တၢ်မၤလိ ၉
ပိာ်မုၣ်တဂၤလၢ အဆၢတဲာ်တၢ်လၢတၢ်ကူၣ်သ့အပူၤ
၁–၃. (က) တၢ်လီၤဘၣ်ယိၣ်ဖးဒိၣ်မနုၤတခါ ဟဲဘၣ်ဝဲ နီၢ်အဘံၤကါယံးလး အဟံၣ်ဖိဃီဖိလဲၣ်. (ခ) ဘၣ်ဃးဒီးပိာ်မုၣ်လၢ အလီၤတိၢ်လီၤဆီတဂၤအံၤန့ၣ် ပကမၤလိတၢ်ဂ့ၢ်မနုၤလဲၣ်.
နီၢ်အဘံၤကါယံးလး ထံၣ်ဘၣ်ဝဲ ပှၤပိာ်ခွါသးစၢ်တဖၣ်လၢအ ပှဲၤဝဲဒီးတၢ်ပျံၤတၢ်ဖုးန့ၣ်လီၤ. အဝဲသ့ၣ် ပျံၤတၢ်ဖုးတၢ်ဒ်အံၤန့ၣ် ကြၢးဝဲဘၣ်ဝဲသပှၢ်ကတၢၢ်လီၤ. တၢ်လီၤဘၣ်ယိၣ်ဖးဒိၣ်တခါ ဟဲဘၣ်အဝဲသ့ၣ် ဒီးမၤအသးဒ်မ့ၣ်အူကဖးအိၣ်လၢ အဝဲသ့ၣ်အခိၣ်လိၤလီၤ. မ့ၢ်လၢ ပှၤသုးဖိ ၄၀၀ ဃၣ်ဃၣ် ဆၢတဲာ်လီၤအသးဂၢၢ်ဂၢၢ်ကျၢၤကျၢၤလၢ အဝဲသ့ၣ်ကမၤသံကွံာ် ပှၤပိာ်ခွါခဲလၢာ်လၢ စီၤနၤဘလး အဟံၣ်ဖိဃီဖိအပူၤ ဒီးအဝဲသ့ၣ်လဲၤဝဲလံ. ဘၣ်မနုၤအဃိ အဝဲသ့ၣ်အဲၣ်ဒိးမၤသံတၢ်လဲၣ်.
၂ တၢ်ဂ့ၢ်ဟဲကဲထီၣ်အသး ခီဖျိလၢ စီၤနၤဘလးန့ၣ်လီၤ. အဝဲပာ်ဖျါထီၣ် အတၢ်သကဲာ်ပဝးလၢ အအၢအသီ, မၤတၢ်တကျးဒး ဒ်အမၤညီနုၢ်ဝဲအသိးန့ၣ်လီၤ. ဘၣ်ဆၣ်တဘျီအံၤ အဝဲကတိၤတရီတပါဘၣ် ပှၤပိာ်ခွါတဂၤအံၤန့ၣ် ကမၣ်လၢအဂီၢ်လံ. ပှၤပိာ်ခွါတဂၤအံၤန့ၣ် မ့ၢ်သုးခိၣ်လၢ အိၣ်ဒီးသုးဖိလၢအတီဒီးအီၤ ဒီးအဝဲသ့ၣ်ဒုးတၢ်ဖၠဲးမးလီၤ. ဖဲန့ၣ်အဆၢကတီၢ် စီၤနၤဘလး အပှၤမၤတၢ်ဖိလၢအသးစၢ်တဂၤန့ၣ် လဲၤဝဲဆူနီၢ်အဘံၤကါယံးလး အအိၣ်မ့ၢ်လၢအဝဲနာ်ဝဲလၢ နီၢ်အဘံၤကါယံးလး ကထုးထီၣ်တၢ်ကူၣ် ဒ်သိးကမၤပူၤဖျဲးဝဲ စီၤနၤဘလးအဟံၣ်ဖိဃီဖိန့ၣ်လီၤ. ဘၣ်ဆၣ် အဝဲမ့ၢ်ပိာ်မုၣ်တဂၤအဃိ အဝဲတြီဆၢဝဲပှၤသုးဖိတဒူၣ်အံၤကသ့ဒ်လဲၣ်.
နီၢ်အဘံၤကါယံးလး မ့ၢ်ပိာ်မုၣ်တဂၤအဃိ အဝဲတြီဆၢဝဲပှၤသုးဖိ တဒူၣ်အံၤကသ့ဒ်လဲၣ်
၃ အဆိကတၢၢ်န့ၣ် ပကမၤလိအါထီၣ် ပိာ်မုၣ်လၢအလီၤတိၢ်လီၤဆီတဂၤအံၤအဂ့ၢ်န့ၣ်လီၤ. နီၢ်အဘံၤကါယံးလး မ့ၢ်မတၤတဂၤလဲၣ်. ဒီးတၢ်ကီတၢ်ခဲတခါအံၤ ဟဲကဲထီၣ်အသးဒ်လဲၣ်. ဘၣ်ဃးဒီးနီၢ်အဘံၤကါယံးလး အတၢ်နာ်န့ၣ်ပမၤလိန့ၢ်တၢ်မနုၤလဲၣ်.
ပိာ်မုၣ်လၢအ “ဒိၣ်တၢ်ဃံလၤ ဒီးအသူၣ်ဆးအသးဆး”
၄. စီၤနၤဘလး မ့ၢ်ပှၤဒ်လဲၣ်တဂၤလဲၣ်.
၄ ပှၤဒီမါဝၤခံဂၤလၢအမ့ၢ် နီၢ်အဘံၤကါယံးလး ဒီးစီၤနၤဘလးန့ၣ် တကြၢးလိာ်အသးနီတစဲးဘၣ်. နီၢ်အဘံၤကါယံးလး မ့ၢ်မါလၢအဂ့ၤတဂၤ ဘၣ်ဆၣ် အဝဲန့ၢ်ဘၣ်အဝၤလၢ အအၢအသီကတၢၢ်တဂၤ လၢအမ့ၢ်စီၤနၤဘလးန့ၣ်လီၤ. မ့မ့ၢ်စီၤနၤဘလးန့ၣ် ဃုထံၣ်န့ၢ်အမါလၢ အဂ့ၤန့ၢ်နီၢ်အဘံၤကါယံးလးန့ၣ်တဘၣ်ဝဲဘၣ်. စီၤနၤဘလး မ့ၢ်ပှၤလၢအထူးအတီၤတဂၤအဃိ အသွံၣ်ဒိၣ်ဝဲဒိၣ်မး ဒီးထံၣ်လီၤအသးလၢ အမ့ၢ်ပှၤလၢအရ့ဒိၣ်တဂၤလီၤ. ဘၣ်ဆၣ်သနာ်က့ မ့မ့ၢ်ပှၤအဂၤတဖၣ်န့ၣ် ထံၣ်အီၤဒ်လဲၣ်. လၢလံာ်စီဆှံအပူၤန့ၣ် ပှၤလၢအဘၣ်တၢ်စံးအၢစံးသီအီၤ နးထဲသိးဒီး စီၤနၤဘလးန့ၣ် ပတထံၣ်ဘၣ်အီၤကြီကြီဘၣ်. အဒိ စီၤနၤဘလး အမံၤအခီပညီမ့ၢ်ဝဲ “ပှၤဟးဂီၤဖိ” မ့တမ့ၢ် “ပှၤနါစိၤ” န့ၣ်လီၤ. မံၤတဖျၢၣ်အံၤ မ့ၢ်အမိၢ်အပၢ်ယုၢ်န့ၢ်အီၤလၢ အအိၣ်ဖျဲၣ်ထီၣ်အခါဧါ မ့တမ့ၢ်ဘၣ်န့ၣ် မ့ၢ်လၢအဝဲအိၣ်မူဝဲနါစံၢ်နါစိၤအဃိ လၢခံန့ၣ်ပှၤဂၤကိးလိၣ်ကွဲန့ၢ်အမံၤဒ်န့ၣ်ဧါ ပတသ့ၣ်ညါလီၤတံၢ်ဘၣ်. ဒ်လဲၣ်ဂ့ၤဒ်လဲၣ်ဂ့ၤ စီၤနၤဘလး အိၣ်မူဝဲဒ်အမံၤအခီပညီအိၣ်ဝဲအသိးန့ၣ်လီၤ. စီၤနၤဘလးမ့ၢ် “ပှၤအသူၣ်အၢပှၤအသးသီ ဒီးပှၤကတိၤတၢ်ဆူၣ်ဆူၣ်ကိၤကိၤတဂၤလီၤ.” အဝဲမ့ၢ်ပှၤလၢအမၤနၢၤမၤဃၣ်ပှၤဂၤ ဒီးမ့ၢ်ပှၤလၢအအီမူၤသံးတဂၤလီၤ. လၢတၢ်န့ၣ်အဃိ ပှၤအါဂၤပျံၤအီၤဒီးသးဟ့အီၤလီၤ.—၁ မူၤ. ၂၅:၂, ၃, ၁၇, ၂၁, ၂၅, ခ့ခါစှီၤကျိာ်.
