၂ စီၤပၤ ၂၃:၁-၃၇
၂၃ အဃိ စီၤပၤဆှၢလီၤတၢ်ကလုၢ် ဒီးအဝဲသ့ၣ်ကိးဖှိၣ် ပှၤသူၣ်က့သးပှၢ်လၢ အအိၣ်လၢယူဒၤဘီမုၢ် ဒီးဝ့ၢ်ယရူၤၡလ့ၣ်အပူၤ ခဲလၢာ်လီၤ.+
၂ ဝံၤဒီး စီၤပၤ လဲၤထီၣ်လၢ ယဟိဝၤယွၤ အဟံၣ် တပူၤဃီဒီး ယူဒၤအပှၤပိာ်ခွါခဲလၢာ်, ပှၤအိၣ်လၢ ဝ့ၢ်ယရူၤၡလ့ၣ်ခဲလၢာ်, ပှၤလုၢ်တၢ်ဒိၣ်တဖၣ်, ဝံတဖၣ် ဒီးပှၤခဲလၢာ် စးထီၣ်လၢအဒိၣ် တုၤလၢအဆံးလီၤ. ဒီးတၢ်ကွဲးအသး လၢအအိၣ်လၢ လံာ်တၢ်အၢၣ်လီၤအီလီၤလၢ+ ပှၤထံၣ်န့ၢ်အီၤလၢ ယဟိဝၤယွၤ အဟံၣ်ပူၤန့ၣ်+ စီၤပၤဖးထီၣ်ဝဲ ခဲလၢာ်လၢ အကလုၢ်ဒိၣ်ဒိၣ် ဒ်သိး အဝဲသ့ၣ် ကနၢ်ဟူဝဲအဂီၢ်လီၤ.+
၃ ဒီးစီၤပၤ ဆၢထၢၣ်လၢ တၢ်အထူၣ်အကပၤ ဒီးမၤဝဲ တၢ်အၢၣ်လီၤအီလီၤ* လၢယဟိဝၤယွၤ အမဲာ်ညါလီၤ.+ အဝဲအၢၣ်လီၤဝဲလၢ အကမၤထွဲ တၢ်အၢၣ်လီၤအီလီၤလၢ အကွဲးအသးလၢ လံာ်တဘ့ၣ်န့ၣ်အပူၤ ဒီးကဒိကနၣ် ယဟိဝၤယွၤ အကလုၢ် ဒီးမၤထွဲအတၢ်မၤလိာ်, အတၢ်ဒုးသ့ၣ်နီၣ်ထီၣ်တဖၣ် ဒီးအတၢ်ဘျၢတဖၣ် လၢအသးဒီဖျၢၣ်ဒီး လၢအတၢ်အိၣ်မူ ကိးသနၢၣ်ဒဲးအပူၤလီၤ. ဒီးပှၤဂီၢ်မုၢ်ခဲလၢာ် အၢၣ်လီၤဝဲလၢ ကမၤထွဲ တၢ်အၢၣ်လီၤအီလီၤအံၤစ့ၢ်ကီးလီၤ.+
၄ ဒီးစီၤပၤမၤလိာ် ပှၤလုၢ်တၢ်ခိၣ် အဒိၣ်ကတၢၢ် စီၤဃံးလကံယၤ,+ ပှၤလုၢ်တၢ်ဒိၣ် အဂၤတဖၣ် ဒီးပှၤခိးတြဲၤတဖၣ် ဒ်သိး အကလဲၤဟံးန့ၢ် ကယဲၢ်တၢ်ပီးတၢ်လီလၢ ပှၤတ့ဝဲလၢ ဘဧၤလးအဂီၢ်, လၢတၢ်စီဆှံအထူၣ်*+ အဂီၢ် ဒီးလၢမူခိၣ်အသုးမုၢ်ခဲလၢာ်* အဂီၢ် လၢအအိၣ်ဝဲလၢ ယဟိဝၤယွၤ အတၢ်လုၢ်ဟံၣ်ပူၤ ဒီးစိာ်ထီၣ်အီၤလၢ တၢ်ချၢလီၤ. ဒီးစီၤပၤ ဒွဲၣ်ထီၣ်ကွံာ်အီၤလၢ ဝ့ၢ်ယရူၤၡလ့ၣ်အချၢလၢ ကံဒြိၣ်အတၢ်လီၤဘံတဖၣ် ဝံၤဒီး လဲၤစိာ်ဝဲ အဖၣ်ဆါလၢ ဝ့ၢ်ဘ့ၤသ့လးလီၤ.+
