အဆၢဒိၣ် ၁၅
မုာ်လၤတၢ်ဂ့ၤလၢ နတၢ်မၤအပူၤတက့ၢ်
“ပှၤကညီကိးဂၤဒဲး . . . မုာ်လၤတၢ်ဂ့ၤလၢ အမၤတၢ်ခဲလၢာ်အပူၤ”သ့လီၤ.—စံၣ်တဲၤတဲလီၤ ၃:၁၃.
၁-၃. (က) ပှၤအါဂၤအိၣ်ဒီး တၢ်ပာ်သူၣ်ပာ်သးလၢ အဝဲသ့ၣ်အတၢ်မၤအဖီခိၣ်ဒ်လဲၣ်. (ခ) လံာ်စီဆှံဆီၣ်ထွဲဝဲလၢ ပကအိၣ်ဒီး တၢ်ထံၣ်မနုၤလၢ တၢ်မၤအဖီခိၣ်လဲၣ်. ဒီးလၢအဆၢဒိၣ်အံၤအပူၤ ပကသမံသမိးကွၢ် တၢ်သံကွၢ်မနုၤတဖၣ်လဲၣ်.
မုၢ်မဆါ တနံၤအံၤ, ပှၤအါဂၤအဂီၢ် တၢ်ဖံးတၢ်မၤန့ၣ် တမ့ၢ်တၢ်လၢ အမၤသးခုပှၤလၢၤဘၣ်. လီၤဆီဒၣ်တၢ် တၢ်မၤလၢ တအဲၣ်ဒိးမၤဝဲန့ၣ် ဘၣ်မၤဝဲ ဒီနံၤအဃိ အဝဲသ့ၣ်တအဲၣ်ဒိးလဲၤတၢ်မၤလၢၤဘၣ်. ပှၤလၢအိၣ်ဒီးတၢ်ပာ်သူၣ်ပာ်သးဒ်သိးအံၤန့ၣ် ကထံၣ်န့ၢ် တၢ်သူၣ်မံသးမုာ် လၢအတၢ်မၤပူၤတကးဘၣ်, အသးစဲလၢအတၢ်မၤပူၤကသ့ဒ်လဲၣ်.
၂ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကအိၣ်ဒီး တၢ်ထံၣ်အဂ့ၤလၢ တၢ်ကျဲးစၢးမၤတၢ် အဖီခိၣ်လီၤ. တၢ်အံၤစံးဝဲလၢ တၢ်မၤဒီး တၢ်အံၤအဘျုးန့ၣ် မ့ၢ်တၢ်ဆိၣ်ဂ့ၤတမံၤလီၤ. ၡလိၤမိၤကွဲးဝဲလၢ “လၢပှၤကညီကိးဂၤဒဲး အီၣ်တၢ်, ဒီးအီတၢ်, ဒီးမုာ်လၤတၢ်ဂ့ၤလၢ အမၤတၢ်ခဲလၢာ်အပူၤန့ၣ်, မ့ၢ်ယွၤအတၢ်ဟ့ၣ်စ့ၢ်ကီးလီၤ.” (စံၣ်တဲၤတဲလီၤ ၃:၁၃) ယဟိဝၤ, ကစၢ်လၢအအဲၣ်ပှၤဒီး အဲၣ်ဒိးဟ့ၣ်ပှၤတၢ်အဂ့ၤထီဘိန့ၣ်, အဲၣ်ဒိးလၢ ပထံၣ်န့ၢ် တၢ်သူၣ်မံသးမုာ်လၢ ပတၢ်မၤအပူၤဒီး ထံၣ်န့ၢ်တၢ်သးခုလၢ ပတၢ်ဂုာ်ကျဲးစၢးအပူၤလီၤ. ပကအိၣ်ဂၢၢ်ဆိးကျၢၤလၢ ကစၢ်အတၢ်အဲၣ်အပူၤအဂီၢ်, လိၣ်လၢပကဘၣ် အိၣ်မူတၢ်အိၣ်မူလၢ လီၤပလိာ်ဒီး ကစၢ်အတၢ်ထံၣ် ဒီးကစၢ်အတၢ်သိၣ်တၢ်သီမိၢ်ပှၢ်လၢ ဘၣ်ဃးဒီးတၢ်ဖံးတၢ်မၤလီၤ.—စံၣ်တဲၤတဲလီၤ ၂:၂၄, ၅:၁၈.
၃ လၢအဆၢဒိၣ်အံၤအပူၤန့ၣ် ပကသမံသမိးကွၢ် တၢ်သံကွၢ်လွံၢ်မံၤလီၤ. ပမုာ်လၤတၢ်ဂ့ၤလၢ ပတၢ်ကျဲးစၢးမၤတၢ် အပူၤသ့ဒ်လဲၣ်. တၢ်မၤမနုၤတဖၣ်န့ၣ် တမ့ၢ်ခရံာ်ဖိနီၢ်နီၢ်တဖၣ်အဂီၢ်လဲၣ်. ဟီၣ်ခိၣ်အတၢ်မၤဒီး နီၢ်သးတၢ်ဖံးတၢ်မၤန့ၣ် ပမၤအီၤပှဲၤသိးသိးကသ့ဒ်လဲၣ်. ဒီးတၢ်မၤအကါဒိၣ်ကတၢၢ်လၢ ပမၤသ့န့ၣ် မ့ၢ်မနုၤလဲၣ်. အဆိကတၢၢ်, ပကသမံသမိးကွၢ်သကိး မူဟီၣ်ကယၢအပူၤ ပှၤမၤတၢ်ဒိၣ်ကတၢၢ်ခံဂၤ လၢအမ့ၢ် ယဟိဝၤယွၤဒီး ယ့ၣ်ၡူးခရံာ် အဒိအတဲာ်န့ၣ်တက့ၢ်.
ပှၤမၤတၢ်အဒိၣ်အထီကတၢၢ် ဒီး ပှၤမၤတၢ်သ့
၄, ၅. ယဟိဝၤမ့ၢ် ပှၤမၤတၢ်လၢ အကဲထီၣ်လိၣ်ထီၣ်တဂၤန့ၣ် လံာ်စီဆှံပာ်ဖျါဝဲဒ်လဲၣ်.
၄ ယဟိဝၤမ့ၢ် ပှၤမၤတၢ်အဒိၣ်အထီကတၢၢ်လီၤ. ၁ မိၤၡ့ ၁:၁ ပာ်ဖျါဝဲလၢ “လၢထံးလၢသီန့ၣ် ယွၤတ့လီၤ မူခိၣ်ဒီးဟီၣ်ခိၣ်လီၤ.” ဖဲယွၤမၤဝံၤအတၢ်ဘၣ်တ့တၢ်မၤ လၢအပာ်ဃုာ်ဒီးဟီၣ်ခိၣ်ဝံၤအခါ, အဝဲဘိးဘၣ်သ့ၣ်ညါဝဲလၢ “အဂ့ၤမးလီၤ.” (၁ မိၤၡ့ ၁:၃၁) ပမ့ၢ်စံးကဒီးတမံၤန့ၣ်, အဝဲသူၣ်မံသးမံနီၢ်နီၢ်လၢ အတၢ်မၤလၢ ဟီၣ်ခိၣ်ချၢကိးမံၤဒဲးလီၤ. ယဟိဝၤ, ‘ယွၤလၢအိၣ်ဒီးတၢ်သူၣ်ခုသးခု’ န့ၣ်, လီၢ်တံၢ်လၢ ကသးခုဝဲဒိၣ်မးလၢ အဝဲမ့ၢ် ပှၤမၤတၢ်လၢအကဲထီၣ်လိၣ်ထီၣ်တဂၤအဃိလီၤ.—၁ တံၤမသ့း ၁:၁၁, ဟသ.