၅, ၆. (က) နီၢ်အဘံၤကါယံးလး အတၢ်ဂ့ၤတၢ်ဝါလၢ အလီၤဘၣ်သူၣ်ဘၣ်သးအဒိၣ်ကတၢၢ်လၢနဂီၢ်န့ၣ် မ့ၢ်မနုၤတဖၣ်လဲၣ်. (ခ) ဘၣ်မနုၤအဃိ နီၢ်အဘံၤကါယံးလး ဖျီအသးဒီးပိာ်ခွါလၢအအၢအသီတဂၤအံၤလဲၣ်.
၅ ပမ့ၢ်ထိၣ်သတြီၤကွၢ် စီၤနၤဘလးဒီးနီၢ်အဘံၤကါယံးလးန့ၣ် အဝဲသ့ၣ်ခံဂၤအတၢ်ပာ်သူၣ်ပာ်သး လီၤဆီလိာ်အသးဒ်ထံဒီးသိအသိးလီၤ. နီၢ်အဘံၤကါယံးလး အမံၤအခီပညီမ့ၢ်ဝဲ “ယပၢ်ဒုးအိၣ်ထီၣ်အတၢ်သးခု” န့ၣ်လီၤ. ပၢ်အါဂၤလၢအဒိးန့ၢ်ဘၣ် အဖိမုၣ်လၢအဒိၣ်တၢ်ဂ့ၤ ဒီးအဃံအလၤတဂၤန့ၣ် ကပာ်ကဖၢလၢအသးလၢအဖီခိၣ်ဒိၣ်မးလီၤ. ဘၣ်ဆၣ် ပၢ်လၢအအိၣ်ဒီးတၢ်ကူၣ်သ့တဂၤန့ၣ် မ့ၢ်ထံၣ်ဘၣ်လၢ အဖိအိၣ်ဒီးတၢ်ပာ်သူၣ်ပာ်သးလၢ အဖျါဃံဖျါလၤ ဒီး မ့ၢ်ထံၣ်ဘၣ်လၢ အဖိအိၣ်ဒီးတၢ်ဂ့ၤတၢ်ဝါလၢ နီၢ်သးတကပၤန့ၣ် ပၢ်တဂၤအံၤ ကပှဲၤဝဲဒီးတၢ်သးခုအါန့ၢ်အလီၢ်ဒံးလီၤ. အါဒၣ်တၢ်တက့ၢ် ပှၤလၢအဒိၣ်တၢ်ဂ့ၤတဖၣ်န့ၣ် တသးအိၣ်မၤဒိၣ်ထီၣ်ဝဲ တၢ်ဂ့ၤတၢ်ဝါဒ်သိးဒီး တၢ်သူၣ်ဆးသးဆး, တၢ်ကူၣ်သ့, တၢ်နာ်ဒီးတၢ်သူၣ်ဒူသးဒူတဖၣ်န့ၣ်ဘၣ်. မ့မ့ၢ်နီၢ်အဘံၤကါယံးလးန့ၣ် အဝဲတမ့ၢ်ပှၤဒ်န့ၣ်ဘၣ်. လံာ်စီဆှံစံးပတြၢၤ နီၢ်အဘံၤကါယံးလး ခီဖျိလၢ အဝဲမ့ၢ်ပှၤလၢအဃံအလၤ ဒီးအဝဲအိၣ်ဒီးတၢ်သူၣ်ဆးသးဆးအဃိလီၤ.—ဖး ၁ ၡမူၤအ့လး ၂၅:၃ တက့ၢ်.
၆ ပှၤတနီၤလၢမုၢ်မဆါတနံၤအံၤ ကအဲၣ်ဒိးသ့ၣ်ညါဝဲလၢ ဘၣ်မနုၤအဃိ နီၢ်အဘံၤကါယံးလး ဖျီအသးဒီး ပှၤဟးဂီၤဖိလၢ အမၢးသံတဂၤအံၤလဲၣ်. ဘၣ်ဃးဒီးတၢ်ဂ့ၢ်အံၤန့ၣ် ပကဘၣ်သ့ၣ်နီၣ်ထီၣ်က့ၤလၢ လံာ်စီဆှံအစိၤ ပှၤလၢအအဲၣ်ဒိးဆီဟံၣ်ဆီဃီန့ၣ် အမိၢ်အပၢ်ကဃုထၢန့ၢ် အီၤအသးသမူတံၤသကိးလီၤ. မိၢ်ပၢ်မ့ၢ်တဃုထၢန့ၢ် သးသမူတံၤသကိးလၢ အဖိအဂီၢ်သနာ်က့ အရ့ဒိၣ်ဒိၣ်မးလၢ မိၢ်ပၢ်ကတူၢ်လိာ်ပှၤတဂၤလၢ အဝဲသ့ၣ်အဲၣ်ဒိးဃုထၢဝဲလီၤ. မ့ၢ်လၢနီၢ်အဘံၤကါယံးလး အမိၢ်အပၢ်န့ၣ်သူၣ်လီသးကွံဝဲ စီၤနၤဘလး အတၢ်ထူးတၢ်တီၤအဃိ ဖျီဝဲအဖိမုၣ်ဒီးအီၤဧါ. မ့တမ့ၢ်ဘၣ်န့ၣ် မ့ၢ်လၢအဝဲသ့ၣ် တအဲၣ်ဒိးအိၣ်မူဖှီၣ်ဖှီၣ်ယာ်ယာ်အဃိ ဖျီဝဲအဖိမုၣ်ဒီးစီၤနၤဘလးဧါ. ဒ်လဲၣ်ဂ့ၤဒ်လဲၣ်ဂ့ၤ စီၤနၤဘလး မ့ၢ်အိၣ်ဒီးကျိၣ်ဧိၤစ့ဧိၤဘၣ်ဆၣ် အဝဲတမ့ၢ်ဝၤလၢအဂ့ၤတဂၤလၢ နီၢ်အဘံၤကါယံးလးအဂီၢ်ဘၣ်.
၇. (က) ဘၣ်ဃးဒီးတၢ်ဆီဟံၣ်ဆီဃီန့ၣ် မိၢ်ပၢ်လၢအိၣ်ဒီးတၢ်ကူၣ်သ့တဖၣ် ကြၢးဟးဆှဲးဝဲတၢ်ဂ့ၢ်မနုၤလဲၣ်. (ခ) နီၢ်အဘံၤကါယံးလး ပာ်လီၤအသးဂၢၢ်ဂၢၢ်ကျၢၤကျၢၤလၢ ကမၤဝဲတၢ်မနုၤလဲၣ်.
၇ မိၢ်ပၢ်လၢအအိၣ်ဒီး တၢ်ကူၣ်သ့တဖၣ် ကသိၣ်လိဝဲအဖိ ဘၣ်ဃးဒီးတၢ်ဆီဟံၣ်ဆီဃီအဂ့ၢ် လီၤတံၢ်လီၤဆဲးန့ၣ်လီၤ. အဝဲသ့ၣ်တဆီၣ်ထွဲ အဖိလၢအကဖျီအသး လၢကဒိးန့ၢ်ဘၣ်ဝဲကျိၣ်စ့အဂီၢ်ဘၣ်. ဒီးအဝဲသ့ၣ်တမၢဆူၣ်စ့ၢ်ကီးအဖိလၢ ကပာ်တၢ်အဲၣ်တီဖဲအသးစၢ်အခါဘၣ်. မ့ၢ်လၢအဖိတဖၣ် တဒိၣ်တုာ်ခိၣ်ပှဲၤ လၢကဟံးထီၣ်ဖီၣ်ထီၣ်မူဒါ ဒ်မါမ့တမ့ၢ်ဝၤအသိးဘၣ်. (၁ ကရံၣ်. ၇:၃၆) မ့မ့ၢ် လၢနီၢ်အဘံၤကါယံးလး ကဆိကမိၣ်ဝဲ တၢ်ဂ့ၢ်တဖၣ်အံၤအဂီၢ်န့ၣ် စဲၤခံဝဲလံ. ဒ်လဲၣ်ဂ့ၤဒ်လဲၣ်ဂ့ၤ နီၢ်အဘံၤကါယံးလး ဖျီအသးဒီးစီၤနၤဘလးဝံၤဝဲလံ. နီၢ်အဘံၤကါယံးလး မ့ၢ်ဘၣ်ကွၢ်ဆၢၣ်မဲာ်ဒီး တၢ်ကီတၢ်ခဲဘၣ်ဆၣ် အဝဲပာ်လီၤအသးဂၢၢ်ဂၢၢ်ကျၢၤကျၢၤလၢ ကမၤလၢပှဲၤဝဲ မါအမူဒါလၢအဂ့ၤကတၢၢ်န့ၣ်လီၤ.