၅ အဃိ ယွၤလၢအကမၣ် အပှၤလုၢ်တၢ်ဒိၣ်တဖၣ် လၢယူဒၤအစီၤပၤတဖၣ် ပာ်ထီၣ်တ့ၢ်ဝဲ ဒ်သိး ကဒွဲၣ်ခုၣ်ထီၣ် တၢ်လုၢ်လၢ တၢ်လီၢ်ထီၣ်ထီတဖၣ် လၢယူဒၤအဝ့ၢ်တဖၣ် အပူၤ ဒီးလၢဝ့ၢ်ယရူၤၡလ့ၣ် အခိၣ်အဃၢၤအဂီၢ် ဒီးပှၤလၢ အဒွဲၣ်ခုၣ်ထီၣ် တၢ်လုၢ်လၢ ဘဧၤလးအအိၣ်, လၢမုၢ်အအိၣ်, လၢလါအအိၣ်, လၢဆၣ်ကရူၢ်တဖၣ်အအိၣ် ဒီးလၢမူခိၣ် အသုးမုၢ်ခဲလၢာ်အအိၣ်န့ၣ် စီၤပၤပာ်ပတုာ်ကွံာ် အဝဲသ့ၣ် အတၢ်မၤလီၤ.+
၆ တၢ်စီဆှံအထူၣ်+ လၢအအိၣ်လၢ ယဟိဝၤယွၤ အဟံၣ်ပူၤန့ၣ် အဝဲစိာ်ထီၣ်ဝဲလၢ ဝ့ၢ်ယရူၤၡလ့ၣ်အချၢ လၢကံဒြိၣ် အတၢ်တြီၤပူၤဒီး ဒွဲၣ်အူထီၣ်ကွံာ်ဝဲ+ ဖဲကံဒြိၣ်အတၢ်တြီၤ ဒီးမၤလီၤကမူၣ်ဝဲ ဒီးဖှံလီၤဝဲလၢ ပှၤမုၢ်ဆ့ၣ်မုၢ်ဂီၤဖိ အသွၣ်ခိၣ်တဖၣ်အဖီခိၣ်လီၤ.+
၇ စီၤပၤမၤလီၤပှီၢ်ကွံာ် ဟံၣ်တဖၣ်လၢ ပိာ်ခွါလၢ အဆါလီၤအီၣ်သးလၢ တၢ်ဘူၣ်ထီၣ်ဘါထီၣ် အလီၢ်တဖၣ် အိၣ်ဝဲန့ၣ်လီၤ.+ ဟံၣ်တဖၣ်န့ၣ် အိၣ်ဝဲလၢ ယဟိဝၤယွၤ အဟံၣ်ပူၤ ဒီးဖဲတၢ်လီၢ်လၢ ပိာ်မုၣ်တဖၣ်ထါဒဲလၢ တၢ်စီဆှံအထူၣ် အဂီၢ်န့ၣ်လီၤ.
၈ ပှၤလုၢ်တၢ်ဒိၣ်လၢ အအိၣ်ဝဲလၢ ယူဒၤအဝ့ၢ်တဖၣ်အပူၤ ကိးဂၤဒဲးန့ၣ် စီၤပၤကိးထီၣ် အဝဲသ့ၣ်လၢ ဝ့ၢ်ချၢ ဒီးအဝဲမၤဘၣ်အၢ တၢ်လီၢ်ထီၣ်ထီတဖၣ်လၢ ပှၤလုၢ်တၢ်ဒိၣ်တဖၣ် ဒွဲၣ်ခုၣ်ထီၣ်တ့ၢ်တၢ်လုၢ် စးထီၣ်လၢ ဝ့ၢ်က့ဘၤ+ တုၤလၢ ဝ့ၢ်ဘ့ၢ်ၡဘၤလီၤ.+ ဒီးအမၤလီၤပှီၢ်ကွံာ် တၢ်လီၢ်ထီၣ်ထီတဖၣ်လၢ အအိၣ်ဝဲလၢ ဝ့ၢ်အခိၣ် စီၤယိၤၡူ အတြဲၤ အကျဲနုာ်လီၤန့ၣ်လီၤ. ဖဲပှၤနုာ်လီၤလၢ ဝ့ၢ်အတြဲၤအခါ လၢညါတၢ်လီၢ်ထီၣ်ထီတဖၣ်အံၤ အိၣ်ဝဲလၢ အစုစ့ၣ်တကပၤလီၤ.
