၁ ၡမူၤအ့လး ၅:၁-၁၂
၅ ဖဲပှၤဖလ့ၡသးဖိ မၤန့ၢ်ဝဲ ယွၤလၢအမ့ၢ်အတီတဂၤ အတလါစီဆှံ+ လၢအ့ဘ့ၣ်န့စၢ် အခါ အဝဲသ့ၣ် ဟဲက့ၤစိာ်ဝဲလၢ ဝ့ၢ်အၤစဒိာ်လီၤ.
၂ ဒီးပှၤဖလ့ၡသးဖိ ဟံးန့ၢ်ဝဲ ယွၤလၢအမ့ၢ်အတီတဂၤ အတလါစီဆှံ ဒီးလဲၤစိာ်နုာ်ဝဲလၢ အဝဲသ့ၣ် အယွၤဒၤကိၣ် အဟံၣ်* ဒီးပာ်လီၤ တလါစီဆှံ လၢဒၤကိၣ်အတၢ်ဂီၤတၢ်ဖှီၣ် အကပၤလီၤ.+
၃ လၢခံတသီ ဖဲပှၤအၤစဒိာ်ဖိ ပၢၢ်ထီၣ်ဂီၤဂီၤအခါ အဝဲသ့ၣ် ထံၣ်ဝဲလၢ ဒၤကိၣ်အတၢ်ဂီၤတၢ်ဖှီၣ် လီၤတဲာ်ကျးမဲာ် လၢဟီၣ်ခိၣ်လိၤ လၢယဟိဝၤယွၤ အတလါစီဆှံ အမဲာ်ညါလီၤ.+ အဃိ အဝဲသ့ၣ် ဟံးထီၣ် ဒၤကိၣ်အတၢ်ဂီၤတၢ်ဖှီၣ် ဒီးဆီလီၤက့ၤဝဲ လၢအလီၢ်လီၤ.+
၄ လၢခံတသီ အဝဲသ့ၣ် ပၢၢ်ထီၣ်ဂီၤဂီၤ ဒီးထံၣ်ဝဲလၢ ဒၤကိၣ်အတၢ်ဂီၤတၢ်ဖှီၣ်န့ၣ် လီၤတဲာ်ကျးမဲာ် လၢဟီၣ်ခိၣ်လိၤလၢ ယဟိဝၤယွၤ အတလါစီဆှံ အမဲာ်ညါလီၤ. ဒီးဒၤကိၣ် အခိၣ် ဒီးအစုခံခီလၢာ် ဘၣ်တၢ်ဒီၣ်တဲာ်ကွံာ်အီၤ ဒီးအိၣ်ဝဲလၢ တြဲၤအခိၣ်ထိး ဒီးတၢ်လၢ အတဟးဂီၤဘၣ်န့ၣ် အိၣ်တ့ၢ်ထဲဒၣ် ဒၤကိၣ်အမိၢ်ပှၢ် လၢအလီၤဂာ်ဒ် ညၣ်အသိးလီၤ.
၅ လၢတၢ်န့ၣ်အဃိ လၢဝ့ၢ်အၤစဒိာ်အပူၤန့ၣ် ဒၤကိၣ် အပှၤလုၢ်တၢ်ဒိၣ်တဖၣ် ဒီးပှၤကိးဂၤဒဲးလၢ အလဲၤနုာ်လၢ ဒၤကိၣ်အဟံၣ်ပူၤန့ၣ် တဟးဝဲလၢ ဒၤကိၣ် အတြဲၤခိၣ်ထိး အဖီခိၣ်ဘၣ် တုၤမုၢ်မဆါတနံၤအံၤလီၤ.
၆ ယဟိဝၤယွၤ သိၣ်ဃီၣ် ပှၤအၤစဒိာ်ဖိ ဒီးမၤနးမၤဖှီၣ် ပှၤအၤစဒိာ်ဖိ ဒီးပှၤလၢ တၢ်လီၢ်လၢ အကပိာ်ကပၤတဖၣ် လၢအ့ၣ်ကီၢ်လီၤတၢ်ဆါလီၤ.+
၇ ဖဲပှၤအၤစဒိာ်ဖိ ထံၣ်ဘၣ်ဝဲ တၢ်မၤအသးအခါ အဝဲသ့ၣ် တဲဝဲလၢ “မ့ၢ်လၢ အံၣ်စရ့လး အကစၢ်ယွၤ မၤနးမၤဖှီၣ်ပှၤ ဒီးပယွၤဒၤကိၣ်အဃိ တဘၣ်ပာ် အတလါစီဆှံ လၢပကျါလၢၤတဂ့ၤ.”