အဝဲကိးဃါတၢ်ဒီး “ဒုၣ်ဒွဲၣ်” အဝဲသ့ၣ်
၈. စီၤနၤဘလး ကတိၤတရီတပါဘၣ် မတၤတဂၤလဲၣ်, ဒီးဘၣ်မနုၤအဃိ ပစံးသ့လၢအဝဲတအိၣ်ဒီးတၢ်ကူၣ်သ့လဲၣ်.
၈ တဘျီအံၤစီၤနၤဘလး ဒုးအိၣ်ထီၣ်ဝဲ နီၢ်အဘံၤကါယံးလး အတၢ်ကိၢ်တၢ်ဂီၤဖးဒိၣ်တခါလီၤ. စီၤနၤဘလး ကတိၤတရီတပါဘၣ်ဝဲ စီၤဒၤဝံးန့ၣ်လီၤ. စီၤဒၤဝံးမ့ၢ်ယဟိဝၤယွၤ အခ့အပှၤတဂၤလၢအအိၣ်ဒီးတၢ်သးတီ ဒီးမ့ၢ်တ့ၢ်ပှၤတဂၤလၢ ဝံၡမူၤအ့လးဖှူတ့ၢ်အီၤ ဒ်သိးအကကဲထီၣ်စီၤပၤတဂၤလၢ စီၤစီလူးအလီၢ်န့ၣ်လီၤ. (၁ မူၤ. ၁၆:၁, ၂, ၁၁-၁၃) မ့ၢ်လၢစီၤစီလူးသးက့ၣ်အီၤ ဒီးအဲၣ်ဒိးမၤသံအီၤအဃိ, စီၤဒၤဝံးဒီးအပှၤသုးဖိ လၢအတီဒီးအီၤအဂၤ ၆၀၀ န့ၣ်လဲၤအိၣ်ခူသူၣ်ဒီးအီၤလၢ ပှၢ်မုၢ်ကနၢအပူၤလီၤ.
၉, ၁၀. (က) စီၤဒၤဝံးဒီးအပှၤသုးဖိတဖၣ် ကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲထဲလဲၣ်. (ခ) ဘၣ်မနုၤအဃိ စီၤနၤဘလးကြၢးစံးဘျုးဝဲစီၤဒၤဝံး ဒီးအပှၤသုးဖိတဖၣ်လဲၣ်. (ကွၢ်စ့ၢ်ကီး အဆၢ ၁၀ တၢ်ဂ့ၢ်အဘျဲၣ်တက့ၢ်.)
၉ စီၤနၤဘလး အတၢ်အိၣ်တၢ်ဆိးအလီၢ် အိၣ်ဝဲလၢမၤဧိၣ် ဘၣ်ဆၣ် အတၢ်ဖံးတၢ်မၤအလီၢ်န့ၣ် အိၣ်ဘူးဝဲဒီးကၢ်မ့ၤလးအဃိ ဖျါလၢအဟီၣ်ခိၣ်ကပံာ်လီၢ်အိၣ်ဝဲဖဲန့ၣ်လီၤ. * ဝ့ၢ်ခံဖျၢၣ်အံၤ ဘၣ်တၢ်သူၣ်ထီၣ်အီၤလၢတၢ်လီၢ်လၢအထီၣ်ထီ ဒီးတၢ်လီၢ်အဝဲန့ၣ် ပှဲၤဝဲဒီးနီၣ်လါဟ့သံကစဲာ်လၢ သိတဖၣ်ကအီၣ်ဝဲအဆၣ်အဂီၢ်လီၤ. စီၤနၤဘလး အသိအိၣ်ဝဲအဒု ၃,၀၀၀ လီၤ. ဒီးပှၢ်မုၢ်ကနၢ အိၣ်ဝးတရံးဝဲ ဝ့ၢ်ခံဖျၢၣ်အံၤလီၤ. လၢကလံၤထံးတခီန့ၣ် ပှၢ်မုၢ်ကနၢပၤရၣ်အိၣ်ဝဲဖဲန့ၣ်လီၤ. မ့မ့ၢ်လၢမုၢ်ထီၣ်တခီန့ၣ် တၢ်လီၢ်ပျီဖးလဲၢ်အိၣ်ဝဲ ပှဲၤဝဲဒီးတၢ်တြိဒီးလ့တဖၣ်န့ၣ်လီၤ. ဒီးမ့ၢ်စ့ၢ်ကီးကျဲလၢ ပှၤကလဲၤဝဲဆူ ပီၣ်လဲၣ်အံသၣ်န့ၣ်လီၤ. တၢ်လီၢ်တဖၣ်အံၤန့ၣ် စီၤဒၤဝံးဒီးအခ့အပှၤတဖၣ် ဘၣ်ဟးဃုခးအီၣ်ဝဲ ဆၣ်ဖိကီၢ်ဖိတဖၣ်ကီကီခဲခဲ ဒ်သိးကလုၢ်အီၣ်အသးသမူအဂီၢ်လီၤ. တကးဒံးဘၣ် အဝဲသ့ၣ်ဘၣ်လဲၤခီဖျိဝဲ တၢ်ကီတၢ်ခဲလၢအဂၤတဖၣ်စ့ၢ်ကီးလီၤ. ဒီးဖဲအဝဲသ့ၣ် ဟးခးအီၣ်တၢ်အဆၢကတီၢ်န့ၣ် ကထံၣ်ဘၣ်ပိာ်ခွါသးစၢ်တဖၣ်လၢ အကွၢ်ဝဲစီၤနၤဘလးအသိန့ၣ်လီၤ.
၁၀ ခီဖျိလၢပှၤသုးဖိတဒူၣ်အံၤ ကွၢ်ဆၢၣ်မဲာ်ဘၣ်ဝဲ တၢ်ကီတခဲအဃိ အဝဲသ့ၣ်ကမၤဝဲ ပှၤကွၢ်သိတဖၣ်အံၤဒ်လဲၣ်. ပှၤသုးဖိတဒူၣ်အံၤ မ့ၢ်အဲၣ်ဒိးဟံးန့ၢ်ဝဲသိတဖၣ်အံၤန့ၣ် ညီဝဲဒိၣ်မးလီၤ. ဘၣ်ဆၣ် အဝဲသ့ၣ်တမၤဝဲဒ်န့ၣ်ဘၣ်. လၢတၢ်န့ၣ်အလီၢ် ပှၤသုးဖိတဖၣ်အံၤန့ၣ် လီၤဂာ်ဒ်ဝ့ၢ်ခိၣ်ဒူလၢ အဒီသဒၢဝဲစီၤနၤဘလး အသိဒီးအခ့အပှၤတဖၣ်န့ၣ်လီၤ. (ဖး ၁ ၡမူၤအ့လး ၂၅:၁၅, ၁၆ တက့ၢ်.) ပှၤကွၢ်သိဒီးသိဖိတဖၣ်န့ၣ် ကသဂၢၢ်ဘၣ်ဝဲ တၢ်ကီတၢ်ခဲအကလုာ်ကလုာ်လီၤ. အဒိ ဖဲတၢ်လီၢ်အဝဲန့ၣ် ဆၣ်ဖိကီၢ်ဖိလၢ အအၢအိၣ်ဝဲအါမးလီၤ. ဒီးပှၤကွၢ်သိဒီးသိတဖၣ်န့ၣ် အိၣ်တယံၤလိာ်အသးဒီး အံၣ်စရ့လးအကီၢ်ဆၢ လၢကလံၤထံးတခီဘၣ်. လၢတၢ်န့ၣ်အဃိ ညီဝဲလၢတမျာ်လၢ ထံကီၢ်အဂၤတဖၣ် ကဟဲဟုၣ်န့ၢ်အဝဲသ့ၣ်အသိ ဒီးမၤအၢမၤသီအဝဲသ့ၣ်န့ၣ်လီၤ. *
၁၁, ၁၂. (က) စီၤဒၤဝံး ပာ်ဖျါထီၣ်တၢ်ပာ်ကဲ စီၤနၤဘလးဒ်လဲၣ်. (ခ) စီၤနၤဘလး စံးဆၢက့ၤစီၤဒၤဝံးဒ်န့ၣ်န့ၣ် ဘၣ်မနုၤအဃိ တကြၢးဝဲဘၣ်ဝဲလဲၣ်.