၉ တၢ်လီၢ်ထီၣ်ထီ အပှၤလုၢ်တၢ်ဒိၣ်တဖၣ် တမၤတၢ်လၢ ယဟိဝၤယွၤ အတၢ်လုၢ်လီၢ် ဖဲဝ့ၢ်ယရူၤၡလ့ၣ် အပူၤဘၣ်.+ ဘၣ်ဆၣ်အဝဲသ့ၣ် အီၣ်ဝဲ ကိၣ်လၢ အတပၣ်ဒီးကိၣ်မံၣ်ဘၣ် ဃုာ်ဒီး ပှၤလုၢ်တၢ်ဒိၣ်လၢအဂၤတဖၣ်လီၤ.*
၁၀ စီၤပၤယိၤၡံယၤ မၤဘၣ်အၢ တိဖ့း+ အတၢ်လုၢ်ထီၣ်တၢ်အလီၢ် လၢအအိၣ်လၢ ဟံၣ်နိၣ်*+ အတၢ်တြီၤပူၤ ဒ်သိး ပှၤလုၢ်ထီၣ် ပှၤဖိမုၣ်ဖိခွါတဖၣ် လၢမ့ၣ်အူဆူ မိလးအအိၣ် သုတသ့လၢၤတဂ့ၤအဂီၢ်လီၤ.+
၁၁ ကသ့ၣ်တဖၣ်လၢ ယူဒၤအစီၤပၤတဖၣ် ပာ်စီဆှံတ့ၢ်အီၤလၢ မုၢ်အဂီၢ်န့ၣ် စီၤပၤတြီဝဲ ဒ်သိးအသုတလဲၤခီဖျိလၢ ပဒိၣ်စီၤနၤသၣ်မ့လး အဒၢး လၢအအိၣ်ဘူးဒီး တၢ်ထူၣ်လၢအအိၣ်ဒီး အခိၣ်ဒုး ဒီးနုာ်လီၤလၢ ယဟိဝၤယွၤ အတၢ်လုၢ်ဟံၣ်ပူၤ လၢၤတဂ့ၤအဂီၢ်လီၤ. ဒီးအဝဲဒွဲၣ်အူထီၣ်ကွံာ် လ့ၣ်ကဟၣ်တဖၣ်လၢ ပှၤပာ်စီဆှံအီၤလၢ မုၢ်အဂီၢ်န့ၣ်လီၤ.+
၁၂ စီၤပၤ မၤလီၤပှီၢ်စ့ၢ်ကီး တၢ်လုၢ်လီၢ်တဖၣ်လၢ ယူဒၤအစီၤပၤတဖၣ် တ့ထီၣ်ပာ်စၢၤဝဲလၢ စီၤအၤဃး အဒၢးလၢတၢ်ဖီခိၣ်တတီၤ အခိၣ်ဒုး+ ဃုာ်ဒီး တၢ်လုၢ်လီၢ်တဖၣ်လၢ စီၤမနၤၡ့ၤ တ့ထီၣ်ပာ်စၢၤဝဲလၢ ယဟိဝၤယွၤအဟံၣ် အတၢ်ပျီခံဘ့ၣ် အပူၤန့ၣ်လီၤ.+ အဝဲမၤသဘှံးဝဲ တၢ်လုၢ်လီၢ်တဖၣ်န့ၣ် ဒီးဖှံဝဲအကမူၣ်လၢ ကံဒြိၣ်အတၢ်တြီၤပူၤန့ၣ်လီၤ.
