၂ ကွဲးနီၣ်တၢ် ၄:၁-၂၂
၄ လၢခံ စီၤၡလိၤမိၤ တ့ထီၣ်ဝဲ တၢ်လုၢ်လီၢ်တိၢ်ဘီ+ လၢအထီအိၣ်ဝဲ အပျၢ် ၂၀, အဒီၣ်ဃီၤအိၣ်ဝဲ အပျၢ် ၂၀ ဒီးအကစီၤထီၣ်ထီအိၣ်ဝဲ အပျၢ် ၁၀ လီၤ.
၂ အဝဲတ့ထီၣ် ထံဒၢဖးဒိၣ်တဖျၢၣ်လၢ+ ပှၤကိးဝဲလၢ ပီၣ်လဲၣ်တိၢ်ဘီလီၤ. ဒီးအမိၢ်ပှၢ်လီၤဂာ်လၢ တၢ်အဖျၢၣ်သလၢၣ်လၢ အကစီၤထီၣ်ထီအိၣ်ဝဲ ယဲၢ်ပျၢ်, အခိၣ်ဒူလၢအံၤတကပၤ တုၤလၢ အဝဲတကပၤန့ၣ် အိၣ်ဝဲအပျၢ် ၁၀ ဒီးဒ်သိး ပှၤကစၢဝးတရံးအီၤ ဝးဝးအဂီၢ်န့ၣ် ကလိၣ်ဘၣ် တၢ်ထိၣ်ပျံၤတဘိလၢ အထီဝဲအပျၢ် ၃၀ လီၤ.+
၃ လၢထံဒၢဖးဒိၣ် အခိၣ်ဒူ အဖီလာ်န့ၣ် တၢ်ကယၢကယဲ လၢအလီၤဂာ်ဒီး ထံလူၤသၣ်တဖၣ်+ အိၣ်ဝးတရံးအီၤ ဒီးတပျၢ်န့ၣ် ထံလူၤသၣ်အိၣ်ဝဲ အဖျၢၣ်တဆံလီၤ. ဒီးထံလူၤသၣ်တဖၣ်အံၤ ဘၣ်တၢ်တ့အီၤခံကျိၤ ဘုးတာ်လိာ်သးဒီး ထံဒၢဖးဒိၣ်လီၤ.
၄ ထံဒၢဖးဒိၣ်န့ၣ် အိၣ်ဝဲလၢ ကျီၢ်ဖါတိၢ်ဘီ ၁၂ ဒုအဖီခိၣ်လီၤ.+ ကျီၢ်ဖါတဖၣ်န့ၣ် ဃၣ်အသးလၢ မုၢ်ထီၣ် ၃ ဒု, လၢမုၢ်နုာ် ၃ ဒု, လၢကလံၤစိး ၃ ဒု ဒီးလၢကလံၤထံး ၃ ဒုလီၤ. ဒီးကျီၢ်ဖါကိးဒုဒဲးန့ၣ် အခံအိၣ်လၢ ထံဒၢအံၤ အဖီလာ်လီၤ.
၅ ဒီးထံဒၢဖးဒိၣ်န့ၣ် အတီၣ်ဝဲ စုနၢလွံၢ်ဘိလီၤ.* အခိၣ်ဒူန့ၣ် ပှၤတ့အီၤဒ် ထံခွးအခိၣ်ဒူ လီၤဂာ်ဒ် ဖီဒ့ၣ်ညါ ဖးထီၣ်အသိးလီၤ. လၢထံဒၢဖးဒိၣ် အပူၤန့ၣ် ထံတြီၢ်ဝဲ ၃,၀၀၀ ဘၤသၤလီၤ.*