၁၁ လၢပှၢ်မုၢ်ကနၢအံၤအပူၤ ဒ်သိးပှၤသုးဖိတဖၣ်အံၤ ကအီၣ်ဘၣ်အီဘၣ်ဝဲအဂီၢ် တညီဝဲဘၣ်. လၢတၢ်န့ၣ်အဃိ မုၢ်အိၣ်ဝဲတနံၤန့ၣ် စီၤဒၤဝံးဆှၢလီၤဝဲအခ့အပှၤအဂၤတဆံ ဆူစီၤနၤဘလးအအိၣ် ဒ်သိးကလဲၤဃ့ဝဲတၢ်မၤစၢၤအဂီၢ်လီၤ. စီၤဒၤဝံး ဃုထၢဝဲတၢ်ဆၢကတီၢ် လၢအကြၢးဝဲဘၣ်ဝဲလီၤ. ဖဲန့ၣ်အဆၢကတီၢ် ဘၣ်လၢပှၤတံာ်သိဆူၣ် ဒီးပှၤမၤဝဲတၢ်သူၣ်ဖှံသးညီအဃိ ပှၤဟ့ၣ်အီၣ်ဟ့ၣ်အီတၢ် ဒီးပှၤဂီၢ်မုၢ်တဖၣ် အိၣ်ဒီးသးလၢအဟ့ၣ်တၢ်ညီန့ၣ်လီၤ. ဒီးစီၤဒၤဝံးဃုထၢဝဲ တၢ်ကတိၤလၢအပှဲၤဝဲဒီး တၢ်သညူးသပှၢ် ဒီးတၢ်ယူးယီၣ်ပာ်ကဲ တုၤဒၣ်လဲာ်စီၤဒၤဝံး ကိးလီၤအနီၢ်ကစၢ်အသးလၢ ယမ့ၢ် “နဖိခွါစီၤဒၤဝံး” န့ၣ်လီၤ. ခီဖျိလၢ စီၤဒၤဝံးအသးစၢ်န့ၢ်စီၤနၤဘလးအဃိ ဘၣ်သ့ၣ်သ့ၣ် အဝဲကိးလီၤအသးဒ်အံၤလၢ အကပာ်ဖျါထီၣ်အတၢ်ပာ်ကဲအီၤန့ၣ်လီၤ. ဘၣ်ဆၣ်သနာ်က့ စီၤနၤဘလး စံးဆၢကဒါက့ၤအီၤဒ်လဲၣ်.—၁ မူၤ. ၂၅:၅-၈.
၁၂ စီၤနၤဘလး အသးပှံၢ်ထီၣ်တၢ်ဖးဒိၣ်ညါ. ပှၤပိာ်ခွါသးစၢ်တဂၤ လဲၤဝဲဆူနီၢ်အဘံၤကါယံးလး အအိၣ်ဒီးစံးဘၣ်အီၤလၢ စီၤနၤဘလးကိးဃါတၢ်ဒီး “ဒုၣ်ဒွဲၣ်” စီၤဒၤဝံးဒီးအပှၤသုးဖိတဖၣ်န့ၣ်လီၤ. ပှၤပံဒံသံလၢအမ့ၢ် စီၤနၤဘလးတဂၤအံၤ ကဒူးကဒ့ၣ်တၢ်လၢ အကလုၢ်ဒိၣ်ဒိၣ် ဘၣ်ဃးဒီး အကိၣ်, အထံဒီးအတၢ်ဖံးတၢ်ညၣ်တဖၣ်န့ၣ် မ့ၢ်တၢ်လၢအလုၢ်အပှ့ၤဒိၣ်ဝဲဒိၣ်မးလီၤ. စီၤနၤဘလး စံးအၢစံးသီဝဲစီၤဒၤဝံး ဒီးစံးဝဲလၢအဝဲတမ့ၢ်တၢ်နီတမံၤဘၣ်, လီၤဂာ်ဒ် ကုၢ်လၢအဃ့ၢ်ပူၤဖျဲးအသး လၢအကစၢ်အစုပူၤအသိးန့ၣ်လီၤ. စီၤနၤဘလးအတၢ်ပာ်သူၣ်ပာ်သးန့ၣ် လီၤဂာ်လိာ်အသးဒီးစီၤစီလူးလၢ အသးဟ့ဝဲစီၤဒၤဝံးန့ၣ်လီၤ. အဝဲသ့ၣ်ခံဂၤန့ၣ် တထံၣ်စီၤဒၤဝံးဒ် ယဟိဝၤယွၤထံၣ်ဝဲအသိးဘၣ်. မ့မ့ၢ်ယဟိဝၤယွၤန့ၣ် အဲၣ်ဝဲစီၤဒၤဝံး ဒီးတထံၣ်အီၤဒ်ကုၢ်လၢအပူထီၣ်တၢ် ဒီးဃ့ၢ်ပူၤဖျဲးအသးတဂၤဘၣ်. ကစၢ်ယွၤထံၣ်ဝဲစီၤဒၤဝံး ဒ်အမ့ၢ်ပှၤလၢအကကဲထီၣ်ဝဲ အံၣ်စရ့လးအစီၤပၤတဂၤန့ၣ်လီၤ.—၁ မူၤ. ၂၅:၁၀, ၁၁, ၁၄.
၁၃. (က) ဖဲပှၤဟဲက့ၤတဲဘၣ်စီၤဒၤဝံး တၢ်လၢအမၤအသးတဖၣ်အခါ အဝဲမၤဝဲတၢ်မနုၤလဲၣ်. (ခ) ဘၣ်ဃးဒီးစီၤဒၤဝံး အတၢ်ပာ်သူၣ်ပာ်သးန့ၣ် ပဒိးန့ၢ်ဘၣ်တၢ်မၤလိဖဲ ယၤကိာ် ၁:၂၀ ဒ်လဲၣ်.
၁၃ ဖဲပှၤဟဲက့ၤတဲဘၣ်စီၤဒၤဝံး တၢ်လၢအမၤအသးတဖၣ်အခါ အသးမိၢ်မှံထီၣ်တၢ်ဒိၣ်မးလီၤ. ဒီးအဝဲမၤလိာ် အခ့အပှၤတဖၣ်လၢ “ကံၢ်ဃာ်သုနးကိးဂၤဒဲးတက့ၢ်.” စီၤဒၤဝံး ဟံးန့ၢ်တၢ်စုကဝဲၤဒီး ကိးန့ၢ်ဝဲအပှၤသုးဖိအဂၤ ၄၀၀ ဒ်သိးကလဲၤဒုးဝဲစီၤနၤဘလးန့ၣ်လီၤ. စီၤဒၤဝံးတိာ်ပာ်ဝဲလၢ အကမၤသံကွံာ် စီၤနၤဘလးဒီးအဟံၣ်ဖိဃီဖိလၢ အမ့ၢ်ပိာ်ခွါတဖၣ်န့ၣ်ကိးဂၤဒဲးလီၤ. (၁ မူၤ. ၂၅:၁၂, ၁၃, ၂၁, ၂၂) စီၤဒၤဝံးသူၣ်ဒိၣ်သးဖျိးထီၣ်တၢ်န့ၣ် ပနၢ်ပၢၢ်စၢၤအီၤသ့ဘၣ်ဆၣ် တၢ်လၢအကမၤဝဲန့ၣ် တမ့ၢ်တၢ်လၢအဘၣ်ဝဲဘၣ်. ဒီးလံာ်စီဆှံစံးဝဲလၢ– “ပှၤကညီအသးဒိၣ်ထီၣ်န့ၣ်, တမၤဘၣ်ယွၤအတၢ်တီတၢ်လိၤဘၣ်.” (ယၤ. ၁:၂၀) ဘၣ်ဆၣ် နီၢ်အဘံၤကါယံးလး မၤပူၤဖျဲးဝဲအဟံၣ်ဖိဃီဖိ ကသ့လၢကျဲဒ်လဲၣ်.
“မ်နသးဆးန့ၣ် ဘၣ်တၢ်ဆိၣ်ဂ့ၤအီၤတက့ၢ်”
၁၄. (က) ဒ်သိးနီၢ်အဘံၤကါယံးလး ကမၤဘၣ်လိာ်ဖိးဒ့က့ၤဝဲ တၢ်ကီတၢ်ခဲလၢအဟဲအိၣ်ထီၣ်ဝဲအဂီၢ်န့ၣ် အဝဲပာ်ဖျါထီၣ်တၢ်ဂ့ၤတၢ်ဝါမနုၤလဲၣ်. (ခ) နီၢ်အဘံၤကါယံးလး အတၢ်ပာ်သူၣ်ပာ်သး လီၤဆီလိာ်အသးဒီးစီၤနၤဘလးန့ၣ် ပဒိးန့ၢ်တၢ်မၤလိဒ်လဲၣ်.