၅ ပကစၢ်ယွၤလၢ အဖံးတၢ်မၤတၢ်ဆူၣ်န့ၣ် မၤတၢ်ထီဘိလီၤ. တၢ်တ့လီၤဟီၣ်ခိၣ်ဒီး တၢ်အိၣ်လၢအဖီခိၣ် ကိးမံၤဒဲးဝံၤ ပူၤကွံာ်အနံၣ်အါမးအလီၢ်ခံ, ယ့ၣ်ၡူးစံးဝဲလၢ “ယပၢ်မၤတၢ်တုၤခဲကနံၣ်အံၤ” လီၤ. (ယိၤဟၣ် ၅:၁၇) ပၢ်အံၤမၤတၢ်မနုၤတဖၣ်လဲၣ်. ကစၢ်အိၣ်ဆိးဝဲလၢ မူခိၣ်ဒီး နဲၣ်လိ ကဟုကယာ်ဝဲ ပှၤဟီၣ်ခိၣ်ဖိလီၤ. လၢခံန့ၣ် ကစၢ်မၤကဲထီၣ် “တၢ်ဘၣ်တ့အသီ”, ခရံာ်ဖိလၢ ဘၣ်တၢ်ဒိးဖှူအီၤတဖၣ်လၢ ကပၢဘၣ်တၢ်ဒီး ယ့ၣ်ၡူးလၢမူခိၣ်လီၤ. (၂ ကရံၣ်သူး ၅:၁၇) ကစၢ်အတၢ်မၤအါဝဲလၢ ကမၤလၢပှဲၤအတၢ်တိာ်လၢ ပှၤကညီလၢ အအဲၣ်အီၤတဖၣ် ကဒိးန့ၢ်ဘၣ်တၢ်မူအထူအယိာ်လၢ ဟီၣ်ခိၣ်သီအပူၤလီၤ. (ရိမ့ၤ ၆:၂၃) ယဟိဝၤသူၣ်မံသးမံလၢ အတၢ်မၤအဘျုးန့ၣ်လီၤ. ပှၤလၢအကကွဲၢ်တဖၣ် တူၢ်လိာ်ဘီမုၢ်တၢ်သးခုကစီၣ်ခီဖျိ ယွၤမိၤအီၤဒီး အဝဲသ့ၣ်မၤလဲလိာ်က့ၤအတၢ်အိၣ်မူလၢ ကအိၣ်ဂၢၢ်ဆိးကျၢၤလၢ ယွၤအတၢ်အဲၣ်အပူၤအဂီၢ်လီၤ.—ယိၤဟၣ် ၆:၄၄.
၆, ၇. လၢပူၤကွံာ်အနံၣ်အါမးလံၤလံၤ ယ့ၣ်ၡူးမ့ၢ် ပှၤကျဲးစၢးမၤတၢ်န့ၣ် တၢ်ကွဲးနီၣ်မနုၤအိၣ်လဲၣ်.
၆ လၢပူၤကွံာ်ယံာ်တ့ၢ်မးလံၤလံၤန့ၣ် ယ့ၣ်ၡူးဘၣ်တၢ်မၤနီၣ်ပာ်ဖျါအီၤလၢ ပှၤကျဲးစၢးမၤတၢ်တဂၤလီၤ. ယ့ၣ်ၡူးတချုးဟဲဆူ ဟီၣ်ခိၣ်အခါ အဝဲမၤတၢ်ဒ်ယွၤအ “ပှၤမၤတၢ်သ့” အသိးဖဲတၢ်တ့လီၤ “တၢ်အိၣ်လၢမူခိၣ်ဒီး တၢ်အိၣ်လၢဟီၣ်ခိၣ်” ကိးမံၤဒဲးန့ၣ်လီၤ. (ကတိၤဒိ ၈:၂၂- ၃၁; ကလီးစဲ ၁:၁၅- ၁၇) လၢဟီၣ်ခိၣ်ချၢစ့ၢ်ကီး ယ့ၣ်ၡူးမ့ၢ်ပှၤဂုာ်ကျဲးစၢးမၤတၢ်တဂၤလီၤ. လၢအသးစၢ်အခါ အဝဲမၤလိအသးလၢ တၢ်ဘှီတၢ်အတၢ်မၤဒီး ဘၣ်တၢ်သ့ၣ်ညါ ထီၣ်အီၤလၢ “ပှၤစုသ့” လီၤ. * (မၢ်ကူး ၆:၃) တၢ်ဘှီတၢ်အတၢ်မၤအံၤ ပာ်ဃုာ်ဒီး တၢ်မၤလၢာ်ဂံၢ်လၢာ်ဘါဒီး တၢ်စုသ့ခီၣ်သ့ အကလုာ်ကလုာ်လီၤ. လီၤဆီဒၣ်တၢ် ဖဲစိၤလၢနီၣ်ဘူးစဲးဖီကဟၣ်, ပှၤဘှီတၢ်အပီးအလီ ဒီးလီမ့ၣ်အူအပီးအလီ တအိၣ်အခါန့ၣ်လီၤ. ယ့ၣ်ၡူးအနီၢ်ကစၢ်ဒၣ်ဝဲ ကူာ်လီၤဝဲသ့ၣ်, ထုးဝဲသ့ၣ်ဝံၤ ဟဲက့ၤစိာ်ဝဲဆူ အတၢ်မၤလီၢ်န့ၣ် နထံၣ်မှံကသ့ဧါ. ကတဲာ်ကတီၤဒီး မၤထီၣ်ဝဲဟံၣ်ခိၣ်ကျိၤဘိ, မၤဝဲပဲတြီတဖၣ်ဒီး ဟံၣ်အပီးအလီတဖၣ်လၢ တၢ်ဘှီဟံၣ်အတၢ်မၤန့ၣ် နထံၣ်မှံအီၤကသ့ဧါ. လီၤတံၢ်လၢ ယ့ၣ်ၡူးကတူၢ်ဘၣ်ဝဲ တၢ်သူၣ်မံသးမုာ်လၢ အတၢ်ဂုာ်ကျဲးစၢးမၤတၢ်လၢ အအိၣ်ဒီးတၢ်စုသ့ခီၣ်သ့န့ၣ်လီၤ.
၇ ယ့ၣ်ၡူးမ့ၢ်ပှၤဂုာ်ကျဲးစၢး မၤတၢ်စဲၣ်နီၤလၢ တၢ်သးခုကစီၣ် တၢ်မၤအပူၤလီၤ. လၢသၢနံၣ်တခီအတီၢ်ပူၤ ကစၢ်အသးဆူၣ်လၢ တၢ်မၤလၢအကါဒိၣ်ဒိၣ်မးအံၤ အပူၤလီၤ. အဝဲအဲၣ်ဒိးလဲၤတုၤလၢ ပှၤအါမးအအိၣ်အဃိ တမၤလၢာ်ဂီၤတၢ်ဆၢကတီၢ်ဘၣ်ဒီး ဂဲၤထၢၣ်ဂီၤဂီၤဒီး မၤတၢ်တုၤလၢ မုၢ်နၤယိာ်န့ၣ်လီၤ. (လူၤကၣ် ၂၁:၃၇- ၃၈; ယိၤဟၣ် ၃:၂ ) “လဲၤစံၣ်တဲၤတဲလီၤယွၤအဘီအမုၢ် အတၢ်သးခုကစီၣ်လၢ ဝ့ၢ်ပူၤဒီးလၢသဝီပူၤ, တပူၤဘၣ်တပူၤကွ့ၢ်ကွ့ၢ်”လီၤ. (လူၤကၣ် ၈:၁) ယ့ၣ်ၡူးလဲၤတၢ် လၢအခီၣ်, ကျဲလၢဖၣ်ဆါကျါ, အမံးလးလၢအကယၤဒီး စံၣ်တဲၤတဲလီၤပှၤလၢ ဘီမုၢ်တၢ်သးခုကစီၣ်လီၤ.
