၂ ၡမူၤအ့လး ၁၁:၁-၂၇
၁၁ ဖဲနံၣ်စးထီၣ်သီသီ ဒီးစီၤပၤတဖၣ် ညီနုၢ်လဲၤဒုးတၢ် အဆၢကတီၢ် စီၤဒၤဝံး ဆှၢလီၤဝဲ စီၤယိၤအာ် ဒီးအခ့အပှၤတဖၣ် ဒီးအံၣ်စရ့လးအသုးမုၢ် ဒီတဖုလၢ ကလဲၤမၤဟးဂီၤ ပှၤဧၣ်မိၣ်ဖိလီၤ. ဒီးအဝဲသ့ၣ် လဲၤကဝီၤဃာ်ဝဲ ဝ့ၢ်ရးဘးလီၤ.+ မ့မ့ၢ်စီၤဒၤဝံးန့ၣ် အိၣ်တ့ၢ်ဝဲလၢ ဝ့ၢ်ယရူၤၡလ့ၣ်လီၤ.+
၂ ဘၣ်တဟါ စီၤဒၤဝံး ဂဲၤဆၢထၢၣ်လၢ အလီၢ်မံ ဒီးဟးဝဲလၢ စီၤပၤအဟံၣ်* ခိၣ်လီၤ. လၢဟံၣ်ခိၣ်န့ၣ် အဝဲထံၣ်လီၤစိဝဲ ပိာ်မုၣ်တဂၤ လုၢ်ထံ ဒီးပိာ်မုၣ်န့ၣ် အဒိၣ်တၢ်ဂ့ၤဒိၣ်မးလီၤ.
၃ စီၤဒၤဝံး ဆှၢလီၤပှၤတဂၤ ဒ်သိးကလဲၤသံကွၢ် ပိာ်မုၣ်န့ၣ်အဂ့ၢ်လီၤ. ဒီးပှၤတဂၤန့ၣ် ဟဲက့ၤတဲဝဲလၢ “ပိာ်မုၣ်န့ၣ် မ့ၢ်ဝဲ စီၤအလံဧၣ်+ အဖိမုၣ် နီၢ်ဘၤသၡ့ဘၤ+ ဒီးအမ့ၢ်ဝဲ ပှၤဃ့ၤသးဖိ+ စီၤအူၤရံယၤ အမါလီၤ.”+
၄ ဒီးစီၤဒၤဝံး ဆှၢလီၤ ပှၤစိာ်တၢ်ကစီၣ်ဖိတဖၣ် ဒ်သိးကလဲၤကိးန့ၢ် နီၢ်ဘၤသၡ့ဘၤ အဂီၢ်လီၤ.+ ဒီးအဝဲလဲၤနုာ်ဝဲလၢ စီၤဒၤဝံးအအိၣ် ဒီးစီၤဒၤဝံး မံဃုာ်ဒီးအီၤလီၤ.+ (တၢ်ကဲထီၣ်အသးဒ်အံၤ ဖဲအဝဲမၤကဆှီထီၣ်အသး အခါလီၤ.)*+ လၢခံအဝဲ က့ၤကဒါက့ၤလၢ အဟံၣ်လီၤ.
၅ ဒီးပိာ်မုၣ်န့ၣ် ဒၢထီၣ်ဝဲ ဒီးအဝဲဆှၢလီၤ တၢ်ကစီၣ်လၢ စီၤဒၤဝံးအအိၣ်လၢ “ယဒၢထီၣ်လံ.”
၆ ဒီးစီၤဒၤဝံး ဆှၢလီၤ တၢ်ကစီၣ်လၢ စီၤယိၤအာ် အအိၣ်လၢ “မၢပှၤဃ့ၤသးဖိ စီၤအူၤရံယၤ ဟဲက့ၤလၢယအိၣ်တက့ၢ်.” အဃိ စီၤယိၤအာ် ဆှၢကဒါက့ၤ စီၤအူၤရံယၤလၢ စီၤဒၤဝံးအအိၣ်လီၤ.