၁၄ နီၢ်အဘံၤကါယံးလး မ့ၢ်ပှၤလၢအိၣ်ဒီးတၢ်ဆီၣ်လီၤသး ဒီးသးအိၣ်ဒိကနၣ်ထံတၢ်လီၤ. တၢ်ဂ့ၤတၢ်ဝါတခါအံၤ မ့ၢ်ခီၣ်ခါတခါလၢ ကမၤဘၣ်လိာ်ဖိးဒ့က့ၤဝဲ တၢ်ကီတၢ်ခဲလၢအဟဲအိၣ်ထီၣ်ဝဲန့ၣ်လီၤ. နီၢ်အဘံၤကါယံးလးန့ၣ် လီၤဆီဒီးအဝၤ စီၤနၤဘလးဒိၣ်မးလီၤ. ဘၣ်ဆၣ် လၢနီၢ်အဘံၤကါယံးလး ကလဲၤတဲသကိးတၢ်ဂ့ၢ်ကီအံၤဒီးအဝၤန့ၣ် အဘျုးတအိၣ်ဝဲဘၣ်. ဒ်ပိာ်ခွါသးစၢ်တဂၤ စံးဝဲအသိး စီၤနၤဘလးန့ၣ် မ့ၢ်ပှၤလၢ “အခိၣ်ကိၤအၢသီ တုၤဒၣ်လဲာ် တကနၣ်ဘၣ်ပှၤနီတဂၤဘၣ်.” (၁ မူၤ. ၂၅:၁၇, ခ့ခါစှီၤကျိာ်) စီၤနၤဘလးန့ၣ် မ့ၢ်ပှၤတဂၤလၢ အဆိကမိၣ်ဒိၣ်လီၤအသးအဃိ အဝဲတဒိကနၣ်ပှၤဂၤအတၢ်ကတိၤဘၣ်. မုၢ်မဆါတနံၤအံၤ ပထံၣ်ဘၣ်ပှၤလၢ အပာ်ကဖၢလၢအသးဒ်အံၤအိၣ်ဝဲစ့ၢ်ကီးလီၤ. ပိာ်ခွါသးစၢ်တဂၤအံၤ ထံၣ်ဝဲလၢနီၢ်အဘံၤကါယံးလး မ့ၢ်ပှၤလၢအလီၤဆီဒီးအဝၤအဃိ အဝဲလဲၤတဲဘၣ်အီၤတၢ်ဂ့ၢ်ကီလၢ အဟဲကဲထီၣ်အသးတဖၣ်န့ၣ်လီၤ.
နီၢ်အဘံၤကါယံးလး တလီၤဂာ်ဒီး စီၤနၤဘလး လၢအတသးအိၣ်ဒိကနၣ် ပှၤဂၤအတၢ်ကတိၤန့ၣ်ဘၣ်
၁၅, ၁၆. (က) မါတဂၤလၢ လံာ်တၢ်ကတိၤဒိပာ်ဖျါထီၣ်ဝဲန့ၣ် နီၢ်အဘံၤကါယံးလး လီၤဂာ်ဒီးအီၤဒ်လဲၣ်. (ခ) ဘၣ်မနုၤအဃိ ပတဲသ့လၢတၢ်လၢ နီၢ်အဘံၤကါယံးလးမၤဝဲတဖၣ်န့ၣ် တမ့ၢ်တၢ်လၢအထီဒါအဝၤအလီၢ်အလၤလဲၣ်.
၁၅ လံာ်စီဆှံစံးဝဲလၢ “နီၢ်အဘံၤကါယံးလးမၤတၢ်ချ့ချ့” န့ၣ်လီၤ. လၢတၢ်န့ၣ်အဃိ နီၢ်အဘံၤကါယံးလး ဆိကမိၣ်တၢ်ဒီးရဲၣ်လီၤကျဲၤလီၤဝဲတထံၣ်ဃီလီၤ. ဘၣ်ဃးဒီးပိာ်မုၣ်တဂၤအံၤအဂ့ၢ်န့ၣ် တၢ်ကတိၤလၢအမ့ၢ်မၤတၢ် “ချ့ချ့” န့ၣ်ဘၣ်တၢ်သူအီၤလွံၢ်ဘျီလီၤ. နီၢ်အဘံၤကါယံးလး ကတဲၤကတီၤထီၣ်တၢ်ဟ့ၣ်အါမး လၢစီၤဒၤဝံးဒီးအပှၤသုးဖိတဖၣ်အဂီၢ်လီၤ. လၢအတၢ်ဟ့ၣ်တဖၣ်အကျါန့ၣ် ပၣ်ဃုာ်ဒီးကိၣ်, စပံးထံ, သိ, ဘုလၢပှၤဝဲာ်မံအီၤ, စပံးသၣ်ဃ့ကိၣ်ခ့ၣ်ဒီး ချၢၣ်ဒၢသၣ်ကိၣ်ခ့ၣ်န့ၣ်လီၤ. နီၢ်အဘံၤကါယံးလး မ့ၢ်မါတဂၤလၢအကွၢ်ထွဲ ဟံၣ်ဃီဂ့ၤဂ့ၤအဃိ ကယဲၢ်တၢ်အိၣ်လၢ အဟံၣ်ပူၤန့ၣ်အဝဲသ့ၣ်ညါဝဲခဲလၢာ်လီၤ. နီၢ်အဘံၤကါယံးလးန့ၣ် လီၤဂာ်ဒီးမါတဂၤလၢ လံာ်တၢ်ကတိၤဒိပာ်ဖျါထီၣ်ဝဲန့ၣ်လီၤ. (ကတိၤ. ၃၁:၁၀-၃၁) နီၢ်အဘံၤကါယံးလး မၢလီၤဆိဝဲအပျဲၢ်အဘီၣ်တဖၣ် ဒ်သိးကလဲၤဆှၢဝဲတၢ်အီၣ်တၢ်အီတဖၣ်လၢ အကတဲာ်ကတီၤပာ်စၢၤဝဲန့ၣ်လီၤ. ဝံၤဒီးဖဲအပျဲၢ်အဘီၣ်တဖၣ် လဲၤတလၢကွံာ်အခါ အဝဲလဲၤလူၤထွဲဝဲ အဝဲသ့ၣ်အခံ ထဲတဂၤဧိၤလီၤ. ဒီးဒ်လံာ်စီဆှံစံးဝဲအသိး “မ့မ့ၢ်အဝၤန့ၣ် တတဲဘၣ်ဝဲတၢ်နီတမံၤဘၣ်.”—၁ မူၤ. ၂၅:၁၈, ၁၉, ခ့ခါစှီၤကျိာ်.
၁၆ ခီဖျိလၢ နီၢ်အဘံၤကါယံးလး မၤဝဲဒ်အံၤအဃိ မ့ၢ်အဝဲထီဒါဝဲအဝၤအလီၢ်အလၤ လၢအမ့ၢ်ဟံၣ်ခိၣ်န့ၣ်ဧါ. တမ့ၢ်လ့ၤတက့ၤဘၣ်. သ့ၣ်နီၣ်ထီၣ်က့ၤလၢ စီၤနၤဘလးကတိၤတရီတပါဘၣ်ဝဲ ယဟိဝၤယွၤအခ့အပှၤ လၢအဘၣ်တၢ်ဒိးဖှူအီၤတဂၤန့ၣ်တက့ၢ်. လၢတၢ်ဂ့ၢ်အံၤအဃိ စီၤနၤဘလး အဟံၣ်ဖိဃီဖိအဂၤတဖၣ် လၢအတၢ်ကမၣ်တအိၣ်န့ၣ် ကဘၣ်တၢ်မၤသံအဝဲသ့ၣ်လီၤ. နီၢ်အဘံၤကါယံးလး မ့ၢ်တရဲၣ်ကျဲၤဝဲတၢ်နီတမံၤဘၣ်န့ၣ် ဘၣ်သ့ၣ်သ့ၣ် ကဖျါလၢအဝဲအိၣ်ဃူဝဲအဝၤ ဒီးကပၣ်ဃုာ်လၢ အဝၤအတၢ်ကမၣ်အပူၤလီၤ. လၢတၢ်န့ၣ်အဃိ ဖဲတၢ်မၤအသးဒ်အံၤအခါ နီၢ်အဘံၤကါယံးလး ကဘၣ်ပာ်ဒိၣ်ယွၤအါန့ၢ်ဒံးအဝၤန့ၣ်လီၤ.
၁၇, ၁၈. နီၢ်အဘံၤကါယံးလး လဲၤသဂၢၢ်စီၤဒၤဝံးဒ်လဲၣ်, အဝဲစံးဘၣ်အီၤ တၢ်ဂ့ၢ်မနုၤလဲၣ်, ဒီးဘၣ်မနုၤအဃိ အတၢ်ကတိၤန့ၣ်ကဲဘျုးဝဲလဲၣ်.