၈, ၉. ယ့ၣ်ၡူးမုာ်လၤတၢ်ဂ့ၤလၢ အတၢ်ကျဲးစၢးမၤတၢ်အပူၤ ဒ်လဲၣ်.
၈ လၢတၢ်သးခုကစီၣ်အတၢ်မၤအပူၤ ယ့ၣ်ၡူးမုာ်လၤဝဲလၢ အတၢ်ဂုာ်ကျဲးစၢးအဃိ ကစီဒီဧါ. မုာ်လၤဝဲလီၤ. မ့ၢ်လၢကစၢ် ဖှံလီၤတ့ၢ်ဝဲဘီမုၢ် တၢ်မ့ၢ်တၢ်တီ အချံတဖၣ်န့ၣ် အိၣ်တ့ၢ်လၢ စံာ်ပျီပူၤဒီး ခဲအံၤဂီၤထီၣ်လၢ တၢ်ကကူးအီၤအဂီၢ်န့ၣ်လီၤ. ယ့ၣ်ၡူးဒိးန့ၢ်ဘၣ် တၢ်ဂံၢ်တၢ်ဘါအါမး လၢတၢ်မၤယွၤအတၢ်မၤအဃိ အဝဲအသးအိၣ်ပာ်တ့ၢ်ဝဲ တၢ်အီၣ်လၢ ကမၤဝံၤမၤကဲယွၤ အတၢ်မၤအဂီၢ်န့ၣ်လီၤ. (ယိၤဟၣ် ၄:၃၁-၃၈) ဆိကမိၣ်ကွၢ် ဘၣ်ဃးတၢ်သူၣ်မံသးမုာ်လၢ ယ့ၣ်ၡူးဒိးန့ၢ်ဖဲ ဟီၣ်ခိၣ်တၢ်စံၣ်တဲၤတဲလီၤ တၢ်မၤဝံၤဝဲအခါ ကစၢ်စံးဝဲအပၢ် တီတီလၢ “ယလီၣ်ဖျါလံနလၤနကပီၤ လၢဟီၣ်ခိၣ်ချၢလံ. တၢ်မၤလၢနဟ့ၣ်ယၤလၢ ယကမၤန့ၣ် ယမၤဝံၤလံ.”—ယိၤဟၣ် ၁၇:၄.
၉ နီၢ်နီၢ်, ပှၤလၢမုာ်လၤတၢ်ဂ့ၤလၢ တၢ်ဖံးတၢ်မၤ အတၢ်ကျဲးစၢးအကျါ, ယဟိဝၤဒီး ယ့ၣ်ၡူးမ့ၢ်ဒိတဲာ်လၢအဂ့ၤကတၢၢ်လီၤ. ပတၢ်အဲၣ်ယဟိဝၤန့ၣ် ထိၣ်ဂဲၤထီၣ်ပှၤလၢ ပက“ကွၢ်လိယွၤ”လီၤ. (အ့းဖ့းစူး ၅:၁) ပတၢ်အဲၣ်ယ့ၣ်ၡူးန့ၣ် မၢဆူၣ်ပှၤလၢ ပက“ယီၢ်အခီၣ်လီၢ်န့ၣ်လီၤ.” (၁ ပ့းတရူး ၂:၂၁) လၢတၢ်န့ၣ်အဃိ, ခဲအံၤပကသမံသမိးကွၢ် ပဝဲစ့ၢ်ကီး ပမုာ်လၤလၢ ပတၢ်ဂုာ်ကျဲးစၢးအပူၤ ကသ့ဒ်လဲၣ်.
ပမုာ်လၤတၢ်ဂ့ၤလၢ ပတၢ်ကျဲးစၢးမၤတၢ်အပူၤအဂ့ၢ်
တၢ်မၤထွဲလံာ်စီဆှံတၢ်သိၣ်တၢ်သီမိၢ်ပှၢ်န့ၣ် မၤစၢၤနၤလၢ နကမုာ်လၤတၢ်ဂ့ၤလၢ နတၢ်ကျဲးစၢးအပူၤ
၁၀, ၁၁. ပကမၤဒိၣ်ထီၣ်ထီထီၣ် တၢ်ပာ်သူၣ်ပာ်သးလၢအဂ့ၤ လၢပတၢ်မၤအဖီခိၣ်အဂီၢ် တၢ်မနုၤမၤစၢၤပှၤသ့လဲၣ်.
၁၀ ခရံာ်ဖိနီၢ်နီၢ်တဖၣ် အတၢ်အိၣ်မူန့ၣ် ပာ်ဃုာ်ဒီးတၢ်လုၢ်အီၣ်သးသမူတၢ်မၤလီၤ. ပအဲၣ်ဒိးထံၣ်န့ၢ် တၢ်သူၣ်မံသးမံဒီး တၢ်သူၣ်ခုသးခု ဖဲအကြၢးလၢ ပတၢ်မၤပူၤလီၤ. ဘၣ်ဆၣ်, တၢ်အံၤမ့ၢ် တၢ်ကီတၢ်ခဲနီၢ်နီၢ် တမံၤဖဲ ပမ့ၢ်ဘၣ်မၤ ဟီၣ်ခိၣ်တၢ်မၤလၢ ပတအဲၣ်ဒိးမၤန့ၣ်လီၤ. လၢတၢ်အိၣ်သးဒ်သိးအံၤ အဖီလာ်န့ၣ် ပမုာ်လၤတၢ်ဂ့ၤလၢ ပတၢ်ကျဲးစၢးမၤတၢ်အပူၤ ကသ့ဒ်လဲၣ်.