၁၃ ဒီးစီၤပၤ မၤဘၣ်အၢဝဲ တၢ်လီၢ်ထီၣ်ထီတဖၣ်လၢ အအိၣ်ဝဲလၢ ဝ့ၢ်ယရူၤၡလ့ၣ် အမဲာ်ညါ လၢကစၢၢ်မၤဟးဂီၤတၢ်* အကလံၤထံးတခီလီၤ. တၢ်လီၢ်ထီၣ်ထီတဖၣ်အံၤ အံၣ်စရ့လး အစီၤပၤၡလိၤမိၤ တ့ထီၣ်တ့ၢ်ဝဲလၢ ပှၤစံဒိၣ်ဖိ အကစၢ်မုၣ်လၢ အလီၤသးဘၣ်အၢ ဧၤၡတြိးအဂီၢ်, လၢပှၤမိၤအးဖိ အယွၤလၢ အလီၤသးဘၣ်အၢ ကမိၣ်အဂီၢ် ဒီးလၢပှၤဧၣ်မိၣ်ဖိ အယွၤလၢ အလီၤသးဘၣ်အၢ+ မိးလးအဂီၢ်န့ၣ်လီၤ.+
၁၄ စီၤပၤမၤကၢ်လီၤကွံာ် လၢၢ်ထူၣ်စီဆှံတဖၣ် တကူာ်ဘၣ်တကူာ်, မၤလီၤကူၢ်ကွံာ်ဝဲ တၢ်စီဆှံအထူၣ်တဖၣ်+ ဒီးလၢတၢ်သ့ၣ်တဖၣ်န့ၣ်အလီၢ်န့ၣ် အဝဲမၤပှဲၤဝဲဒီး ပှၤဃံတဖၣ်လီၤ.
၁၅ အဝဲ မၤလီၤပှီၢ်ကွံာ်စ့ၢ်ကီး တၢ်လုၢ်လီၢ်လၢ ဝ့ၢ်ဘ့ၤသ့လး ဒီးတၢ်လီၢ်ထီၣ်ထီ လၢစီၤနဘးအဖိခွါ စီၤယၤရၤဘၣ် တ့ထီၣ်တ့ၢ်ဝဲလၢ အဆီၣ်ထွဲ ပှၤအံၣ်စရ့လးဖိ လၢကမၤတၢ်ဒဲးဘးအဂီၢ်န့ၣ်လီၤ.+ အဝဲမၤလီၤပှီၢ်ကွံာ်ဝဲ တၢ်လုၢ်လီၢ်တဖျၢၣ်န့ၣ် ဒီးတၢ်လီၢ်ထီၣ်ထီ ဝံၤအလီၢ်ခံ အဝဲဒွဲၣ်အူထီၣ်ကွံာ် တၢ်လီၢ်ထီၣ်ထီ ဒီးမၤလီၤကမူၣ်ဝဲ ဒီးဒွဲၣ်အူထီၣ်ကွံာ်ဝဲ တၢ်စီဆှံအထူၣ်န့ၣ်လီၤ.+
၁၆ ဖဲစီၤယိၤၡံယၤ ဃၣ်အသး ဒီးထံၣ်ဝဲ တၢ်သွၣ်ခိၣ်တဖၣ် လၢကစၢၢ်လိၤအခါ အဝဲမၢ ပှၤဟံးန့ၢ် ပှၤဃံတဖၣ် လၢတၢ်သွၣ်ခိၣ်အပူၤ ဒီးမၤဘၣ်အၢဝဲ တၢ်လုၢ်လီၢ် ခီဖျိ ဒွဲၣ်အူထီၣ်ဝဲ ပှၤဃံတဖၣ်လၢ အဖီခိၣ်န့ၣ်လီၤ. တၢ်မၤအသးတဖၣ်အံၤ ကဲထီၣ်အသး ဒ်ယဟိဝၤယွၤ တဲပာ်စၢၤဝဲ ခီဖျိလၢအဝံန့ၣ်လီၤ.+
၁၇ ဝံၤဒီး စီၤယိၤၡံယၤ တဲဝဲလၢ “တၢ်သွၣ်ခိၣ်အလၢၢ်လၢ ယထံၣ်ဘၣ်အီၤ လၢန့ၣ်တဖျၢၣ်န့ၣ် အကဲမတဂၤ အသွၣ်ခိၣ်လဲၣ်.” ဒီးပိာ်ခွါတဖၣ်လၢ ဝ့ၢ်ပူၤန့ၣ် တဲဘၣ်အီၤလၢ “အကဲဝဲ ယွၤလၢအမ့ၢ်အတီ အပှၤတဂၤ လၢအအိၣ်ဟဲလၢ ယူဒၤန့ၣ်+ အသွၣ်ခိၣ်လီၤ. အဝဲကဲ ပှၤတဂၤလၢ အတဲဆိပာ်စၢၤဝဲလၢ နကမၤ ဝ့ၢ်ဘ့ၤသ့လး အတၢ်လုၢ်လီၢ်ဒ်အံၤလီၤ.”