၁၇ လၢတယံာ်တမီၢ်အတီၢ်ပူၤန့ၣ် နီၢ်အဘံၤကါယံးလး တိနိၣ်လိာ်အသးဒီး စီၤဒၤဝံးဒီးပှၤသုးဖိတဖၣ်လီၤ. တဘျီအံၤစ့ၢ်ကီး နီၢ်အဘံၤကါယံးလး စံၣ်လီၤလၢကသ့ၣ်ယီၤအလိၤချ့ချ့ဒီး ထိၣ်လီၤပှီၤအသး လၢဟီၣ်ခိၣ်လိၤလၢ စီၤဒၤဝံးအမဲာ်ညါန့ၣ်လီၤ. (၁ မူၤ. ၂၅:၂၀, ၂၃) ဖဲအဝဲတဲတၢ်ဒီးစီၤဒၤဝံးအခါ အဝဲတဲဖျါထီၣ်ဝဲ တၢ်အိၣ်လၢအသးပူၤနီၢ်နီၢ် ဒီးဃ့ကညးဝဲသပှၢ်ကတၢၢ် ဒ်သိးစီၤဒၤဝံးကပာ်ဖျါထီၣ်တၢ်သးကညီၤ လၢအဝၤဒီးအဟံၣ်ဖိဃီဖိအဖီခိၣ်န့ၣ်လီၤ. နီၢ်အဘံၤကါယံးလး အတၢ်ကတိၤတဖၣ်အံၤ ကဲဘျုးဒ်လဲၣ်.
“ဒုးကတိၤလၢ်နကုၢ်ပိာ်မုၣ်လၢနနၢ်ပူၤ” တက့ၢ်
၁၈ ဘၣ်ဃးဒီးတၢ်ဂ့ၢ်ကီတဖၣ်အံၤန့ၣ် နီၢ်အဘံၤကါယံးလး ဟံးန့ၢ်မူဒါဒီးဃ့ဝဲလၢ စီၤဒၤဝံးကပျၢ်ကွံာ်အတၢ်ကမၣ်လီၤ. အဝဲစံးဘၣ်စီၤဒၤဝံးလိၤလိၤလၢ ယဝၤစီၤနၤဘလးန့ၣ် မ့ၢ်ပှၤလၢအသးတဆးဘၣ် ဒ်အမံၤအခီပညီအိၣ်ဝဲအသိးလီၤ. လၢတၢ်န့ၣ်အဃိ တဘၣ်ကနၣ်ဃုာ်အီၤတဂ့ၤ. နီၢ်အဘံၤကါယံးလး အတၢ်ကတိၤတဖၣ်အံၤ ကဒုးဆိကမိၣ်စီၤဒၤဝံးလၢ အဝဲမ့ၢ်မၤဆၢက့ၤပှၤဒ်သိးဒီး စီၤနၤဘလးန့ၣ် ကမၤဘၣ်ဒိဘၣ်ထံးအနီၢ်ကစၢ်အလၤကပီၤလီၤ. နီၢ်အဘံၤကါယံးလး တဲဖျါထီၣ်ဝဲ အတၢ်နာ်စီၤဒၤဝံးခီဖျိလၢ အဝဲမ့ၢ်ယဟိဝၤယွၤ အခၢၣ်စးတဂၤလီၤ. တကးဒံးဘၣ် နီၢ်အဘံၤကါယံးလး တဲဘၣ်စီၤဒၤဝံးလၢ ယသ့ၣ်ညါလၢ နဒုးတၢ်လၢ “ယွၤအတၢ်ဒုးတၢ်တဖၣ်” အဂီၢ်လီၤ. လၢန့ၣ်အမဲာ်ညါ ပထံၣ်ဘၣ်လၢ အဝဲသ့ၣ်ညါဝဲလၢ ယွၤအၢၣ်လီၤဝဲလၢ စီၤဒၤဝံးကကဲထီၣ်စီၤပၤလီၤ. မ့ၢ်လၢ အဝဲစံးဘၣ် စီၤဒၤဝံးလၢ “ယွၤ . . . ကပာ်နၤလၢ ပှၤပၢအံၣ်စရ့လး” အဂီၢ်န့ၣ်လီၤ. ဒီးနီၢ်အဘံၤကါယံးလး ဟ့ၣ်ကူၣ်ဟ့ၣ်ဖးဝဲစီၤဒၤဝံးလၢ အဝဲမ့ၢ်မၤသံပှၤဂၤလၢ အတၢ်ကမၣ်တအိၣ်န့ၣ် လၢခံကကဲထီၣ် “တၢ်သးဘၣ်တိၢ်ဘၣ်ထံး” လၢအဂီၢ်န့ၣ်လီၤ. အခီပညီအဲၣ်ဒိးစံးဝဲလၢ လၢခံစီၤဒၤဝံးအသးလၢ အသ့ၣ်ညါဒၣ်တၢ်န့ၣ် ကမၤတံာ်တာ်အီၤလီၤ. (ဖး ၁ ၡမူၤအ့လး ၂၅:၂၄-၃၁ တက့ၢ်.) နီၢ်အဘံၤကါယံးလး အတၢ်ကတိၤလၢ အပှဲၤဒီးတၢ်အဲၣ်တၢ်ကွံအံၤ ထုးန့ၢ်ဝဲစီၤဒၤဝံးအသးန့ၣ်လီၤ.
၁၉. စီၤဒၤဝံးစံးဆၢက့ၤ နီၢ်အဘံၤကါယံးလးဒ်လဲၣ်, ဘၣ်မနုၤအဃိ စီၤဒၤဝံးစံးပတြၢၤအီၤလဲၣ်.
၁၉ စီၤဒၤဝံးမၤဝဲဒ်လဲၣ်. အဝဲတူၢ်လိာ်ဝဲ ကယဲၢ်တၢ်လၢ နီၢ်အဘံၤကါယံးလး ဟ့ၣ်အီၤဒီးစံးဝဲလၢ “မ်ယွၤ အံၣ်စရ့လးအကစၢ်လၢ အမၢနဟဲသဂၢၢ်ယၤလၢ မုၢ်မဆါတနံၤအံၤ, ဘၣ်တၢ်စံးထီၣ်ပတြၢၤအီၤတက့ၢ်. မ်နသးဆးန့ၣ် ဘၣ်တၢ်ဆိၣ်ဂ့ၤအီၤတက့ၢ်. ဒီးပှၤအတြီယဟဲဂၢ်လီၤတၢ်သွံၣ် လၢမုၢ်မဆါတနံၤအံၤ, ဒီးအုၣ်က့ၤခီၣ်က့ၤယသးလၢ ယစုဒၣ်ယဲ နဲဒၣ်အံၤ, မ်နဘၣ်တၢ်ဆိၣ်ဂ့ၤတက့ၢ်.” စီၤဒၤဝံး စံးဘျုးဝဲ နီၢ်အဘံၤကါယံးလး ခီဖျိလၢ နီၢ်အဘံၤကါယံးလး ဟဲဆူအအိၣ်လၢ တၢ်သးဒူအပူၤ ဒီးမၤစၢၤအီၤဒ်သိးအသုတ မၤသံဘၣ်ပှၤဂၤလၢ အတၢ်ကမၣ်တအိၣ်တဖၣ်တဂ့ၤ အဂီၢ်န့ၣ်လီၤ. ဒီးစီၤဒၤဝံးစံးဘၣ် နီၢ်အဘံၤကါယံးလးလၢ “က့ၤက့ၤမုာ်မုာ်ဆူ နဟံၣ်တက့ၢ်.” လၢတၢ်ဆီၣ်လီၤသးအပူၤ စီၤဒၤဝံးစံးစ့ၢ်ကီးဝဲလၢ “ယဒိကနၣ်လံနကလုၢ်” လံ.—၁ မူၤ. ၂၅:၃၂-၃၅.
“နကုၢ်ပိာ်မုၣ်”
၂၀, ၂၁. (က) ဘၣ်မနုၤအဃိ ပကြၢးပတြၢၤနီၢ်အဘံၤကါယံးလး လၢအသးအိၣ်က့ၤကဒါက့ၤ လၢအဝၤအအိၣ်လဲၣ်. (ခ) နီၢ်အဘံၤကါယံးလး ဃုထၢတၢ်ဆၢကတီၢ်လၢ အဝဲကတဲတၢ်ဒီးအဝၤန့ၣ် အဝဲပာ်ဖျါထီၣ်တၢ်သးဒူ ဒီးတၢ်သးဆးဒ်လဲၣ်.