၁၁ ခီဖျိပအိၣ်ဒီး တၢ်ပာ်သူၣ်ပာ်သးလၢ အဂ့ၤလီၤ. ပလဲလိာ်ပတၢ်အိၣ်သး တန့ၢ်ဘၣ်ဆၣ် ပလဲလိာ်ပတၢ်ပာ်သူၣ်ပာ်သးသ့လီၤ. တၢ်ဆိကမိၣ်ယိာ်ယိာ် ယဟိဝၤအတၢ်ထံၣ်န့ၣ် မၤစၢၤပှၤလၢ ပကအိၣ်ဒီးတၢ်ပာ်သူၣ်ပာ်သးအဂ့ၤလၢ တၢ်မၤအဖီခိၣ်လီၤ. အဒိ, နမ့မ့ၢ် ဟံၣ်ခိၣ်တဂၤန့ၣ်, ဆိကမိၣ်တၢ်ဂ့ၢ်လၢ နတၢ်မၤအံၤ မ့ၢ်လီၤဂာ်လၢ အလၤကပီၤတအိၣ်သနာ်က့, မၤပှဲၤနဟံၣ်ဖိဃီဖိ အတၢ်လိၣ်ဘၣ်တဖၣ်န့ၢ်န့ၣ်တက့ၢ်. နတၢ်အံးထွဲကွၢ်ထွဲ ပှၤလၢနအဲၣ်ဘၣ်အီၤတဖၣ်န့ၣ် မ့ၢ်တၢ်အဒိၣ်အမုၢ်လၢ ယွၤအမဲာ်ညါလီၤ. ကစၢ်အကလုၢ်ကထါစံးဝဲလၢ ပှၤလၢတလုၢ်အီၣ် အဟံၣ်ဖိဃီဖိန့ၣ် “အၢန့ၢ်ပှၤတနာ်ဘၣ်တၢ်တက့ၢ်လီၤ.” (၁ တံၤမသ့း ၅:၈) လၢတၢ်န့ၣ်အဃိ, နတၢ်မၤန့ၣ် မၤလၢပှဲၤ မူဒါအကါဒိၣ်လၢ ယွၤဟ့ၣ်နၤလီၤ. တၢ်သ့ၣ်ညါနၢ်ပၢၢ် တၢ်အံၤန့ၣ် မၤစၢၤနၤလၢ နကထံၣ်န့ၢ် တၢ်သူၣ်မံသးမုာ် ဒီးတၢ်ပညိၣ်လၢ ပှၤမၤတၢ်ဒီးနၤတဖၣ် တဒိးန့ၢ်ဘၣ်ဝဲန့ၣ်လီၤ.
၁၂. တၢ်မၤတၢ်ဆူၣ်ဆူၣ်ဒီး တီတီလိၤလိၤန့ၣ် အဘျုးအိၣ်လၢကျဲဒ်လဲၣ်တဖၣ်လဲၣ်.
၁၂ ခီဖျိတၢ်မၤတၢ်ဆူၣ်ဆူၣ် ဒီးတီတီလိၤလိၤလီၤ. တၢ်ဂုာ်ကျဲးစၢးမၤတၢ်ဒီး တၢ်မၤလိဒ်သိး မၤတၢ်ကသ့ဂ့ၤဂ့ၤန့ၣ် ဒုးအိၣ်ထီၣ်တၢ်ဆိၣ်ဂ့ၤလီၤ. ပှၤလၢဂုာ်ကျဲးစၢးမၤတၢ်, ဒီးမၤတၢ်သ့ဂ့ၤဂ့ၤတဖၣ်န့ၣ် အတၢ်မၤကစၢ် ပာ်လုၢ်ပာ်ပှ့ၤအီၤလီၤ. (ကတိၤဒိ ၁၂:၂၄; ၂၂:၂၉) ဒ်ခရံာ်ဖိနီၢ်နီၢ်တဖၣ်အသိး, ပကဘၣ်တီလိၤစ့ၢ်ကီးလၢ ပတၢ်မၤပူၤလီၤ. ပတဟုၣ်တိၢ်, ဟုၣ်တၢ်အပီးအလီ, မ့တမ့ၢ် ဟုၣ်တၢ်ဆၢကတီၢ်လၢ တၢ်မၤကစၢ်အအိၣ်ဘၣ်. (အ့းဖ့းစူး ၄:၂၈) ဒ်ပထံၣ်ဘၣ်လၢ အဆၢဒိၣ်လၢညါအသိး, တၢ်တီလိၤန့ၣ် မ့ၢ်တၢ်ဘျုးတၢ်ဖှိၣ်လီၤ. ပှၤမၤတၢ်ဖိတဂၤလၢ အိၣ်ဒီးမံၤဂ့ၤသၣ်ဂ့ၤလၢ တီလိၤန့ၣ် ပှၤနာ်န့ၢ်အီၤလီၤ. ပမ့ၢ်ပှၤဂုာ်ကျဲးစၢးမၤတၢ်န့ၣ် ပတၢ်မၤကစၢ် မ့ၢ်ပာ်အသးဂ့ၤ တပာ်အသးဂ့ၤ, ပဒိးန့ၢ်ဘၣ်တၢ်သူၣ်မံသးမုာ်လၢ ပအိၣ်ဒီး “ပသးသ့ၣ်ညါဒၣ်တၢ်အဂ့ၤ” ဒီးပသ့ၣ်ညါလၢ ပမၤမုာ်ယွၤလၢပအဲၣ်အီၤအသးလီၤ.—ဧ့ၤဘြံၤ ၁၃:၁၈; ကလီးစဲ ၃:၂၂-၂၄.
၁၃. ပဒိဂ့ၤတဲာ်ဘၣ်လၢ တၢ်မၤလီၢ်ပူၤန့ၣ် ဒုးအိၣ်ထီၣ် တၢ်အဘျုးမနုၤတဖၣ်လဲၣ်.
၁၃ ခီဖျိတၢ်သ့ၣ်ညါနီၣ်လၢ ပသကဲာ်ပဝး မၤလၤကပီၤယွၤလီၤ. ဖဲပပၢၤဃာ် ခရံာ်ဖိသကဲာ်ပဝးအဂ့ၤလၢ ပတၢ်မၤလီၢ်အခါ, ပှၤအဂၤတဖၣ် ပာ်သူၣ်ပာ်သးဝဲ တၢ်အံၤသပှၢ်တၢၢ်လီၤ. အဘျုးအိၣ်မနုၤလဲၣ်. မ့ၢ်လၢ ပမၤ “ကယၢကယဲတၢ်အုၣ်က့ၤခီၣ်က့ၤပှၤ, ယွၤအတၢ်သိၣ်တၢ်သီ” လီၤ. (တံတူး ၂:၉, ၁၀) မ့ၢ်လီၤ, ပသကဲာ်ပဝးလၢအဂ့ၤန့ၣ် မၤတၢ်သ့လၢ ပှၤဂၤကထံၣ်ဘၣ် ပတၢ်ဘူၣ်ထီၣ်ဘါထီၣ်အတၢ်ဃံတၢ်လၤ, ဒီးထုးန့ၢ်အဝဲသ့ၣ်ဒိၣ်မးလီၤ. ခီဖျိနဒိဂ့ၤတဲာ်ဘၣ်လၢ တၢ်မၤလီၢ်ပူၤအဃိ, ပှၤမၤသကိးတၢ်ဒီး နၤတဂၤ မ့ၢ်တူၢ်လိာ်လံာ်စီဆှံတၢ်မ့ၢ်တၢ်တီဒီး နသးကမၤသးဒ်လဲၣ်န့ၣ် ဆိကမိၣ်ကွၢ်တက့ၢ်. အကါဒိၣ်ကတၢၢ်, ဆိကမိၣ်ကွၢ်တၢ်အံၤတက့ၢ်. တၢ်ကမၤမံသူၣ်မံသးနၤ အါန့ၢ်ဒံး တၢ်သ့ၣ်ညါပာ်လၢ နသကဲာ်ပဝးအဂ့ၤ မၤလၤကပီၤယဟိဝၤဒီး မၤခုကစၢ်အသးန့ၣ် ကအိၣ်ဒံးဧါ.—ကတိၤဒိ ၂၇:၁၁; ၁ ပ့းတရူး ၂:၁၂.
တၢ်သူတၢ်ကူၣ်ဘၣ်ဖးသ့ လၢပဃုထၢ တၢ်ဖံးတၢ်မၤအပူၤ
၁၄-၁၆. ဖဲပကွၢ်ဆၢၣ်မဲာ်တၢ်ပာ်လီၤသး ဘၣ်ဃးတၢ်ဖံးတၢ်မၤအခါ, လိၣ်လၢ ပကဘၣ်ဆိကမိၣ် တၢ်သံကွၢ်အကါဒိၣ်မနုၤတဖၣ်လဲၣ်.
