၂ ၡမူၤအ့လး ၁၂:၁-၃၁
၁၂ ဒီးယဟိဝၤယွၤ ဆှၢလီၤစီၤနၤသၣ်လၢ+ စီၤဒၤဝံးအအိၣ်လီၤ. ဒီးစီၤနၤသၣ် ဟဲလၢစီၤဒၤဝံးအအိၣ်+ ဒီးတဲအီၤလၢ “လၢဝ့ၢ်တဖျၢၣ်အပူၤန့ၣ် ပှၤပိာ်ခွါ အိၣ်ဝဲခံဂၤလီၤ. တဂၤန့ၣ် အကဲဒိၣ် ဒီးအဝဲတဂၤန့ၣ် အဖှီၣ်လီၤ.
၂ ပိာ်ခွါလၢ အကဲဒိၣ်တဂၤန့ၣ် အသိဒီး အကျီၢ်အိၣ်ဝဲ အါမးလီၤ.+
၃ ဘၣ်ဆၣ် ပိာ်ခွါလၢ အဖှီၣ်တဂၤန့ၣ် အတၢ်တအိၣ်နီတမံၤဘၣ်, အိၣ်ထဲ အသိမိၢ်ဖိတဒုလၢ အပှ့ၤဝဲန့ၣ်လီၤ.+ အဝဲကဟုကယာ်ဝဲ အသိဖိတဒုအံၤ ဒီးအသိဖိအံၤ ဒိၣ်ထီၣ်ဝဲလၢ အီၤဒီးအဖိခွါတဖၣ် အမဲာ်ညါလီၤ. ဒီးတၢ်အီၣ်လၢ အအိၣ်ဒီးအီၤတစဲးဖိန့ၣ် အဝဲဒုးအီၣ်စ့ၢ်ကီး အသိ ဒီးဒုးအီဝဲ တၢ်အိၣ်လၢ အထံခွး ဒီးဒုးမံနီၤဝဲလၢ အစုဒုၣ်လိၤလီၤ. သိဖိအံၤ လီၤဂာ်ဒ် ဖိမုၣ်တဂၤလၢ အဂီၢ်လီၤ.
၄ လၢခံ ပှၤတမှံၤတဂၤ လဲၤဟးဝဲလၢ ပိာ်ခွါလၢ အကဲဒိၣ်တဂၤန့ၣ် အအိၣ်လီၤ. ဘၣ်ဆၣ် ဒ်သိးအကကတဲာ်ကတီၤန့ၢ်တၢ်အီၣ်လၢ ပှၤတမှံၤအံၤအဂီၢ် အဝဲတဟံးန့ၢ် အနီၢ်ကစၢ် အသိ ဒီးအကျီၢ်ဘၣ်. လၢတၢ်န့ၣ်အလီၢ် အဝဲလဲၤဟံးန့ၢ်ဝဲ ပိာ်ခွါလၢအဖှီၣ်တဂၤန့ၣ် အသိဖိ ဒီးဖီဒုးအီၣ်ဝဲလၢ ပှၤတမှံၤတဂၤန့ၣ်အဂီၢ်လီၤ.”+
၅ ဒီးစီၤဒၤဝံး အသးဒိၣ်ထီၣ်ဝဲ ပိာ်ခွါလၢ အကဲဒိၣ်တဂၤန့ၣ်ဒိၣ်မး ဒီးအဝဲတဲ စီၤနၤသၣ်လၢ “ယအၢၣ်လီၤတၢ်လၢ ယဟိဝၤယွၤလၢ အမူဝဲတဂၤ+ အမဲာ်ညါလၢ ပိာ်ခွါလၢ အမၤတၢ်ဒ်န့ၣ်တဂၤန့ၣ် အကြၢးသံလီၤ.
