၢ်ခဲလၢာ်လၢ ယတဲပာ်စၢၤ ဘၣ်ဃးဒီး စီၤဧ့လံၤ ဒီးအဒူၣ်ဖိထၢဖိ စးထီၣ်လၢအခီၣ်ထံး တုၤလၢ အကတၢၢ်လီၤ.+
၁၃ အဝဲသ့ၣ်ညါဝဲလၢ+ အဖိခွါတဖၣ် ဆိၣ်အၢကစၢ်ယွၤ+ ဘၣ်ဆၣ် အဝဲတသိၣ်ဃီၣ် အဝဲသ့ၣ်ဘၣ်.+ အဃိ နကဘၣ်တဲအီၤလၢ ယကစံၣ်ညီၣ် အဒူၣ်ဖိထၢဖိ အစိၤစိၤအဃၣ်ဃၣ်လီၤ.
၁၄ ဒီးလၢတၢ်ဂ့ၢ် အဝဲန့ၣ်အဃိ ယအၢၣ်လီၤပာ်စၢၤ စီၤဧ့လံၤ အဒူၣ်ဖိထၢဖိလၢ တၢ်လုၢ်တၢ်ပာ်လၢ အကမၤပူၤဖျဲး စီၤဧ့လံၤ အဒူၣ်ဖိထၢဖိ အတၢ်ကမၣ်န့ၣ် တအိၣ် နီတမံၤလၢၤဘၣ်.”+
၁၅ စီၤၡမူၤအ့လး က့ၤမံနီၤကဒါ တုၤလၢမုၢ်ဝါထီၣ် ဒီးအဝဲ အိးထီၣ်ဝဲ တြဲၤလၢ ယဟိဝၤယွၤအဟံၣ် အဂီၢ်လီၤ. စီၤၡမူၤအ့လး တဲဘၣ် စီၤဧ့လံၤ ဘၣ်ဃးဒီး တၢ်ထံၣ်လၢညါခီ တဘူၣ်ဘၣ်.
၁၆ ဘၣ်ဆၣ် စီၤဧ့လံၤကိးဝဲ စီၤၡမူၤအ့လးလၢ “ဖိခွါ စီၤၡမူၤအ့လးဧၢ.” ဖဲန့ၣ် စီၤၡမူၤအ့လး တဲဝဲလၢ “မ့ၢ်.”
၁၇ ဒီးစီၤဧ့လံၤ သံကွၢ်ဝဲလၢ “ကစၢ်ယွၤတဲနၤ တၢ်မနုၤလဲၣ်. ဝံသးစူၤ တဘၣ်ပာ်ခူသူၣ်အီၤတဂ့ၤ. တၢ်လၢအဝဲတဲနၤန့ၣ် နမ့ၢ် ပာ်ခူသူၣ်တၢ်ကတိၤ တဖျၢၣ်ဒၣ်လဲာ် မ်ကစၢ်ယွၤ သိၣ်ဃီၣ်နၤ ဆူၣ်ဆူၣ်တက့ၢ်.”
၁၈ အဃိ စီၤၡမူၤအ့လး တဲဘၣ်အီၤ တၢ်ခဲလၢာ် ဒီးအတပာ်ခူသူၣ်ဝဲ နီတမံၤဘၣ်. ဒီးစီၤဧ့လံၤ တဲဝဲလၢ “တၢ်အဝဲအံၤ ဟဲလၢယဟိဝၤယွၤ အအိၣ်လီၤ. တၢ်လၢအထံၣ်ဝဲလၢအဂ့ၤန့ၣ် မ်အမၤဒၣ်ဝဲတက့ၢ်.”
၁၉ စီၤၡမူၤအ့လး ဆဲးဒိၣ်ထီၣ်ဝဲ ဒီးယဟိဝၤယွၤ အိၣ်ဒီးအီၤလီၤ.+ ဒီးကစၢ်ယွၤ မၤလၢထီၣ်ပှဲၤထီၣ်ဝဲ တၢ်လၢစီၤၡမူၤအ့လး တဲဝဲခဲလၢာ်လီၤ.
၂၀ ပှၤအံၣ်စရ့လးဖိ လၢအအိၣ်လၢ ဝ့ၢ်ဒၣ် တုၤလၢ ဝ့ၢ်ဘ့ၢ်ၡဘၤ ခဲလၢာ်န့ၣ် သ့ၣ်ညါဝဲလၢ စီၤၡမူၤအ့လးန့ၣ် ဘၣ်တၢ်ပာ်ပနီၣ်အီၤ ဒ်ယဟိဝၤယွၤအဝံ တဂၤအသိးလီၤ.
၂၁ ဒီးယဟိဝၤယွၤ ဆဲးလီၣ်ဖျါထီၣ်အသး လၢဝ့ၢ်ၡံလိၤ အပူၤလီၤ. ဖဲဝ့ၢ်ၡံလိၤန့ၣ် ယဟိဝၤယွၤ ပာ်ဖျါထီၣ် အနီၢ်ကစၢ်အဂ့ၢ်လၢ စီၤၡမူၤအ့လးအအိၣ် ခီဖျိလၢ ယဟိဝၤယွၤ အတၢ်ကတိၤလီၤ.+