၈ အဃိ အဝဲသ့ၣ်ကိးဖှိၣ် ပှၤဖလ့ၡသးဖိ အခိၣ်အနၢ် ကိးဂၤဒဲး ဒီးသံကွၢ် အဝဲသ့ၣ်လၢ “အံၣ်စရ့လး အကစၢ်ယွၤ အတလါစီဆှံန့ၣ် ပကဘၣ်မၤအီၤ ဒ်လဲၣ်.” အဝဲသ့ၣ် တဲဆၢဝဲလၢ “ပှၤကဘၣ်လဲၤသုး အံၣ်စရ့လး အကစၢ်ယွၤ အတလါစီဆှံဆူ ဝ့ၢ်ကၤသးလီၤ.”+ အဃိ အဝဲသ့ၣ် လဲၤသုး အံၣ်စရ့လး အကစၢ်ယွၤ အတလါစီဆှံ ဖဲန့ၣ်လီၤ.
၉ ဖဲအဝဲသ့ၣ် လဲၤသုးဝဲ တလါစီဆှံဖဲန့ၣ် ဝံၤအလီၢ်ခံ ယဟိဝၤယွၤ သိၣ်ဃီၣ် ပှၤဝ့ၢ်ဖိတဖၣ် ဒီးဒုးအိၣ်ထီၣ် တၢ်ပျံၤတၢ်ဖုးဖးဒိၣ် လၢဝ့ၢ်ပူၤလီၤ. ဒီးကစၢ်ယွၤ သိၣ်ဃီၣ်ဝဲ ပှၤအိၣ်လၢဝ့ၢ်ပူၤ စးထီၣ်လၢ ပှၤအဆံးကတၢၢ် တုၤလၢ ပှၤအဒိၣ် ကတၢၢ် ဒီးအ့ၣ်ကီၢ်လီၤတၢ်ဆါ ဘၣ်အဝဲသ့ၣ် ခဲလၢာ်လီၤ.+
၁၀ အဃိ အဝဲသ့ၣ် လဲၤဆှၢဝဲ ယွၤလၢအမ့ၢ်အတီတဂၤ အတလါစီဆှံ လၢဝ့ၢ်ဧ့ကြိၣ်လီၤ.+ ဘၣ်ဆၣ် ဖဲပှၤလဲၤစိာ်နုာ် ယွၤလၢအမ့ၢ်အတီတဂၤ အတလါစီဆှံလၢ ဝ့ၢ်ဧ့ကြိၣ်အပူၤအခါ ပှၤဧ့ကြိၣ်ဖိ ကိးပသူထီၣ်လၢ “အဝဲသ့ၣ် ဟဲစိာ် အံၣ်စရ့လး အကစၢ်ယွၤ အတလါစီဆှံ လၢပအိၣ် ဒ်သိး ကမၤသံပှၤ ဒီးပပှၤဂီၢ်မုၢ်အဂီၢ်လီၤ.”+
၁၁ ဒီးအဝဲသ့ၣ်ကိးဖှိၣ် ပှၤဖလ့ၡသးဖိ အခိၣ်အနၢ် ကိးဂၤဒဲး ဒီးတဲဝဲလၢ “ဒ်သိးပဝဲ ဒီးပပှၤဂီၢ်မုၢ် သုတသံတဂ့ၤအဂီၢ် မၢပှၤက့ၤဆှၢက့ၤ အံၣ်စရ့လး အကစၢ်ယွၤ အတလါစီဆှံ ဆူအလီၢ်မီၤ.” ခီဖျိလၢ ယွၤလၢအမ့ၢ်အတီတဂၤ သိၣ်ဃီၣ် ပှၤဖဲန့ၣ်တဖၣ် ဆူၣ်ဆူၣ်အဃိ ပှၤလၢအအိၣ်လၢ ဝ့ၢ်ပူၤကိးဂၤဒဲး ပျံၤဝဲလၢ အကသံလီၤ.+
၁၂ ဒီးပှၤလၢအအိၣ်လၢ ဝ့ၢ်ပူၤ လၢအတသံဘၣ် တဖၣ်န့ၣ် ဘၣ်ဝဲ အ့ၣ်ကီၢ်လီၤတၢ်ဆါလီၤ. ဒီးပှၤလၢအအိၣ်လၢ ဝ့ၢ်ပူၤခဲလၢာ် ကွၢ်ထီၣ်တၢ်လၢ မူခိၣ်ဒီးကိးပသူထီၣ် ဒီးဃ့ဝဲတၢ်မၤစၢၤလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “တၢ်လုၢ်ဟံၣ်.”