၁၈ ဒီးစီၤယိၤၡံယၤ တဲဝဲလၢ “အိၣ်ဒၣ်ဝဲဒ်န့ၣ်. တဘၣ်ဟ့ၣ်အခွဲးလၢ ပှၤကလဲၤဖီၣ်ဘူးအဃံ နီတဂၤတဂ့ၤ.” အဃိ ပှၤတလဲၤဖီၣ်ဘူး အဃံတဖၣ်ဘၣ်. ဒီးဝံလၢအအိၣ်ဟဲလၢ ဝ့ၢ်ၡၤမရံတဂၤန့ၣ် အဃံတဖၣ်စ့ၢ်ကီး ပှၤတဖီၣ်ဘူးဝဲဘၣ်.+
၁၉ ဒီးတၢ်ဘူၣ်ထီၣ်ဘါထီၣ် အဟံၣ်တဖၣ်လၢ တၢ်လီၢ်ထီၣ်ထီတဖၣ်အလိၤ လၢအအိၣ်လၢ ဝ့ၢ်ၡၤမရံအပူၤ+ လၢအံၣ်စရ့လး အစီၤပၤတဖၣ် တ့ထီၣ်တ့ၢ်ဝဲ ဒ်သိးကမၤဆါ ကစၢ်ယွၤ အသးအဂီၢ်န့ၣ် စီၤယိၤၡံယၤ မၤလီၤပှီၢ်ကွံာ်ဝဲ ခဲလၢာ်လီၤ. အဝဲမၤ ဟံၣ်တဖၣ်န့ၣ် ဒ်အမၤတ့ၢ်ဝဲ လၢဝ့ၢ်ဘ့ၤသ့လး အပူၤအသိးန့ၣ်လီၤ.+
၂၀ အဃိ တၢ်လီၢ်ထီၣ်ထီ အပှၤလုၢ်တၢ်ဒိၣ်ခဲလၢာ် လၢအအိၣ် ဖဲန့ၣ်တဖၣ်န့ၣ် စီၤယိၤၡံယၤ လုၢ်ထီၣ် အဝဲသ့ၣ် လၢတၢ်လုၢ်လီၢ်တဖၣ် အဖီခိၣ် ဒီးအဝဲ ဒွဲၣ်အူထီၣ်စ့ၢ်ကီး ပှၤဃံတဖၣ်လၢ တၢ်လုၢ်လီၢ်အဖီခိၣ်လီၤ.+ ဝံၤဒီး အဝဲက့ၤကဒါက့ၤဝဲလၢ ဝ့ၢ်ယရူၤၡလ့ၣ်လီၤ.
