၂ စီၤပၤ ၁၃:၁-၂၅
၁၃ ဖဲစီၤအဃၤစယၤ+ အဖိခွါ လၢအမ့ၢ် ယူဒၤဘီမုၢ် အစီၤပၤ စီၤယိၤအၣ်+ ပၢတၢ် ၂၃ နံၣ်တနံၣ်န့ၣ် စီၤယ့ၤဟူ+ အဖိခွါ စီၤယဟိအါဃး ကဲထီၣ်စီၤပၤလၢ ဝ့ၢ်ၡၤမရံအပူၤ လၢအံၣ်စရ့လး အဖီခိၣ်လီၤ. ဒီးစီၤယဟိအါဃး ပၢဘၣ်တၢ် ၁၇ နံၣ်လီၤ.
၂ တၢ်လၢ ယဟိဝၤယွၤ ထံၣ်ဝဲလၢအအၢန့ၣ် စီၤယဟိအါဃး ဆဲးမၤဝဲ တလီၢ်လီၢ် ဒီးအဝဲမၤဒံးဝဲ တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိလၢ အကမၤဝဲ+ ဒီးအဝဲတဃၣ်ကွံာ်အသးလၢ တၢ်ဒဲးဘးတခါန့ၣ်ဘၣ်.
၃ အဃိ ယဟိဝၤယွၤ သးပှံၢ်ထီၣ်+ ပှၤအံၣ်စရ့လးဖိဒိၣ်မး+ ဒီးကစၢ်ယွၤ ဟ့ၣ်လီၤကွံာ် ပှၤအံၣ်စရ့လးဖိလၢ ကီၢ်စူၤရံ အစီၤပၤဃစ့လး+ ဒီးအဖိခွါ စီၤဘ့ၣ်ဟဒး+ အစုပူၤလၢ တၢ်ဆၢကတီၢ်ဖးယံာ်လီၤ.
၄ လၢခံ စီၤယဟိအါဃး ဃ့ကညးယဟိဝၤယွၤလၢ တၢ်သးကညီၤအဂီၢ် ဒီးယဟိဝၤယွၤ ဒိကနၣ်အီၤ, မ့ၢ်လၢ အထံၣ်ဝဲ ကီၢ်စူၤရံအစီၤပၤ ဆီၣ်တံၢ်မၤနၢၤ ပှၤအံၣ်စရ့လးဖိ အဃိလီၤ.+
၅ အဃိ ယဟိဝၤယွၤဟ့ၣ်လီၤ ပှၤအံၣ်စရ့လးဖိလၢ ပှၤတဂၤလၢ ကမၤထူၣ်ဖျဲးထီၣ် အဝဲသ့ၣ်လၢ ပှၤစူၤရံဖိ အစုပူၤလီၤ.+ ဒီးပှၤအံၣ်စရ့လးဖိ အိၣ်ဘၣ်က့ၤလၢ အနီၢ်ကစၢ်အဟံၣ် ဒ်လၢညါအသိးလီၤ.*
၆ (ဘၣ်ဆၣ် အဝဲသ့ၣ် တပာ်တ့ၢ်ကွံာ်ဝဲ စီၤယၤရၤဘၣ် အစၢၤအသွဲၣ် အတၢ်ဒဲးဘးဘၣ်. စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိလၢ ကမၤဝဲတၢ်ဒဲးဘး+ ဒီးအဝဲသ့ၣ် ဆဲးမၤဝဲ တၢ်ဒဲးဘးအံၤ ဒီးတၢ်စီဆှံအထူၣ်*+ ဆဲးအိၣ်ဒံးလၢ ဝ့ၢ်ၡၤမရံအပူၤလီၤ.)
၇ ဒီးကီၢ်စူၤရံအစီၤပၤ မၤဟးဂီၤကွံာ် ပှၤအံၣ်စရ့လးဖိ+ ဒီးယီၢ်တံၢ်အဝဲသ့ၣ် ဒ်ဟီၣ်ခိၣ်ကမူၣ် လၢကြဲၢ်ပူၤအသိးလီၤ.+ အဃိ စီၤယဟိအါဃး အသုးမုၢ်အိၣ်တ့ၢ်က့ၤထဲ အဂၤ ၁၀,၀၀၀, အပှၤဒိးကသ့ၣ်သုး အဂၤ ၅၀ ဒီးအလ့ၣ်ကဟၣ် အခိၣ် ၁၀ လီၤ.