၁၄ ဘၣ်ဃးဒီးဟီၣ်ခိၣ်တၢ်မၤမနုၤန့ၣ် ပတူၢ်လိာ်သ့ဒီး တၢ်မၤမနုၤန့ၣ်ပတူၢ်လိာ်တသ့န့ၣ် လံာ်စီဆှံ တပာ်ဖျါဝဲလီၤတံၢ်လီၤဆဲးဘၣ်. တၢ်အံၤအခီပညီတမ့ၢ်လၢ တၢ်မၤမနုၤဂ့ၤဂ့ၤ ပတူၢ်လိာ်အီၤသ့ဘၣ်. လံာ်စီဆှံမၤစၢၤပှၤလၢ ပကဃုထၢတၢ်မၤလၢ အဘျုးအိၣ်ဒီး တီလိၤလၢ ယွၤဘၣ်သူၣ်ဘၣ်သးသ့အသိး ပကဟးဆှဲးတၢ်မၤလၢ တဘၣ်ကစၢ်အသးအဂီၢ် မၤစၢၤပှၤသ့လီၤ. (ကတိၤဒိ ၂:၆) ဖဲပကွၢ်ဆၢၣ်မဲာ်ဘၣ်ဒီး တၢ်ပာ်လီၤသးဘၣ်ဃး တၢ်ဖံးတၢ်မၤအခါ, ပကဘၣ်ဆိကမိၣ် တၢ်သံကွၢ်အကါဒိၣ် အိၣ်ဝဲခံမံၤလီၤ.
၁၅ မ့ၢ်မၤတၢ်မၤအံၤန့ၣ် လီၤဂာ်လၢ ပမၤတၢ်လၢ လံာ်စီဆှံတြီဝဲဒၣ်န့ၣ်ဧါ. လံာ်စီဆှံ တြီဝဲ တၢ်ဟုၣ်တၢ်, တၢ်လီတၢ်, ဒီးတၢ်မၤတၢ်ဂီၤတၢ်ဖီၣ်တဖၣ်လီၤ. (၂ မိၤၡ့ ၂၀:၄; မၤတၢ် ၁၅:၂၉; အ့းဖ့းစူး ၄:၂၈; လီၣ်ဖျါ ၂၁:၈) ပကဘၣ်ဂ့ၢ်လိာ် တၢ်မၤမနုၤဂ့ၤဂ့ၤလၢ အပာ်ဃုာ်ဒီး တၢ်ဒ်သိးန့ၣ်တဖၣ်လီၤ. ပတၢ်အဲၣ်ယဟိဝၤ တဟ့ၣ်အခွဲးလ့ၤတက့ၤလၢ ပကတူၢ်လိာ် တၢ်မၤတမံၤလၢ အပာ်ဃုာ်ဒီး လုၢ်လၢ်လၢ အလုၢ်သ့ၣ်ခါပတာ် ယွၤအတၢ်မၤလိာ်တဖၣ်ဘၣ်.—၁ ယိၤဟၣ် ၅:၃.
၁၆ တၢ်မၤအံၤန့ၣ် ကဒုးကဲထီၣ်ပှၤလၢ ပှၤမၤသကိးတၢ်အၢ မ့တမ့ၢ် ပှၤဆီၣ်ထွဲ လုၢ်လၢ်အၢန့ၣ်ဧါ. ဆိကမိၣ်ကွၢ် တၢ်အဒိတမံၤတက့ၢ်. တၢ်တူၢ်လိာ်ခီၣ်ဆၢတၢ် အတၢ်မၤန့ၣ် တကမၣ်ဘၣ်. ဘၣ်ဆၣ်, ခရံာ်ဖိတဂၤ မ့ၢ်တူၢ်လိာ်ဝဲတၢ်မၤ ဒ်သိးအံၤဖဲ တၢ်မၤဟးဂီၤဟုးကသံၣ်ဒၢးတခီ ပကစံးဒ်လဲၣ်. နီၢ်နီၢ်, အဝဲအတၢ်မၤန့ၣ် တပာ်ဃုာ်လိၤလိၤလၢ တၢ်မၤဟးဂီၤဟုး အတၢ်မၤဘၣ်. ဘၣ်ဆၣ်, အဝဲမ့ၢ်မၤတၢ် ဘၣ်ဆၢဘၣ်ကတီၢ်လၢ တၢ်မၤဟးဂီၤဟုး ကသံၣ်ဒၢးအံၤန့ၣ် ဆီၣ်ထွဲဝဲ လုၢ်လၢ်လၢ ထီဒါလံာ်စီဆှံ တမ့ၢ်ဘၣ်ဧါ. (၂ မိၤၡ့ ၂၁:၂၂-၂၄) ဒ်ပှၤအဲၣ်ယဟိဝၤတဖၣ်အသိး ပတအဲၣ်ဒိး မၤဘၣ်ဃးပသး ဘူးဘူးတံၢ်တံၢ်ဒီး လုၢ်လၢ်လၢ တလီၤပလိာ်ဒီး လံာ်စီဆှံဘၣ်.
၁၇. (က) ဖဲပအိၣ်ဒီးတၢ်ပာ်လီၤသးဘၣ်ဃး တၢ်ဖံးတၢ်မၤအခါ ပကဘၣ်ဆိကမိၣ် တၢ်ဂ့ၢ်မနုၤလဲၣ်. (ကွၢ်တၢ်လွံၢ်နၢၣ်လၢ လံာ်ကဘျံး ၁၇၇ တက့ၢ်.) (ခ) ပကအိၣ်ဒီး တၢ်ပာ်လီၤသးလၢ အမၤခုယွၤအသးအဂီၢ် ပသးလၢအသ့ၣ်ညါဒၣ်တၢ် မၤစၢၤပှၤသ့ဒ်လဲၣ်.
