၁ ၡမူၤအ့လး ၃၁:၁-၁၃
-
စီၤစီလူး ဒီးအဖိခွါ သၢဂၤသံဝဲ (၁-၁၃)
၃၁ ဒီးပှၤဖလ့ၡသးဖိတဖၣ် ဒုးလိာ်သးဒီး ပှၤအံၣ်စရ့လးဖိလီၤ.+ ဒီးပှၤအံၣ်စရ့လးဖိတဖၣ် ဃ့ၢ်ကွံာ်ဝဲလၢ ပှၤဖလ့ၡသးဖိတဖၣ် အမဲာ်ညါလီၤ. ပှၤအံၣ်စရ့လးဖိအါဂၤ သံဝဲလၢ ကစၢၢ်ကံးလဘိ အလိၤလီၤ.+
၂ ဒီးပှၤဖလ့ၡသးဖိတဖၣ် လူၤဝဲစီၤစီလူး ဒီးအဖိခွါတဖၣ် တုၤလၢအချုး ဒီးမၤသံဝဲ စီၤစီလူးဒီး အဖိခွါတဖၣ်လၢအမ့ၢ်+ စီၤယိနၤသၣ်,+ စီၤအဘံနဒာ်, ဒီးစီၤမးလကံၡူၤန့ၣ်လီၤ.
၃ ဒီးစီၤစီလူးစ့ၢ်ကီး ပှၤဒုးအီၤသပှၢ်တၢၢ် ဒီးပှၤခးပျၢ်ဖိတဖၣ် ထံၣ်ချုးအီၤ ဒီးခးအီၤ ဒီးအဘၣ်ဒိဘၣ်ထံး ဖးနးညါ.+
၄ ဒီးစီၤစီလူး တဲဘၣ် ပှၤလၢအစိာ် အတၢ်စုကဝဲၤတဂၤန့ၣ်လၢ “ဒ်သိး ပှၤလၢ အတဒိးဘၣ် တၢ်ကူးတရံးတဖၣ်+ သုတဟဲဆဲးယၤ ဒီးမၤယၤအၢအၢသီသီတဂ့ၤအဂီၢ် ထုးထီၣ်နနး ဒီးဆဲးယၤတက့ၢ်.” ဘၣ်ဆၣ် ပှၤလၢအစိာ် အတၢ်စုကဝဲၤတဂၤန့ၣ် ပျံၤတၢ်ဒိၣ်မးအဃိ အဝဲတအဲၣ်ဒိးမၤဝဲဘၣ်. အဃိ စီၤစီလူး ဟံးန့ၢ်နး ဒီးမၤသံလီၤအသးလီၤ.+
၅ ဖဲပှၤလၢအစိာ် စီၤစီလူး အတၢ်စုကဝဲၤတဂၤန့ၣ် ထံၣ်ဝဲလၢ စီၤစီလူးသံအခါ+ အဝဲထုးထီၣ်အနီၢ်ကစၢ်အနး ဒီးမၤသံလီၤအသးစ့ၢ်ကီးလီၤ.
၆ အဃိ ဖဲတၢ်တနံၤန့ၣ် စီၤစီလူး, အဖိခွါသၢဂၤ, ပှၤလၢအစိာ် အတၢ်စုကဝဲၤ ဒီးအပှၤခဲလၢာ်သံဝဲလီၤ.+
၇ ဖဲပှၤအံၣ်စရ့လးဖိလၢ အအိၣ်လၢ တၢ်တြီၤ ဒီးလၢယၢ်ဒ့ၣ် အဟီၣ်ကဝီၤန့ၣ် သ့ၣ်ညါဘၣ်ဝဲလၢ အံၣ်စရ့လးအသုးတဖၣ် ဃ့ၢ်ကွံာ်ဝဲ ဒီးစီၤစီလူး ဒီးအဖိခွါသၢဂၤသံအခါ အဝဲသ့ၣ် ဃ့ၢ်ထီၣ်ကွံာ်ဝဲလၢ ဝ့ၢ်တဖၣ်အပူၤလီၤ.+ ဒီးပှၤဖလ့ၡသးဖိတဖၣ် ဟဲနုာ်လီၤဝဲလၢ ဝ့ၢ်တဖၣ်အပူၤ ဒီးအိၣ်ဝဲဖဲန့ၣ်လီၤ.