၈ မ့မ့ၢ် စီၤယဟိအါဃး အဂ့ၢ်လၢအဂၤတဖၣ်, တၢ်ခဲလၢာ်လၢ အမၤဝဲ ဒီးအတၢ်မၤလၢ အဒိၣ်အမုၢ်ခဲလၢာ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၉ ဒီးစီၤယဟိအါဃး သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးပှၤခူၣ်လီၤကွံာ်အီၤလၢ ဝ့ၢ်ၡၤမရံအပူၤလီၤ.+ ဒီးအဖိခွါ စီၤယိၤအၣ် ကဲထီၣ်စီၤပၤလၢ အလီၢ်လီၤ.
၁၀ ဖဲယူဒၤအစီၤပၤ စီၤယိၤအၣ် ပၢတၢ် ၃၇ နံၣ်တနံၣ်န့ၣ် စီၤယဟိအါဃး အဖိခွါ စီၤယိၤအၣ်+ ကဲထီၣ်စီၤပၤလၢ ဝ့ၢ်ၡၤမရံအပူၤ လၢအံၣ်စရ့လး အဖီခိၣ်န့ၣ်လီၤ. ဒီးအဝဲပၢဘၣ်တၢ် ၁၆ နံၣ်လီၤ.
၁၁ အဝဲဆဲးမၤ တၢ်လၢယဟိဝၤယွၤ ထံၣ်ဝဲလၢအအၢ ဒီးအဝဲတပာ်တ့ၢ်ကွံာ် တၢ်ဒဲးဘးလၢ စီၤနဘး အဖိခွါ စီၤယၤရၤဘၣ် ဆီၣ်ထွဲ ပှၤအံၣ်စရ့လးဖိလၢ ကမၤဝဲန့ၣ် နီတခါဘၣ်.+ အဝဲဆဲးမၤဝဲ တၢ်ဒဲးဘးတဖၣ်န့ၣ်လီၤ.
၁၂ မ့မ့ၢ် စီၤယိၤအၣ် အဂ့ၢ်လၢအဂၤတဖၣ်, တၢ်ခဲလၢာ်လၢ အမၤဝဲ, အတၢ်မၤလၢ အဒိၣ်အမုၢ်ခဲလၢာ် ဒီးအဝဲဒုးဝဲ ယူဒၤအစီၤပၤအမၤစယါ+ ဒ်လဲၣ်အဂ့ၢ်န့ၣ် ဘၣ်တၢ်ကွဲးလီၤအီၤလၢ အံၣ်စရ့လး အစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၁၃ ဒီးစီၤယိၤအၣ် သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး ဒီးစီၤယၤရၤဘၣ်*+ ဆ့ၣ်နီၤလၢ အလီၢ်ပစိာ်အဖီခိၣ်လီၤ. ဒီးပှၤခူၣ်လီၤကွံာ် စီၤယိၤအၣ်လၢ ဝ့ၢ်ၡၤမရံအပူၤ တပူၤဃီဒီး အံၣ်စရ့လး အစီၤပၤတဖၣ်လီၤ.+
၁၄ ဒီးဖဲစီၤအလံၤၡါ+ ဆိးက့ထီၣ် ဘူးထီၣ်လၢအကသံအခါ အံၣ်စရ့လးအစီၤပၤ ဟဲလၢအအိၣ်ဒီး ဟီၣ်ဝဲလၢအလိၤ ဒီးတဲဝဲလၢ “ယပၢ်ဧၢ, ယပၢ်ဧၢ, အံၣ်စရ့လး အလ့ၣ်ကဟၣ် ဒီးအပှၤဒိးကသ့ၣ်တဖၣ်မၢၤ.”*+
၁၅ ဒီးစီၤအလံၤၡါ တဲအီၤလၢ “ဟံးန့ၢ်ချံၣ် ဒီးပျၢ်တဖၣ်တက့ၢ်.” အဃိ အဝဲဟံးန့ၢ်ဝဲ ချံၣ်ဒီးပျၢ်တဖၣ်လီၤ.