၆ ဒီးမ့ၢ်လၢ အဝဲတပာ်ဖျါထီၣ် တၢ်သးကညီၤဘၣ် ဒီးမၤဝဲဒ်န့ၣ်အဃိ အကြၢးဟ့ၣ်က့ၤ သိဖိအပှ့ၤ လွံၢ်စးလီၤ.”+
၇ ဒီးစီၤနၤသၣ် တဲဘၣ်စီၤဒၤဝံးလၢ “ပိာ်ခွါတဂၤန့ၣ် အကဲနၤလီၤ. အံၣ်စရ့လး အကစၢ် ယဟိဝၤယွၤ တဲဝဲဒ်အံၤ, ‘ယနီၢ်ကစၢ်ဒၣ်ယဲ ယဒိးဖှူနၤဒ် စီၤပၤတဂၤအသိး လၢအံၣ်စရ့လးအဖီခိၣ်+ ဒီးယမၤပူၤဖျဲးနၤလၢ စီၤစီလူး အစုပူၤလီၤ.+
၈ ယသးအိၣ် ဟ့ၣ်လီၤနၤလၢ နကစၢ် အတၢ်စုလီၢ်ခီၣ်ခိၣ်တဖၣ်+ ဒီးအးလီၤ နကစၢ်အမါတဖၣ်လၢ+ နစုပူၤ ဒီးယဒုးကဲထီၣ်နၤလၢ စီၤပၤတဂၤလၢ အံၣ်စရ့လး ဒီးယူဒၤအဒူၣ် အဖီခိၣ်လီၤ.+ တၢ်သ့ၣ်တဖၣ်အံၤ မ့ၢ်တအါဘၣ်နၤဒံးဘၣ်န့ၣ် ယသးအိၣ်ဟ့ၣ်နၤအါန့ၢ်အန့ၣ်ဒံး.+
၉ ဘၣ်မနုၤအဃိ နတပာ်ကဲ ယဟိဝၤယွၤ အတၢ်ကတိၤဘၣ် ဒီးမၤတၢ်အၢ လၢအမဲာ်ညါလဲၣ်. နမၤသံ ပှၤဃ့ၤသးဖိ စီၤအူၤရံယၤ လၢနးလီၤ.+ ဒီးနမၤသံအီၤလၢ ပှၤဧၣ်မိၣ်ဖိ အနးဝံၤ+ နဟံးန့ၢ်အမါလီၤ.+
၁၀ ဒီးမ့ၢ်လၢ နတပာ်ကဲယၤဘၣ် ခီဖျိ နဟံးန့ၢ် ပှၤဃ့ၤသးဖိ စီၤအူၤရံယၤ အမါအဃိ စးထီၣ်ခဲအံၤ နးတဘ့ၣ် တဟးဖးလၢ နဟံၣ်ဖိဃီဖိအကျါ နီတဘျီလၢၤဘၣ်.’+
၁၁ ယဟိဝၤယွၤ တဲဝဲဒ်အံၤ, ‘ယကဒုးအိၣ်ထီၣ် တၢ်နးတၢ်ဖှီၣ်လၢ နဟံၣ်ဖိဃီဖိအပူၤ+ ဒီးယကဟံးန့ၢ် နမါတဖၣ် ဒီးဟ့ၣ်လီၤကွံာ် အဝဲသ့ၣ်လၢ ပှၤအဂၤတဂၤအအိၣ်+ ပျီပျီလၢနမဲာ်ညါ ဒီးအဝဲကမံဃုာ်ဒီး နမါတဖၣ်လၢ ပှၤခဲလၢာ် အမဲာ်ညါလီၤ.+
၁၂ နမၤတၢ်လၢ တၢ်ခူသူၣ်အပူၤ+ ဘၣ်ဆၣ် ယကမၤအီၤလၢ အံၣ်စရ့လးခဲလၢာ် အမဲာ်ညါပျီပျီလီၤ.’”