၈ လၢခံတသီ ဖဲပှၤဖလ့ၡသးဖိတဖၣ် လဲၤဟံးန့ၢ် ပှၤလၢအသံတဖၣ် အတၢ်ကူတၢ်သိး ဒီးအတၢ်စုကဝဲၤတဖၣ်အခါ အဝဲသ့ၣ်ထံၣ်ဝဲ စီၤစီလူး ဒီးအဖိခွါသၢဂၤ သံဝဲလၢ ကစၢၢ် ကံးလဘိအလိၤလီၤ.+
၉ အဃိ အဝဲသ့ၣ် ဒီၣ်တဲာ်ကွံာ်ဝဲ အကိာ် ဒီးဟံးန့ၢ်ဝဲ အတၢ်ကူတၢ်သိး ဒီးအစုကဝဲၤတဖၣ်လီၤ. ဒီးအဝဲသ့ၣ် ဆှၢလီၤဝဲ ပှၤစိာ်တၢ်ကစီၣ်ဖိတဖၣ်လၢ ပှၤဖလ့ၡသးဖိ အကီၢ်ဒီတဘ့ၣ်ညါ ဒ်သိးကရၤလီၤဝဲ တၢ်ကစီၣ်လၢ+ အဝဲသ့ၣ် အတၢ်ဂီၤတၢ်ဖှီၣ် အတၢ်လုၢ်ဟံၣ်တဖၣ်အပူၤ+ ဒီးလၢပှၤဂီၢ်မုၢ်အကျါ အဂီၢ်လီၤ.
၁၀ ဒီးအဝဲသ့ၣ် ပာ်လီၤဝဲ စီၤစီလူး အတၢ်ကူတၢ်သိး ဒီးအစုကဝဲၤတဖၣ် လၢဧၤၡတြိး အတၢ်ဂီၤတၢ်ဖှီၣ်တဖၣ် အတၢ်လုၢ်ဟံၣ်ပူၤ ဒီးဘျးထီၣ်ဝဲ အစိၣ်လၢ ဝ့ၢ်ဘ့ၤသၡၢ် အဒူၣ်ကပၤလီၤ.+
၁၁ ဖဲပှၤလၢအအိၣ်လၢ ယၤဘ့ၣ်ကံးလဧး+ နၢ်ဟူဝဲ ပှၤဖလ့ၡသးဖိတဖၣ် မၤဝဲစီၤစီလူးဒ်လဲၣ် အဂ့ၢ်အခါ
၁၂ အဝဲသ့ၣ် အသုးဖိလၢအသးဒူ ကိးဂၤဒဲးန့ၣ် လဲၤဝဲဒီတနၤကျၢၤ ဆူဝ့ၢ်ဘ့ၤသၡၢ် ဒီးဟံးန့ၢ်ဝဲ စီၤစီလူး ဒီးအဖိခွါတဖၣ်အစိၣ်လၢ ဝ့ၢ်ဘ့ၤသၡၢ် အဒူၣ်ကပၤန့ၣ်လီၤ. အဝဲသ့ၣ် ဟဲက့ၤကဒါလၢ ယၤဘ့ၣ် ဒီးကုၢ် အဝဲသ့ၣ်အစိၣ်ဖဲန့ၣ်လီၤ.
၁၃ ဒီးအဝဲသ့ၣ် လဲၤစိာ်ဝဲ စီၤစီလူး ဒီးအဖိခွါတဖၣ်အဃံ+ ဒီးခူၣ်လီၤကွံာ်ဝဲလၢ သ့ၣ်ထးမရ့း အခီၣ်ထံးလၢ ယၤဘ့ၣ်န့ၣ်လီၤ.+ ဒီးအဝဲသ့ၣ် ဒုၣ်တၢ်အီၣ် နွံသီလီၤ.