၁၆ ဝံၤဒီး အဝဲတဲ အံၣ်စရ့လး အစီၤပၤလၢ “ဖီၣ်ထီၣ်ချံၣ်တက့ၢ်.” ဒီးအံၣ်စရ့လး အစီၤပၤ ဖီၣ်ထီၣ်ချံၣ်လီၤ. ဝံၤဒီး စီၤအလံၤၡါ ပာ်ဝဲအစုလၢ စီၤပၤအစုအဖီခိၣ်လီၤ.
၁၇ ဒီးအဝဲတဲစီၤပၤလၢ “အိးထီၣ်ပဲတြီဖိ လၢမုၢ်ထီၣ်တခီ.” အဃိ အဝဲအိးထီၣ် ပဲတြီဖိလီၤ. ဒီးစီၤအလံၤၡါ တဲဝဲလၢ “ခးတထံၣ်.” အဃိ အဝဲခးဝဲလီၤ. ဒီးဖဲန့ၣ် စီၤအလံၤၡါတဲဝဲလၢ “ယဟိဝၤယွၤ အတၢ်မၤနၢၤအပျၢ်တဘိ, တၢ်မၤနၢၤ ကီၢ်စူၤရံအပျၢ်တဘိလီၤ. နကတီၢ်* ပှၤစူၤရံဖိတဖၣ် ဖဲဝ့ၢ်အဖ့း+ တုၤလၢ နမၤလၢာ်ကွံာ် အဝဲသ့ၣ်လီၤ.”
၁၈ ဒီးစီၤအလံၤၡါ ဆဲးတဲဝဲလၢ “ဟံးန့ၢ် ပျၢ်ဘိတဖၣ်တက့ၢ်.” ဒီးစီၤပၤ ဟံးန့ၢ်ဝဲ ပျၢ်ဘိတဖၣ်လီၤ. ဝံၤဒီး စီၤအလံၤၡါ တဲအံၣ်စရ့လး အစီၤပၤလၢ “တီၢ်လီၤဟီၣ်ခိၣ်တက့ၢ်.” ဒီးစီၤပၤတီၢ်လီၤ ဟီၣ်ခိၣ်သၢထံၣ်ဒီး ပတုာ်ဝဲလီၤ.
၁၉ ဖဲန့ၣ် ယွၤလၢအမ့ၢ်အတီ အပှၤတဂၤန့ၣ် သးပှံၢ်ထီၣ်စီၤပၤ ဒီးတဲအီၤလၢ “နကြၢးတီၢ် ဟီၣ်ခိၣ် ယဲၢ်ထံၣ်ဃုထံၣ်ညါ. နမ့ၢ်မၤဒ်န့ၣ်မး နကတီၢ်* ပှၤစူၤရံဖိတဖၣ် တုၤလၢ နမၤလၢာ်ကွံာ် အဝဲသ့ၣ်. ဘၣ်ဆၣ် ခဲအံၤ နကတီၢ် ပှၤစူၤရံဖိ ထဲသၢထံၣ်လီၤ.”+
၂၀ ဖဲန့ၣ်ဝံၤအလီၢ်ခံ စီၤအလံၤၡါသံဝဲ ဒီးပှၤခူၣ်လီၤကွံာ်အီၤလီၤ. ဒီးကိးနံၣ်ဒဲး ဖဲနံၣ်စးထီၣ်သီသီအခါ ကီၢ်မိၤအးအသုးဖိ အဒူၣ်တဖၣ်+ ညီနုၢ် ဟဲနုာ်လီၤဝဲလၢ ကီၢ်ပူၤလီၤ.