၇ ဖဲစီၤအူၤရံယၤ ဟဲက့ၤတုၤလၢ စီၤဒၤဝံး အအိၣ်အခါ စီၤဒၤဝံး သံကွၢ်အီၤလၢ စီၤယိၤအာ် မၤအသးဒ်လဲၣ်, သုးဖိတဖၣ် မၤအသးဒ်လဲၣ် ဒီးတၢ်ဒုး မၤအသးဒ်လဲၣ် အဂ့ၢ်န့ၣ်လီၤ.
၈ ဒီးစီၤဒၤဝံး တဲစီၤအူၤရံယၤလၢ “က့ၤလီၤလၢ နဟံၣ် ဒီးအိၣ်ဘှံးအိၣ်သါသၢၤ.” ဖဲစီၤအူၤရံယၤ ဟးထီၣ်လၢ စီၤပၤအဟံၣ်အခါ စီၤပၤဆှၢလီၤ စီၤပၤအတၢ်ဟ့ၣ်လၢ အအိၣ်လီၤ.
၉ ဘၣ်ဆၣ် စီၤအူၤရံယၤ တက့ၤလၢ အဟံၣ်ဘၣ်. အဝဲမံဝဲလၢ စီၤပၤအဟံၣ် အတြဲၤခိၣ်ထိး ဃုာ်ဒီး စီၤပၤအခ့အပှၤ လၢအဂၤတဖၣ်လီၤ.
၁၀ ဒီးပှၤတဲဘၣ် စီၤဒၤဝံးလၢ “စီၤအူၤရံယၤ တက့ၤလၢ အဟံၣ်ဘၣ်.” အဃိ စီၤဒၤဝံး တဲဘၣ် စီၤအူၤရံယၤလၢ “နဟဲက့ၤလၢ တၢ်လီၢ်ယံၤတမ့ၢ်ဧီၤ. ဘၣ်မနုၤအဃိ နတက့ၤလၢ နဟံၣ်ဘၣ်လဲၣ်.”
၁၁ စီၤအူၤရံယၤ တဲဆၢစီၤဒၤဝံးလၢ “တလါစီဆှံ+ ဒီးအံၣ်စရ့လး ဒီးယူဒၤ အသုးမုၢ် အိၣ်ဝဲလၢ ဒဲတဖၣ်အပူၤ ဒီးယကစၢ် စီၤယိၤအာ် ဒီးအခ့အပှၤတဖၣ် အိၣ်ဝဲလၢ တၢ်ပျီပူၤလီၤ. အဃိ ယကက့ၤ အီၣ်တၢ်အီတၢ်လၢ ယဟံၣ်ပူၤ ဒီးမံဃုာ်ဒီးယမါန့ၣ် မ့ၢ်အကကြၢးဧါ.+ ယအၢၣ်လီၤလၢ နမဲာ်ညါလၢ လ့ၤတက့ၤ ယတမၤဒ်န့ၣ်ဘၣ်.”
၁၂ ဒီးစီၤဒၤဝံးတဲ စီၤအူၤရံယၤလၢ “တနံၤအံၤစ့ၢ်ကီး အိၣ်ဖဲအံၤ ဒီးလၢခဲမုၢ်ဆ့ၣ်န့ၣ် ယကပျဲလဲၤကဒါနၤ.” အဃိ စီၤအူၤရံယၤ ဆဲးအိၣ်ကဒီးဝဲလၢ ဝ့ၢ်ယရူၤၡလ့ၣ် တုၤလၢ လၢခံတနံၤလီၤ.
၁၃ စီၤဒၤဝံး မၢပှၤလဲၤကိး စီၤအူၤရံယၤလၢ ကဟဲအီၣ်သကိး အီသကိးတၢ် ဒီးအီၤ ဒီးစီၤဒၤဝံး ဒုးအီမူၤ စီၤအူၤရံယၤလီၤ. ဘၣ်ဆၣ် လၢဟါလီၤခီန့ၣ် အဝဲတက့ၤလၢ အဟံၣ်ဘၣ်. အဝဲလဲၤမံဝဲ လၢအလီၢ်မံ ဒီးစီၤပၤ အခ့အပှၤတဖၣ် မံဝဲဖဲန့ၣ်စ့ၢ်ကီးလီၤ.