၁၇ ဘၣ်ဃးဒီး တၢ်မၤအဂ့ၢ်အါမးန့ၣ် ပအိၣ်ဒီး တၢ်ပာ်လီၤသးကျၢၤကျၢၤသ့ခီဖျိ ပဃုထံၣ်သ့ၣ်ညါ လံာ်အဆၢ ၁၅ ဒီး ၁၆ အပူၤတၢ်သံကွၢ် အကါဒိၣ်ခံမံၤ အတၢ်စံးဆၢ လီၤတံၢ်လီၤဆဲးန့ၣ်လီၤ. အါန့ၢ်အန့ၣ်, တၢ်ဂ့ၢ်အဂၤအိၣ်တနီၤလၢ ပကြၢးဆိကမိၣ်အီၤ လီၤတံၢ်လီၤဆဲးဖဲ ပအိၣ်ဒီး တၢ်ပာ်လီၤသး ဘၣ်ဃးတၢ်ဖံးတၢ်မၤအခါန့ၣ်လီၤ. * ကုၢ်လၢအတီဒီး ကူၣ်တၢ်သ့ ကပာ်လီၤတၢ်ဘျၢလၢ ကနဲၣ်လိ တၢ်အိၣ်အသး ကိးမံၤဒဲးလၢ အဟဲပၢၢ်ထီၣ်န့ၣ် ပမုၢ်လၢ်တသ့ဘၣ်. ဖဲအံၤန့ၣ် လိၣ်လၢ ပကဘၣ်အိၣ်ဒီး တၢ်ကူၣ်ဘၣ်ဖးသ့လီၤ. ဒ်ပမၤလိတ့ၢ်လၢ အဆၢဒိၣ်၂ အသိး လိၣ်လၢ ပကဘၣ်သိၣ်လိ ပသးလၢအသ့ၣ်ညါဒၣ်တၢ် ခီဖျိ တၢ်မၤလိလၢ ပကဘၣ်မၤထွဲ ယွၤအကလုၢ်ကထါလၢ ပတၢ်အိၣ်မူကိးနံၤဒဲးအပူၤဒ်လဲၣ်န့ၣ်လီၤ. ပအိၣ် “ကတဲာ်ကတီၤတ့ၢ်လံ”ပသးခီဖျိပသူ “တၢ်ပဲာ်ဖးနီၤဖး” ဒီးသိၣ်လိ ပသးလၢအသ့ၣ်ညါဒၣ်တၢ်န့ၣ် မၤစၢၤပှၤလၢ ပကအိၣ်ဒီး တၢ်ပာ်လီၤသးလၢ အဘၣ်ယွၤအသးဒီး မၤစၢၤပှၤလၢ ပကအိၣ်ဂၢၢ်ဆိးကျၢၤလၢ ယွၤအတၢ်အဲၣ်အပူၤလီၤ.—ဧ့ၤဘြံၤ ၅:၁၄, ခစ.
တၢ်အိၣ်ဒီး တၢ်ပာ်သူၣ်ပာ်သး အကြၢးအဘၣ်လၢ တၢ်မၤအဖီခိၣ်
၁၈. တၢ်ပာ်လီၤသးလၢ မၤစၢၤပှၤလၢ ပကဒိးန့ၢ်ယဟိဝၤအတၢ်ကွၢ်မဲာ်န့ၣ် ဘၣ်မနုၤအဃိ တညီလဲၣ်.
၁၈ တၢ်ပာ်လီၤသးလၢ မၤစၢၤပှၤလၢ ပကဒိးန့ၢ် ယဟိဝၤ အတၢ်ကွၢ်မဲာ်န့ၣ် တညီဝဲလၢ “မုၢ်နံၤအခံကတၢၢ်,” “အဆၢအကတီၢ်လၢ အကီအခဲ” အံၤအပူၤဘၣ်. (၂ တံၤမသ့း ၃:၁) တၢ်ကဒိးန့ၢ်တၢ်မၤဒီး မၤဂၢၢ်မၤကျၢၤအီၤန့ၣ် ကီခဲနီၢ်နီၢ်လီၤ. ဒ်ခရံာ်ဖိနီၢ်နီၢ်တဖၣ်အသိး ပနၢ်ပၢၢ် တၢ်ဂုာ်ကျဲးစၢး မၤတၢ်လၢ တၢ်လုၢ်အီၣ် ဟံၣ်ဖိဃီဖိအဂီၢ်အံၤ အကါဒိၣ်အဂ့ၢ်န့ၣ်လီၤ. ဘၣ်ဆၣ်, ပမ့ၢ်တပာ်ပသးဘၣ်ဒီး တၢ်မၢဆူၣ်မၤဆူၣ်လၢ တၢ်မၤလီၢ်ပူၤ မ့တမ့ၢ် သးလၢတၢ်ပာ်ဒိၣ်ပာ်ကဲကျိာ်စ့လၢ အမ့ၢ် ဟီၣ်ခိၣ် အတၢ်ဘၣ်ကူဘၣ်ဂာ်န့ၣ် မၤတံာ်တာ် တၢ်လၢအဘၣ်ဃးဒီး ပနီၢ်သးတၢ်ဖံးတၢ်မၤလီၤ. (၁ တံးမသ့း ၆:၉, ၁၀) ပကသမံသမိးကွၢ်သကိး တၢ်ဂ့ၢ်လၢ ပအိၣ်ဒီး တၢ်ပာ်သူၣ်ပာ်သး အကြၢးအဘၣ်လၢ တၢ်မၤလီၤတံၢ် “တၢ်လီၤဆီတဖၣ်အဆၢ” သ့ဒ်လဲၣ်န့ၣ်လီၤ.—ဖံလံးပံၤ ၁:၁၀.
၁၉. ဘၣ်မနုၤအဃိ ယဟိဝၤကြၢးဒိးန့ၢ် ပတၢ်နာ်လၢလၢပှဲၤပှဲၤလဲၣ်. ဒီးတၢ်နာ်ဒ်သိးအံၤန့ၣ် မၤစၢၤပှၤလၢ ပကဟးဆှဲးတၢ်မနုၤလဲၣ်.
၁၉ နာ်ယဟိဝၤ လၢလၢပှဲၤပှဲၤတက့ၢ်. (ကတိၤဒိ ၃:၅, ၆) ကစၢ်တကြၢးဒိးန့ၢ်တၢ်နာ် ဒ်သိးန့ၣ်ဘၣ်ဧါ. အါန့ၢ်အန့ၣ်, ကစၢ်ကဟုကယာ်ပှၤလီၤ. (၁ ပ့းတရူး ၅:၇) ကစၢ်သ့ၣ်ညါ ပတၢ်လိၣ်ဘၣ်တဖၣ် အါန့ၢ်ဒံးပှၤဒီး အစုတဖုၣ် နီတဘျီဘၣ်. (စံးထီၣ်ပတြၢၤ ၃၇:၂၅) လၢတၢ်န့ၣ်အဃိ, ပကဘၣ်ဒိကနၣ် ကစၢ်အကလုၢ်ကထါ ဟ့ၣ်ပလီၢ်ပှၤလၢ “သုမၤတၢ်ဖံးတၢ်န့ၣ်, မ်အထူၣ်ဖျဲးဒီး တၢ်အဲၣ်ကျိၣ်ဧိၤစ့ဧိၤတက့ၢ်. ဖဲသုတၢ်အိၣ်တဖၣ်န့ၣ်, သူၣ်မံသးမံဒီးအီၤတက့ၢ်. အဂ့ၢ်ဒ်အံၤ[ယွၤ]စံးဝဲဒၣ် ‘ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်’”လီၤ. (ဧ့ၤဘြံၤ ၁၃:၅) ပှၤလၢအမၤ တၢ်သးခုကစီၣ် လၢလၢပှဲၤပှဲၤတဖၣ် အုၣ်အသးလၢ ကစၢ်ယွၤ မၤလၢပှဲၤ ပတၢ်အိၣ်မူ တၢ်လိၣ်ဘၣ်တဖၣ်သ့ဝဲလီၤ. ပမ့ၢ်နာ်နီၢ်နီၢ်လၢ ယဟိဝၤ အံးထွဲကွၢ်ထွဲပှၤန့ၣ် ပကဟးဆှဲး တၢ်ဘၣ်ယိၣ် တလၢကွံာ်အခၢးလၢ ဟံၣ်ဖိဃီဖိ အတၢ်လိၣ်ဘၣ်အဂီၢ်လီၤ. (မးသဲ ၆: ၂၅-၃၂) ပတဟ့ၣ်အခွဲးလၢ ဟီၣ်ခိၣ်အတၢ်မၤ ကဒုးကွၢ်ကပာ်ပှၤ နီၢ်သးအတၢ်ဖံးတၢ်မၤ ဒ်သိးဒီး တၢ်စံၣ်တဲၤတဲလီၤ တၢ်သးခုကစီၣ်, တၢ်ထီၣ် တၢ်အိၣ်ဖှိၣ်ဘၣ်.—မးသဲ ၂၄:၁၄; ဧ့ၤဘြံၤ ၁၀:၂၄, ၂၅.