၂၁ ဒီးစီၤပၤ မၤလိာ် ပှၤဂီၢ်မုၢ်ခဲလၢာ်လၢ “မၤဘူၣ်လဲၤကပာ်လၢ+ သုကစၢ် ယဟိဝၤယွၤအဂီၢ် ဒ်အဘၣ်တၢ်ကွဲးလီၤ ပာ်စၢၤအီၤလၢ လံာ်တၢ်အၢၣ်လီၤအီလီၤ အပူၤအသိးတက့ၢ်.”+
၂၂ စးထီၣ်ဖဲ တၢ်ဆၢကတီၢ်လၢ စံၣ်ညီၣ်ကွီၢ်တဖၣ် စံၣ်ညီၣ်န့ၢ်တၢ်လၢ ပှၤအံၣ်စရ့လးဖိအဂီၢ် တုၤလၢ အံၣ်စရ့လး အစီၤပၤတဖၣ် ဒီးယူဒၤအစီၤပၤတဖၣ် အစိၤန့ၣ် ဘူၣ်လဲၤကပာ်ဒ်အံၤ တအိၣ်နီတဘျီဘၣ်.+
၂၃ ဘၣ်ဆၣ် ဖဲစီၤပၤယိၤၡံယၤပၢတၢ် ၁၈ နံၣ်တနံၣ်န့ၣ် ပှၤမၤဝဲ ဘူၣ်လဲၤကပာ်တခါအံၤ လၢယဟိဝၤယွၤအဂီၢ် လၢဝ့ၢ်ယရူၤၡလ့ၣ်အပူၤလီၤ.
၂၄ ဒ်သိး စီၤယိၤၡံယၤ ကမၤလၢပှဲၤထီၣ် တၢ်သိၣ်တၢ်သီလၢ+ အအိၣ်လၢ လံာ်လၢ ပှၤလုၢ်တၢ်ဒိၣ် စီၤဃံးလကံယၤ ထံၣ်န့ၢ်ဝဲလၢ ယဟိဝၤယွၤ အဟံၣ်ပူၤအဂီၢ်+ စီၤယိၤၡံယၤ မၤလီၤမၢ်ကွံာ် ပှၤလၢအဆဲးကျိးဒီးပှၤသံ, ပှၤလၢအဟီဆိပာ်စၢၤတၢ်,+ တရၤဖး တၢ်ဂီၤတၢ်ဖှီၣ်တဖၣ်,*+ တၢ်ဂီၤတၢ်ဖှီၣ်လၢ အလီၤသးဘၣ်အၢတဖၣ် ဒီးတၢ်လၢ အလီၤသးဘၣ်အၢ လၢယူဒၤဘီမုၢ် ဒီးဝ့ၢ်ယရူၤၡလ့ၣ် အပူၤခဲလၢာ်လီၤ.
၂၅ စီၤပၤလၢ အအိၣ်မူဝဲလၢ စီၤယိၤၡံယၤအမဲာ်ညါမ့ၢ်ဂ့ၤ အလီၢ်ခံမ့ၢ်ဂ့ၤ လၢအဟဲက့ၤကဒါက့ၤ လၢယဟိဝၤယွၤအအိၣ် လၢအသးဒီဖျၢၣ်+ ဒီးမၤအတၢ်ဘၣ်သး လၢအတၢ်အိၣ်မူ ကိးသနၢၣ်ဒဲးအပူၤ ဒီးလၢအဂံၢ်အဘါခဲလၢာ် ဒီးမၤထွဲဝဲ စီၤမိၤၡ့အတၢ်သိၣ်တၢ်သီ ခဲလၢာ် ဒ်စီၤယိၤၡံယၤအသိးန့ၣ် တအိၣ်နီတဂၤဘၣ်.
၂၆ ဘၣ်ဆၣ်သနာ်က့ ခီဖျိလၢ စီၤမနၤၡ့ၤ မၤတ့ၢ်ဝဲ တၢ်အါမံၤလၢ အမၤဆါ ယဟိဝၤယွၤအသး အဃိ ယွၤအတၢ်သးဒိၣ်လၢ အကဲၤထီၣ်လၢ ယူဒၤဘီမုၢ် အဖီခိၣ်န့ၣ် တလီၤပံးကွံာ်ဒံးဘၣ်.+
၂၇ အဃိ ယဟိဝၤယွၤ တဲဝဲလၢ “ယကမၤလီၤမၢ်ကွံာ် ယူဒၤဘီမုၢ် လၢယမဲာ်ညါ+ ဒ်ယမၤလီၤမၢ်ကွံာ် အံၣ်စရ့လးအသိးလီၤ.+ ဒီးဝ့ၢ်ယရူၤၡလ့ၣ် လၢယဃုထၢထီၣ်ပာ်စၢၤ ဒီးဟံၣ်လၢယတဲလၢ ‘ယမံၤကအိၣ်ဖဲန့ၣ် ထီဘိ’ တဖျၢၣ်န့ၣ်+ ယကပာ်တ့ၢ်ကွံာ်အီၤလီၤ.”