၆ အဝဲတ့ထီၣ်စ့ၢ်ကီး ထံဒၢအဖျၢၣ်တဆံလၢ တၢ်သ့စီတၢ်အဂီၢ် ဒီးပာ်လီၤဝဲ လၢအထွဲတခီန့ၣ် ယဲၢ်ဖျၢၣ် ဒီးလၢ အစ့ၣ်တခီန့ၣ် ယဲၢ်ဖျၢၣ်လီၤ.+ လၢထံဒၢတဖၣ်အံၤအပူၤန့ၣ် ပှၤလုၢ်တၢ်ဒိၣ်တဖၣ် သ့စီဆၣ်ဖိကီၢ်ဖိ အကူာ်တဖၣ်လၢ တၢ်လုၢ်ဒွဲၣ်အူအဂီၢ်လီၤ.+ မ့မ့ၢ် ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီန့ၣ် မ့ၢ်ဝဲလၢ ပှၤလုၢ်တၢ်ဒိၣ်တဖၣ် ကသ့စုသ့ခီၣ် အဂီၢ်လီၤ.+
၇ အဝဲတ့ထီၣ် မ့ၣ်အူဒၢထူ+ အဖျၢၣ်တဆံ ဒ်တၢ်ဂီၤအဒိ+ အိၣ်ဝဲအသိး ဒီးပာ်အီၤလၢ တၢ်လုၢ်ဟံၣ်အပူၤ လၢအစ့ၣ်တခီန့ၣ် ယဲၢ်ဖျၢၣ် ဒီးလၢအထွဲတခီန့ၣ် ယဲၢ်ဖျၢၣ်လီၤ.+
၈ အဝဲတ့ထီၣ်စ့ၢ်ကီး စီၢ်နီၤခိၣ် အခါတဆံ ဒီးပာ်အီၤလၢ တၢ်လုၢ်ဟံၣ်အပူၤ လၢအစ့ၣ်တခီန့ၣ် ယဲၢ်ဖျၢၣ် ဒီးလၢအထွဲတခီန့ၣ် ယဲၢ်ဖျၢၣ်လီၤ.+ ဒီးအဝဲတ့ထီၣ် လီခီဖျၢၣ်ထူ အဖျၢၣ် ၁၀၀ လီၤ.
၉ ဒီးအဝဲတ့ထီၣ် ပှၤလုၢ်တၢ်ဒိၣ်တဖၣ်+ အတၢ်ပျီလၢ အဘၣ်တၢ်ကရၢၢ်ဃာ်အီၤ,+ တၢ်ပျီဖးလဲၢ်တဘ့ၣ်+ ဒီးပဲတြီတဖၣ်လၢ တၢ်ပျီအဂီၢ်လီၤ. ဒီးအဝဲကျးဝဲ ပဲတြီတဖၣ်လၢ တိၢ်ဘီကဘျၣ်တဖၣ်လီၤ.
၁၀ ဒီးအဝဲပာ်လီၤ ထံဒၢဖးဒိၣ် လၢအထွဲတကပၤ လၢအအိၣ်လၢ မုၢ်ထီၣ်ကလံၤထံး တခီန့ၣ်လီၤ.+
၁၁ စီၤဃံရၣ် တ့ထီၣ်စ့ၢ်ကီး ထံစဲၤတဖၣ်, နီၣ်တရီာ်တၢ်တဖၣ် ဒီးလီခီဖျၢၣ်တဖၣ်လီၤ.+
ဒီးစီၤဃံရၣ် မၤတၢ်မၤလၢ အဘၣ်ထွဲဒီး ယွၤလၢအမ့ၢ်အတီတဂၤ အဟံၣ် ဒ်စီၤပၤၡလိၤမိၤ မၢအီၤအသိး ဝံၤဝဲလီၤ.+
၁၂ အဝဲတ့ထီၣ်ဝဲ တၢ်အထူၣ်ခံထူၣ်,+ တၢ်အခိၣ်ထိး ခံခါလၢ အက့ၢ်အဂီၤလီၤဂာ်ဒ် လီခီဖျၢၣ်အသိး ဒီးတၢ်ကယၢကယဲ ခံခါလၢ အလီၤဂာ်ဒ်ပှာ်အသိး+ လၢအအိၣ်ဝဲလၢ တၢ်အထူၣ် အခိၣ်ထိးအလိၤလီၤ.