၂၀ ဖဲအဝဲသ့ၣ် ဟးဖးလိာ်သးဝံၤအလီၢ်ခံန့ၣ် နီၢ်အဘံၤကါယံးလး ကဆိကမိၣ်ထီၣ်က့ၤဝဲ ဘၣ်ဃးဒီးအတၢ်ထံၣ်လိာ်သး ဒီးစီၤဒၤဝံးအဂ့ၢ်န့ၣ်လီၤ. ဒီးအဝဲထံၣ်ဘၣ်ဝဲလၢ စီၤဒၤဝံးမ့ၢ်ပှၤအတီအလိၤ လၢအိၣ်ဒီးတၢ်သးကညီၤအဃိ လီၤဆီလိာ်အသးဒီးအဝၤဒိၣ်မးလီၤ. ဘၣ်ဆၣ်သနာ်က့ အဝဲတဆဲးဆိကမိၣ်ဝဲ တၢ်ဂ့ၢ်တခါအံၤလၢၤဘၣ်. ဒီးလံာ်စီဆှံပာ်ဖျါထီၣ်ဝဲလၢ– “နီၢ်အဘံၤကါယံးလး က့ၤက့ၤဆူစီၤနၤဘလးအအိၣ်” လီၤ. နီၢ်အဘံၤကါယံးလး က့ၤဆူအဝၤအအိၣ် ဒ်သိးကဆဲးမၤလၢပှဲၤဝဲမါအမူဒါ လၢအဂ့ၤကတၢၢ်န့ၣ်လီၤ. ကယဲၢ်တၢ်အီၣ်တၢ်အီ လၢနီၢ်အဘံၤကါယံးလး ဟ့ၣ်လီၤဝဲစီၤဒၤဝံးဒီးအခ့အပှၤတဖၣ်န့ၣ် အဝၤကြၢးသ့ၣ်ညါဝဲအဃိ အဝဲကဘၣ်တဲဘၣ်အဝၤလီၤ. နီၢ်အဘံၤကါယံးလး ကဘၣ်တဲစ့ၢ်ကီးအဝၤလၢ အဝဲမၤပူၤဖျဲးအဟံၣ်ဖိဃီဖိလၢ တၢ်သံအကဒုဖီလာ်ဒ်လဲၣ်အဂ့ၢ်န့ၣ်လီၤ. ခီဖျိလၢ အဝၤမ့ၢ်နၢ်ဟူဘၣ်ဝဲတၢ်ဂ့ၢ်အံၤ လၢပှၤဂၤအအိၣ်န့ၣ် ကကဲထီၣ်တၢ်မဲာ်ဆှးလၢအဂီၢ် ဒိၣ်န့ၢ်အလီၢ်လီၤ. ဘၣ်ဆၣ် ခဲအံၤ မ့ၢ်လၢအဝၤ အီၣ်တၢ်အီတၢ် ဒ်စီၤပၤတဂၤအသိး ဒီးအီမူၤသံးတုၤလၢ အလီၤဘျးလီၤဘျဲအဃိ အဝဲတဲဘၣ်ဝဲတသ့ဒံးဘၣ်.—၁ မူၤ. ၂၅:၃၆.
တၢ်လၢ နီၢ်အဘံၤကါယံးလး မၤတ့ၢ်ဝဲ ဒ်သိးကမၤပူၤဖျဲး စီၤနၤဘလးအသးသမူ အဂီၢ်န့ၣ် အဝဲတဲဘၣ်အီၤလၢ တၢ်သးဒူအပူၤ
၂၁ တဘျီအံၤသနာ်က့ နီၢ်အဘံၤကါယံးလး ပာ်ဖျါထီၣ်တၢ်သးဒူဒီးတၢ်သးဆး အဃိအဝဲအိၣ်ခိးဝဲတုၤလၢ မုၢ်ဆ့ၣ်ဝါထီၣ် ဖဲအဝၤတမူၤသံးလၢၤအဆၢကတီၢ်န့ၣ်လီၤ. စီၤနၤဘလး မ့ၢ်တမူၤသံးလၢၤဘၣ် သနာ်က့ အမါမ့ၢ်တဲဘၣ်အီၤ တၢ်ဂ့ၢ်တၢ်ကျိၤလၢအဟဲကဲထီၣ်အသးန့ၣ် ဘၣ်သ့ၣ်သ့ၣ် စီၤနၤဘလး ကသူၣ်ဒိၣ်သးဖျိးထီၣ်ဝဲအမါချ့ချ့ ဒီးကဲထီၣ်တၢ်ဘၣ်ယိၣ်လၢအဂီၢ်သ့ဝဲလီၤ. ဘၣ်ဆၣ်သနာ်က့ နီၢ်အဘံၤကါယံးလး လဲၤလၢအဝၤအအိၣ် ဒီးတဲဘၣ်အီၤတၢ်ဂ့ၢ်တၢ်ကျိၤခဲလၢာ်န့ၣ်လီၤ. ဖဲအဝဲတဲဘၣ်အဝၤဝံၤအလီၢ်ခံ နီၢ်အဘံၤကါယံးလး ကဆိကမိၣ်ဝဲလၢ အဝၤအတၢ်သးထီၣ်ကပိၢ်ဖး ဒီးကဒိအီၤတီၢ်အီၤသ့ၣ်သ့ၣ်လီၤ. ဘၣ်ဆၣ် အဝၤဆ့ၣ်နီၤဝဲလၢအလီၢ် ဒီးတဟူးတဝးဝဲနီတစဲးဘၣ်.—၁ မူၤ. ၂၅:၃၇.
၂၂. တၢ်မၤအသးဒီး စီၤနၤဘလးဒ်လဲၣ်, ဘၣ်ဃးဒီးတၢ်ပၢဆူၣ်ပၢစိးတၢ် ဒီးတၢ်မၤအၢမၤသီ ဟံၣ်ဖိဃီဖိန့ၣ် ပဒိးန့ၢ်ဘၣ်တၢ်မၤလိဒ်လဲၣ်.
၂၂ တၢ်ကဲထီၣ်အသး ဒီးစီၤနၤဘလးဒ်လဲၣ်. စီၤနၤဘလး “အသးသံဝဲလၢအပူၤ, ဒီးကဲထီၣ်ဝဲဒ်လၢၢ်အသိးန့ၣ်လီၤ.” ဘၣ်သ့ၣ်သ့ၣ် ကမ့ၢ်လၢကလံၤဖၠးအီၤအဃိလီၤ. ဒီးတၢ်ဆၢကတီၢ်လဲၤပူၤကွံာ် အသီတဆံ ဃၣ်ဃၣ်ဝံၤအလီၢ်ခံန့ၣ် စီၤနၤဘလးသံဝဲလီၤ. အဝဲသံဝဲန့ၣ် တမ့ၢ်ထဲလၢတၢ်ဆါအဃိဘၣ်. လံာ်စီဆှံပာ်ဖျါထီၣ်ဝဲလၢ– “ယွၤတီၢ်စီၤနၤဘလး, ဒီးသံဝဲလီၤ.” (၁ မူၤ. ၂၅:၃၈) ယွၤအတၢ်စံၣ်ညီၣ်န့ၣ် တီဝဲလိၤဝဲလီၤ. ဒီးလၢနီၢ်အဘံၤကါယံးလးအဂီၢ်န့ၣ် တၢ်ဆီဟံၣ်ဆီဃီလၢ အပှဲၤဝဲဒီးတၤဆှုၣ်တၤမဲအံၤ ကတၢၢ်ကွံာ်ဝဲလံ. မုၢ်မဆါတနံၤအံၤ ယဟိဝၤယွၤ တစံၣ်ညီၣ်သံပှၤဟီၣ်ခိၣ်ဖိလၢ တၢ်လီၤလိၢ်လီၤလးအပူၤလၢၤဘၣ်. ဘၣ်ဆၣ် တၢ်ဂ့ၢ်တဖၣ်အံၤ မ့ၢ်တၢ်ဟ့ၣ်ပလီၢ်ပှၤလၢ တၢ်ပၢဆူၣ်ပၢစိးတၢ်ဒီး တၢ်မၤအၢမၤသီမ့ၢ်အိၣ်ထီၣ်ဝဲလၢဟံၣ်ဖိဃီဖိအပူၤန့ၣ် ကစၢ်ယွၤတကွၢ်ကပာ်ကွံာ်ဝဲနီတစဲးဘၣ်. ဒီးကစၢ်ယွၤကစံၣ်ညီၣ်တၢ် တီတီလိၤလိၤ ဖဲတၢ်ဆၢကတီၢ်ဘၣ်ဝဲအခါန့ၣ်လီၤ.—ဖး လူၤကၣ် ၈:၁၇ တက့ၢ်.
၂၃. နီၢ်အဘံၤကါယံးလး ဒိးန့ၢ်ဘၣ်ဝဲတၢ်ဆိၣ်ဂ့ၤ လၢအဂၤတမံၤန့ၣ်မ့ၢ်မနုၤလဲၣ်, ဒီးအဝဲမ့ၢ်ကဲထီၣ် စီၤဒၤဝံးအမါဘၣ်ဆၣ် တၢ်မနုၤပာ်ဖျါထီၣ်န့ၢ်ပှၤလၢ အဝဲအိၣ်ဒီးတၢ်ဆီၣ်လီၤသးလဲၣ်.