၂၈ မ့မ့ၢ် စီၤယိၤၡံယၤ အဂ့ၢ်လၢအဂၤတဖၣ် ဒီးတၢ်လၢအမၤတ့ၢ်ဝဲ ခဲလၢာ်န့ၣ် ဘၣ်တၢ်ကွဲးလီၤအီၤလၢ ယူဒၤအစီၤပၤ တၢ်စံၣ်စိၤတဲစိၤ အလံာ်ပူၤလီၤ.
၂၉ ဖဲစီၤယိၤၡံယၤ ပၢတၢ်အခါ ကီၢ်အဲၤကူပတူး အစီၤပၤ ဖၤရိၤနကိၤ လဲၤဝဲဒ်သိး ကဆီၣ်ထွဲ ကီၢ်အၤၡူၢ် အစီၤပၤလၢ ထံကျိဖရၤသး အကပၤလီၤ. ဒီးစီၤပၤယိၤၡံယၤ လဲၤထီၣ်သဂၢၢ် ဖၤရိၤနကိၤလီၤ. ဘၣ်ဆၣ် ဖဲဖၤရိၤနကိၤ ထံၣ်ဘၣ်အီၤအခါ အမၤသံအီၤ ဘူးဒီး ဝ့ၢ်မကံးဒိၤလီၤ.+
၃၀ အဃိ စီၤယိၤၡံယၤအစိၣ်လၢ အအိၣ်ဘူးဒီး ဝ့ၢ်မကံးဒိၤန့ၣ် အခ့အပှၤတဖၣ် က့ၤတီၣ်ဝဲလၢ လ့ၣ်ကဟၣ်အပူၤ ဒီးက့ၤဆှၢကဒါက့ၤဝဲလၢ ဝ့ၢ်ယရူၤၡလ့ၣ် ဒီးခူၣ်လီၤကွံာ်အီၤလၢ အသွၣ်ခိၣ်လီၤ. ဝံၤဒီး ပှၤထံဖိကီၢ်ဖိ ဒိးဖှူဝဲ စီၤယိၤၡံယၤ အဖိခွါ စီၤယဟိအါဃး ဒီးပာ်ထီၣ်အီၤဒ်စီၤပၤ လၢအပၢ် စီၤယိၤၡံယၤ အလီၢ်န့ၣ်လီၤ.+
၃၁ ဖဲစီၤယဟိအါဃး+ ကဲထီၣ်စီၤပၤအခါ အသးနံၣ်အိၣ်ဝဲ ၂၃ နံၣ်ဒီးအဝဲပၢဘၣ်တၢ် လၢဝ့ၢ်ယရူၤၡလ့ၣ်အပူၤ သၢလါလီၤ. စီၤယဟိအါဃး အမိၢ်မ့ၢ်ဝဲ နီၢ်ဃမူတလး+ လၢအမ့ၢ် စီၤယံးရမံယၤ လၢအအိၣ်ဟဲလၢ ဝ့ၢ်လံးဘနၤန့ၣ် အဖိမုၣ်လီၤ.