၂၀. တၢ်ပာ်မဲာ်ချံယိယိဖိန့ၣ် အခီပညီမ့ၢ်မနုၤလဲၣ်. ဒီးတၢ်ထံၣ်ဒ်သိးအံၤန့ၣ် နပၢၤဃာ်ကသ့ဒ်လဲၣ်.
၂၀ ပာ်နမဲာ်ချံယိယိဖိတက့ၢ်. (မးသဲ ၆:၂၂, ၂၃) တၢ်ပာ်မဲာ်ချံယိယိဖိန့ၣ် အခီပညီမ့ၢ် တၢ်ပာ်ပတၢ်အိၣ်မူ ယိယိဖိလၢ တအိၣ်ဒီး တၢ်သဘံၣ်ဘူၣ်ဘၣ်လီၤ. ခရံာ်ဖိတဂၤ အမဲာ်ချံယိယိဖိန့ၣ် သးစဲထဲတၢ်တိာ်ထဲတမံၤဧိၤလၢ တၢ်ကမၤယွၤအတၢ်မၤလီၤ. ပမဲာ်ချံ မ့ၢ်သးစဲတၢ်လၢ အကြၢးအဘၣ်န့ၣ် တမ့ၢ်ပသးကအိၣ်စဲဘူးဒီးလူၤပိာ်ထွဲ တၢ်မၤလၢ အဘူးအလဲအါ, တၢ်အိၣ်မူလၢ ပာ်ဖျါတၢ်ဆှုၣ်ဆှုၣ်ဘှဲၣ်ဘှဲၣ် အခံဘၣ်. တၢ်ဟဲပၢၢ်ထီၣ်လၢခံကတၢၢ်ဒီး တၢ်သူတၢ်စွဲလၢ အဂ့ၤကတၢၢ်တဖၣ်လၢ ပှၤဒုးဟူထီၣ်သါလီၤတၢ်တဖၣ်စံးဝဲလၢ ပကအိၣ်ဒီး တၢ်သူၣ်ခုသးခုအဂီၢ် တၢ်တဖၣ်အံၤ လိၣ်ဝဲန့ၣ် တမ့ၢ်ပကဃုထီဘိဘၣ်. နပၢၤဃာ် မဲာ်ချံယိယိဖိကသ့ဒ်လဲၣ်. ဟးဆှဲးတၢ်ဒ့ၣ်ထီၣ်ကမၣ်ထီၣ်လၢ အလီၢ်တဘၣ်န့ၣ်တက့ၢ်. တၢ်အပီးအလီလၢ မၤလၢာ်ဂီၤ တၢ်ဆၢကတီၢ်ဒီး တၢ်သးစဲတလၢကွံာ်အခၢးန့ၣ် တဘၣ်ပာ်ဖှိၣ်အီၤတဂ့ၤ. ဒိကနၣ် လံာ်စီဆှံ အတၢ်ဟ့ၣ်ကူၣ်လၢ အိၣ်ဒီးတၢ်သူၣ်မံသးမံလၢ ‘တၢ်အီၣ်တၢ်အီ, ဒီးတၢ်ကူတၢ်သိး’ လၢအိၣ်ဒီးပှၤန့ၣ်တက့ၢ်. (၁ တံၤမသ့း ၆:၈) ပာ်နတၢ်အိၣ်မူ ယိယိဖိ တသ့ဖဲအသ့တက့ၢ်.
၂၁. ဘၣ်မနုၤအဃိ လိၣ်လၢပကဘၣ်ပာ်လီၤဃာ် တၢ်လၢပကဘၣ်မၤဆိတဖၣ်လဲၣ်. ဒီးလၢပတၢ်အိၣ်မူပူၤ ပကြၢးပာ်တၢ်မနုၤလၢညါလဲၣ်.
၂၁ မၤဆိတၢ်လၢဘၣ်ဃးဒီးနီၢ်သးဒီး ဟံးဃာ်ဂၢၢ်ကျၢၤအီၤတက့ၢ်. ပမၤတၢ်အါမးလၢ ပတၢ်အိၣ်မူပူၤတသ့ဘၣ်အဃိ လိၣ်လၢ ပဘၣ်ပာ်လီၤဃာ် တၢ်လၢ ပကဘၣ်မၤဆိတဖၣ်လီၤ. မ့တမ့ၢ်ဘၣ်ဒ်န့ၣ်ဒီး တၢ်လၢအကါတဒိၣ်တဖၣ်န့ၣ် ဟံးန့ၢ်တၢ်ဆၢကတီၢ် လုၢ်ဒိၣ်ပှ့ၤဒိၣ်အဃိ တၢ်ဆၢကတီၢ် တအိၣ်လၢၤလၢ တၢ်အကါဒိၣ်တဖၣ်အဂီၢ်လၢၤဘၣ်. လၢပတၢ်အိၣ်မူပူၤ ပကြၢးမၤဆိတၢ်မနုၤလဲၣ်. ပှၤအါဂၤန့ၣ် ပာ်ဒိၣ်ဝဲ တၢ်ကူၣ်ဘၣ်ကူၣ်သ့ လၢအပတီၢ်ထီ ဒ်သိးကဒိးန့ၢ်ဘၣ် တၢ်ဘျုးတၢ်ဖှိၣ်အါမး လၢဟီၣ်ခိၣ်အံၤလီၤ. ဘၣ်ဆၣ်, ယ့ၣ်ၡူးဆီၣ်ထွဲ ပှၤပိာ်အခံတဖၣ်လၢ “ဃုဆိယွၤအဘီအမုၢ် . . . တက့ၢ်” လီၤ. (မးသဲ ၆:၃၃) မ့ၢ်လီၤ. ဒ်ခရံာ်ဖိနီၢ်နီၢ်တဖၣ်အသိး, လၢပတၢ်အိၣ်မူပူၤ ပပာ်ယွၤအဘီအမုၢ်လၢညါလီၤ. ပတၢ်အိၣ်မူပူၤ တၢ်လၢပဃုထၢ, တၢ်တိာ်လၢပပာ်, ဒီးတၢ်လၢပမၤတဖၣ် ကြၢးပာ်ဖျါထီၣ်လၢ ဘီမုၢ်အတၢ်ဒိၣ်ထီၣ်ထီထီၣ်ဒီး ယွၤအတၢ်ဘၣ်သးန့ၣ် အကါဒိၣ်လၢ ပဂီၢ်အါန့ၢ်ဒံး နီၢ်ခိတၢ်လိၣ်ဘၣ်ဒီး ဟီၣ်ခိၣ်တၢ်ဖံးတၢ်မၤတဖၣ်လီၤ.