၂၃ နီၢ်အဘံၤကါယံးလး ထူၣ်ဖျဲးထီၣ်က့ၤလၢ တၢ်ဆီဟံၣ်ဆီဃီ လၢအတမုာ်တခုၣ်ဝံၤအလီၢ်ခံ အဝဲဒိးန့ၢ်ဘၣ်ဝဲတၢ်ဆိၣ်ဂ့ၤလၢ အဂၤတမံၤစ့ၢ်ကီးလီၤ. ဖဲစီၤဒၤဝံး နၢ်ဟူဘၣ်ဝဲလၢ နီၢ်အဘံၤကါယံးလး အဝၤတအိၣ်လၢၤဘၣ်န့ၣ် အဝဲဆှၢလီၤအခ့အပှၤ ဒ်သိးကလဲၤဃ့န့ၢ်အီၤ နီၢ်အဘံၤကါယံးလး လၢအကဖျီအသးဒီးအီၤအဂီၢ်လီၤ. နီၢ်အဘံၤကါယံးလး စံးဆၢက့ၤစီၤဒၤဝံးအခ့အပှၤလၢ “ပာ်နကုၢ်ပိာ်မုၣ်လၢ ပှၤသ့စီယကစၢ်အခ့အပှၤအခီၣ်န့ၣ်တက့ၢ်.” ဖဲအံၤပထံၣ်ဘၣ်လၢ နီၢ်အဘံၤကါယံးလး ကကဲထီၣ်စီၤဒၤဝံးအမါ ဘၣ်ဆၣ် အတၢ်ပာ်သူၣ်ပာ်သးတဆီတလဲဝဲဘၣ်, အဝဲအိၣ်ဒီးတၢ်ဆီၣ်လီၤသး ဒ်လၢညါအသိးလီၤ. လၢန့ၣ်အမဲာ်ညါ အဝဲသးအိၣ်ဟ့ၣ်လီၤအသးလၢ ကကဲဝဲစီၤဒၤဝံးအခ့အပှၤတဖၣ် အကုၢ်အပှၤလီၤ. တဘျီအံၤစ့ၢ်ကီး လံာ်စီဆှံပာ်ဖျါထီၣ်ဝဲလၢ နီၢ်အဘံၤကါယံးလး ကတဲာ်ကတီၤထီၣ်အသးချ့ချ့ လၢကလဲၤဝဲဆူစီၤဒၤဝံးအအိၣ်န့ၣ်လီၤ.—၁ မူၤ. ၂၅:၃၉-၄၂.
၂၄. ဖဲနီၢ်အဘံၤကါယံးလး သူၣ်ထီၣ်အတၢ်အိၣ်မူလၢအသီအခါန့ၣ် အဝဲထံၣ်ဘၣ်တၢ်ကီတၢ်ခဲမနုၤတဖၣ်လဲၣ်, ဘၣ်ဆၣ် အဝၤဒီးကစၢ်ယွၤထံၣ်အီၤဒ်လဲၣ်.
၂၄ နီၢ်အဘံၤကါယံးလး ဖျီအသးဒီးစီၤဒၤဝံး ဝံၤအလီၢ်ခံန့ၣ် အတၢ်အိၣ်မူ တမၤအသးဒ်ဖီထိၣ်ကံၣ်အိၣ် လၢသ့ၣ်ခံအသိးဘၣ်. အဝဲကဲထီၣ်စီၤဒၤဝံး အမါသနာ်က့ တညီဝဲလၢအဂီၢ်ထီဘိဘၣ်. အဒိ တချုးလၢ စီၤဒၤဝံးဟံးန့ၢ် နီၢ်အဘံၤကါယံးလးန့ၣ် အဝဲဖျီအသးဒီး နီၢ်အဃံနိၣ်ဝံၤဝဲလံ. ဒ်ပသ့ၣ်ညါအသိး ဖဲစီၤဒၤဝံးအစိၤန့ၣ် ကစၢ်ယွၤဟ့ၣ်အခွဲးလၢ ပိာ်ခွါတဖၣ်ဟံးန့ၢ်ဝဲအမါအါဂၤသ့ဝဲလီၤ. ဘၣ်ဆၣ်သနာ်က့ တမ့ၢ်တၢ်အညီလၢ ပှၤပိာ်မုၣ်လၢအတီအလိၤတဖၣ်အဂီၢ်ဘၣ်. တကးဒံးဘၣ် ဖဲန့ၣ်အခါစီၤဒၤဝံးတကဲထီၣ် စီၤပၤဒံးဘၣ်. တချုးလၢအဝဲကဲထီၣ်စီၤပၤန့ၣ် စီၤဒၤဝံးဘၣ်ကွၢ်ဆၢၣ်မဲာ်ဝဲ တၢ်ကီတၢ်ခဲဒီး တၢ်မၤကွၢ်အကလုာ်ကလုာ်လီၤ. ဘၣ်ဆၣ် နီၢ်အဘံၤကါယံးလး ဆီၣ်ထွဲမၤစၢၤစီၤဒၤဝံးထီဘိလီၤ. ဒီးလၢခံန့ၣ် နီၢ်အဘံၤကါယံးလး အိၣ်ဖျဲၣ်ထီၣ်ဝဲဖိခွါတဂၤ လၢစီၤဒၤဝံးအဂီၢ်န့ၣ်လီၤ. နီၢ်အဘံၤကါယံးလး သ့ၣ်ညါဝဲလၢ စီၤဒၤဝံးအဲၣ်အီၤဒီး ကဟုကယာ်အီၤထီဘိလီၤ. ဘၣ်တဘျီန့ၣ် ဖဲပှၤက့ၤဖီၣ်နီၢ်အဘံၤကါယံးလးအခါ စီၤဒၤဝံးလဲၤမၤပူၤဖျဲးအီၤလီၤ. (၁ မူၤ. ၃၀:၁-၁၉) စီၤဒၤဝံးမၤဝဲဒ်န့ၣ်န့ၣ် မ့ၢ်ဒၣ်အဝဲကွၢ်လိမၤဒိးဝဲ ယဟိဝၤယွၤ လၢအအဲၣ်ဝဲဒီးပာ်လုၢ်ပာ်ပှ့ၤဝဲ ပိာ်မုၣ်လၢအသးဆး, လၢအိၣ်ဒီးတၢ်တီတၢ်လိၤ ဒီးတၢ်သးဒူန့ၣ်လီၤ.
^ လံာ်အဆၢ. 9 တၢ်လီၢ်အဝဲအံၤ တမ့ၢ်ကစၢၢ်ကၢ်မ့ၤလး လၢအမံၤဟူသၣ်ဖျါတဖျၢၣ်လၢ အိၣ်လၢကလံၤစိးတခီ ဖဲဝံအ့ၤလံယၤ ကွၢ်ဆၢၣ်မဲာ်ဘၣ်ဝဲဒီးဘဧၤလး အဝံတဖၣ်န့ၣ်ဘၣ်. (ကွၢ်တၢ်မၤလိ ၁၀.) တၢ်လီၢ်ကၢ်မ့ၤလးအံၤ မ့ၢ်ဝ့ၢ်တဖျၢၣ်လၢအအိၣ်ဝဲလၢ ပှၢ်မုၢ်ကနၢဆူကလံၤထံးတခီအကတၢၢ်န့ၣ်လီၤ.
^ လံာ်အဆၢ. 10 ဘၣ်သ့ၣ်သ့ၣ် စီၤဒၤဝံးတူၢ်ဘၣ်ဝဲလၢ အဝဲမ့ၢ်ဒီသဒၢဟီၣ်ခိၣ်လီၢ်အကစၢ် ဒီးအသိန့ၣ် မ့ၢ်ဒၣ်တၢ်မၤ ယဟိဝၤယွၤအတၢ်မၤန့ၣ်လီၤ. ဖဲစီၤဒၤဝံးအစိၤ ယဟိဝၤယွၤတိာ်ပာ်ဝဲလၢ စီၤအၤဘြၤဟၣ်, စီၤအံၤစဲးဒီးစီၤယၤကိာ် အစၢၤအသွဲၣ်တဖၣ် ကအိၣ်ဝဲဆိးဝဲဖဲကီၢ်အဝဲန့ၣ်လီၤ. လၢတၢ်န့ၣ်အဃိ စီၤဒၤဝံးမ့ၢ်ဒီသဒၢတၢ်လီၢ်အံၤ လၢတမျာ်ဒီးကလုာ်အဂၤတဖၣ်အစုပူၤန့ၣ် မ့ၢ်တၢ်မၤလၢအလုၢ်ဒိၣ်ပှ့ၤဒိၣ်တခါ လၢယဟိဝၤယွၤအဂီၢ်လီၤ.
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
နီၢ်အ့ၤစတၢ်—အဝဲအိၣ်ဒီးတၢ်ကူၣ်သ့, တၢ်သးဒူဒီး တအဲၣ်လီၤထဲအသးဘၣ်
နီၢ်အ့ၤစတၢ် ပာ်ဖျါထီၣ် တၢ်ဟ့ၣ်လီၤသးလၢ ယဟိဝၤယွၤဒီးအပှၤဂီၢ်မုၢ်အဂီၢ်ဒ်လဲၣ်.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
