ဆိကမိၣ်​ကွၢ်​တၢ်ဂ့ၢ်​အံၤ​တက့ၢ်– ဟဲ​သၣ် ဒီး မဲး(ခ်) ပာ်တၢ်အဲၣ်တီ​အိၣ်ဒံး​ထဲ​ခံ​လါ, ဘၣ်ဆၣ် ဟဲ​သၣ် တူၢ်ဘၣ်​ဝဲ​လၢ အဝဲ​သ့ၣ်ညါ မဲး(ခ်) ဖးယံာ်​လံ. အဝဲသ့ၣ်​ဆဲးကျိး​လိာ်သး (text) ထီဘိ​လီၤ. ဒီး​အဝဲသ့ၣ်​မ့ၢ်​တဲသကိး​တၢ်​လၢ လီတဲစိ​န့ၣ်​ယံာ်ဝဲ​လၢ​အ​နၣ်ရံၣ်​တဖၣ်​လီၤ. တကးဒံးဘၣ် အဝဲသ့ၣ်​သ့ၣ်ညါ​လိာ်အသး​ဂ့ၤဂ့ၤ တုၤ​ဒၣ်လဲာ်​တဲ​ကတၢၢ်​န့ၢ်​လိာ်သး တၢ်ကတိၤ​သ့ဝဲ​လီၤ. အဒိ ဖဲ​မဲး(ခ်) တဲတၢ်​အခါ, အ​တၢ်အဲၣ်​တီ​မုၣ်​သ့ၣ်ညါ​ဝဲ​တၢ်​လၢ​အ​အဲၣ်ဒိး​တဲဝဲ​အဃိ အဝဲ​တဲ​ကတၢၢ်​န့ၢ်​မဲး(ခ်) အ​တၢ်ကတိၤ​လီၤ. ဘၣ်ဆၣ်​ခဲအံၤ မဲး(ခ်) တ​လီကီ​ထဲ​တၢ်​တဲသကိး​တခါ​လၢၤဘၣ်.

လၢ​ပူၤကွံာ်​ခံ​လါ​အတီၢ်ပူၤ, မဲး(ခ်) ဒီး ဟဲ​သၣ် ဖီၣ်​လိာ်သး​စု​ဒီး​နၢမူ​လိာ်အသး​ထဲ​တစဲးဖိ​လီၤ. ဘၣ်ဆၣ် မဲး(ခ်) လီကီဝဲ​အါန့ၢ်​အန့ၣ်​ဒံး, မ့မ့ၢ်​ဟဲ​သၣ်​တခီ တ​အဲၣ်ဒိး​မၤဝဲ​ဘၣ်. တဘျီဃီ​န့ၣ် အဝဲ​တ​အဲၣ်ဒိး​လၢ မဲး(ခ်) က​ပာ်တ့ၢ်​ကွံာ်​အီၤ​စ့ၢ်ကီး​ဘၣ်. မ့ၢ်​လၢ​ဟဲ​သၣ်​တူၢ်ဘၣ်​ဝဲ​လၢ မဲး(ခ်) န့ၣ်​အဲၣ်အီၤ​ဒီး​ကဟုကယာ်​အီၤ​ဒ်​အ နီၢ်ပၤမုၣ်​တဂၤ​အသိး​လီၤ. ခဲအံၤ​န့ၣ် ဟဲ​သၣ်​ဆိကမိၣ်​လီၤအသး​လၢ ‘ယၤ​ဒီး မဲး(ခ်)န့ၣ် ပ​အဲၣ်လိာ်​ပ​သး​အဃိ ယ​က​ဘၣ်​မၤ​ဒ်လဲၣ်.’

န​သး​နံၣ်​မ့ၢ်​ပှဲၤထီၣ်​လၢ န​က​ပာ်တၢ်အဲၣ်တီ​ဒီး န​မ့ၢ်​အိၣ်ဘၣ်​လၢ ဟဲ​သၣ် အလီၢ်​န့ၣ် န​က​မၤ​ဒ်လဲၣ်.