ကျဲးစၢးမၤတၢ်လၢ တၢ်သးခုကစီၣ်တၢ်မၤ
ပပာ်ဖျါပတၢ်အဲၣ်ယဟိဝၤခီဖျိ ပမၤဆိတၢ်စံၣ်တဲၤလီၤတၢ်မၤလၢ ပတၢ်အိၣ်မူပူၤ
၂၂, ၂၃. (က) ခရံာ်ဖိနီၢ်နီၢ်တဖၣ် အတၢ်မၤအကါဒိၣ် မ့ၢ်မနုၤလဲၣ်. ဒီးတၢ်မၤအံၤအကါဒိၣ်လၢ ပဂီၢ်န့ၣ်ပပာ်ဖျါထီၣ်သ့ဒ်လဲၣ်. (ကွၢ်တၢ်လွံၢ်နၢၣ်လၢ လံာ်ကဘျံး ၁၈၀ ပူၤတက့ၢ်.) (ခ) နတၢ်ပာ်လီၤသးလၢ ဘၣ်ဃးဒီးဟီၣ်ခိၣ်တၢ်မၤန့ၣ် မ့ၢ်မနုၤလဲၣ်.
၂၂ ပသ့ၣ်ညါပာ်လၢ ပအိၣ်မူဘၣ်လၢ တၢ်ဆၢကတီၢ်လၢခံ အကတၢၢ်ဘူးထီၣ်လံအဃိ ပကြၢးသးစဲ ခရံာ်ဖိနီၢ်နီၢ်တဖၣ် အတၢ်မၤအကါဒိၣ်လၢအမ့ၢ် တၢ်စံၣ်တဲၤတဲလီၤဒီး တၢ်ဒုးကဲထီၣ်ပျဲၢ်ဘီၣ်တၢ်မၤန့ၣ်လီၤ. (မးသဲ ၂၄:၁၄;၂၈:၁၉,၂၀) ဒ်ယ့ၣ်ၡူးမ့ၢ် ပှၤဒိဂ့ၤတဲာ်ဘၣ်လၢပဂီၢ်အသိး ပအဲၣ်ဒိးမၤတၢ်ဆူၣ်ဆူၣ်လၢ တၢ်မၤလၢ အုၣ်က့ၤခီၣ်က့ၤပှၤသးသမူလီၤ. တၢ်မၤအံၤ အကါဒိၣ်လၢ ပဂီၢ်န့ၣ် ပပာ်ဖျါကသ့ဒ်လဲၣ်. ယွၤအပှၤကလုာ်အါမးတဖၣ် ဟ့ၣ်လီၤအသးလၢ တၢ်စံၣ်တဲၤတဲလီၤတၢ်မၤအဂီၢ် လၢသးဒီဖျၢၣ် ဒ်တၢ်အိၣ်ဖှိၣ် ပှၤဘိးဘၣ်သ့ၣ်ညါတၢ်တဖၣ်လီၤ. တနီၤသုးကျဲၤဝဲလၢ ကမၤတၢ်ဒ် ပှၤလဲၤလၢညါ မ့တမ့ၢ် မံးၡ့ၣ်နရ့ၣ်အသိးလီၤ. နီၢ်သးအတၢ်တိာ်အကါဒိၣ်အဂ့ၢ်န့ၣ် မိၢ်ပၢ်တဖၣ် အၢၣ်လီၤတူၢ်လိာ်ဝဲအဃိ အဝဲသ့ၣ် ဆီၣ်ထွဲအဖိတဖၣ်လၢ ကမၤတၢ်သးခုကစီၣ်တၢ်မၤလၢ ဆၢကတီၢ်လၢလၢပှဲၤပှဲၤလီၤ. ပှၤဘိးဘၣ်သ့ၣ်ညါ ဘီမုၢ်တၢ်သးခုကစီၣ်လၢ တၢ်သးဆူၣ်တဖၣ်န့ၣ် မုာ်လၤတၢ်ဂ့ၤလၢ အတၢ်ဂုာ်ကျဲးစၢးလၢ တၢ်သးခုကစီၣ်တၢ်မၤပူၤကသ့ဧါ. မုာ်လၤဝဲသ့လီၤ. တၢ်မၤယဟိဝၤအတၢ်မၤလၢ သးဒီဖျၢၣ်န့ၣ် မ့ၢ်တၢ်အိၣ်မူ အကျဲနီၢ်နီၢ်လၢ ဟ့ၣ်ပှၤတၢ်သူၣ်ခုသးခု, တၢ်သူၣ်မံသးမုာ်ဒီး တၢ်ဆိၣ်ဂ့ၤလၢပဂံၢ်ထီၣ်ဒွးထီၣ် တလၢာ်န့ၣ်လီၤ.—ကတိၤဒိ ၁၀:၂၂.
၂၃ ပဝဲအါဂၤန့ၣ် ပကလုၢ်အီၣ် ဟံၣ်ဖိဃီဖိအတၢ်လိၣ်ဘၣ်အဂီၢ် ပဘၣ်မၤဟီၣ်ခိၣ်တၢ်မၤ လၢနၣ်ရံၣ်အါမးလီၤ. သ့ၣ်နီၣ်ထီၣ်လၢ ယဟိဝၤအဲၣ်ဒိး ပမုာ်လၤတၢ်ဂ့ၤလၢ ပကျဲးစၢးမၤတၢ်အပူၤတက့ၢ်. ဖဲပမၤလီၤပလိာ် ပတၢ်ပာ်သူၣ်ပာ်သးဒီး ပတၢ်ဖံးတၢ်မၤဒ် ကစၢ်အတၢ်ထံၣ်ဒီး အတၢ်သိၣ်တၢ်သီမိၢ်ပှၢ်အခါ, ပထံၣ်န့ၢ်တၢ်သူၣ်မံသးမုာ်လၢ ပတၢ်မၤအပူၤလီၤ. ဘၣ်ဆၣ်, ပကပာ်လီၤသကိးပသးလၢ ပတဟ့ၣ်အခွဲး လ့ၤတက့ၤလၢ ဟီၣ်ခိၣ်တၢ်မၤ ကထုးကွံာ်ပှၤလၢ ပတၢ်မၤအကါဒိၣ်လၢအမ့ၢ် တၢ်ဘိးဘၣ်သ့ၣ်ညါ ယွၤအဘီမုၢ်အတၢ်သးခုကစီၣ်န့ၣ်တက့ၢ်. လၢပတၢ်အိၣ်မူပူၤ ပမၤဆိတၢ်မၤအံၤ လၢညါအဃိ ပပာ်ဖျါ ပတၢ်အဲၣ်ယဟိဝၤဒီး ပကအိၣ်ဂၢၢ်ဆိးကျၢၤလၢ ကစၢ်အတၢ်အဲၣ်အပူၤလီၤ.
^ လံာ်အဆၢ. 6 ကြံးခ်တၢ်ကတိၤလၢ ဘၣ်တၢ်ကွဲးကျိးအီၤလၢ“တၢ်စုသ့”န့ၣ်မ့ၢ် “တၢ်ကတိၤထီရီၤလၢ ပှၤမၤသ့ၣ်တဂၤအဂီၢ်လၢ အဘှီဟံၣ်မ့တမ့ၢ် ဟံၣ်ဃီပီးလီမ့တမ့ၢ် တၢ်လၢဘၣ်တၢ်မၤလၢသ့ၣ် ကိးမံၤဒဲးန့ၣ်လီၤ.”
^ လံာ်အဆၢ. 17 တၢ်ကတိၤသကိး လီၤတံၢ်လီၤဆဲး လၢဘၣ်ဃး တၢ်ဖံးတၢ်မၤအဂ့ၢ်န့ၣ် ကွၢ် ကင်းမျှော်စင်၊ ၁၉၉၉ ဧပြီ ၁၅ ထုတ်၊ စာမျက်နှာ ၂၈-၃၀ နှင့် ၁၉၈၃ ဇူလိုင် ၁၅ ထုတ်၊ စာမျက်နှာ ၁၉-၂၀.