၁၄ လၢဂီၤခီန့ၣ် စီၤဒၤဝံး ကွဲးန့ၢ် စီၤယိၤအာ် လံာ်ပရၢတဘ့ၣ် ဒီးမၢစီၤအူၤရံယၤ လဲၤဆှၢန့ၢ်အီၤလီၤ.
၁၅ လၢလံာ်ပရၢအပူၤန့ၣ် အဝဲကွဲးလီၤဝဲလၢ “ပာ်စီၤအူၤရံယၤလၢ တၢ်မဲာ်ညါ လၢတၢ်ဒုးဆူၣ်ကတၢၢ် အလီၢ် ဒီးမ့မ့ၢ်သုန့ၣ် ဂုာ်က့ၤသုလီၢ်ခံ ဒ်သိး စီၤအူၤရံယၤ ကဘၣ်တၢ်မၤသံအီၤ အဂီၢ်တက့ၢ်.”+
၁၆ စီၤယိၤအာ် ကွၢ်နီၣ်ပာ်စၢၤ ဝ့ၢ်လီၤတံၢ်လီၤဆဲး ဝံၤလံအဃိ ပှၤသုးဖိလၢ အဂံၢ်ဆူၣ်ဘါဆူၣ်တဖၣ် အိၣ်ဖဲလဲၣ်န့ၣ် အဝဲသ့ၣ်ညါဝဲ ဒီးအဝဲ ပာ်လီၤ စီၤအူၤရံယၤ ဖဲန့ၣ်လီၤ.
၁၇ ဖဲပှၤပိာ်ခွါလၢ ဝ့ၢ်ပူၤတဖၣ် ဟဲထီၣ်ဒုးဝဲ စီၤယိၤအာ်အခါ စီၤဒၤဝံး အခ့အပှၤတဖၣ် သံဝဲတနီၤလီၤ. လၢပှၤသံတဖၣ်အကျါန့ၣ် ပၣ်ဃုာ်ဒီး ပှၤဃ့ၤသးဖိ စီၤအူၤရံယၤလီၤ.+
၁၈ ဒီးစီၤယိၤအာ် ပာ်ဖျါထီၣ်က့ၤဝဲ တၢ်ဒုးအဂ့ၢ်ခဲလၢာ်လၢ စီၤဒၤဝံးအအိၣ်လီၤ.
၁၉ ဒီးစီၤယိၤအာ် မၤလိာ် ပှၤစိာ်တၢ်ကစီၣ်ဖိလၢ “ဖဲနတဲ စီၤပၤလၢ တၢ်ဒုးအဂ့ၢ် ဝံၤခဲလၢာ်အခါ
၂၀ ဘၣ်သ့ၣ်သ့ၣ် စီၤပၤကသးဒိၣ်ထီၣ်တၢ် ဒီးကတဲနၤလၢ ‘ဘၣ်မနုၤအဃိ သုဘၣ်လဲၤဒုးတၢ် ဘူးဘူးဒီးဝ့ၢ် ထဲန့ၣ်ညါလဲၣ်. ပှၤကခးလီၤတၢ်လၢ ဝ့ၢ်ခိၣ်ဒူ အဖီခိၣ်န့ၣ် သုတသ့ၣ်ညါဧီၤ.