အဒိ, န​မ့ၢ်​တ​ဒိကနၣ်​ထံကီၢ်​တၢ်သိၣ်​တၢ်သီ​န့ၣ် န​က​ထံၣ်ဘၣ်​တၢ်ကီ​တၢ်ခဲ​တဖၣ်​န့ၣ်​လီၤ. ဒ်​န့ၣ်​အသိး န​မ့ၢ်​တ​ဒိကနၣ်​လံာ်စီဆှံ​အ​တၢ်သိၣ်​တၢ်သီ​လၢ အ​စံး​ဝဲ “ဟးဆှဲး​တၢ်မၤ​ကမၣ်မုၣ်​ကမၣ်ခွါ” န့ၣ်, န​က​တူၢ်ဘၣ်​တၢ်ကီ​တၢ်ခဲ​တဖၣ်​စ့ၢ်ကီး​လီၤ.​—၁ သ့းစၤလနံ ၄:၃.

ပ​မ့ၢ်​တ​ဒိကနၣ်​တၢ်သိၣ်​တၢ်သီ​အံၤ ပ​က​တူၢ်ဘၣ်​တၢ်မနုၤ​လဲၣ်. လံာ်စီဆှံ​တဲဝဲ​လၢ “ပှၤလၢ​အ​မၤ​ကမၣ်​ပိာ်မုၣ်​ပိာ်မၢၤ​န့ၣ်, မၤ​ကမၣ်​အ​နီၢ်ခိ​ဒၣ်ဝဲ​လီၤ.” (၁ ကရံၣ်သူး ၆:၁၈) လံာ်စီဆှံ​တ​ဆၢ​အံၤ အဲၣ်ဒိး​တဲဝဲ​ဒ်လဲၣ်.

 ပှၤ​ဃု​သ့ၣ်ညါ​တၢ်ဖိ​တဖၣ် ထံၣ်ဘၣ်​ဝဲ​လၢ ပှၤသးစၢ်​အါဂၤ​လၢ မံဃုာ်​လိာ်သး​တချုး​လၢ​အ​ဖျီအသး​န့ၣ် တူၢ်ဘၣ်​ဝဲ​တၢ်ကီ​တၢ်ခဲ​လၢ လာ်​တဖၣ်​အံၤ​တနီၤ​န့ၣ်​လီၤ.

• တၢ်​သူၣ်ကိၢ်​သးဂီၤ. ပှၤသးစၢ်​လၢ အ​မံဃုာ်​လိာ်သး​တချုး​လၢ​ဖျီအသး​န့ၣ် အါတက့ၢ်​တဲဝဲ, လၢခံ​အဝဲသ့ၣ်​တူၢ်ဘၣ်​ဝဲ​တၢ်သူၣ်အုး​သးအုး​လီၤ.

• တၢ်​နာ်န့ၢ်​လိာ်သး​လီၤ​စှၤ. ဖဲ​ပှၤ​ခံဂၤ​မံဃုာ်​လိာ်သး​ဝံၤ​အလီၢ်​ခံ အဝဲသ့ၣ်​တဂၤ​စုာ်စုာ် က​ဆိကမိၣ်​ထီၣ်ဝဲ​လၢ ပိာ်မုၣ် မ့တမ့ၢ် ပိာ်ခွါ​လၢ​ယ​မံဃုာ်​ဒီး​အီၤ​တဂၤ​အံၤ, လၢညါ​န့ၣ်​မ့ၢ်​အဝဲ​မံဃုာ်​ဒီး ပှၤ​တဂၤဂၤ​ဧါ.