၁၃ ဒီးလၢတၢ်ကယၢကယဲ ခံခါ လၢအလီၤဂာ်ဒ် ပှာ်အသိးအလိၤန့ၣ် အဝဲတ့ထီၣ်စ့ၢ်ကီး သလဲသၣ်အဖျၢၣ် ၄၀၀ လီၤ.+ တၢ်ကယၢကယဲ လၢအလီၤဂာ်ဒ် ပှာ်တခါစုာ်စုာ်န့ၣ် အိၣ်ဝဲဒီး သလဲသၣ်အဂီၤ ခံဂ့ၢ် ဒ်သိးကမၤဘၢဝဲ တၢ်အခိၣ်ထိး ခံခါလၢ အက့ၢ်အဂီၤ လီၤဂာ်ဒ် လီခီဖျၢၣ်အသိး လၢအအိၣ်ဝဲလၢ တၢ်အထူၣ်ခံထူၣ်အဖီခိၣ်လီၤ.+
၁၄ အဝဲတ့ထီၣ်စ့ၢ်ကီး လ့ၣ်ဆီၣ်အခိၣ်တဆံ ဒီးထံဒၢ အဖျၢၣ်တဆံလၢ အအိၣ်လၢ လ့ၣ်ဆီၣ်အပူၤ,+
၁၅ ထံဒၢဖးဒိၣ် ဒီးကျီၢ်ဖါတိၢ်ဘီ ၁၂ ဒုအိၣ်ဝဲလၢ ထံဒၢဖးဒိၣ် အဖီလာ်,+
၁၆ ထံစဲၤတဖၣ်, နီၣ်တရီာ်တၢ်တဖၣ်, နီၣ်ဆဲးတဖၣ်+ ဒီးတၢ်ပီးတၢ်လီအဂၤ ခဲလၢာ်န့ၣ် စီၤဃူရၤအဘံ+ တ့ဝဲလၢ တိၢ်ဘီ ဒီးထူးဘျ့ကတြ့ၣ်ထီၣ်အီၤ လၢယဟိဝၤယွၤ အတၢ်လုၢ်ဟံၣ်အဂီၢ် ဒ်စီၤၡလိၤမိၤ မၢအီၤအသိးလီၤ.
၁၇ စီၤပၤမၢ ပှၤတ့ထီၣ်* တၢ်သ့ၣ်တဖၣ်န့ၣ် အက့ၢ်အဂီၤလၢ ကပံာ်တီၣ်တီၣ် လၢယၢ်ဒ့ၣ် အဟီၣ်ကဝီၤအပူၤ ဖဲစူးကိၤသး+ ဒီးစရ့ဒၤ အဘၢၣ်စၢၤလီၤ.
၁၈ စီၤၡလိၤမိၤ တ့ထီၣ်ဝဲ တၢ်ပီးတၢ်လီတဖၣ်အံၤ အါအါဂီၢ်ဂီၢ်လီၤ. အဃိ အဝဲသူဝဲ တိၢ်ဘီလၢာ် ထဲလဲၣ်န့ၣ် ပှၤတသ့ၣ်ညါဝဲဘၣ်.+
၁၉ စီၤၡလိၤမိၤ တ့ထီၣ်ဝဲ တၢ်ပီးတၢ်လီခဲလၢာ်လၢ+ ယွၤလၢအမ့ၢ်အတီတဂၤ အဟံၣ်အဂီၢ်လီၤ. အဝဲတ့ထီၣ်ဝဲ တၢ်လုၢ်လီၢ်လၢထူ,+ စီၢ်နီၤခိၣ်တဖၣ်လၢ+ ပှၤပာ်လီၤ ကိၣ်လၢတၢ်လုၢ်ထီၣ်တၢ်အဂီၢ် လၢအဖီခိၣ်,+
၂၀ မ့ၣ်အူဒၢတဖၣ် ဒီးမ့ၣ်အူဒၢခွးထူစီတဖၣ်+ လၢကဘၣ် တၢ်ဒွဲၣ်ထီၣ်အီၤလၢ တၢ်လီၢ်စီဆှံကတၢၢ် အမဲာ်ညါ ဒ်တၢ်ဘျၢအိၣ်ဝဲ အသိးလီၤ.
၂၁ ဒီးအဝဲတ့ထီၣ် ဖီဖးထီၣ်တဖၣ်, မ့ၣ်အူဒၢခွးတဖၣ် ဒီးနီၣ်တံာ်တဖၣ် လၢထူစီလီၤ.
၂၂ အဝဲတ့ထီၣ်စ့ၢ်ကီး ထးရံးတဖၣ်, လီခီဖျၢၣ်တဖၣ်, ထံခွးတဖၣ် ဒီးတၢ်စိာ်မ့ၣ်အူအ့ၣ် အခွးတဖၣ် လၢထူစီလီၤ. ဒီးတၢ်လီၢ်စီဆှံကတၢၢ် အတြဲၤတဖၣ်+ ဒီးတၢ်လုၢ်ဟံၣ်အတြဲၤတဖၣ်န့ၣ် အဝဲကျးဝဲဒီး ထူကဘျၣ်တဖၣ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “စုမုၢ်လွံၢ်ဒူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ၁ ဘၤသၤန့ၣ် အိၣ်ဝဲ ၂၂ လံးထၢၣ် (၅.၈၁ ကါလၣ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ အခီပညီလိၤလိၤ “သိတၢ်.”