၂၁ မတဂၤ မၤသံ စီၤယရူၤဘၡ့း+ အဖိခွါ စီၤအဘံၤမ့လ့းလဲၣ်.+ ပိာ်မုၣ်တဂၤလၢ အအိၣ်လၢ တၢ်ဒူၣ်အဖီခိၣ်န့ၣ် ကွံာ်လီၤ ဆၢၣ်ဂူာ်လၢၢ်လၢ စီၤအဘံၤမ့လ့းအခိၣ်လိၤ ဒီးအသံဝဲလၢ ဝ့ၢ်တ့ဘ့းန့ၣ် တမ့ၢ်ဧီၤ. ဘၣ်မနုၤအဃိ သုဘၣ်လဲၤဘူးဘူးဒီး ဝ့ၢ်ဒူၣ်လဲၣ်.’ ဖဲန့ၣ် တဲအီၤလၢ ‘နခ့နပှၤ ပှၤဃ့ၤသးဖိ စီၤအူၤရံယၤ စ့ၢ်ကီးသံဝဲလံ.’”
၂၂ ဒီးပှၤစိာ်တၢ်ကစီၣ်ဖိတဂၤန့ၣ် လဲၤတဲဘၣ် စီၤဒၤဝံးလၢ တၢ်လၢစီၤယိၤအာ် မၤလိာ်အီၤ ခဲလၢာ်န့ၣ်လီၤ.
၂၃ ဒီးပှၤစိာ်တၢ်ကစီၣ်ဖိတဂၤ တဲစီၤဒၤဝံးလၢ “ပှၤတဖၣ်န့ၣ် အဂံၢ်ဆူၣ်န့ၢ်ပှၤဒံး ဒီးဟဲထီၣ်လၢ ပအိၣ်လၢတၢ်ပျီပူၤ ဘၣ်ဆၣ် ပဒုးအဝဲသ့ၣ် အဃိ အဝဲသ့ၣ် ဂုၤကဒါက့ၤလၢ အလီၢ်ခံ တုၤလၢ ဝ့ၢ်တြဲၤလီၤ.
၂၄ ဒီးပှၤခးပျၢ်ဖိတဖၣ် အိၣ်လၢ ဝ့ၢ်ခိၣ်ဒူဒီး ခးလီၤဝဲ စီၤပၤအခ့အပှၤတဖၣ် ဒီးစီၤပၤအခ့အပှၤတနီၤ သံဝဲလီၤ. ဒီးနခ့နပှၤ ပှၤဃ့ၤသးဖိ စီၤအူၤရံယၤ စ့ၢ်ကီးသံဝဲလီၤ.”+
၂၅ စီၤဒၤဝံး တဲပှၤစိာ်တၢ်ကစီၣ်ဖိတဂၤန့ၣ်လၢ “တဲစီၤယိၤအာ် ဒ်အံၤ, ‘တလိၣ် နသးဘၣ်တံာ်တာ်လၢ တၢ်ဂ့ၢ်တခါအံၤ အဃိဘၣ်. တၢ်လၢနးန့ၣ် မၤသံပှၤတဂၤဂ့ၤ တဂၤဂ့ၤသ့လီၤ. ဆဲးဒုးဝ့ၢ်တဖျၢၣ်န့ၣ် ဆူၣ်န့ၢ်အလီၢ် ဒီးမၤနၢၤအီၤတက့ၢ်.’+ ဝံၤဒီးဟ့ၣ်ဂံၢ်ဟ့ၣ်ဘါ စီၤယိၤအာ်သၢၤ.”
၂၆ ဖဲစီၤအူၤရံယၤအမါ နၢ်ဟူဝဲလၢ အဝၤသံလံအခါ အဝဲသူၣ်အုးသးအုးဝဲလၢ အဝၤအဃိလီၤ.
၂၇ ဖဲတၢ်သူၣ်အုးသးအုး အဆၢကတီၢ် ဝံၤဝဲအခါ စီၤဒၤဝံး မၢပှၤဟဲက့ၤကိးအီၤလၢ အဟံၣ်လီၤ. ဒီးနီၢ်ဘၤသၡ့ဘၤ ကဲထီၣ်အမါ+ ဒီးအိၣ်ဖျဲၣ်ထီၣ်န့ၢ်အီၤ ဖိခွါတဂၤလီၤ. ဘၣ်ဆၣ် တၢ်လၢစီၤဒၤဝံး မၤဝဲန့ၣ် တဘၣ်ယဟိဝၤယွၤ အသး နီတစဲးဘၣ်.+