• တၢ်​သးဟးဂီၤ. ပိာ်မုၣ်​အါဂၤ​န့ၣ်​လီကီဝဲ​လၢ ပိာ်ခွါ​က​ကဟုကယာ်​အီၤ ဒီး​တ​လီကီဝဲ ပိာ်ခွါ​လၢ​ကသူ​အီၤ​ထဲ​လၢ အ​နီၢ်ကစၢ်​အဘျုး​အဂီၢ်​ဘၣ်. ပိာ်ခွါ​အါဂၤ ဖဲ​အဝဲသ့ၣ်​မ့ၢ်​မံဃုာ်​ဒီး ပိာ်မုၣ်​တဂၤ​ဂ့ၤ​တဂၤ​ဂ့ၤ ဝံၤ​အလီၢ်​ခံ အဝဲသ့ၣ်​တ​သးအိၣ်​ပိာ်မုၣ်​တဖၣ်​အံၤ​ထဲသိး​လၢညါ​လၢၤဘၣ်.

• တၢ်ကတိၤ​လၢခံကတၢၢ်– န​မ့ၢ်​မံဃုာ်​တချုး​လၢ​န​ဖျီ​သး​န့ၣ် မ့ၢ်ဒၣ်​န​မၤ​ဟးဂီၤ​ကွံာ်​န​သူးသ့ၣ်​လၤကပီၤ​လၢ အလုၢ်​ဒိၣ်​ပှ့ၤဒိၣ်​န့ၣ်​လီၤ. (ရိမ့ၤ ၁:၂၄) န​သူးသ့ၣ်​လၤကပီၤ​န့ၣ် အလုၢ်​အ​ပှ့ၤဒိၣ်​ဝဲ​ဒိၣ်မး​အဃိ တ​ကြၢး​လၢ​န​မၤ​ဟးဂီၤ​အီၤ လၢ​ကျဲဒ်အံၤ​ဘၣ်.

န​မ့ၢ် “ဟးဆှဲး​တၢ်မၤ​ကမၣ်မုၣ်​ကမၣ်ခွါ” န့ၣ်, မ့ၢ်​န​ပာ်ဖျါ​ထီၣ်​လၢ န​ဂုာ်ကျဲးစၢး​ပၢၤဃာ်​ဝဲ လုၢ်လၢ်​သကဲာ်ပဝး​လၢ​အဂ့ၤ​န့ၣ်​လီၤ. (၁ သ့းစၤလနံ ၄:၃) ခါဆူညါ​န​မ့ၢ်​ဖျီ​န​သး​န့ၣ် န​မံဃုာ် ဒီး​န​သးသမူ​တံၤသကိး​သ့ဝဲ​လီၤ. ဒီး​ဖဲ​န့ၣ်​အဆၢ​ကတီၢ် န​က​ပှဲၤ​ဒီး​တၢ်​သူၣ်မံ​သးမံ​လီၤ. ဒီး​န​တ​တူၢ်ဘၣ်​တၢ်သူၣ်အုး​သးအုး ဒီး​တၢ်​သူၣ်ကိၢ်​သးဂီၤ​လၢ ဟဲကဲထီၣ်​အသး​ခီဖျိ တၢ်မံဃုာ်​လၢ တချုး​ဖျီအသး​အဃိ​ဘၣ်.​—ကတိၤဒိ ၇:၂၂, ၂၃; ၁ ကရံၣ်သူး ၇:၃.

• ပှၤလၢ​အ​အဲၣ်​နၤ​နီၢ်ကီၢ်​န့ၣ် မ့ၢ်​အဝဲ​က​အဲၣ်ဒိး​မၤတၢ်​လၢ အ​မၤဘၣ်ဒိ​န​သး​ဒီး​န​နီၢ်ခိ​ဧါ.

• ပှၤလၢ​အသး​အိၣ်​နၤ​သပှၢ်​ကတၢၢ်​န့ၣ် မ့ၢ်​အဝဲ​က​လ့ပစီ​နၤ​လၢ န​က​မၤတၢ်​လၢ​က​မၤဘၣ်ဒိ န​တၢ်​ရ့လိာ်သး​ဒီး​ကစၢ်​ယွၤ​ဧါ.​—ဧ့ၤဘြံၤ ၁၃:၄.