၁၃ ဒီးစီၤဒၤဝံး တဲစီၤနၤသၣ်လၢ “ယမၤကမၣ်ဘၣ် ယဟိဝၤယွၤလံ.”+ စီၤနၤသၣ် တဲဆၢက့ၤ စီၤဒၤဝံးလၢ “ယဟိဝၤယွၤ ပျၢ်ကွံာ်နတၢ်ဒဲးဘးလံ.+ နတသံဘၣ်လၢၤဘၣ်.+
၁၄ ဘၣ်ဆၣ် ဘၣ်ဃးဒီး တၢ်ဂ့ၢ်တခါအံၤန့ၣ် နတပာ်ဖျါထီၣ် တၢ်ပာ်ကဲလၢ ယဟိဝၤယွၤအဖီခိၣ် နီတစဲးဘၣ်အဃိ နဖိခွါလၢ အအိၣ်ဖျဲၣ်လီၤခဲအံၤန့ၣ် ကသံဝဲ သပှၢ်ကတၢၢ်လီၤ.”
၁၅ ဝံၤဒီးစီၤနၤသၣ် က့ၤလၢအဟံၣ်လီၤ.
ဒီးဖိသၣ်လၢ စီၤအူၤရံယၤအမါ အိၣ်ဖျဲၣ်ထီၣ်န့ၢ် စီၤဒၤဝံးန့ၣ် ယဟိဝၤယွၤ တီၢ်အီၤဒီး တၢ်ဆူးတၢ်ဆါ အဃိ ဖိသၣ်န့ၣ် ဆိးက့ဝဲလီၤ.
၁၆ စီၤဒၤဝံး ဃ့ကညးယွၤလၢ အမ့ၢ်အတီတဂၤ လၢဖိသၣ်အဂီၢ်လီၤ. ဒီးစီၤဒၤဝံး ဒုၣ်တၢ်အီၣ် သပှၢ်တၢၢ် ဒီးကိးဟါဒဲးန့ၣ် အဝဲလဲၤနုာ်လီၤလၢ အဒၢးပူၤ ဒီးမံနီၤဝဲလၢ တၢ်ဖီလာ် ဒီတနၤကျၢၤလီၤ.+
၁၇ ဒီးအခ့အပှၤလၢ အသးပှၢ်တဖၣ် လၢအအိၣ်လၢအဟံၣ်န့ၣ် ဟဲလၢအအိၣ်ဒီး မၢအီၤခဲအံၤ ခဲအံၤလၢ အကဆၢထၢၣ် ဘၣ်ဆၣ် အဝဲတဂဲၤဆၢထၢၣ်ဘၣ် ဒီးတအီၣ်တၢ်ဒီး အဝဲသ့ၣ်ဘၣ်.
၁၈ ဒီးလၢနွံသီတသီန့ၣ် ဖိသၣ်သံဝဲ ဘၣ်ဆၣ် စီၤဒၤဝံး အခ့အပှၤတဖၣ် တဲစီၤဒၤဝံး တဘူၣ်ဘၣ်. အဝဲသ့ၣ်တဲဝဲလၢ “ဖဲဖိသၣ် မူဒံးအခါ အဝဲတဒိကနၣ် ပကလုၢ်ဘၣ်. အဃိ ပတဲအီၤလၢ ဖိသၣ်သံလံန့ၣ် ကသ့ဒ်လဲၣ်. ပမ့ၢ်တဲအီၤန့ၣ် အဝဲကဟးမၤကြီ ဘၣ်ဖုးတၢ်လီၤ.”
၁၉ ဖဲစီၤဒၤဝံး ထံၣ်ဝဲလၢ အခ့အပှၤတဖၣ် တဲကသွံလိာ်အသး တဂၤဒီးတဂၤအခါ အဝဲတယာ်ဝဲလၢ ဖိသၣ်သံလံလီၤ. ဒီးစီၤဒၤဝံး သံကွၢ် အခ့အပှၤတဖၣ်လၢ “ဖိသၣ်သံလံဧါ.” အဝဲသ့ၣ် တဲဆၢက့ၤဝဲလၢ “မ့ၢ်, အသံလံ.”
၂၀ အဃိ စီၤဒၤဝံး ဂဲၤဆၢထၢၣ်, လုၢ်ထံ ဒီးဖှူအလိၤလၢသိ+ ဒီးဆီတလဲကွံာ် အကူအကၤ ဒီးလဲၤလၢ ယဟိဝၤယွၤအဟံၣ်+ ဒီးဘူၣ်ထီၣ်ဘါထီၣ်တၢ်လီၤ. ဝံၤဒီး အဝဲက့ၤလၢအဟံၣ် ဒီးမၢ ပှၤဟဲစိာ်န့ၢ်အီၤ တၢ်အီၣ် ဒီးအဝဲအီၣ်ဝဲလီၤ.