၃၂ စီၤယဟိအါဃး မၤတၢ်လၢ ယဟိဝၤယွၤ ထံၣ်ဝဲလၢအအၢ ဒ်အမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲအသိး ခဲလၢာ်လီၤ.+
၃၃ ဒီးဒ်သိး စီၤယဟိအါဃး သုတပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ တဂ့ၤအဂီၢ် ဖၤရိၤနကိၤ+ ပာ်အီၤလၢဃိာ်ပူၤ ဖဲဝ့ၢ်ရံးဘလၤ+ လၢဃမါသး အဟီၣ်ကဝီၤန့ၣ်လီၤ. ဒီးဖၤရိၤ အီၣ်လိးဝဲ ယူဒၤဘီမုၢ်လၢ စ့ညၣ် အတၤလၣ်* ၁၀၀ ဒီးထူတတၤလၣ်လီၤ.+
၃၄ တကးဒံးဘၣ် ဖၤရိၤနကိၤ ဒုးကဲထီၣ် စီၤယိၤၡံယၤ အဖိခွါ စီၤအ့ၤလယါကံၣ် လၢစီၤပၤ လၢစီၤယိၤၡံယၤအလီၢ် ဒီးဆီတလဲက့ၤဝဲ စီၤအ့ၤလယါကံၣ် အမံၤလၢ စီၤယဟိၤယါကံၣ်န့ၣ်လီၤ. မ့မ့ၢ် စီၤယဟိအါဃးန့ၣ် ဖၤရိၤ က့ၤကိးအီၤလၢ ကီၢ်အဲၤကူပတူးအပူၤ+ ဒီးလၢခံ စီၤယဟိအါဃး သံဝဲဖဲန့ၣ်လီၤ.+
၃၅ စီၤယဟိၤယါကံၣ် ဟ့ၣ်ဝဲ ဖၤရိၤလၢ စ့ညၣ်ဒီးထူ ဘၣ်ဆၣ် ဒ်သိးအကဟ့ၣ် စ့ညၣ်လၢ ဖၤရိၤဃ့ဝဲအဂီၢ် အဝဲဘၣ်ထၢ တၢ်ခိတၢ်သွဲ လၢယူဒၤအပှၤဂီၢ်မုၢ်အအိၣ်လီၤ. ဒီးအဝဲဃ့ဝဲ စ့ညၣ် ဒီးထူ လၢပှၤလၢ အအိၣ်လၢ ယူဒၤဘီမုၢ်အပူၤ ကိးဂၤဒဲးအအိၣ် ဒ်တၢ်ပာ်ပနီၣ်အပှ့ၤ အိၣ်ဝဲအသိး ဒီးအဟ့ၣ်လီၤဝဲ ဖၤရိၤနကိၤလီၤ.
၃၆ ဖဲစီၤယဟိၤယါကံၣ်+ ကဲထီၣ်စီၤပၤအခါ အသးနံၣ်အိၣ်ဝဲ ၂၅ နံၣ်ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၁၁ နံၣ်လီၤ.+ စီၤယဟိၤယါကံၣ် အမိၢ်မ့ၢ်ဝဲ နီၢ်စဘူဒၤ လၢအမ့ၢ် စီၤပဒါယၤ လၢအအိၣ်လၢ ရူမၤ န့ၣ်အဖိမုၣ်လီၤ.
၃၇ စီၤယဟိၤယါကံၣ် ဆဲးမၤတၢ်လၢ ယဟိဝၤယွၤ ထံၣ်ဝဲလၢအအၢ+ ဒ်အမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲအသိး ခဲလၢာ်လီၤ.+
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “မၤသီထီၣ်က့ၤ တၢ်အၢၣ်လီၤအီလီၤ.”
^ ကွၢ် တၢ်ကတိၤအခီပညီ.
^ ဖျါလၢအဲၣ်ဒိးတဲဝဲ မူဖျၢၣ်တဖၣ် ဒ်သိးဒီး မုၢ်, လါဒီးဆၣ်တဖၣ်.
^ အခီပညီလိၤလိၤ “ဒီပုၢ်ဝဲၢ်ခွါတဖၣ်.”
^ မ့ၢ်ဝဲ ကစၢၢ်သ့ၣ်စၤယံး လီၤဆီဒၣ်တၢ် လၢကစၢၢ်အကလံၤစိးတခီလၢ အဘၣ်တၢ်ကိးစ့ၢ်ကီးအီၤလၢ ကစၢၢ်ဒုးလီၤကမၣ်တၢ်.
^ မ့ၢ်စ့ၢ်ကီး “ဟံၣ်ဖိဃီဖိအယွၤတဖၣ်.”
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