၂၁ ဖဲပှၤပိာ်ခွါတဖၣ် လဲၤခူၣ်လီၤပှၤပိာ်ခွါ တဂၤအခါ အဝဲသ့ၣ်ထံၣ် ပှၤသုးဖိတဒူၣ်အဃိ အဝဲသ့ၣ် ကရီကွံာ်လီၤ ပိာ်ခွါအစိၣ်န့ၣ်လၢ စီၤအလံၤၡါ အတၢ်သွၣ်ခိၣ်အပူၤ ဒီးဃ့ၢ်ကွံာ်ဝဲလီၤ. ဒီးဖဲပိာ်ခွါအစိၣ်န့ၣ် လဲၤဘၣ်ဒီး စီၤအလံၤၡါ အဃံတဖၣ်အခါ ပိာ်ခွါန့ၣ် သမူထီၣ်က့ၤဝဲ+ ဒီးဆၢထၢၣ်ဝဲလီၤ.
၂၂ ဖဲစီၤယဟိအါဃး ပၢတၢ်ဒီတကတီၢ်န့ၣ် ကီၢ်စူၤရံ အစီၤပၤဃစ့လး+ ဆီၣ်တံၢ်မၤနၢၤ ပှၤအံၣ်စရ့လးဖိလီၤ.+
၂၃ ဘၣ်ဆၣ် ယဟိဝၤယွၤ ပာ်ဖျါထီၣ် တၢ်သူၣ်ဂ့ၤသးဝါ ဒီးတၢ်သးကညီၤလၢ အဝဲသ့ၣ်အဖီခိၣ်+ ဒီးသူၣ်အိၣ်သးအိၣ် အဝဲသ့ၣ်ခီဖျိလၢ အတၢ်အၢၣ်လီၤအီလီၤ ဒီးစီၤအၤဘြၤဟၣ်,+ စီၤအံၤစဲး+ ဒီးစီၤယၤကိာ်+ အဃိလီၤ. ကစၢ်ယွၤတအဲၣ်ဒိးပျဲလၢ အဝဲသ့ၣ်ကတုၤလၢ တၢ်ဟးဂီၤခဲလၢာ်ဘၣ်. ဒီးတုၤလၢ မုၢ်မဆါတနံၤအံၤ အဝဲတပာ်တ့ၢ်ကွံာ် အဝဲသ့ၣ်ဘၣ်.
၂၄ ဖဲကီၢ်စူၤရံ အစီၤပၤဃစ့လး သံဝဲအခါ အဖိခွါ စီၤဘ့ၣ်ဟဒး ကဲထီၣ်စီၤပၤလၢအလီၢ်လီၤ.
၂၅ ဖဲန့ၣ်အခါ စီၤယဟိအါဃး အဖိခွါ စီၤယိၤအၣ် မၤနၢၤ* စီၤဃစ့လး အဖိခွါ စီၤဘ့ၣ်ဟဒး သၢဘျီ+ ဒီးမၤန့ၢ်က့ၤ အံၣ်စရ့လး အဝ့ၢ်တဖၣ်လၢ စီၤဘ့ၣ်ဟဒး အအိၣ်လီၤ. လၢညါန့ၣ် စီၤဃစ့လး မၤန့ၢ်ဝဲ ဝ့ၢ်တဖၣ်အံၤလၢ စီၤယိၤအၣ် အပၢ် စီၤယဟိအါဃး အအိၣ် လၢတၢ်ဒုးအပူၤလီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ မုာ်မုာ်ခုၣ်ခုၣ် ဒီးဘံၣ်ဘံၣ်ဘၢဘၢ.
^ ကွၢ် တၢ်ကတိၤအခီပညီ.
^ မ့ၢ်ဝဲ စီၤယၤရၤဘၣ် ခံဂၤတဂၤ.
^ ဘၣ်သ့ၣ်သ့ၣ် အဝဲဃ့တၢ်မၤစၢၤလၢ ကစၢ်ယွၤအအိၣ် မ့တမ့ၢ် လၢကစၢ်ယွၤအပှၤခၢၣ်စးတဖၣ်အအိၣ်.
^ မ့ၢ်စ့ၢ်ကီး “မၤနၢၤ.”
^ မ့ၢ်စ့ၢ်ကီး “မၤနၢၤ.”
^ မ့ၢ်စ့ၢ်ကီး “တီၢ်.”