၂၁ ဒီးအခ့အပှၤတဖၣ် သံကွၢ်အီၤလၢ “ဖဲဖိသၣ်မူဒံးအခါ နဒုၣ်တၢ်အီၣ် ဒီးနဟီၣ်ထီဘိ, ဘၣ်ဆၣ် ဖိသၣ်သံဝံၤဒီး တဘျီဃီန့ၣ် နဂဲၤဆၢထၢၣ် ဒီးနအီၣ်တၢ်လီၤ. ဘၣ်မနုၤအဃိ နမၤဒ်န့ၣ်လဲၣ်.”
၂၂ စီၤဒၤဝံး တဲဆၢဝဲလၢ “ဖဲဖိသၣ်အိၣ်မူဒံးအခါ ယတဲလီၤယသးလၢ ‘မ့ၢ်ယဟိဝၤယွၤ ကသးကညီၤက့ၤယၤ ဒီးပျဲမူဖိသၣ်ဧါန့ၣ် ပတဲတဘၣ်ဘၣ်.’+ အဃိန့ၣ် ယဒုၣ်တၢ်အီၣ်+ ဒီးယဟီၣ်ထီဘိလီၤ.
၂၃ ခဲအံၤ အဝဲသံလံ အဃိ ဘၣ်မနုၤအဃိ ယကဘၣ်ဒုၣ်တၢ်အီၣ်လဲၣ်. ယဒုးဟဲက့ၤကဒါက့ၤအီၤ ကသ့ဧါ.+ ယကလဲၤလၢအအိၣ်+ ဘၣ်ဆၣ် အဝဲတဟဲက့ၤကဒါလၢ ယအိၣ်လၢၤဘၣ်.”+
၂၄ ဒီးစီၤဒၤဝံး မၤမုာ်ထီၣ် အမါ နီၢ်ဘၤသၡ့ဘၤ+ အသးလီၤ. ဒီးစီၤဒၤဝံး လဲၤလၢအအိၣ်ဒီး မံဃုာ်ဒီးအီၤလီၤ. လၢခံ နီၢ်ဘၤသၡ့ဘၤ အိၣ်ဖျဲၣ်ထီၣ် အဖိခွါတဂၤ ဒီးဘၣ်တၢ်ယုၢ်န့ၢ် အမံၤလၢ စီၤၡလိၤမိၤလီၤ.*+ ဒီးယဟိဝၤယွၤ အဲၣ်အီၤလီၤ.+
၂၅ ဒီးကစၢ်ယွၤ ဆှၢလီၤဝဲ တၢ်ကစီၣ် ခီဖျိ ဝံနၤသၣ်လၢ+ ကယုၢ်န့ၢ်အမံၤလၢ စီၤယဒံဒယၤ* ခီဖျိလၢ ယဟိဝၤယွၤ အဲၣ်အီၤအဃိလီၤ.*
၂၆ ဒီးစီၤယိၤအာ် ဆဲးဒုးဝဲ ပှၤဧၣ်မိၣ်ဖိ+ အဝ့ၢ်ရးဘး+ ဒီးအဝဲမၤန့ၢ်ဝဲ စီၤပၤအဝ့ၢ်လီၤ.+
၂၇ အဃိ စီၤယိၤအာ် ဆှၢလီၤ ပှၤစိာ်တၢ်ကစီၣ်ဖိတဖၣ်လၢ စီၤဒၤဝံး အအိၣ် ဒ်သိးကတဲအီၤလၢ “ယဒုးဝ့ၢ်ရးဘးဝံၤလံ+ ဒီးယမၤန့ၢ် ဝ့ၢ်လၢအဘၣ်ဃးဒီး ထံတဖၣ်လံ.*
၂၈ ကိးဖှိၣ် သုးဖိလၢအအိၣ်တ့ၢ်တဖၣ် ဒီးလဲၤဆီလီၤသး ဒ်သိးနကဒုးဝ့ၢ်ဒီး မၤန့ၢ်အီၤအဂီၢ်တက့ၢ်. နမ့ၢ်တမၤဒ်န့ၣ်ဘၣ်န့ၣ် ယကကဲထီၣ်ဘၣ်ဖုး ပှၤလၢအမၤန့ၢ်ဝ့ၢ် ဒီးပှၤလၢအကဒိးန့ၢ်ဘၣ် တၢ်လၤကပီၤန့ၣ် ကမ့ၢ်ယၤလီၤ.”
၂၉ အဃိ စီၤဒၤဝံး ကိးဖှိၣ်ဝဲ သုးဖိခဲလၢာ် ဒီးလဲၤဒုးဝဲ ဝ့ၢ်ရးဘး ဒီးမၤန့ၢ်ဝဲဝ့ၢ်အံၤလီၤ.
၃၀ ဒီးအဝဲဟံးန့ၢ်ဝဲ မၤလက့ၣ်* အခိၣ်သလုးလၢ အခိၣ်လိၤလီၤ. ခိၣ်သလုးအံၤ ဘၣ်တၢ်တ့အီၤလၢ ထူတတၤလၣ်* ဒီးအအိၣ်ဒီး လၢၢ်လၢ အလုၢ်ဒိၣ်ပှ့ၤဒိၣ်တဖၣ်လီၤ. ဒီးအဘၣ်တၢ်ဖျီၣ်ထီၣ်အီၤလၢ စီၤဒၤဝံးအခိၣ်လိၤလီၤ. စီၤဒၤဝံး ဟံးန့ၢ်ဝဲ တၢ်ဖိတၢ်လံၤ အါအါဂီၢ်ဂီၢ်လၢ+ ဝ့ၢ်အံၤအပူၤလီၤ.+
၃၁ ဒီးအဝဲဖီၣ်န့ၢ် ပှၤလၢအအိၣ်လၢ ဝ့ၢ်ပူၤ ဒီးမၢအဝဲသ့ၣ် ဘူးတဲာ်လၢၢ် ဒီးမၤတၢ်လၢ တၢ်ပီးတၢ်လီထးလၢ အကနၣ်အ့ၣ်တဖၣ် ဒီးကွါထးတဖၣ် ဒီးမၢအဝဲသ့ၣ် တ့အူးခဲလီၤ. ပှၤလၢအအိၣ်လၢ ပှၤဧၣ်မိၣ်ဖိ အဝ့ၢ်ကိးဖျၢၣ်ဒဲးန့ၣ် အဝဲမၤအဝဲသ့ၣ်ဒ်အံၤလီၤ. လၢခံ စီၤဒၤဝံးဒီး အသုးဖိခဲလၢာ် ဟဲက့ၤကဒါက့ၤလၢ ဝ့ၢ်ယရူၤၡလ့ၣ်လီၤ.
တၢ်ဂ့ၢ်အဘျဲၣ်တဖၣ်
^ လၢဧ့ၤဘြံၤအကျိာ်န့ၣ် တၢ်ကတိၤတဖျၢၣ်အံၤ အခီပညီမ့ၢ်ဝဲ “တၢ်မုာ်တၢ်ခုၣ်.”
^ အခီပညီမ့ၢ်ဝဲ “ပှၤလၢ ယဟိဝၤအဲၣ်အီၤ.”
^ အခီပညီလိၤလိၤ “လၢ ယဟိဝၤယွၤအဃိ.”
^ ဘၣ်သ့ၣ်သ့ၣ် အဲၣ်ဒိးတဲဝဲ ထံအိၣ်အလီၢ်လၢ ဝ့ၢ်တဖျၢၣ်န့ၣ်အပူၤ.
^ ပှၤဧၣ်မိၣ်ဖိ အယွၤ လၢအမ့ၢ်တၢ်ဂီၤတၢ်ဖှီၣ်တခါ.
^ ၁ တၤလၣ်န့ၣ် အဃၢအိၣ်ဝဲ ၃၄.၂ ကံလိ. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
